ໂລກຸຕ຺ຕຣກຸສລໍ

ສຸທ຺ຘິກປຏິປທາ

໒໗໗. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ປີຕິ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ສທ຺ຘິນ຺ທ຺ຣິຍໍ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສຕິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ປຎ຺ຎິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ໂສມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ໂຫຕິ, ສມ຺ມາທິຏ຺ຐິ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາຈາ ໂຫຕິ, ສມ຺ມາກມ຺ມນ຺ໂຕ ໂຫຕິ, ສມ຺ມາອາຊີໂວ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ, ສທ຺ຘາພລໍ ໂຫຕິ, ວີຣິຍພລໍ ໂຫຕິ, ສຕິພລໍ ໂຫຕິ, ສມາຘິພລໍ ໂຫຕິ, ປຎ຺ຎາພລໍ ໂຫຕິ, ຫິຣິພລໍ ໂຫຕິ, ໂອຕ຺ຕປ຺ປພລໍ ໂຫຕິ, ອໂລໂຠ ໂຫຕິ, ອໂທໂສ ໂຫຕິ, ອໂມໂຫ ໂຫຕິ, ອນຠິຊ຺ຌາ ໂຫຕິ, ອພ຺ຍາປາໂທ ໂຫຕິ, ສມ຺ມາທິຏ຺ຐິ ໂຫຕິ, ຫິຣີ ໂຫຕິ, ໂອຕ຺ຕປ຺ປໍ ໂຫຕິ, ກາຍປສ຺ສທ຺ຘິ ໂຫຕິ, ຈິຕ຺ຕປສ຺ສທ຺ຘິ ໂຫຕິ, ກາຍລຫຸຕາ ໂຫຕິ, ຈິຕ຺ຕລຫຸຕາ ໂຫຕິ, ກາຍມຸທຸຕາ ໂຫຕິ, ຈິຕ຺ຕມຸທຸຕາ ໂຫຕິ, ກາຍກມ຺ມຎ຺ຎຕາ ໂຫຕິ, ຈິຕ຺ຕກມ຺ມຎ຺ຎຕາ ໂຫຕິ, ກາຍປາຄຸຎ຺ຎຕາ ໂຫຕິ, ຈິຕ຺ຕປາຄຸຎ຺ຎຕາ ໂຫຕິ, ກາຍຸຊຸກຕາ ໂຫຕິ, ຈິຕ຺ຕຸຊຸກຕາ ໂຫຕິ, ສຕິ ໂຫຕິ, ສມ຺ປຊຎ຺ຎໍ ໂຫຕິ, ສມໂຖ ໂຫຕິ, ວິປສ຺ສນາ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.

໒໗໘. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໒໗໙. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.

໒໘໐. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໒໘໑. ກຕມາ ຕສ຺ມິໍ ສມເຍ ເຈຕນາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເຈຕນາ ໂຫຕິ.

໒໘໒. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໒໘໓. ກຕໂມ ຕສ຺ມິໍ ສມເຍ ວິຕກ຺ໂກ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ວິຕກ຺ໂກ ໂຫຕິ.

໒໘໔. ກຕໂມ ຕສ຺ມິໍ ສມເຍ ວິຈາໂຣ ໂຫຕິ? ໂຍ ຕສ຺ມິໍ ສມເຍ ຈາໂຣ ວິຈາໂຣ ອນຸວິຈາໂຣ ອຸປວິຈາໂຣ ຈິຕ຺ຕສ຺ສ ອນຸສນ຺ຘານຕາ ອນຸເປກ຺ຂນຕາ – ອຍໍ ຕສ຺ມິໍ ສມເຍ ວິຈາໂຣ ໂຫຕິ.

໒໘໕. ກຕມາ ຕສ຺ມິໍ ສມເຍ ປີຕິ ໂຫຕິ? ຍາ ຕສ຺ມິໍ ສມເຍ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ ປີຕິສມ຺ໂພຊ຺ຌງ຺ໂຄ – ອຍໍ ຕສ຺ມິໍ ສມເຍ ປີຕິ ໂຫຕິ.

໒໘໖. ກຕມໍ ຕສ຺ມິໍ ສມເຍ ສຸຂໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ສຸຂໍ ໂຫຕິ.

