໒. ທຸຕິຍວຄ຺ໂຄ

(໑໘) ໙. ອນຸປຸພ຺ພາຠິສມຍກຖາ

໓໓໙. ອນຸປຸພ຺ພາຠິສມໂຍຕິ? ອາມນ຺ຕາ. ອນຸປຸພ຺ເພນ ໂສຕາປຕ຺ຕິມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ. ອນຸປຸພ຺ເພນ ໂສຕາປຕ຺ຕິມຄ຺ຄໍ ຠາເວຕີຕິ? ອາມນ຺ຕາ. ອນຸປຸພ຺ເພນ ໂສຕາປຕ຺ຕິຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ.

ອນຸປຸພ຺ພາຠິສມໂຍຕິ? ອາມນ຺ຕາ. ອນຸປຸພ຺ເພນ ສກທາຄາມິມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ. ອນຸປຸພ຺ເພນ ສກທາຄາມິມຄ຺ຄໍ ຠາເວຕີຕິ? ອາມນ຺ຕາ. ອນຸປຸພ຺ເພນ ສກທາຄາມິຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ.

ອນຸປຸພ຺ພາຠິສມໂຍຕິ? ອາມນ຺ຕາ. ອນຸປຸພ຺ເພນ ອນາຄາມິມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ. ອນຸປຸພ຺ເພນ ອນາຄາມິມຄ຺ຄໍ ຠາເວຕີຕິ? ອາມນ຺ຕາ. ອນຸປຸພ຺ເພນ ອນາຄາມິຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ.

ອນຸປຸພ຺ພາຠິສມໂຍຕິ? ອາມນ຺ຕາ. ອນຸປຸພ຺ເພນ ອຣຫຕ຺ຕມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ. ອນຸປຸພ຺ເພນ ອຣຫຕ຺ຕມຄ຺ຄໍ ຠາເວຕີຕິ? ອາມນ຺ຕາ. ອນຸປຸພ຺ເພນ ອຣຫຕ຺ຕຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ.

໓໔໐. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທຸກ຺ຂທສ຺ສເນນ ກິໍ ຊຫຕີຕິ? ສກ຺ກາຍທິຏ຺ຐິໍ, ວິຈິກິຈ຺ຉໍ, ສີລພ຺ພຕປຣາມາສໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ໂສຕາປນ຺ໂນ, ຈຕຸຠາຄໍ ນ ໂສຕາປນ຺ໂນ, ຈຕຸຠາຄໍ ໂສຕາປຕ຺ຕິຜລປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ສຕ຺ຕກ຺ຂຕ຺ຕຸປຣໂມ ໂກລງ຺ໂກໂລ ເອກພີຊີ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ, ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ ຈຕຸຠາຄໍ ນ ອຣິຍກນ຺ເຕຫິ ສີເລຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ.

ສມຸທຍທສ຺ສເນນ…ເປ… ນິໂຣຘທສ຺ສເນນ…ເປ… ມຄ຺ຄທສ຺ສເນນ ກິໍ ຊຫຕີຕິ? ສກ຺ກາຍທິຏ຺ຐິໍ, ວິຈິກິຈ຺ຉໍ, ສີລພ຺ພຕປຣາມາສໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ໂສຕາປນ຺ໂນ, ຈຕຸຠາຄໍ ນ ໂສຕາປນ຺ໂນ, ຈຕຸຠາຄໍ ໂສຕາປຕ຺ຕິຜລປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ສຕ຺ຕກ຺ຂຕ຺ຕຸປຣໂມ ໂກລງ຺ໂກໂລ ເອກພີຊີ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ, ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ, ຈຕຸຠາຄໍ ນ ອຣິຍກນ຺ເຕຫິ ສີເລຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

