໑໐. ລິງ຺ຄຕ຺ຕຍມິສ຺ສກນາມິກປທມາລາ

ອຘິກູນກໂຕ ເຈກ-ກ຺ຂຣໂຕ ຈ ອິໂຕ ປຣໍ;

ຕີຓິ ລິງ຺ຄານິ ມິສ຺ເສຕ຺ວາ, ປທມາລມນາກຸລໍ.

ນານາສຸຂຸມສງ຺ເກຕ-ຄເຕສ຺ວຕ຺ເຖສຸ ວິຎ຺ຎຸນໍ;

ຄມ຺ຠີຣພຸທ຺ຘິຈາຣຕ຺ຖໍ, ປວກ຺ຂາມິ ຍຖາພລໍ.

ອິຕ຺ຖີ ຖີ ຈ ປຠາ ຠາ ຈ, ຄິຣາ ຣາ ປວນໍ ວນໍ;

ອຸທກຎ຺ຈ ທກໍ ກຎ຺ຈ, ວິຕກ຺ໂກ ອິຕິ ຈາທໂຍ.

ຠູ ຠູມິ ເຈວ ອຣຎ຺ຎໍ, ອຣຎ຺ຎານີຕິ ຈາທໂຍ;

ປຎ຺ຎາ ປຎ຺ຎາຓໍ ຎາຓຎ຺ຈ, ອິຈ຺ຈາທີ ຈ ຕິຘາ ສິຍຸໍ.

ໂກ ວິ ສາ ເຈວ ຠາ ຣາ ຈ, ຖີ ຘີ ກຸ ຠູ ຕເຖວ ກໍ;

ຂໍ ໂຄ ໂມ ມາ ຈ ສໍ ຍໍ ຕໍ, ກິມິຈ຺ຈາທີ ຈ ເອກິກາຕິ.

ອຍໍ ລິງ຺ຄຕ຺ຕຍມິສ຺ສໂກ ນາມິກປທມາລາອຸທ຺ເທໂສ. ຕຕ຺ຣ ອິຕ຺ຖີ, ອິຕ຺ຖີ, ອິຕ຺ຖິໂຍ. ອິຕ຺ຖິໍ…ເປ… ໂຠຕິໂຍ ອິຕ຺ຖິໂຍ.

ຖີ ຖີ, ຖິໂຍ. ຖິໍ, ຖີ, ຖິໂຍ. ຖິຍາ, ຖີຫິ, ຖີຠິ. ຖິຍາ, ຖີນໍ. ຖິຍາ, ຖີຫິ, ຖີຠິ. ຖິຍາ, ຖີນໍ. ຖິຍາ, ຖິຍໍ, ຖີສຸ. ໂຠຕິ ຖິ, ໂຠຕິໂຍ ຖີ, ໂຠຕິໂຍ ຖິໂຍ. ເອຕ຺ຖ –

‘‘ກຸກ຺ກຸຏາ ມຓໂຍ ທຓ຺ຑາ, ຖິໂຍ ຈ ປຸຎ຺ຎລກ຺ຂຓາ;

ອຸປ຺ປຊ຺ຊນ຺ຕິ ອປາປສ຺ສ, ກຕປຸຎ຺ຎສ຺ສ ຊນ຺ຕຸໂນ;

ຖິຍາ ຄຸຍ຺ຫໍ ນ ສໍເສຍ຺ຍ; ຖີນໍ ຠາໂວ ທຸຣາຊາໂນ’’ຕິ

ອາທີນິ ນິທສ຺ສນປທານິ.

ປຠາ, ປຠາ, ປຠາໂຍ. ປຠໍ…ເປ… ໂຠຕິໂຍ ປຠາໂຍ.

ຠາ, ຠາ, ຠາໂຍ. ຠໍ, ຠາ, ຠາໂຍ. ຠາຍ, ຠາຫິ, ຠາຠິ. ຠາຍ, ຠານໍ. ຠາຍ, ຠາຫິ, ຠາຠິ. ຠາຍ, ຠານໍ. ຠາຍ, ຠາຍໍ, ຠາສຸ. ໂຠຕິ ເຠ, ໂຠຕິໂຍ ຠາ, ໂຠຕິໂຍ ຠາໂຍ. ເອຕ຺ຖ ຈ ‘‘ຠາກໂຣ ຠານຸ’’ອິຈ຺ຈາທີນິ ນິທສ຺ສນປທານິ.

ຄິຣາ, ຄິຣາ, ຄິຣາໂຍ. ຄິຣໍ…ເປ… ໂຠຕິໂຍ ຄິຣາໂຍ. ‘‘ວາຈາ ຄິຣາ ພ຺ຍປ຺ປໂຖ. ເຍ ໂວຫໍ ກິຕ຺ຕຍິສ຺ສາມິ, ຄິຣາຫິ ອນຸປຸພ຺ພໂສ’’ຕິ ອິມານິ ຄິຣາສທ຺ທສ຺ສ ອິຕ຺ຖິລິງ຺ຄຠາເວ ນິທສ຺ສນປທານິ.

ສຸວຓ຺ຓວາຈໂກ ຣາສທ຺ໂທ ປຸລ຺ລິງ຺ໂຄ, ອິຘ ປນ ສທ຺ທວາຈໂກ ຣາສທ຺ໂທ ອິຕ຺ຖິລິງ຺ໂຄ.

ຣາ, ຣາ, ຣາໂຍ. ຣໍ, ຣາ, ຣາໂຍ. ຣາຍ, ຣາຫິ, ຣາຠິ. ຣາຍ, ຣານໍ. ຣາຍ, ຣາຫິ, ຣາຠິ. ຣາຍ, ຣານໍ. ຣາຍ, ຣາຍໍ, ຣາສຸ. ໂຠຕິ ເຣ, ໂຠຕິໂຍ ຣາ, ໂຠຕິໂຍ ຣາໂຍ.

ຣາ ວຸຈ຺ຈຕິ ສທ຺ໂທ. ອຄ຺ຄຎ຺ຎສຸຕ຺ຕຏີກາຍຎ຺ຫິ ‘‘ຣາ ສທ຺ໂທ ຕິຍຕິ ຉິຊ຺ຊຕິ ເອຕ຺ຖາຕິ ຣຕ຺ຕິ, ສຕ຺ຕານໍ ສທ຺ທສ຺ສ ວູປສມກາໂລ’’ຕິ ວຸຕ຺ຕໍ. ຕສ຺ມາ ຣາສທ຺ທສ຺ສ ສທ຺ທວາຈກຕ຺ເຕ ‘‘ຣຕ຺ຕີ’’ຕິ ປທໍ ນິທສ຺ສນໍ.

ປວນໍ, ປວນານິ, ປວນາ. ປວນໍ, ປວນານິ, ປວເນ.

ວນໍ, ວນານິ, ວນາ. ວນໍ, ວນານິ, ວເນ. ເສສໍ ສພ຺ພໍ ເນຍ຺ຍໍ.

