ຘມ຺ມປທຏ຺ຐກຖາກຣຓໍ

ອປຣາປິ ຕິສ຺ໂສ ອຏ຺ຐກຖາໂຍ ສນ຺ຕິ ຂຸທ຺ທກປາຐຏ຺ຐກຖາ ຘມ຺ມປທຏ຺ຐກຖາ ສຸຕ຺ຕນິປາຕຏ຺ຐກຖາ ຈາຕິ, ຍາ ຕາສຸ ທິສ຺ສມານນິຄມນວເສນ ອາຈຣິຍພຸທ຺ຘໂຆເສເນວ ກຕາຕິ ປຎ຺ຎາຍນ຺ຕິ. ຕຕ຺ຖ ປນ ວຸຕ຺ຕວຈນານິ ການິຈິ ການິຈິ ອາຄມຏ຺ຐກຖາສຸ ວຸຕ຺ຕາກາເຣນ ນ ໂຫນ຺ຕິ. ຕສ຺ມາ ເອເກ ວທນ຺ຕິ ‘‘ເນຕາ ອາຈຣິຍພຸທ຺ຘໂຆສສ຺ສາ’’ຕິ. ເອກຈ຺ເຈ ປນ ‘‘ອາຈຣິຍສ຺ສ ອຸປຖມ຺ຠກຕ຺ເຖເຣຫິ ປຐມໍ ກຕາ, ປຈ຺ຉາ ອາຈຣິເຍນ ໂອສານໂສຘນວເສນ ປຣິໂຍສາປິຕາ ວາ ຠເວຍ຺ຍຸໍ, ອຠິຘມ຺ມຏ຺ຐກຖໍ ອາຍາຈນ຺ເຕນ ຈູຬພຸທ຺ຘໂຆເສນ ວາ ກຕາ ຠເວຍ຺ຍຸ’’ນ຺ຕິ ວທນ຺ຕິ.

ຕໍ ຕຖາ ວາ ໂຫຕຸ ອຎ຺ຎຖາ ວາ, ອິທານິ ເອກນ຺ຕໂຕ ວິນິຈ຺ຉິນິຕຸໍ ນ ສຸກຣເມວ. ຕສ຺ມາ ຕາສໍ ນິຄມນວຈນວເສເນວ ເອຕ຺ຖ ປກາສຍິສ຺ສາມ. ຕາສຸ ຫິ ຘມ຺ມປທຏ຺ຐກຖໍ ກຸມາຣກສ຺ສປຕ຺ເຖເຣນ ອາຍາຈິໂຕ ສິຣິກູຏສ຺ສ (ສິຣິກຸຑ຺ຑສ຺ສ) ຣຎ຺ໂຎ ປາສາເທ ວິຫຣນ຺ໂຕ ປຣມ຺ປຣາຠຕໍ ສີຫຬຠາສາຍ ສຓ຺ຐິຕໍ ໂປຣາຓຏ຺ຐກຖໍ ປາຬິຠາສາຍ ອາໂຣເປຕ຺ວາ ວິຕ຺ຖາຣຄຕຎ຺ຈ ວຈນກ຺ກມໍ ສມາເສຕ຺ວາ ຄາຖາສຸ ອສໍວຓ຺ຓິຕປທພ຺ຍຎ຺ຊນານິ ສໍວຓ຺ເຓຕ຺ວາ ອກາສິ. ວຸຕ຺ຕຎ຺ຫິ ຕຕ຺ຖ ຄນ຺ຖາຣມ຺ເຠ –

‘‘ປຣມ຺ປຣາຠຕາ ຕສ຺ສ, ນິປຸຓາ ອຕ຺ຖວຓ຺ຓນາ;

ຍາ ຕມ຺ພປຓ຺ຓິທີປມ຺ຫິ, ທີປຠາສາຍ ສຓ຺ຐິຕາ…ເປ…

ກຸມາຣກສ຺ສເປນາຫໍ, ເຖເຣນ ຖິຣເຈຕສາ;

ສທ຺ຘມ຺ມຏ຺ຐິຕິກາເມນ, ສກ຺ກຈ຺ຈໍ ອຠິຍາຈິໂຕ…ເປ…

ຕໍ ຠາສໍ ອຕິວິຕ຺ຖາຣ, ຄຕຎ຺ຈ ວຈນກ຺ກມໍ;

ປຫາຍາໂຣປຍິຕ຺ວານ, ຕນ຺ຕິຠາສໍ ມໂນຣມໍ.

