໕. ຈາຄານຸສ຺ສຕິກຖາ

໑໖໐. ຈາຄານຸສ຺ສຕິໍ ຠາເວຕຸກາເມນ ປນ ປກຕິຍາ ຈາຄາຘິມຸຕ຺ເຕນ ນິຈ຺ຈປ຺ປວຕ຺ຕທານສໍວິຠາເຄນ ຠວິຕພ຺ພໍ. ອຖ ວາ ປນ ຠາວນໍ ອາຣຠນ຺ເຕນ ອິໂຕ ທານິ ປຠຸຕິ ສຕິ ປຏິຄ຺ຄາຫເກ ອນ຺ຕມໂສ ເອກາໂລປມຕ຺ຕມ຺ປິ ທານໍ ອທຕ຺ວາ ນ ຠຸຎ຺ຊິສ຺ສາມີຕິ ສມາທານໍ ກຕ຺ວາ ຕໍທິວສໍ ຄຸຓວິສິຏ຺ເຐສຸ ປຏິຄ຺ຄາຫເກສຸ ຍຖາສຕ຺ຕິ ຍຖາພລໍ ທານໍ ທຕ຺ວາ ຕຕ຺ຖ ນິມິຕ຺ຕໍ ຄຓ຺ຫິຕ຺ວາ ຣໂຫຄເຕນ ປຏິສລ຺ລີເນນ ‘‘ລາຠາ ວຕ ເມ ສຸລທ຺ຘໍ ວຕ ເມ, ໂຍຫໍ ມຈ຺ເຉຣມລປຣິຍຸຏ຺ຐິຕາຍ ປຊາຍ ວິຄຕມລມຈ຺ເຉເຣນ ເຈຕສາ ວິຫຣາມິ ມຸຕ຺ຕຈາໂຄ ປຍຕປາຓິ ໂວສ຺ສຄ຺ຄຣໂຕ ຍາຈໂຍໂຄ ທານສໍວິຠາຄຣໂຕ’’ຕິ ເອວໍ ວິຄຕມລມຈ຺ເຉຣຕາທິຄຸຓວເສນ ອຕ຺ຕໂນ ຈາໂຄ ອນຸສ຺ສຣິຕພ຺ໂພ.

ຕຕ຺ຖ ລາຠາ ວຕ ເມຕິ ມຍ຺ຫໍ ວຕ ລາຠາ, ເຍ ອິເມ ‘‘ອາຍຸໍ ໂຂ ປນ ທຕ຺ວາ ອາຍຸສ຺ສ ຠາຄີ ໂຫຕິ ທິພ຺ພສ຺ສ ວາ ມານຸສສ຺ສ ວາ’’ ອິຕິ (ອ. ນິ. ໕.໓໗) ຈ, ‘‘ທທໍ ປິໂຍ ໂຫຕິ ຠຊນ຺ຕິ ນໍ ພຫູ’’ ອິຕິ (ອ. ນິ. ໕.໓໔) ຈ, ‘‘ທທມາໂນ ປິໂຍ ໂຫຕິ, ສຕໍ ຘມ຺ມໍ ອນຸກ຺ກມໍ’’ ອິຕິ (ອ. ນິ. ໕.໓໕) ຈ ເອວມາທີຫິ ນເຍຫິ ຠຄວຕາ ທາຍກສ຺ສ ລາຠາ ສໍວຓ຺ຓິຕາ, ເຕ ມຍ຺ຫໍ ອວສ຺ສໍ ຠາຄິໂນຕິ ອຘິປ຺ປາໂຍ. ສຸລທ຺ຘໍ ວຕ ເມຕິ ຍໍ ມຍາ ອິທໍ ສາສນໍ ມນຸສ຺ສຕ຺ຕໍ ວາ ລທ຺ຘໍ, ຕໍ ສຸລທ຺ຘໍ ວຕ ເມ. ກສ຺ມາ? ໂຍຫໍ ມຈ຺ເຉຣມລປຣິຍຸຏ຺ຐິຕາຍ ປຊາຍ…ເປ… ທານສໍວິຠາຄຣໂຕຕິ.

