ສຸຎ຺ຎຕວາໂຣ

໑໒໑. ຕສ຺ມິໍ ໂຂ ປນ ສມເຍ ຘມ຺ມາ ໂຫນ຺ຕິ, ຂນ຺ຘາ ໂຫນ຺ຕິ, ອາຍຕນານິ ໂຫນ຺ຕິ, ຘາຕຸໂຍ ໂຫນ຺ຕິ, ອາຫາຣາ ໂຫນ຺ຕິ, ອິນ຺ທ຺ຣິຍານິ ໂຫນ຺ຕິ, ຌານໍ ໂຫຕິ, ມຄ຺ໂຄ ໂຫຕິ, ພລານິ ໂຫນ຺ຕິ, ເຫຕູ ໂຫນ຺ຕິ, ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ເວທນາກ຺ຂນ຺ໂຘ ໂຫຕິ, ສຎ຺ຎາກ຺ຂນ຺ໂຘ ໂຫຕິ, ສງ຺ຂາຣກ຺ຂນ຺ໂຘ ໂຫຕິ, ວິຎ຺ຎາຓກ຺ຂນ຺ໂຘ ໂຫຕິ, ມນາຍຕນໍ ໂຫຕິ, ມນິນ຺ທ຺ຣິຍໍ ໂຫຕິ, ມໂນວິຎ຺ຎາຓຘາຕຸ ໂຫຕິ, ຘມ຺ມາຍຕນໍ ໂຫຕິ, ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.

໑໒໒. ກຕເມ ຕສ຺ມິໍ ສມເຍ ຘມ຺ມາ ໂຫນ຺ຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິເມ ຕສ຺ມິໍ ສມເຍ ຘມ຺ມາ ໂຫນ຺ຕິ.

໑໒໓. ກຕເມ ຕສ຺ມິໍ ສມເຍ ຂນ຺ຘາ ໂຫນ຺ຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິເມ ຕສ຺ມິໍ ສມເຍ ຂນ຺ຘາ ໂຫນ຺ຕິ.

໑໒໔. ກຕມານິ ຕສ຺ມິໍ ສມເຍ ອາຍຕນານິ ໂຫນ຺ຕິ? ມນາຍຕນໍ, ຘມ຺ມາຍຕນໍ – ອິມານິ ຕສ຺ມິໍ ສມເຍ ອາຍຕນານິ ໂຫນ຺ຕິ.

໑໒໕. ກຕມາ ຕສ຺ມິໍ ສມເຍ ຘາຕຸໂຍ ໂຫນ຺ຕິ? ມໂນວິຎ຺ຎາຓຘາຕຸ, ຘມ຺ມຘາຕຸ – ອິມາ ຕສ຺ມິໍ ສມເຍ ຘາຕຸໂຍ ໂຫນ຺ຕິ.

໑໒໖. ກຕເມ ຕສ຺ມິໍ ສມເຍ ອາຫາຣາ ໂຫນ຺ຕິ? ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ – ອິເມ ຕສ຺ມິໍ ສມເຍ ອາຫາຣາ ໂຫນ຺ຕິ.

໑໒໗. ກຕມານິ ຕສ຺ມິໍ ສມເຍ ອິນ຺ທ຺ຣິຍານິ ໂຫນ຺ຕິ? ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ, ມນິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ, ຊີວິຕິນ຺ທ຺ຣິຍໍ – ອິມານິ ຕສ຺ມິໍ ສມເຍ ອິນ຺ທ຺ຣິຍານິ ໂຫນ຺ຕິ.

໑໒໘. ກຕມໍ ຕສ຺ມິໍ ສມເຍ ຌານໍ ໂຫຕິ? ວິຕກ຺ໂກ, ວິຈາໂຣ, ປີຕິ, ສຸຂໍ, ຈິຕ຺ຕສ຺ເສກຄ຺ຄຕາ – ອິທໍ ຕສ຺ມິໍ ສມເຍ ຌານໍ ໂຫຕິ.

໑໒໙. ກຕໂມ ຕສ຺ມິໍ ສມເຍ ມຄ຺ໂຄ ໂຫຕິ? ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ – ອຍໍ ຕສ຺ມິໍ ສມເຍ ມຄ຺ໂຄ ໂຫຕິ.

໑໓໐. ກຕມານິ ຕສ຺ມິໍ ສມເຍ ພລານິ ໂຫນ຺ຕິ? ສທ຺ຘາພລໍ, ວີຣິຍພລໍ, ສຕິພລໍ, ສມາຘິພລໍ, ປຎ຺ຎາພລໍ, ຫິຣິພລໍ, ໂອຕ຺ຕປ຺ປພລໍ – ອິມານິ ຕສ຺ມິໍ ສມເຍ ພລານິ ໂຫນ຺ຕິ.

