໙. ນປຸໍສກລິງ຺ຄນາມິກປທມາລາ

ອຖ ປຸພ຺ພາຈຣິຍມຕໍ ປຸເຣຈຣໍ ກຕ຺ວາ ນິຄ຺ຄຫີຕນ຺ຕນປຸໍສກລິງ຺ຄານໍ ‘‘ຠູຕໍ’’ອິຈ຺ຈາທິກສ຺ສ ປກຕິຣູປສ຺ສ ນາມິກປທມາລໍ ວກ຺ຂາມ –

ຈິຕ຺ຕໍ, ຈິຕ຺ຕານິ. ຈິຕ຺ຕໍ, ຈິຕ຺ຕານິ. ຈິຕ຺ເຕນ, ຈິຕ຺ເຕຫິ, ຈິຕ຺ເຕຠິ. ຈິຕ຺ຕສ຺ສ, ຈິຕ຺ຕານໍ. ຈິຕ຺ຕາ, ຈິຕ຺ຕສ຺ມາ, ຈິຕ຺ຕມ຺ຫາ, ຈິຕ຺ເຕຫິ, ຈິຕ຺ເຕຠິ. ຈິຕ຺ຕສ຺ສ, ຈິຕ຺ຕານໍ. ຈິຕ຺ເຕ, ຈິຕ຺ຕສ຺ມິໍ, ຈິຕ຺ຕມ຺ຫິ, ຈິຕ຺ເຕສຸ. ໂຠ ຈິຕ຺ຕ, ໂຠ ຈິຕ຺ຕາ, ຠວນ຺ໂຕ ຈິຕ຺ຕານິ. ຍມກມຫາເຖຣມຕໍ.

ເອຕ຺ຖ ກິຎ຺ຈາປິ ‘‘ຈິຕ຺ຕາ’’ຕິ ປຈ຺ຈຕ຺ຕພຫຸວຈນໍ ‘‘ຈິຕ຺ເຕ’’ຕິ ອຸປໂຍຄພຫຸວຈນຎ຺ຈ ອນາຄຕໍ, ຕຖາປິ ຕຕ຺ຖ ຕຕ຺ຖ ອຎ຺ເຎສມ຺ປິ ຕາທິສານໍ ນິຄ຺ຄຫີຕນ຺ຕນປຸໍສກຣູປານໍ ທສ຺ສນໂຕ ວິຠງ຺ຄປາຬິຍຎ຺ຈ ‘‘ຉ ຈິຕ຺ຕາ ອພ຺ຍາກຕາ’’ຕິອາທິທສ຺ສນໂຕ ຄເຫຕພ຺ພເມວ, ຕສ຺ມາ ‘‘ຈິຕ຺ຕໍ, ຈິຕ຺ຕານິ, ຈິຕ຺ຕາ. ຈິຕ຺ຕໍ, ຈິຕ຺ຕານິ, ຈິຕ຺ເຕ’’ຕິ ກໂມ ເວທິຕພ຺ໂພ. ນິຄ຺ຄຫີຕນ຺ຕານຎ຺ຫິ ນປຸໍສກລິງ຺ຄານໍ ກຕ຺ຖຈິ ໂອກາຣນ຺ຕປຸລ຺ລິງ຺ຄານໍ ວິຍ ປຈ຺ຈຕ຺ໂຕປໂຍຄພຫຸວຈນານິ ຠວນ຺ຕິ. ຕານິ ຈ ປຸລ຺ລິງ຺ເຄນ ວາ ສລິງ຺ເຄນ ວາ ອລິງ຺ເຄນ ວາ ສທ຺ຘິໍ ສມານາຘິກຣຓານິ ຫຸຕ຺ວາ ເກວລານິ ວາ ປາວຈເນ ສຎ຺ຈຣນ຺ຕິ. ອຕ຺ຣ ‘‘ຈຕ຺ຕາໂຣ ສຕິປຏ຺ຐານາ. ຈຕ຺ຕາໂຣ ສມ຺ມປ຺ປຘານາ. ສພ຺ເພ ມາລາ ອຸເປນ຺ຕິມໍ. ຍສ຺ສ ເອເຕ ຘນາ ອຕ຺ຖິ. ຈຕ຺ຕາໂຣ ມຫາຠູຕາ. ຕີຓິນ຺ທ຺ຣິຍາ. ທ຺ເວ ອິນ຺ທ຺ຣິຍາ. ທສິນ຺ທ຺ຣິຍາ. ທ຺ເວ ມຫາຠູເຕ ນິສ຺ສາຍ ທ຺ເວ ມຫາຠູຕາ, ປຎ຺ຈ ວິຎ຺ຎາຓາ, ຈຕຸໂຣ ອງ຺ເຄ ອຘິຏ຺ຐາຍ, ເສມິ ວມ຺ມິກມຕ຺ຖເກ, ຣູປາ ສທ຺ທາ ຣສາ ຄນ຺ຘາ. ຣູເປ ຈ ສທ຺ເທ ຈ ອໂຖ ຣເສ ຈ. ຈກ຺ຂຸຎ຺ຈ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ ເອວມາທໂຍ ອເນກສຕາ ປາຬິປ຺ປເທສາ ທຏ຺ຐພ຺ພາ.

ເອຕ຺ຖ ປນ ‘‘ສຕິປຏ຺ຐານາ’’ຕິອາທີນິ ປທານິ ລິງ຺ຄວິປລ຺ລາສວເສນ ວຸຕ຺ຕານີຕິ ນ ຄເຫຕພ຺ພານິ ສຕິປຏ຺ຐານສທ຺ທາທີນໍ ປຐເມກວຈນຏ຺ຐາເນ ໂອກາຣນ຺ຕປຸລ຺ລິງ຺ຄຠາເວນ ຐິຕຠາວສ຺ສ ອທສ຺ສນໂຕ. ‘‘ຈຕ຺ຕາໂຣ’’ຕິອາທີນິເຍວ ປນ ປທານິ ລິງ຺ຄວິປລ຺ລາສວເສນ ວຸຕ຺ຕານີຕິ ຄເຫຕພ຺ພານິ ນິໂຍຄາ ນິຄ຺ຄຫີຕນ຺ເຕຫິ ນປຸໍສກລິງ຺ເຄຫິ ສຕິປຏ຺ຐານສທ຺ທາທີຫິ ສທ຺ຘິໍ ເຕສໍ ສມານາຘິກຣຓຠາວສ຺ສ ທສ຺ສນໂຕຕິ.

