໗. ກສ຺ມິຣຄນ຺ຘາຣຣຏ຺ຐສາສນວໍສກຖາມຄ຺ໂຄ

໗. ອິທານິ ຍຖາວຸຕ຺ຕມາຕິກາວເສນ ກສ຺ມີຣວນ຺ຘາຣຣຏ຺ຐສາສນວໍສກຖາມຄ຺ຄໍ ວຕ຺ຕຸໍ ໂອກາໂສ ອນຸປ຺ປຕ຺ໂຕ, ຕສ຺ມາ ຕໍ ວກ຺ຂາມິ.

ຕຕິຍສງ຺ຄີຕາວສາເນ ຫິ ມຫາໂມຄ຺ຄລິປຸຕ຺ຕຕິສ຺ສຕ຺ເຖໂຣ ມຊ຺ຌນ຺ຕິ ກຕ຺ເຖຣໍ ກສ຺ມີຣຄນ຺ຘາຣຣຏ຺ຐໍ ເປເສສິ,-ຕ຺ວໍ ເອຕໍ ຣຏ຺ຐໍ ຄນ຺ຕ຺ວາ ເອຕ຺ຖ ສາສນໍ ປຠິຏ຺ຐາເປຫີຕິ. ເອຕ຺ຖ ຈ ກສ຺ມີຣຄນ຺ຘາຣຣຏ຺ຐໍ ນາມ ຈີນຣຏ຺ຐສມີເປ ຕິຏ຺ຐຕິ. ເຕເນວ ຫິ ອຘຸນາ ກສ຺ມີຣຄນ຺ຘາຣຣຏ຺ຐວາສິໂນ ຈິນຣຏ຺ຐວາສິໂນຈ ມນຸສ຺ສາ ອຣວາຬສ຺ສ ນາມ ນາຄຣາຊສ຺ສ ອຸປ຺ປຊ຺ຊນກາລໂຕ ປຏ຺ຐາຍ ຍາວຊ຺ຊຕນາ ນາຄຣູປໍ ກຕ຺ວາ ມາເນນ຺ຕິ ປູເຊນ຺ຕິ ສກ຺ກໂຣນ຺ຕິ, ວຕ຺ຖຠາຊນາທີສຸປິ ນາຄຣູປເມວ ເຕ ເຍຠຸຍ຺ເຍນ ກໂຣນ຺ຕີຕິ.

ໂສຈ ມຊ຺ຌນ຺ຕິກຕ຺ເຖໂຣປິ ຈຕູຫິ ຠິກ຺ຂູຫິ ສທ຺ຘິໍ ອຕ຺ຖ ປຎ຺ຈໂມ ຫຸຕ຺ວາ ປາຏລິປຸຕ຺ຕໂຕ ເວຫາສໍ ອພ຺ຠຸຄ຺ຄນ຺ຕ຺ວາ ຫິມວຕິ ອຣວາຬທຫສ຺ສ ອຸປຣິ ໂອຕຣິ. ເຕນ ໂຂ ປນ ສມເຍນ ກສ຺ມີຣຄນ຺ຘາຣຣຏ຺ເຐ ສສ຺ສປາກສມເຍ ອຣວາໂຬ ນາມ ນາຄຣາຊາ ອຣວາຬທເຫ ນິສີທິຕ຺ວາ ກຣກວສ຺ສໍ ນາມ ວສ຺ສາເປຕ຺ວາ ສສ຺ສໍ ຫຣາເປຕ຺ວາ ມຫາສມຸທ຺ທໍ ປາເປສິ. ເຕໂຣຈ ອຣວາຬທຫສ຺ສ ອຸປຣິ ໂອຕຣິຕ຺ວາ ອຣວາຬທຫປິຏ຺ຐິກໍ ຈງ຺ກມຕິປິ ຕິຏ຺ຐຕິປິ ນິສີທຕິປິ ເສຍ຺ຍມ຺ປິ ກປ຺ເປຕິ. ນາຄມາຓວກາ ຕໍ ທິສ຺ວາ ອຣວາຬສ຺ສ ນາຄຣາຊສ຺ສ ອາໂຣເຈສຸໍ, - ມຫາຣາຊ ເອໂກ ຉິນ຺ນຠິນ຺ນປຏຘໂຣ ຠຓ຺ຑຸກາສາວວສໂນ ອມ຺ຫາກໍ ອຸທກໍ ທູເສຕີຕິ. ຕທາ ປນ ເຖໂຣ ອຕ຺ຕານໍເຍວ ນາຄານໍ ທສ຺ເສຕິ. ນຄຣາຊາ ຕາວເທວ ໂກຘາຠິຠູໂຕ ນິກ຺ຂມິຕ຺ວາ ເຖຣໍ ທິສ຺ວາ ມກ຺ຂໍ ອສ຺ສຫມາໂນ ອນ຺ຕລິກ຺ເຂ ອເນການິ ຠິໍສນການິ ນິມ຺ມິນິ. ຕໂຕ ຕໂຕ ຠຸສາວາຕາ ວາຍນ຺ຕິ, ຣຸກ຺ຂາ ຉິຊ຺ຊນ຺ຕິ, ປພ຺ພຕກູຏາ ປຕນ຺ຕິ ເມຆາຄຊ຺ຊນ຺ຕິ, ວິຊ຺ຊຸໍລຕາ ນິຈ຺ຉຣນ຺ຕິ, ອສນິໂຍ ຜລນ຺ຕິ, ຠິນ຺ນໍ ວິຍ ຄຄນໍ ອຸທກໍ ປຄ຺ຆຣຕິ, ຠຍານກຣູປາ ນາຄກຸມາຣາ ສນ຺ນິປຕນ຺ຕິ, ສຍມ຺ປິ ຘູມາຍຕິ ປຊ຺ຊລຕິ, ປຫຣຓວຸຏ຺ຐິໂຍ ວິສ຺ສຊ຺ເຊຕິ, ໂກ ອຍໍມຸຓ຺ຑໂກ ຉິນ຺ນຠິນ຺ນປຏຘໂຣຕິອາທີຫິ ຜຣຸສວຈເນຫິ ເຖຣໍ ສນ຺ຕຊ຺ເຊຕິ, ເອຖ ຄຓ຺ຫຖ ຫນຖ ນິທ຺ຘມຖ ອິມໍ ສມຓນ຺ຕິ ນາຄພລໍ ອາຓາເປສິ.

