ທ຺ວາທສ ອກຸສລານິ

໓໖໕. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ທິຏ຺ຐິຄຕສມ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ປີຕິ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ໂສມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ມິຈ຺ຉາທິຏ຺ຐິ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສມາຘິ ໂຫຕິ, ວີຣິຍພລໍ ໂຫຕິ, ສມາຘິພລໍ ໂຫຕິ, ອຫິຣິກພລໍ ໂຫຕິ, ອໂນຕ຺ຕປ຺ປພລໍ ໂຫຕິ, ໂລໂຠ ໂຫຕິ, ໂມໂຫ ໂຫຕິ, ອຠິຊ຺ຌາ ໂຫຕິ, ມິຈ຺ຉາທິຏ຺ຐິ ໂຫຕິ, ອຫິຣິກໍ ໂຫຕິ, ອໂນຕ຺ຕປ຺ປໍ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

໓໖໖. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໓໖໗. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.

໓໖໘. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໓໖໙. ກຕມາ ຕສ຺ມິໍ ສມເຍ ເຈຕນາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເຈຕນາ ໂຫຕິ.

໓໗໐. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໓໗໑. ກຕໂມ ຕສ຺ມິໍ ສມເຍ ວິຕກ຺ໂກ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ມິຈ຺ຉາສງ຺ກປ຺ໂປ – ອຍໍ ຕສ຺ມິໍ ສມເຍ ວິຕກ຺ໂກ ໂຫຕິ.

໓໗໒. ກຕໂມ ຕສ຺ມິໍ ສມເຍ ວິຈາໂຣ ໂຫຕິ? ໂຍ ຕສ຺ມິໍ ສມເຍ ຈາໂຣ ວິຈາໂຣ ອນຸວິຈາໂຣ ອຸປວິຈາໂຣ ຈິຕ຺ຕສ຺ສ ອນຸສນ຺ຘານຕາ ອນຸເປກ຺ຂນຕາ – ອຍໍ ຕສ຺ມິໍ ສມເຍ ວິຈາໂຣ ໂຫຕິ.

໓໗໓. ກຕມາ ຕສ຺ມິໍ ສມເຍ ປີຕິ ໂຫຕິ? ຍາ ຕສ຺ມິໍ ສມເຍ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ – ອຍໍ ຕສ຺ມິໍ ສມເຍ ປີຕິ ໂຫຕິ.

໓໗໔. ກຕມໍ ຕສ຺ມິໍ ສມເຍ ສຸຂໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ສຸຂໍ ໂຫຕິ.

໓໗໕. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ມິຈ຺ຉາສມາຘິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໓໗໖. ກຕມໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ມິຈ຺ຉາວາຍາໂມ – ອິທໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ.

໓໗໗. ກຕມໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ມິຈ຺ຉາສມາຘິ – ອິທໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ?

໓໗໘. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໓໗໙. ກຕມໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ.

໓໘໐. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ.

໓໘໑. ກຕມາ ຕສ຺ມິໍ ສມເຍ ມິຈ຺ຉາທິຏ຺ຐິ ໂຫຕິ? ຍາ ຕສ຺ມິໍ ສມເຍ ທິຏ຺ຐິ ທິຏ຺ຐິຄຕໍ ທິຏ຺ຐິຄຫນໍ ທິຏ຺ຐິກນ຺ຕາໂຣ ທິຏ຺ຐິວິສູກາຍິກໍ ທິຏ຺ຐິວິປ຺ຜນ຺ທິຕໍ ທິຏ຺ຐິສໍໂຍຊນໍ ຄາໂຫ ປຕິຏ຺ຐາໂຫ [ປຏິຄ຺ຄາໂຫ (ສີ. ສ຺ຍາ.)] ອຠິນິເວໂສ ປຣາມາໂສ ກຸມ຺ມຄ຺ໂຄ ມິຈ຺ຉາປໂຖ ມິຈ຺ຉຕ຺ຕໍ ຕິຕ຺ຖາຍຕນໍ ວິປຣິຍາສຄ຺ຄາໂຫ [ວິປຣິເຍສຄາໂຫ (ກ.)] – ອຍໍ ຕສ຺ມິໍ ສມເຍ ມິຈ຺ຉາທິຏ຺ຐິ ໂຫຕິ.