໓໔໑. ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທຸກ຺ຂທສ຺ສເນນ ກິໍ ຊຫຕີຕິ? ໂອຬາຣິກໍ ກາມຣາຄໍ, ໂອຬາຣິກໍ ພ຺ຍາປາທໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ສກທາຄາມີ, ຈຕຸຠາຄໍ ນ ສກທາຄາມີ, ຈຕຸຠາຄໍ ສກທາຄາມິຜລປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕີຕິ? ນ ເຫວໍ ວຕ຺ຕພ຺ເພ…ເປ… ສມຸທຍທສ຺ສເນນ…ເປ… ນິໂຣຘທສ຺ສເນນ…ເປ… ມຄ຺ຄທສ຺ສເນນ ກິໍ ຊຫຕີຕິ? ໂອຬາຣິກໍ ກາມຣາຄໍ, ໂອຬາຣິກໍ ພ຺ຍາປາທໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ສກທາຄາມີ, ຈຕຸຠາຄໍ ນ ສກທາຄາມີ, ຈຕຸຠາຄໍ ສກທາຄາມິຜລປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕີຕິ? ນ ເຫວໍ ວຕ຺ຕພ຺ເພ…ເປ….

໓໔໒. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທຸກ຺ຂທສ຺ສເນນ ກິໍ ຊຫຕີຕິ? ອຓຸສຫຄຕໍ ກາມຣາຄໍ, ອຓຸສຫຄຕໍ ພ຺ຍາປາທໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ອນາຄາມີ, ຈຕຸຠາຄໍ ນ ອນາຄາມີ, ຈຕຸຠາຄໍ ອນາຄາມິຜລປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ອນ຺ຕຣາປຣິນິພ຺ພາຍີ…ເປ… ອຸປຫຈ຺ຈປຣິນິພ຺ພາຍີ… ອສງ຺ຂາຣປຣິນິພ຺ພາຍີ… ສສງ຺ຂາຣປຣິນິພ຺ພາຍີ… ອຸທ຺ຘໍໂສໂຕ ອກນິຏ຺ຐຄາມີ, ຈຕຸຠາຄໍ ນ ອຸທ຺ຘໍໂສໂຕ ນ ອກນິຏ຺ຐຄາມີຕິ? ນ ເຫວໍ ວຕ຺ຕພ຺ເພ…ເປ….

ສມຸທຍທສ຺ສເນນ…ເປ… ນິໂຣຘທສ຺ສເນນ…ເປ… ມຄ຺ຄທສ຺ສເນນ ກິໍ ຊຫຕີຕິ? ອຓຸສຫຄຕໍ ກາມຣາຄໍ, ອຓຸສຫຄຕໍ ພ຺ຍາປາທໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ອນາຄາມີ, ຈຕຸຠາຄໍ ນ ອນາຄາມີ, ຈຕຸຠາຄໍ ອນາຄາມິຜລປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ອນ຺ຕຣາປຣິນິພ຺ພາຍີ…ເປ… ອຸປຫຈ຺ຈປຣິນິພ຺ພາຍີ… ອສງ຺ຂາຣປຣິນິພ຺ພາຍີ… ສສງ຺ຂາຣປຣິນິພ຺ພາຍີ… ອຸທ຺ຘໍໂສໂຕ ອກນິຏ຺ຐຄາມີ, ຈຕຸຠາຄໍ ນ ອຸທ຺ຘໍໂສໂຕ ອກນິຏ຺ຐຄາມີຕິ? ນ ເຫວໍ ວຕ຺ຕພ຺ເພ…ເປ….