໑໓໑. ກຕເມ ຕສ຺ມິໍ ສມເຍ ເຫຕູ ໂຫນ຺ຕິ? ອໂລໂຠ, ອໂທໂສ, ອໂມໂຫ – ອິເມ ຕສ຺ມິໍ ສມເຍ ເຫຕູ ໂຫນ຺ຕິ.

໑໓໒. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ…ເປ… ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໑໓໓. ກຕມາ ຕສ຺ມິໍ ສມເຍ ເວທນາ ໂຫຕິ…ເປ… ອຍໍ ຕສ຺ມິໍ ສມເຍ ເວທນາ ໂຫຕິ.

໑໓໔. ກຕມາ ຕສ຺ມິໍ ສມເຍ ສຎ຺ຎາ ໂຫຕິ…ເປ… ອຍໍ ຕສ຺ມິໍ ສມເຍ ສຎ຺ຎາ ໂຫຕິ.

໑໓໕. ກຕມາ ຕສ຺ມິໍ ສມເຍ ເຈຕນາ ໂຫຕິ…ເປ… ອຍໍ ຕສ຺ມິໍ ສມເຍ ເຈຕນາ ໂຫຕິ?

໑໓໖. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ…ເປ… ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.

໑໓໗. ກຕໂມ ຕສ຺ມິໍ ສມເຍ ເວທນາກ຺ຂນ຺ໂຘ ໂຫຕິ…ເປ… ອຍໍ ຕສ຺ມິໍ ສມເຍ ເວທນາກ຺ຂນ຺ໂຘ ໂຫຕິ.

໑໓໘. ກຕໂມ ຕສ຺ມິໍ ສມເຍ ສຎ຺ຎາກ຺ຂນ຺ໂຘ ໂຫຕິ…ເປ… ອຍໍ ຕສ຺ມິໍ ສມເຍ ສຎ຺ຎາກ຺ຂນ຺ໂຘ ໂຫຕິ.

໑໓໙. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ.

໑໔໐. ກຕໂມ ຕສ຺ມິໍ ສມເຍ ວິຎ຺ຎາຓກ຺ຂນ຺ໂຘ ໂຫຕິ…ເປ… ອຍໍ ຕສ຺ມິໍ ສມເຍ ວິຎ຺ຎາຓກ຺ຂນ຺ໂຘ ໂຫຕິ.

໑໔໑. ກຕມໍ ຕສ຺ມິໍ ສມເຍ ມນາຍຕນໍ ໂຫຕິ…ເປ… ອິທໍ ຕສ຺ມິໍ ສມເຍ ມນາຍຕນໍ ໂຫຕິ.

໑໔໒. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ…ເປ… ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.

໑໔໓. ກຕມາ ຕສ຺ມິໍ ສມເຍ ມໂນວິຎ຺ຎາຓຘາຕຸ ໂຫຕິ…ເປ… ອຍໍ ຕສ຺ມິໍ ສມເຍ ມໂນວິຎ຺ຎາຓຘາຕຸ ໂຫຕິ.

໑໔໔. ກຕມໍ ຕສ຺ມິໍ ສມເຍ ຘມ຺ມາຍຕນໍ ໂຫຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ຕສ຺ມິໍ ສມເຍ ຘມ຺ມາຍຕນໍ ໂຫຕິ.

໑໔໕. ກຕມາ ຕສ຺ມິໍ ສມເຍ ຘມ຺ມຘາຕຸ ໂຫຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອຍໍ ຕສ຺ມິໍ ສມເຍ ຘມ຺ມຘາຕຸ ໂຫຕິ.

ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.

ສຸຎ຺ຎຕວາໂຣ.

ປຐມໍ ຈິຕ຺ຕໍ.

໑໔໖. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ຎາຓສມ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ທຸຕິຍໍ ຈິຕ຺ຕໍ.