໒໘໗. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໒໘໘. ກຕມໍ ຕສ຺ມິໍ ສມເຍ ສທ຺ຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ສທ຺ຘາ ສທ຺ທຫນາ ໂອກປ຺ປນາ ອຠິປ຺ປສາໂທ ສທ຺ຘາ ສທ຺ຘິນ຺ທ຺ຣິຍໍ ສທ຺ຘາພລໍ – ອິທໍ ຕສ຺ມິໍ ສມເຍ ສທ຺ຘິນ຺ທ຺ຣິຍໍ ໂຫຕິ.

໒໘໙. ກຕມໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ.

໒໙໐. ກຕມໍ ຕສ຺ມິໍ ສມເຍ ສຕິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ສຕິນ຺ທ຺ຣິຍໍ ໂຫຕິ.

໒໙໑. ກຕມໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ.

໒໙໒. ກຕມໍ ຕສ຺ມິໍ ສມເຍ ປຎ຺ຎິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ປຎ຺ຎິນ຺ທ຺ຣິຍໍ ໂຫຕິ.

໒໙໓. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໒໙໔. ກຕມໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ.

໒໙໕. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ.

໒໙໖. ກຕມໍ ຕສ຺ມິໍ ສມເຍ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ໂຫຕິ? ຍາ ເຕສໍ ຘມ຺ມານໍ ອນຎ຺ຎາຕານໍ ອທິຏ຺ຐານໍ ອປ຺ປຕ຺ຕານໍ ອວິທິຕານໍ ອສຈ຺ຉິກຕານໍ ສຈ຺ຉິກິຣິຍາຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ໂຫຕິ.

໒໙໗. ກຕມາ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ.

໒໙໘. ກຕໂມ ຕສ຺ມິໍ ສມເຍ ສມ຺ມາສງ຺ກປ຺ໂປ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາສງ຺ກປ຺ໂປ ໂຫຕິ.

໒໙໙. ກຕມາ ຕສ຺ມິໍ ສມເຍ ສມ຺ມາວາຈາ ໂຫຕິ? ຍາ ຕສ຺ມິໍ ສມເຍ ຈຕູຫິ ວຈີທຸຈ຺ຈຣິເຕຫິ ອາຣຕິ ວິຣຕິ ປຏິວິຣຕິ ເວຣມຓີ ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ ເສຕຸຆາໂຕ ສມ຺ມາວາຈາ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາວາຈາ ໂຫຕິ.

໓໐໐. ກຕໂມ ຕສ຺ມິໍ ສມເຍ ສມ຺ມາກມ຺ມນ຺ໂຕ ໂຫຕິ? ຍາ ຕສ຺ມິໍ ສມເຍ ຕີຫິ ກາຍທຸຈ຺ຈຣິເຕຫິ ອາຣຕິ ວິຣຕິ ປຏິວິຣຕິ ເວຣມຓີ ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ ເສຕຸຆາໂຕ ສມ຺ມາກມ຺ມນ຺ໂຕ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາກມ຺ມນ຺ໂຕ ໂຫຕິ.

໓໐໑. ກຕໂມ ຕສ຺ມິໍ ສມເຍ ສມ຺ມາອາຊີໂວ ໂຫຕິ? ຍາ ຕສ຺ມິໍ ສມເຍ ມິຈ຺ຉາອາຊີວາ ອາຣຕິ ວິຣຕິ ປຏິວິຣຕິ ເວຣມຓີ ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ ເສຕຸຆາໂຕ ສມ຺ມາອາຊີໂວ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາອາຊີໂວ ໂຫຕິ.

໓໐໒. ກຕໂມ ຕສ຺ມິໍ ສມເຍ ສມ຺ມາວາຍາໂມ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາວາຍາໂມ ໂຫຕິ.

໓໐໓. ກຕມາ ຕສ຺ມິໍ ສມເຍ ສມ຺ມາສຕິ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາສຕິ ໂຫຕິ.

໓໐໔. ກຕໂມ ຕສ຺ມິໍ ສມເຍ ສມ຺ມາສມາຘິ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາສມາຘິ ໂຫຕິ.

໓໐໕. ກຕມໍ ຕສ຺ມິໍ ສມເຍ ສທ຺ຘາພລໍ ໂຫຕິ? ຍາ ຕສ຺ມິໍ ສມເຍ ສທ຺ຘາ ສທ຺ທຫນາ ໂອກປ຺ປນາ ອຠິປ຺ປສາໂທ ສທ຺ຘາ ສທ຺ຘິນ຺ທ຺ຣິຍໍ ສທ຺ຘາພລໍ – ອິທໍ ຕສ຺ມິໍ ສມເຍ ສທ຺ຘາພລໍ ໂຫຕິ.