໓໔໓. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທຸກ຺ຂທສ຺ສເນນ ກິໍ ຊຫຕີຕິ? ຣູປຣາຄໍ, ອຣູປຣາຄໍ, ມານໍ, ອຸທ຺ຘຈ຺ຈໍ, ອວິຊ຺ຊໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ອຣຫາ, ຈຕຸຠາຄໍ ນ ອຣຫາ, ຈຕຸຠາຄໍ ອຣຫຕ຺ຕປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ວີຕຣາໂຄ…ເປ… ວີຕໂທໂສ… ວີຕໂມໂຫ…ເປ… ກຕກຣຓີໂຍ ໂອຫິຕຠາໂຣ ອນຸປ຺ປຕ຺ຕສທຕ຺ໂຖ ປຣິກ຺ຂີຓຠວສໍໂຍຊໂນ ສມ຺ມທຎ຺ຎາວິມຸຕ຺ໂຕ ອຸກ຺ຂິຕ຺ຕປລິໂຆ ສງ຺ກິຓ຺ຓປຣິໂຂ ອພ຺ພູຬ຺ເຫສິໂກ ນິຣຄ຺ຄໂຬ ອຣິໂຍ ປນ຺ນທ຺ຘໂຊ ປນ຺ນຠາໂຣ ວິສຎ຺ຎຸຕ຺ໂຕ ສຸວິຊິຕວິຊໂຍ, ທຸກ຺ຂໍ ຕສ຺ສ ປຣິຎ຺ຎາຕໍ, ສມຸທໂຍ ປຫີໂນ, ນິໂຣໂຘ ສຈ຺ຉິກໂຕ, ມຄ຺ໂຄ ຠາວິໂຕ, ອຠິຎ຺ເຎຍ຺ຍໍ ອຠິຎ຺ຎາຕໍ, ປຣິຎ຺ເຎຍ຺ຍໍ ປຣິຎ຺ຎາຕໍ, ປຫາຕພ຺ພໍ ປຫີນໍ, ຠາເວຕພ຺ພໍ ຠາວິຕໍ…ເປ… ສຈ຺ຉິກາຕພ຺ພໍ ສຈ຺ຉິກຕໍ, ຈຕຸຠາຄໍ ສຈ຺ຉິກາຕພ຺ພໍ ນ ສຈ຺ຉິກຕນ຺ຕິ? ນ ເຫວໍ ວຕ຺ຕພ຺ເພ…ເປ….

ສມຸທຍທສ຺ສເນນ … ນິໂຣຘທສ຺ສເນນ… ມຄ຺ຄທສ຺ສເນນ ກິໍ ຊຫຕີຕິ? ຣູປຣາຄໍ, ອຣູປຣາຄໍ, ມານໍ, ອຸທ຺ຘຈ຺ຈໍ, ອວິຊ຺ຊໍ, ຕເທກຏ຺ເຐ ຈ ກິເລເສ ຈຕຸຠາຄໍ ຊຫຕີຕິ. ຈຕຸຠາຄໍ ອຣຫາ, ຈຕຸຠາຄໍ ນ ອຣຫາ, ຈຕຸຠາຄໍ ອຣຫຕ຺ຕປ຺ປຕ຺ໂຕ ປຏິລທ຺ໂຘ ອຘິຄໂຕ ສຈ຺ຉິກໂຕ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ນ ກາເຍນ ຜຸສິຕ຺ວາ ວິຫຣຕິ, ຈຕຸຠາຄໍ ວີຕຣາໂຄ… ວີຕໂທໂສ… ວີຕໂມໂຫ… ກຕກຣຓີໂຍ ໂອຫິຕຠາໂຣ ອນຸປ຺ປຕ຺ຕສທຕ຺ໂຖ ປຣິກ຺ຂີຓຠວສໍໂຍຊໂນ ສມ຺ມທຎ຺ຎາວິມຸຕ຺ໂຕ ອຸກ຺ຂິຕ຺ຕປລິໂຆ ສງ຺ກິຓ຺ຓປຣິໂຂ ອພ຺ພູຬ຺ເຫສິໂກ ນິຣຄ຺ຄໂຬ ອຣິໂຍ ປນ຺ນທ຺ຘໂຊ ປນ຺ນຠາໂຣ ວິສຎ຺ຎຸຕ຺ໂຕ ສຸວິຊິຕວິຊໂຍ, ທຸກ຺ຂໍ ຕສ຺ສ ປຣິຎ຺ຎາຕໍ, ສມຸທໂຍ ປຫີໂນ, ນິໂຣໂຘ ສຈ຺ຉິກໂຕ, ມຄ຺ໂຄ ຠາວິໂຕ, ອຠິຎ຺ເຎຍ຺ຍໍ ອຠິຎ຺ຎາຕໍ, ປຣິຎ຺ເຎຍ຺ຍໍ ປຣິຎ຺ຎາຕໍ, ປຫາຕພ຺ພໍ ປຫີນໍ, ຠາເວຕພ຺ພໍ ຠາວິຕໍ…ເປ… ສຈ຺ຉິກາຕພ຺ພໍ ສຈ຺ຉິກຕໍ, ຈຕຸຠາຄໍ ສຈ຺ຉິກາຕພ຺ພໍ ນ ສຈ຺ຉິກຕນ຺ຕິ? ນ ເຫວໍ ວຕ຺ຕພ຺ເພ…ເປ….

