ຜາຫິຍມທ຺ຘານກ຺ກມກຖາ

ຜາຫິຍນ຺ນາເມນ ຫິ ຈິນຠິກ຺ຂຸນາ ໙໕໖-ພຸທ຺ຘວສ຺ເສ ສີຫຬທີປໂຕ ສກ຺ກຕຠາສາໂຣປິຕໍ ມຫິສາສກວິນຍປິຏກຎ຺ຈ ທີຆາຄໂມ ຈ ສໍຍຸຕ຺ຕາຄໂມ ຈ ສນ຺ນິປາຕປິຏກຎ຺ຈ ອຕ຺ຕນາ ສຫ ຈິນຣຏ຺ຐມານີຕນ຺ຕິ ຕສ຺ສ ອທ຺ຘານກ຺ກມກຖາຍໍ ທສ຺ສິຕໍ. ຕຎ຺ຈ ສພ຺ພໍ ອຠຍຄິຣິວິຫາຣໂຕເຍວ ລທ຺ຘມສ຺ສ, ມຫາວິຫາຣວາສີນໍ ສກ຺ກຕາໂຣປິຕປິຏກາຠາວໂຕ. ອຏ຺ຐກຖາຍໍ ປຏິກ຺ຂິຕ຺ຕວຓ຺ຓປິຏກາທີນິ ຈ ຕຕ຺ເຖວ ຠເວຍ຺ຍຸໍ, ມຫາວິຫາຣວາສີຫິ ເຕສໍ ອປ຺ປຏິຄ຺ຄຫິຕຠາວໂຕ. ຕຖາ ‘‘ຜາຫິຍມ຺ຠິກ຺ຂຸສ຺ສ ສີຫຬທີເປ ປຏິວສນກາເລ (໙໕໔-໙໕໖-ພຸ-ວ) ມຫາວິຫາເຣ ຕິສຫສ຺ສມຕ຺ຕາ ຠິກ຺ຂູ ວສນ຺ຕິ, ເຕ ເຖຣວາທປິຏກເມວ ອຸຄ຺ຄຓ຺ຫນ຺ຕິ, ນ ມຫາຍານປິຏກໍ. ອຠຍຄິຣິວິຫາເຣ ປຎ຺ຈສຫສ຺ສມຕ຺ຕາ ຠິກ຺ຂູ ວສນ຺ຕິ, ເຕ ປນ ທ຺ເວປິ ປິຏການິ ອຸຄ຺ຄຓ຺ຫນ຺ຕິ ມຫາຍານປິຏກຎ຺ເຈວ ເຖຣວາທປິຏກຎ຺ຈາ’’ຕິ ຈ ເຕເນວ ຈິນຠິກ຺ຂຸນາ ທສ຺ສິຕໍ.

ຍສ຺ມາ ປນ ອຠຍຄິຣິວາສິໂນ ມຫາຍານປິຏກມ຺ປິ ອຸຄ຺ຄຓ຺ຫນ຺ຕິ, ຕສ຺ມາ ຕສ຺ມິໍ ວິຫາເຣ ມຫາຍານິການໍ ປຘານາຈຣິຍຠູເຕຫິ ອສ຺ສໂຆສນາຄຊ຺ຊຸເນຫິ ກຕຄນ຺ຖາປິ ສໍວິຊ຺ຊມານາເຍວ ຠເວຍ຺ຍຸໍ, ຕໂຕເຍວ ເຕສໍ ນຍຎ຺ຈ ນາມຎ຺ຈ ອາຈຣິຍພຸທ຺ຘໂຆສຕ຺ເຖໂຣປິ ອຎ຺ເຎປິ ຕໍກາລິກາ ມຫາວິຫາຣວາສິໂນ ສຸຕສມ຺ປນ຺ນາ ເຖຣາ ຊາເນຍ຺ຍຸໍເຍວ. ອປິຈ ທກ຺ຂິຓອິນ຺ທິຍຣຏ຺ເຐ ສມຸທ຺ທສມີເປ ຄຸນ຺ຕາຊນປເທ ນາຄາຣຊຸນໂກຓ຺ຑໍ ນາມ ຐານມຕ຺ຖິ, ຍຕ຺ຖ ນາຄຊ຺ຊຸໂນ ມຫາຍານິການໍ ປຘານາຈຣິຍຠູໂຕ ວສນ຺ໂຕ ພຸທ຺ຘສາສນໍ ປຕິຏ຺ຐາເປສິ. ອາຈຣິຍພຸທ຺ຘໂຆສສ຺ສ ຈ ຕນ຺ເທສິກຠາວນິມິຕ຺ຕໍ ທິສ຺ສຕິ, ຕໍ ປຈ຺ຉໂຕ (໓໓-ປິຏ຺ເຐ) ອາວິຠວິສ຺ສຕິ. ຕສ຺ມາປິ ອາຈຣິຍພຸທ຺ຘໂຆສຕ຺ເຖໂຣ ນາຄຊ຺ຊຸນສ຺ສ ຈ ອສ຺ສໂຆສສ຺ສ ຈ ນຍຎ຺ຈ ນາມຎ຺ຈ ຊາເນຍ຺ຍເຍວາຕິ ສກ຺ກາ ອນຸມິນິຕຸໍ.

