ກາມາວຈຣກຸສລໍ
ປທຠາຊນີ
໑. ກຕເມ ຘມ຺ມາ ກຸສລາ? ຍສ຺ມິໍ ສມເຍ ກາມາວຈຣໍ ກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ຎາຓສມ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ປີຕິ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ສທ຺ຘິນ຺ທ຺ຣິຍໍ ໂຫຕິ, ວີຣິຍິນ຺ທ຺ຣິຍໍ [ວິຣິຍິນ຺ທ຺ຣິຍໍ (ສີ. ສ຺ຍາ.)] ໂຫຕິ, ສຕິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ປຎ຺ຎິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ໂສມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ສມ຺ມາທິຏ຺ຐິ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ, ສທ຺ຘາພລໍ ໂຫຕິ, ວີຣິຍພລໍ [ວິຣິຍພລໍ (ສີ. ສ຺ຍາ.)] ໂຫຕິ, ສຕິພລໍ ໂຫຕິ, ສມາຘິພລໍ ໂຫຕິ, ປຎ຺ຎາພລໍ ໂຫຕິ, ຫິຣິພລໍ ໂຫຕິ, ໂອຕ຺ຕປ຺ປພລໍ ໂຫຕິ, ອໂລໂຠ ໂຫຕິ, ອໂທໂສ ໂຫຕິ, ອໂມໂຫ ໂຫຕິ, ອນຠິຊ຺ຌາ ໂຫຕິ, ອພ຺ຍາປາໂທ ໂຫຕິ, ສມ຺ມາທິຏ຺ຐິ ໂຫຕິ, ຫິຣີ ໂຫຕິ, ໂອຕ຺ຕປ຺ປໍ ໂຫຕິ, ກາຍປສ຺ສທ຺ຘິ [ກາຍປ຺ປສ຺ສທ຺ຘິ (ສ຺ຍາ.)] ໂຫຕິ, ຈິຕ຺ຕປສ຺ສທ຺ຘິ [ຈິຕ຺ຕປ຺ປສ຺ສທ຺ຘິ (ສ຺ຍາ.)] ໂຫຕິ, ກາຍລຫຸຕາ ໂຫຕິ, ຈິຕ຺ຕລຫຸຕາ ໂຫຕິ, ກາຍມຸທຸຕາ ໂຫຕິ, ຈິຕ຺ຕມຸທຸຕາ ໂຫຕິ, ກາຍກມ຺ມຎ຺ຎຕາ ໂຫຕິ, ຈິຕ຺ຕກມ຺ມຎ຺ຎຕາ ໂຫຕິ, ກາຍປາຄຸຎ຺ຎຕາ ໂຫຕິ, ຈິຕ຺ຕປາຄຸຎ຺ຎຕາ ໂຫຕິ, ກາຍຸຊຸກຕາ [ກາຍຸຊ຺ຊຸກຕາ (ສີ. ກ.)] ໂຫຕິ, ຈິຕ຺ຕຸຊຸກຕາ [ຈິຕ຺ຕຸຊ຺ຊຸກຕາ (ສີ. ກ.)] ໂຫຕິ, ສຕິ ໂຫຕິ, ສມ຺ປຊຎ຺ຎໍ ໂຫຕິ, ສມໂຖ ໂຫຕິ, ວິປສ຺ສນາ ໂຫຕິ, ປຄ຺ຄາໂຫ ໂຫຕິ, ອວິກ຺ເຂໂປ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.
໒. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ.
໓. ກຕມາ ຕສ຺ມິໍ ສມເຍ ເວທນາ ໂຫຕິ? ຍໍ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເວທນາ ໂຫຕິ.
໔. ກຕມາ ຕສ຺ມິໍ ສມເຍ ສຎ຺ຎາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາ ໂຫຕິ.
໕. ກຕມາ ຕສ຺ມິໍ ສມເຍ ເຈຕນາ ໂຫຕິ? ຍາ ຕສ຺ມິໍ ສມເຍ ຕຊ຺ຊາມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ ສຎ຺ເຈຕນາ ເຈຕຍິຕຕ຺ຕໍ [ສຎ຺ເຈຕຍິຕຕ຺ຕໍ (ສ຺ຍາ.)] – ອຍໍ ຕສ຺ມິໍ ສມເຍ ເຈຕນາ ໂຫຕິ.
໖. ກຕມໍ ຕສ຺ມິໍ ສມເຍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ຈິຕ຺ຕໍ ໂຫຕິ.
໗. ກຕໂມ ຕສ຺ມິໍ ສມເຍ ວິຕກ຺ໂກ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ – ອຍໍ ຕສ຺ມິໍ ສມເຍ ວິຕກ຺ໂກ ໂຫຕິ.
໘. ກຕໂມ ຕສ຺ມິໍ ສມເຍ ວິຈາໂຣ ໂຫຕິ? ໂຍ ຕສ຺ມິໍ ສມເຍ ຈາໂຣ ວິຈາໂຣ ອນຸວິຈາໂຣ ອຸປວິຈາໂຣ ຈິຕ຺ຕສ຺ສ ອນຸສນ຺ຘານຕາ ອນຸເປກ຺ຂນຕາ – ອຍໍ ຕສ຺ມິໍ ສມເຍ ວິຈາໂຣ ໂຫຕິ.
໙. ກຕມາ ຕສ຺ມິໍ ສມເຍ ປີຕິ ໂຫຕິ? ຍາ ຕສ຺ມິໍ ສມເຍ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ – ອຍໍ ຕສ຺ມິໍ ສມເຍ ປີຕິ ໂຫຕິ.
໑໐. ກຕມໍ ຕສ຺ມິໍ ສມເຍ ສຸຂໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ສຸຂໍ ໂຫຕິ.
໑໑. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.
໑໒. ກຕມໍ ຕສ຺ມິໍ ສມເຍ ສທ຺ຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ສທ຺ຘາ ສທ຺ທຫນາ ໂອກປ຺ປນາ ອຠິປ຺ປສາໂທ ສທ຺ຘາ ສທ຺ຘິນ຺ທ຺ຣິຍໍ ສທ຺ຘາພລໍ – ອິທໍ ຕສ຺ມິໍ ສມເຍ ສທ຺ຘິນ຺ທ຺ຣິຍໍ ໂຫຕິ.
໑໓. ກຕມໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ [ວິຣິຍາຣມ຺ໂຠ (ສີ. ສ຺ຍາ.)] ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ [ອຸສ຺ໂສຬ຺ຫິ (ສີ.)] ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອິທໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ.