໓໔໔. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທຸກ຺ຂໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພຕິ? ອາມນ຺ຕາ. ທຸກ຺ເຂ ທິຏ຺ເຐ ຜເລ ຐິໂຕຕິ ວຕ຺ຕພ຺ໂພຕິ? ນ ເຫວໍ ວຕ຺ຕພ຺ເພ. ສມຸທຍໍ ທກ຺ຂນ຺ໂຕ…ເປ… ນິໂຣຘໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພຕິ? ອາມນ຺ຕາ. ນິໂຣເຘ ທິຏ຺ເຐ ຜເລ ຐິໂຕຕິ ວຕ຺ຕພ຺ໂພຕິ? ນ ເຫວໍ ວຕ຺ຕພ຺ເພ.

ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ມຄ຺ຄໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ມຄ຺ເຄ ທິຏ຺ເຐ ຜເລ ຐິໂຕຕິ ວຕ຺ຕພ຺ໂພຕິ? ອາມນ຺ຕາ. ທຸກ຺ຂໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ທຸກ຺ເຂ ທິຏ຺ເຐ ຜເລ ຐິໂຕຕິ ວຕ຺ຕພ຺ໂພຕິ? ນ ເຫວໍ ວຕ຺ຕພ຺ເພ…ເປ… ມຄ຺ຄໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ມຄ຺ເຄ ທິຏ຺ເຐ ຜເລ ຐິໂຕຕິ ວຕ຺ຕພ຺ໂພຕິ? ອາມນ຺ຕາ. ສມຸທຍໍ ທກ຺ຂນ຺ໂຕ…ເປ… ນິໂຣຘໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ນິໂຣເຘ ທິຏ຺ເຐ ຜເລ ຐິໂຕຕິ ວຕ຺ຕພ຺ໂພຕິ? ນ ເຫວໍ ວຕ຺ຕພ຺ເພ…ເປ….

ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທຸກ຺ຂໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ທຸກ຺ເຂ ທິຏ຺ເຐ ນ ວຕ຺ຕພ຺ພໍ – ‘‘ຜເລ ຐິໂຕຕິ ວຕ຺ຕພ຺ໂພ’’ຕິ? ອາມນ຺ຕາ. ມຄ຺ຄໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ມຄ຺ເຄ ທິຏ຺ເຐ ນ ວຕ຺ຕພ຺ພໍ – ‘‘ຜເລ ຐິໂຕຕິ ວຕ຺ຕພ຺ໂພ’’ຕິ? ນ ເຫວໍ ວຕ຺ຕພ຺ເພ…ເປ… ສມຸທຍໍ ທກ຺ຂນ຺ໂຕ… ນິໂຣຘໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ນິໂຣເຘ ທິຏ຺ເຐ ນ ວຕ຺ຕພ຺ພໍ – ‘‘ຜເລ ຐິໂຕຕິ ວຕ຺ຕພ຺ໂພ’’ຕິ? ອາມນ຺ຕາ. ມຄ຺ຄໍ ທກ຺ຂນ຺ໂຕ ‘‘ປຏິປນ຺ນໂກ’’ຕິ ວຕ຺ຕພ຺ໂພ, ມຄ຺ເຄ ທິຏ຺ເຐ ນ ວຕ຺ຕພ຺ພໍ – ‘‘ຜເລ ຐິໂຕຕິ ວຕ຺ຕພ຺ໂພ’’ຕິ? ນ ເຫວໍ ວຕ຺ຕພ຺ເພ…ເປ….

