໒. ທຸຕິຍວຄ຺ໂຄ

(໑໖) ໗. ຈິຕ຺ຕຏ຺ຐິຕິກຖາ

໓໓໕. ເອກໍ ຈິຕ຺ຕໍ ທິວສໍ ຕິຏ຺ຐຕີຕິ? ອາມນ຺ຕາ. ອຸປຑ຺ຒທິວໂສ ອຸປ຺ປາທກ຺ຂໂຓ, ອຸປຑ຺ຒທິວໂສ ວຍກ຺ຂໂຓຕິ? ນ ເຫວໍ ວຕ຺ຕພ຺ເພ.

ເອກໍ ຈິຕ຺ຕໍ ທ຺ເວ ທິວເສ ຕິຏ຺ຐຕີຕິ? ອາມນ຺ຕາ. ທິວໂສ ອຸປ຺ປາທກ຺ຂໂຓ, ທິວໂສ ວຍກ຺ຂໂຓຕິ? ນ ເຫວໍ ວຕ຺ຕພ຺ເພ.

ເອກໍ ຈິຕ຺ຕໍ ຈຕ຺ຕາໂຣ ທິວເສ ຕິຏ຺ຐຕິ… ອຏ຺ຐ ທິວເສ ຕິຏ຺ຐຕິ… ທສ ທິວເສ ຕິຏ຺ຐຕິ… ວີສຕິ ທິວເສ ຕິຏ຺ຐຕິ… ມາສໍ ຕິຏ຺ຐຕິ… ທ຺ເວ ມາເສ ຕິຏ຺ຐຕິ… ຈຕ຺ຕາໂຣ ມາເສ ຕິຏ຺ຐຕິ… ອຏ຺ຐ ມາເສ ຕິຏ຺ຐຕິ… ທສ ມາເສ ຕິຏ຺ຐຕິ… ສໍວຈ຺ຉຣໍ ຕິຏ຺ຐຕິ… ທ຺ເວ ວສ຺ສານິ ຕິຏ຺ຐຕິ… ຈຕ຺ຕາຣິ ວສ຺ສານິ ຕິຏ຺ຐຕິ… ອຏ຺ຐ ວສ຺ສານິ ຕິຏ຺ຐຕິ… ທສ ວສ຺ສານິ ຕິຏ຺ຐຕິ… ວີສຕິ ວສ຺ສານິ ຕິຏ຺ຐຕິ… ຕິໍສ ວສ຺ສານິ ຕິຏ຺ຐຕິ… ຈຕ຺ຕາຣີສ ວສ຺ສານິ ຕິຏ຺ຐຕິ… ປຎ຺ຎາສ ວສ຺ສານິ ຕິຏ຺ຐຕິ… ວສ຺ສສຕໍ ຕິຏ຺ຐຕິ… ທ຺ເວ ວສ຺ສສຕານິ ຕິຏ຺ຐຕິ… ຈຕ຺ຕາຣິ ວສ຺ສສຕານິ ຕິຏ຺ຐຕິ… ປຎ຺ຈ ວສ຺ສສຕານິ ຕິຏ຺ຐຕິ… ວສ຺ສສຫສ຺ສໍ ຕິຏ຺ຐຕິ… ທ຺ເວ ວສ຺ສສຫສ຺ສານິ ຕິຏ຺ຐຕິ… ຈຕ຺ຕາຣິ ວສ຺ສສຫສ຺ສານິ ຕິຏ຺ຐຕິ… ອຏ຺ຐ ວສ຺ສສຫສ຺ສານິ ຕິຏ຺ຐຕິ… ໂສຬສ ວສ຺ສສຫສ຺ສານິ ຕິຏ຺ຐຕິ… ກປ຺ປໍ ຕິຏ຺ຐຕິ… ທ຺ເວ ກປ຺ເປ ຕິຏ຺ຐຕິ… ຈຕ຺ຕາໂຣ ກປ຺ເປ ຕິຏ຺ຐຕິ… ອຏ຺ຐ ກປ຺ເປ ຕິຏ຺ຐຕິ… ໂສຬສ ກປ຺ເປ ຕິຏ຺ຐຕິ… ພາຕ຺ຕິໍສ ກປ຺ເປ ຕິຏ຺ຐຕິ… ຈຕຸສຏ຺ຐິ ກປ຺ເປ ຕິຏ຺ຐຕິ… ປຎ຺ຈ ກປ຺ປສຕານິ ຕິຏ຺ຐຕິ… ກປ຺ປສຫສ຺ສານິ ຕິຏ຺ຐຕິ… ທ຺ເວ ກປ຺ປສຫສ຺ສານິ ຕິຏ຺ຐຕິ… ຈຕ຺ຕາຣິ ກປ຺ປສຫສ຺ສານິ ຕິຏ຺ຐຕິ… ອຏ຺ຐ ກປ຺ປສຫສ຺ສານິ ຕິຏ຺ຐຕິ… ໂສຬສ ກປ຺ປສຫສ຺ສານິ ຕິຏ຺ຐຕິ… ວີສຕິ ກປ຺ປສຫສ຺ສານິ ຕິຏ຺ຐຕິ… ຈຕ຺ຕາຣີສ ກປ຺ປສຫສ຺ສານິ ຕິຏ຺ຐຕິ… ສຏ຺ຐິ ກປ຺ປສຫສ຺ສານິ ຕິຏ຺ຐຕິ… ຈຕຸຣາສີຕິ ກປ຺ປສຫສ຺ສານິ ຕິຏ຺ຐຕີຕິ? ອາມນ຺ຕາ. ທ຺ເວຈຕ຺ຕາຣີສ ກປ຺ປສຫສ຺ສານິ ອຸປ຺ປາທກ຺ຂໂຓ, ທ຺ເວຈຕ຺ຕາຣີສ ກປ຺ປສຫສ຺ສານິ ວຍກ຺ຂໂຓຕິ? ນ ເຫວໍ ວຕ຺ຕພ຺ເພ.