ຕຕ຺ຖ ມຈ຺ເຉຣມລປຣິຍຸຏ຺ຐິຕາຍາຕິ ມຈ຺ເຉຣມເລນ ອຠິຠູຕາຍ. ປຊາຍາຕິ ປຊາຍນວເສນ ສຕ຺ຕາ ວຸຈ຺ຈນ຺ຕິ. ຕສ຺ມາ ອຕ຺ຕໂນ ສມ຺ປຕ຺ຕີນໍ ປຣສາຘາຣຓຠາວມສຫນລກ຺ຂເຓນ ຈິຕ຺ຕສ຺ສ ປຠສ຺ສຣຠາວທູສການໍ ກຓ຺ຫຘມ຺ມານໍ ອຎ຺ຎຕເຣນ ມຈ຺ເຉຣມເລນ ອຠິຠູເຕສຸ ສຕ຺ເຕສູຕິ ອຍເມຕ຺ຖ ອຕ຺ໂຖ. ວິຄຕມລມຈ຺ເຉເຣນາຕິ ອຎ຺ເຎສມ຺ປິ ຣາຄໂທສາທິມລານຎ຺ເຈວ ມຈ຺ເຉຣສ຺ສ ຈ ວິຄຕຕ຺ຕາ ວິຄຕມລມຈ຺ເຉເຣນ. ເຈຕສາ ວິຫຣາມີຕິ ຍຖາວຸຕ຺ຕປ຺ປກາຣຈິຕ຺ໂຕ ຫຸຕ຺ວາ ວສາມີຕິ ອຕ຺ໂຖ. ສຸຕ຺ເຕສຸ ປນ ມຫານາມສກ຺ກສ຺ສ ໂສຕາປນ຺ນສ຺ສ ສໂຕ ນິສ຺ສຍວິຫາຣໍ ປຸຈ຺ຉໂຕ ນິສ຺ສຍວິຫາຣວເສນ ເທສິຕຕ຺ຕາ ອຄາຣໍ ອຊ຺ຌາວສາມີຕິ ວຸຕ຺ຕໍ. ຕຕ຺ຖ ອຠິຠວິຕ຺ວາ ວສາມີຕິ ອຕ຺ໂຖ.

ມຸຕ຺ຕຈາໂຄຕິ ວິສ຺ສຏ຺ຐຈາໂຄ. ປຍຕປາຓີຕິ ປຣິສຸທ຺ຘຫຕ຺ໂຖ. ສກ຺ກຈ຺ຈໍ ສຫຕ຺ຖາ ເທຍ຺ຍຘມ຺ມໍ ທາຕຸໍ ສທາ ໂຘຕຫຕ຺ໂຖເຍວາຕິ ວຸຕ຺ຕໍ ໂຫຕິ. ໂວສ຺ສຄ຺ຄຣໂຕຕິ ໂວສ຺ສຊ຺ຊນໍ ໂວສ຺ສຄ຺ໂຄ, ປຣິຈ຺ຈາໂຄຕິ ອຕ຺ໂຖ. ຕສ຺ມິໍ ໂວສ຺ສຄ຺ເຄ ສຕຕາຠິໂຍຄວເສນ ຣໂຕຕິ ໂວສ຺ສຄ຺ຄຣໂຕ. ຍາຈໂຍໂຄຕິ ຍໍ ຍໍ ປເຣ ຍາຈນ຺ຕິ, ຕສ຺ສ ຕສ຺ສ ທານໂຕ ຍາຈນໂຍໂຄຕິ ອຕ຺ໂຖ. ຍາຊໂຍໂຄຕິປິ ປາໂຐ. ຍຊນສງ຺ຂາເຕນ ຍາເຊນ ຍຸຕ຺ໂຕຕິ ອຕ຺ໂຖ. ທານສໍວິຠາຄຣໂຕຕິ ທາເນ ຈ ສໍວິຠາເຄ ຈ ຣໂຕ. ອຫຎ຺ຫິ ທານຎ຺ຈ ເທມິ, ອຕ຺ຕນາ ປຣິຠຸຎ຺ຊິຕພ຺ພໂຕປິ ຈ ສໍວິຠາຄໍ ກໂຣມິ, ເອຕ຺ເຖວ ຈສ຺ມິ ອຸຠເຍ ຣໂຕຕິ ເອວໍ ອນຸສ຺ສຣຕີຕິ ອຕ຺ໂຖ.