໓໐໖. ກຕມໍ ຕສ຺ມິໍ ສມເຍ ວີຣິຍພລໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ວີຣິຍພລໍ ໂຫຕິ.

໓໐໗. ກຕມໍ ຕສ຺ມິໍ ສມເຍ ສຕິພລໍ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ສຕິພລໍ ໂຫຕິ.

໓໐໘. ກຕມໍ ຕສ຺ມິໍ ສມເຍ ສມາຘິພລໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ສມາຘິພລໍ ໂຫຕິ.

໓໐໙. ກຕມໍ ຕສ຺ມິໍ ສມເຍ ປຎ຺ຎາພລໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ປຎ຺ຎາພລໍ ໂຫຕິ.

໓໑໐. ກຕມໍ ຕສ຺ມິໍ ສມເຍ ຫິຣິພລໍ ໂຫຕິ? ຍໍ ຕສ຺ມິໍ ສມເຍ ຫິຣີຍຕິ ຫິຣິຍິຕພ຺ເພນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ຫິຣິພລໍ ໂຫຕິ.

໓໑໑. ກຕມໍ ຕສ຺ມິໍ ສມເຍ ໂອຕ຺ຕປ຺ປພລໍ ໂຫຕິ? ຍໍ ຕສ຺ມິໍ ສມເຍ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ໂອຕ຺ຕປ຺ປພລໍ ໂຫຕິ.

໓໑໒. ກຕໂມ ຕສ຺ມິໍ ສມເຍ ອໂລໂຠ ໂຫຕິ? ໂຍ ຕສ຺ມິໍ ສມເຍ ອໂລໂຠ ອລຸພ຺ຠນາ ອລຸພ຺ຠິຕຕ຺ຕໍ ອສາຣາໂຄ ອສາຣຊ຺ຊນາ ອສາຣຊ຺ຊິຕຕ຺ຕໍ ອນຠິຊ຺ຌາ ອໂລໂຠ ກຸສລມູລໍ – ອຍໍ ຕສ຺ມິໍ ສມເຍ ອໂລໂຠ ໂຫຕິ.

໓໑໓. ກຕໂມ ຕສ຺ມິໍ ສມເຍ ອໂທໂສ ໂຫຕິ? ໂຍ ຕສ຺ມິໍ ສມເຍ ອໂທໂສ ອທຸສ຺ສນາ ອທຸສ຺ສິຕຕ຺ຕໍ ອພ຺ຍາປາໂທ ອພ຺ຍາປຊ຺ໂຊ ອໂທໂສ ກຸສລມູລໍ – ອຍໍ ຕສ຺ມິໍ ສມເຍ ອໂທໂສ ໂຫຕິ.

໓໑໔. ກຕໂມ ຕສ຺ມິໍ ສມເຍ ອໂມໂຫ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ອໂມໂຫ ໂຫຕິ.

໓໑໕. ກຕມາ ຕສ຺ມິໍ ສມເຍ ອນຠິຊ຺ຌາ ໂຫຕິ? ໂຍ ຕສ຺ມິໍ ສມເຍ ອໂລໂຠ ອລຸພ຺ຠນາ ອລຸພ຺ຠິຕຕ຺ຕໍ ອສາຣາໂຄ ອສາຣຊ຺ຊນາ ອສາຣຊ຺ຊິຕຕ຺ຕໍ ອນຠິຊ຺ຌາ ອໂລໂຠ ກຸສລມູລໍ – ອຍໍ ຕສ຺ມິໍ ສມເຍ ອນຠິຊ຺ຌາ ໂຫຕິ.

໓໑໖. ກຕໂມ ຕສ຺ມິໍ ສມເຍ ອພ຺ຍາປາໂທ ໂຫຕິ? ໂຍ ຕສ຺ມິໍ ສມເຍ ອໂທໂສ ອທຸສ຺ສນາ ອທຸສ຺ສິຕຕ຺ຕໍ ອພ຺ຍາປາໂທ ອພ຺ຍາປຊ຺ໂຊ ອໂທໂສ ກຸສລມູລໍ – ອຍໍ ຕສ຺ມິໍ ສມເຍ ອພ຺ຍາປາໂທ ໂຫຕິ.

