໑໐. ທສມວຄ຺ໂຄ

(໙໘) ໔. ປຎ຺ຈວິຎ຺ຎາຓາ ກຸສລາປິ ອກຸສລາປີຕິກຖາ

໕໘໐. ປຎ຺ຈວິຎ຺ຎາຓາ ກຸສລາປິ ອກຸສລາປີຕິ? ອາມນ຺ຕາ. ນນຸ ປຎ຺ຈວິຎ຺ຎາຓາ ອຸປ຺ປນ຺ນວຕ຺ຖຸກາ ອຸປ຺ປນ຺ນາຣມ຺ມຓາຕິ? ອາມນ຺ຕາ. ຫຎ຺ຈິ ປຎ຺ຈວິຎ຺ຎາຓາ ອຸປ຺ປນ຺ນວຕ຺ຖຸກາ ອຸປ຺ປນ຺ນາຣມ຺ມຓາ, ໂນ ຈ ວຕ ເຣ ວຕ຺ຕພ຺ເພ – ‘‘ປຎ຺ຈວິຎ຺ຎາຓາ ກຸສລາປິ ອກຸສລາປີ’’ຕິ. ນນຸ ປຎ຺ຈວິຎ຺ຎາຓາ ປຸເຣຊາຕວຕ຺ຖຸກາ ປຸເຣຊາຕາຣມ຺ມຓາ ອຊ຺ຌຕ຺ຕິກວຕ຺ຖຸກາ ພາຫິຣາຣມ຺ມຓາ ອສມ຺ຠິນ຺ນວຕ຺ຖຸກາ ອສມ຺ຠິນ຺ນາຣມ຺ມຓາ ນານາວຕ຺ຖຸກາ ນານາຣມ຺ມຓາ ນ ອຎ຺ຎມຎ຺ຎສ຺ສ ໂຄຈຣວິສຍໍ ປຈ຺ຈນຸໂຠນ຺ຕິ, ນ ອສມນ຺ນາຫາຣາ ອຸປ຺ປຊ຺ຊນ຺ຕິ, ນ ອມນສິກາຣາ ອຸປ຺ປຊ຺ຊນ຺ຕິ, ນ ອພ຺ໂພກິຓ຺ຓາ ອຸປ຺ປຊ຺ຊນ຺ຕິ, ນ ອປຸພ຺ພໍ ອຈຣິມໍ ອຸປ຺ປຊ຺ຊນ຺ຕິ, ນ ອຎ຺ຎມຎ຺ຎສ຺ສ ສມນນ຺ຕຣາ ອຸປ຺ປຊ຺ຊນ຺ຕິ, ນນຸ ປຎ຺ຈວິຎ຺ຎາຓາ ອນາໂຠຄາຕິ? ອາມນ຺ຕາ. ຫຎ຺ຈິ ປຎ຺ຈວິຎ຺ຎາຓາ ອນາໂຠຄາ, ໂນ ຈ ວຕ ເຣ ວຕ຺ຕພ຺ເພ – ‘‘ປຎ຺ຈວິຎ຺ຎາຓາ ກຸສລາປິ ອກຸສລາປີ’’ຕິ.

໕໘໑. ຈກ຺ຂຸວິຎ຺ຎາຓໍ ກຸສລນ຺ຕິ? ອາມນ຺ຕາ. ຈກ຺ຂຸວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ຈກ຺ຂຸວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓນ຺ຕິ? ນ ເຫວໍ ວຕ຺ຕພ຺ເພ. ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓນ຺ຕິ? ອາມນ຺ຕາ. ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ – ອຕ຺ເຖວ ສຸຕ຺ຕນ຺ໂຕຕິ? ນຕ຺ຖິ. ‘‘ຈກ຺ຂຸຎ຺ຈ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ – ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ຫຎ຺ຈິ ‘‘ຈກ຺ຂຸຎ຺ຈ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ – ອຕ຺ເຖວ ສຸຕ຺ຕນ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ.

໕໘໒. ຈກ຺ຂຸວິຎ຺ຎາຓໍ ກຸສລມ຺ປິ ອກຸສລມ຺ປີຕິ? ອາມນ຺ຕາ. ຈກ຺ຂຸວິຎ຺ຎາຓໍ ອຕີຕານາຄຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ…. ຈກ຺ຂຸວິຎ຺ຎາຓໍ ກຸສລມ຺ປິ ອກຸສລມ຺ປີຕິ? ອາມນ຺ຕາ. ຈກ຺ຂຸວິຎ຺ຎາຓໍ ຜສ຺ສໍ ອາຣພ຺ຠ…ເປ… ຈິຕ຺ຕໍ ອາຣພ຺ຠ… ຈກ຺ຂຸໍ ອາຣພ຺ຠ…ເປ… ກາຍໍ ອາຣພ຺ຠ… ສທ຺ທໍ ອາຣພ຺ຠ…ເປ… ໂຜຏ຺ຐພ຺ພໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ….

ມໂນວິຎ຺ຎາຓໍ ກຸສລມ຺ປິ ອກຸສລມ຺ປິ, ມໂນວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸວິຎ຺ຎາຓໍ ກຸສລມ຺ປິ ອກຸສລມ຺ປິ, ຈກ຺ຂຸວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ມໂນວິຎ຺ຎາຓໍ ກຸສລມ຺ປິ ອກຸສລມ຺ປິ, ມໂນວິຎ຺ຎາຓໍ ອຕີຕານາຄຕໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸວິຎ຺ຎາຓໍ ກຸສລມ຺ປິ ອກຸສລມ຺ປິ, ຈກ຺ຂຸວິຎ຺ຎາຓໍ ອຕີຕານາຄຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ມໂນວິຎ຺ຎາຓໍ ກຸສລມ຺ປິ ອກຸສລມ຺ປິ, ມໂນວິຎ຺ຎາຓໍ ຜສ຺ສໍ ອາຣພ຺ຠ…ເປ… ຈິຕ຺ຕໍ ອາຣພ຺ຠ…ເປ… ກາຍໍ ອາຣພ຺ຠ … ສທ຺ທໍ ອາຣພ຺ຠ …ເປ… ໂຜຏ຺ຐພ຺ພໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸວິຎ຺ຎາຓໍ ກຸສລມ຺ປິ ອກຸສລມ຺ປິ, ຈກ຺ຂຸວິຎ຺ຎາຓໍ ຜສ຺ສໍ ອາຣພ຺ຠ…ເປ… ໂຜຏ຺ຐພ຺ພໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ….

໕໘໓. ນ ວຕ຺ຕພ຺ພໍ – ‘‘ປຎ຺ຈວິຎ຺ຎາຓາ ກຸສລາປິ ອກຸສລາປີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ອິຘ, ຠິກ຺ຂເວ, ຠິກ຺ຂຸ ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕິ…ເປ… ນ ນິມິຕ຺ຕຄ຺ຄາຫີ ໂຫຕິ…ເປ… ໂສເຕນ ສທ຺ທໍ ສຸຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ ນິມິຕ຺ຕຄ຺ຄາຫີ ໂຫຕິ…ເປ… ນ ນິມິຕ຺ຕຄ຺ຄາຫີ ໂຫຕີ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ປຎ຺ຈວິຎ຺ຎາຓາ ກຸສລາປິ ອກຸສລາປີຕິ.

ປຎ຺ຈວິຎ຺ຎາຓາ ກຸສລາປິ ອກຸສລາປີຕິກຖາ ນິຏ຺ຐິຕາ.