໓. ຕຕິຍວຄ຺ໂຄ

(໓໑) ໑໑. ອສຎ຺ຎກຖາ

໓໘໑. ອສຎ຺ຎສຕ຺ເຕສຸ ສຎ຺ຎາ ອຕ຺ຖີຕິ? ອາມນ຺ຕາ. ສຎ຺ຎາຠໂວ ສຎ຺ຎາຄຕິ ສຎ຺ຎາສຕ຺ຕາວາໂສ ສຎ຺ຎາສໍສາໂຣ ສຎ຺ຎາໂຍນິ ສຎ຺ຎຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ….

ນນຸ ອສຎ຺ຎຠໂວ ອສຎ຺ຎຄຕິ ອສຎ຺ຎສຕ຺ຕາວາໂສ ອສຎ຺ຎສໍສາໂຣ ອສຎ຺ຎໂຍນິ ອສຎ຺ຎຕ຺ຕຠາວປຏິລາໂຠຕິ? ອາມນ຺ຕາ. ຫຎ຺ຈິ ອສຎ຺ຎຠໂວ ອສຎ຺ຎຄຕິ ອສຎ຺ຎສຕ຺ຕາວາໂສ ອສຎ຺ຎສໍສາໂຣ ອສຎ຺ຎໂຍນິ ອສຎ຺ຎຕ຺ຕຠາວປຏິລາໂຠ, ໂນ ຈ ວຕ ເຣ ວຕ຺ຕພ຺ເພ – ‘‘ອສຎ຺ຎສຕ຺ເຕສຸ ສຎ຺ຎາ ອຕ຺ຖີ’’ຕິ.

ອສຎ຺ຎສຕ຺ເຕສຸ ສຎ຺ຎາ ອຕ຺ຖີຕິ? ອາມນ຺ຕາ. ປຎ຺ຈໂວກາຣຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ….

ນນຸ ເອກໂວກາຣຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ອຕ຺ຕຠາວປຏິລາໂຠຕິ? ອາມນ຺ຕາ. ຫຎ຺ຈິ ເອກໂວກາຣຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ອຕ຺ຕຠາວປຏິລາໂຠ, ໂນ ຈ ວຕ ເຣ ວຕ຺ຕພ຺ເພ – ‘‘ອສຎ຺ຎສຕ຺ເຕສຸ ສຎ຺ຎາ ອຕ຺ຖີ’’ຕິ.

ອສຎ຺ຎສຕ຺ເຕສຸ ສຎ຺ຎາ ອຕ຺ຖີຕິ? ອາມນ຺ຕາ. ຕາຍ ສຎ຺ຎາຍ ສຎ຺ຎາກຣຓີຍໍ ກໂຣຕີຕິ? ນ ເຫວໍ ວຕ຺ຕພ຺ເພ…ເປ….

໓໘໒. ມນຸສ຺ເສສຸ ສຎ຺ຎາ ອຕ຺ຖິ, ໂສ ຈ ສຎ຺ຎາຠໂວ ສຎ຺ຎາຄຕິ ສຎ຺ຎາສຕ຺ຕາວາໂສ ສຎ຺ຎາສໍສາໂຣ ສຎ຺ຎາໂຍນິ ສຎ຺ຎຕ຺ຕຠາວປຏິລາໂຠຕິ? ອາມນ຺ຕາ. ອສຎ຺ຎສຕ຺ເຕສຸ ສຎ຺ຎາ ອຕ຺ຖິ, ໂສ ຈ ສຎ຺ຎາຠໂວ ສຎ຺ຎາຄຕິ ສຕ຺ຕາວາໂສ ສໍສາໂຣ ໂຍນິ ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ….

ມນຸສ຺ເສສຸ ສຎ຺ຎາ ອຕ຺ຖິ, ໂສ ຈ ປຎ຺ຈໂວກາຣຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ອຕ຺ຕຠາວປຏິລາໂຠຕິ? ອາມນ຺ຕາ. ອສຎ຺ຎສຕ຺ເຕສຸ ສຎ຺ຎາ ອຕ຺ຖິ, ໂສ ຈ ປຎ຺ຈໂວກາຣຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ….

ມນຸສ຺ເສສຸ ສຎ຺ຎາ ອຕ຺ຖິ, ຕາຍ ສຎ຺ຎາຍ ສຎ຺ຎາກຣຓີຍໍ ກໂຣຕີຕິ? ອາມນ຺ຕາ. ອສຎ຺ຎສຕ຺ເຕສຸ ສຎ຺ຎາ ອຕ຺ຖິ, ຕາຍ ສຎ຺ຎາຍ ສຎ຺ຎາກຣຓີຍໍ ກໂຣຕີຕິ? ນ ເຫວໍ ວຕ຺ຕພ຺ເພ…ເປ….