໑໔. ກຕມໍ ຕສ຺ມິໍ ສມເຍ ສຕິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອິທໍ ຕສ຺ມິໍ ສມເຍ ສຕິນ຺ທ຺ຣິຍໍ ໂຫຕິ.
໑໕. ກຕມໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອິທໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ.
໑໖. ກຕມໍ ຕສ຺ມິໍ ສມເຍ ປຎ຺ຎິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ຕສ຺ມິໍ ສມເຍ ປຎ຺ຎິນ຺ທ຺ຣິຍໍ ໂຫຕິ.
໑໗. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.
໑໘. ກຕມໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ.
໑໙. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ [ອິຣີຍນາ (ສີ.)] ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ.
໒໐. ກຕມາ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ.
໒໑. ກຕໂມ ຕສ຺ມິໍ ສມເຍ ສມ຺ມາສງ຺ກປ຺ໂປ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ – ອຍໍ ຕສ຺ມິໍ ສມເຍ ສມ຺ມາສງ຺ກປ຺ໂປ ໂຫຕິ.
໒໒. ກຕໂມ ຕສ຺ມິໍ ສມເຍ ສມ຺ມາວາຍາໂມ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອຍໍ ຕສ຺ມິໍ ສມເຍ ສມ຺ມາວາຍາໂມ ໂຫຕິ.
໒໓. ກຕມາ ຕສ຺ມິໍ ສມເຍ ສມ຺ມາສຕິ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອຍໍ ຕສ຺ມິໍ ສມເຍ ສມ຺ມາສຕິ ໂຫຕິ.
໒໔. ກຕໂມ ຕສ຺ມິໍ ສມເຍ ສມ຺ມາສມາຘິ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ຕສ຺ມິໍ ສມເຍ ສມ຺ມາສມາຘິ ໂຫຕິ.
໒໕. ກຕມໍ ຕສ຺ມິໍ ສມເຍ ສທ຺ຘາພລໍ ໂຫຕິ? ຍາ ຕສ຺ມິໍ ສມເຍ ສທ຺ຘາ ສທ຺ທຫນາ ໂອກປ຺ປນາ ອຠິປ຺ປສາໂທ ສທ຺ຘາ ສທ຺ຘິນ຺ທ຺ຣິຍໍ ສທ຺ຘາພລໍ – ອິທໍ ຕສ຺ມິໍ ສມເຍ ສທ຺ຘາພລໍ ໂຫຕິ.
໒໖. ກຕມໍ ຕສ຺ມິໍ ສມເຍ ວີຣິຍພລໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອິທໍ ຕສ຺ມິໍ ສມເຍ ວີຣິຍພລໍ ໂຫຕິ.
໒໗. ກຕມໍ ຕສ຺ມິໍ ສມເຍ ສຕິພລໍ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອິທໍ ຕສ຺ມິໍ ສມເຍ ສຕິພລໍ ໂຫຕິ.
໒໘. ກຕມໍ ຕສ຺ມິໍ ສມເຍ ສມາຘິພລໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອິທໍ ຕສ຺ມິໍ ສມເຍ ສມາຘິພລໍ ໂຫຕິ.
໒໙. ກຕມໍ ຕສ຺ມິໍ ສມເຍ ປຎ຺ຎາພລໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ຕສ຺ມິໍ ສມເຍ ປຎ຺ຎາພລໍ ໂຫຕິ.
໓໐. ກຕມໍ ຕສ຺ມິໍ ສມເຍ ຫິຣິພລໍ ໂຫຕິ? ຍໍ ຕສ຺ມິໍ ສມເຍ ຫິຣີຍຕິ ຫິຣິຍິຕພ຺ເພນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ຫິຣິພລໍ ໂຫຕິ.
໓໑. ກຕມໍ ຕສ຺ມິໍ ສມເຍ ໂອຕ຺ຕປ຺ປພລໍ ໂຫຕິ? ຍໍ ຕສ຺ມິໍ ສມເຍ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ໂອຕ຺ຕປ຺ປພລໍ ໂຫຕິ.
໓໒. ກຕໂມ ຕສ຺ມິໍ ສມເຍ ອໂລໂຠ ໂຫຕິ? ໂຍ ຕສ຺ມິໍ ສມເຍ ອໂລໂຠ ອລຸພ຺ຠນາ ອລຸພ຺ຠິຕຕ຺ຕໍ ອສາຣາໂຄ ອສາຣຊ຺ຊນາ ອສາຣຊ຺ຊິຕຕ຺ຕໍ ອນຠິຊ຺ຌາ ອໂລໂຠ ກຸສລມູລໍ – ອຍໍ ຕສ຺ມິໍ ສມເຍ ອໂລໂຠ ໂຫຕິ.
໓໓. ກຕໂມ ຕສ຺ມິໍ ສມເຍ ອໂທໂສ ໂຫຕິ? ໂຍ ຕສ຺ມິໍ ສມເຍ ອໂທໂສ ອທຸສ຺ສນາ ອທຸສ຺ສິຕຕ຺ຕໍ [ອທູສນາ ອທູສິຕຕ຺ຕໍ (ສ຺ຍາ.)] ອພ຺ຍາປາໂທ ອພ຺ຍາປຊ຺ໂຊ ອໂທໂສ ກຸສລມູລໍ – ອຍໍ ຕສ຺ມິໍ ສມເຍ ອໂທໂສ ໂຫຕິ?
໓໔. ກຕໂມ ຕສ຺ມິໍ ສມເຍ ອໂມໂຫ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ອໂມໂຫ ກຸສລມູລໍ – ອຍໍ ຕສ຺ມິໍ ສມເຍ ອໂມໂຫ ໂຫຕິ.
໓໕. ກຕມາ ຕສ຺ມິໍ ສມເຍ ອນຠິຊ຺ຌາ ໂຫຕິ? ໂຍ ຕສ຺ມິໍ ສມເຍ ອໂລໂຠ ອລຸພ຺ຠນາ ອລຸພ຺ຠິຕຕ຺ຕໍ ອສາຣາໂຄ ອສາຣຊ຺ຊນາ ອສາຣຊ຺ຊິຕຕ຺ຕໍ ອນຠິຊ຺ຌາ ອໂລໂຠ ກຸສລມູລໍ – ອຍໍ ຕສ຺ມິໍ ສມເຍ ອນຠິຊ຺ຌາ ໂຫຕິ.