ເອກໍ ຈິຕ຺ຕໍ ທິວສໍ ຕິຏ຺ຐຕີຕິ? ອາມນ຺ຕາ. ອຕ຺ຖຎ຺ເຎ ຘມ຺ມາ ເອກາຫໍ ພຫຸມ຺ປິ ອຸປ຺ປຊ຺ຊິຕ຺ວາ ນິຣຸຊ຺ຌນ຺ຕີຕິ? ອາມນ຺ຕາ. ເຕ ຘມ຺ມາ ຈິຕ຺ເຕນ ລຫຸປຣິວຕ຺ຕາຕິ? ນ ເຫວໍ ວຕ຺ຕພ຺ເພ.

ເຕ ຘມ຺ມາ ຈິຕ຺ເຕນ ລຫຸປຣິວຕ຺ຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເອວໍ ລຫຸປຣິວຕ຺ຕໍ ຍຖຍິທໍ ຈິຕ຺ຕໍ. ຍາວຎ຺ຈິທໍ, ຠິກ຺ຂເວ, ອຸປມາປິ ນ ສຸກຣາ ຍາວ ລຫຸປຣິວຕ຺ຕໍ ຈິຕ຺ຕ’’ນ຺ຕິ [ອ. ນິ. ໑.໔໘]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ເຕ ຘມ຺ມາ ຈິຕ຺ເຕນ ລຫຸປຣິວຕ຺ຕາ’’ຕິ.

ເຕ ຘມ຺ມາ ຈິຕ຺ເຕນ ລຫຸປຣິວຕ຺ຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ເສຍ຺ຍຖາປິ, ຠິກ຺ຂເວ, ມກ຺ກໂຏ ອຣຎ຺ເຎ ປວເນ ຈຣມາໂນ ສາຂໍ ຄຓ຺ຫຕິ, ຕໍ ມຸຎ຺ຈິຕ຺ວາ ອຎ຺ຎໍ ຄຓ຺ຫຕິ, ຕໍ ມຸຎ຺ຈິຕ຺ວາ ອຎ຺ຎໍ ຄຓ຺ຫຕິ; ເອວເມວ ໂຂ, ຠິກ຺ຂເວ, ຍມິທໍ [ຍທິທໍ (ພຫູສຸ)] ວຸຈ຺ຈຕິ ຈິຕ຺ຕໍ ອິຕິປິ ມໂນ ອິຕິປິ ວິຎ຺ຎາຓໍ ອິຕິປິ ຕໍ ຣຕ຺ຕິຍາ ຈ ທິວສສ຺ສ ຈ ອຎ຺ຎເທວ ອຸປ຺ປຊ຺ຊຕິ ອຎ຺ຎໍ ນິຣຸຊ຺ຌຕີ’’ຕິ [ສໍ. ນິ. ໒.໖໑]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ເຕ ຘມ຺ມາ ຈິຕ຺ເຕນ ລຫຸປຣິວຕ຺ຕາ’’ຕິ.