ປວນ ວນສທ຺ທາ ກທາຈິ ສມານຕ຺ຖາ ກທາຈິ ຠິນ຺ນຕ຺ຖາ. ເຕ ຫິ ອຣຎ຺ຎວາຈກຕ຺ເຕ ສມານຕ຺ຖາ ‘‘ເຕ ຘມ຺ເມ ປຣິປູເຣນ຺ໂຕ, ປວນໍ ປາວິສິໍ ຕທາ. ສປຸຕ຺ໂຕ ປາວິສິໍ ວນ’’ນ຺ຕິອາທີສຸ. ຍຖາກ຺ກມໍ ປນ ເຕ ວາຍຸຕຓ຺ຫາວນວາຈກຕ຺ເຕ ຠິນ຺ນຕ຺ຖາ ‘‘ປຣມທຸຄ຺ຄນ຺ຘປວນວິຈຣິເຕ. ເຉຕ຺ວາ ວນຎ຺ຈ ວນຖໍ, ນິພ຺ພນາ ໂຫຖ ຠິກ຺ຂໂວ’’ຕິອາທີສຸ.

ອຸທກໍ, ອຸທການິ, ອຸທກາ. ອຸທກໍ, ອຸທການິ, ອຸທເກ.

ທກໍ, ທການິ, ທກາ. ທກໍ, ທການິ, ທເກ. ເສສໍ ສພ຺ພໍ ເນຍ຺ຍໍ.

‘‘ອມ຺ພປກ຺ກໍ ທກໍ ສີຕໍ. ຖລຊາ ທກຊາ ປຸປ຺ຜາ’’ຕິອາທີເນຕ຺ຖ ນິທສ຺ສນປທານິ. ‘‘ນີໂລທໍ ວນມຊ຺ຌໂຕ. ມໂຫທຘິ. ອຸທພິນ຺ທຸນິປາເຕນ, ອຸທກຸມ຺ໂຠປິ ປູຣຕີ’’ຕິ ປາຬິປ຺ປເທເສສຸ ປນ ສມາສນ຺ຕຄຕນາມຕ຺ຕາ ອຸທສທ຺ເທເນວ ອຸທກຕ຺ໂຖ ວຸຕ຺ໂຕ ‘‘ຣິຕ຺ຕສ຺ສາທ’’ນ຺ຕິ ວຕ຺ຕພ຺ພຏ຺ຐາເນ ‘‘ຣິຕ຺ຕສ຺ສ’’ນ຺ຕິ ສທ຺ເທນ ຣິຕ຺ຕສ຺ສາທຕ຺ໂຖ ວິຍ. ປາຬິຍຎ຺ຫິ ເກວໂລ ອຸທສທ຺ໂທ ນ ທິຏ຺ຐປຸພ຺ໂພ. ອຕ຺ຖິ ເຈ, ສຸຏ຺ຐຸ ມນສິ ກາຕພ຺ໂພ.

ກໍ, ການິ, ກາ. ກໍ, ການິ, ເກ. ເກນ, ເກຫິ, ເກຠິ. ກສ຺ສ, ການໍ. ກາ, ກສ຺ມາ, ກມ຺ຫາ, ເກຫິ, ເກຠິ. ກສ຺ສ, ການໍ. ເກ, ກສ຺ມິໍ, ກມ຺ຫິ, ເກສຸ. ໂຠ ກ, ຠວນ຺ໂຕ ກາ, ຠວນ຺ໂຕ ການິ. ໂຠສທ຺ເທນ ວາ ພຫຸວຈນໍ ໂຍເຊຕພ຺ພໍ ‘‘ໂຠ ການິ, ໂຠ ກາ’’ຕິ.

ເອຕ຺ຖ ກໍ ວຸຈ຺ຈຕິ ອຸທກໍ ສີສໍ ສຸຂຎ຺ຈ. ອຕ຺ຣ ‘‘ກນ຺ຕາໂຣ ກນ຺ທໂຣ ເກວຏ຺ຏາ ເກສາ ກຣຸຓາ ນາໂກ’’ຕິອາທີນິ ປໂຍຄານິ ເວທິຕພ຺ພານິ. ຕຕ຺ຣ ກນ຺ຕາໂຣຕິ ກໍ ວຸຈ຺ຈຕິ ອຸທກໍ, ເຕນ ຕຣິຕພ຺ໂພ ອຕິກ຺ກມິຕພ຺ໂພຕິ ກນ຺ຕາໂຣ, ນິຣຸທກປ຺ປເທໂສ. ໂຈຣກນ຺ຕາຣນ຺ຕິອາທີສຸ ປນ ຣູຬ຺ຫິຍາ ທຸຄ຺ຄມນຏ຺ຐາເນປິ ກນ຺ຕາຣສທ຺ໂທ ປວຕ຺ຕຕີຕິ ທຏ຺ຐພ຺ພໍ. ກນ຺ທໂຣຕິ ເອຕ຺ຖາປິ ກໍ ວຸຈ຺ຈຕິ ອຸທກໍ, ເຕນ ທາຣິໂຕ ຠິນ຺ໂນຕິ ກນ຺ທໂຣ. ເກວຏ຺ຏາຕິອາທີສຸ ປນ ເກ ອຸທເກ ວຕ຺ຕນໂຕ ຄຫຓຕ຺ຖໍ ປວຕ຺ຕນໂຕ ເກວຏ຺ຏາ. ເກ ສີເສ ເສນ຺ຕິ ອຸປ຺ປຊ຺ຊນ຺ຕີຕິ ເກສາ. ກໍ ສຸຂໍ ຣຸນ຺ຘຕີຕິ ກຣຸຓາ. ນາໂກຕິ ສຄ຺ໂຄ. ກນ຺ຕິ ຫິ ສຸຂໍ, ນ ກໍ ອກໍ, ທຸກ຺ຂໍ, ຕໍ ນຕ຺ຖິ ເອຕ຺ຖາຕິ ນາໂກຕິ ອຕ຺ໂຖ ຄເຫຕພ຺ໂພ. ຍເຖຕ຺ຖ ອິຕ຺ຖີສທ຺ທາທີນໍ ນາມິກປທມາລາ ໂຍຊິຕາ, ເອວໍ ‘‘ວິຕກ຺ໂກ ວິຈາໂຣ ອາຠາ ປທີໂປ’’ຕິອາທີນມ຺ປິ ໂຍເຊຕພ຺ພາ.

ຠູ, ຠູ, ຠຸໂຍ. ຠຸໍ, ຠູ, ຠຸໂຍ. ຠຸຍາ, ຠູຫິ, ຠູຠິ. ຠຸຍາ, ຠູນໍ. ຠຸຍາ, ຠູຫິ, ຠູຠິ. ຠຸຍາ, ຠູນໍ. ຠຸຍາ, ຠຸຍໍ, ຠູສຸ. ໂຠຕິ ຠຸ, ໂຠຕິໂຍ ຠູ, ໂຠຕິໂຍ ຠຸໂຍ. ເອຕ຺ຖ ຈ ‘‘ຠູຣຸໂຫ ຠູປາໂລ ຠູຠຸໂຊ ຠູຕລ’’ນ຺ຕິ ນິທສ຺ສນປທານິ.

ຠູມິ, ຠູມີ, ຠູມິໂຍ; ເສສໍ ວິຕ຺ຖາເຣຕພ຺ພໍ;

ອຣຎ຺ຎໍ, ອຣຎ຺ຎານິ, ອຣຎ຺ຎາ; ເສສໍ ວິຕ຺ຖາເຣຕພ຺ພໍ.

ອຣຎ຺ຎານີ ວຸຈ຺ຈຕິ ມຫາອຣຎ຺ຎໍ, ‘‘ຄຫປຕານີ’’ຕິ ປທມິວ ອິນີປຈ຺ຈຍວເສນ ສາເຘຕພ຺ພໍ ປທໍ ອິຕ຺ຖິລິງ຺ຄຎ຺ຈ. ‘‘ອຣຎ຺ຎານີ’’ຕິ ຫິ ອຏ຺ຐກຖາປາໂຐປິ ທິສ຺ສຕິ.

