໒. ທຸຕິຍວຄ຺ໂຄ

(໑໙) ໑໐. ໂວຫາຣກຖາ

໓໔໗. ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣຕິ? ອາມນ຺ຕາ. ໂລກຸຕ຺ຕເຣ ໂສເຕ ປຏິຫຎ຺ຎຕິ ໂນ ໂລກິເຍ, ໂລກຸຕ຺ຕເຣນ ວິຎ຺ຎາເຓນ ປຏິວິຊານນ຺ຕິ ໂນ ໂລກິເຍນ, ສາວກາ ປຏິວິຊານນ຺ຕິ ໂນ ປຸຖຸຊ຺ຊນາຕິ? ນ ເຫວໍ ວຕ຺ຕພ຺ເພ…ເປ….

ນນຸ ພຸທ຺ຘສ຺ສ ຠຄວໂຕ ໂວຫາໂຣ ໂລກິເຍ ໂສເຕ ປຏິຫຎ຺ຎຕີຕິ? ອາມນ຺ຕາ. ຫຎ຺ຈິ ພຸທ຺ຘສ຺ສ ຠຄວໂຕ ໂວຫາໂຣ ໂລກິເຍ ໂສເຕ ປຏິຫຎ຺ຎຕິ, ໂນ ຈ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣ’’ຕິ.

ນນຸ ພຸທ຺ຘສ຺ສ ຠຄວໂຕ ໂວຫາຣໍ ໂລກິເຍນ ວິຎ຺ຎາເຓນ ປຏິວິຊານນ຺ຕີຕິ? ອາມນ຺ຕາ. ຫຎ຺ຈິ ພຸທ຺ຘສ຺ສ ຠຄວໂຕ ໂວຫາຣໍ ໂລກິເຍນ ວິຎ຺ຎາເຓນ ປຏິວິຊານນ຺ຕິ, ໂນ ຈ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣ’’ຕິ.

ນນຸ ພຸທ຺ຘສ຺ສ ຠຄວໂຕ ໂວຫາຣໍ ປຸຖຸຊ຺ຊນາ ປຏິວິຊານນ຺ຕີຕິ? ອາມນ຺ຕາ. ຫຎ຺ຈິ ພຸທ຺ຘສ຺ສ ຠຄວໂຕ ໂວຫາຣໍ ປຸຖຸຊ຺ຊນາ ປຏິວິຊານນ຺ຕິ, ໂນ ຈ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣ’’ຕິ.

໓໔໘. ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣຕິ? ອາມນ຺ຕາ. ມຄ຺ໂຄ ຜລໍ ນິພ຺ພານໍ, ໂສຕາປຕ຺ຕິມຄ຺ໂຄ ໂສຕາປຕ຺ຕິຜລໍ, ສກທາຄາມິມຄ຺ໂຄ ສກທາຄາມິຜລໍ, ອນາຄາມິມຄ຺ໂຄ ອນາຄາມິຜລໍ, ອຣຫຕ຺ຕມຄ຺ໂຄ ອຣຫຕ຺ຕຜລໍ, ສຕິປຏ຺ຐານໍ ສມ຺ມປ຺ປຘານໍ ອິທ຺ຘິປາໂທ ອິນ຺ທ຺ຣິຍໍ ພລໍ ໂພຊ຺ຌງ຺ໂຄຕິ? ນ ເຫວໍ ວຕ຺ຕພ຺ເພ…ເປ….

ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣຕິ? ອາມນ຺ຕາ. ອຕ຺ຖິ ເກຈິ ພຸທ຺ຘສ຺ສ ຠຄວໂຕ ໂວຫາຣໍ ສຸຓນ຺ຕີຕິ? ອາມນ຺ຕາ. ໂລກຸຕ຺ຕໂຣ ຘມ຺ໂມ ໂສຕວິຎ຺ເຎຍ຺ໂຍ, ໂສຕສ຺ມິໍ ປຏິຫຎ຺ຎຕິ, ໂສຕສ຺ສ ອາປາຖໍ ອາຄຈ຺ຉຕີຕິ? ນ ເຫວໍ ວຕ຺ຕພ຺ເພ…ເປ….