ເກເຈຕ຺ຖ ວເທຍ຺ຍຸໍ – ນນຸ ‘‘ສຕິປຏ຺ຐາໂນ ຘມ຺ໂມ, ຈິຕ຺ໂຕ ຘມ຺ໂມ, ຈິຕ຺ຕາ ຘມ຺ມາ’’ຕິອາທິປ຺ປໂຍຄທສ຺ສນໂຕ ສຕິປຏ຺ຐານສທ຺ທາທີນໍ ໂອກາຣນ຺ຕປຸລ຺ລິງ຺ຄຠາໂວ ລພ຺ຠຕິ. ເອວໍ ສນ຺ເຕ ກສ຺ມາ ຕຸມ຺ເຫຫິ ‘‘ສຕິປຏ຺ຐານສທ຺ທາທີນໍ ປຐເມກວຈນຏ຺ຐາເນ ໂອກາຣນ຺ຕປຸລ຺ລິງ຺ຄຠາເວນ ຐິຕຠາວສ຺ສ ອທສ຺ສນໂຕ’’ຕິ ວຸຕ຺ຕໍ, ກສ຺ມາ ຈ ເອກນ຺ຕໂຕ ສຕິປຏ຺ຐານສທ຺ທາທີນໍ ນິຄ຺ຄຫີຕນ຺ຕນປຸໍສກລິງ຺ຄຕາ ອນຸມຕາ, ນນຸ ‘‘ສຕິປຏ຺ຐາໂນ ຘມ຺ໂມ, ຈິຕ຺ໂຕ ຘມ຺ໂມ, ຈິຕ຺ຕາ ຘມ຺ມາ’’ຕິອາທິທສ຺ສນໂຕ ‘‘ຈຕ຺ຕາໂຣ ສຕິປຏ຺ຐານາ’’ຕິອາທີສຸປິ ‘‘ສຕິປຏ຺ຐານສທ຺ທາທໂຍ ລິງ຺ຄວິປລ຺ລາສວເສນ ວຸຕ຺ຕາ’’ຕິ ວຕ຺ຕພ຺ພາຕິ? ນ ວຕ຺ຕພ຺ພາ, ກສ຺ມາຕິ ເຈ? ‘‘ສຕິປຏ຺ຐາໂນ ຘມ຺ໂມ, ຈິຕ຺ໂຕ ຘມ຺ໂມ, ຈິຕ຺ຕາ ຘມ຺ມາ’’ຕິອາທີສຸປິ ສຕິປຏ຺ຐານຈິຕ຺ຕສທ຺ທາທີນໍ ລິງ຺ຄວິປລ຺ລາສວເສນ ອນິຈ຺ຉິຕພ຺ພໂຕ. ຕຕ຺ຖ ຫິ ປຸລ຺ລິງ຺ເຄນ ຘມ຺ມສທ຺ເທນ ໂຍເຊຕຸໍ ຘມ຺ມິສ຺ສໂຣ ຠຄວາ ຘມ຺ມາເປກ຺ຂໍ ກຕ຺ວາ ‘‘ສຕິປຏ຺ຐາໂນ, ຈິຕ຺ໂຕ, ຈິຕ຺ຕາ’’ຕິ ຈ ອຠາສິ. ເກວລາ ຫິ ສຕິປຏ຺ຐານ ຈິຕ຺ຕສທ຺ທາທໂຍ ໂອກາຣນ຺ຕປຸລ຺ລິງ຺ຄຠາເວນ ກຕ຺ຖຈິປິ ໂຍຊິຕາ ນ ສນ຺ຕິ, ນິຄ຺ຄຫີຕນ຺ຕນປຸໍສກຠາເວນ ປນ ໂຍຊິຕາ ສນ຺ຕິ.

ຕຖາ ຫິ ‘‘ຈິຕ຺ໂຕ ຄຫປຕີ’’ຕິ ເອຕ຺ຖາປິ ປຸລ຺ລິງ຺ຄຄຫປຕິສທ຺ທໍ ອເປກ຺ຂິຕ຺ວາ ວິຎ຺ຎາເຓ ປວຕ຺ຕໍ ຈິຕ຺ຕນາມໍ ປຓ຺ຓຕ຺ຕິວເສນ ປຸຄ຺ຄເລ ອາໂຣເປຕ຺ວາ ປຸຄ຺ຄລວາຈກໍ ກຕ຺ວາ ‘‘ຈິຕ຺ໂຕ’’ຕິ ວຸຕ຺ຕໍ. ຍທິ ປນ ວິຎ຺ຎາຓສງ຺ຂາຕໍ ຈິຕ຺ຕມຘິປ຺ເປຕໍ ສິຍາ, ‘‘ຈິຕ຺ຕ’’ມິຈ຺ເຈວ ວຸຈ຺ເຈຍ຺ຍ. ຕສ຺ມາ ‘‘ຈິຕ຺ໂຕ ຄຫປຕິ, ຈິຕ຺ຕາ ອິຕ຺ຖີ’’ຕິອາທີສຸ ລິງ຺ຄວິປລ຺ລາໂສ ນ ອິຈ຺ຉິຕພ຺ໂພ ສາເປກ຺ຂຕ຺ຕາ ຈິຕ຺ຕສທ຺ທາທີນໍ. ຍຖາ ຈ ເອຕ຺ຖ, ເອວໍ ‘‘ສຕິປຏ຺ຐາໂນ ຘມ຺ໂມ, ຈິຕ຺ໂຕ ຘມ຺ໂມ, ຈິຕ຺ຕາ ຘມ຺ມາ’’ຕິອາທີສຸປິ ລິງ຺ຄວິປລ຺ລາໂສ ນ ອິຈ຺ຉິຕພ຺ໂພ. ‘‘ຈຕ຺ຕາໂຣ ສຕິປຏ຺ຐານາ’’ຕິອາທີສຸ ປນ ສຕິປຏ຺ຐານສທ຺ທາທີນໍ ອເປກ຺ຂິຕພ຺ພານິ ປທານິ ນ ສນ຺ຕິ, ເຍຫິ ເຕ ປຸລ຺ລິງ຺ຄານິ ສິຍຸໍ, ຕສ຺ມາ ‘‘ຈຕ຺ຕາໂຣ’’ຕິອາທີນິເຍວ ປທານິ ປຣິວຕ຺ເຕຕ຺ວາ ‘‘ຈຕ຺ຕາຣິ, ສພ຺ພານິ, ເອຕານີ’’ຕິ ນປຸໍສກລິງ຺ຄວເສນ ຄເຫຕ຺ວາ ‘‘ສຕິປຏ຺ຐານາ, ສມ຺ມປ຺ປຘານາ’’ຕິອາທີຫິ ປເທຫິ ໂຍເຊຕພ຺ພານິ. ອີທິເສສຸ ຐາເນສຸ ເກຈິ ອຏ຺ຐກຖາຈຣິຍາ ນິກາຣໂລປໍ ອິຈ຺ຉນ຺ຕິ ‘‘ຍາ ປຸພ຺ເພ ໂພຘິສຕ຺ຕານໍ, ປລ຺ລງ຺ກວຣມາຠຸເຊ, ນິມິຕ຺ຕານິ ປທິສ຺ສນ຺ຕີ’’ຕິ ເອຕ຺ຖ ວິຍ. ອທສ຺ສນຎ຺ຫິ ໂລໂປ, ຕສ຺ມາ ‘‘ຈຕ຺ຕາຣິ ສຕິປຏ຺ຐານານິ, ຈຕ຺ຕາຣິ ສມ຺ມປ຺ປຘານານິ, ສພ຺ພານິ ມາລານີ’ຕິອາທິກາ ໂຍຊນາ ກາຕພ຺ພາ.

