(໖໓) ໑. ສງ຺ຄຫິຕກຖາ

໔໗໑. ນຕ຺ຖິ ເກຈິ ຘມ຺ມາ ເກຫິຈິ ຘມ຺ເມຫິ ສງ຺ຄຫິຕາຕິ [ສງ຺ຄຫີຕາຕິ (ປີ.)]? ອາມນ຺ຕາ. ນນຸ ອຕ຺ຖິ ເກຈິ ຘມ຺ມາ ເກຫິຈິ ຘມ຺ເມຫິ ຄຓນໍ ຄຈ຺ຉນ຺ຕິ ອຸທ຺ເທສໍ ຄຈ຺ຉນ຺ຕິ ປຣິຍາປນ຺ນາຕິ? ອາມນ຺ຕາ. ຫຎ຺ຈິ ອຕ຺ຖິ ເກຈິ ຘມ຺ມາ ເກຫິຈິ ຘມ຺ເມຫິ ຄຓນໍ ຄຈ຺ຉນ຺ຕິ ອຸທ຺ເທສໍ ຄຈ຺ຉນ຺ຕິ ປຣິຍາປນ຺ນາ, ໂນ ຈ ວຕ ເຣ ວຕ຺ຕພ຺ເພ – ‘‘ນຕ຺ຖິ ເກຈິ ຘມ຺ມາ ເກຫິຈິ ຘມ຺ເມຫິ ສງ຺ຄຫິຕາ’’ຕິ.

ຈກ຺ຂາຍຕນໍ ກຕມກ຺ຂນ຺ຘຄຓນໍ [ກຕມໍ ຂນ຺ຘຄຓນໍ (ສີ. ປີ. ກ.)] ຄຈ຺ຉຕີຕິ? ຣູປກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ຈກ຺ຂາຍຕນໍ ຣູປກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ຈກ຺ຂາຍຕນໍ ຣູປກ຺ຂນ຺ເຘນ ສງ຺ຄຫິຕ’’ນ຺ຕິ. ໂສຕາຍຕນໍ…ເປ… ຆານາຍຕນໍ…ເປ… ຊິວ຺ຫາຍຕນໍ…ເປ… ກາຍາຍຕນໍ ກຕມກ຺ຂນ຺ຘຄຓນໍ ຄຈ຺ຉຕີຕິ? ຣູປກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ກາຍາຍຕນໍ ຣູປກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ກາຍາຍຕນໍ ຣູປກ຺ຂນ຺ເຘນ ສງ຺ຄຫິຕ’’ນ຺ຕິ.

ຣູປາຍຕນໍ…ເປ… ສທ຺ທາຍຕນໍ…ເປ… ຄນ຺ຘາຍຕນໍ…ເປ… ຣສາຍຕນໍ…ເປ… ໂຜຏ຺ຐພ຺ພາຍຕນໍ ກຕມກ຺ຂນ຺ຘຄຓນໍ ຄຈ຺ຉຕີຕິ? ຣູປກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ໂຜຏ຺ຐພ຺ພາຍຕນໍ ຣູປກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ໂຜຏ຺ຐພ຺ພາຍຕນໍ ຣູປກ຺ຂນ຺ເຘນ ສງ຺ຄຫິຕ’’ນ຺ຕິ.

ສຸຂາ ເວທນາ ກຕມກ຺ຂນ຺ຘຄຓນໍ ຄຈ຺ຉຕີຕິ? ເວທນາກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ສຸຂາ ເວທນາ ເວທນາກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ສຸຂາ ເວທນາ ເວທນາກ຺ຂນ຺ເຘນ ສງ຺ຄຫິຕາ’’ຕິ. ທຸກ຺ຂາ ເວທນາ…ເປ… ອທຸກ຺ຂມສຸຂາ ເວທນາ ກຕມກ຺ຂນ຺ຘຄຓນໍ ຄຈ຺ຉຕີຕິ? ເວທນາກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ອທຸກ຺ຂມສຸຂາ ເວທນາ ເວທນາກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ອທຸກ຺ຂມສຸຂາ ເວທນາ ເວທນາກ຺ຂນ຺ເຘນ ສງ຺ຄຫິຕາ’’ຕິ.