໓໖. ກຕໂມ ຕສ຺ມິໍ ສມເຍ ອພ຺ຍາປາໂທ ໂຫຕິ? ໂຍ ຕສ຺ມິໍ ສມເຍ ອໂທໂສ ອທຸສ຺ສນາ ອທຸສ຺ສິຕຕ຺ຕໍ ອພ຺ຍາປາໂທ ອພ຺ຍາປຊ຺ໂຊ ອໂທໂສ ກຸສລມູລໍ – ອຍໍ ຕສ຺ມິໍ ສມເຍ ອພ຺ຍາປາໂທ ໂຫຕິ.
໓໗. ກຕມາ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ.
໓໘. ກຕມາ ຕສ຺ມິໍ ສມເຍ ຫິຣີ ໂຫຕິ? ຍໍ ຕສ຺ມິໍ ສມເຍ ຫິຣີຍຕິ ຫິຣິຍິຕພ຺ເພນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອຍໍ ຕສ຺ມິໍ ສມເຍ ຫິຣີ ໂຫຕິ.
໓໙. ກຕມໍ ຕສ຺ມິໍ ສມເຍ ໂອຕ຺ຕປ຺ປໍ ໂຫຕິ? ຍໍ ຕສ຺ມິໍ ສມເຍ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ໂອຕ຺ຕປ຺ປໍ ໂຫຕິ.
໔໐. ກຕມາ ຕສ຺ມິໍ ສມເຍ ກາຍປສ຺ສທ຺ຘິ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ປສ຺ສທ຺ຘິ ປຏິປສ຺ສທ຺ຘິ [ປຏິປ຺ປສ຺ສທ຺ຘິ (ສີ. ສ຺ຍາ.)] ປສ຺ສມ຺ຠນາ ປຏິປສ຺ສມ຺ຠນາ [ປຏິປ຺ປສ຺ສມ຺ຠນາ (ສີ. ສ຺ຍາ.)] ປຏິປສ຺ສມ຺ຠິຕຕ຺ຕໍ [ປຏິປ຺ປສ຺ສມ຺ຠິຕຕ຺ຕໍ (ສີ. ສ຺ຍາ.)] – ອຍໍ ຕສ຺ມິໍ ສມເຍ ກາຍປສ຺ສທ຺ຘິ ໂຫຕິ.
໔໑. ກຕມາ ຕສ຺ມິໍ ສມເຍ ຈິຕ຺ຕປສ຺ສທ຺ຘິ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ປສ຺ສທ຺ຘິ ປຏິປສ຺ສທ຺ຘິ ປສ຺ສມ຺ຠນາ ປຏິປສ຺ສມ຺ຠນາ ປຏິປສ຺ສມ຺ຠິຕຕ຺ຕໍ – ອຍໍ ຕສ຺ມິໍ ສມເຍ ຈິຕ຺ຕປສ຺ສທ຺ຘິ ໂຫຕິ.
໔໒. ກຕມາ ຕສ຺ມິໍ ສມເຍ ກາຍລຫຸຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ລຫຸຕາ ລຫຸປຣິຓາມຕາ ອທນ຺ຘນຕາ ອວິຕ຺ຖນຕາ – ອຍໍ ຕສ຺ມິໍ ສມເຍ ກາຍລຫຸຕາ ໂຫຕິ.
໔໓. ກຕມາ ຕສ຺ມິໍ ສມເຍ ຈິຕ຺ຕລຫຸຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ລຫຸຕາ ລຫຸປຣິຓາມຕາ ອທນ຺ຘນຕາ ອວິຕ຺ຖນຕາ – ອຍໍ ຕສ຺ມິໍ ສມເຍ ຈິຕ຺ຕລຫຸຕາ ໂຫຕິ.
໔໔. ກຕມາ ຕສ຺ມິໍ ສມເຍ ກາຍມຸທຸຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ມຸທຸຕາ ມທ຺ທວຕາ ອກກ຺ຂຬຕາ ອກຖິນຕາ – ອຍໍ ຕສ຺ມິໍ ສມເຍ ກາຍມຸທຸຕາ ໂຫຕິ.
໔໕. ກຕມາ ຕສ຺ມິໍ ສມເຍ ຈິຕ຺ຕມຸທຸຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ມຸທຸຕາ ມທ຺ທວຕາ ອກກ຺ຂຬຕາ ອກຖິນຕາ – ອຍໍ ຕສ຺ມິໍ ສມເຍ ຈິຕ຺ຕມຸທຸຕາ ໂຫຕິ.
໔໖. ກຕມາ ຕສ຺ມິໍ ສມເຍ ກາຍກມ຺ມຎ຺ຎຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ກມ຺ມຎ຺ຎຕາ ກມ຺ມຎ຺ຎຕ຺ຕໍ ກມ຺ມຎ຺ຎຠາໂວ – ອຍໍ ຕສ຺ມິໍ ສມເຍ ກາຍກມ຺ມຎ຺ຎຕາ ໂຫຕິ.
໔໗. ກຕມາ ຕສ຺ມິໍ ສມເຍ ຈິຕ຺ຕກມ຺ມຎ຺ຎຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ກມ຺ມຎ຺ຎຕາ ກມ຺ມຎ຺ຎຕ຺ຕໍ ກມ຺ມຎ຺ຎຠາໂວ – ອຍໍ ຕສ຺ມິໍ ສມເຍ ຈິຕ຺ຕກມ຺ມຎ຺ຎຕາ ໂຫຕິ.
໔໘. ກຕມາ ຕສ຺ມິໍ ສມເຍ ກາຍປາຄຸຎ຺ຎຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ປຄຸຓຕາ ປຄຸຓຕ຺ຕໍ ປຄຸຓຠາໂວ – ອຍໍ ຕສ຺ມິໍ ສມເຍ ກາຍປາຄຸຎ຺ຎຕາ ໂຫຕິ.
໔໙. ກຕມາ ຕສ຺ມິໍ ສມເຍ ຈິຕ຺ຕປາຄຸຎ຺ຎຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ປຄຸຓຕາ ປຄຸຓຕ຺ຕໍ ປຄຸຓຠາໂວ – ອຍໍ ຕສ຺ມິໍ ສມເຍ ຈິຕ຺ຕປາຄຸຎ຺ຎຕາ ໂຫຕິ.
໕໐. ກຕມາ ຕສ຺ມິໍ ສມເຍ ກາຍຸຊຸກຕາ ໂຫຕິ? ຍາ ຕສ຺ມິໍ ສມເຍ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ອຸຊຸຕາ ອຸຊຸກຕາ ອຊິມ຺ຫຕາ ອວງ຺ກຕາ ອກຸຏິລຕາ – ອຍໍ ຕສ຺ມິໍ ສມເຍ ກາຍຸຊຸກຕາ ໂຫຕິ.