ອສຎ຺ຎສຕ຺ເຕສຸ ສຎ຺ຎາ ອຕ຺ຖິ, ໂສ ຈ ອສຎ຺ຎຠໂວ ອສຎ຺ຎຄຕິ ອສຎ຺ຎສຕ຺ຕາວາໂສ ອສຎ຺ຎສໍສາໂຣ ອສຎ຺ຎໂຍນິ ອສຎ຺ຎຕ຺ຕຠາວປຏິລາໂຠຕິ? ອາມນ຺ຕາ. ມນຸສ຺ເສສຸ ສຎ຺ຎາ ອຕ຺ຖິ, ໂສ ຈ ອສຎ຺ຎຠໂວ ອສຎ຺ຎຄຕິ…ເປ… ອສຎ຺ຎຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ….

ອສຎ຺ຎສຕ຺ເຕສຸ ສຎ຺ຎາ ອຕ຺ຖິ, ໂສ ຈ ເອກໂວກາຣຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ອຕ຺ຕຠາວປຏິລາໂຠຕິ? ອາມນ຺ຕາ. ມນຸສ຺ເສສຸ ສຎ຺ຎາ ອຕ຺ຖິ, ໂສ ຈ ເອກໂວກາຣຠໂວ ຄຕິ…ເປ… ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ….

ອສຎ຺ຎສຕ຺ເຕສຸ ສຎ຺ຎາ ອຕ຺ຖິ, ນ ຈ ຕາຍ ສຎ຺ຎາຍ ສຎ຺ຎາກຣຓີຍໍ ກໂຣຕີຕິ? ອາມນ຺ຕາ. ມນຸສ຺ເສສຸ ສຎ຺ຎາ ອຕ຺ຖິ, ນ ຈ ຕາຍ ສຎ຺ຎາຍ ສຎ຺ຎາກຣຓີຍໍ ກໂຣຕີຕິ? ນ ເຫວໍ ວຕ຺ຕພ຺ເພ…ເປ….

໓໘໓. ນ ວຕ຺ຕພ຺ພໍ – ‘‘ອສຎ຺ຎສຕ຺ເຕສຸ ສຎ຺ຎາ ອຕ຺ຖີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ສນ຺ຕິ, ຠິກ຺ຂເວ, ອສຎ຺ຎສຕ຺ຕາ ນາມ ເທວາ; ສຎ຺ຎຸປ຺ປາທາ ຈ ປນ ເຕ ເທວາ ຕມ຺ຫາ ກາຍາ ຈວນ຺ຕີ’’ຕິ [ທີ. ນິ. ໑.໖໘]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອສຎ຺ຎສຕ຺ເຕສຸ ສຎ຺ຎາ ອຕ຺ຖີຕິ.

ອສຎ຺ຎສຕ຺ເຕສຸ ສຎ຺ຎາ ອຕ຺ຖີຕິ? ກິຎ຺ຈິ [ກຎ຺ຈິ (ສ຺ຍາ.)] ກາເລ ອຕ຺ຖິ, ກິຎ຺ຈິ ກາເລ ນຕ຺ຖີຕິ. ກິຎ຺ຈິ ກາເລ ສຎ຺ຎສຕ຺ຕາ ກິຎ຺ຈິ ກາເລ ອສຎ຺ຎສຕ຺ຕາ, ກິຎ຺ຈິ ກາເລ ສຎ຺ຎຠໂວ ກິຎ຺ຈິ ກາເລ ອສຎ຺ຎຠໂວ, ກິຎ຺ຈິ ກາເລ ປຎ຺ຈໂວກາຣຠໂວ ກິຎ຺ຈິ ກາເລ ເອກໂວກາຣຠໂວຕິ? ນ ເຫວໍ ວຕ຺ຕພ຺ເພ…ເປ….

ອສຎ຺ຎສຕ຺ເຕສຸ ສຎ຺ຎາ ກິຎ຺ຈິ ກາເລ ອຕ຺ຖິ, ກິຎ຺ຈິ ກາເລ ນຕ຺ຖີຕິ? ອາມນ຺ຕາ. ກໍ ກາລໍ ອຕ຺ຖິ, ກໍ ກາລໍ ນຕ຺ຖີຕິ? ຈຸຕິກາເລ ອຸປປຕ຺ຕິກາເລ ອຕ຺ຖິ, ຐິຕິກາເລ ນຕ຺ຖີຕິ. ຈຸຕິກາເລ ອຸປປຕ຺ຕິກາເລ ສຎ຺ຎສຕ຺ຕາ, ຐິຕິກາເລ ອສຎ຺ຎສຕ຺ຕາ; ຈຸຕິກາເລ ອຸປປຕ຺ຕິກາເລ ສຎ຺ຎຠໂວ, ຐິຕິກາເລ ອສຎ຺ຎຠໂວ; ຈຸຕິກາເລ ອຸປປຕ຺ຕິກາເລ ປຎ຺ຈໂວກາຣຠໂວ, ຐິຕິກາເລ ເອກໂວກາຣຠໂວຕິ? ນ ເຫວໍ ວຕ຺ຕພ຺ເພ…ເປ….

ອສຎ຺ຎກຖາ ນິຏ຺ຐິຕາ.