໓໓໖. ເອກໍ ຈິຕ຺ຕໍ ທິວສໍ ຕິຏ຺ຐຕີຕິ? ອາມນ຺ຕາ. ຈກ຺ຂຸວິຎ຺ຎາຓໍ ທິວສໍ ຕິຏ຺ຐຕີຕິ? ນ ເຫວໍ ວຕ຺ຕພ຺ເພ. ໂສຕວິຎ຺ຎາຓໍ…ເປ… ຆານວິຎ຺ຎາຓໍ… ຊິວ຺ຫາວິຎ຺ຎາຓໍ… ກາຍວິຎ຺ຎາຓໍ… ອກຸສລໍ ຈິຕ຺ຕໍ… ຣາຄສຫຄຕໍ… ໂທສສຫຄຕໍ… ໂມຫສຫຄຕໍ… ມານສຫຄຕໍ… ທິຏ຺ຐິສຫຄຕໍ… ວິຈິກິຈ຺ຉາສຫຄຕໍ… ຖິນສຫຄຕໍ… ອຸທ຺ຘຈ຺ຈສຫຄຕໍ… ອຫິຣິກສຫຄຕໍ… ອໂນຕ຺ຕປ຺ປສຫຄຕໍ ຈິຕ຺ຕໍ ທິວສໍ ຕິຏ຺ຐຕີຕິ? ນ ເຫວໍ ວຕ຺ຕພ຺ເພ…ເປ….

ເອກໍ ຈິຕ຺ຕໍ ທິວສໍ ຕິຏ຺ຐຕີຕິ? ອາມນ຺ຕາ. ເຍເນວ ຈິຕ຺ເຕນ ຈກ຺ຂຸນາ ຣູປໍ ປສ຺ສຕິ, ເຕເນວ ຈິຕ຺ເຕນ ໂສເຕນ ສທ຺ທໍ ສຸຓາຕິ…ເປ… ຆາເນນ ຄນ຺ຘໍ ຆາຍຕິ… ຊິວ຺ຫາຍ ຣສໍ ສາຍຕິ… ກາເຍນ ໂຜຏ຺ຐພ຺ພໍ ຜຸສຕິ… ມນສາ ຘມ຺ມໍ ວິຊານາຕິ…ເປ… ເຍເນວ ຈິຕ຺ເຕນ ມນສາ ຘມ຺ມໍ ວິຊານາຕິ, ເຕເນວ ຈິຕ຺ເຕນ ຈກ຺ຂຸນາ ຣູປໍ ປສ຺ສຕິ…ເປ… ໂສເຕນ ສທ຺ທໍ ສຸຓາຕິ… ຆາເນນ ຄນ຺ຘໍ ຆາຍຕິ… ຊິວ຺ຫາຍ ຣສໍ ສາຍຕິ…ເປ… ກາເຍນ ໂຜຏ຺ຐພ຺ພໍ ຜຸສຕີຕິ? ນ ເຫວໍ ວຕ຺ຕພ຺ເພ…ເປ….

ເອກໍ ຈິຕ຺ຕໍ ທິວສໍ ຕິຏ຺ຐຕີຕິ? ອາມນ຺ຕາ. ເຍເນວ ຈິຕ຺ເຕນ ອຠິກ຺ກມຕິ, ເຕເນວ ຈິຕ຺ເຕນ ປຏິກ຺ກມຕິ; ເຍເນວ ຈິຕ຺ເຕນ ປຏິກ຺ກມຕິ, ເຕເນວ ຈິຕ຺ເຕນ ອຠິກ຺ກມຕິ; ເຍເນວ ຈິຕ຺ເຕນ ອາໂລເກຕິ, ເຕເນວ ຈິຕ຺ເຕນ ວິໂລເກຕິ; ເຍເນວ ຈິຕ຺ເຕນ ວິໂລເກຕິ, ເຕເນວ ຈິຕ຺ເຕນ ອາໂລເກຕິ; ເຍເນວ ຈິຕ຺ເຕນ ສມິຎ຺ເຊຕິ, ເຕເນວ ຈິຕ຺ເຕນ ປສາເຣຕິ; ເຍເນວ ຈິຕ຺ເຕນ ປສາເຣຕິ, ເຕເນວ ຈິຕ຺ເຕນ ສມິຎ຺ເຊຕີຕິ? ນ ເຫວໍ ວຕ຺ຕພ຺ເພ…ເປ….

