ອພ຺ຍາກຕວິປາໂກ

ກຸສລວິປາກປຎ຺ຈວິຎ຺ຎາຓານິ

໔໓໑. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ຈກ຺ຂຸວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຣູປາຣມ຺ມຓໍ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

໔໓໒. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໔໓໓. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາຈກ຺ຂຸວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.

໔໓໔. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາຈກ຺ຂຸວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໔໓໕. ກຕມາ ຕສ຺ມິໍ ສມເຍ ເຈຕນາ ໂຫຕິ? ຍາ ຕສ຺ມິໍ ສມເຍ ຕຊ຺ຊາຈກ຺ຂຸວິຎ຺ຎາຓຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເຈຕນາ ໂຫຕິ.

໔໓໖. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາຈກ຺ຂຸວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໔໓໗. ກຕມາ ຕສ຺ມິໍ ສມເຍ ອຸເປກ຺ຂາ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ອຸເປກ຺ຂາ ໂຫຕິ.

໔໓໘. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໔໓໙. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາຈກ຺ຂຸວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໔໔໐. ກຕມໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອິທໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ.

໔໔໑. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ຕີຓິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ຈກ຺ຂຸວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໔໔໒. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ຈິຕ຺ຕສ຺ເສກຄ຺ຄຕາ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໔໔໓. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ໂສຕວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ສທ຺ທາຣມ຺ມຓໍ…ເປ… ຆານວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຄນ຺ຘາຣມ຺ມຓໍ…ເປ… ຊິວ຺ຫາວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຣສາຣມ຺ມຓໍ…ເປ… ກາຍວິຎ຺ຎາຓໍ ອຸປ຺ປນ຺ນໍ ໂຫຕິ ສຸຂສຫຄຕໍ ໂຜຏ຺ຐພ຺ພາຣມ຺ມຓໍ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ມນິນ຺ທ຺ຣິຍໍ ໂຫຕິ, ສຸຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

໔໔໔. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໔໔໕. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາກາຍວິຎ຺ຎາຓຘາຕຸສມ຺ຜສ຺ສຊໍ ກາຍິກໍ ສາຕໍ ກາຍິກໍ ສຸຂໍ ກາຍສມ຺ຜສ຺ສຊໍ ສາຕໍ ສຸຂໍ ເວທຍິຕໍ ກາຍສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.

໔໔໖. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາກາຍວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໔໔໗. ກຕມາ ຕສ຺ມິໍ ສມເຍ ເຈຕນາ ໂຫຕິ? ຍາ ຕສ຺ມິໍ ສມເຍ ຕຊ຺ຊາກາຍວິຎ຺ຎາຓຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເຈຕນາ ໂຫຕິ.

໔໔໘. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາກາຍວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໔໔໙. ກຕມໍ ຕສ຺ມິໍ ສມເຍ ສຸຂໍ ໂຫຕິ? ຍໍ ຕສ຺ມິໍ ສມເຍ ກາຍິກໍ ສາຕໍ ກາຍິກໍ ສຸຂໍ ກາຍສມ຺ຜສ຺ສຊໍ ສາຕໍ ສຸຂໍ ເວທຍິຕໍ ກາຍສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ສຸຂໍ ໂຫຕິ.

໔໕໐. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໔໕໑. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາກາຍວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໔໕໒. ກຕມໍ ຕສ຺ມິໍ ສມເຍ ສຸຂິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ກາຍິກໍ ສາຕໍ ກາຍິກໍ ສຸຂໍ ກາຍສມ຺ຜສ຺ສຊໍ ສາຕໍ ສຸຂໍ ເວທຍິຕໍ ກາຍສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ສຸຂິນ຺ທ຺ຣິຍໍ ໂຫຕິ.

໔໕໓. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ຕີຓິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ກາຍວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໔໕໔. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ຈິຕ຺ຕສ຺ເສກຄ຺ຄຕາ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ກຸສລວິປາການິ ປຎ຺ຈວິຎ຺ຎາຓານິ.

ກຸສລວິປາກມໂນຘາຕຸ

໔໕໕. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກາ ມໂນຘາຕຸ ອຸປ຺ປນ຺ນາ ໂຫຕິ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ໂຜຏ຺ຐພ຺ພາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

໔໕໖. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໔໕໗. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນຘາຕຸສມ຺ຜສ຺ສຊໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.

໔໕໘. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໔໕໙. ກຕມາ ຕສ຺ມິໍ ສມເຍ ເຈຕນາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເຈຕນາ ໂຫຕິ.

໔໖໐. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໔໖໑. ກຕໂມ ຕສ຺ມິໍ ສມເຍ ວິຕກ຺ໂກ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ – ອຍໍ ຕສ຺ມິໍ ສມເຍ ວິຕກ຺ໂກ ໂຫຕິ.