໑໔໗. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ຎາຓວິປ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ປີຕິ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ສທ຺ຘິນ຺ທ຺ຣິຍໍ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສຕິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ໂສມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ, ສທ຺ຘາພລໍ ໂຫຕິ, ວີຣິຍພລໍ ໂຫຕິ, ສຕິພລໍ ໂຫຕິ, ສມາຘິພລໍ ໂຫຕິ, ຫິຣິພລໍ ໂຫຕິ, ໂອຕ຺ຕປ຺ປພລໍ ໂຫຕິ, ອໂລໂຠ ໂຫຕິ, ອໂທໂສ ໂຫຕິ, ອນຠິຊ຺ຌາ ໂຫຕິ, ອພ຺ຍາປາໂທ ໂຫຕິ, ຫິຣີ ໂຫຕິ, ໂອຕ຺ຕປ຺ປໍ ໂຫຕິ, ກາຍປສ຺ສທ຺ຘິ ໂຫຕິ, ຈິຕ຺ຕປສ຺ສທ຺ຘິ ໂຫຕິ, ກາຍລຫຸຕາ ໂຫຕິ, ຈິຕ຺ຕລຫຸຕາ ໂຫຕິ, ກາຍມຸທຸຕາ ໂຫຕິ, ຈິຕ຺ຕມຸທຸຕາ ໂຫຕິ, ກາຍກມ຺ມຎ຺ຎຕາ ໂຫຕິ, ຈິຕ຺ຕກມ຺ມຎ຺ຎຕາ ໂຫຕິ, ກາຍປາຄຸຎ຺ຎຕາ ໂຫຕິ, ຈິຕ຺ຕປາຄຸຎ຺ຎຕາ ໂຫຕິ, ກາຍຸຊຸກຕາ ໂຫຕິ, ຈິຕ຺ຕຸຊຸກຕາ ໂຫຕິ, ສຕິ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ…ເປ….

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ສຕ຺ຕິນ຺ທ຺ຣິຍານິ ໂຫນ຺ຕິ, ປຎ຺ຈງ຺ຄິກໍ ຌານໍ ໂຫຕິ, ຈຕຸຣງ຺ຄິໂກ ມຄ຺ໂຄ ໂຫຕິ, ຉ ພລານິ ໂຫນ຺ຕິ, ທ຺ເວ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ…ເປ….

໑໔໘. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ສທ຺ຘິນ຺ທ຺ຣິຍໍ ວີຣິຍິນ຺ທ຺ຣິຍໍ ສຕິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ສມ຺ມາສງ຺ກປ຺ໂປ ສມ຺ມາວາຍາໂມ ສມ຺ມາສຕິ ສມ຺ມາສມາຘິ ສທ຺ຘາພລໍ ວີຣິຍພລໍ ສຕິພລໍ ສມາຘິພລໍ ຫິຣິພລໍ ໂອຕ຺ຕປ຺ປພລໍ ອໂລໂຠ ອໂທໂສ ອນຠິຊ຺ຌາ ອພ຺ຍາປາໂທ ຫິຣີ ໂອຕ຺ຕປ຺ປໍ ກາຍປສ຺ສທ຺ຘິ ຈິຕ຺ຕປສ຺ສທ຺ຘິ ກາຍລຫຸຕາ ຈິຕ຺ຕລຫຸຕາ ກາຍມຸທຸຕາ ຈິຕ຺ຕມຸທຸຕາ ກາຍກມ຺ມຎ຺ຎຕາ ຈິຕ຺ຕກມ຺ມຎ຺ຎຕາ ກາຍປາຄຸຎ຺ຎຕາ ຈິຕ຺ຕປາຄຸຎ຺ຎຕາ ກາຍຸຊຸກຕາ ຈິຕ຺ຕຸຊຸກຕາ ສຕິ ສມໂຖ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ກຸສລາ.

ຕຕິຍໍ ຈິຕ຺ຕໍ.

໑໔໙. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ຎາຓວິປ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ຈຕຸຕ຺ຖໍ ຈິຕ຺ຕໍ.