໓໘໒. ກຕໂມ ຕສ຺ມິໍ ສມເຍ ມິຈ຺ຉາສງ຺ກປ຺ໂປ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ມິຈ຺ຉາສງ຺ກປ຺ໂປ – ອຍໍ ຕສ຺ມິໍ ສມເຍ ມິຈ຺ຉາສງ຺ກປ຺ໂປ ໂຫຕິ.

໓໘໓. ກຕໂມ ຕສ຺ມິໍ ສມເຍ ມິຈ຺ຉາວາຍາໂມ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ມິຈ຺ຉາວາຍາໂມ – ອຍໍ ຕສ຺ມິໍ ສມເຍ ມິຈ຺ຉາວາຍາໂມ ໂຫຕິ.

໓໘໔. ກຕໂມ ຕສ຺ມິໍ ສມເຍ ມິຈ຺ຉາສມາຘິ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ມິຈ຺ຉາສມາຘິ – ອຍໍ ຕສ຺ມິໍ ສມເຍ ມິຈ຺ຉາສມາຘິ ໂຫຕິ.

໓໘໕. ກຕມໍ ຕສ຺ມິໍ ສມເຍ ວີຣິຍພລໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ມິຈ຺ຉາວາຍາໂມ – ອິທໍ ຕສ຺ມິໍ ສມເຍ ວີຣິຍພລໍ ໂຫຕິ.

໓໘໖. ກຕມໍ ຕສ຺ມິໍ ສມເຍ ສມາຘິພລໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ມິຈ຺ຉາສມາຘິ – ອິທໍ ຕສ຺ມິໍ ສມເຍ ສມາຘິພລໍ ໂຫຕິ.

໓໘໗. ກຕມໍ ຕສ຺ມິໍ ສມເຍ ອຫິຣິກພລໍ ໂຫຕິ? ຍໍ ຕສ຺ມິໍ ສມເຍ ນ ຫິຣີຍຕິ ຫິຣິຍິຕພ຺ເພນ ນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ອຫິຣິກພລໍ ໂຫຕິ.

໓໘໘. ກຕມໍ ຕສ຺ມິໍ ສມເຍ ອໂນຕ຺ຕປ຺ປພລໍ ໂຫຕິ? ຍໍ ຕສ຺ມິໍ ສມເຍ ນ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ອໂນຕ຺ຕປ຺ປພລໍ ໂຫຕິ.

໓໘໙. ກຕໂມ ຕສ຺ມິໍ ສມເຍ ໂລໂຠ ໂຫຕິ? ໂຍ ຕສ຺ມິໍ ສມເຍ ໂລໂຠ ລຸພ຺ຠນາ ລຸພ຺ຠິຕຕ຺ຕໍ ສາຣາໂຄ ສາຣຊ຺ຊນາ ສາຣຊ຺ຊິຕຕ຺ຕໍ ອຠິຊ຺ຌາ ໂລໂຠ ອກຸສລມູລໍ – ອຍໍ ຕສ຺ມິໍ ສມເຍ ໂລໂຠ ໂຫຕິ.

໓໙໐. ກຕໂມ ຕສ຺ມິໍ ສມເຍ ໂມໂຫ ໂຫຕິ? ຍໍ ຕສ຺ມິໍ ສມເຍ ອຎ຺ຎາຓໍ ອທສ຺ສນໍ ອນຠິສມໂຍ ອນນຸໂພໂຘ ອສມ຺ໂພໂຘ ອປ຺ປຏິເວໂຘ ອສໍຄາຫນາ ອປຣິໂຍຄາຫນາ ອສມເປກ຺ຂນາ ອປຈ຺ຈເວກ຺ຂນາ ອປຈ຺ຈກ຺ຂກມ຺ມໍ ທຸມ຺ເມຊ຺ຌໍ ພາລ຺ຍໍ ອສມ຺ປຊຎ຺ຎໍ ໂມໂຫ ປໂມໂຫ ສມ຺ໂມໂຫ ອວິຊ຺ຊາ ອວິຊ຺ໂຊໂຆ ອວິຊ຺ຊາໂຍໂຄ ອວິຊ຺ຊານຸສໂຍ ອວິຊ຺ຊາປຣິຍຸຏ຺ຐານໍ ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ຕສ຺ມິໍ ສມເຍ ໂມໂຫ ໂຫຕິ.