໕໑. ກຕມາ ຕສ຺ມິໍ ສມເຍ ຈິຕ຺ຕຸຊຸກຕາ ໂຫຕິ? ຍາ ຕສ຺ມິໍ ສມເຍ ວິຎ຺ຎາຓກ຺ຂນ຺ຘສ຺ສ ອຸຊຸຕາ ອຸຊຸກຕາ ອຊິມ຺ຫຕາ ອວງ຺ກຕາ ອກຸຏິລຕາ – ອຍໍ ຕສ຺ມິໍ ສມເຍ ຈິຕ຺ຕຸຊຸກຕາ ໂຫຕິ.
໕໒. ກຕມາ ຕສ຺ມິໍ ສມເຍ ສຕິ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອຍໍ ຕສ຺ມິໍ ສມເຍ ສຕິ ໂຫຕິ.
໕໓. ກຕມໍ ຕສ຺ມິໍ ສມເຍ ສມ຺ປຊຎ຺ຎໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ຕສ຺ມິໍ ສມເຍ ສມ຺ປຊຎ຺ຎໍ ໂຫຕິ.
໕໔. ກຕໂມ ຕສ຺ມິໍ ສມເຍ ສມໂຖ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ຕສ຺ມິໍ ສມເຍ ສມໂຖ ໂຫຕິ.
໕໕. ກຕມາ ຕສ຺ມິໍ ສມເຍ ວິປສ຺ສນາ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ຕສ຺ມິໍ ສມເຍ ວິປສ຺ສນາ ໂຫຕິ.
໕໖. ກຕໂມ ຕສ຺ມິໍ ສມເຍ ປຄ຺ຄາໂຫ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອຍໍ ຕສ຺ມິໍ ສມເຍ ປຄ຺ຄາໂຫ ໂຫຕິ.
໕໗. ກຕໂມ ຕສ຺ມິໍ ສມເຍ ອວິກ຺ເຂໂປ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ຕສ຺ມິໍ ສມເຍ ອວິກ຺ເຂໂປ ໂຫຕິ.
ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.
ປທຠາຊນີຍໍ.
ປຐມຠາຓວາໂຣ.
ໂກຏ຺ຐາສວາໂຣ
໕໘. ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ອຏ຺ຐິນ຺ທ຺ຣິຍານິ ໂຫນ຺ຕິ, ປຎ຺ຈງ຺ຄິກໍ ຌານໍ ໂຫຕິ, ປຎ຺ຈງ຺ຄິໂກ ມຄ຺ໂຄ ໂຫຕິ, ສຕ຺ຕ ພລານິ ໂຫນ຺ຕິ, ຕໂຍ ເຫຕູ ໂຫນ຺ຕິ, ເອໂກ ຜສ຺ໂສ ໂຫຕິ, ເອກາ ເວທນາ ໂຫຕິ, ເອກາ ສຎ຺ຎາ ໂຫຕິ, ເອກາ ເຈຕນາ ໂຫຕິ, ເອກໍ ຈິຕ຺ຕໍ ໂຫຕິ, ເອໂກ ເວທນາກ຺ຂນ຺ໂຘ ໂຫຕິ, ເອໂກ ສຎ຺ຎາກ຺ຂນ຺ໂຘ ໂຫຕິ, ເອໂກ ສງ຺ຂາຣກ຺ຂນ຺ໂຘ ໂຫຕິ, ເອໂກ ວິຎ຺ຎາຓກ຺ຂນ຺ໂຘ ໂຫຕິ, ເອກໍ ມນາຍຕນໍ ໂຫຕິ, ເອກໍ ມນິນ຺ທ຺ຣິຍໍ ໂຫຕິ, ເອກາ ມໂນວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.
໕໙. ກຕເມ ຕສ຺ມິໍ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ.
໖໐. ກຕໂມ ຕສ຺ມິໍ ສມເຍ ເວທນາກ຺ຂນ຺ໂຘ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເວທນາກ຺ຂນ຺ໂຘ ໂຫຕິ.
໖໑. ກຕໂມ ຕສ຺ມິໍ ສມເຍ ສຎ຺ຎາກ຺ຂນ຺ໂຘ ໂຫຕິ? ຍາ ຕສ຺ມິໍ ສມເຍ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ສຎ຺ຎາກ຺ຂນ຺ໂຘ ໂຫຕິ.
໖໒. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ສທ຺ຘິນ຺ທ຺ຣິຍໍ ວີຣິຍິນ຺ທ຺ຣິຍໍ ສຕິນ຺ທ຺ຣິຍໍ ສມາຘິນ຺ທ຺ຣິຍໍ ປຎ຺ຎິນ຺ທ຺ຣິຍໍ ຊີວິຕິນ຺ທ຺ຣິຍໍ ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຍາໂມ ສມ຺ມາສຕິ ສມ຺ມາສມາຘິ ສທ຺ຘາພລໍ ວີຣິຍພລໍ ສຕິພລໍ ສມາຘິພລໍ ປຎ຺ຎາພລໍ ຫິຣິພລໍ ໂອຕ຺ຕປ຺ປພລໍ ອໂລໂຠ ອໂທໂສ ອໂມໂຫ ອນຠິຊ຺ຌາ ອພ຺ຍາປາໂທ ສມ຺ມາທິຏ຺ຐິ ຫິຣີ ໂອຕ຺ຕປ຺ປໍ ກາຍປສ຺ສທ຺ຘິ ຈິຕ຺ຕປສ຺ສທ຺ຘິ ກາຍລຫຸຕາ ຈິຕ຺ຕລຫຸຕາ ກາຍມຸທຸຕາ ຈິຕ຺ຕມຸທຸຕາ ກາຍກມ຺ມຎ຺ຎຕາ ຈິຕ຺ຕກມ຺ມຎ຺ຎຕາ ກາຍປາຄຸຎ຺ຎຕາ ຈິຕ຺ຕປາຄຸຎ຺ຎຕາ ກາຍຸຊຸກຕາ ຈິຕ຺ຕຸຊຸກຕາ ສຕິ ສມ຺ປຊຎ຺ຎໍ ສມໂຖ ວິປສ຺ສນາ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ [ຖເປຕ຺ວາ (ກ.)] ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ.
໖໓. ກຕໂມ ຕສ຺ມິໍ ສມເຍ ວິຎ຺ຎາຓກ຺ຂນ຺ໂຘ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອຍໍ ຕສ຺ມິໍ ສມເຍ ວິຎ຺ຎາຓກ຺ຂນ຺ໂຘ ໂຫຕິ.
