໗. ສຕ຺ຕມວຄ຺ໂຄ

(໖໘) ໖. ອິໂຕທິນ຺ນກຖາ

໔໘໘. ອິໂຕ ທິນ຺ເນນ ຕຕ຺ຖ ຍາເປນ຺ຕີຕິ? ອາມນ຺ຕາ. ອິໂຕ ຈີວຣໍ ເທນ຺ຕິ ຕໍ ຈີວຣໍ ຕຕ຺ຖ ປຣິຠຸຎ຺ຊນ຺ຕີຕິ? ນ ເຫວໍ ວຕ຺ຕພ຺ເພ…ເປ… ອິໂຕ ປິຓ຺ຑປາຕໍ ເທນ຺ຕິ, ອິໂຕ ເສນາສນໍ ເທນ຺ຕິ, ອິໂຕ ຄິລານປຈ຺ຈຍເຠສຊ຺ຊປຣິກ຺ຂາຣໍ ເທນ຺ຕິ, ອິໂຕ ຂາທນີຍໍ ເທນ຺ຕິ, ອິໂຕ ໂຠຊນີຍໍ ເທນ຺ຕິ, ອິໂຕ ປານີຍໍ ເທນ຺ຕິ; ຕໍ ປານີຍໍ ຕຕ຺ຖ ປຣິຠຸຎ຺ຊນ຺ຕີຕິ? ນ ເຫວໍ ວຕ຺ຕພ຺ເພ…ເປ….

ອິໂຕ ທິນ຺ເນນ ຕຕ຺ຖ ຍາເປນ຺ຕີຕິ? ອາມນ຺ຕາ. ອຎ຺ໂຎ ອຎ຺ຎສ຺ສ ກາຣໂກ ປຣກຕໍ ສຸຂທຸກ຺ຂໍ ອຎ຺ໂຎ ກໂຣຕິ, ອຎ຺ໂຎ ປຏິສໍເວເທຕີຕິ? ນ ເຫວໍ ວຕ຺ຕພ຺ເພ…ເປ….

໔໘໙. ນ ວຕ຺ຕພ຺ພໍ – ‘‘ອິໂຕ ທິນ຺ເນນ ຕຕ຺ຖ ຍາເປນ຺ຕີ’’ຕິ? ອາມນ຺ຕາ. ນນຸ ເປຕາ ອຕ຺ຕໂນ ອຕ຺ຖາຍ ທານໍ ເທນ຺ຕໍ ອນຸໂມເທນ຺ຕິ, ຈິຕ຺ຕໍ ປສາເທນ຺ຕິ, ປີຕິໍ ອຸປ຺ປາເທນ຺ຕິ, ໂສມນສ຺ສໍ ປຏິລຠນ຺ຕີຕິ? ອາມນ຺ຕາ. ຫຎ຺ຈິ ເປຕາ ອຕ຺ຕໂນ ອຕ຺ຖາຍ ທານໍ ເທນ຺ຕໍ ອນຸໂມເທນ຺ຕິ, ຈິຕ຺ຕໍ ປສາເທນ຺ຕິ, ປີຕິໍ ອຸປ຺ປາເທນ຺ຕິ, ໂສມນສ຺ສໍ ປຏິລຠນ຺ຕິ; ເຕນ ວຕ ເຣ ວຕ຺ຕພ຺ເພ – ‘‘ອິໂຕ ທິນ຺ເນນ ຕຕ຺ຖ ຍາເປນ຺ຕີ’’ຕິ.

໔໙໐. ນ ວຕ຺ຕພ຺ພໍ – ‘‘ອິໂຕ ທິນ຺ເນນ ຕຕ຺ຖ ຍາເປນ຺ຕີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ອຸນ຺ນເມ ອຸທກໍ ວຸຏ຺ຐໍ, ຍຖານິນ຺ນໍ ປວຕ຺ຕຕິ;

ເອວເມວ ອິໂຕ ທິນ຺ນໍ, ເປຕານໍ ອຸປກປ຺ປຕິ.

‘‘ຍຖາ ວາຣິວຫາ ປູຣາ, ປຣິປູເຣນ຺ຕິ ສາຄຣໍ;

ເອວເມວ ອິໂຕ ທິນ຺ນໍ, ເປຕານໍ ອຸປກປ຺ປຕິ.