໔໖໒. ກຕໂມ ຕສ຺ມິໍ ສມເຍ ວິຈາໂຣ ໂຫຕິ? ໂຍ ຕສ຺ມິໍ ສມເຍ ຈາໂຣ ວິຈາໂຣ ອນຸວິຈາໂຣ ອຸປວິຈາໂຣ ຈິຕ຺ຕສ຺ສ ອນຸສນ຺ຘານຕາ ອນຸເປກ຺ຂນຕາ – ອຍໍ ຕສ຺ມິໍ ສມເຍ ວິຈາໂຣ ໂຫຕິ.

໔໖໓. ກຕມາ ຕສ຺ມິໍ ສມເຍ ອຸເປກ຺ຂາ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ອຸເປກ຺ຂາ ໂຫຕິ.

໔໖໔. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໔໖໕. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໔໖໖. ກຕມໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອິທໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ.

໔໖໗. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ຕີຓິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ມໂນຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໔໖໘. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ກຸສລວິປາກາ ມໂນຘາຕຸ.

ກຸສລວິປາກມໂນວິຎ຺ຎາຓຘາຕຸໂສມນສ຺ສສຫຄຕາ

໔໖໙. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກາ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ໂສມນສ຺ສສຫຄຕາ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ປີຕິ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ມນິນ຺ທ຺ຣິຍໍ ໂຫຕິ, ໂສມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

໔໗໐. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໔໗໑. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.

໔໗໒. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໔໗໓. ກຕມາ ຕສ຺ມິໍ ສມເຍ ເຈຕນາ ໂຫຕິ. ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເຈຕນາ ໂຫຕິ.

໔໗໔. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໔໗໕. ກຕໂມ ຕສ຺ມິໍ ສມເຍ ວິຕກ຺ໂກ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ – ອຍໍ ຕສ຺ມິໍ ສມເຍ ວິຕກ຺ໂກ ໂຫຕິ.

໔໗໖. ກຕໂມ ຕສ຺ມິໍ ສມເຍ ວິຈາໂຣ ໂຫຕິ? ໂຍ ຕສ຺ມິໍ ສມເຍ ຈາໂຣ ວິຈາໂຣ ອນຸວິຈາໂຣ ອຸປວິຈາໂຣ ຈິຕ຺ຕສ຺ສ ອນຸສນ຺ຘານຕາ ອນຸເປກ຺ຂນຕາ – ອຍໍ ຕສ຺ມິໍ ສມເຍ ວິຈາໂຣ ໂຫຕິ.

໔໗໗. ກຕມາ ຕສ຺ມິໍ ສມເຍ ປີຕິ ໂຫຕິ? ຍາ ຕສ຺ມິໍ ສມເຍ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ – ອຍໍ ຕສ຺ມິໍ ສມເຍ ປີຕິ ໂຫຕິ.

໔໗໘. ກຕມໍ ຕສ຺ມິໍ ສມເຍ ສຸຂໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ສຸຂໍ ໂຫຕິ.

໔໗໙. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໔໘໐. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໔໘໑. ກຕມໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ.

໔໘໒. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ຕີຓິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ມໂນວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໔໘໓. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ກຸສລວິປາກາ ມໂນວິຎ຺ຎາຓຘາຕຸ ໂສມນສ຺ສສຫຄຕາ.

ກຸສລວິປາກມໂນວິຎ຺ຎາຓຘາຕຸອຸເປກ຺ຂາສຫຄຕາ

໔໘໔. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກາ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

໔໘໕. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໔໘໖. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.

໔໘໗. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໔໘໘. ກຕມາ ຕສ຺ມິໍ ສມເຍ ເຈຕນາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເຈຕນາ ໂຫຕິ.

໔໘໙. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໔໙໐. ກຕໂມ ຕສ຺ມິໍ ສມເຍ ວິຕກ຺ໂກ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ – ອຍໍ ຕສ຺ມິໍ ສມເຍ ວິຕກ຺ໂກ ໂຫຕິ.

໔໙໑. ກຕໂມ ຕສ຺ມິໍ ສມເຍ ວິຈາໂຣ ໂຫຕິ? ໂຍ ຕສ຺ມິໍ ສມເຍ ຈາໂຣ ວິຈາໂຣ ອນຸວິຈາໂຣ ອຸປວິຈາໂຣ ຈິຕ຺ຕສ຺ສ ອນຸສນ຺ຘານຕາ ອນຸເປກ຺ຂນຕາ – ອຍໍ ຕສ຺ມິໍ ສມເຍ ວິຈາໂຣ ໂຫຕິ.

໔໙໒. ກຕມາ ຕສ຺ມິໍ ສມເຍ ອຸເປກ຺ຂາ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ອຸເປກ຺ຂາ ໂຫຕິ.

໔໙໓. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໔໙໔. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໔໙໕. ກຕມໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອິທໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ.

໔໙໖. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ຕີຓິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ມໂນວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໔໙໗. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ກຸສລວິປາກາ ອຸເປກ຺ຂາສຫຄຕາ ມໂນວິຎ຺ຎາຓຘາຕຸ.