ຊານໂຕເຍວ ປນ ເຕສໍ ນຍສ຺ສ ວາ ນາມສ຺ສ ວາ ອຕ຺ຕໂນ ອຏ຺ຐກຖາຍມປ຺ປກາສນໍ ເຕສໍ ນິກາຍນ຺ຕຣຠາວໂຕເຍວສ຺ສ. ຕຖາ ຫິ ເຕສໍ ອສ຺ສໂຆສນາຄຊ຺ຊຸນານໍ ອສ຺ສໂຆໂສ [(໕໗໐-໖໗໐-ພຸທ຺ຘວສ຺ສພ຺ຠນ຺ຕເຣ)] ເຖຣວາທໂຕ ຠິນ຺ເນສຸ ເອກາທສສຸ ຄເຓສຸ ສພ຺ພຕ຺ຖິວາທຄເຓ ປຣິຍາປນ຺ໂນ, ນາຄຊ຺ຊຸໂນ ຈ ມຫາສງ຺ຆິກ-ເຈຕິຍວາທິຄຓາທີຫິ ຊາເຕ ມຫາຍານນິກາເຍ ປຣິຍາປນ຺ໂນ, ມຫາວິຫາຣວາສິໂນ ຈ ອາທິໂຕເຍວ ປຏ຺ຐາຍ ນິກາຍນ຺ຕຣສມເຍຫິ ອສມ຺ມິສ຺ສນຕ຺ຖໍ ອຕ຺ຕໂນ ປິຏກໍ ອຕີວ ອາທຣໍ ກຕ຺ວາ ຣກ຺ຂນ຺ຕິ, ອຍຎ຺ຈ ອາຈຣິຍພຸທ຺ຘໂຆໂສ ເຕສມຎ຺ຎຕໂຣ. ວຸຕ຺ຕຎ຺ຫິ ຕສ຺ສ ຄນ຺ຖນິຄມເນສຸ ‘‘ມຫາວິຫາຣວາສີນໍ ວໍສາລງ຺ກາຣຠູເຕນາ’’ຕິ. ຕສ຺ມາ ‘‘ອາຈຣິຍພຸທ຺ຘໂຆໂສ ເຕສໍ ນຍໍ ຊານນ຺ໂຕເຍວ ອຕ຺ຕໂນ ຄນ຺ເຖສຸ ນິກາຍນ຺ຕຣສມເຍຫິ ອສມ຺ມິສ຺ສນຕ຺ຖໍ ນປ຺ປກາເສສີ’’ຕິ ເວທິຕພ຺ພໍ.

ເອຕ຺ຕາວຕາ ຈ ຍານິ ‘‘ໂພຘິມຓ຺ຑສມີປມ຺ຫິ, ຊາໂຕ ພ຺ຣາຫ຺ມຓມາຓໂວ’’ຕິອາທິນາ ວຸຕ຺ຕສ຺ສ ມຫາວໍສວຈນສ຺ສ ວິຈາຣຓມຸເຂນ ອາຈຣິຍພຸທ຺ຘໂຆສສ຺ສ ວມ຺ຠນວຈນານິ ຘມ຺ມານນ຺ທໂກສມ຺ພິນາ ວຸຕ຺ຕານິ, ຕານິ ອມູລກຠາເວນ ອນຸວິຈາຣິຕານິ. ຕຖາປິ ‘‘ອາຈຣິຍພຸທ຺ຘໂຆໂສ ໂພຘິມຓ຺ຑສມີເປ ຊາໂຕ’’ຕິ ເອຕໍ ປນ ອຕ຺ຖໍ ສາເຘຕຸໍ ທຬ຺ຫກາຣຓໍ ນ ທິສ຺ສເຕວ ຐເປຕ຺ວາ ຕໍ ມຫາວໍສວຈນໍ, ຍມ຺ປິ ພຸທ຺ຘໂຆສຸປ຺ປຕ຺ຕິຍໍ ວຸຕ຺ຕໍ, ຕມ຺ປິ ມຫາວໍສເມວ ນິສ຺ສາຍ ວຸຕ຺ຕວຈນຕ຺ຕາ ນ ທຬ຺ຫກາຣຓໍ ໂຫຕີຕິ.