ອິເມ ຕສ຺ມິໍ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ.
໖໔. ກຕມານິ ຕສ຺ມິໍ ສມເຍ ທ຺ວາຍຕນານິ ໂຫນ຺ຕິ? ມນາຍຕນໍ ຘມ຺ມາຍຕນໍ.
໖໕. ກຕມໍ ຕສ຺ມິໍ ສມເຍ ມນາຍຕນໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນາຍຕນໍ ໂຫຕິ.
໖໖. ກຕມໍ ຕສ຺ມິໍ ສມເຍ ຘມ຺ມາຍຕນໍ ໂຫຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ຕສ຺ມິໍ ສມເຍ ຘມ຺ມາຍຕນໍ ໂຫຕິ.
ອິມານິ ຕສ຺ມິໍ ສມເຍ ທ຺ວາຍຕນານິ ໂຫນ຺ຕິ.
໖໗. ກຕມາ ຕສ຺ມິໍ ສມເຍ ທ຺ເວ ຘາຕຸໂຍ ໂຫນ຺ຕິ? ມໂນວິຎ຺ຎາຓຘາຕຸ, ຘມ຺ມຘາຕຸ.
໖໘. ກຕມາ ຕສ຺ມິໍ ສມເຍ ມໂນວິຎ຺ຎາຓຘາຕຸ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອຍໍ ຕສ຺ມິໍ ສມເຍ ມໂນວິຎ຺ຎາຓຘາຕຸ ໂຫຕິ.
໖໙. ກຕມາ ຕສ຺ມິໍ ສມເຍ ຘມ຺ມຘາຕຸ ໂຫຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອຍໍ ຕສ຺ມິໍ ສມເຍ ຘມ຺ມຘາຕຸ ໂຫຕິ.
ອິມາ ຕສ຺ມິໍ ສມເຍ ທ຺ເວ ຘາຕຸໂຍ ໂຫນ຺ຕິ.
໗໐. ກຕເມ ຕສ຺ມິໍ ສມເຍ ຕໂຍ ອາຫາຣາ ໂຫນ຺ຕິ? ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ.
໗໑. ກຕໂມ ຕສ຺ມິໍ ສມເຍ ຜສ຺ສາຫາໂຣ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ສາຫາໂຣ ໂຫຕິ.
໗໒. ກຕໂມ ຕສ຺ມິໍ ສມເຍ ມໂນສຎ຺ເຈຕນາຫາໂຣ ໂຫຕິ? ຍາ ຕສ຺ມິໍ ສມເຍ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ມໂນສຎ຺ເຈຕນາຫາໂຣ ໂຫຕິ.
໗໓. ກຕໂມ ຕສ຺ມິໍ ສມເຍ ວິຎ຺ຎາຓາຫາໂຣ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອຍໍ ຕສ຺ມິໍ ສມເຍ ວິຎ຺ຎາຓາຫາໂຣ ໂຫຕິ.
ອິເມ ຕສ຺ມິໍ ສມເຍ ຕໂຍ ອາຫາຣາ ໂຫນ຺ຕິ.
໗໔. ກຕມານິ ຕສ຺ມິໍ ສມເຍ ອຏ຺ຐິນ຺ທ຺ຣິຍານິ ໂຫນ຺ຕິ? ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ, ມນິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ, ຊີວິຕິນ຺ທ຺ຣິຍໍ.
໗໕. ກຕມໍ ຕສ຺ມິໍ ສມເຍ ສທ຺ຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ສທ຺ຘາ ສທ຺ທຫນາ ໂອກປ຺ປນາ ອຠິປ຺ປສາໂທ ສທ຺ຘາ ສທ຺ຘິນ຺ທ຺ຣິຍໍ ສທ຺ຘາພລໍ – ອິທໍ ຕສ຺ມິໍ ສມເຍ ສທ຺ຘິນ຺ທ຺ຣິຍໍ ໂຫຕິ.
໗໖. ກຕມໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອິທໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ.
໗໗. ກຕມໍ ຕສ຺ມິໍ ສມເຍ ສຕິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອິທໍ ຕສ຺ມິໍ ສມເຍ ສຕິນ຺ທ຺ຣິຍໍ ໂຫຕິ.
໗໘. ກຕມໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອິທໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ.
໗໙. ກຕມໍ ຕສ຺ມິໍ ສມເຍ ປຎ຺ຎິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ຕສ຺ມິໍ ສມເຍ ປຎ຺ຎິນ຺ທ຺ຣິຍໍ ໂຫຕິ.
໘໐. ກຕມໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ມນິນ຺ທ຺ຣິຍໍ ໂຫຕິ.
໘໑. ກຕມໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ໂສມນສ຺ສິນ຺ທ຺ຣິຍໍ ໂຫຕິ.
໘໒. ກຕມໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ຕສ຺ມິໍ ສມເຍ ຊີວິຕິນ຺ທ຺ຣິຍໍ ໂຫຕິ.
ອິມານິ ຕສ຺ມິໍ ສມເຍ ອຏ຺ຐິນ຺ທ຺ຣິຍານິ ໂຫນ຺ຕິ.
໘໓. ກຕມໍ ຕສ຺ມິໍ ສມເຍ ປຎ຺ຈງ຺ຄິກໍ ຌານໍ ໂຫຕິ? ວິຕກ຺ໂກ, ວິຈາໂຣ, ປີຕິ, ສຸຂໍ, ຈິຕ຺ຕສ຺ເສກຄ຺ຄຕາ.
໘໔. ກຕໂມ ຕສ຺ມິໍ ສມເຍ ວິຕກ຺ໂກ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ – ອຍໍ ຕສ຺ມິໍ ສມເຍ ວິຕກ຺ໂກ ໂຫຕິ.
໘໕. ກຕໂມ ຕສ຺ມິໍ ສມເຍ ວິຈາໂຣ ໂຫຕິ? ໂຍ ຕສ຺ມິໍ ສມເຍ ຈາໂຣ ວິຈາໂຣ ອນຸວິຈາໂຣ ອຸປວິຈາໂຣ ຈິຕ຺ຕສ຺ສ ອນຸສນ຺ຘານຕາ ອນຸເປກ຺ຂນຕາ – ອຍໍ ຕສ຺ມິໍ ສມເຍ ວິຈາໂຣ ໂຫຕິ.
໘໖. ກຕມາ ຕສ຺ມິໍ ສມເຍ ປີຕິ ໂຫຕິ? ຍາ ຕສ຺ມິໍ ສມເຍ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສ – ອຍໍ ຕສ຺ມິໍ ສມເຍ ປີຕິ ໂຫຕິ.