໑໕໐. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຎາຓສມ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ສທ຺ຘິນ຺ທ຺ຣິຍໍ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສຕິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ປຎ຺ຎິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ສມ຺ມາທິຏ຺ຐິ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ, ສທ຺ຘາພລໍ ໂຫຕິ, ວີຣິຍພລໍ ໂຫຕິ, ສຕິພລໍ ໂຫຕິ, ສມາຘິພລໍ ໂຫຕິ, ປຎ຺ຎາພລໍ ໂຫຕິ, ຫິຣິພລໍ ໂຫຕິ, ໂອຕ຺ຕປ຺ປພລໍ ໂຫຕິ, ອໂລໂຠ ໂຫຕິ, ອໂທໂສ ໂຫຕິ, ອໂມໂຫ ໂຫຕິ, ອນຠິຊ຺ຌາ ໂຫຕິ, ອພ຺ຍາປາໂທ ໂຫຕິ, ສມ຺ມາທິຏ຺ຐິ ໂຫຕິ, ຫິຣີ ໂຫຕິ, ໂອຕ຺ຕປ຺ປໍ ໂຫຕິ, ກາຍປສ຺ສທ຺ຘິ ໂຫຕິ, ຈິຕ຺ຕປສ຺ສທ຺ຘິ ໂຫຕິ, ກາຍລຫຸຕາ ໂຫຕິ, ຈິຕ຺ຕລຫຸຕາ ໂຫຕິ, ກາຍມຸທຸຕາ ໂຫຕິ, ຈິຕ຺ຕມຸທຸຕາ ໂຫຕິ, ກາຍກມ຺ມຎ຺ຎຕາ ໂຫຕິ, ຈິຕ຺ຕກມ຺ມຎ຺ຎຕາ ໂຫຕິ ກາຍປາຄຸຎ຺ຎຕາ ໂຫຕິ, ຈິຕ຺ຕປາຄຸຎ຺ຎຕາ ໂຫຕິ, ກາຍຸຊຸກຕາ ໂຫຕິ, ຈິຕ຺ຕຸຊຸກຕາ ໂຫຕິ, ສຕິ ໂຫຕິ, ສມ຺ປຊຎ຺ຎໍ ໂຫຕິ, ສມໂຖ ໂຫຕິ, ວິປສ຺ສນາ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.

໑໕໑. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.

໑໕໒. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ…ເປ….

໑໕໓. ກຕມາ ຕສ຺ມິໍ ສມເຍ ອຸເປກ຺ຂາ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ຕສ຺ມິໍ ສມເຍ ອຸເປກ຺ຂາ ໂຫຕິ…ເປ….

໑໕໔. ກຕມໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອິທໍ ຕສ຺ມິໍ ສມເຍ ອຸເປກ຺ຂິນ຺ທ຺ຣິຍໍ ໂຫຕິ…ເປ… ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ…ເປ….

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ອຏ຺ຐິນ຺ທ຺ຣິຍານິ ໂຫນ຺ຕິ, ຈຕຸຣງ຺ຄິກໍ ຌານໍ ໂຫຕິ, ປຎ຺ຈງ຺ຄິໂກ ມຄ຺ໂຄ ໂຫຕິ, ສຕ຺ຕ ພລານິ ໂຫນ຺ຕິ, ຕໂຍ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ…ເປ….

໑໕໕. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ສທ຺ຘິນ຺ທ຺ຣິຍໍ ວີຣິຍິນ຺ທ຺ຣິຍໍ ສຕິນ຺ທ຺ຣິຍໍ ສມາຘິນ຺ທ຺ຣິຍໍ ປຎ຺ຎິນ຺ທ຺ຣິຍໍ ຊີວິຕິນ຺ທ຺ຣິຍໍ ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຍາໂມ ສມ຺ມາສຕິ ສມ຺ມາສມາຘິ ສທ຺ຘາພລໍ ວີຣິຍພລໍ ສຕິພລໍ ສມາຘິພລໍ ປຎ຺ຎາພລໍ ຫິຣິພລໍ ໂອຕ຺ຕປ຺ປພລໍ ອໂລໂຠ ອໂທໂສ ອໂມໂຫ ອນຠິຊ຺ຌາ ອພ຺ຍາປາໂທ ສມ຺ມາທິຏ຺ຐິ ຫິຣີ ໂອຕ຺ຕປ຺ປໍ ກາຍປສ຺ສທ຺ຘິ ຈິຕ຺ຕປສ຺ສທ຺ຘິ ກາຍລຫຸຕາ ຈິຕ຺ຕລຫຸຕາ ກາຍມຸທຸຕາ ຈິຕ຺ຕມຸທຸຕາ ກາຍກມ຺ມຎ຺ຎຕາ ຈິຕ຺ຕກມ຺ມຎ຺ຎຕາ ກາຍປາຄຸຎ຺ຎຕາ ຈິຕ຺ຕປາຄຸຎ຺ຎຕາ ກາຍຸຊຸກຕາ ຈິຕ຺ຕຸຊຸກຕາ ສຕິ ສມ຺ປຊຎ຺ຎໍ ສມໂຖ ວິປສ຺ສນາ ປຄ຺ຄາໂຫ ອວິກ຺ເຂໂປ.

ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ກຸສລາ.

ປຎ຺ຈມໍ ຈິຕ຺ຕໍ.

໑໕໖. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຎາຓສມ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ຉຏ຺ຐໍ ຈິຕ຺ຕໍ.