[ສກວາທີປຸຈ຺ຉາລກ຺ຂຓໍ] ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທຸກ຺ຂໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ທຸກ຺ເຂ ທິຏ຺ເຐ ນ ວຕ຺ຕພ຺ພໍ – ‘‘ຜເລ ຐິໂຕຕິ ວຕ຺ຕພ຺ໂພ’’ຕິ? ອາມນ຺ຕາ. ນິຣຕ຺ຖິຍໍ ທຸກ຺ຂທສ຺ສນນ຺ຕິ? ນ ເຫວໍ ວຕ຺ຕພ຺ເພ…ເປ… ສມຸທຍໍ ທກ຺ຂນ຺ໂຕ…ເປ… ນິໂຣຘໍ ທກ຺ຂນ຺ໂຕ ປຏິປນ຺ນໂກຕິ ວຕ຺ຕພ຺ໂພ, ນິໂຣເຘ ທິຏ຺ເຐ ນ ວຕ຺ຕພ຺ພໍ – ‘‘ຜເລ ຐິໂຕຕິ ວຕ຺ຕພ຺ໂພ’’ຕິ? ອາມນ຺ຕາ. ນິຣຕ຺ຖິຍໍ ນິໂຣຘທສ຺ສນນ຺ຕິ? ນ ເຫວໍ ວຕ຺ຕພ຺ເພ…ເປ….

໓໔໕. [ປຣວາທີປຸຈ຺ຉາລກ຺ຂຓໍ] ທຸກ຺ເຂ ທິຏ຺ເຐ ຈຕ຺ຕາຣິ ສຈ຺ຈານິ ທິຏ຺ຐານິ ໂຫນ຺ຕີຕິ? ອາມນ຺ຕາ. ທຸກ຺ຂສຈ຺ຈໍ ຈຕ຺ຕາຣິ ສຈ຺ຈານີຕິ? ນ ເຫວໍ ວຕ຺ຕພ຺ເພ…ເປ….

[ສກວາທີປຸຈ຺ຉາລກ຺ຂຓໍ] ຣູປກ຺ຂນ຺ເຘ ອນິຈ຺ຈໂຕ ທິຏ຺ເຐ ປຎ຺ຈກ຺ຂນ຺ຘາ ອນິຈ຺ຈໂຕ ທິຏ຺ຐາ ໂຫນ຺ຕີຕິ? ອາມນ຺ຕາ. ຣູປກ຺ຂນ຺ໂຘ ປຎ຺ຈກ຺ຂນ຺ຘາຕິ? ນ ເຫວໍ ວຕ຺ຕພ຺ເພ…ເປ….

[ສກວາທີປຸຈ຺ຉາລກ຺ຂຓໍ] ຈກ຺ຂາຍຕເນ ອນິຈ຺ຈໂຕ ທິຏ຺ເຐ ທ຺ວາທສາຍຕນານິ ອນິຈ຺ຈໂຕ ທິຏ຺ຐານິ ໂຫນ຺ຕີຕິ? ອາມນ຺ຕາ. ຈກ຺ຂາຍຕນໍ ທ຺ວາທສາຍຕນານີຕິ? ນ ເຫວໍ ວຕ຺ຕພ຺ເພ…ເປ….

[ສກວາທີປຸຈ຺ຉາລກ຺ຂຓໍ] ຈກ຺ຂຸຘາຕຸຍາ ອນິຈ຺ຈໂຕ ທິຏ຺ຐາຍ ອຏ຺ຐາຣສ ຘາຕຸໂຍ ອນິຈ຺ຈໂຕ ທິຏ຺ຐາ ໂຫນ຺ຕີຕິ? ອາມນ຺ຕາ. ຈກ຺ຂຸຘາຕຸ ອຏ຺ຐາຣສ ຘາຕຸໂຍຕິ? ນ ເຫວໍ ວຕ຺ຕພ຺ເພ…ເປ….

[ສກວາທີປຸຈ຺ຉາລກ຺ຂຓໍ] ຈກ຺ຂຸນ຺ທ຺ຣິເຍ ອນິຈ຺ຈໂຕ ທິຏ຺ເຐ ພາວີສຕິນ຺ທ຺ຣິຍານິ ອນິຈ຺ຈໂຕ ທິຏ຺ຐານິ ໂຫນ຺ຕີຕິ? ອາມນ຺ຕາ. ຈກ຺ຂຸນ຺ທ຺ຣິຍໍ ພາວີສຕິນ຺ທ຺ຣິຍານີຕິ? ນ ເຫວໍ ວຕ຺ຕພ຺ເພ…ເປ….