ນນຸ ໂລກຸຕ຺ຕໂຣ ຘມ຺ໂມ ນ ໂສຕວິຎ຺ເຎຍ຺ໂຍ, ນ ໂສຕສ຺ມິໍ ປຏິຫຎ຺ຎຕິ, ນ ໂສຕສ຺ສ ອາປາຖໍ ອາຄຈ຺ຉຕີຕິ? ອາມນ຺ຕາ. ຫຎ຺ຈິ ໂລກຸຕ຺ຕໂຣ ຘມ຺ໂມ ນ ໂສຕວິຎ຺ເຎຍ຺ໂຍ, ນ ໂສຕສ຺ມິໍ ປຏິຫຎ຺ຎຕິ, ນ ໂສຕສ຺ສ ອາປາຖໍ ອາຄຈ຺ຉຕິ, ໂນ ຈ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣ’’ຕິ.

໓໔໙. ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣຕິ? ອາມນ຺ຕາ. ອຕ຺ຖິ ເກຈິ ພຸທ຺ຘສ຺ສ ຠຄວໂຕ ໂວຫາເຣ ຣຊ຺ເຊຍ຺ຍຸນ຺ຕິ? ອາມນ຺ຕາ. ໂລກຸຕ຺ຕໂຣ ຘມ຺ໂມ ຣາຄຏ຺ຐານິໂຍ ຣຊນີໂຍ ກມນີໂຍ ມທນີໂຍ ພນ຺ຘນີໂຍ ມຸຈ຺ຉນີໂຍຕິ? ນ ເຫວໍ ວຕ຺ຕພ຺ເພ…ເປ….

ນນຸ ໂລກຸຕ຺ຕໂຣ ຘມ຺ໂມ ນ ຣາຄຏ຺ຐານິໂຍ ນ ຣຊນີໂຍ ນ ກມນີໂຍ ນ ມທນີໂຍ ນ ພນ຺ຘນີໂຍ ນ ມຸຈ຺ຉນີໂຍຕິ? ອາມນ຺ຕາ. ຫຎ຺ຈິ ໂລກຸຕ຺ຕໂຣ ຘມ຺ໂມ ນ ຣາຄຏ຺ຐານິໂຍ ນ ຣຊນີໂຍ ນ ກມນີໂຍ ນ ມທນີໂຍ ນ ພນ຺ຘນີໂຍ ນ ມຸຈ຺ຉນີໂຍ, ໂນ ຈ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣ’’ຕິ.

ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣຕິ? ອາມນ຺ຕາ. ອຕ຺ຖິ ເກຈິ ພຸທ຺ຘສ຺ສ ຠຄວໂຕ ໂວຫາເຣ ທຸສ຺ເສຍ຺ຍຸນ຺ຕິ? ອາມນ຺ຕາ. ໂລກຸຕ຺ຕໂຣ ຘມ຺ໂມ ໂທສຏ຺ຐານິໂຍ ໂກປຏ຺ຐານິໂຍ ປຏິຆຏ຺ຐານິໂຍຕິ? ນ ເຫວໍ ວຕ຺ຕພ຺ເພ…ເປ….

ນນຸ ໂລກຸຕ຺ຕໂຣ ຘມ຺ໂມ ນ ໂທສຏ຺ຐານິໂຍ ນ ໂກປຏ຺ຐານິໂຍ ນ ປຏິຆຏ຺ຐານິໂຍຕິ? ອາມນ຺ຕາ. ຫຎ຺ຈິ ໂລກຸຕ຺ຕໂຣ ຘມ຺ໂມ ນ ໂທສຏ຺ຐານິໂຍ ນ ໂກປຏ຺ຐານິໂຍ ນ ປຏິຆຏ຺ຐານິໂຍ, ໂນ ຈ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣ’’ຕິ.

ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣຕິ? ອາມນ຺ຕາ. ອຕ຺ຖິ ເກຈິ ພຸທ຺ຘສ຺ສ ຠຄວໂຕ ໂວຫາເຣ ມຸຍ຺ເຫຍ຺ຍຸນ຺ຕິ? ອາມນ຺ຕາ. ໂລກຸຕ຺ຕໂຣ ຘມ຺ໂມ ໂມຫຏ຺ຐານິໂຍ ອຎ຺ຎາຓກຣໂຓ ອຈກ຺ຂຸກຣໂຓ ປຎ຺ຎານິໂຣຘິໂກ ວິຆາຕປກ຺ຂິໂກ ອນິພ຺ພານສໍວຕ຺ຕນິໂກຕິ? ນ ເຫວໍ ວຕ຺ຕພ຺ເພ…ເປ….

ນນຸ ໂລກຸຕ຺ຕໂຣ ຘມ຺ໂມ ນ ໂມຫຏ຺ຐານິໂຍ ນ ອຎ຺ຎາຓກຣໂຓ ນ ອຈກ຺ຂຸກຣໂຓ ປຎ຺ຎາວຸທ຺ຘິໂກ ອວິຆາຕປກ຺ຂິໂກ ນິພ຺ພານສໍວຕ຺ຕນິໂກຕິ? ອາມນ຺ຕາ. ຫຎ຺ຈິ ໂລກຸຕ຺ຕໂຣ ຘມ຺ໂມ ນ ໂມຫຏ຺ຐານິໂຍ ນ ອຎ຺ຎາຓກຣໂຓ ນ ອຈກ຺ຂຸກຣໂຓ ປຎ຺ຎາວຸທ຺ຘິໂກ ອວິຆາຕປກ຺ຂິໂກ ນິພ຺ພານສໍວຕ຺ຕນິໂກ, ໂນ ຈ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣ’’ຕິ.

໓໕໐. ພຸທ຺ຘສ຺ສ ຠຄວໂຕ ໂວຫາໂຣ ໂລກຸຕ຺ຕໂຣຕິ? ອາມນ຺ຕາ. ເຍ ເກຈິ ພຸທ຺ຘສ຺ສ ຠຄວໂຕ ໂວຫາຣໍ ສຸຓນ຺ຕິ, ສພ຺ເພ ເຕ ມຄ຺ຄໍ ຠາເວນ຺ຕີຕິ? ນ ເຫວໍ ວຕ຺ຕພ຺ເພ…ເປ….

ເຍ ເກຈິ ພຸທ຺ຘສ຺ສ ຠຄວໂຕ ໂວຫາຣໍ ສຸຓນ຺ຕິ, ສພ຺ເພ ເຕ ມຄ຺ຄໍ ຠາເວນ຺ຕີຕິ? ອາມນ຺ຕາ. ພາລປຸຖຸຊ຺ຊນາ ພຸທ຺ຘສ຺ສ ຠຄວໂຕ ໂວຫາຣໍ ສຸຓນ຺ຕິ, ພາລປຸຖຸຊ຺ຊນາ ມຄ຺ຄໍ ຠາເວນ຺ຕີຕິ? ນ ເຫວໍ ວຕ຺ຕພ຺ເພ…ເປ… ມາຕຸຆາຕໂກ ມຄ຺ຄໍ ຠາເວຕິ…ເປ… ປິຕຸຆາຕໂກ… ອຣຫນ຺ຕຆາຕໂກ… ຣຸຫິຣຸປ຺ປາທໂກ… ສງ຺ຆເຠທໂກ ພຸທ຺ຘສ຺ສ ຠຄວໂຕ ໂວຫາຣໍ ສຸຓາຕິ, ສງ຺ຆເຠທໂກ ມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ…ເປ….