ເກຈິ ປນ ‘‘ສພ຺ເພ ມາລາ ອຸເປນ຺ຕິ ມ’’ນ຺ຕິ ເອຕ຺ຖ ມາລາສທ຺ທໍ ອິຕ຺ຖິລິງ຺ຄນ຺ຕິ ມຎ຺ຎິຕ຺ວາ ປຸລ຺ລິງ຺ຄຠູຕໍ ສພ຺ເພສທ຺ທໍ ອິຕ຺ຖິລິງ຺ຄວເສນ ປຣິວຕ຺ເຕຕ຺ວາ ‘‘ສພ຺ພາ ມາລາ’’ຕິ ອຕ຺ຖໍ ກເຖນ຺ຕິ. ຕໍ ກິຎ຺ຈາປິ ຍຸຕ຺ຕຕຣໍ ວິຍ ທິສ຺ສຕິ, ຕຖາປິ ນ ຄເຫຕພ຺ພໍ. ນ ຫິ ໂສ ຠຄວາ ລິງ຺ຄໍ ນຎ຺ຎາສິ, ນ ຈ ‘‘ສພ຺ພາ ມາລາ ອຸເປນ຺ຕິ ມ’’ນ຺ຕິ ທ຺ເວ ປທານິ ອິຕ຺ຖິລິງ຺ຄານິ ກຕ຺ວາ ວຕ຺ຕຸໍ ນ ສກ຺ຂິ. ໂຍ ເອວໍ ວິສທິສລິງ຺ຄານິ ປທານິ ອຸຈ຺ຈາເຣສິ. ຊານນ຺ໂຕເຍວ ປນ ຠຄວາ ວຕ຺ຕຸໍ ສກ຺ໂກນ຺ໂຕເຍວ ຈ ‘‘ສພ຺ເພ ມາລາ ອຸເປນ຺ຕິ ມ’’ນ຺ຕິ ວິສທິສລິງ຺ຄານິ ປທານິ ອຸຈ຺ຈາເຣສິ, ຕສ຺ມາ ປຸລ຺ລິງ຺ຄຠູຕໍ ສພ຺ເພສທ຺ທໍ ‘‘ສພ຺ພານີ’’ຕິ ນປຸໍສກລິງ຺ຄວເສນ ປຣິວຕ຺ເຕຕ຺ວາ ວິຠງ຺ຄປາຬິຍໍ ‘‘ຕີຓິນ຺ທ຺ຣິຍາ’’ຕິ ປທໍ ວິຍ ລຸຕ຺ຕນິກາເຣນ ນປຸໍສກລິງ຺ເຄນ ມາລາສທ຺ເທນ ໂຍເຊຕ຺ວາ ‘‘ສພ຺ພານິ ມາລານີ’’ຕິ ອຕ຺ໂຖ ຄເຫຕພ຺ໂພ ກຕ຺ຖຈິ ‘‘ຍສ຺ສ ເອເຕ ຘນາ ອຕ຺ຖີ’’ຕິ ເອຕ຺ຖ ວິຍ. ເອຕ຺ຖ ຫິ ຍສ຺ສ ເອຕານິ ຘນານີຕິ ອຕ຺ໂຖ. ອິທມ຺ເປຕ຺ຖ ສລ຺ລກ຺ຂິຕພ຺ພໍ. ມາລາສທ຺ໂທ ທ຺ວິລິງ຺ໂຄ ອິຕ຺ຖິນປຸໍສກວເສນ. ຕິຏ຺ຐຕຸ ຕສ຺ສິຕ຺ຖິລິງ຺ຄຕ຺ຕໍ ສຸວິຎ຺ເຎຍ຺ຍຕ຺ຕາ, ນປຸໍສກຕ຺ເຕ ປນ ຕີຓິ ມາລານິ. ‘‘ມາເລຫິ ຈ ຄນ຺ເຘຫິ ຈ ຠຄວໂຕ ສຣີຣໍ ປູເຊນ຺ຕີ’’ຕິອາທໂຍ ນປຸໍສກປ຺ປໂຍຄານິປິ ພຫູ ສນ຺ທິສ຺ສນ຺ຕີຕິ.

ຍທິ ປນ ໂຠ ມາລສທ຺ໂທ ອິຕ຺ຖິນປຸໍສກວເສນ ທ຺ວິລິງ຺ໂຄ, ‘‘ສພ຺ເພ ມາລາ ອຸເປນ຺ຕິ ມ’’ນ຺ຕິ ເອຕ຺ຖ ມາລາສທ຺ທສ຺ສ ອິຕ຺ຖິລິງ຺ຄຠາວປຣິກປ຺ປເນ ໂກ ໂທໂສ ອຕ຺ຖີຕິ? ອຕ຺ເຖວ ອິຕ຺ຖິລິງ຺ຄສທ຺ທສ຺ສ ປຸລ຺ລິງ຺ຄຠູເຕນ ສພ຺ພນາມິກປເທນ ສທ຺ຘິໍ ສມານາຘິກຣຓຠາວສ຺ສາຠາວໂຕ, ນປຸໍສກລິງ຺ຄສ຺ສ ປນ ປຸລ຺ລິງ຺ຄຠູເຕນ ສພ຺ພນາມິກປເທນ ສທ຺ຘິໍ ສມານາຘິກຣຓຠາວສ຺ສ ອຸປລພ຺ຠນໂຕ. ເຕເນວ ຈ ‘‘ເອເຕ ຘນາ’’ຕິອາທໂຍ ປໂຍຄາ ປາວຈເນ ພຫຸຘາ ທິຏ຺ຐາ. ເອຕ຺ຖາປິ ປນ ວເທຍ຺ຍຸໍ ‘‘ຘນາຕິອາທີນິ ວິປລ຺ລາສວເສນ ປຸລ຺ລິງ຺ຄານິເຍວ ‘‘ເອເຕ’’ຕິອາທີຫິ ສມານາຘິກຣຓປເທຫິ ໂຍຊິຕຕ຺ຕາ’’ຕິ. ນ, ນປຸໍສການິເຍເວຕານິ. ຍທິ ຫິ ‘‘ຘນາ’’ຕິອາທີນິ ປຸລ຺ລິງ຺ຄານິ ສິຍຸໍ, ກຕ຺ຖຈິ ປຈ຺ຈຕ຺ເຕກວຈນຏ຺ຐາເນ ‘‘ເອໂສ’’ຕິອາທີຫິ ໂອກາຣນ຺ຕສມານາຘິກຣຓປເທຫິ ໂຍຊິຕາ ໂອກາຣນ຺ຕຘນສທ຺ທາທໂຍ ສິຍຸໍ. ຕຖາຣູປານໍ ອຠາວໂຕ ປນ ‘‘ຘນາ ອິນ຺ທ຺ຣິຍາ ວິຎ຺ຎາຓາ’’ຕິອາທໂຍ ສທ຺ທາ ນປຸໍສກລິງ຺ຄານິເຍວ ໂຫນ຺ຕິ. ອຍໍ ນໂຍ ປຈ຺ຈຕ຺ຕພຫຸວຈນຏ຺ຐາເນເຍວ ລພ຺ຠຕິ. ນປຸໍສກລິງ຺ຄານິ ຫິ ວິສທາກາຣານິ ປຸລ຺ລິງ຺ຄຣູປານິ ວິຍ ຫຸຕ຺ວາ ປຸລ຺ລິງ຺ເຄຫິປິ ສທ຺ຘິໍ ຈຣນ຺ຕິ, ນປຸໍສກາ ວິຍ ປຸຣິສເວສຘາຣິໂນ ປຸຣິເສຫີຕິ ນິຏ຺ຐເມຕ຺ຖາວຄນ຺ຕພ຺ພໍ.

ອຖາປິ ເຕ ປຸພ຺ເພ ວຸຕ຺ຕວຈນໍ ປຸນ ປຣິວຕ຺ເຕຕ຺ວາ ເອວໍ ວເທຍ຺ຍຸໍ ‘‘ຈິຕ຺ໂຕ ຄຫປຕິ, ຈິຕ຺ຕາ ອິຕ຺ຖີ’’ຕິອາທີສຸ ຈິຕ຺ຕໍ ເອຕສ຺ສ ອຕ຺ຖີຕິ ຈິຕ຺ໂຕ, ຈິຕ຺ຕໍ ເອຕິສ຺ສາ ອຕ຺ຖີຕິ ຈິຕ຺ຕາ ຍຖາ ‘‘ສທ຺ໂຘ, ສທ຺ຘາ’’ຕິ ເອວໍ ອສ຺ສຕ຺ຖີຕິ ອຕ຺ຖວເສນ ຄເຫຕພ຺ພໂຕ ລິງ຺ຄວິປລ຺ລາໂສ ນິຈ຺ຉິຕພ຺ໂພ, ‘‘ສຕິປຏ຺ຐາໂນ ຘມ຺ໂມ, ຈິຕ຺ໂຕ ຘມ຺ໂມ, ຈິຕ຺ຕາ ຘມ຺ມາ’’ຕິອາທີນິ ປນ ເອວຣູປສ຺ສ ອຕ຺ຖສ຺ສ ອຄ຺ຄເຫຕພ຺ພໂຕ ‘‘ສຕິປຏ຺ຐານໍ ຘມ຺ໂມ, ຈິຕ຺ຕໍ ຘມ຺ໂມ, ຈິຕ຺ຕານິ ຘມ຺ມາ’’ຕິ ວຕ຺ຕພ຺ເພ ລິງ຺ຄວິປລ຺ລາເສນ ‘‘ສຕິປຏ຺ຐາໂນ ຘມ຺ໂມ, ຈິຕ຺ໂຕ ຘມ຺ໂມ, ຈິຕ຺ຕາ ຘມ຺ມາ’’ຕິອາທິ ວຸຕ຺ຕນ຺ຕິ ລິງ຺ຄວິປລ຺ລາໂສ ອິຈ຺ຉິຕພ຺ໂພ’’ຕິ? ຕນ຺ນ, ‘‘ຈິຕ຺ໂຕ ຄຫປຕີ’’ຕິອາທີສຸ ປນ ‘‘ສຕິປຏ຺ຐາໂນ ຘມ຺ໂມ’’ຕິອາທີສຸ ຈ ຈິຕ຺ຕສຕິປຏ຺ຐານສທ຺ທາທີນໍ ຄຫປຕິ ຘມ຺ມາທີນໍ ອເປກ຺ຂນວເສນ ນິຈ຺ຈໍ ປຸລ຺ລິງ຺ຄຠາວສ຺ສ ອິຈ຺ຉິຕຕ຺ຕາ.