໓໑໗. ກຕມາ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ.

໓໑໘. ກຕມາ ຕສ຺ມິໍ ສມເຍ ຫິຣີ ໂຫຕິ? ຍໍ ຕສ຺ມິໍ ສມເຍ ຫິຣີຍຕິ ຫິຣິຍິຕພ຺ເພນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອຍໍ ຕສ຺ມິໍ ສມເຍ ຫິຣີ ໂຫຕິ.

໓໑໙. ກຕມໍ ຕສ຺ມິໍ ສມເຍ ໂອຕ຺ຕປ຺ປໍ ໂຫຕິ? ຍໍ ຕສ຺ມິໍ ສມເຍ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ໂອຕ຺ຕປ຺ປໍ ໂຫຕິ.

໓໒໐. ກຕມາ ຕສ຺ມິໍ ສມເຍ ກາຍປສ຺ສທ຺ຘິ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ປສ຺ສທ຺ຘິ ປຏິປສ຺ສທ຺ຘິ ປສ຺ສມ຺ຠນາ ປຏິປສ຺ສມ຺ຠນາ ປຏິປສ຺ສມ຺ຠິຕຕ຺ຕໍ ປສ຺ສທ຺ຘິສມ຺ໂພຊ຺ຌງ຺ໂຄ – ອຍໍ ຕສ຺ມິໍ ສມເຍ ກາຍປສ຺ສທ຺ຘິ ໂຫຕິ.

໓໒໑. ກຕມາ ຕສ຺ມິໍ ສມເຍ ຈິຕ຺ຕປສ຺ສທ຺ຘິ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ປສ຺ສທ຺ຘິ ປຏິປສ຺ສທ຺ຘິ ປສ຺ສມ຺ຠນາ ປຏິປສ຺ສມ຺ຠນາ ປຏິປສ຺ສມ຺ຠິຕຕ຺ຕໍ ປສ຺ສທ຺ຘິສມ຺ໂພຊ຺ຌງ຺ໂຄ – ອຍໍ ຕສ຺ມິໍ ສມເຍ ຈິຕ຺ຕປສ຺ສທ຺ຘິ ໂຫຕິ.

໓໒໒. ກຕມາ ຕສ຺ມິໍ ສມເຍ ກາຍລຫຸຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ລຫຸຕາ ລຫຸປຣິຓາມຕາ ອທນ຺ຘນຕາ ອວິຕ຺ຖນຕາ – ອຍໍ ຕສ຺ມິໍ ສມເຍ ກາຍລຫຸຕາ ໂຫຕິ.

໓໒໓. ກຕມາ ຕສ຺ມິໍ ສມເຍ ຈິຕ຺ຕລຫຸຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ລຫຸຕາ ລຫຸປຣິຓາມຕາ ອທນ຺ຘນຕາ ອວິຕ຺ຖນຕາ – ອຍໍ ຕສ຺ມິໍ ສມເຍ ຈິຕ຺ຕລຫຸຕາ ໂຫຕິ.

໓໒໔. ກຕມາ ຕສ຺ມິໍ ສມເຍ ກາຍມຸທຸຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ມຸທຸຕາ ມທ຺ທວຕາ ອກກ຺ຂຬຕາ ອກຖິນຕາ – ອຍໍ ຕສ຺ມິໍ ສມເຍ ກາຍມຸທຸຕາ ໂຫຕິ.

໓໒໕. ກຕມາ ຕສ຺ມິໍ ສມເຍ ຈິຕ຺ຕມຸທຸຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ມຸທຸຕາ ມທ຺ທວຕາ ອກກ຺ຂຬຕາ ອກຖິນຕາ – ອຍໍ ຕສ຺ມິໍ ສມເຍ ຈິຕ຺ຕມຸທຸຕາ ໂຫຕິ.

໓໒໖. ກຕມາ ຕສ຺ມິໍ ສມເຍ ກາຍກມ຺ມຎ຺ຎຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ກມ຺ມຎ຺ຎຕາ ກມ຺ມຎ຺ຎຕ຺ຕໍ ກມ຺ມຎ຺ຎຠາໂວ – ອຍໍ ຕສ຺ມິໍ ສມເຍ ກາຍກມ຺ມຎ຺ຎຕາ ໂຫຕິ.