໓໕໑. ລພ຺ຠາ ໂສວຓ຺ຓມຍາຍ ລຏ຺ຐິຍາ ຘຎ຺ຎປຸຎ຺ໂຊປິ ສຸວຓ຺ຓປຸຎ຺ໂຊປິ ອາຈິກ຺ຂິຕຸນ຺ຕິ? ອາມນ຺ຕາ. ເອວເມວໍ ຠຄວາ ໂລກຸຕ຺ຕເຣນ ໂວຫາເຣນ ໂລກິຍມ຺ປິ ໂລກຸຕ຺ຕຣມ຺ປິ ຘມ຺ມໍ ໂວຫຣຕີຕິ.

ລພ຺ຠາ ເອລຓ຺ຑິຍາຍ ລຏ຺ຐິຍາ ຘຎ຺ຎປຸຎ຺ໂຊປິ ສຸວຓ຺ຓປຸຎ຺ໂຊປິ ອາຈິກ຺ຂິຕຸນ຺ຕິ? ອາມນ຺ຕາ. ເອວເມວໍ ຠຄວາ ໂລກິເຍນ ໂວຫາເຣນ ໂລກິຍມ຺ປິ ໂລກຸຕ຺ຕຣມ຺ປິ ຘມ຺ມໍ ໂວຫຣຕີຕິ.

໓໕໒. ພຸທ຺ຘສ຺ສ ຠຄວໂຕ ໂວຫາໂຣ ໂລກິຍໍ ໂວຫຣນ຺ຕສ຺ສ ໂລກິໂຍ ໂຫຕິ, ໂລກຸຕ຺ຕຣໍ ໂວຫຣນ຺ຕສ຺ສ ໂລກຸຕ຺ຕໂຣ ໂຫຕີຕິ? ອາມນ຺ຕາ. ໂລກິຍໍ ໂວຫຣນ຺ຕສ຺ສ ໂລກິເຍ ໂສເຕ ປຏິຫຎ຺ຎຕິ, ໂລກຸຕ຺ຕຣໍ ໂວຫຣນ຺ຕສ຺ສ ໂລກຸຕ຺ຕເຣ ໂສເຕ ປຏິຫຎ຺ຎຕິ; ໂລກິຍໍ ໂວຫຣນ຺ຕສ຺ສ ໂລກິເຍນ ວິຎ຺ຎາເຓນ ປຏິວິຊານນ຺ຕິ, ໂລກຸຕ຺ຕຣໍ ໂວຫຣນ຺ຕສ຺ສ ໂລກຸຕ຺ຕເຣນ ວິຎ຺ຎາເຓນ ປຏິວິຊານນ຺ຕິ; ໂລກິຍໍ ໂວຫຣນ຺ຕສ຺ສ ປຸຖຸຊ຺ຊນາ ປຏິວິຊານນ຺ຕິ, ໂລກຸຕ຺ຕຣໍ ໂວຫຣນ຺ຕສ຺ສ ສາວກາ ປຏິວິຊານນ຺ຕີຕິ? ນ ເຫວໍ ວຕ຺ຕພ຺ເພ…ເປ….

ນ ວຕ຺ຕພ຺ພໍ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກິຍໍ ໂວຫຣນ຺ຕສ຺ສ ໂລກິໂຍ ໂຫຕິ, ໂລກຸຕ຺ຕຣໍ ໂວຫຣນ຺ຕສ຺ສ ໂລກຸຕ຺ຕໂຣ ໂຫຕີຕິ? ອາມນ຺ຕາ. ນນຸ ຠຄວາ ໂລກິຍມ຺ປິ ໂລກຸຕ຺ຕຣມ຺ປິ ຘມ຺ມໍ ໂວຫຣຕີຕິ? ອາມນ຺ຕາ. ຫຎ຺ຈິ ຠຄວາ ໂລກິຍມ຺ປິ ໂລກຸຕ຺ຕຣມ຺ປິ ຘມ຺ມໍ ໂວຫຣຕິ, ເຕນ ວຕ ເຣ ວຕ຺ຕພ຺ເພ – ‘‘ພຸທ຺ຘສ຺ສ ຠຄວໂຕ ໂວຫາໂຣ ໂລກິຍໍ ໂວຫຣນ຺ຕສ຺ສ ໂລກິໂຍ ໂຫຕິ, ໂລກຸຕ຺ຕຣໍ ໂວຫຣນ຺ຕສ຺ສ ໂລກຸຕ຺ຕໂຣ ໂຫຕີ’’ຕິ.