[ສກວາທີປຸຈ຺ຉາລກ຺ຂຓໍ] ຈຕູຫິ ຎາເຓຫິ ໂສຕາປຕ຺ຕິຜລໍ ສຈ຺ຉິກໂຣຕີຕິ? ອາມນ຺ຕາ. ຈຕ຺ຕາຣິ ໂສຕາປຕ຺ຕິຜລານີຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐຫິ ຎາເຓຫິ ໂສຕາປຕ຺ຕິຜລໍ ສຈ຺ຉິກໂຣຕີຕິ? ອາມນ຺ຕາ. ອຏ຺ຐ ໂສຕາປຕ຺ຕິຜລານີຕິ? ນ ເຫວໍ ວຕ຺ຕພ຺ເພ…ເປ… ທ຺ວາທສຫິ ຎາເຓຫິ ໂສຕາປຕ຺ຕິຜລໍ ສຈ຺ຉິກໂຣຕີຕິ? ອາມນ຺ຕາ. ທ຺ວາທສ ໂສຕາປຕ຺ຕິຜລານີຕິ? ນ ເຫວໍ ວຕ຺ຕພ຺ເພ…ເປ… ຈຕຸຈຕ຺ຕາຣີສາຍ ຎາເຓຫິ ໂສຕາປຕ຺ຕິຜລໍ ສຈ຺ຉິກໂຣຕີຕິ? ອາມນ຺ຕາ. ຈຕຸຈຕ຺ຕາຣີສໍ ໂສຕາປຕ຺ຕິຜລານີຕິ? ນ ເຫວໍ ວຕ຺ຕພ຺ເພ…ເປ… ສຕ຺ຕສຕ຺ຕຕິຍາ ຎາເຓຫິ ໂສຕາປຕ຺ຕິຜລໍ ສຈ຺ຉິກໂຣຕີຕິ? ອາມນ຺ຕາ. ສຕ຺ຕສຕ຺ຕຕິ ໂສຕາປຕ຺ຕິຜລານີຕິ? ນ ເຫວໍ ວຕ຺ຕພ຺ເພ…ເປ….

໓໔໖. ນ ວຕ຺ຕພ຺ພໍ – ‘‘ອນຸປຸພ຺ພາຠິສມໂຍ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ເສຍ຺ຍຖາປິ, ຠິກ຺ຂເວ, ມຫາສມຸທ຺ໂທ ອນຸປຸພ຺ພນິນ຺ໂນ ອນຸປຸພ຺ພໂປໂຓ ອນຸປຸພ຺ພປພ຺ຠາໂຣ, ນ ອາຍຕເກເນວ ປປາໂຕ; ເອວເມວ ໂຂ, ຠິກ຺ຂເວ, ອິມສ຺ມິໍ ຘມ຺ມວິນເຍ ອນຸປຸພ຺ພສິກ຺ຂາ ອນຸປຸພ຺ພກິຣິຍາ ອນຸປຸພ຺ພປຏິປທາ, ນ ອາຍຕເກເນວ ອຎ຺ຎາປຏິເວໂຘ’’ຕິ [ຈູຬວ. ໓໘໕; ອ. ນິ. ໘.໒໐; ອຸທາ. ໔໕ ອຸທາເນ ຈ]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອນຸປຸພ຺ພາຠິສມໂຍຕິ.

ນ ວຕ຺ຕພ຺ພໍ – ‘‘ອນຸປຸພ຺ພາຠິສມໂຍ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ອນຸປຸພ຺ເພນ ເມຘາວີ, ໂຖກໍ ໂຖກໍ ຂເຓ ຂເຓ;

ກມ຺ມາໂຣ ຣຊຕສ຺ເສວ, ນິທ຺ຘເມ ມລມຕ຺ຕໂນ’’ຕິ [ຘ. ປ. ໒໓໙ ຘມ຺ມປເທ].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອນຸປຸພ຺ພາຠິສມໂຍຕິ.