໓໓໗. ອາກາສານຎ຺ຈາຍຕນູປຄານໍ ເທວານໍ ເອກໍ ຈິຕ຺ຕໍ ຍາວຕາຍຸກໍ ຕິຏ຺ຐຕີຕິ? ອາມນ຺ຕາ. ມນຸສ຺ສານໍ ເອກໍ ຈິຕ຺ຕໍ ຍາວຕາຍຸກໍ ຕິຏ຺ຐຕີຕິ? ນ ເຫວໍ ວຕ຺ຕພ຺ເພ.

ອາກາສານຎ຺ຈາຍຕນູປຄານໍ ເທວານໍ ເອກໍ ຈິຕ຺ຕໍ ຍາວຕາຍຸກໍ ຕິຏ຺ຐຕີຕິ? ອາມນ຺ຕາ. ຈາຕຸມຫາຣາຊິການໍ ເທວານໍ…ເປ… ຕາວຕິໍສານໍ ເທວານໍ… ຍາມານໍ ເທວານໍ… ຕຸສິຕານໍ ເທວານໍ… ນິມ຺ມານຣຕີນໍ ເທວານໍ… ປຣນິມ຺ມິຕວສວຕ຺ຕີນໍ ເທວານໍ… ພ຺ຣຫ຺ມປາຣິສຊ຺ຊານໍ ເທວານໍ… ພ຺ຣຫ຺ມປຸໂຣຫິຕານໍ ເທວານໍ… ມຫາພ຺ຣຫ຺ມານໍ ເທວານໍ… ປຣິຕ຺ຕາຠານໍ ເທວານໍ… ອປ຺ປມາຓາຠານໍ ເທວານໍ… ອາຠສ຺ສຣານໍ ເທວານໍ… ປຣິຕ຺ຕສຸຠານໍ ເທວານໍ… ອປ຺ປມາຓສຸຠານໍ ເທວານໍ… ສຸຠກິຓ຺ຫານໍ ເທວານໍ … ເວຫປ຺ຜລານໍ ເທວານໍ… ອວິຫານໍ ເທວານໍ… ອຕປ຺ປານໍ ເທວານໍ… ສຸທສ຺ສານໍ ເທວານໍ… ສຸທສ຺ສີນໍ ເທວານໍ… ອກນິຏ຺ຐານໍ ເທວານໍ ເອກໍ ຈິຕ຺ຕໍ ຍາວຕາຍຸກໍ ຕິຏ຺ຐຕີຕິ? ນ ເຫວໍ ວຕ຺ຕພ຺ເພ.

ອາກາສານຎ຺ຈາຍຕນູປຄານໍ ເທວານໍ ວີສຕິ ກປ຺ປສຫສ຺ສານິ ອາຍຸປ຺ປມາຓໍ, ອາກາສານຎ຺ຈາຍຕນູປຄານໍ ເທວານໍ ເອກໍ ຈິຕ຺ຕໍ ວີສຕິ ກປ຺ປສຫສ຺ສານິ ຕິຏ຺ຐຕີຕິ? ອາມນ຺ຕາ. ມນຸສ຺ສານໍ ວສ຺ສສຕໍ ອາຍຸປ຺ປມາຓໍ, ມນຸສ຺ສານໍ ເອກໍ ຈິຕ຺ຕໍ ວສ຺ສສຕໍ ຕິຏ຺ຐຕີຕິ? ນ ເຫວໍ ວຕ຺ຕພ຺ເພ.

