ປິຏກຕ຺ຕຍສ຺ສ ໂປຕ຺ຖກາໂຣປນໍ

ມຫາວິຫາຣວາສິໂນ ປນ ໂປຣາຓິກໍ ປາຬິຠາສາຍ ສຓ຺ຐິຕໍ ປຣິສຸທ຺ຘປິຏກເມວ ປຏິຄ຺ຄຓ຺ຫນ຺ຕິ, ຕຎ຺ຈ ມຸຂປາເຐເນວ ຘາເຣນ຺ຕິ. ຕທາ ປນ ເຖຣາ ປຈ຺ຉິມຊນານໍ ສຕິປຎ຺ຎາຫານິໍ ທິສ຺ວາ ພຸທ຺ຘກາລໂຕ ປຏ຺ຐາຍ ຍາວ ຕໍກາລາ ມຸຂປາເຐນາຠຕໍ ສາຏ຺ຐກຖໍ ປິຏກຕ຺ຕຍໍ ໂປຕ຺ຖເກ ອາໂຣເປຕຸໍ ສມາຣຠິໍສຸ. ສມາຣຠມານາ ຈ ເຕ ອນຸຣາຘຣາຊຘານິປຸຣໂຕ ອຏ຺ຐສຏ຺ຐິມິລປ຺ປມາເຓ ມລຍຊນປເທ ມາຕຸລ [ມາຕເລ ອິຕິ ເອຕຣຫິ ໂວຫາໂຣ] ນຄເຣ ອາໂລກເລເຓ ວສນ຺ຕາ ເອກສ຺ສ ຕນ຺ເທສິກສ຺ສ ຊນປທາຘິປຕິໂນ ອາຣກ຺ຂໍ ຄເຫຕ຺ວາ ຕໍ ໂປຕ຺ຖກາໂຣປນກມ຺ມມກໍສຸ [ມຫາວໍເສ ໓໓, ໑໐໐-໑໐໑-ຄາຖາສຸ]. ເຕນິທໍ ຎາຍຕິ ‘‘ຕທາ ມຫາວິຫາຣວາສິໂນ ເຖຣາ ຣາຊຣາຊມຫາມຕ຺ເຕຫິ ອລທ຺ຘູປກາຣາ ຫຸຕ຺ວາ ອຕ຺ຕໂນ ພເລເນວ ປິຏກຕ຺ຕຍສ຺ສ ໂປຕ຺ຖກາໂຣປນກມ຺ມມກໍສູ’’ຕິ ຈ, ‘‘ຕຎ຺ຈ ຍເຖວ ປຈ຺ຉິມຊນານໍ ສຕິປຎ຺ຎາຫານິໍ ທິສ຺ວາ ກຕໍ, ຕເຖວ ທຸພ຺ຠິກ຺ຂຣຏ຺ຐກ຺ໂຂຠາທິຠຍຸປທ຺ທຸຕກາເລສຸ ທຸທ຺ຘຣຠາວມ຺ປິ ທິສ຺ວາ’’ຕິ ຈ, ຕຖາ ‘‘ອຠຍຄິຣິວາສີນໍ ສມ຺ປຏິຈ຺ຉິຕສມຍນ຺ຕຣວາເທຫິ ອນາກຸລນຕ຺ຖມ຺ປິ ກຕ’’ນ຺ຕິ ຈ. ເອວໍ ມຫາວິຫາຣວາສິໂນ ເຖຣາ ປຣິສຸທ຺ຘຕ຺ເຖຣວາທປິຏກໍ ສມຍນ຺ຕເຣຫິ ອສມ຺ມິສ຺ສນຕ຺ຖາຍ ຍຖາ ປຸເຣ, ຕຖາ ປາຬິຠາສາຍ ເອວ ໂປຕ຺ຖເກ ອາໂຣເປຕ຺ວາປິ ສຸຣກ຺ຂິຕໍ ຣກ຺ຂິໍສຸ. ຍທິ ຫິ ຕທາ ເຕປິຏກໍ ໂປຕ຺ຖເກສຸ ອນາໂຣປິຕມສ຺ສ, ປຈ຺ຉາກາເລສຸ ສມຍນ຺ຕຣໂຕ ອາຄຕສຸຕ຺ຕານິ ‘‘ເນຕານິ ອມ຺ຫາກ’’ນ຺ຕິ ປຏິກ຺ຂິປິຕຸໍ ນ ສຸກຣານິ ຠເວຍ຺ຍຸໍ. ຍໂຕ ຈ ໂຂ ຕທາ ສາຏ຺ຐກຖໍ ເຕປິຏກໍ ໂປຕ຺ຖເກສຸ ອາໂຣປິຕໍ, ຕໂຕເຍວ ອນາຄຕກາເລສຸ ສມຍນ຺ຕຣາຄຕສຸຕ຺ຕານິ ເຕຫິ ໂປຕ຺ຖເກຫິ ສໍສນ຺ເທຕ຺ວາ ປຏິກ຺ຂິປິຕຸໍ ສຸກຣານິ ໂຫນ຺ຕິ.

ຕຖາ ຫິ ຠາຕິຍຣາຊກາເລ (໕໒໔-໕໕໒-ພຸ-ວ) ມຫາວິຫາຣວາສີນໍ ອຠຍຄິຣິວາສີຫິ ວິນເຍ ວິວາໂທ ອຸປ຺ປຊ຺ຊິ. ຕທາ ຣາຊາ ທີຆກາຣາຍນໍ ນາມ ພ຺ຣາຫ຺ມຓຊາຕິກໍ ອມຈ຺ຈໍ ເຖຣານໍ ສນ຺ຕິກໍ ເປເສສິ. ໂສ ອຸຠິນ຺ນໍ ສຸຕ຺ຕໍ ສຸຕ຺ວາ ວິນິຈ຺ຉຍໍ ອທາສິ [ປາຣາ. ອຏ຺ຐ. ໒.໓໘໔]. ຕຖາ ໂວຫາຣກຕິສ຺ສຣາຊກາເລ ຈ (໗໕໘-໗໘໐ ພຸ-ວ) ໂຄຐາຠຍຣາຊກາເລ ຈ (໗໙໗-໘໑໐ ພຸ-ວ) ເຖຣວາທິກາ ໂປຕ຺ຖກາຣູຬ຺ເຫນ ຘມ຺ມວິນເຍນ ສໍສນ຺ເທຕ຺ວາ ອຘມ຺ມວາທໍ ປຏິກ຺ຂິປິໍສຸ [ນິກາຍສງ຺ຄເຫ ໑໒-ປິຏ຺ເຐ].