໓໒໗. ກຕມາ ຕສ຺ມິໍ ສມເຍ ຈິຕ຺ຕກມ຺ມຎ຺ຎຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ກມ຺ມຎ຺ຎຕາ ກມ຺ມຎ຺ຎຕ຺ຕໍ ກມ຺ມຎ຺ຎຠາໂວ – ອຍໍ ຕສ຺ມິໍ ສມເຍ ຈິຕ຺ຕກມ຺ມຎ຺ຎຕາ ໂຫຕິ.

໓໒໘. ກຕມາ ຕສ຺ມິໍ ສມເຍ ກາຍປາຄຸຎ຺ຎຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ປຄຸຓຕາ ປຄຸຓຕ຺ຕໍ ປຄຸຓຠາໂວ – ອຍໍ ຕສ຺ມິໍ ສມເຍ ກາຍປາຄຸຎ຺ຎຕາ ໂຫຕິ.

໓໒໙. ກຕມາ ຕສ຺ມິໍ ສມເຍ ຈິຕ຺ຕປາຄຸຎ຺ຎຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ປຄຸຓຕາ ປຄຸຓຕ຺ຕໍ ປຄຸຓຠາໂວ – ອຍໍ ຕສ຺ມິໍ ສມເຍ ຈິຕ຺ຕປາຄຸຎ຺ຎຕາ ໂຫຕິ.

໓໓໐. ກຕມາ ຕສ຺ມິໍ ສມເຍ ກາຍຸຊຸກຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ອຸຊຸຕາ ອຸຊຸກຕາ ອຊິມ຺ຫຕາ ອວງ຺ກຕາ ອກຸຏິລຕາ – ອຍໍ ຕສ຺ມິໍ ສມເຍ ກາຍຸຊຸກຕາ ໂຫຕິ.

໓໓໑. ກຕມາ ຕສ຺ມິໍ ສມເຍ ຈິຕ຺ຕຸຊຸກຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ອຸຊຸຕາ ອຸຊຸກຕາ ອຊິມ຺ຫຕາ ອວງ຺ກຕາ ອກຸຏິລຕາ – ອຍໍ ຕສ຺ມິໍ ສມເຍ ຈິຕ຺ຕຸຊຸກຕາ ໂຫຕິ.

໓໓໒. ກຕມາ ຕສ຺ມິໍ ສມເຍ ສຕິ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສຕິ ໂຫຕິ.

໓໓໓. ກຕມໍ ຕສ຺ມິໍ ສມເຍ ສມ຺ປຊຎ຺ຎໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ຕສ຺ມິໍ ສມເຍ ສມ຺ປຊຎ຺ຎໍ ໂຫຕິ.

໓໓໔. ກຕໂມ ຕສ຺ມິໍ ສມເຍ ສມໂຖ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ສມໂຖ ໂຫຕິ.

໓໓໕. ກຕມາ ຕສ຺ມິໍ ສມເຍ ວິປສ຺ສນາ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ວິປສ຺ສນາ ໂຫຕິ.

໓໓໖. ກຕໂມ ຕສ຺ມິໍ ສມເຍ ປຄ຺ຄາໂຫ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ປຄ຺ຄາໂຫ ໂຫຕິ.

໓໓໗. ກຕໂມ ຕສ຺ມິໍ ສມເຍ ອວິກ຺ເຂໂປ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ຕສ຺ມິໍ ສມເຍ ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ນວິນ຺ທ຺ຣິຍານິ ໂຫນ຺ຕິ, ປຎ຺ຈງ຺ຄິກໍ ຌານໍ ໂຫຕິ, ອຏ຺ຐງ຺ຄິໂກ ມຄ຺ໂຄ ໂຫຕິ, ສຕ຺ຕ ພລານິ ໂຫນ຺ຕິ, ຕໂຍ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ, ເອກາ ເວທນາ ໂຫຕິ, ເອກາ ສຎ຺ຎາ ໂຫຕິ, ເອກາ ເຈຕນາ ໂຫຕິ, ເອກໍ ຈິຕ຺ຕໍ ໂຫຕິ, ເອໂກ ເວທນາກ຺ຂນ຺ໂຘ ໂຫຕິ, ເອໂກ ສຎ຺ຎາກ຺ຂນ຺ໂຘ ໂຫຕິ, ເອໂກ ສງ຺ຂາຣກ຺ຂນ຺ໂຘ ໂຫຕິ, ເອໂກ ວິຎ຺ຎາຓກ຺ຂນ຺ໂຘ ໂຫຕິ, ເອກໍ ມນາຍຕນໍ ໂຫຕິ, ເອກໍ ມນິນ຺ທ຺ຣິຍໍ ໂຫຕິ, ເອກາ ມໂນວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ…ເປ….