ຄາຖານໍ ພ຺ຍຎ຺ຊນປທໍ, ຍໍ ຕຕ຺ຖ ນ ວິຠາວິຕໍ;

ເກວລໍ ຕໍ ວິຠາເວຕ຺ວາ, ເສສໍ ຕເມວ ອຕ຺ຖໂຕ.

ຠາສນ຺ຕເຣນ ຠາສິສ຺ສ’’ນ຺ຕິ [ຘ. ປ. ອຏ຺ຐ. ໑.ຄນ຺ຖາຣມ຺ຠກຖາ] –

ນິຄມເນ ຈ ວຸຕ຺ຕໍ –

‘‘ວິຫາເຣ ອຘິຣາເຊນ, ກາຣິຕມ຺ຫິ ກຕຎ຺ຎຸນາ;

ປາສາເທ ສິຣິກູຏສ຺ສ, ຣຎ຺ໂຎ ວິຫຣຕາ ມຍາ’’ຕິ [ຘ. ປ. ອຏ຺ຐ. ໒.ນິຄມນກຖາ].

ເອຕ຺ຖ ຈ ສິຣິກູໂຏ ນາມ ສມນ຺ຕປາສາທິການິຄມເນ ສິຣິປາໂລຕິ ວຸຕ຺ໂຕ ມຫານາໂມເຍວ ຣາຊາຕິ ວທນ຺ຕິ. ເອວໍ ສຕິ ມເຫສິຍາ ອານຍນໍ ສມາທາປນມາຣພ຺ຠ ເຕນ ຣຎ຺ຎາ ທິນ຺ເນ ຘູມຣກ຺ຂປພ຺ພຕວິຫາເຣ ວສນ຺ເຕນ ສາ ກຕາຕິ ເວທິຕພ຺ພາ. ວຸຕ຺ຕຎ຺ເຫຕໍ ມຫາວໍເສ –

໓໗-໒໑໒. ‘‘ໂລຫທ຺ວາຣ-ຣລຄ຺ຄາມ-ໂກຏິປສ຺ສາວນວ຺ຫເຍ;

ຕໂຍ ວິຫາເຣ ກາເຣຕ຺ວາ, ຠິກ຺ຂູນໍ ອຠຍຸຕ຺ຕເຣ.

໒໑໓. ວິຫາຣໍ ກາຣຍິຕ຺ວານ, ຘູມຣກ຺ຂມ຺ຫິ ປພ຺ພເຕ;

ມເຫສິຍາ’ນເຍນາ’ທາ, ຠິກ຺ຂູນໍ ເຖຣວາທິນ’’ນ຺ຕິ.

ຕສ຺ສ ປນ ຣຎ຺ໂຎ ກາເລ ສາ ນິຏ຺ຐາປິຕາຕິ ນ ສກ຺ກາ ຄເຫຕຸໍ. ຕສ຺ສ ຫິ ຣຎ຺ໂຎ ເອກວີສຕິມວສ຺ເສ ສມນ຺ຕປາສາທິກໍ ນິຏ຺ຐາເປສິ. ໂສ ຈ ຣາຊາ ທ຺ວາວີສຕິມວສ຺ເສ ທິວງ຺ຄໂຕ. ເອຕ຺ຖນ຺ຕເຣ ສາຘິກເອກວສ຺ເສນ ‘‘ຈຕສ຺ໂສ ຈ ອາຄມຏ຺ຐກຖາໂຍ ຕິສ຺ໂສ ຈ ອຠິຘມ຺ມຏ຺ຐກຖາໂຍ ອຍຎ຺ຈ ຘມ຺ມປທຏ຺ຐກຖາ’’ຕິ ສພ຺ພາ ເອຕາ ນ ສກ຺ກາ ນິຏ຺ຐາເປຕຸນ຺ຕິ.