ອຣຎ຺ຎານີ, ອຣຎ຺ຎານີ, ອຣຎ຺ຎານິໂຍ. ອຣຎ຺ຎານິໍ, ອຣຎ຺ຎານີ, ອຣຎ຺ຎານິໂຍ. ອຣຎ຺ຎານິຍາ, ອຣຎ຺ຎານີຫິ, ອຣຎ຺ຎານີຠິ. ອຣຎ຺ຎານິຍາ, ອຣຎ຺ຎານີນໍ. ອຣຎ຺ຎານິຍາ, ອຣຎ຺ຎານີຫິ, ອຣຎ຺ຎານີຠິ. ອຣຎ຺ຎານິຍາ, ອຣຎ຺ຎານີນໍ. ອຣຎ຺ຎານິຍາ, ອຣຎ຺ຎານິຍໍ, ອຣຎ຺ຎານີສຸ. ໂຠຕິ ອຣຎ຺ຎານິ, ໂຠຕິໂຍ ອຣຎ຺ຎານີ, ໂຠຕິໂຍ ອຣຎ຺ຎານິໂຍ.

ຍເຖຕ຺ຖ ອຸຕ຺ຕຣາຘິກວເສນ ໂຍຊິຕາ, ເອວໍ ‘‘ສຠາ, ສຠາຍ’’ນ຺ຕິອາທີສຸປິ ໂຍເຊຕພ຺ພາ. ສຠາຍນ຺ຕິ ສຠາ ເອວ, ລິງ຺ຄພ຺ຍຕ຺ຕຍວເສນ ປນ ເອວໍ ວຸຕ຺ຕໍ. ‘‘ສຠາເຍ ວາ ທ຺ວາຣມູເລ ວາ ວຕ຺ຖພ຺ພ’’ນ຺ຕິ ປາຬິ ເອຕ຺ຖ ນິທສ຺ສນໍ.

ປຎ຺ຎາ, ປຎ຺ຎາ, ປຎ຺ຎາໂຍ. ປຎ຺ຎໍ, ປຎ຺ຎາ, ປຎ຺ຎາໂຍ. ປຎ຺ຎາຍ.

ປຎ຺ຎາຓໍ, ປຎ຺ຎາຓານິ, ປຎ຺ຎາຓາ. ປຎ຺ຎາຓໍ, ປຎ຺ຎາຓານິ, ປຎ຺ຎາເຓ. ປຎ຺ຎາເຓນ.

‘‘ຕຖາ ຫິ ຠນ຺ເຕ ຠຄວໂຕ ສີລປຎ຺ຎາຓໍ. ສາຘຸ ປຎ຺ຎາຓວາ ນໂຣ’’ຕິອາທີເນຕ຺ຖ ນິທສ຺ສນປທານິ.

ຎາຓໍ, ຎາຓານິ, ຎາຓາ. ຎາຓໍ, ຎາຓານິ, ຎາເຓ. ຎາເຓນ. ເສສໍ ສພ຺ພໍ ເນຍ຺ຍໍ. ‘‘ອຄ຺ຄິ ອຄ຺ຄິນິ ຄິນິ’’ອິຈ຺ຈາທີສຸປິ ອຸຕ຺ຕຣາຘິກວເສນ ນາມິກປທມາລາ ໂຍເຊຕພ຺ພາ.

ໂກ ວີ ສາທີສຸປິ ເອກກ຺ຂເຣສຸ ໂກ ວຸຈ຺ຈຕິ ພ຺ຣຫ຺ມາ ວາໂຕ ຈ ສຣີຣຎ຺ຈ, ຕສ຺ສ ຕພ຺ພາຈກຕ຺ເຕ ອິເມ ປໂຍຄາ. ເສຍ຺ຍຖິທໍ?

‘‘ຊິເນນ ເຍນ ອານີຕໍ, ໂລກສ຺ສ ອມິຕໍ ຫິຕໍ;

ຕສ຺ສ ປາທມ຺ພຸຊໍ ວນ຺ເທ, ກໂມຬິອລິເສວິຕໍ.

ກກຸຘຣຸກ຺ໂຂ. ກຣຊກາໂຍ’’ ອິຈ຺ເຈວມາທໂຍ. ຕຕ຺ຖ ກໂມຬິອລິເສວິຕນ຺ຕິ ວນ຺ທນ຺ຕານໍ ອເນກສຕານໍ ພ຺ຣຫ຺ມານໍ ໂມຬິຠມຣເສວິຕນ຺ຕິ ກວໂຍ ອິຈ຺ຉນ຺ຕິ. ກກຸຘຣຸກ຺ໂຂຕິ ເອຕ຺ຖ ປນ ໂກ ວຸຈ຺ຈຕິ ວາໂຕ, ຕສ຺ສ ໂຍ ກຸຊ຺ຌຕິ, ວາຕໂຣຄາປນຍນວເສນ ຕໍ ນິວາເຣຕິ, ຕສ຺ມາ ໂສ ຣຸກ຺ໂຂ ກກຸໂຘຕິ ວຸຈ຺ຈຕີຠິ ອາຈຣິຍາ. ກຣຊກາໂຍຕິ ເອຕ຺ຖ ຕຸ ໂກ ວຸຈ຺ຈຕິ ສຣີຣໍ, ຕຕ຺ຖ ປວຕ຺ໂຕ ຣໂຊ ກຣໂຊ. ກິໍ ຕໍ? ສຸກ຺ກໂສຓິຕໍ. ຕຎ຺ຫິ ‘‘ຣາໂຄ ຣໂຊ, ນ ຈ ປນ ເຣຓຸ ວຸຈ຺ຈຕີ’’ຕິ ເອວໍ ວຸຕ຺ຕຣາຄຣຊຜລຕ຺ຕາ ສຣີຣວາຈເກນ ກສທ຺ເທນ ວິເສເສຕ຺ວາ ຜລໂວຫາເຣນ ‘‘ກຣໂຊ’’ຕິ ວຸຈ຺ຈຕິ. ເຕນ ສຸກ຺ກໂສຓິຕສງ຺ຂາເຕນ ກຣເຊນ ສມ຺ຠູໂຕ ກາໂຍ ກຣຊກາໂຍຕິ ອາຈຣິຍາ. ຕຖາ ຫິ ‘‘ກາໂຍ ມາຕາເປຕ຺ຕິກສມ຺ຠໂວ’’ຕິ ວຸຕ຺ໂຕ, ມຫາອສ຺ສປູຣສຸຕ຺ຕຏີກາຍໍ ປນ ‘‘ກຣິຍຕິ ຄພ຺ຠາສເຍ ຂິປິຍຕີຕິ ກໂຣ, ສມ຺ຠໂວ. ກຣໂຕ ຊາໂຕຕິ ກຣໂຊ, ມາຕາເປຕ຺ຕິກສມ຺ຠໂວຕິ ອຕ຺ໂຖ. ມາຕຸອາທີນໍ ສຓ຺ຐາປນວເສນ ກຣໂຕ ຊາໂຕຕິ ອປເຣ, ອຸຠຍຖາປິ ກຣຊກາຍນ຺ຕິ ຈຕຸສນ຺ຕຕິຣູປມາຫາ’’ຕິ ວຸຕ຺ຕໍ. ອຍໍ ປນຕ຺ໂຖ ອິຘ ນາຘິປ຺ເປໂຕ, ປຸຣິໂມເຍວຕ຺ໂຖ ອຘິປ຺ເປໂຕ ກສທ຺ທາຘິກາຣຕ຺ຕາ.