໓໓໘. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ສທ຺ຘິນ຺ທ຺ຣິຍໍ ວີຣິຍິນ຺ທ຺ຣິຍໍ ສຕິນ຺ທ຺ຣິຍໍ ສມາຘິນ຺ທ຺ຣິຍໍ ປຎ຺ຎິນ຺ທ຺ຣິຍໍ ຊີວິຕິນ຺ທ຺ຣິຍໍ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ ສທ຺ຘາພລໍ ວີຣິຍພລໍ ສຕິພລໍ ສມາຘິພລໍ ປຎ຺ຎາພລໍ ຫິຣິພລໍ ໂອຕ຺ຕປ຺ປພລໍ ອໂລໂຠ ອໂທໂສ ອໂມໂຫ ອນຠິຊ຺ຌາ ອພ຺ຍາປາໂທ ສມ຺ມາທິຏ຺ຐິ ຫິຣີ ໂອຕ຺ຕປ຺ປໍ ກາຍປສ຺ສທ຺ຘິ ຈິຕ຺ຕປສ຺ສທ຺ຘິ ກາຍລຫຸຕາ ຈິຕ຺ຕລຫຸຕາ ກາຍມຸທຸຕາ ຈິຕ຺ຕມຸທຸຕາ ກາຍກມ຺ມຎ຺ຎຕາ ຈິຕ຺ຕກມ຺ມຎ຺ຎຕາ ກາຍປາຄຸຎ຺ຎຕາ ຈິຕ຺ຕປາຄຸຎ຺ຎຕາ ກາຍຸຊຸກຕາ ຈິຕ຺ຕຸຊຸກຕາ ສຕິ ສມ຺ປຊຎ຺ຎໍ ສມໂຖ ວິປສ຺ສນາ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ກຸສລາ.

໓໓໙. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ຂິປ຺ປາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໐. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ສຸຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໑. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ສຸຂປຏິປທໍ ຂິປ຺ປາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໒. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິຕກ຺ກວິຈາຣານໍ ວູປສມາ …ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ…ເປ… ທຸກ຺ຂປຏິປທໍ ຂິປ຺ປາຠິຎ຺ຎໍ…ເປ… ສຸຂປຏິປທໍ ທນ຺ຘາຠິຎ຺ຎໍ…ເປ… ສຸຂປຏິປທໍ ຂິປ຺ປາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ສຸທ຺ຘິກປຏິປທາ.

ສຸຎ຺ຎຕໍ

໓໔໓. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ສຸຎ຺ຎຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໔. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ສຸຎ຺ຎຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ສຸຎ຺ຎຕໍ.

ສຸຎ຺ຎຕມູລກປຏິປທາ

໓໔໕. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ສຸຎ຺ຎຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໖. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ຂິປ຺ປາຠິຎ຺ຎໍ ສຸຎ຺ຎຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໗. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ສຸຂປຏິປທໍ ທນ຺ຘາຠິຎ຺ຎໍ ສຸຎ຺ຎຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໘. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ສຸຂປຏິປທໍ ຂິປ຺ປາຠິຎ຺ຎໍ ສຸຎ຺ຎຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໔໙. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ສຸຎ຺ຎຕໍ…ເປ… ທຸກ຺ຂປຏິປທໍ ຂິປ຺ປາຠິຎ຺ຎໍ ສຸຎ຺ຎຕໍ…ເປ… ສຸຂປຏິປທໍ ທນ຺ຘາຠິຎ຺ຎໍ ສຸຎ຺ຎຕໍ…ເປ… ສຸຂປຏິປທໍ ຂິປ຺ປາຠິຎ຺ຎໍ ສຸຎ຺ຎຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ສຸຎ຺ຎຕມູລກປຏິປທາ.

ອປ຺ປຓິຫິຕໍ

໓໕໐. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ອປ຺ປຓິຫິຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໕໑. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ອປ຺ປຓິຫິຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ອປ຺ປຓິຫິຕໍ.

