(໒໑) ໑. ພລກຖາ

໓໕໔. ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ຕຖາຄຕພລໍ ສາວກພລໍ, ສາວກພລໍ ຕຖາຄຕພລນ຺ຕິ? ນ ເຫວໍ ວຕ຺ຕພ຺ເພ…ເປ….

ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ຕຎ຺ເຎວ ຕຖາຄຕພລໍ ຕໍ ສາວກພລໍ, ຕຎ຺ເຎວ ສາວກພລໍ ຕໍ ຕຖາຄຕພລນ຺ຕິ? ນ ເຫວໍ ວຕ຺ຕພ຺ເພ…ເປ….

ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ຍາທິສໍ ຕຖາຄຕພລໍ ຕາທິສໍ ສາວກພລໍ, ຍາທິສໍ ສາວກພລໍ ຕາທິສໍ ຕຖາຄຕພລນ຺ຕິ? ນ ເຫວໍ ວຕ຺ຕພ຺ເພ…ເປ….

ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ຍາທິໂສ ຕຖາຄຕສ຺ສ ປຸພ຺ພໂຍໂຄ ປຸພ຺ພຈຣິຍາ ຘມ຺ມກ຺ຂານໍ ຘມ຺ມເທສນາ ຕາທິໂສ ສາວກສ຺ສ ປຸພ຺ພໂຍໂຄ ປຸພ຺ພຈຣິຍາ ຘມ຺ມກ຺ຂານໍ ຘມ຺ມເທສນາຕິ? ນ ເຫວໍ ວຕ຺ຕພ຺ເພ…ເປ….

ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ຕຖາຄໂຕ ຊິໂນ ສຕ຺ຖາ ສມ຺ມາສມ຺ພຸທ຺ໂຘ ສພ຺ພຎ຺ຎູ ສພ຺ພທສ຺ສາວີ ຘມ຺ມສ຺ສາມີ ຘມ຺ມປ຺ປຏິສຣໂຓຕິ? ອາມນ຺ຕາ. ສາວໂກ ຊິໂນ ສຕ຺ຖາ ສມ຺ມາສມ຺ພຸທ຺ໂຘ ສພ຺ພຎ຺ຎູ ສພ຺ພທສ຺ສາວີ ຘມ຺ມສ຺ສາມີ ຘມ຺ມປ຺ປຏິສຣໂຓຕິ? ນ ເຫວໍ ວຕ຺ຕພ຺ເພ…ເປ….

ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ຕຖາຄໂຕ ອນຸປ຺ປນ຺ນສ຺ສ ມຄ຺ຄສ຺ສ ອຸປ຺ປາເທຕາ ອສຎ຺ຊາຕສ຺ສ ມຄ຺ຄສ຺ສ ສຎ຺ຊເນຕາ ອນກ຺ຂາຕສ຺ສ ມຄ຺ຄສ຺ສ ອກ຺ຂາຕາ ມຄ຺ຄຎ຺ຎູ ມຄ຺ຄວິທູ ມຄ຺ຄໂກວິໂທຕິ? ອາມນ຺ຕາ. ສາວໂກ ອນຸປ຺ປນ຺ນສ຺ສ ມຄ຺ຄສ຺ສ ອຸປ຺ປາເທຕາ ອສຎ຺ຊາຕສ຺ສ ມຄ຺ຄສ຺ສ ສຎ຺ຊເນຕາ ອນກ຺ຂາຕສ຺ສ ມຄ຺ຄສ຺ສ ອກ຺ຂາຕາ ມຄ຺ຄຎ຺ຎູ ມຄ຺ຄວິທູ ມຄ຺ຄໂກວິໂທຕິ? ນ ເຫວໍ ວຕ຺ຕພ຺ເພ…ເປ….

ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ສາວໂກ ສພ຺ພຎ຺ຎູ ສພ຺ພທສ຺ສາວີຕິ? ນ ເຫວໍ ວຕ຺ຕພ຺ເພ…ເປ….