ອຏ຺ຐມຫາວິປາກາ

໔໙໘. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກາ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ໂສມນສ຺ສສຫຄຕາ ຎາຓສມ຺ປຍຸຕ຺ຕາ…ເປ… ໂສມນສ຺ສສຫຄຕາ ຎາຓສມ຺ປຍຸຕ຺ຕາ ສສງ຺ຂາເຣນ…ເປ… ໂສມນສ຺ສສຫຄຕາ ຎາຓວິປ຺ປຍຸຕ຺ຕາ…ເປ… ໂສມນສ຺ສສຫຄຕາ ຎາຓວິປ຺ປຍຸຕ຺ຕາ ສສງ຺ຂາເຣນ…ເປ… ອຸເປກ຺ຂາສຫຄຕາ ຎາຓສມ຺ປຍຸຕ຺ຕາ…ເປ… ອຸເປກ຺ຂາສຫຄຕາ ຎາຓສມ຺ປຍຸຕ຺ຕາ ສສງ຺ຂາເຣນ…ເປ… ອຸເປກ຺ຂາສຫຄຕາ ຎາຓວິປ຺ປຍຸຕ຺ຕາ…ເປ… ອຸເປກ຺ຂາສຫຄຕາ ຎາຓວິປ຺ປຍຸຕ຺ຕາ ສສງ຺ຂາເຣນ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ …ເປ… ອິເມ ຘມ຺ມາ ອພ຺ຍາກຕາ…ເປ… ອໂລໂຠ ອພ຺ຍາກຕມູລໍ…ເປ… ອໂທໂສ ອພ຺ຍາກຕມູລໍ…ເປ… ອິເມ ຘມ຺ມາ ອພ຺ຍາກຕາ.

ອຏ຺ຐມຫາວິປາກາ.

ຣູປາວຈຣວິປາກາ

໔໙໙. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ປຖວີກສິຓໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ປຖວີກສິຓໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໐໐. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ຣູປູປປຕ຺ຕິຍາ ມຄ຺ຄໍ ຠາເວຕິ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ປຖວີກສິຓໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ. ຕສ຺ເສວ ຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ສຸຂສ຺ສ ຈ ປຫານາ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ປຖວີກສິຓໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ຣູປາວຈຣວິປາກາ.

ອຣູປາວຈຣວິປາກາ

໕໐໑. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປູປປຕ຺ຕິຍາ ມຄ຺ຄໍ ຠາເວຕິ ສພ຺ພໂສ ຣູປສຎ຺ຎານໍ ສມຕິກ຺ກມາ ປຏິຆສຎ຺ຎານໍ ອຕ຺ຖງ຺ຄມາ ນານຕ຺ຕສຎ຺ຎານໍ ອມນສິກາຣາ ອາກາສານຎ຺ຈາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ. ຕສ຺ເສວ ອຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ສພ຺ພໂສ ຣູປສຎ຺ຎານໍ ສມຕິກ຺ກມາ ປຏິຆສຎ຺ຎານໍ ອຕ຺ຖງ຺ຄມາ ນານຕ຺ຕສຎ຺ຎານໍ ອມນສິກາຣາ ອາກາສານຎ຺ຈາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໐໒. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປູປປຕ຺ຕິຍາ ມຄ຺ຄໍ ຠາເວຕິ ສພ຺ພໂສ ອາກາສານຎ຺ຈາຍຕນໍ ສມຕິກ຺ກມ຺ມ ວິຎ຺ຎາຓຎ຺ຈາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ. ຕສ຺ເສວ ອຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ສພ຺ພໂສ ອາກາສານຎ຺ຈາຍຕນໍ ສມຕິກ຺ກມ຺ມ ວິຎ຺ຎາຓຎ຺ຈາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໐໓. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປູປປຕ຺ຕິຍາ ມຄ຺ຄໍ ຠາເວຕິ ສພ຺ພໂສ ວິຎ຺ຎາຓຎ຺ຈາຍຕນໍ ສມຕິກ຺ກມ຺ມ ອາກິຎ຺ຈຎ຺ຎາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ. ຕສ຺ເສວ ອຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ສພ຺ພໂສ ວິຎ຺ຎາຓຎ຺ຈາຍຕນໍ ສມຕິກ຺ກມ຺ມ ອາກິຎ຺ຈຎ຺ຎາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໐໔. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປູປປຕ຺ຕິຍາ ມຄ຺ຄໍ ຠາເວຕິ ສພ຺ພໂສ ອາກິຎ຺ຈຎ຺ຎາຍຕນໍ ສມຕິກ຺ກມ຺ມ ເນວສຎ຺ຎານາສຎ຺ຎາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ. ຕສ຺ເສວ ອຣູປາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ສພ຺ພໂສ ອາກິຎ຺ຈຎ຺ຎາຍຕນໍ ສມຕິກ຺ກມ຺ມ ເນວສຎ຺ຎານາສຎ຺ຎາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ອຣູປາວຈຣວິປາກາ.