ອປ຺ປຓິຫິຕມູລກປຏິປທາ

໓໕໒. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ອປ຺ປຓິຫິຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໕໓. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ຂິປ຺ປາຠິຎ຺ຎໍ ອປ຺ປຓິຫິຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໕໔. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ສຸຂປຏິປທໍ ທນ຺ຘາຠິຎ຺ຎໍ ອປ຺ປຓິຫິຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໕໕. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ສຸຂປຏິປທໍ ຂິປ຺ປາຠິຎ຺ຎໍ ອປ຺ປຓິຫິຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໕໖. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ອປ຺ປຓິຫິຕໍ…ເປ… ທຸກ຺ຂປຏິປທໍ ຂິປ຺ປາຠິຎ຺ຎໍ ອປ຺ປຓິຫິຕໍ…ເປ… ສຸຂປຏິປທໍ ທນ຺ຘາຠິຎ຺ຎໍ ອປ຺ປຓິຫິຕໍ…ເປ… ສຸຂປຏິປທໍ ຂິປ຺ປາຠິຎ຺ຎໍ ອປ຺ປຓິຫິຕໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ອປ຺ປຓິຫິຕມູລກປຏິປທາ.

ວີສຕິ ມຫານຍາ

໓໕໗. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ມຄ຺ຄໍ ຠາເວຕິ…ເປ… ໂລກຸຕ຺ຕຣໍ ສຕິປຏ຺ຐານໍ ຠາເວຕິ…ເປ… ໂລກຸຕ຺ຕຣໍ ສມ຺ມປ຺ປຘານໍ ຠາເວຕິ…ເປ… ໂລກຸຕ຺ຕຣໍ ອິທ຺ຘິປາທໍ ຠາເວຕິ…ເປ… ໂລກຸຕ຺ຕຣໍ ອິນ຺ທ຺ຣິຍໍ ຠາເວຕິ…ເປ… ໂລກຸຕ຺ຕຣໍ ພລໍ ຠາເວຕິ…ເປ… ໂລກຸຕ຺ຕຣໍ ໂພຊ຺ຌງ຺ຄໍ ຠາເວຕິ…ເປ… ໂລກຸຕ຺ຕຣໍ ສຈ຺ຈໍ ຠາເວຕິ…ເປ… ໂລກຸຕ຺ຕຣໍ ສມຖໍ ຠາເວຕິ…ເປ… ໂລກຸຕ຺ຕຣໍ ຘມ຺ມໍ ຠາເວຕິ…ເປ… ໂລກຸຕ຺ຕຣໍ ຂນ຺ຘໍ ຠາເວຕິ…ເປ… ໂລກຸຕ຺ຕຣໍ ອາຍຕນໍ ຠາເວຕິ…ເປ… ໂລກຸຕ຺ຕຣໍ ຘາຕຸໍ ຠາເວຕິ…ເປ… ໂລກຸຕ຺ຕຣໍ ອາຫາຣໍ ຠາເວຕິ…ເປ… ໂລກຸຕ຺ຕຣໍ ຜສ຺ສໍ ຠາເວຕິ…ເປ… ໂລກຸຕ຺ຕຣໍ ເວທນໍ ຠາເວຕິ…ເປ… ໂລກຸຕ຺ຕຣໍ ສຎ຺ຎໍ ຠາເວຕິ…ເປ… ໂລກຸຕ຺ຕຣໍ ເຈຕນໍ ຠາເວຕິ…ເປ… ໂລກຸຕ຺ຕຣໍ ຈິຕ຺ຕໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ວີສຕິ ມຫານຍາ.

ອຘິປຕິ

໓໕໘. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ຉນ຺ທາຘິປເຕຍ຺ຍໍ…ເປ… ວີຣິຍາຘິປເຕຍ຺ຍໍ…ເປ… ຈິຕ຺ຕາຘິປເຕຍ຺ຍໍ…ເປ… ວີມໍສາຘິປເຕຍ຺ຍໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໕໙. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ …ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ຉນ຺ທາຘິປເຕຍ຺ຍໍ…ເປ… ວີຣິຍາຘິປເຕຍ຺ຍໍ…ເປ… ຈິຕ຺ຕາຘິປເຕຍ຺ຍໍ…ເປ… ວີມໍສາຘິປເຕຍ຺ຍໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