ຕຖາ ຫິ ເອກນ຺ຕນປຸໍສກລິງ຺ໂຄປິ ປຸຎ຺ຎສທ຺ໂທ ອຠິສງ຺ຂາຣາເປກ຺ຂນວເສນ ‘‘ປຸຎ຺ໂຎ ອຠິສງ຺ຂາໂຣ’’ຕິ ປຸລ຺ລິງ຺ໂຄ ຊາໂຕ, ຕຖາ ເອກນ຺ຕນປຸໍສກລິງ຺ຄາປິ ປທຸມ ມງ຺ຄລສທ຺ທາທໂຍ ອຎ຺ຎສ຺ສຕ຺ຖສ຺ສາເປກ຺ຂນວເສນ ‘‘ປທຸໂມ ຠຄວາ, ປທຸມາ ເທວີ, ມງ຺ຄໂລ ຠຄວາ, ມງ຺ຄລາ ອິຕ຺ຖີ’’ຕິ ຈ ປຸມິຕ຺ຖິລິງ຺ຄາ ຊາຕາ. ເອກນ຺ຕປຸລ຺ລິງ຺ຄາປິ ຫຕ຺ຖິວິເສສວາຈກາ ກາລາວກ ຄງ຺ເຄຍ຺ຍສທ຺ທາທໂຍ ກຸລາເປກ຺ຂນວເສນ ‘‘ກາລາວກຎ຺ຈ ຄງ຺ເຄຍ຺ຍ’’ນ຺ຕິອາທິນາ ນປຸໍສກລິງ຺ຄາ ຊາຕາ. ຕທເປກ຺ຂນວເສນ ຫິ ອຏ຺ຐກຖາຍໍ ‘‘ກາລາວໂກ ຈ ຄງ຺ເຄຍ຺ໂຍ’’ຕິອາທິ ປຸລ຺ລິງ຺ຄນິທ຺ເທໂສ ທິສ຺ສຕິ. ເອວໍ ຕໍຕທຕ຺ຖານມເປກ຺ຂນວເສນ ຕໍຕໍປກຕິລິງ຺ຄໍ ນາເສຕ຺ວາ ອປຣໍ ລິງ຺ຄໍ ປຕິຏ຺ຐາເປຕ຺ວາ ນິທ຺ເທໂສ ທິສ຺ສຕິ, ນ ຈ ຕານິ ສພ຺ພານິປິ ລິງ຺ຄານິ ຕທ຺ຘິຕວເສນ ອຎ຺ຎລິງ຺ຄານິ ຊາຕານິ, ອຖ ໂຂ ຄຫປຕິຘມ຺ມາທີນໍ ອເປກ຺ຂນວເສເນວ ອຎ຺ຎລິງ຺ຄານິ ຊາຕານິ, ຕສ຺ມາ ‘‘ເປຕານິ ໂຠຕິ ປຸຕ຺ຕານິ, ຂາທມານາ ຕຸວໍ ປຸເຣ. ສິວິປຸຕ຺ຕານິ ຈວ຺ຫຍ. ເອວໍ ຘມ຺ມານິ ສຸຕ຺ວານ, ວິປ຺ປສີທນ຺ຕິ ປຓ຺ຑິຕາ’’ຕິອາທີສຸເຍວ ລິງ຺ຄວິປລ຺ລາໂສ ອິຈ຺ຉິຕພ຺ໂພ ອນຎ຺ຎາເປກ຺ຂກຕ຺ຕາ ວຸຕ຺ຕຘມ຺ມສທ຺ທາທີນໍ, ນ ປນ ‘‘ຈິຕ຺ໂຕ ຄຫປຕິ, ຈິຕ຺ຕາ ອິຕ຺ຖີ, ສຕິປຏ຺ຐາໂນ ຘມ຺ໂມ, ຈິຕ຺ໂຕ ຘມ຺ໂມ, ຈິຕ຺ຕາ ຘມ຺ມາ’’ຕິອາທີສຸ ຈິຕ຺ຕສທ຺ທາທີນໍ ວິປລ຺ລາໂສ ອິຈ຺ຉິຕພ຺ໂພ ຄຫປຕິ ຘມ຺ມາທີນໍ ອເປກ຺ຂກຕ຺ຕາ ເຕສນ຺ຕິ ນິຏ຺ຐເມຕ຺ຖາວຄນ຺ຕພ຺ພໍ, ອິທຎ຺ຈ ເອກຈ຺ຈານໍ ສມ຺ໂມຫຏ຺ຐານໍ, ຕສ຺ມາ ສທ຺ຘມ຺ມຏ຺ຐິຕິຍາ ອຍໍ ນີຕິ ສທ຺ຘາສມ຺ປນ຺ເນຫິ ກຸລປຸຕ຺ເຕຫິ ສາຘຸກໍ ມນສິ ກາຕພ຺ພາ.

ພທຣຕິຕ຺ຖວິຫາຣວາສີ ອາຈຣິຍຘມ຺ມປາໂລ ປນ ‘‘ອປຣິມາຓາ ປທາ ອປຣິມາຓາ ອກ຺ຂຣາ ອປຣິມາຓາ ພ຺ຍຎ຺ຊນາຕິ ປາຬິປ຺ປເທເສ ‘ປທາ ອກ຺ຂຣາ ພ຺ຍຎ຺ຊນາ’ຕິ ລິງ຺ຄວິປລ຺ລາໂສ ກໂຕຕິ ທຏ຺ຐພ຺ພ’’ນ຺ຕິ ອາຫ. ເອຕ຺ຖາປິ ມຍໍ ‘‘ປທາ’’ຕິ ອິທໍ ‘‘ອິນ຺ທ຺ຣິຍາ ຣູປາ’’ຕິອາທີນິ ວິຍ ນປຸໍສກລິງ຺ຄເມວາຕິ ວທາມ ໂອກາຣນ຺ຕວເສນ ປຐເມກວຈນນ຺ຕຠາວາຠາວໂຕ, ອິຕຣທ຺ວຍໍ ປນ ນປຸໍສກລິງ຺ຄນ຺ຕິປິ ປຸລ຺ລິງ຺ຄນ຺ຕິປິ ຄເຫຕພ຺ພໍ ນິຄ຺ຄຫີຕນ຺ໂຕກາຣນ຺ຕວເສນ ປຐເມກວຈນນ຺ຕຠາວສ຺ສູປລພ຺ຠນໂຕ. ຕຖາ ຫິ ‘‘ປຸຕ຺ຕານິ ລຕານິ ປພ຺ພຕານິ ຘມ຺ມານີ’’ຕິອາທີນໍເຍວ ລິງ຺ຄວິປລ຺ລາສານິ ອິຈ຺ຉິຕພ຺ພານິ ນິຄ຺ຄຫີຕນ຺ຕວເສນ ປຐເມກວຈນນ຺ຕຕາຍ ອນຸປລທ຺ຘິໂຕ, ເຕສຎ຺ໂຈກາຣນ຺ຕາກາຣນ຺ຕວເສນ ປຐເມກວຈນນ຺ຕຕາທສ຺ສນໂຕ. ‘‘ຊຣາຘມ຺ມໍ ມາ ຊີຣີ’’ຕິ ອິທໍ ປນ ອຎ຺ຎປທຕ຺ຖວເສນ ນປຸໍສກໍ ຊາຕນ຺ຕິ ທຏ຺ຐພ຺ພໍ.