໑໖໑. ຕສ຺ເສວໍ ວິຄຕມລມຈ຺ເຉຣຕາທິຄຸຓວເສນ ອຕ຺ຕໂນ ຈາຄໍ ອນຸສ຺ສຣໂຕ ເນວ ຕສ຺ມິໍ ສມເຍ ຣາຄປຣິຍຸຏ຺ຐິຕໍ ຈິຕ຺ຕໍ ໂຫຕິ. ນ ໂທສ…ເປ… ນ ໂມຫປຣິຍຸຏ຺ຐິຕໍ ຈິຕ຺ຕໍ ໂຫຕິ. ອຸຊຸຄຕເມວສ຺ສ ຕສ຺ມິໍ ສມເຍ ຈິຕ຺ຕໍ ໂຫຕິ ຈາຄໍ ອາຣພ຺ຠາຕິ (ອ. ນິ. ໕.໑໐) ປຸຣິມນເຍເນວ ວິກ຺ຂມ຺ຠິຕນີວຣຓສ຺ສ ເອກກ຺ຂເຓ ຌານງ຺ຄານິ ອຸປ຺ປຊ຺ຊນ຺ຕິ. ຈາຄຄຸຓານໍ ປນ ຄມ຺ຠີຣຕາຍ ນານປ຺ປກາຣຈາຄຄຸຓານຸສ຺ສຣຓາຘິມຸຕ຺ຕຕາຍ ວາ ອປ຺ປນໍ ອປ຺ປຕ຺ວາ ອຸປຈາຣປ຺ປຕ຺ຕເມວ ຌານໍ ໂຫຕິ. ຕເທຕໍ ຈາຄຄຸຓານຸສ຺ສຣຓວເສນ ອຸປ຺ປນ຺ນຕ຺ຕາ ຈາຄານຸສ຺ສຕິຈ຺ເຈວ ສງ຺ຂໍ ຄຈ຺ຉຕິ.

ອິມຎ຺ຈ ປນ ຈາຄານຸສ຺ສຕິໍ ອນຸຍຸຕ຺ໂຕ ຠິກ຺ຂຸ ຠິຍ຺ໂຍໂສ ມຕ຺ຕາຍ ຈາຄາຘິມຸຕ຺ໂຕ ໂຫຕິ, ອໂລຠຊ຺ຌາສໂຍ, ເມຕ຺ຕາຍ ອນຸໂລມກາຣີ, ວິສາຣໂທ, ປີຕິປາໂມຊ຺ຊພຫຸໂລ, ອຸຕ຺ຕຣິ ອປ຺ປຏິວິຊ຺ຌນ຺ໂຕ ປນ ສຸຄຕິປຣາຍໂນ ໂຫຕິ.

ຕສ຺ມາ ຫເວ ອປ຺ປມາທໍ, ກຍິຣາຖ ສຸເມຘໂສ;

ເອວໍ ມຫານຸຠາວາຍ, ຈາຄານຸສ຺ສຕິຍາ ສທາຕິ.

ອິທໍ ຈາຄານຸສ຺ສຕິຍໍ ວິຕ຺ຖາຣກຖາມຸຂໍ.