ອາຍາຈນກາຣຓໍ

ກສ຺ມາ ປນ ເຕ ຕໍ ອາຍາຈິໍສູຕິ? ວຸຈ຺ຈເຕ, ມຫາວິຫາຣວາສິໂນ ຫິ ອາທິໂຕເຍວ ປຏ຺ຐາຍ ປິຏກຕ຺ຕຍໍ ຍຖາ ຕີສຸ ສງ຺ຄີຕີສຸ ປາຬິຠາສາຍ ສງ຺ຄີຕໍ, ຍຖາ ຈ ວຏ຺ຏຄາມຓິຣາຊກາເລ (໔໕໕-໔໖໗-ພຸ-ວ) ໂປຕ຺ຖເກສຸ ອາໂຣປິຕໍ, ຕຖາ ໂປຣາຓໍ ປາຬິປິຏກເມວ ອຸຄ຺ຄຓ຺ຫນ຺ຕິ ເຈວ ວາເຈນ຺ຕິ ຈ, ນ ສກ຺ກຕາໂຣປິຕປິຏກໍ. ອຏ຺ຐກຖາໂຍ ຈ ຕິວສ຺ສສຕມຕ຺ຕໂຕ ປຸເຣ ກຕາ. ຕຖາ ຫິ ອຏ຺ຐກຖາສຸ ວສຠຣາຊກາລໂຕ (໖໐໙-໖໕໓-ພຸ-໐) ປຈ຺ຉາ ສີຫຬິກຕ຺ເຖຣານຎ຺ເຈວ ອຎ຺ເຎສຎ຺ຈ ວຕ຺ຖຸ ນ ທິສ຺ສຕິ ຐເປຕ຺ວາ ມຫາເສນຣາຊວຕ຺ຖຸໍ [ປາຣາ. ອຏ຺ຐ. ໒.໒໓໖-໒໓໗], ຍາວ ອາຈຣິຍພຸທ຺ຘໂຆສກາລາປິ ຈ ຕາ ເອວ ໂປຣາຓຏ຺ຐກຖາໂຍ ອຕ຺ຖິ ນ ອຠິນວີກຕາ. ເຕນ ເຕສໍ ປິຏເກສຸ ເຍຠຸຍ຺ເຍນ ຊນາ ປຣິຈຍໍ ກາຕຸໍ ອສຎ຺ຊາຕາຠິລາສາ ໂຫນ຺ຕິ ອສຎ຺ຊາຕຸສ຺ສາຫາ. ທີປນ຺ຕເຣສຸ ຈ ອຕ຺ຕໂນ ປິຏກໍ ປຕ຺ຖຣາເປຕຸໍ ນ ສກ຺ໂກນ຺ຕິ ອຏ຺ຐກຖານໍ ທີປຠາສາຍ ອຠິສງ຺ຂຕຕ຺ຕາ. ອຠຍຄິຣິວາສິໂນ ປນ ວຏ຺ຏຄາມຓິຣາຊກາລໂຕ ປຏ຺ຐາຍ ສກ຺ກຕຠາສາໂຣປິຕໍ ຘມ຺ມຣຸຈິນິກາຍາທິປິຏກມ຺ປິ ມຫາຍານປິຏກມ຺ປິ ນວໍ ນວໍ ປຣິຍາປຸຓນ຺ຕິ ເຈວ ວາເຈນ຺ຕິ ຈ, ເຕນ ເຕສໍ ປິຏເກສຸ ເຍຠຸຍ຺ເຍນ ຊນາ ປຣິຈຍໍ ກາຕຸໍ ສຎ຺ຊາຕາຠິລາສາ ໂຫນ຺ຕິ ສຎ຺ຊາຕຸສ຺ສາຫາ, ນວໍ ນວເມວ ຫິ ສຕ຺ຕາ ປິຍາຍນ຺ຕິ. ຕໂຕເຍວ ເຕ ທີປນ຺ຕເຣສຸປິ ອຕ຺ຕໂນ ວາທໍ ປຕ຺ຖຣາເປຕຸໍ ສກ຺ໂກນ຺ຕິ. ຕສ຺ມາ ເຕ ມຫາວິຫາຣວາສິໂນ ເຖຣາ ອຕ຺ຕໂນ ສີຫຬຏ຺ຐກຖາໂຍ ປາຬິຠາສາຍ ອຠິສງ຺ຂຣິຕຸກາມາ ຕຖາ ກາຕຸໍ ສມຕ຺ຖໍ ອາຈຣິຍພຸທ຺ຘໂຆສຕ຺ເຖຣສ຺ສ ຎາຓປ຺ປຠາວວິເສສໍ ຍຖາວຸຕ຺ຕຄຸຓສມ຺ປນ຺ນຠາວຎ຺ຈ ຎຕ຺ວາ ອາຍາຈິໍສູຕິ ເວທິຕພ຺ພໍ.