ຠູຕໍ, ຠູຕານິ, ຠູຕາ. ຠູຕໍ, ຠູຕານິ, ຠູເຕ. ຠູເຕນ, ຠູເຕຫິ, ຠູເຕຠິ. ຠູຕສ຺ສ, ຠູຕານໍ. ຠູຕາ, ຠູຕສ຺ມາ, ຠູຕມ຺ຫາ, ຠູເຕຫິ, ຠູເຕຠິ. ຠູຕສ຺ສ, ຠູຕານໍ. ຠູເຕ, ຠູຕສ຺ມິໍ, ຠູຕມ຺ຫິ, ຠູເຕສຸ. ໂຠ ຠູຕ, ຠວນ຺ໂຕ ຠູຕານິ, ຠວນ຺ໂຕ ຠູຕາ. ເອວໍ ຈິຕ຺ຕນເຍນ ນາມິກປທມາລາ ຠວຕິ.

ອິມິນາ ນເຍນ ‘‘ມຫາຠູຕໍ ຠວິຕ຺ຕໍ ຠູນໍ ຠວນ’’ມິຈ຺ຈາທີນໍ ຠູຘາຕຸມຍານໍ ນິຄ຺ຄຫີຕນ຺ຕປທານໍ ອຎ຺ເຎສຎ຺ຈ ‘‘ວຕ຺ຕ’’ມິຈ຺ຈາທີນໍ ນິຄ຺ຄຫີຕນ຺ຕປທານໍ ນາມິກປທມາລາ ເວທິຕພ຺ພາ.

ວຕ຺ຕໍ ຣູປໍ ໂສຕໍ ຆານໍ, ທຸກ຺ຂໍ ປຸປ຺ຜໍ ຌານໍ ຎາຓໍ;

ທານໍ ສີລໍ ປຸຎ຺ຎໍ ປາປໍ, ວຊ຺ຊໍ ສຈ຺ຈໍ ຍານໍ ຉຕ຺ຕໍ.

ສກຏໍ ກນກໍ ຕຄຣໍ ນຄຣໍ, ຕຣຓໍ ຈຣຓໍ ຘຣຓໍ ມຣຓໍ;

ນຍນໍ ວທນໍ ກຣຓໍ ລວນໍ, ວສນໍ ປວນໍ ຠວນໍ ຄຄນໍ.

ອມຕໍ ປຸຬິນໍ ມາລໍ, ອາສນໍ ສວນໍ ມຸຂໍ;

ປທຸມໍ ອຸປ຺ປລໍ ວສ຺ສໍ, ໂລຈນໍ ສາຘນໍ ສຸຂໍ.

ຕາຓໍ ມູລໍ ຘນໍ ກູລໍ, ມງ຺ຄລໍ ນຬິນໍ ຜລໍ;

ຫິຣຎ຺ຎໍ ອມ຺ພຸຊໍ ຘຎ຺ຎໍ, ຊາລໍ ລິງ຺ຄໍ ປທໍ ຊລໍ.

ອງ຺ຄໍ ປຓ຺ຓໍ ສຸສານໍ ສໍ, ອາວຸຘໍ ຫທຍໍ ວນໍ;

ໂສປານໍ ຈີວຣໍ ປາຓໍ, ອລາຕໍ ອິນ຺ທ຺ຣິຍໍ ກຸລໍ.

ໂລຫໍ ກຓໍ ພລໍ ປີຐໍ, ອຓ຺ຑໍ ອາຣມ຺ມຓໍ ປຸຣໍ;

ອຣຎ຺ຎໍ ຕີຣມສ຺ສຕ຺ຖ-ມິຈ຺ຈາທີນິ ສມຸທ຺ຘເຣ.

ອິມານິ ຈິຕ຺ຕສທ຺ເທນ ສພ຺ພຖາປິ ສທິສານິ, ອິມານິ ປນ ວິສທິສານິ. ເສຍ຺ຍຖິທໍ –

‘‘ຈມ຺ມໍ ເວສ຺ມ’’ນ຺ຕິອາທີນິ, ເອກຘາເຍວ ຠິຊ຺ຊເຣ;

‘‘ກມ຺ມໍ ຖາມໍ ຄຸຓວ’’ນ຺ຕິ-ອາທີນິ ຕຸ ອເນກຘາ.

ກຖໍ?

ຈມ຺ເມ, ຈມ຺ມສ຺ມິໍ, ຈມ຺ມມ຺ຫິ, ຈມ຺ມນິ, ເວສ຺ເມ, ເວສ຺ມສ຺ມິໍ, ເວສ຺ມມ຺ຫິ, ເວສ຺ມນິ, ຆມ຺ເມ, ຆມ຺ມສ຺ມິໍ, ຆມ຺ມມ຺ຫິ, ຆມ຺ມນິ. ເອວໍ ອຎ຺ຎານິປິ ໂຍເຊຕພ຺ພານິ.

ກມ຺ມໍ, ກມ຺ມານິ, ກມ຺ມາ. ກມ຺ມໍ, ກມ຺ມານິ, ກມ຺ເມ. ກມ຺ເມນ, ກມ຺ມຸນາ, ກມ຺ມນາ, ກມ຺ເມຫິ, ກມ຺ເມຠິ. ກມ຺ມສ຺ສ, ກມ຺ມຸໂນ, ກມ຺ມານໍ. ກມ຺ມສ຺ມາ, ກມ຺ມມ຺ຫາ, ກມ຺ມຸນາ, ກມ຺ເມຫິ, ກມ຺ເມຠິ. ກມ຺ມສ຺ສ, ກມ຺ມຸໂນ, ກມ຺ມານໍ. ກມ຺ເມ, ກມ຺ມສ຺ມິໍ, ກມ຺ມມ຺ຫິ, ກມ຺ມນິ, ກມ຺ເມສຸ. ໂຠ ກມ຺ມ, ຠວນ຺ໂຕ ກມ຺ມານິ, ຠວນ຺ໂຕ ກມ຺ມາ.

ຖາມສທ຺ທສ຺ສ ປນ ຕຕິເຍກວຈນຏ຺ຐານາທີສຸ ‘‘ຖາເມນ, ຖາມຸນາ, ຖາມສ຺ສ, ຖາມຸໂນ’’ຕິ ຈ, ‘‘ຖາມາ, ຖາມສ຺ມາ, ຖາມມ຺ຫາ, ຖາມຸນາ’’ຕິ ຈ ໂຍເຊຕພ຺ພໍ.