໓໙໑. ກຕມາ ຕສ຺ມິໍ ສມເຍ ອຠິຊ຺ຌາ ໂຫຕິ? ໂຍ ຕສ຺ມິໍ ສມເຍ ໂລໂຠ ລຸພ຺ຠນາ ລຸພ຺ຠິຕຕ຺ຕໍ ສາຣາໂຄ ສາຣຊ຺ຊນາ ສາຣຊ຺ຊິຕຕ຺ຕໍ ອຠິຊ຺ຌາ ໂລໂຠ ອກຸສລມູລໍ – ອຍໍ ຕສ຺ມິໍ ສມເຍ ອຠິຊ຺ຌາ ໂຫຕິ.

໓໙໒. ກຕມາ ຕສ຺ມິໍ ສມເຍ ມິຈ຺ຉາທິຏ຺ຐິ ໂຫຕິ? ຍາ ຕສ຺ມິໍ ສມເຍ ທິຏ຺ຐິ ທິຏ຺ຐິຄຕໍ ທິຏ຺ຐິຄຫນໍ ທິຏ຺ຐິກນ຺ຕາໂຣ ທິຏ຺ຐິວິສູກາຍິກໍ ທິຏ຺ຐິວິປ຺ຜນ຺ທິຕໍ ທິຏ຺ຐິສໍໂຍຊນໍ ຄາໂຫ ປຕິຏ຺ຐາໂຫ ອຠິນິເວໂສ ປຣາມາໂສ ກຸມ຺ມຄ຺ໂຄ ມິຈ຺ຉາປໂຖ ມິຈ຺ຉຕ຺ຕໍ ຕິຕ຺ຖາຍຕນໍ ວິປຣິຍາສຄ຺ຄາໂຫ – ອຍໍ ຕສ຺ມິໍ ສມເຍ ມິຈ຺ຉາທິຏ຺ຐິ ໂຫຕິ.

໓໙໓. ກຕມໍ ຕສ຺ມິໍ ສມເຍ ອຫິຣິກໍ ໂຫຕິ? ຍໍ ຕສ຺ມິໍ ສມເຍ ນ ຫິຣີຍຕິ ຫິຣິຍິຕພ຺ເພນ ນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ອຫິຣິກໍ ໂຫຕິ.

໓໙໔. ກຕມໍ ຕສ຺ມິໍ ສມເຍ ອໂນຕ຺ຕປ຺ປໍ ໂຫຕິ? ຍໍ ຕສ຺ມິໍ ສມເຍ ນ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ອໂນຕ຺ຕປ຺ປໍ ໂຫຕິ.

໓໙໕. ກຕໂມ ຕສ຺ມິໍ ສມເຍ ສມໂຖ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ມິຈ຺ຉາສມາຘິ – ອຍໍ ຕສ຺ມິໍ ສມເຍ ສມໂຖ ໂຫຕິ.

໓໙໖. ກຕໂມ ຕສ຺ມິໍ ສມເຍ ປຄ຺ຄາໂຫ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ມິຈ຺ຉາວາຍາໂມ – ອຍໍ ຕສ຺ມິໍ ສມເຍ ປຄ຺ຄາໂຫ ໂຫຕິ.

໓໙໗. ກຕໂມ ຕສ຺ມິໍ ສມເຍ ອວິກ຺ເຂໂປ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ມິຈ຺ຉາສມາຘິ – ອຍໍ ຕສ຺ມິໍ ສມເຍ ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ປຎ຺ຈິນ຺ທ຺ຣິຍານິ ໂຫນ຺ຕິ, ປຎ຺ຈງ຺ຄິກໍ ຌານໍ ໂຫຕິ, ຈຕຸຣງ຺ຄິໂກ ມຄ຺ໂຄ ໂຫຕິ, ຈຕ຺ຕາຣິ ພລານິ ໂຫນ຺ຕິ, ທ຺ເວ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

໓໙໘. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາທິຏ຺ຐິ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ມິຈ຺ຉາສມາຘິ ວີຣິຍພລໍ ສມາຘິພລໍ ອຫິຣິກພລໍ ອໂນຕ຺ຕປ຺ປພລໍ ໂລໂຠ ໂມໂຫ ອຠິຊ຺ຌາ ມິຈ຺ຉາທິຏ຺ຐິ ອຫິຣິກໍ ອໂນຕ຺ຕປ຺ປໍ ສມໂຖ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອກຸສລາ.

໓໙໙. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ທິຏ຺ຐິຄຕສມ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອກຸສລາ.