ເຖໂຣ ສພ຺ພໍ ຕໍ ຠິໍສນກໍ ອຕ຺ຕໂນ ອິທ຺ຘິພເລນ ປຏິພາຫິຕ຺ວາ ນາຄຣາຊານໍ ອາຫ,–

ສເທວໂກປິ ເຈ ໂລໂກ, ອາຄນ຺ຕ຺ວາ ຕາສເຍຍ຺ຍ ມໍ;

ນ ເມ ປຏິພໂລ ອສ຺ສ, ຊເນຕຸໍ ຠຍເຠຣວໍ.

ສເຈປິ ຕ຺ວໍ ມຫິໍ ສພ຺ພ, ສສມຸທ຺ທໍ ສປພ຺ພຕໍ;

ອຸກ຺ຂິປິຕ຺ວາ ມຫານາຄ, ຂິເປຍ຺ຍາສິ ມມູປຣິ.

ເນວ ເມ ສກ຺ກຸເຓຍ຺ຍາສິ, ຊເນຕຸໍ ຠຍເຠຣວໍ;

ອຎ຺ຎທຕ຺ຖຸ ຕເວວສ຺ສ, ວິຆາໂຕ ອຸຣຄາຘິປາຕິ.

ເອວໍ ວຸຕ຺ເຕ ນາຄຣາຊາ ວິຫຕານຸຠາໂວ ນິປ຺ຜລວາຍາໂມ ທຸກ຺ຂີ ທຸມ຺ມໂນ ອໂຫສິ.

ຕໍ ເຖໂຣ ຕງ຺ຂຓານຸຣູປາຍ ຘມ຺ມິຍາ ກຖາຍ ສນ຺ທສ຺ເສຕ຺ວາ ສມາທເປຕ຺ວາ ສມຸຕ຺ເຕເຊຕ຺ວາ ສມ຺ປຫໍເສຕ຺ວາ ຕີສຸ ສຣເຓສຸ ປຎ຺ຈສຸຈ ສີເລສຸ ປຕິຏ຺ຐາເປສິ ສທ຺ຘິໍ ຈຕຸຣາສີຕິຍາ ນາຄສຫສ຺ເສຫິ. ອຎ຺ເຎປິ ພຫູ ຫິມວນ຺ຕວາສິໂນ ຍກ຺ຂາຈ ຄນ຺ຘພ຺ພາຈ ກຸມ຺ຠຓ຺ຑາຈ ເຖຣສ຺ສ ຘມ຺ມກຖໍ ສຸຕ຺ວາ ສຣເຓສຸຈ ສີເລສຸຈ ປຕິຏ຺ຐຫິໍສຸ. ປຎ຺ຈໂກປິ ຍກ຺ໂຂ ສທ຺ຘິໍ ຠຣິຍາຍ ຍກ຺ຂິນິຍາ ປຎ຺ຈຫິຈ ປຸຕ຺ຕສເຕຫິ ປຐເມ ຜເລ ປຕິຏ຺ຐິໂຕ. ອຖາຍສ຺ມາ ມຊ຺ຌນ຺ຕິ ກຕ຺ເຖໂຣ ສພ຺ເພນາຄຍກ຺ຂຣກ຺ຂເສ ອາມນ຺ເຕຕ຺ວາ ເອວມາຫ,-