ວນ຺ຕຸ ມນ຺ຕຸ ອິມນ຺ຕຸປຈ຺ຈຍວຕໍ ປນ ນິຄ຺ຄຫີຕນ຺ຕສທ຺ທານໍ ‘‘ຄຸຓວໍ ຈິຕ຺ຕໍ, ຣຸຈິມໍ ປຸປ຺ຜໍ, ປາປິມໍ ກຸລໍ’’ ອິຈ຺ຈາທິປໂຍຄວເສນ –

ຄຸຓວໍ, ຄຸຓວນ຺ຕານິ, ຄຸຓວນ຺ຕາ, ຄຸຓວນ຺ຕິ. ຄຸຓວນ຺ຕໍ, ຄຸຓວນ຺ຕານິ, ຄຸຓວນ຺ເຕ ຄຸຓວນ຺ຕິ. ຄຸຓວຕາ, ຄຸຓວນ຺ເຕນ, ຄຸຓວນ຺ເຕຫິ, ຄຸຓວນ຺ເຕຠິ. ຄຸຓວໂຕ, ຄຸຓວນ຺ຕສ຺ສ, ຄຸຓວຕໍ, ຄຸຓວນ຺ຕານໍ. ຄຸຓວຕາ, ຄຸຓວນ຺ຕາ, ຄຸຓວນ຺ຕສ຺ມາ, ຄຸຓວນ຺ຕມ຺ຫາ, ຄຸຓວນ຺ເຕຫິ, ຄຸຓວນ຺ເຕຠິ. ຄຸຓວໂຕ, ຄຸຓວນ຺ຕສ຺ສ, ຄຸຓວຕໍ, ຄຸຓວນ຺ຕານໍ. ຄຸຓວຕິ, ຄຸຓວນ຺ເຕ, ຄຸຓວນ຺ຕສ຺ມິໍ, ຄຸຓວນ຺ຕມ຺ຫິ, ຄຸຓວນ຺ເຕສຸ. ໂຠ ຄຸຓວ, ຠວນ຺ໂຕ ຄຸຓວນ຺ຕານິ, ຄຸຓວນ຺ຕິ.

ເອວໍ ‘‘ຣຸຈິມໍ, ຣຸຈິມນ຺ຕານິ, ຣຸຈິມ’’ນ຺ຕິອິຈ຺ຈາທິນາ, ‘‘ປາປິມໍ, ປາປິມນ຺ຕານິ, ປາປິມ’’ນ຺ຕິ ອິຈ຺ຈາທິນາ ຈ ໂຍເຊຕພ຺ພໍ. ອປິເຈຕ຺ຖ ‘‘ຄຸຓວໍ ພລວໍ ຍສວໍ ສຕິມໍ ຄຕິມໍ’’ອິຈ຺ຈາທິນາ ປໂຍຄາ ວິຕ຺ຖາເຣຕພ຺ພາ.

ກໂຣນ຺ຕສທ຺ທສ຺ສ ‘‘ກໂຣນ຺ຕໍ ຈິຕ຺ຕໍ, ກໂຣນ຺ຕໍ ກຸລ’’ນ຺ຕິ ປໂຍຄວເສນ –

ກໂຣນ຺ຕໍ, ກໂຣນ຺ຕານິ, ກໂຣນ຺ຕາ, ກໂຣນ຺ຕິ. ກໂຣນ຺ຕໍ, ກໂຣນ຺ຕານິ, ກໂຣນ຺ເຕ, ກໂຣນ຺ຕິ. ກໂຣຕາ, ກໂຣນ຺ເຕນ, ກໂຣນ຺ເຕຫິ, ກໂຣນ຺ເຕຠິ. ກໂຣໂຕ, ກຣໂຕ, ກໂຣນ຺ຕສ຺ສ, ກໂຣນ຺ຕານໍ, ກໂຣຕໍ. ກໂຣຕາ, ກໂຣນ຺ຕາ, ກໂຣນ຺ຕສ຺ມາ, ກໂຣນ຺ຕມ຺ຫາ, ກໂຣນ຺ເຕຫິ, ກໂຣນ຺ເຕຠິ. ກໂຣໂຕ, ກຣໂຕ, ກໂຣນ຺ຕສ຺ສ, ກໂຣນ຺ຕານໍ, ກໂຣຕໍ. ກໂຣຕິ, ກໂຣນ຺ເຕ, ກໂຣນ຺ຕສ຺ມິໍ, ກໂຣນ຺ຕມ຺ຫິ, ກໂຣນ຺ເຕສຸ. ໂຠ ກໂຣນ຺ຕ, ຠວນ຺ໂຕ, ກໂຣນ຺ຕານິ, ກໂຣນ຺ຕາ, ກໂຣນ຺ຕີຕິ ໂຍເຊຕພ຺ພໍ.

ຄຈ຺ຉນ຺ຕສທ຺ທສ຺ສ ຕຸ ‘‘ຄຈ຺ຉນ຺ຕໍ ຈິຕ຺ຕໍ, ຄຈ຺ຉນ຺ຕໍ ກຸລ’’ນ຺ຕິ ປໂຍຄວເສນ –

ຄຈ຺ຉນ຺ຕໍ, ຄຈ຺ຉນ຺ຕານິ, ຄຈ຺ຉນ຺ຕາ. ຄຈ຺ຉນ຺ຕໍ, ຄຈ຺ຉນ຺ຕານິ, ຄຈ຺ຉນ຺ເຕ. ຄຈ຺ຉຕາ, ຄຈ຺ຉນ຺ເຕນ, ຄຈ຺ຉນ຺ເຕຫິ, ຄຈ຺ຉນ຺ເຕຠິ. ຄຈ຺ຉໂຕ, ຄຈ຺ຉນ຺ຕສ຺ສ, ຄຈ຺ຉນ຺ຕານໍ, ຄຈ຺ຉຕໍ. ຄຈ຺ຉຕາ, ຄຈ຺ຉນ຺ຕາ, ຄຈ຺ຉນ຺ຕສ຺ມາ, ຄຈ຺ຉນ຺ຕມ຺ຫາ, ຄຈ຺ຉນ຺ເຕຫິ, ຄຈ຺ຉນ຺ເຕຠິ. ຄຈ຺ຉໂຕ, ຄຈ຺ຉນ຺ຕສ຺ສ, ຄຈ຺ຉນ຺ຕານໍ, ຄຈ຺ຉຕໍ. ຄຈ຺ຉຕິ, ຄຈ຺ຉນ຺ເຕ, ຄຈ຺ຉນ຺ຕສ຺ມິໍ, ຄຈ຺ຉນ຺ຕມ຺ຫິ, ຄຈ຺ຉນ຺ເຕສຸ. ໂຠ ຄຈ຺ຉໍ, ໂຠ ຄຈ຺ຉນ຺ຕາ, ຠວນ຺ໂຕ ຄຈ຺ຉນ຺ຕານິ, ຄຈ຺ຉນ຺ຕາຕິ ໂຍເຊຕພ຺ພໍ.

ເອວໍ ‘‘ຈຣນ຺ຕໍ ທທນ຺ຕໍ ຕິຏ຺ຐນ຺ຕໍ ຈິນ຺ຕຍນ຺ຕ’’ນ຺ຕິອາທີສຸປິ ນາມິກປທມາລາ ໂຍເຊຕພ຺ພາ.

ມຫນ຺ຕສທ຺ທສ຺ສ ປນ ໂກຈິ ເຠໂທ, ຕຖາ ຫິ ‘‘ພາຣາຓສິຣຊ຺ຊໍ ນາມ ມຫາ’’ຕິ ເອວໍ ‘‘ມຫາ’’ອິຕິ ນປຸໍສກປໂຍຄທສ຺ສນໂຕ ‘‘ມຫນ຺ຕໍ, ມຫາ, ມຫນ຺ຕານິ, ມຫນ຺ຕາ. ມຫນ຺ຕໍ, ມຫນ຺ຕານິ, ມຫນ຺ເຕ. ມຫຕາ’’ຕິ ກໂມ ເວທິຕພ຺ໂພ. ສພ຺ພາເນຕານິ ຈິຕ຺ຕສທ຺ເທນ ວິສທິສານິ.