໔໐໐. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ທິຏ຺ຐິຄຕວິປ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ປີຕິ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ໂສມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສມາຘິ ໂຫຕິ, ວີຣິຍພລໍ ໂຫຕິ, ສມາຘິພລໍ ໂຫຕິ, ອຫິຣິກພລໍ ໂຫຕິ, ອໂນຕ຺ຕປ຺ປພລໍ ໂຫຕິ, ໂລໂຠ ໂຫຕິ, ໂມໂຫ ໂຫຕິ, ອຠິຊ຺ຌາ ໂຫຕິ, ອຫິຣິກໍ ໂຫຕິ, ອໂນຕ຺ຕປ຺ປໍ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ປຎ຺ຈິນ຺ທ຺ຣິຍານິ ໂຫນ຺ຕິ, ປຎ຺ຈງ຺ຄິກໍ ຌານໍ ໂຫຕິ, ຕິວງ຺ຄິໂກ ມຄ຺ໂຄ ໂຫຕິ, ຈຕ຺ຕາຣິ ພລານິ ໂຫນ຺ຕິ, ທ຺ເວ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

໔໐໑. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ມິຈ຺ຉາສມາຘິ ວີຣິຍພລໍ ສມາຘິພລໍ ອຫິຣິກພລໍ ອໂນຕ຺ຕປ຺ປພລໍ ໂລໂຠ ໂມໂຫ ອຠິຊ຺ຌາ ອຫິຣິກໍ ອໂນຕ຺ຕປ຺ປໍ ສມໂຖ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອກຸສລາ.

໔໐໒. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ທິຏ຺ຐິຄຕວິປ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອກຸສລາ.

໔໐໓. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ທິຏ຺ຐິຄຕສມ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ມິຈ຺ຉາທິຏ຺ຐິ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສມາຘິ ໂຫຕິ, ວີຣິຍພລໍ ໂຫຕິ, ສມາຘິພລໍ ໂຫຕິ, ອຫິຣິກພລໍ ໂຫຕິ, ອໂນຕ຺ຕປ຺ປພລໍ ໂຫຕິ, ໂລໂຠ ໂຫຕິ, ໂມໂຫ ໂຫຕິ, ອຠິຊ຺ຌາ ໂຫຕິ, ມິຈ຺ຉາທິຏ຺ຐິ ໂຫຕິ, ອຫິຣິກໍ ໂຫຕິ, ອໂນຕ຺ຕປ຺ປໍ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

໔໐໔. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໔໐໕. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ…ເປ….

໔໐໖. ກຕມາ ຕສ຺ມິໍ ສມເຍ ອຸເປກ຺ຂາ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ອຸເປກ຺ຂາ ໂຫຕິ…ເປ….

໔໐໗. ກຕມໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອິທໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ…ເປ… ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ປຎ຺ຈິນ຺ທ຺ຣິຍານິ ໂຫນ຺ຕິ, ຈຕຸຣງ຺ຄິກໍ ຌານໍ ໂຫຕິ, ຈຕຸຣງ຺ຄິໂກ ມຄ຺ໂຄ ໂຫຕິ, ຈຕ຺ຕາຣິ ພລານິ ໂຫນ຺ຕິ, ທ຺ເວ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

໔໐໘. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາທິຏ຺ຐິ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ມິຈ຺ຉາສມາຘິ ວີຣິຍພລໍ ສມາຘິພລໍ ອຫິຣິກພລໍ ອໂນຕ຺ຕປ຺ປພລໍ ໂລໂຠ ໂມໂຫ ອຠິຊ຺ຌາ ມິຈ຺ຉາທິຏ຺ຐິ ອຫິຣິກໍ ອໂນຕ຺ຕປ຺ປໍ ສມໂຖ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອກຸສລາ.

໔໐໙. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ທິຏ຺ຐິຄຕສມ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອກຸສລາ.