ມາທານິ ໂກຘໍ ຊນຍິຕ຺ຖ, ອິໂຕ ອຸທ຺ຘໍ ຍຖາ ປຸເຣ;

ສສ຺ສຆາຕຎ຺ຈ ມາ ກຕ຺ຖ, ສຸຂກາມາ ຫິ ປາຓິໂນ;

ກໂຣຖ ເມຕ຺ຕໍ ສຕ຺ເຕສຸ, ວສນ຺ຕຸ ມນຸຊາ ສຸຂນ຺ຕິ.

ເຕ ສພ຺ເພປິ ສາຘຸ ຠນ຺ເຕຕິ ເຖຣສ຺ສ ວຈນໍ ປຏິສ຺ສຸຓິຕ຺ວາ ຍຖານຸສິຏ຺ຐໍ ປຏິປຊ຺ຊິໍສຸ. ຕໍ ທິວສເມວ ນາຄຣາຊສ຺ສ ປູຊາສມໂຍ ໂຫຕິ. ອຖ ນາຄຣາຊາ ອຕ຺ຕໂນ ຣຕນມຍໍ ປລ຺ລງ຺ກໍ ອາຫຣາເປຕ຺ວາ ເຖຣສ຺ສ ປຎ຺ຎເປສິ. ນິສີທິ ເຖໂຣ ປລ຺ລງ຺ເກ. ນາຄຣາຊາປິ ເຖຣໍ ພີຊຍມາໂນ ສມີເປ ອຏ຺ຐາສິ. ຕສ຺ມິໍ ຂເຓ ກສ຺ມີຣຄນ຺ຘາຣຣຏ຺ຐວາສິໂນ ອາຄນ຺ຕ຺ວາ ເຖຣໍ ທິສ຺ວາ ອມ຺ຫາກໍ ນາຄຣາຊໂຕປິ ເຖໂຣ ມຫິທ຺ຘິກຕໂຣຕິ ເຖຣເມວ ວນ຺ທິຕ຺ວາ ນິສິນ຺ນາ. ເຖໂຣ ເຕສໍ ອາສິວິໂສປມສຸຕ຺ຕໍ ກເຖສິ. ສຸຕ຺ຕປຣິໂຍສາເນ ອສີຕິຍາປາຓສຫສ຺ສານໍ ຘມ຺ມາຠິສມໂຍ ອໂຫສິ. ກຸລສຕສຫສ຺ສຎ຺ຈ ປພ຺ພຊິ. ຕໂຕ ປຠຸຕິ ຈ ກສ຺ມີຣຄນ຺ຘາໂຣ ຍາວຊ຺ເຊຕນາ ກາສາວປຊ຺ໂຊຕາ ອິສິວາຕປຏິວາຕາເອວ.

ຄນ຺ຕ຺ວາ ກສ຺ມີຣຄນ຺ຘາຣໍ, ອິສິ ມຊ຺ຌນ຺ຕິໂກ ຕທາ;

ທຸຏ຺ຐໍ ນາຄໍ ປສາເທຕ຺ວາ, ໂມເຈສິ ພນ຺ຘນາ ພຫູຕິ.

ອຘຸນາ ປນ ກສ຺ມີຣຄນ຺ຘາຣຣຏ຺ເຐ ສາສນສ຺ສ ອຕ຺ຖງ຺ຄຕສ຺ສວິຍ ສູຣິຍສ຺ສ ໂອຠາໂສ ນ ປຎ຺ຎາຍຕິ, ຕສ຺ມາ ຕຕ຺ຖ ສາສນສ຺ສ ປຕິຏ຺ຐາເນ ວິຕ຺ຖາເຣນ ວຕ຺ຕພ຺ພກິຈ຺ຈໍ ນຕ຺ຖີຕິ.

ອິຕິ ສາສນວໍເສ ກສ຺ມີຣຄນ຺ຘາຣຣຏ຺ຐສາສນວໍສກຖາມຄ຺ໂຄ

ນາມ ສຕ຺ຕໂມ ປຣິຈ຺ເຉໂທ.