ອາກາສານຎ຺ຈາຍຕນູປຄານໍ ເທວານໍ ວີສຕິ ກປ຺ປສຫສ຺ສານິ ອາຍຸປ຺ປມາຓໍ, ອາກາສານຎ຺ຈາຍຕນູປຄານໍ ເທວານໍ ເອກໍ ຈິຕ຺ຕໍ ວີສຕິ ກປ຺ປສຫສ຺ສານິ ຕິຏ຺ຐຕີຕິ? ອາມນ຺ຕາ. ຈາຕຸມຫາຣາຊິການໍ ເທວານໍ ປຎ຺ຈ ວສ຺ສສຕານິ ອາຍຸປ຺ປມາຓໍ, ຈາຕຸມຫາຣາຊິການໍ ເທວານໍ ເອກໍ ຈິຕ຺ຕໍ ປຎ຺ຈ ວສ຺ສສຕານິ ຕິຏ຺ຐຕິ… ວສ຺ສສຫສ຺ສໍ ຕິຏ຺ຐຕິ… ທ຺ເວ ວສ຺ສສຫສ຺ສານິ ຕິຏ຺ຐຕິ… ຈຕ຺ຕາຣິ ວສ຺ສສຫສ຺ສານິ ຕິຏ຺ຐຕິ… ອຏ຺ຐ ວສ຺ສສຫສ຺ສານິ ຕິຏ຺ຐຕິ… ໂສຬສ ວສ຺ສສຫສ຺ສານິ ຕິຏ຺ຐຕິ… ກປ຺ປສ຺ສ ຕຕິຍຠາຄໍ ຕິຏ຺ຐຕິ… ອຸປຑ຺ຒກປ຺ປໍ ຕິຏ຺ຐຕິ… ເອກໍ ກປ຺ປໍ ຕິຏ຺ຐຕິ… ທ຺ເວ ກປ຺ເປ ຕິຏ຺ຐຕິ… ຈຕ຺ຕາໂຣ ກປ຺ເປ ຕິຏ຺ຐຕິ… ອຏ຺ຐ ກປ຺ເປ ຕິຏ຺ຐຕິ… ໂສຬສ ກປ຺ເປ ຕິຏ຺ຐຕິ… ພາຕ຺ຕິໍສ ກປ຺ເປ ຕິຏ຺ຐຕິ… ຈຕຸສຏ຺ຐິ ກປ຺ເປ ຕິຏ຺ຐຕິ… ປຎ຺ຈ ກປ຺ປສຕານິ ຕິຏ຺ຐຕິ… ກປ຺ປສຫສ຺ສໍ ຕິຏ຺ຐຕິ… ທ຺ເວ ກປ຺ປສຫສ຺ສານິ ຕິຏ຺ຐຕິ… ຈຕ຺ຕາຣິ ກປ຺ປສຫສ຺ສານິ ຕິຏ຺ຐຕິ… ອຏ຺ຐ ກປ຺ປສຫສ຺ສານິ ຕິຏ຺ຐຕິ… ອກນິຏ຺ຐານໍ ເທວານໍ ໂສຬສ ກປ຺ປສຫສ຺ສານິ ອາຍຸປ຺ປມາຓໍ, ອກນິຏ຺ຐານໍ ເທວານໍ ເອກໍ ຈິຕ຺ຕໍ ໂສຬສ ກປ຺ປສຫສ຺ສານິ ຕິຏ຺ຐຕີຕິ? ນ ເຫວໍ ວຕ຺ຕພ຺ເພ.

ອາກາສານຎ຺ຈາຍຕນູປຄານໍ ເທວານໍ ຈິຕ຺ຕໍ ມຸຫຸຕ຺ຕໍ ມຸຫຸຕ຺ຕໍ ອຸປ຺ປຊ຺ຊຕິ ມຸຫຸຕ຺ຕໍ ມຸຫຸຕ຺ຕໍ ນິຣຸຊ຺ຌຕີຕິ? ອາມນ຺ຕາ. ອາກາສານຎ຺ຈາຍຕນູປຄາ ເທວາ ມຸຫຸຕ຺ຕໍ ມຸຫຸຕ຺ຕໍ ຈວນ຺ຕິ ມຸຫຸຕ຺ຕໍ ມຸຫຸຕ຺ຕໍ ອຸປ຺ປຊ຺ຊນ຺ຕີຕິ? ນ ເຫວໍ ວຕ຺ຕພ຺ເພ.

ອາກາສານຎ຺ຈາຍຕນູປຄານໍ ເທວານໍ ເອກໍ ຈິຕ຺ຕໍ ຍາວຕາຍຸກໍ ຕິຏ຺ຐຕີຕິ? ອາມນ຺ຕາ. ອາກາສານຎ຺ຈາຍຕນູປຄາ ເທວາ ເຍເນວ ຈິຕ຺ເຕນ ອຸປ຺ປຊ຺ຊນ຺ຕິ, ເຕເນວ ຈິຕ຺ເຕນ ຈວນ຺ຕີຕິ? ນ ເຫວໍ ວຕ຺ຕພ຺ເພ…ເປ….

ຈິຕ຺ຕຏ຺ຐິຕິກຖາ ນິຏ຺ຐິຕາ.