ພຸທ຺ຘສ຺ສ ຠຄວໂຕ ໂວຫາໂຣ ໂລກິຍໍ ໂວຫຣນ຺ຕສ຺ສ ໂລກິໂຍ ໂຫຕິ, ໂລກຸຕ຺ຕຣໍ ໂວຫຣນ຺ຕສ຺ສ ໂລກຸຕ຺ຕໂຣ ໂຫຕີຕິ? ອາມນ຺ຕາ. ມຄ຺ຄໍ ໂວຫຣນ຺ຕສ຺ສ ມຄ຺ໂຄ ໂຫຕິ, ອມຄ຺ຄໍ ໂວຫຣນ຺ຕສ຺ສ ອມຄ຺ໂຄ ໂຫຕິ, ຜລໍ ໂວຫຣນ຺ຕສ຺ສ ຜລໍ ໂຫຕິ, ອຜລໍ ໂວຫຣນ຺ຕສ຺ສ ອຜລໍ ໂຫຕິ, ນິພ຺ພານໍ ໂວຫຣນ຺ຕສ຺ສ ນິພ຺ພານໍ ໂຫຕິ, ອນິພ຺ພານໍ ໂວຫຣນ຺ຕສ຺ສ ອນິພ຺ພານໍ ໂຫຕິ, ສງ຺ຂຕໍ ໂວຫຣນ຺ຕສ຺ສ ສງ຺ຂຕໍ ໂຫຕິ, ອສງ຺ຂຕໍ ໂວຫຣນ຺ຕສ຺ສ ອສງ຺ຂຕໍ ໂຫຕິ, ຣູປໍ ໂວຫຣນ຺ຕສ຺ສ ຣູປໍ ໂຫຕິ, ອຣູປໍ ໂວຫຣນ຺ຕສ຺ສ ອຣູປໍ ໂຫຕິ, ເວທນໍ ໂວຫຣນ຺ຕສ຺ສ ເວທນາ ໂຫຕິ, ອເວທນໍ ໂວຫຣນ຺ຕສ຺ສ ອເວທນາ ໂຫຕິ, ສຎ຺ຎໍ ໂວຫຣນ຺ຕສ຺ສ ສຎ຺ຎາ ໂຫຕິ, ອສຎ຺ຎໍ ໂວຫຣນ຺ຕສ຺ສ ອສຎ຺ຎາ ໂຫຕິ, ສງ຺ຂາເຣ ໂວຫຣນ຺ຕສ຺ສ ສງ຺ຂາຣາ ໂຫນ຺ຕິ, ອສງ຺ຂາເຣ ໂວຫຣນ຺ຕສ຺ສ ອສງ຺ຂາຣາ ໂຫນ຺ຕິ, ວິຎ຺ຎາຓໍ ໂວຫຣນ຺ຕສ຺ສ ວິຎ຺ຎາຓໍ ໂຫຕິ, ອວິຎ຺ຎາຓໍ ໂວຫຣນ຺ຕສ຺ສ ອວິຎ຺ຎາຓໍ ໂຫຕີຕິ? ນ ເຫວໍ ວຕ຺ຕພ຺ເພ…ເປ….

ໂວຫາຣກຖາ ນິຏ຺ຐິຕາ.