໘໗. ກຕມໍ ຕສ຺ມິໍ ສມເຍ ສຸຂໍ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ຕສ຺ມິໍ ສມເຍ ສຸຂໍ ໂຫຕິ.
໘໘. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.
ອິທໍ ຕສ຺ມິໍ ສມເຍ ປຎ຺ຈງ຺ຄິກໍ ຌານໍ ໂຫຕິ.
໘໙. ກຕໂມ ຕສ຺ມິໍ ສມເຍ ປຎ຺ຈງ຺ຄິໂກ ມຄ຺ໂຄ ໂຫຕິ? ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ.
໙໐. ກຕມາ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ຕສ຺ມິໍ ສມເຍ ສມ຺ມາທິຏ຺ຐິ ໂຫຕິ.
໙໑. ກຕໂມ ຕສ຺ມິໍ ສມເຍ ສມ຺ມາສງ຺ກປ຺ໂປ ໂຫຕິ? ໂຍ ຕສ຺ມິໍ ສມເຍ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ – ອຍໍ ຕສ຺ມິໍ ສມເຍ ສມ຺ມາສງ຺ກປ຺ໂປ ໂຫຕິ.
໙໒. ກຕໂມ ຕສ຺ມິໍ ສມເຍ ສມ຺ມາວາຍາໂມ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອຍໍ ຕສ຺ມິໍ ສມເຍ ສມ຺ມາວາຍາໂມ ໂຫຕິ.
໙໓. ກຕມາ ຕສ຺ມິໍ ສມເຍ ສມ຺ມາສຕິ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອຍໍ ຕສ຺ມິໍ ສມເຍ ສມ຺ມາສຕິ ໂຫຕິ.
໙໔. ກຕໂມ ຕສ຺ມິໍ ສມເຍ ສມ຺ມາສມາຘິ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ຕສ຺ມິໍ ສມເຍ ສມ຺ມາສມາຘິ ໂຫຕິ.
ອຍໍ ຕສ຺ມິໍ ສມເຍ ປຎ຺ຈງ຺ຄິໂກ ມຄ຺ໂຄ ໂຫຕິ.
໙໕. ກຕມານິ ຕສ຺ມິໍ ສມເຍ ສຕ຺ຕ ພລານິ ໂຫນ຺ຕິ? ສທ຺ຘາພລໍ, ວີຣິຍພລໍ, ສຕິພລໍ, ສມາຘິພລໍ, ປຎ຺ຎາພລໍ, ຫິຣິພລໍ, ໂອຕ຺ຕປ຺ປພລໍ.
໙໖. ກຕມໍ ຕສ຺ມິໍ ສມເຍ ສທ຺ຘາພລໍ ໂຫຕິ? ຍາ ຕສ຺ມິໍ ສມເຍ ສທ຺ຘາ ສທ຺ທຫນາ ໂອກປ຺ປນາ ອຠິປ຺ປສາໂທ ສທ຺ຘາ ສທ຺ຘິນ຺ທ຺ຣິຍໍ ສທ຺ຘາພລໍ – ອິທໍ ຕສ຺ມິໍ ສມເຍ ສທ຺ຘາພລໍ ໂຫຕິ.
໙໗. ກຕມໍ ຕສ຺ມິໍ ສມເຍ ວີຣິຍພລໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອິທໍ ຕສ຺ມິໍ ສມເຍ ວີຣິຍພລໍ ໂຫຕິ.
໙໘. ກຕມໍ ຕສ຺ມິໍ ສມເຍ ສຕິພລໍ ໂຫຕິ? ຍາ ຕສ຺ມິໍ ສມເຍ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອິທໍ ຕສ຺ມິໍ ສມເຍ ສຕິພລໍ ໂຫຕິ.
໙໙. ກຕມໍ ຕສ຺ມິໍ ສມເຍ ສມາຘິພລໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອິທໍ ຕສ຺ມິໍ ສມເຍ ສມາຘິພລໍ ໂຫຕິ.
໑໐໐. ກຕມໍ ຕສ຺ມິໍ ສມເຍ ປຎ຺ຎາພລໍ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ ວິຈໂຍ ປວິຈໂຍ ຘມ຺ມວິຈໂຍ ສລ຺ລກ຺ຂຓາ ອຸປລກ຺ຂຓາ ປຈ຺ຈຸປລກ຺ຂຓາ ປຓ຺ຑິຈ຺ຈໍ ໂກສລ຺ລໍ ເນປຸຎ຺ຎໍ ເວຠພ຺ຍາ ຈິນ຺ຕາ ອຸປປຣິກ຺ຂາ ຠູຣີ ເມຘາ ປຣິຓາຍິກາ ວິປສ຺ສນາ ສມ຺ປຊຎ຺ຎໍ ປໂຕໂທ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ປຎ຺ຎາສຕ຺ຖໍ ປຎ຺ຎາປາສາໂທ ປຎ຺ຎາອາໂລໂກ ປຎ຺ຎາໂອຠາໂສ ປຎ຺ຎາປຊ຺ໂຊໂຕ ປຎ຺ຎາຣຕນໍ ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ຕສ຺ມິໍ ສມເຍ ປຎ຺ຎາພລໍ ໂຫຕິ.
໑໐໑. ກຕມໍ ຕສ຺ມິໍ ສມເຍ ຫິຣິພລໍ ໂຫຕິ? ຍໍ ຕສ຺ມິໍ ສມເຍ ຫິຣີຍຕິ ຫິຣິຍິຕພ຺ເພນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ຫິຣິພລໍ ໂຫຕິ.
໑໐໒. ກຕມໍ ຕສ຺ມິໍ ສມເຍ ໂອຕ຺ຕປ຺ປພລໍ ໂຫຕິ? ຍໍ ຕສ຺ມິໍ ສມເຍ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ຕສ຺ມິໍ ສມເຍ ໂອຕ຺ຕປ຺ປພລໍ ໂຫຕິ.
ອິມານິ ຕສ຺ມິໍ ສມເຍ ສຕ຺ຕ ພລານິ ໂຫນ຺ຕິ.
໑໐໓. ກຕເມ ຕສ຺ມິໍ ສມເຍ ຕໂຍ ເຫຕູ ໂຫນ຺ຕິ? ອໂລໂຠ, ອໂທໂສ, ອໂມໂຫ.