໑໕໗. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຎາຓວິປ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ສທ຺ຘິນ຺ທ຺ຣິຍໍ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສຕິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ, ສທ຺ຘາພລໍ ໂຫຕິ, ວີຣິຍພລໍ ໂຫຕິ, ສຕິພລໍ ໂຫຕິ, ສມາຘິພລໍ ໂຫຕິ, ຫິຣິພລໍ ໂຫຕິ, ໂອຕ຺ຕປ຺ປພລໍ ໂຫຕິ, ອໂລໂຠ ໂຫຕິ, ອໂທໂສ ໂຫຕິ, ອນຠິຊ຺ຌາ ໂຫຕິ, ອພ຺ຍາປາໂທ ໂຫຕິ, ຫິຣີ ໂຫຕິ, ໂອຕ຺ຕປ຺ປໍ ໂຫຕິ, ກາຍປສ຺ສທ຺ຘິ ໂຫຕິ, ຈິຕ຺ຕປສ຺ສທ຺ຘິ ໂຫຕິ, ກາຍລຫຸຕາ ໂຫຕິ, ຈິຕ຺ຕລຫຸຕາ ໂຫຕິ, ກາຍມຸທຸຕາ ໂຫຕິ, ຈິຕ຺ຕມຸທຸຕາ ໂຫຕິ, ກາຍກມ຺ມຎ຺ຎຕາ ໂຫຕິ, ຈິຕ຺ຕກມ຺ມຎ຺ຎຕາ ໂຫຕິ, ກາຍປາຄຸຎ຺ຎຕາ ໂຫຕິ, ຈິຕ຺ຕປາຄຸຎ຺ຎຕາ ໂຫຕິ, ກາຍຸຊຸກຕາ ໂຫຕິ, ຈິຕ຺ຕຸຊຸກຕາ ໂຫຕິ, ສຕິ ໂຫຕິ, ສມໂຖ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ…ເປ….

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ສຕ຺ຕິນ຺ທ຺ຣິຍານິ ໂຫນ຺ຕິ, ຈຕຸຣງ຺ຄິກໍ ຌານໍ ໂຫຕິ, ຈຕຸຣງ຺ຄິໂກ ມຄ຺ໂຄ ໂຫຕິ, ຉ ພລານິ ໂຫນ຺ຕິ, ທ຺ເວ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ…ເປ….

໑໕໘. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ສທ຺ຘິນ຺ທ຺ຣິຍໍ ວີຣິຍິນ຺ທ຺ຣິຍໍ ສຕິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ ສມ຺ມາສງ຺ກປ຺ໂປ ສມ຺ມາວາຍາໂມ ສມ຺ມາສຕິ ສມ຺ມາສມາຘິ ສທ຺ຘາພລໍ ວີຣິຍພລໍ ສຕິພລໍ ສມາຘິພລໍ ຫິຣິພລໍ ໂອຕ຺ຕປ຺ປພລໍ ອໂລໂຠ ອໂທໂສ ອນຠິຊ຺ຌາ ອພ຺ຍາປາໂທ ຫິຣີ ໂອຕ຺ຕປ຺ປໍ ກາຍປສ຺ສທ຺ຘິ ຈິຕ຺ຕປສ຺ສທ຺ຘິ ກາຍລຫຸຕາ ຈິຕ຺ຕລຫຸຕາ ກາຍມຸທຸຕາ ຈິຕ຺ຕມຸທຸຕາ ກາຍກມ຺ມຎ຺ຎຕາ ຈິຕ຺ຕກມ຺ມຎ຺ຎຕາ ກາຍປາຄຸຎ຺ຎຕາ ຈິຕ຺ຕປາຄຸຎ຺ຎຕາ ກາຍຸຊຸກຕາ ຈິຕ຺ຕຸຊຸກຕາ ສຕິ ສມໂຖ ປຄ຺ຄາໂຫ ອວິກ຺ເຂໂປ.

ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ກຸສລາ.

ສຕ຺ຕມໍ ຈິຕ຺ຕໍ.

໑໕໙. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຎາຓວິປ຺ປຍຸຕ຺ຕໍ ສສງ຺ຂາເຣນ ຣູປາຣມ຺ມຓໍ ວາ…ເປ… ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ກຸສລາ.

ອຏ຺ຐມໍ ຈິຕ຺ຕໍ.

ອຏ຺ຐ ກາມາວຈຣມຫາກຸສລຈິຕ຺ຕານິ.

ທຸຕິຍຠາຓວາໂຣ.