ສວິນິຈ຺ຉໂຍຍໍ ນິຄ຺ຄຫີຕນ຺ຕນປຸໍສກລິງ຺ຄານໍ ປກຕິຣູປສ຺ສ ນາມິກປທມາລາວິຠາໂຄ.

ອວຓ຺ຓຸກາຣນ຺ຕຕາປກຕິກໍ ນິຄ຺ຄຫີຕນ຺ຕໍ

ນປຸໍສກລິງ຺ຄໍ ນິຏ຺ຐິຕໍ.

ອິທານິ ຕສ຺ສີລຕ຺ຖສ຺ສ ກຕຣສ຺ສສ຺ສ ອຕ຺ຖວິຠາວິ ອິຈ຺ເຈຕສ຺ສ ສທ຺ທສ຺ສ ນາມິກປທມາລໍ ວກ຺ຂາມ ປຸພ຺ພາຈຣິຍມຕໍ ປຸເຣຈຣໍ ກຕ຺ວາ –

ອຏ຺ຐິ, ອຏ຺ຐີ, ອຏ຺ຐີນິ. ອຏ຺ຐິໍ, ອຏ຺ຐີ, ອຏ຺ຐີນິ. ອຏ຺ຐິນາ, ອຏ຺ຐີຫິ, ອຏ຺ຐີຠິ. ອຏ຺ຐິສ຺ສ, ອຏ຺ຐິໂນ, ອຏ຺ຐີນໍ. ອຏ຺ຐິນາ, ອຏ຺ຐີຫິ, ອຏ຺ຐີຠິ. ອຏ຺ຐິສ຺ສ, ອຏ຺ຐິໂນ, ອຏ຺ຐີນໍ. ອຏ຺ຐິສ຺ມິໍ, ອຏ຺ຐິມ຺ຫິ, ອຏ຺ຐີສຸ. ໂຠ ອຏ຺ຐິ, ຠວນ຺ໂຕ ອຏ຺ຐີ, ຠວນ຺ໂຕ ອຏ຺ຐີນິ. ຍມກມຫາເຖຣມຕໍ.

ກິຎ຺ຈາເປຕ຺ຖ ນິສ຺ສກ຺ກວຈນຏ຺ຐາເນ ‘‘ອຏ຺ຐິສ຺ມາ, ອຏ຺ຐິມ຺ຫາ’’ຕິ ປທານິ ອນາຄຕານິ, ຕຖາປິ ຕຕ຺ຖ ຕຕ຺ຖ ຕໍສທິສປ຺ປໂຍຄທສ຺ສນາ ຄເຫຕພ຺ພານິ. ຍຖາ ປນ ອຏ຺ຐິສທ຺ທສ຺ສ, ເອວໍ ‘‘ສຕ຺ຖິ ທຘິ ວາຣິ ອກ຺ຂິ ອຈ຺ຉິ’’ອິຈ຺ຈາທີນມ຺ປິ ຣູປານິ ຠວນ຺ຕິ.

ອຕ຺ຖວິຠາວິ, ອຕ຺ຖວິຠາວີ, ອຕ຺ຖວິຠາວີນິ. ອຕ຺ຖວິຠາວິໍ, ອຕ຺ຖວິຠາວີ, ອຕ຺ຖວິຠາວີນິ. ອຕ຺ຖວິຠາວິນາ, ອຕ຺ຖວິຠາວີຫິ, ອຕ຺ຖວິຠາວີຠິ. ອຕ຺ຖວິຠາວິສ຺ສ, ອຕ຺ຖວິຠາວິໂນ, ອຕ຺ຖວິຠາວີນໍ. ອຕ຺ຖວິຠາວິນາ, ອຕ຺ຖວິຠາວິສ຺ມາ ອຕ຺ຖວິຠາວິມ຺ຫາ, ອຕ຺ຖວິຠາວີຫິ, ອຕ຺ຖວິຠາວີຠິ. ອຕ຺ຖວິຠາວິສ຺ສ, ອຕ຺ຖວິຠາວິໂນ, ອຕ຺ຖວິຠາວີນໍ. ອຕ຺ຖວິຠາວິສ຺ມິໍ, ອຕ຺ຖວິຠາວິມ຺ຫິ, ອຕ຺ຖວິຠາວີສຸ. ໂຠ ອຕ຺ຖວິຠາວິ, ຠວນ຺ໂຕ ອຕ຺ຖວິຠາວີ, ຠວນ຺ໂຕ ອຕ຺ຖວິຠາວີນິ.

ເອວໍ ‘‘ຘມ຺ມວິຠາວິ, ຈິຕ຺ຕານຸປຣິວຕ຺ຕິ, ສຸຂກາຣິ’’ອິຈ຺ຈາທີນິປິ. ຕຕ຺ຖ ອຏ຺ຐິ ສຕ຺ຖິອາທີນິ ປຘານລິງ຺ຄານິ ອນຎ຺ຎາເປກ຺ຂກຕ຺ຕາ, ອຕ຺ຖວິຠາວິ ຘມ຺ມວິຠາວິອາທີນິ ອປ຺ປຘານລິງ຺ຄານິ ອຎ຺ຎາເປກ຺ຂກຕ຺ຕາ.

ສວິນິຈ຺ຉໂຍຍໍ ອິກາຣນ຺ຕນປຸໍສກລິງ຺ຄານໍ ປກຕິຣູປສ຺ສ ນາມິກປທມາລາວິຠາໂຄ.

ອິວຓ຺ຓນ຺ຕຕາປກຕິກໍ ອິກາຣນ຺ຕນປຸໍສກລິງ຺ຄໍ ນິຏ຺ຐິຕໍ.

ອິທານິ ກຕຣສ຺ສສ຺ສ ໂຄຕ຺ຣຠຸ ອິຈ຺ເຈຕສ຺ສ ສທ຺ທສ຺ສ ນາມິກປທມາລໍ ວກ຺ຂາມ ປຸພ຺ພາຈຣິຍມຕໍ ປຸເຣຈຣໍ ກຕ຺ວາ –

ອາຍຸ, ອາຍູ, ອາຍູນິ. ອາຍຸໍ, ອາຍູ, ອາຍູນິ. ອາຍຸນາ, ອາຍູຫິ, ອາຍູຠິ. ອາຍຸສ຺ສ, ອາຍຸໂນ, ອາຍູນໍ. ອາຍຸນາ, ອາຍູຫິ, ອາຍູຠິ. ອາຍຸສ຺ສ, ອາຍຸໂນ, ອາຍູນໍ. ອາຍຸສ຺ມິໍ, ອາຍຸມ຺ຫິ, ອາຍູສຸ. ໂຠ ອາຍຸ, ຠວນ຺ໂຕ ອາຍູ, ຠວນ຺ໂຕ ອາຍູນິ. ຍມກມຫາເຖຣມຕໍ.