ໂກ, ກາ. ກໍ, ເກ. ເກນ, ເກຫິ, ເກຠິ. ກສ຺ສ, ການໍ. ກາ, ກສ຺ມາ, ກມ຺ຫາ, ເກຫິ, ເກຠິ. ກສ຺ສ, ການໍ. ເກ, ກສ຺ມິໍ, ກມ຺ຫິ, ເກສຸ. ໂຠ ກ, ຠວນ຺ໂຕ ກາ.

ຕຕ຺ຣ ວິ ວຸຈ຺ຈຕິ ປກ຺ຂີ. ຕຖາ ຫິ ປກ຺ຂີນໍ ອິສ຺ສໂຣ ສຸປຓ຺ຓຣາຊາ ວິນ຺ໂທຕິ ກຖິຍຕິ. ເອຕມຕ຺ຖຎ຺ຫິ ສນ຺ຘາຍ ປຸພ຺ພາຈຣິເຍນປິ ອຍໍ ຄາຖາ ຠາສິຕາ –

‘‘ສທ຺ຘານເຕ ມຸທ຺ຘນິ ສຓ຺ຐເປມິ, ມຸນິນ຺ທ ນິນ຺ທາປຄຕໍ ຕວຄ຺ຄໍ;

ເທວິນ຺ທນາຄິນ຺ທນຣິນ຺ທວິນ຺ທ-ນ ຕໍ ວິຠິນ຺ນໍ ຈຣຓາຣວິນ຺ທ’’ນ຺ຕິ.

ຕຕ຺ຖ ວີນໍ ອິນ຺ໂທຕິ ວິນ຺ໂທ, ປກ຺ຂິຊາຕິຍາ ຊາຕານໍ ສຸປຓ຺ຓານໍ ຣາຊາຕິ ອຕ຺ໂຖ.

ວິໍ, ວີ, ວໂຍ. ວິໍ, ວີ, ວໂຍ. ວິນາ, ວີຫິ, ວີຠິ. ວິສ຺ສ, ວິໂນ, ວີນໍ. ວິນາ, ວິສ຺ມາ, ວິມ຺ຫາ, ວີຫິ, ວີຠິ. ວິສ຺ສ, ວິໂນ, ວີນໍ. ວິສ຺ມິໍ, ວິມ຺ຫິ, ວີສຸ. ໂຠ ວິ, ຠວນ຺ໂຕ ວໂຍ.

ສາ ວຸຈ຺ຈຕິ ສຸນໂຂ, ‘‘ມາຕາ ເມ ອຕ຺ຖິ, ສາ ມຍາ ໂປເສຕພ຺ພາ’’ຕິອາທີສຸ ປນ ສາສທ຺ໂທ ສພ຺ພນາມິກປຣິຍາປນ຺ໂນ ປຣມ຺ມຸຂວຈໂນ ຕສທ຺ເທນ ສມ຺ຠູໂຕ ທຏ຺ຐພ຺ໂພ. ສາສທ຺ທສ຺ສ ຠາ ຣາ ຖີ ຠູ ກສທ຺ທານຎ຺ຈ ນາມິກປທມາລາ ເຫຏ຺ຐາ ປກາສິຕາ.

ຘີ ວຸຈ຺ຈຕິ ປຎ຺ຎາ. ເອຕ຺ຖ ຈ ‘‘ອມຈ຺ເຈ ຕາຕ ຊານາຫິ, ຘີເຣ ອຕ຺ຖສ຺ສ ໂກວິເທ’’ຕິ. ‘‘ຘີມາ, ຘີມຕິ, ສຸຘີ, ສຸຘິນີ, ຘີຍຸຕ຺ຕ’’ນ຺ຕິ ຈ ອາທີນິ ນິທສ຺ສນປທານິ.

ຘີ, ຘີ, ຘິໂຍ. ຘິໍ, ຘີ, ຘິໂຍ. ຘິຍາ, ຘີຫິ, ຘີຠິ. ຘິຍາ, ຘີນໍ. ຘິຍາ, ຘີຫິ, ຘີຠິ. ຘິຍາ, ຘີນໍ. ຘິຍາ, ຘິຍໍ, ຘີສຸ. ໂຠຕິ ຘິ, ໂຠຕິໂຍ ຘີ, ໂຠຕິໂຍ ຘິໂຍ.

ກຸ ວຸຈ຺ຈຕິ ປຖວີ. ເອຕ຺ຖ ຈ ‘‘ກຸທາໂລ. ກຸມຸທໍ. ກຸຎ຺ຊໂຣ’’ຕິ ອິມານິ ນິທສ຺ສນປທານິ. ຕຕ຺ຣ ກຸໍ ປຖວິໍ ທາລຍຕິ ປທາເລຕິ ຠິນ຺ທຕິ ເອເຕນາຕິ ກຸທາໂລ. ກຸຍໍ ປຖວິຍໍ ໂມທຕີຕິ ກຸມຸທໍ. ກຸໍ ຊຣຕີຕິ ກຸຎ຺ຊໂຣ. ຕຖາ ຫິ ວິມານວຕ຺ຖຸອຏ຺ຐກຖາຍໍ ວຸຕ຺ຕໍ ‘‘ກຸໍ ປຖວິໍ ຕທຠິຆາເຕນ ຊຣຍຕີຕິ ກຸຎ຺ຊໂຣ’’ຕິ.

ກຸ, ກູ, ກຸໂຍ. ກຸໍ, ກູ, ກຸໂຍ. ກຸຍາ, ກູຫິ, ກູຠິ. ກຸຍາ, ກູນໍ. ກຸຍາ, ກູຫິ, ກູຠິ. ກຸຍາ, ກູນໍ. ກຸຍາ, ກຸຍໍ, ກູສຸ. ໂຠຕິ ກຸ, ໂຠຕິໂຍ ກູ, ໂຠຕິໂຍ ກຸໂຍ.

ຂ’ມິນ຺ທ຺ຣິຍໍ ປກຖິຕໍ, ຂ’ມາກາສມຸທີຣິຕໍ;

ສຄ຺ຄຏ຺ຐານມ຺ປິ ຂໍ ວຸຕ຺ຕໍ, ສຸຎ຺ຎຕ຺ຕມ຺ປິ ຈ ຂໍ ມຕໍ.

ຕຕ຺ຣິນ຺ທ຺ຣິຍໍ ຈກ຺ຂຸວິຎ຺ຎາຓາທີນໍ ຄຕິນິວາສຠາວໂຕ ‘‘ຂ’’ນ຺ຕິ ວຸຈ຺ຈຕິ, ອາກາສໍ ວິວິຕ຺ຕຏ຺ເຐນ. ສຄ຺ໂຄ ກຕສຸຈຣິເຕຫິ ເອກນ຺ເຕນ ຄນ຺ຕພ຺ພຕາຍ ‘‘ຂ’’ນ຺ຕິ ສງ຺ຂໍ ຄຈ຺ຉຕິ. ‘‘ຂໂຄ ຍຖາ ຫິ ຣຸກ຺ຂຄ຺ເຄ, ນິລີຍນ຺ໂຕວ ສາຂິໂນ. ສາຂໍ ຆຏ຺ເຏຕີ’’ຕິ ຈ, ‘‘ເຂ ນິມ຺ມິໂຕ ອຈຣິ ອຏ຺ຐສຕໍ ສຍມ຺ຠູ’’ຕິ ຈ ອາທິ ເອຕ຺ຖ ນິທສ຺ສນໍ.