໔໑໐. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ທິຏ຺ຐິຄຕວິປ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສມາຘິ ໂຫຕິ, ວີຣິຍພລໍ ໂຫຕິ, ສມາຘິພລໍ ໂຫຕິ, ອຫິຣິກພລໍ ໂຫຕິ, ອໂນຕ຺ຕປ຺ປພລໍ ໂຫຕິ, ໂລໂຠ ໂຫຕິ, ໂມໂຫ ໂຫຕິ, ອຠິຊ຺ຌາ ໂຫຕິ, ອຫິຣິກໍ ໂຫຕິ, ອໂນຕ຺ຕປ຺ປໍ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ປຎ຺ຈິນ຺ທ຺ຣິຍານິ ໂຫນ຺ຕິ, ຈຕຸຣງ຺ຄິກໍ ຌານໍ ໂຫຕິ, ຕິວງ຺ຄິໂກ ມຄ຺ໂຄ ໂຫຕິ, ຈຕ຺ຕາຣິ ພລານິ ໂຫນ຺ຕິ, ທ຺ເວ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

໔໑໑. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ມິຈ຺ຉາສມາຘິ ວີຣິຍພລໍ ສມາຘິພລໍ ອຫິຣິກພລໍ ອໂນຕ຺ຕປ຺ປພລໍ ໂລໂຠ ໂມໂຫ ອຠິຊ຺ຌາ ອຫິຣິກໍ ອໂນຕ຺ຕປ຺ປໍ ສມໂຖ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອກຸສລາ.

໔໑໒. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ທິຏ຺ຐິຄຕວິປ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອກຸສລາ.

໔໑໓. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂທມນສ຺ສສຫຄຕໍ ປຏິຆສມ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ທຸກ຺ຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ໂທມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສມາຘິ ໂຫຕິ, ວີຣິຍພລໍ ໂຫຕິ, ສມາຘິພລໍ ໂຫຕິ, ອຫິຣິກພລໍ ໂຫຕິ, ອໂນຕ຺ຕປ຺ປພລໍ ໂຫຕິ, ໂທໂສ ໂຫຕິ, ໂມໂຫ ໂຫຕິ, ພ຺ຍາປາໂທ ໂຫຕິ, ອຫິຣິກໍ ໂຫຕິ, ອໂນຕ຺ຕປ຺ປໍ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

໔໑໔. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໔໑໕. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ…ເປ….

໔໑໖. ກຕມໍ ຕສ຺ມິໍ ສມເຍ ທຸກ຺ຂໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ຕສ຺ມິໍ ສມເຍ ທຸກ຺ຂໍ ໂຫຕິ…ເປ….

໔໑໗. ກຕມໍ ຕສ຺ມິໍ ສມເຍ ໂທມນສ຺ສິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ຕສ຺ມິໍ ສມເຍ ໂທມນສ຺ສິນ຺ທ຺ຣິຍໍ ໂຫຕິ…ເປ….

໔໑໘. ກຕໂມ ຕສ຺ມິໍ ສມເຍ ໂທໂສ ໂຫຕິ? ໂຍ ຕສ຺ມິໍ ສມເຍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ພ຺ຍາປຊ຺ຊິຕຕ຺ຕໍ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ຕສ຺ມິໍ ສມເຍ ໂທໂສ ໂຫຕິ…ເປ….

໔໑໙. ກຕໂມ ຕສ຺ມິໍ ສມເຍ ພ຺ຍາປາໂທ ໂຫຕິ? ໂຍ ຕສ຺ມິໍ ສມເຍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ພ຺ຍາປຊ຺ຊິຕຕ຺ຕໍ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ຕສ຺ມິໍ ສມເຍ ພ຺ຍາປາໂທ ໂຫຕິ…ເປ… ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

໔໒໐. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ມິຈ຺ຉາສມາຘິ ວີຣິຍພລໍ ສມາຘິພລໍ ອຫິຣິກພລໍ ອໂນຕ຺ຕປ຺ປພລໍ ໂທໂສ ໂມໂຫ ພ຺ຍາປາໂທ ອຫິຣິກໍ ອໂນຕ຺ຕປ຺ປໍ ສມໂຖ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອກຸສລາ.

໔໒໑. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂທມນສ຺ສສຫຄຕໍ ປຏິຆສມ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອກຸສລາ.

໔໒໒. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ວິຈິກິຈ຺ຉາສມ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາຍາໂມ ໂຫຕິ, ວີຣິຍພລໍ ໂຫຕິ, ອຫິຣິກພລໍ ໂຫຕິ, ອໂນຕ຺ຕປ຺ປພລໍ ໂຫຕິ, ວິຈິກິຈ຺ຉາ ໂຫຕິ, ໂມໂຫ ໂຫຕິ, ອຫິຣິກໍ ໂຫຕິ, ອໂນຕ຺ຕປ຺ປໍ ໂຫຕິ, ປຄ຺ຄາໂຫ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

໔໒໓. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ…ເປ….