ກິຎ຺ຈາເປຕ຺ຖ ນິສ຺ສກ຺ກວຈນຏ຺ຐາເນ ‘‘ອາຍຸສ຺ມາ, ອາຍຸມ຺ຫາ’’ຕິ ປທານິ ອນາຄຕານິ, ຕຖາປິ ຕຕ຺ຖ ຕຕ຺ຖ ຕໍສທິສປ຺ປໂຍຄທສ຺ສນໂຕ ຄເຫຕພ຺ພານິ. ເອຕ຺ຖ ຈ ອາຍຸສທ຺ໂທ ປຸໍນປຸໍສກລິງ຺ໂຄ ທຏ຺ຐພ຺ໂພ. ຕຖາ ຫິ ປາຬິຍໍ ອຏ຺ຐກຖາສຸ ຈ ຕສ຺ສ ທ຺ວິລິງ຺ຄຕາ ທິສ຺ສຕິ. ‘‘ປຸນຣາຍຸ ຈ ເມ ລທ຺ໂຘ, ເອວໍ ຊານາຫິ ມາຣິສ. ອາຍຸ ຈສ຺ສາ ປຣິກ຺ຂີໂຓ ອໂຫສີ’’ຕິອາທີສຸ ຫິ ອາຍຸສທ຺ໂທ ປຸລ຺ລິງ຺ໂຄ, ຕພ຺ພເສນ ‘‘ອາຍຸ, ອາຍູ, ອາຍໂວ’’ຕິອາທິນາ ຠິກ຺ຂຸນເຍນ ຍຖາສມ຺ຠວໍ ນາມິກປທມາລາ ໂຍເຊຕພ຺ພາ. ‘‘ອຄ຺ຄໍ ອາຍຸ ຈ ວຓ຺ໂຓ ຈ. ກິຕ຺ຕກໍ ປນສ຺ສ ອາຍູ’’ຕິອາທີສຸ ປນ ນປຸໍສກລິງ຺ໂຄ, ຕພ຺ພເສນ ‘‘ອາຍຸ, ອາຍູ, ອາຍູນີ’’ຕິ ໂຍຊິຕາ.

ໂຄຕ຺ຣຠຸ, ໂຄຕ຺ຣຠູ, ໂຄຕ຺ຣຠູນິ. ໂຄຕ຺ຣຠຸໍ, ໂຄຕ຺ຣຠູ, ໂຄຕ຺ຣຠູນິ. ໂຄຕ຺ຣຠຸນາ, ໂຄຕ຺ຣຠູຫິ, ໂຄຕ຺ຣຠູຠິ. ໂຄຕ຺ຣຠຸສ຺ສ, ໂຄຕ຺ຣຠຸໂນ, ໂຄຕ຺ຣຠູນໍ. ໂຄຕ຺ຣຠຸນາ, ໂຄຕ຺ຣຠຸສ຺ມາ, ໂຄຕ຺ຣຠຸມ຺ຫາ, ໂຄຕ຺ຣຠູຫິ, ໂຄຕ຺ຣຠູຠິ. ໂຄຕ຺ຣຠຸສ຺ສ, ໂຄຕ຺ຣຠຸໂນ, ໂຄຕ຺ຣຠູນໍ. ໂຄຕ຺ຣຠຸສ຺ມິໍ, ໂຄຕ຺ຣຠຸມ຺ຫິ, ໂຄຕ຺ຣຠູສຸ. ໂຠ ໂຄຕ຺ຣຠຸ, ຠວນ຺ໂຕ ໂຄຕ຺ຣຠູ, ຠວນ຺ໂຕ ໂຄຕ຺ຣຠູນິ. ໂຠ ໂຄຕ຺ຣຠູ, ໂຠ ໂຄຕ຺ຣຠູນິ, ເອວໍ ພຫຸວຈນໍ ວາ. ອຍມມ຺ຫາກໍ ມຕໍ, ເອວໍ ‘‘ຈິຕ຺ຕສຫຠຸ’’ອິຈ຺ຈາທີນໍ ຠູຘາຕຸມຍານໍ ອຸກາຣນ຺ຕສທ຺ທານໍ ອຎ຺ເຎສມ຺ປິ ຕໍສທິສານໍ ນາມິກປທມາລາ ໂຍເຊຕພ຺ພາ. ປຸຄ຺ຄລວາຈໂກ ປນ ອູກາຣນ຺ໂຕ ໂຄຕ຺ຣຠູສທ຺ໂທ ປຸລ຺ລິງ຺ຄປຣິຍາປນ຺ນຕ຺ຕາ ສພ຺ພຎ຺ຎູນເຍ ປວິຏ຺ໂຐ. ຕຕ຺ຣຎ຺ເຎ ສທ຺ທາ ນາມ ‘‘ຈກ຺ຂຸ ວສຸ ຘນຸ ທາຣຸ ຕິປຸ ມຘຸ ສິງ຺ຄຸ ຫິງ຺ຄຸ ຈິຕ຺ຕຄຸ’’ອິຈ຺ຈາທໂຍ.

ສວິນິຈ຺ຉໂຍຍໍ ອຸກາຣນ຺ຕນປຸໍສກລິງ຺ຄານໍ ປກຕິຣູປສ຺ສ ນາມິກປທມາລາວິຠາໂຄ.

ອຸວຓ຺ໂຓກາຣນ຺ຕຕາປກຕິກໍ

ອຸກາຣນ຺ຕນປຸໍສກລິງ຺ຄໍ ນິຏ຺ຐິຕໍ.

ເອວໍ ນິຄ຺ຄຫີຕນ຺ຕ ອິກາຣນ຺ຕ ອຸກາຣນ຺ຕວເສນ ຕິວິຘານິ ນປຸໍສກລິງ຺ຄານິ ນິຣວເສສໂຕ ຄຫິຕາເນວ ໂຫນ຺ຕິ. ເຕສຸ ເກສຎ຺ຈິ ນິຄ຺ຄຫີຕນ຺ຕານໍ ກ຺ວຈິ ປຈ຺ຈຕ຺ເຕກວຈນສ຺ສ ພຫຸວຈນສ຺ສ ເອກາຣາເທສວເສນ ເຠໂທ ທິສ຺ສຕິ. ເສຍ຺ຍຖິທໍ? ‘‘ສຸເຂ ທຸກ຺ເຂ. ເອກູນປຎ຺ຎາສ ອາຊີວກສເຕ ເອກູນປຎ຺ຎາສ ປຣິພ຺ພາຊກສເຕ’’ອິຈ຺ເຈວມາທິ. ນນຸ ໂຠ ເອວໍວິຘານໍ ຣູປານໍ ປາຬິຍໍ ທສ຺ສນໂຕ ‘‘ເອກາຣນ຺ຕມ຺ປິ ນປຸໍສກລິງ຺ຄໍ ອຕ຺ຖີ’’ຕິ ວຕ຺ຕພ຺ພນ຺ຕິ? ນ ວຕ຺ຕພ຺ພໍ ນິຄ຺ຄຫີຕນ຺ໂຕຄຘຣູປວິເສສຕ຺ຕາ ເຕສໍ ຣູປານໍ. ອາເທສວເສນ ຫິ ສິທ຺ຘຕ຺ຕາ ວິສຸໍ ເອກາຣນ຺ຕໍ ນປຸໍສກລິງ຺ຄໍ ນາມ ນຕ຺ຖິ. ຕສ຺ມາ ນປຸໍສກລິງ຺ຄານໍ ຍຖາວຸຕ຺ຕາ ຕິວິຘຕາເຍວ ຄເຫຕພ຺ພາຕິ.

ນປຸໍສການມິຈ຺ເຈວໍ, ລິງ຺ຄານໍ ນຍສາລິນີ;

ປທມາລາ ວິຠຕ຺ຕາ ເມ, ສາສນຕ຺ຖໍ ມເຫສິໂນ.

ຍສ຺ເສສາ ປຄຸຓາ ສທ຺ທ-ນີຕິເຣສາ ສຸຠາວິຕາ;

ສາສເນ ກຸລປຸຕ຺ຕານໍ, ສຣຓໍ ໂສ ປຣາຍຓໍ.

ອິຕິ ນວງ຺ເຄ ສາຏ຺ຐກເຖ ປິຏກຕ຺ຕເຍ ພ຺ຍປ຺ປຖຄຕີສຸ ວິຎ຺ຎູນໍ

ໂກສລ຺ລຕ຺ຖາຍ ກເຕ ສທ຺ທນີຕິປ຺ປກຣເຓ

ນປຸໍສກລິງ຺ຄານໍ ປກຕິຣູປສ຺ສ ນາມິກປທມາລາວິຠາໂຄ

ນວໂມ ປຣິຈ຺ເຉໂທ.