ຂໍ, ຂານິ, ຂາ. ຂໍ, ຂານິ, ເຂ. ເຂນ, ເຂຫິ, ເຂຠິ. ຂສ຺ສ, ຂານໍ. ຂາ, ຂສ຺ມາ, ຂມ຺ຫາ, ເຂຫິ, ເຂຠິ. ຂສ຺ສ, ຂານໍ. ເຂ, ຂສ຺ມິໍ, ຂມ຺ຫິ, ເຂສຸ. ໂຠ ຂ, ຠວນ຺ໂຕ ຂານິ, ຠວນ຺ໂຕ ຂາ.

ໂຄສທ຺ທສ຺ສ ອຕ຺ຖຸທ຺ຘາໂຣ ວຸຈ຺ຈເຕ –

ໂຄ ໂຄເຓ ຈິນ຺ທ຺ຣິເຍ ຠູມ຺ຍໍ, ວຈເນ ເຈວ ພຸທ຺ຘິຍໍ;

ອາທິຈ຺ເຈ ຣສ຺ມິຍຎ຺ເຈວ, ປານີເຍປິ ຈ ວຕ຺ຕເຕ;

ເຕສຸ ອຕ຺ເຖສຸ ໂຄເຓ ຖິ-ປຸມາ ຈ ອິຕເຣ ປຸມາ.

ຕຖາ ຫິ ‘‘ໂຄສຸ ທຸຍ຺ຫມານາສຸ ຄໂຕ. ໂຄປຎ຺ຈໂມ’’ຕິອາທີສຸ ໂຄສທ຺ໂທ ໂຄເຓ ວຕ຺ຕຕິ. ໂຄຈໂຣຕິ ເອຕ຺ຖິນ຺ທ຺ຣິເຍປິ ວຕ຺ຕຕິ ຄາໂວ ຈກ຺ຂາທີນິນ຺ທ຺ຣິຍານິ ຈຣນ຺ຕິ ເອຕ຺ຖາຕິ ໂຄຈໂຣ. ຕຖາ ຫິ ໂປຣາຓາ ກຖຍິໍສຸ ‘‘ຄາໂວ ຈຣນ຺ຕິ ເອຕ຺ຖາຕິ ໂຄຈໂຣ, ໂຄຈໂຣ ວິຍ ໂຄຈໂຣ, ອຠິຓ຺ຫໍ ຈຣິຕພ຺ພຏ຺ຐານໍ. ຄາໂວວາຈກ຺ຂາທີນິນ຺ທ຺ຣິຍານິ, ເຕຫິ ຈຣິຕພ຺ພຏ຺ຐານໍ ໂຄຈໂຣ’’ຕິ. ‘‘ໂຄມຕິໍ ໂຄຕມໍ ນເມ’’ຕິ ໂປຣາຓກວິຣຈນາຍໍ ປນ ປຖວິຍໍ ວຕ຺ຕຕິ. ‘‘ຠູຣິປຎ຺ຎໍ ໂຄຕມໍ ສມ຺ມາສມ຺ພຸທ຺ຘໍວນ຺ທາມີ’’ຕິ ຫິ ອຕ຺ໂຖ. ຕຖາ ສຸຕ຺ຕນິປາຕຏ຺ຐກຖາຍວາເສຏ຺ຐສຸຕ຺ຕສໍວຓ຺ຓນປ຺ປເທເສ ‘‘ໂຄຣກ຺ຂນ຺ຕິ ເຂຕ຺ຕຣກ຺ຂໍ, ກສິຣກ຺ຂນ຺ຕິ ວຸຕ຺ຕໍ ໂຫຕິ. ປຖວີ ຫິ ‘‘ໂຄ’’ຕິ ວຸຈ຺ຈຕິ, ຕປ຺ປເຠໂທ ຈ ເຂຕ຺ຕ’’ນ຺ຕິ ວຸຕ຺ຕໍ.

‘‘ໂຄຕ຺ຕວເສນ ໂຄຕໂມ’’ຕິ ເອຕ຺ຖ ຕຸ ວຈເນ ພຸທ຺ຘິຍຎ຺ຈ ວຕ຺ຕຕິ. ເຕນາຫຸ ໂປຣາຓາ ‘‘ຄໍ ຕາຍຕີຕິ ໂຄຕ຺ຕໍ. ໂຄຕໂມຕິ ຫິ ປວຕ຺ຕມານໍ ຄໍ ວຈນໍ ພຸທ຺ຘິຎ຺ຈ ຕາຍຕິ ເອກໍສິກວິສຍຕາຍ ຣກ຺ຂຕີຕິ ໂຄຕ຺ຕໍ. ຍຖາ ຫິ ພຸທ຺ຘິ ອາຣມ຺ມຓຠູເຕນ ອຕ຺ເຖນ ວິນາ ນ ວຕ຺ຕຕິ, ເອວໍ ອຠິຘານໍ ອຠິເຘຍ຺ຍຠູເຕນ, ຕສ຺ມາ ໂສ ໂຄຕ຺ຕສງ຺ຂາໂຕ ອຕ຺ໂຖ ຕານິ ຕາຍຕິ ຣກ຺ຂຕີຕິ ວຸຈ຺ຈຕິ. ໂກ ປນ ໂສຕິ? ອຎ຺ຎກຸລປຣມ຺ປຣາສາຘາຣຓໍ ຕສ຺ສ ກຸລສ຺ສ ອາທິປຸຣິສສມຸທາຄຕໍ ຕໍກຸລປຣິຍາປນ຺ນສາຘາຣຓໍ ສາມຎ຺ຎຣູປນ຺ຕິ ທຏ຺ຐພ຺ພ’’ນ຺ຕິ. ຕຖາ ຫິ ຕໍໂຄຕ຺ຕຊາຕາ ສຸທ຺ໂຘທນມຫາຣາຊາທໂຍປິ ໂຄຕໂມຕ຺ເວວ ວຸຈ຺ຈນ຺ຕິ. ເຠນ ຠຄວາ ອຕ຺ຕໂນ ປິຕຣໍ ສຸທ຺ໂຘທນມຫາຣາຊານໍ ‘‘ອຕິກ຺ກນ຺ຕວຣາ ໂຂ ໂຄຕມ ຕຖາຄຕາ’’ຕິ ອໂວຈ. ເວສ຺ສວໂຓປິ ມຫາຣາຊາ ຠຄວນ຺ຕໍ ‘‘ວິຊ຺ຊາຈຣຓສມ຺ປນ຺ນໍ, ພຸທ຺ຘໍ ວນ຺ທາມ ໂຄຕມ’’ນ຺ຕິ ອໂວຈ, ອາຍສ຺ມາປິ ວງ຺ຄີໂສ ອາຍສ຺ມນ຺ຕໍ ອານນ຺ທໍ ‘‘ສາຘຸ ນິພ຺ພາປນໍ ພ຺ຣູຫິ, ອນຸກມ຺ປາຍ ໂຄຕມາ’’ຕິ ອໂວຈ. ເອວໍ ອິທໍ ສາມຎ຺ຎຣູປໍ ຄໍ ຕາຍຕີຕິ ໂຄຕ຺ຕນ຺ຕິ ວຸຕ຺ຕໍ. ຕໍ ປນ ໂຄຕມໂຄຕ຺ຕກສ຺ສປໂຄຕ຺ຕາທິວເສນ ພຫຸວິຘໍ.