໔໒໔. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ…ເປ….

໔໒໕. ກຕມາ ຕສ຺ມິໍ ສມເຍ ວິຈິກິຈ຺ຉາ ໂຫຕິ? ຍາ ຕສ຺ມິໍ ສມເຍ ກງ຺ຂາ ກງ຺ຂາຍນາ ກງ຺ຂາຍິຕຕ຺ຕໍ ວິມຕິ ວິຈິກິຈ຺ຉາ ທ຺ເວຬ຺ຫກໍ ທ຺ເວຘາປໂຖ ສໍສໂຍ ອເນກໍສຄ຺ຄາໂຫ ອາສປ຺ປນາ ປຣິສປ຺ປນາ ອປຣິໂຍຄາຫນາ ຖມ຺ຠິຕຕ຺ຕໍ ຈິຕ຺ຕສ຺ສ ມໂນວິເລໂຂ – ອຍໍ ຕສ຺ມິໍ ສມເຍ ວິຈິກິຈ຺ຉາ ໂຫຕິ…ເປ… ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ຈຕ຺ຕາຣິ ອິນ຺ທ຺ຣິຍານິ ໂຫນ຺ຕິ, ຈຕຸຣງ຺ຄິກໍ ຌານໍ ໂຫຕິ, ທຸວງ຺ຄິໂກ ມຄ຺ໂຄ ໂຫຕິ, ຕີຓິ ພລານິ ໂຫນ຺ຕິ, ເອໂກ ເຫຕຸ ໂຫຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

໔໒໖. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ວີຣິຍພລໍ ອຫິຣິກພລໍ ອໂນຕ຺ຕປ຺ປພລໍ ວິຈິກິຈ຺ຉາ ໂມໂຫ ອຫິຣິກໍ ອໂນຕ຺ຕປ຺ປໍ ປຄ຺ຄາໂຫ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອກຸສລາ.

໔໒໗. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ອຸທ຺ຘຈ຺ຈສມ຺ປຍຸຕ຺ຕໍ ຣູປາຣມ຺ມຓໍ ວາ…ເປ… ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສມາຘິ ໂຫຕິ, ວີຣິຍພລໍ ໂຫຕິ, ສມາຘິພລໍ ໂຫຕິ, ອຫິຣິກພລໍ ໂຫຕິ, ອໂນຕ຺ຕປ຺ປພລໍ ໂຫຕິ, ອຸທ຺ຘຈ຺ຈໍ ໂຫຕິ, ໂມໂຫ ໂຫຕິ, ອຫິຣິກໍ ໂຫຕິ, ອໂນຕ຺ຕປ຺ປໍ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

໔໒໘. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ…ເປ….

໔໒໙. ກຕມໍ ຕສ຺ມິໍ ສມເຍ ອຸທ຺ຘຈ຺ຈໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕສ຺ສ ອຸທ຺ຘຈ຺ຈໍ ອວູປສໂມ ເຈຕໂສ ວິກ຺ເຂໂປ ຠນ຺ຕຕ຺ຕໍ ຈິຕ຺ຕສ຺ສ – ອິທໍ ຕສ຺ມິໍ ສມເຍ ອຸທ຺ຘຈ຺ຈໍ ໂຫຕິ …ເປ… ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ປຎ຺ຈິນ຺ທ຺ຣິຍານິ ໂຫນ຺ຕິ, ຈຕຸຣງ຺ຄິກໍ ຌານໍ ໂຫຕິ, ຕິວງ຺ຄິໂກ ມຄ຺ໂຄ ໂຫຕິ, ຈຕ຺ຕາຣິ ພລານິ ໂຫນ຺ຕິ, ເອໂກ ເຫຕຸ ໂຫຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອກຸສລາ…ເປ….

໔໓໐. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາສງ຺ກປ຺ໂປ ມິຈ຺ຉາວາຍາໂມ ມິຈ຺ຉາສມາຘິ ວີຣິຍພລໍ ສມາຘິພລໍ ອຫິຣິກພລໍ ອໂນຕ຺ຕປ຺ປພລໍ ອຸທ຺ຘຈ຺ຈໍ ໂມໂຫ ອຫິຣິກໍ ອໂນຕ຺ຕປ຺ປໍ ສມໂຖ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອກຸສລາ.

ທ຺ວາທສ ອກຸສລຈິຕ຺ຕານິ.