໑໐໔. ກຕໂມ ຕສ຺ມິໍ ສມເຍ ອໂລໂຠ ໂຫຕິ? ໂຍ ຕສ຺ມິໍ ສມເຍ ອໂລໂຠ ອລຸພ຺ຠນາ ອລຸພ຺ຠິຕຕ຺ຕໍ ອສາຣາໂຄ ອສາຣຊ຺ຊນາ ອສາຣຊ຺ຊິຕຕ຺ຕໍ ອນຠິຊ຺ຌາ ອໂລໂຠ ກຸສລມູລໍ – ອຍໍ ຕສ຺ມິໍ ສມເຍ ອໂລໂຠ ໂຫຕິ.
໑໐໕. ກຕໂມ ຕສ຺ມິໍ ສມເຍ ອໂທໂສ ໂຫຕິ? ໂຍ ຕສ຺ມິໍ ສມເຍ ອໂທໂສ ອທຸສ຺ສນາ ອທຸສ຺ສິຕຕ຺ຕໍ ອພ຺ຍາປາໂທ ອພ຺ຍາປຊ຺ໂຊ ອໂທໂສ ກຸສລມູລໍ – ອຍໍ ຕສ຺ມິໍ ສມເຍ ອໂທໂສ ໂຫຕິ.
໑໐໖. ກຕໂມ ຕສ຺ມິໍ ສມເຍ ອໂມໂຫ ໂຫຕິ? ຍາ ຕສ຺ມິໍ ສມເຍ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ຕສ຺ມິໍ ສມເຍ ອໂມໂຫ ໂຫຕິ.
ອິເມ ຕສ຺ມິໍ ສມເຍ ຕໂຍ ເຫຕູ ໂຫນ຺ຕິ.
໑໐໗. ກຕໂມ ຕສ຺ມິໍ ສມເຍ ເອໂກ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ເອໂກ ຜສ຺ໂສ ໂຫຕິ.
໑໐໘. ກຕມາ ຕສ຺ມິໍ ສມເຍ ເອກາ ເວທນາ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເອກາ ເວທນາ ໂຫຕິ.
໑໐໙. ກຕມາ ຕສ຺ມິໍ ສມເຍ ເອກາ ສຎ຺ຎາ ໂຫຕິ? ຍາ ຕສ຺ມິໍ ສມເຍ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ເອກາ ສຎ຺ຎາ ໂຫຕິ.
໑໑໐. ກຕມາ ຕສ຺ມິໍ ສມເຍ ເອກາ ເຈຕນາ ໂຫຕິ? ຍາ ຕສ຺ມິໍ ສມເຍ ເຈຕນາ ສຎ຺ເຈຕນາ ເຈຕຍິຕຕ຺ຕໍ – ອຍໍ ຕສ຺ມິໍ ສມເຍ ເອກາ ເຈຕນາ ໂຫຕິ.
໑໑໑. ກຕມໍ ຕສ຺ມິໍ ສມເຍ ເອກໍ ຈິຕ຺ຕໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ເອກໍ ຈິຕ຺ຕໍ ໂຫຕິ.
໑໑໒. ກຕໂມ ຕສ຺ມິໍ ສມເຍ ເອໂກ ເວທນາກ຺ຂນ຺ໂຘ ໂຫຕິ? ຍໍ ຕສ຺ມິໍ ສມເຍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ຕສ຺ມິໍ ສມເຍ ເອໂກ ເວທນາກ຺ຂນ຺ໂຘ ໂຫຕິ.
໑໑໓. ກຕໂມ ຕສ຺ມິໍ ສມເຍ ເອໂກ ສຎ຺ຎາກ຺ຂນ຺ໂຘ ໂຫຕິ? ຍາ ຕສ຺ມິໍ ສມເຍ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ຕສ຺ມິໍ ສມເຍ ເອໂກ ສຎ຺ຎາກ຺ຂນ຺ໂຘ ໂຫຕິ.
໑໑໔. ກຕໂມ ຕສ຺ມິໍ ສມເຍ ເອໂກ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ສທ຺ຘິນ຺ທ຺ຣິຍໍ ວີຣິຍິນ຺ທ຺ຣິຍໍ ສຕິນ຺ທ຺ຣິຍໍ ສມາຘິນ຺ທ຺ຣິຍໍ ປຎ຺ຎິນ຺ທ຺ຣິຍໍ ຊີວິຕິນ຺ທ຺ຣິຍໍ ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຍາໂມ ສມ຺ມາສຕິ ສມ຺ມາສມາຘິ ສທ຺ຘາພລໍ ວີຣິຍພລໍ ສຕິພລໍ ສມາຘິພລໍ ປຎ຺ຎາພລໍ ຫິຣິພລໍ ໂອຕ຺ຕປ຺ປພລໍ ອໂລໂຠ ອໂທໂສ ອໂມໂຫ ອນຠິຊ຺ຌາ ອພ຺ຍາປາໂທ ສມ຺ມາທິຏ຺ຐິ ຫິຣີ ໂອຕ຺ຕປ຺ປໍ ກາຍປສ຺ສທ຺ຘິ ຈິຕ຺ຕປສ຺ສທ຺ຘິ ກາຍລຫຸຕາ ຈິຕ຺ຕລຫຸຕາ ກາຍມຸທຸຕາ ຈິຕ຺ຕມຸທຸຕາ ກາຍກມ຺ມຎ຺ຎຕາ ຈິຕ຺ຕກມ຺ມຎ຺ຎຕາ ກາຍປາຄຸຎ຺ຎຕາ ຈິຕ຺ຕປາຄຸຎ຺ຎຕາ ກາຍຸຊຸກຕາ ຈິຕ຺ຕຸຊຸກຕາ ສຕິ ສມ຺ປຊຎ຺ຎໍ ສມໂຖ ວິປສ຺ສນາ ປຄ຺ຄາໂຫ ອວິກ຺ເຂໂປ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ເອໂກ ສງ຺ຂາຣກ຺ຂນ຺ໂຘ ໂຫຕິ.
໑໑໕. ກຕໂມ ຕສ຺ມິໍ ສມເຍ ເອໂກ ວິຎ຺ຎາຓກ຺ຂນ຺ໂຘ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອຍໍ ຕສ຺ມິໍ ສມເຍ ເອໂກ ວິຎ຺ຎາຓກ຺ຂນ຺ໂຘ ໂຫຕິ.
໑໑໖. ກຕມໍ ຕສ຺ມິໍ ສມເຍ ເອກໍ ມນາຍຕນໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ເອກໍ ມນາຍຕນໍ ໂຫຕິ.