ຈກ຺ຂຸສມ຺ຜສ຺ສຊາ ສຎ຺ຎາ ກຕມກ຺ຂນ຺ຘຄຓນໍ ຄຈ຺ຉຕີຕິ? ສຎ຺ຎາກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ຈກ຺ຂຸສມ຺ຜສ຺ສຊາ ສຎ຺ຎາ ສຎ຺ຎາກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ຈກ຺ຂຸສມ຺ຜສ຺ສຊາ ສຎ຺ຎາ ສຎ຺ຎາກ຺ຂນ຺ເຘນ ສງ຺ຄຫິຕາ’’ຕິ. ໂສຕສມ຺ຜສ຺ສຊາ ສຎ຺ຎາ…ເປ… ມໂນສມ຺ຜສ຺ສຊາ ສຎ຺ຎາ ກຕມກ຺ຂນ຺ຘຄຓນໍ ຄຈ຺ຉຕີຕິ? ສຎ຺ຎາກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ມໂນສມ຺ຜສ຺ສຊາ ສຎ຺ຎາ ສຎ຺ຎາກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ມໂນສມ຺ຜສ຺ສຊາ ສຎ຺ຎາ ສຎ຺ຎາກ຺ຂນ຺ເຘນ ສງ຺ຄຫິຕາ’’ຕິ.

ຈກ຺ຂຸສມ຺ຜສ຺ສຊາ ເຈຕນາ…ເປ… ມໂນສມ຺ຜສ຺ສຊາ ເຈຕນາ ກຕມກ຺ຂນ຺ຘຄຓນໍ ຄຈ຺ຉຕີຕິ? ສງ຺ຂາຣກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ມໂນສມ຺ຜສ຺ສຊາ ເຈຕນາ ສງ຺ຂາຣກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ມໂນສມ຺ຜສ຺ສຊາ ເຈຕນາ ສງ຺ຂາຣກ຺ຂນ຺ເຘນ ສງ຺ຄຫິຕາ’’ຕິ.

ຈກ຺ຂຸວິຎ຺ຎາຓໍ …ເປ… ມໂນວິຎ຺ຎາຓໍ ກຕມກ຺ຂນ຺ຘຄຓນໍ ຄຈ຺ຉຕີຕິ? ວິຎ຺ຎາຓກ຺ຂນ຺ຘຄຓນໍ ຄຈ຺ຉຕີຕິ. ຫຎ຺ຈິ ມໂນວິຎ຺ຎາຓໍ ວິຎ຺ຎາຓກ຺ຂນ຺ຘຄຓນໍ ຄຈ຺ຉຕິ, ເຕນ ວຕ ເຣ ວຕ຺ຕພ຺ເພ – ‘‘ມໂນວິຎ຺ຎາຓໍ ວິຎ຺ຎາຓກ຺ຂນ຺ເຘນ ສງ຺ຄຫິຕ’’ນ຺ຕິ.

໔໗໒. ຍຖາ ທາເມນ ວາ ໂຍຕ຺ເຕນ ວາ ທ຺ເວ ພລິພທ຺ທາ ສງ຺ຄຫິຕາ, ສິກ຺ກາຍ ປິຓ຺ຑປາໂຕ ສງ຺ຄຫິໂຕ, ສາ ຄທ຺ທຸເລນ ສງ຺ຄຫິໂຕ; ເອວເມວ ເຕ ຘມ຺ມາ ເຕຫິ ຘມ຺ເມຫິ ສງ຺ຄຫິຕາຕິ [ສກວາທິວຈນໍ (ອຏ຺ຐກຖາ ປສ຺ສິຕພ຺ພາ)]? ຫຎ຺ຈິ ທາເມນ ວາ ໂຍຕ຺ເຕນ ວາ ທ຺ເວ ພລີພທ຺ທາ ສງ຺ຄຫິຕາ, ສິກ຺ກາຍ ປິຓ຺ຑປາໂຕ ສງ຺ຄຫິໂຕ, ສາ ຄທ຺ທຸເລນ ສງ຺ຄຫິໂຕ, ເຕນ ວຕ ເຣ ວຕ຺ຕພ຺ເພ – ‘‘ອຕ຺ຖິ ເກຈິ ຘມ຺ມາ ເກຫິຈິ ຘມ຺ເມຫິ ສງ຺ຄຫິຕາ’’ຕິ [ສກວາທິວຈນໍ (ອຏ຺ຐກຖາ ປສ຺ສິຕພ຺ພາ)].

ສງ຺ຄຫິຕກຖາ ນິຏ຺ຐິຕາ.