໓໖໐. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ມຄ຺ຄໍ ຠາເວຕິ…ເປ… ໂລກຸຕ຺ຕຣໍ ສຕິປຏ຺ຐານໍ ຠາເວຕິ…ເປ… ໂລກຸຕ຺ຕຣໍ ສມ຺ມປ຺ປຘານໍ ຠາເວຕິ…ເປ… ໂລກຸຕ຺ຕຣໍ ອິທ຺ຘິປາທໍ ຠາເວຕິ…ເປ… ໂລກຸຕ຺ຕຣໍ ອິນ຺ທ຺ຣິຍໍ ຠາເວຕິ…ເປ… ໂລກຸຕ຺ຕຣໍ ພລໍ ຠາເວຕິ…ເປ… ໂລກຸຕ຺ຕຣໍ ໂພຊ຺ຌງ຺ຄໍ ຠາເວຕິ…ເປ… ໂລກຸຕ຺ຕຣໍ ສຈ຺ຈໍ ຠາເວຕິ…ເປ… ໂລກຸຕ຺ຕຣໍ ສມຖໍ ຠາເວຕິ…ເປ… ໂລກຸຕ຺ຕຣໍ ຘມ຺ມໍ ຠາເວຕິ…ເປ… ໂລກຸຕ຺ຕຣໍ ຂນ຺ຘໍ ຠາເວຕິ…ເປ… ໂລກຸຕ຺ຕຣໍ ອາຍຕນໍ ຠາເວຕິ…ເປ… ໂລກຸຕ຺ຕຣໍ ຘາຕຸໍ ຠາເວຕິ…ເປ… ໂລກຸຕ຺ຕຣໍ ອາຫາຣໍ ຠາເວຕິ…ເປ… ໂລກຸຕ຺ຕຣໍ ຜສ຺ສໍ ຠາເວຕິ…ເປ… ໂລກຸຕ຺ຕຣໍ ເວທນໍ ຠາເວຕິ…ເປ… ໂລກຸຕ຺ຕຣໍ ສຎ຺ຎໍ ຠາເວຕິ…ເປ… ໂລກຸຕ຺ຕຣໍ ເຈຕນໍ ຠາເວຕິ…ເປ… ໂລກຸຕ຺ຕຣໍ ຈິຕ຺ຕໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ຉນ຺ທາຘິປເຕຍ຺ຍໍ…ເປ… ວີຣິຍາຘິປເຕຍ຺ຍໍ…ເປ… ຈິຕ຺ຕາຘິປເຕຍ຺ຍໍ…ເປ… ວີມໍສາຘິປເຕຍ຺ຍໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ອຘິປຕິ.

ປຐໂມ ມຄ຺ໂຄ.

໓໖໑. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ກາມຣາຄພ຺ຍາປາທານໍ ຕນຸຠາວາຍ ທຸຕິຍາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອຎ຺ຎິນ຺ທ຺ຣິຍໍ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ທຸຕິໂຍ ມຄ຺ໂຄ.

໓໖໒. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ກາມຣາຄພ຺ຍາປາທານໍ ອນວເສສປ຺ປຫານາຍ ຕຕິຍາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອຎ຺ຎິນ຺ທ຺ຣິຍໍ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ຕຕິໂຍ ມຄ຺ໂຄ.

໓໖໓. ກຕເມ ຘມ຺ມາ ກຸສລາ? ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ຣູປຣາຄອຣູປຣາຄມານອຸທ຺ຘຈ຺ຈອວິຊ຺ຊາຍ ອນວເສສປ຺ປຫານາຍ ຈຕຸຕ຺ຖາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອຎ຺ຎິນ຺ທ຺ຣິຍໍ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ…ເປ….

໓໖໔. ກຕມໍ ຕສ຺ມິໍ ສມເຍ ອຎ຺ຎິນ຺ທ຺ຣິຍໍ ໂຫຕິ? ຍາ ເຕສໍ ຘມ຺ມານໍ ຎາຕານໍ ທິຏ຺ຐານໍ ປຕ຺ຕານໍ ວິທິຕານໍ ສຈ຺ຉິກຕານໍ ສຈ຺ຉິກິຣິຍາຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ, ອິທໍ ຕສ຺ມິໍ ສມເຍ ອຎ຺ຎິນ຺ທ຺ຣິຍໍ ໂຫຕິ…ເປ… ອວິກ຺ເຂໂປ ໂຫຕິ…ເປ… ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.

ຈຕຸຕ຺ໂຖ ມຄ຺ໂຄ.

ໂລກຸຕ຺ຕຣໍ ຈິຕ຺ຕໍ.