ພາຫຸສຈ຺ຈຄຸຓມກ຺ຂນໍ
໕. ປຸນປິ ຘມ຺ມານນ຺ໂທ ອາຈຣິຍສ຺ສ ພາຫຸສຈ຺ຈຄຸຓໍ ມກ຺ເຂຕຸກາໂມ ເອວມາຫ – ‘‘ຕສ຺ສ (ພຸທ຺ຘໂຆສສ຺ສ) ສມຍນ຺ຕຣໂກວິທສງ຺ຂາຕໍ ພາຫຸສຈ຺ຈໍ ນ ຕໂຕ ອຸຕ຺ຕຣິຕຣໍ ໂຫຕິ, ຍໍ ອາຘຸນິການໍ ຄນ຺ຖນ຺ຕຣໂກວິທານໍ ສີຫຬິກຠິກ຺ຂູນໍ ຍໍ ວາ ເອກາທສເມ ຂຣິສ຺ຕວສ຺ສສຕເກ (໑໐໐໑-໑໑໐໐) ອຸປ຺ປນ຺ນານໍ ທກ຺ຂິຓອິນ຺ທິຍຣຏ຺ຐິການໍ ອນຸຣຸທ຺ຘ-ຘມ຺ມປາລາທີນໍ ຠິກ຺ຂູນ’’ນ຺ຕິ.
ຕໍ ປນ ສພ຺ພຖາປິ ອຍຸຕ຺ຕວຈນເມວ. ຍທິ ຫິ ອາຘຸນິກາ ວາ ສີຫຬິກຠິກ຺ຂູ, ໂປຣາຓາ ວາ ອາຈຣິຍອນຸຣຸທ຺ຘ-ຘມ຺ມປາລຕ຺ເຖຣາທໂຍ ສມຍນ຺ຕຣພາຫຸສຈ຺ຈວເສນ ອາຈຣິຍພຸທ຺ຘໂຆເສນ ສມານາ ວາ ອຸຕ຺ຕຣິຕຣາ ວາ ຠເວຍ຺ຍຸໍ, ເຕ ອາຈຣິຍພຸທ຺ຘໂຆສຕ຺ເຖຣສ຺ສ ອຏ຺ຐກຖາຫິ ອນາຣທ຺ຘຈິຕ຺ຕາ ຫຸຕ຺ວາ ຕໂຕ ສຸນ຺ທຣຕຣາ ປຣິປຸຓ຺ຓຕຣາ ຈ ອຠິນວຏ຺ຐກຖາໂຍ ກເຣຍ຺ຍຸໍ, ນ ປນ ເຕ ຕຖາ ກໂຣນ຺ຕິ, ນ ເກວລໍ ນ ກໂຣນ຺ຕິເຍວ, ອຖ ໂຂ ເຕສໍ ເອໂກປິ ນ ເອວໍ ວທຕິ ‘‘ອຫໍ ພຸທ຺ຘໂຆເສນ ພາຫຸສຈ຺ຈວເສນ ສມສໂມຕິ ວາ ອຸຕ຺ຕຣິຕໂຣ’’ຕິ ວາ, ອຎ຺ຎທຕ຺ຖຸ ເຕ ອາຈຣິຍສ຺ສ ອຏ຺ຐກຖາໂຍເຍວ ສໍວຓ຺ເຓນ຺ຕິ ຈ ອຸປຕ຺ຖມ຺ເຠນ຺ຕິ ຈ, ອາຈຣິຍຏ຺ຐາເນ ຈ ຐເປນ຺ຕິ. ເຕເນຕໍ ຎາຍຕິ ສພ຺ພຖາປິ ອຍຸຕ຺ຕວຈນນ຺ຕິ.