໗. ສຕ຺ຕມວຄ຺ໂຄ

(໗໒) ໑໐. ວິປາໂກ ວິປາກຘມ຺ມຘມ຺ໂມຕິກຖາ

໕໐໑. ວິປາໂກ ວິປາກຘມ຺ມຘມ຺ໂມຕິ? ອາມນ຺ຕາ. ຕສ຺ສ ວິປາໂກ ວິປາກຘມ຺ມຘມ຺ໂມຕິ? ນ ເຫວໍ ວຕ຺ຕພ຺ເພ…ເປ… ຕສ຺ສ ວິປາໂກ ວິປາກຘມ຺ມຘມ຺ໂມຕິ? ອາມນ຺ຕາ. ຕສ຺ສ ຕສ຺ເສວ ນຕ຺ຖິ ທຸກ຺ຂສ຺ສ ອນ຺ຕກິຣິຍາ ນຕ຺ຖິ ວຏ຺ຏຸປຈ຺ເຉໂທ ນຕ຺ຖິ ອນຸປາທາປຣິນິພ຺ພານນ຺ຕິ? ນ ເຫວໍ ວຕ຺ຕພ຺ເພ…ເປ….

ວິປາໂກ ວິປາກຘມ຺ມຘມ຺ໂມຕິ? ອາມນ຺ຕາ. ວິປາໂກຕິ ວາ ວິປາກຘມ຺ມຘມ຺ໂມຕິ ວາ ວິປາກຘມ຺ມຘມ຺ໂມຕິ ວາ ວິປາໂກຕິ ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕຕິ? ນ ເຫວໍ ວຕ຺ຕພ຺ເພ…ເປ….

ວິປາໂກ ວິປາກຘມ຺ມຘມ຺ໂມຕິ? ອາມນ຺ຕາ. ວິປາໂກ ຈ ວິປາກຘມ຺ມຘມ຺ໂມ ຈ ວິປາກຘມ຺ມຘມ຺ໂມ ຈ ວິປາໂກ ຈ ສຫຄຕາ ສຫຊາຕາ ສໍສຏ຺ຐາ ສມ຺ປຍຸຕ຺ຕາ ເອກຸປ຺ປາທາ ເອກນິໂຣຘາ ເອກວຕ຺ຖຸກາ ເອກາຣມ຺ມຓາຕິ? ນ ເຫວໍ ວຕ຺ຕພ຺ເພ…ເປ….

ວິປາໂກ ວິປາກຘມ຺ມຘມ຺ໂມຕິ? ອາມນ຺ຕາ. ຕຎ຺ເຎວ ອກຸສລໍ ໂສ ອກຸສລສ຺ສ ວິປາໂກ, ຕຎ຺ເຎວ ກຸສລໍ ໂສ ກຸສລສ຺ສ ວິປາໂກຕິ? ນ ເຫວໍ ວຕ຺ຕພ຺ເພ…ເປ….

ວິປາໂກ ວິປາກຘມ຺ມຘມ຺ໂມຕິ? ອາມນ຺ຕາ. ເຍເນວ ຈິຕ຺ເຕນ ປາຓໍ ຫນຕິ ເຕເນວ ຈິຕ຺ເຕນ ນິຣເຍ ປຈ຺ຈຕິ, ເຍເນວ ຈິຕ຺ເຕນ ທານໍ ເທຕິ ເຕເນວ ຈິຕ຺ເຕນ ສຄ຺ເຄ ໂມທຕີຕິ? ນ ເຫວໍ ວຕ຺ຕພ຺ເພ…ເປ….

໕໐໒. ນ ວຕ຺ຕພ຺ພໍ – ‘‘ວິປາໂກ ວິປາກຘມ຺ມຘມ຺ໂມ’’ຕິ? ອາມນ຺ຕາ. ນນຸ ວິປາກາ ຈຕ຺ຕາໂຣ ຂນ຺ຘາ ອຣູປິໂນ ອຎ຺ຎມຎ຺ຎປຈ຺ຈຍາຕິ? ອາມນ຺ຕາ. ຫຎ຺ຈິ ວິປາກາ ຈຕ຺ຕາໂຣ ຂນ຺ຘາ ອຣູປິໂນ ອຎ຺ຎມຎ຺ຎປຈ຺ຈຍາ, ເຕນ ວຕ ເຣ ວຕ຺ຕພ຺ເພ – ‘‘ວິປາໂກ ວິປາກຘມ຺ມຘມ຺ໂມ’’ຕິ.

ວິປາໂກ ວິປາກຘມ຺ມຘມ຺ໂມຕິກຖາ ນິຏ຺ຐິຕາ.

ສຕ຺ຕມວຄ຺ໂຄ.

ຕສ຺ສຸທ຺ທານໍ –

ສງ຺ຄໂຫ, ສມ຺ປຍຸຕ຺ໂຕ, ເຈຕສິໂກ ຘມ຺ໂມ, ເຈຕສິກໍ ທານໍ, ປຣິໂຠຄມຍໍ ປຸຎ຺ຎໍ ວຑ຺ຒຕິ, ອິໂຕ ທິນ຺ເນນ ຕຕ຺ຖ ຍາເປນ຺ຕິ, ປຖວີ ກມ຺ມວິປາໂກ, ຊຣາມຣຓໍ ວິປາໂກ, ນຕ຺ຖິ ອຣິຍຘມ຺ມວິປາໂກ, ວິປາໂກ ວິປາກຘມ຺ມຘມ຺ໂມຕິ.