‘‘ນ ຫິ ຕຕ຺ຖ ກສີ ອຕ຺ຖິ, ໂຄຣກ຺ເຂຕ຺ຖ ນ ວິຊ຺ຊຕິ;

ວຓິຊ຺ຊາ ຕາທິສີ ນຕ຺ຖິ, ຫິຣຎ຺ເຎນ ກຍາກຍໍ [ກຍກ຺ກຍໍ (ສີ. ປີ.)];

ອິໂຕ ທິນ຺ເນນ ຍາເປນ຺ຕິ, ເປຕາ ກາລງ຺ກຕາ ຕຫິ’’ນ຺ຕິ [ຂຸ. ປາ. ໗.໖; ເປ. ວ. ໑໙].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອິໂຕ ທິນ຺ເນນ ຕຕ຺ຖ ຍາເປນ຺ຕີຕິ.

໔໙໑. ນ ວຕ຺ຕພ຺ພໍ – ‘‘ອິໂຕ ທິນ຺ເນນ ຕຕ຺ຖ ຍາເປນ຺ຕີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ປຎ຺ຈິມານິ, ຠິກ຺ຂເວ, ຐານານິ ສມ຺ປສ຺ສນ຺ຕາ ມາຕາປິຕໂຣ ປຸຕ຺ຕໍ ອິຈ຺ຉນ຺ຕິ ກຸເລ ຊາຍມານໍ! ກຕມານິ ປຎ຺ຈ? ຠໂຏ ວາ ໂນ ຠຣິສ຺ສຕິ, ກິຈ຺ຈໍ ວາ ໂນ ກຣິສ຺ສຕິ, ກຸລວໍໂສ ຈິຣໍ ຐສ຺ສຕິ, ທາຍຊ຺ຊໍ ປຏິປຊ຺ຊິສ຺ສຕິ, ອຖ ວາ ປນ ເປຕານໍ ກາລງ຺ກຕານໍ ທກ຺ຂິຓໍ ອນຸປ຺ປທສ຺ສຕິ – ອິມານິ ໂຂ, ຠິກ຺ຂເວ, ປຎ຺ຈ ຐານານິ ສມ຺ປສ຺ສນ຺ຕາ ມາຕາປິຕໂຣ ປຸຕ຺ຕໍ ອິຈ຺ຉນ຺ຕິ ກຸເລ ຊາຍມານ’’ນ຺ຕິ.

‘‘ປຎ຺ຈ ຐານານິ ສມ຺ປສ຺ສໍ, ປຸຕ຺ຕໍ ອິຈ຺ຉນ຺ຕິ ປຓ຺ຑິຕາ;

ຠໂຏ ວາ ໂນ ຠຣິສ຺ສຕິ, ກິຈ຺ຈໍ ວາ ໂນ ກຣິສ຺ສຕິ.

‘‘ກຸລວໍໂສ ຈິຣໍ ຕິຏ຺ເຐ, ທາຍຊ຺ຊໍ ປຏິປຊ຺ຊຕິ;

ອຖ ວາ ປນ ເປຕານໍ, ທກ຺ຂິຓໍ ອນຸປ຺ປທສ຺ສຕິ.

‘‘ຐານາເນຕານິ ສມ຺ປສ຺ສໍ, ປຸຕ຺ຕໍ ອິຈ຺ຉນ຺ຕິ ປຓ຺ຑິຕາ;

ຕສ຺ມາ ສນ຺ໂຕ ສປ຺ປຸຣິສາ, ກຕຎ຺ຎູ ກຕເວທິໂນ.

‘‘ຠຣນ຺ຕິ ມາຕາປິຕໂຣ, ປຸພ຺ເພ ກຕມນຸສ຺ສຣໍ;

ກໂຣນ຺ຕິ ເຕສໍ ກິຈ຺ຈານິ, ຍຖາ ຕໍ ປຸພ຺ພກາຣິນໍ.

‘‘ໂອວາທກາຣີ ຠຏໂປສີ, ກຸລວໍສໍ ອຫາປຍໍ;

ສທ຺ໂຘ ສີເລນ ສມ຺ປນ຺ໂນ, ປຸຕ຺ໂຕ ໂຫຕິ ປສໍສິໂຍ’’ຕິ [ອ. ນິ. ໕.໓໑].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອິໂຕ ທິນ຺ເນນ ຕຕ຺ຖ ຍາເປນ຺ຕີຕິ.

ອິໂຕ ທິນ຺ນກຖາ ນິຏ຺ຐິຕາ.