ຕຖາ ໂຄສທ຺ໂທ ອາທິຈ຺ເຈ ວຕ຺ຕຕິ. ‘‘ໂຄໂຄຕ຺ຕໍ ໂຄຕມໍ ນເມ’’ຕິ ໂປຣາຓກວິຣຈນາ ເອຕ຺ຖ ນິທສ຺ສນໍ, ອາທິຈ຺ຈພນ຺ຘຸໍ ໂຄຕມໍ ສມ຺ມາສມ຺ພຸທ຺ຘໍ ວນ຺ທາມີຕິ ອຕ຺ໂຖ. ອາທິຈ຺ໂຈປິ ຫິ ໂຄຕມໂຄຕ຺ເຕ ຊາໂຕ ຠຄວາປິ, ເອວໍ ເຕນ ສມານໂຄຕ຺ຕຕາຍ ຕຕ຺ຖ ຕຕ຺ຖ ‘‘ອາທິຈ຺ຈພນ຺ຘູ’’ຕິອາທິນາ ຠຄວໂຕ ໂຖມນາ ທິສ຺ສຕິ ‘‘ປຸຈ຺ຉາມິ ຕໍ ອາທິຈ຺ຈພນ຺ຘຸ, ວິເວກໍ ສນ຺ຕິປທຎ຺ຈ ມເຫສີ’’ຕິ ຈ, ‘‘ວນ຺ເທ ເຊຕວນໍ ນິຈ຺ຈໍ, ວິຫາຣໍ ຣວິພນ຺ຘຸໂນ’’ຕິ ຈ, ‘‘ໂລເກກພນ຺ຘຸ’ມຣວິນ຺ທສຫາຍພນ຺ຘຸ’’ນ຺ຕິ ຈ. ‘‘ອຸຓ຺ຫຄູ’’ຕິ ເອຕ຺ຖ ປນ ໂຄສທ຺ໂທ ຣສ຺ມິຍໍ ວຕ຺ຕຕິ. ອຸຓ຺ຫາ ຄາໂວ ຣສ຺ມິໂຍ ເອຕສ຺ສາຕິ ອຸຓ຺ຫຄູ, ສູຣິໂຍ. ປຸພ຺ພາຈຣິຍາປິ ຫິ ຉນ຺ໂທວິຈິຕິສຕ຺ເຖ ອິມເມວຕ຺ຖໍ ພ຺ຍາກຣິໍສຸ.

‘‘ໂຄສີຕຈນ຺ທນ’’ນ຺ຕິ ເອຕ຺ຖ ປານີເຍ ວຕ຺ຕຕິ. ໂຄສທ຺ເທນ ຫິ ຊລໍ ວຸຈ຺ຈຕິ. ໂຄ ວິຍ ສີຕໍ ຈນ຺ທນໍ, ຕສ຺ມິໍ ປນ ອຸທ຺ຘນໂຕ ອຸທ຺ຘຣິຕປກ຺ກຸຖິຕເຕລມ຺ຫິ ປກ຺ຂິຕ຺ເຕ ຕງ຺ຂຓຎ຺ເຎວ ຕໍ ເຕລໍ ສຸສີຕລໍ ໂຫຕິ.

ເອຕ຺ເຖເກ ວທນ຺ຕິ ‘‘ກສ຺ມາ ໂຠ ‘ໂຄປທຕ຺ເຖ ວຕ຺ຕມາໂນ ໂຄສທ຺ໂທ ອິຕ຺ຖິລິງ຺ໂຄ ເຈວ ປຸລ຺ລິງ຺ໂຄ ຈາ’ຕິ ວທຖ, ກສ຺ມາ ຈ ປນ ‘ອິນ຺ທ຺ຣິຍປຖວີວຈນພຸທ຺ຘິສູຣິຍຣສ຺ມິປານີເຍສຸ ວຕ຺ຕມາໂນ ປຸລ຺ລິງ຺ໂຄ’ຕິ ວທຖ, ເອເຕສຸ ສູຣິຍຕ຺ເຖ ວຕ຺ຕມາໂນ ປຸລ຺ລິງ຺ໂຄ ໂຫຕຸ, ນນຸ ອິນ຺ທ຺ຣິຍວຈນປານີເຍສຸ ວຕ຺ຕມາເນນ ປນ ໂຄສທ຺ເທນ ນປຸໍສກລິງ຺ເຄນ ຠວິຕພ຺ພໍ, ປຖວີພຸທ຺ຘິຣສ຺ມີສຸ ວຕ຺ຕມາເນນ ອິຕ຺ຖິລິງ຺ເຄນ ຠວິຕພ຺ພໍ ອິນ຺ທ຺ຣິຍາທິປຖວາທິປທຕ຺ເຖສຸ ວຕ຺ຕມານານໍ ອິນ຺ທ຺ຣິຍສທ຺ທາທິປຖວີສທ຺ທາທີນໍ ນປຸໍສກິຕ຺ຖິລິງ຺ຄວເສນ ນິທ຺ເທສສ຺ສ ທສ຺ສນໂຕ’’ຕິ? ຕນ຺ນ, ນິຍມາຠາວໂຕ. ອິຕ຺ຖິປທຕ຺ເຖ ວຕ຺ຕມານສ຺ສາປິ ຫິ ສໂຕ ກສ຺ສຈິ ສທ຺ທສ຺ສ ປຸລ຺ລິງ຺ຄວເສນ ນິທ຺ເທໂສ ທິສ຺ສຕິ ຍຖາ ‘‘ໂອໂຣໂຘ’’ຕິ. ປຸຣິສປທຕ຺ເຖ ວຕ຺ຕມານສ຺ສາປິ ຈ ສໂຕ ກສ຺ສຈິ ອິຕ຺ຖິລິງ຺ຄວເສນ ນິທ຺ເທໂສ ທິສ຺ສຕິ, ຍຖາ ‘‘ອຕ຺ຖກາໂມສິ ເມ ຍກ຺ຂ, ຫິຕກາມາສິ ເທວເຕ’’ຕິ. ອິຕ຺ຖິປຸຣິສປທຕ຺ເຖສຸ ປນ ອວຕ຺ຕມານານມ຺ປິ ສຕໍ ເກສຎ຺ຈິ ສທ຺ທານໍ ເອກສ຺ມິໍເຍວ ຎາຓາທິອຕ຺ເຖ ວຕ຺ຕມານານໍ ອິຕ຺ຖິປຸມນປຸໍສກລິງ຺ຄວເສນ ນິທ຺ເທໂສ ທິສ຺ສຕິ ຍຖາ ‘‘ປຎ຺ຎາ ອໂມໂຫ ຎາຓ’’ນ຺ຕິ, ‘‘ຕຏໍຕຏີຕໂຏ’’ຕິ ຈ. ຕຖາ ຫິ ອນິຕ຺ຖິຠູໂຕປິ ສມາໂນ ‘‘ມາຕຸລາ’’ຕິ ອິຕ຺ຖິລິງ຺ຄວເສນ ຣຸກ຺ໂຂປິ ນາມໍ ລຠຕິ, ຕພ຺ພເສນ ນຄຣມ຺ປິ. ເຕນາຫ ຈກ຺ກວຕ຺ຕິສຸຕ຺ຕຏີກາຍໍ ‘‘ມາຕຸລາຕິ ອິຕ຺ຖິລິງ຺ຄວເສນ ລທ຺ຘນາໂມ ເອໂກ ຣຸກ຺ໂຂ, ຕາຍ ອາສນ຺ນປ຺ປເທເສ ມາປິຕຕ຺ຕາ ນຄຣມ຺ປິ ‘ມາຕຸລາ’ຕ຺ເວວ ປຎ຺ຎາຍິຕ຺ຖ. ເຕນ ວຸຕ຺ຕໍ ມາຕຸລາຍນ຺ຕິ ເອວໍນາມເກ ນຄເຣ’’ຕິ.