໑໑໗. ກຕມໍ ຕສ຺ມິໍ ສມເຍ ເອກໍ ມນິນ຺ທ຺ຣິຍໍ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ຕສ຺ມິໍ ສມເຍ ເອກໍ ມນິນ຺ທ຺ຣິຍໍ ໂຫຕິ.
໑໑໘. ກຕມາ ຕສ຺ມິໍ ສມເຍ ເອກາ ມໂນວິຎ຺ຎາຓຘາຕຸ ໂຫຕິ? ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອຍໍ ຕສ຺ມິໍ ສມເຍ ເອກາ ມໂນວິຎ຺ຎາຓຘາຕຸ ໂຫຕິ.
໑໑໙. ກຕມໍ ຕສ຺ມິໍ ສມເຍ ເອກໍ ຘມ຺ມາຍຕນໍ ໂຫຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ຕສ຺ມິໍ ສມເຍ ເອກໍ ຘມ຺ມາຍຕນໍ ໂຫຕິ.
໑໒໐. ກຕມາ ຕສ຺ມິໍ ສມເຍ ເອກາ ຘມ຺ມຘາຕຸ ໂຫຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອຍໍ ຕສ຺ມິໍ ສມເຍ ເອກາ ຘມ຺ມຘາຕຸ ໂຫຕິ.
ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.
ໂກຏ຺ຐາສວາໂຣ.
ສຸຎ຺ຎຕວາໂຣ
໑໒໑. ຕສ຺ມິໍ ໂຂ ປນ ສມເຍ ຘມ຺ມາ ໂຫນ຺ຕິ, ຂນ຺ຘາ ໂຫນ຺ຕິ, ອາຍຕນານິ ໂຫນ຺ຕິ, ຘາຕຸໂຍ ໂຫນ຺ຕິ, ອາຫາຣາ ໂຫນ຺ຕິ, ອິນ຺ທ຺ຣິຍານິ ໂຫນ຺ຕິ, ຌານໍ ໂຫຕິ, ມຄ຺ໂຄ ໂຫຕິ, ພລານິ ໂຫນ຺ຕິ, ເຫຕູ ໂຫນ຺ຕິ, ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ເວທນາກ຺ຂນ຺ໂຘ ໂຫຕິ, ສຎ຺ຎາກ຺ຂນ຺ໂຘ ໂຫຕິ, ສງ຺ຂາຣກ຺ຂນ຺ໂຘ ໂຫຕິ, ວິຎ຺ຎາຓກ຺ຂນ຺ໂຘ ໂຫຕິ, ມນາຍຕນໍ ໂຫຕິ, ມນິນ຺ທ຺ຣິຍໍ ໂຫຕິ, ມໂນວິຎ຺ຎາຓຘາຕຸ ໂຫຕິ, ຘມ຺ມາຍຕນໍ ໂຫຕິ, ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ກຸສລາ.
໑໒໒. ກຕເມ ຕສ຺ມິໍ ສມເຍ ຘມ຺ມາ ໂຫນ຺ຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິເມ ຕສ຺ມິໍ ສມເຍ ຘມ຺ມາ ໂຫນ຺ຕິ.
໑໒໓. ກຕເມ ຕສ຺ມິໍ ສມເຍ ຂນ຺ຘາ ໂຫນ຺ຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິເມ ຕສ຺ມິໍ ສມເຍ ຂນ຺ຘາ ໂຫນ຺ຕິ.
໑໒໔. ກຕມານິ ຕສ຺ມິໍ ສມເຍ ອາຍຕນານິ ໂຫນ຺ຕິ? ມນາຍຕນໍ, ຘມ຺ມາຍຕນໍ – ອິມານິ ຕສ຺ມິໍ ສມເຍ ອາຍຕນານິ ໂຫນ຺ຕິ.
໑໒໕. ກຕມາ ຕສ຺ມິໍ ສມເຍ ຘາຕຸໂຍ ໂຫນ຺ຕິ? ມໂນວິຎ຺ຎາຓຘາຕຸ, ຘມ຺ມຘາຕຸ – ອິມາ ຕສ຺ມິໍ ສມເຍ ຘາຕຸໂຍ ໂຫນ຺ຕິ.
໑໒໖. ກຕເມ ຕສ຺ມິໍ ສມເຍ ອາຫາຣາ ໂຫນ຺ຕິ? ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ – ອິເມ ຕສ຺ມິໍ ສມເຍ ອາຫາຣາ ໂຫນ຺ຕິ.
໑໒໗. ກຕມານິ ຕສ຺ມິໍ ສມເຍ ອິນ຺ທ຺ຣິຍານິ ໂຫນ຺ຕິ? ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ, ມນິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ, ຊີວິຕິນ຺ທ຺ຣິຍໍ – ອິມານິ ຕສ຺ມິໍ ສມເຍ ອິນ຺ທ຺ຣິຍານິ ໂຫນ຺ຕິ.
໑໒໘. ກຕມໍ ຕສ຺ມິໍ ສມເຍ ຌານໍ ໂຫຕິ? ວິຕກ຺ໂກ, ວິຈາໂຣ, ປີຕິ, ສຸຂໍ, ຈິຕ຺ຕສ຺ເສກຄ຺ຄຕາ – ອິທໍ ຕສ຺ມິໍ ສມເຍ ຌານໍ ໂຫຕິ.
໑໒໙. ກຕໂມ ຕສ຺ມິໍ ສມເຍ ມຄ຺ໂຄ ໂຫຕິ? ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ – ອຍໍ ຕສ຺ມິໍ ສມເຍ ມຄ຺ໂຄ ໂຫຕິ.
໑໓໐. ກຕມານິ ຕສ຺ມິໍ ສມເຍ ພລານິ ໂຫນ຺ຕິ? ສທ຺ຘາພລໍ, ວີຣິຍພລໍ, ສຕິພລໍ, ສມາຘິພລໍ, ປຎ຺ຎາພລໍ, ຫິຣິພລໍ, ໂອຕ຺ຕປ຺ປພລໍ – ອິມານິ ຕສ຺ມິໍ ສມເຍ ພລານິ ໂຫນ຺ຕິ.
໑໓໑. ກຕເມ ຕສ຺ມິໍ ສມເຍ ເຫຕູ ໂຫນ຺ຕິ? ອໂລໂຠ, ອໂທໂສ, ອໂມໂຫ – ອິເມ ຕສ຺ມິໍ ສມເຍ ເຫຕູ ໂຫນ຺ຕິ.
໑໓໒. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ…ເປ… ອຍໍ ຕສ຺ມິໍ ສມເຍ ຜສ຺ໂສ ໂຫຕິ.