ອນຸປຸພ຺ພາຠິສມໂຍຕິ? ອາມນ຺ຕາ. ນນ຺ວາຍສ຺ມາ ຄວມ຺ປຕິ ເຖໂຣ ຠິກ຺ຂູ ເອຕທໂວຈ – ‘‘ສມ຺ມຸຂາ ເມຕໍ, ອາວຸໂສ, ຠຄວໂຕ ສຸຕໍ ສມ຺ມຸຂາ ປຏິຄ຺ຄຫິຕໍ – ‘ໂຍ, ຠິກ຺ຂເວ, ທຸກ຺ຂໍ ປສ຺ສຕິ ທຸກ຺ຂສມຸທຍມ຺ປິ ໂສ ປສ຺ສຕິ, ທຸກ຺ຂນິໂຣຘມ຺ປິ ປສ຺ສຕິ, ທຸກ຺ຂນິໂຣຘຄາມິນິໍ ປຏິປທມ຺ປິ ປສ຺ສຕິ; ໂຍ ທຸກ຺ຂສມຸທຍໍ ປສ຺ສຕິ ທຸກ຺ຂມ຺ປິ ໂສ ປສ຺ສຕິ, ທຸກ຺ຂນິໂຣຘມ຺ປິ ປສ຺ສຕິ, ທຸກ຺ຂນິໂຣຘຄາມິນິໍ ປຏິປທມ຺ປິ ປສ຺ສຕິ; ໂຍ ທຸກ຺ຂນິໂຣຘໍ ປສ຺ສຕິ ທຸກ຺ຂມ຺ປິ ໂສ ປສ຺ສຕິ, ທຸກ຺ຂສມຸທຍມ຺ປິ ປສ຺ສຕິ, ທຸກ຺ຂນິໂຣຘຄາມິນິໍ ປຏິປທມ຺ປິ ປສ຺ສຕິ; ໂຍ ທຸກ຺ຂນິໂຣຘຄາມິນິໍ ປຏິປທໍ ປສ຺ສຕິ ທຸກ຺ຂມ຺ປິ ໂສ ປສ຺ສຕິ, ທຸກ຺ຂສມຸທຍມ຺ປິ ປສ຺ສຕິ, ທຸກ຺ຂນິໂຣຘມ຺ປິ ປສ຺ສຕີ’’’ຕິ [ສໍ. ນິ. ໕.໑໑໐໐]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອນຸປຸພ຺ພາຠິສມໂຍ’’ຕິ.

ອນຸປຸພ຺ພາຠິສມໂຍຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ສຫາວສ຺ສ ທສ຺ສນສມ຺ປທາຍ,

ຕຍສ຺ສຸ ຘມ຺ມາ ຊຫິຕາ ຠວນ຺ຕິ;

ສກ຺ກາຍທິຏ຺ຐີ ວິຈິກິຈ຺ຉິຕຎ຺ຈ,

ສີລພ຺ພຕໍ ວາປິ ຍທຕ຺ຖິ ກິຎ຺ຈິ;

ຈຕູຫປາເຍຫິ ຈ ວິປ຺ປມຸຕ຺ໂຕ,

ຉຈ຺ຈາຠິຐານານິ ອຠພ຺ພ ກາຕຸ’’ນ຺ຕິ.

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອນຸປຸພ຺ພາຠິສມໂຍ’’ຕິ.

ອນຸປຸພ຺ພາຠິສມໂຍຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຍສ຺ມິໍ, ຠິກ຺ຂເວ, ສມເຍ ອຣິຍສາວກສ຺ສ ວິຣຊໍ ວີຕມລໍ ຘມ຺ມຈກ຺ຂຸໍ ອຸທປາທິ – ‘ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມ’ນ຺ຕິ, ສຫ ທສ຺ສນຸປ຺ປາທາ, ຠິກ຺ຂເວ, ອຣິຍສາວກສ຺ສ ຕີຓິ ສໍໂຍຊນານິ ປຫີຍນ຺ຕິ – ສກ຺ກາຍທິຏ຺ຐິ, ວິຈິກິຈ຺ຉາ, ສີລພ຺ພຕປຣາມາໂສ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອນຸປຸພ຺ພາຠິສມໂຍ’’ຕິ.

ອນຸປຸພ຺ພາຠິສມຍກຖາ ນິຏ຺ຐິຕາ.