໓໕໕. ສາວໂກ ຐານາຐານໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ຐານາຐານໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ຐານາຐານໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ສາວໂກ ອຕີຕານາຄຕປຈ຺ຈຸປ຺ປນ຺ນານໍ ກມ຺ມສມາທານານໍ ຐານໂສ ເຫຕຸໂສ ວິປາກໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ອຕີຕານາຄຕປຈ຺ຈຸປ຺ປນ຺ນານໍ ກມ຺ມສມາທານານໍ ຐານໂສ ເຫຕຸໂສ ວິປາກໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ອຕີຕານາຄຕປຈ຺ຈຸປ຺ປນ຺ນານໍ ກມ຺ມສມາທານານໍ ຐານໂສ ເຫຕຸໂສ ວິປາກໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ສາວໂກ ສພ຺ພຕ຺ຖຄາມິນິໍ ປຏິປທໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ສພ຺ພຕ຺ຖຄາມິນິໍ ປຏິປທໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ສພ຺ພຕ຺ຖຄາມິນິໍ ປຏິປທໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ສາວໂກ ອເນກຘາຕຸໍ ນານາຘາຕຸໍ ໂລກໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ອເນກຘາຕຸໍ ນານາຘາຕຸໍ ໂລກໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ອເນກຘາຕຸໍ ນານາຘາຕຸໍ ໂລກໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ສາວໂກ ສຕ຺ຕານໍ ນານາຘິມຸຕ຺ຕິກຕໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ສຕ຺ຕານໍ ນານາຘິມຸຕ຺ຕິກຕໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ສຕ຺ຕານໍ ນານາຘິມຸຕ຺ຕິກຕໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ສາວໂກ ຌານວິໂມກ຺ຂສມາຘິສມາປຕ຺ຕີນໍ ສໍກິເລສໍ ໂວທານໍ ວຸຏ຺ຐານໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ຌານວິໂມກ຺ຂສມາຘິສມາປຕ຺ຕີນໍ ສໍກິເລສໍ ໂວທານໍ ວຸຏ຺ຐານໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ຌານວິໂມກ຺ຂສມາຘິສມາປຕ຺ຕີນໍ ສໍກິເລສໍ ໂວທານໍ ວຸຏ຺ຐານໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ສາວໂກ ປຸພ຺ເພນິວາສານຸສ຺ສຕິໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ປຸພ຺ເພນິວາສານຸສ຺ສຕິໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ປຸພ຺ເພນິວາສານຸສ຺ສຕິ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ສາວໂກ ສຕ຺ຕານໍ ຈຸຕູປປາຕໍ ຊານາຕີຕິ? ອາມນ຺ຕາ. ຫຎ຺ຈິ ສາວໂກ ສຕ຺ຕານໍ ຈຸຕູປປາຕໍ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ສຕ຺ຕານໍ ຈຸຕູປປາຕໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

ນນຸ ຕຖາຄຕສ຺ສາປິ ອາສວາ ຂີຓາ ສາວກສ຺ສາປິ ອາສວາ ຂີຓາຕິ? ອາມນ຺ຕາ. ອຕ຺ຖິ ກິຎ຺ຈິ ນານາກຣຓໍ ຕຖາຄຕສ຺ສ ວາ ສາວກສ຺ສ ວາ ອາສວກ຺ຂເຍນ ວາ ອາສວກ຺ຂຍໍ ວິມຸຕ຺ຕິຍາ ວາ ວິມຸຕ຺ຕີຕິ? ນຕ຺ຖິ. ຫຎ຺ຈິ ນຕ຺ຖິ ກິຎ຺ຈິ ນານາກຣຓໍ ຕຖາຄຕສ຺ສ ວາ ສາວກສ຺ສ ວາ ອາສວກ຺ຂເຍນ ວາ ອາສວກ຺ຂຍໍ ວິມຸຕ຺ຕິຍາ ວາ ວິມຸຕ຺ຕິ, ເຕນ ວຕ ເຣ ວຕ຺ຕພ຺ເພ – ‘‘ອາສວານໍ ຂເຍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓ’’ນ຺ຕິ.

໓໕໖. ອາສວານໍ ຂເຍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ຐານາຐາເນ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ນ ເຫວໍ ວຕ຺ຕພ຺ເພ…ເປ….

ອາສວານໍ ຂເຍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ສຕ຺ຕານໍ ຈຸຕູປປາເຕ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ນ ເຫວໍ ວຕ຺ຕພ຺ເພ…ເປ….

ຐານາຐາເນ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ອາມນ຺ຕາ. ອາສວານໍ ຂເຍ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ນ ເຫວໍ ວຕ຺ຕພ຺ເພ…ເປ….

ສຕ຺ຕານໍ ຈຸຕູປປາເຕ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ອາມນ຺ຕາ. ອາສວານໍ ຂເຍ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ນ ເຫວໍ ວຕ຺ຕພ຺ເພ…ເປ….

ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ອາມນ຺ຕາ. ຐານາຐາເນ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ນ ເຫວໍ ວຕ຺ຕພ຺ເພ [ອຍເມຕ຺ຖ ສາຘາຣຓປກ຺ຂໍ ສນ຺ຘາຍ ປຏິກ຺ເຂໂປ (ຏີກາ ໂອໂລເກຕພ຺ພາ)] …ເປ….

ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ອາມນ຺ຕາ…ເປ…. ອາສວານໍ ຂເຍ ຍຖາຠູຕໍ ຎາຓໍ ຕຖາຄຕພລໍ ສາວກອສາຘາຣຓນ຺ຕິ? ນ ເຫວໍ ວຕ຺ຕພ຺ເພ…ເປ….

ຐານາຐາເນ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ນ ເຫວໍ ວຕ຺ຕພ຺ເພ…ເປ….

ອາສວານໍ ຂເຍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ອາມນ຺ຕາ. ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ຎາຓໍ ຕຖາຄຕພລໍ ສາວກສາຘາຣຓນ຺ຕິ? ນ ເຫວໍ ວຕ຺ຕພ຺ເພ…ເປ….

ພລກຖາ ນິຏ຺ຐິຕາ.