ໂຄສທ຺ທສ຺ສ ນາມິກປທມາລາ ເຫຏ຺ຐາ ປກາສິຕາ.

ໂມ ວຸຈ຺ຈຕິ ຈນ຺ໂທ, ອຏ຺ຐກຖາຍໍ ປນ ‘‘ມາ ວຸຈ຺ຈຕິ ຈນ຺ໂທ’’ຕິ ອາກາຣນ຺ຕປາໂຐ ທິສ຺ສຕິ, ໂອກາຣນ຺ຕປາເຐນ ເຕນ ຠວິຕພ຺ພໍ ສກ຺ກຏຠາສາຍ ເອກກ຺ຂຣໂກສໂຕ ນຍໍ ຄເຫຕ຺ວາ ‘‘ໂມ ສິໂວ ຈນ຺ທິມາ ເຈວາ’’ຕິ ໂອກາຣນ຺ຕວເສນ ວຕ຺ຕພ຺ພຕ຺ຕາ. ເອຕ຺ຖ ຈ ໂອກາຣນ຺ຕວເສນ ວຸຕ຺ຕສ຺ສ ມສທ຺ທສ຺ສ ຈນ຺ທວາຈກຕ຺ເຕ ‘‘ປຸຓ຺ຓມີ, ປຸຓ຺ຓມາ’’ຕິ ຈ ນິທສ຺ສນປທານິ. ຕຕ຺ຖ ປຸຓ຺ໂຓ ໂມ ເອຕ຺ຖາຕິ ປຸຓ຺ຓມີ, ເອວໍ ປຸຓ຺ຓມາ, ຣຕ຺ຕາເປກ຺ຂໍ ອິຕ຺ຖິລິງ຺ຄວຈນໍ. ເອຕ຺ຖ ປນ ‘‘ວິສາຂປຸຓ຺ຓມາຍ ຣຕ຺ຕິຍາ ປຐມຍາເມປຸພ຺ເພນິວາສໍ ອນຸສ຺ສຣີ’’ຕິ ອິທໍ ນິທສ຺ສນໍ. ເອຕ຺ຖ ສິຍາ – ຍທິ ‘‘ປຸຓ຺ຓມາ’’ຕິ ອຍໍສທ຺ໂທ ຣຕ຺ຕາເປກ຺ໂຂ ອິຕ຺ຖິລິງ຺ໂຄ.

‘‘ປຸຓ຺ຓມາເຍ ຍຖາ ຈນ຺ໂທ, ປຣິສຸທ຺ໂຘ ວິໂຣຈຕິ;

ຕເຖວ ຕ຺ວໍ ປຸຓ຺ຓມໂນ, ວິໂຣຈ ທສສຫສ຺ສິຍໍ.

ອນ຺ວທ຺ຘມາເສ ປນ຺ນຣເສ, ປຸຓ຺ຓມາເຍ ອຸໂປສເຖ;

ປຈ຺ຈຍໍ ນາຄມາຣຸຍ຺ຫ, ທານໍ ທາຕຸມຸປາຄມິ’’ນ຺ຕິ

ອາທີສຸ ກຖໍ ‘‘ປຸຓ຺ຓມາເຍ’’ຕິ ປທສິທ຺ຘີຕິ? ຍກາຣສ຺ສ ເຍກາຣາເທສວເສນ. ຘມ຺ມິສ຺ສເຣນ ຫິ ຠຄວຕາ ‘‘ປຸຓ຺ຓມາຍາ’’ຕິ ວຕ຺ຕພ຺ເພ ‘‘ປຸຓ຺ຓມາເຍ’’ຕິ ວທຕາ ຍກາຣສ຺ສ ຐາເນ ເຍກາໂຣ ປຐິໂຕ ອິຕ຺ຖິລິງ຺ຄວິສເຍ ຕ຺ຕາກາຣສ຺ສ ຐາເນ ຕ຺ເຕກາໂຣ ວິຍ, ນີກາຣສ຺ສ ຐາເນ ເນກາໂຣ ວິຍ ຈ. ຕຖາ ຫິ ຍຖາ ‘‘ອພ຺ຍຍຕໍ ວິລປສິ ວິຣຕ຺ເຕ ໂກສິຍາຍເນ’’ຕິ ອິມສ຺ມິໍ ຣາຘຊາຕເກ ‘‘ວິຣຕ຺ຕາ’’ຕິ ວຕ຺ຕພ຺ເພ ‘‘ວິຣຕ຺ເຕ’’ຕິ ວທນ຺ເຕນ ຕ຺ຕາກາຣສ຺ສ ຐາເນ ຕ຺ເຕກາໂຣ ປຐິໂຕ, ‘‘ໂກສິຍາຍນີ’’ຕິ ຈ ວຕ຺ຕພ຺ເພ ‘‘ໂກສິຍາຍເນ’’ຕິ ວທນ຺ເຕນ ນີກາຣສ຺ສ ຐາເນ ເນກາໂຣ ປຐິໂຕ. ເອວໍ ‘‘ປຸຓ຺ຓມາຍາ’’ຕິ ວຕ຺ຕພ຺ເພ ‘‘ປຸຓ຺ຓມາເຍ’’ຕິ ວທຕາ ຍກາຣສ຺ສ ຐາເນ ເຍກາໂຣ ປຐິໂຕ. ຍຖາ ຈ ‘‘ທກ຺ຂິຕາເຍ ອປຣາຊິຕສງ຺ຆ’’ນ຺ຕິ ອິມສ຺ມິໍ ມຫາສມຍສຸຕ຺ຕປ຺ປເທເສ ‘‘ທກ຺ຂິຕາຍາ’’ຕິ ວຕ຺ຕພ຺ເພ ‘‘ທກ຺ຂິຕາເຍ’’ຕິ ວທຕາ ຍກາຣສ຺ສ ຐາເນ ເຍກາໂຣ ປຐິໂຕ, ເອວມິຘາປິ. ຍຖາ ປນ ‘‘ສຠາເຍ ວາ ທ຺ວາຣມູເລ ວາ’’ຕິ ເອຕ຺ຖ ‘‘ສຠາຍ’’ນ຺ຕິ ລິງ຺ຄພ຺ຍຕ຺ຕຍວເສນ ສຠາ ວຸຕ຺ຕາ, ນ ຕຖາ ອິຘ ‘‘ປຸຓ຺ຓມາຍ’’ນ຺ຕິ ລິງ຺ຄພ຺ຍຕ຺ຕເຍນ ປຸຓ຺ຓມາ ວຸຕ຺ຕາ, ອຖ ໂຂ ‘‘ປຸຓ຺ຓມາ’’ຕິ ອາກາຣນ຺ຕິຕ຺ຖິລິງ຺ຄວເສນ ວຸຕ຺ຕາ. ຕຖາ ຫິ ‘‘ປຸຓ຺ຓມາໂຍ’’ຕິ ປທໍ ຍກາຣຏ຺ຐາເນ ເຍກາຣຸຈ຺ຈາຣຓວເສນ ສມ຺ຠູຕໍ ຠຸມ຺ມວຈນນ຺ຕິ ທຏ຺ຐພ຺ພໍ.

ມາ ວຸຈ຺ຈຕິ ສິຣີ. ຕຖາ ຫິ ວິທ຺ວມຸຂມຓ຺ຑນຏີກາຍໍ ‘‘ມາລິນີ’’ຕິ ປທສ຺ສຕ຺ຖໍ ວທຕາ ‘‘ມາ ວຸຈ຺ຈຕິ ລກ຺ຂີ, ອລິນີ ຠມຣີ’’ຕິ ວຸຕ຺ຕໍ. ລກ຺ຂີສທ຺ໂທ ຈ ສິຣີສທ຺ເທນ ສມານຕ຺ໂຖ, ເຕນ ‘‘ມາ ວຸຈ຺ຈຕິ ສິຣີ’’ຕິ ອຕ຺ໂຖ ອມ຺ເຫຫິ ອນຸມໂຕ, ຕຖາ ໂປຣາເຓຫິປິ ‘‘ມໍ ສິຣິໍ ຘາເຣຕິ ວິທຘາຕິ ຈາຕິ ມນ຺ຘາຕາ’’ຕິ ອຕ຺ໂຖ ປກາສິໂຕ, ຕສ຺ມາ ‘‘ມາລິນີ ມນ຺ຘາຕາ’’ຕິ ຈ ອິມາເນຕ຺ຖ ນິທສ຺ສນປທານິ. ຕຕ຺ຣ ປຸລ຺ລິງ຺ຄສ຺ສ ຕາວ ມສທ຺ທສ຺ສ ອຍໍ ນາມິກປທມາລາ –

ໂມ, ມາ. ມໍ, ເມ. ເມນ, ເມຫິ, ເມຠິ. ມສ຺ສ, ມານໍ. ມາ, ມສ຺ມາ, ມມ຺ຫາ, ເມຫິ, ເມຠິ. ມສ຺ສ, ມານໍ. ເມ, ມສ຺ມິໍ, ມມ຺ຫິ, ເມສຸ. ໂຠ ມ, ຠວນ຺ໂຕ ມາ.

ອຍໍ ປນ ອິຕ຺ຖິລິງ຺ຄສ຺ສ ມາສທ຺ທສ຺ສ ນາມິກປທມາລາ –

ມາ, ມາ, ມາໂຍ. ມໍ, ມາ, ມາໂຍ. ມາຍ, ມາຫິ, ມາຠິ. ມາຍ, ມານໍ. ມາຍ, ມາຫິ, ມາຠິ. ມາຍ, ມານໍ. ມາຍ, ມາຍໍ, ມາສຸ. ໂຠຕິ ເມ, ໂຠຕິໂຍ ມາໂຍ.

ເອຕ຺ຖ ປນ ສິຣີວາຈໂກ ມາສທ຺ໂທ ຈ ສທ຺ທວາຈໂກ ຣາສທ຺ໂທ ຈາຕິ ອິເມ ສມານຄຕິກາ ເອກກ຺ຂຣຕ຺ຕາ ນິຈ຺ຈມາກາຣນ຺ຕປກຕິກຕ຺ຕາ ອິຕ຺ຖິລິງ຺ຄຕ຺ຕາ ຈ.

ຕຕ຺ຣ ສໍ ວຸຈ຺ຈຕິ ສນ຺ຕຈິຕ຺ໂຕ ປຸຣິໂສ. ຍໍ ໂລເກ ‘‘ສປ຺ປຸຣິໂສ’’ຕິ ຈ, ‘‘ອຣິໂຍ’’ຕິ ຈ, ‘‘ປຓ຺ຑິໂຕ’’ຕິ ຈ ວທນ຺ຕິ, ຕສ຺ເສຕໍ ອຘິວຈນໍ ຍທິທໍ ‘‘ສ’’ນ຺ຕິ. ເອວໍ ສປ຺ປຸຣິສາຣິຍປຓ຺ຑິຕວາຈກສ຺ສ ສໍສທ຺ທສ຺ສ ປຈ຺ຈຕ຺ຕວຈນວເສນ ອຕ຺ຖິຠາເວ ‘‘ສເມຕິ ອສຕາ ອສ’’ນ຺ຕິ ອິທໍ ປໂຍຄນິທສ຺ສນໍ. ເອຕ຺ຖ ຫິ ‘‘ນ ສໍ ອສ’’ນ຺ຕິ ສມາສຈິນ຺ຕາຍ ສປ຺ປຸຣິສາສປ຺ປຸຣິສປທຕ຺ຖາ ສໍ ອສໍສທ຺ເທຫິ ວຸຕ຺ຕາຕິ ຎາຍນ຺ຕິ, ຕສ຺ມາ ‘‘ສປ຺ປຸຣິສປທຕ຺ໂຖ ປຈ຺ຈຕ຺ຕວຈເນນ ສໍສທ຺ເທນ ວຸຕ຺ໂຕ ນຕ຺ຖີ’’ຕິ ວຈນໍ ນ ວຕ຺ຕພ຺ພໍ. ເຍ ‘‘ນຕ຺ຖີ’’ຕິ ວທນ຺ຕິ, ເຕສໍ ວຈນໍ ນ ຄເຫຕພ຺ພໍ. ນາມິກປທມາລາ ປນສ຺ສ ‘‘ສໍ, ສນ຺ຕໍ, ສນ຺ເຕ’’ຕິອາທິນາ ເຫຏ຺ຐາ ປກາສິຕາ. ນປຸໍສກລິງ຺ຄຕ຺ເຕ ສໍ ວຸຈ຺ຈຕິ ຘນໍ, ‘‘ມນຸສ຺ສສ຺ສໍ. ປຣສ຺ສໍ. ສພ຺ພສ຺ສໍ. ສພ຺ພສ຺ສຫຣຓໍ. ປຣສ຺ສຫຣຓ’’ນ຺ຕິອາທີເນຕ຺ຖ ນິທສ຺ສນປທານິ. ຕຕ຺ຖ ມນຸສ຺ສສ຺ສ ສໍ ມນຸສ຺ສສ຺ສໍ. ເອວໍ ປຣສ຺ສ ສໍ ປຣສ຺ສໍ. ສພ຺ພສ຺ສ ສໍ ສພ຺ພສ຺ສໍ. ຕສ຺ສ ຫຣຓໍ ປຣສ຺ສຫຣຓໍ ສພ຺ພສ຺ສຫຣຓນ຺ຕິ ສມາໂສ. ຕຖາ ສໍ ວຸຈ຺ຈຕິ ສຸຂໍ ສນ຺ຕິ ຈ. ວຸຕ຺ຕຎ຺ຫິ ຕພ຺ພາຈກຕ຺ຕໍ ໂປຣາຓກວິຣຈນາຍໍ –

‘‘ເທວເທໂວ ສໍເທຫີ ໂນ, ຫີໂນ ເທວາຕິເທຫໂຕ;

ຫໂຕປປາຕສໍສາໂຣ, ສາໂຣ ສໍ ເທຕຸ ເທຫິນ’’ນ຺ຕິ.

ຕສ຺ມາ ອຍເມຕ຺ຖ ຄາຖາ, ‘‘ສກລໂລກສງ຺ກໂຣ ທີປງ຺ກໂຣ’’ຕິ ເອຕ຺ຖ ‘‘ສງ຺ກໂຣ’’ຕິ ປທຎ຺ຈນິທສ຺ສນໍ. ‘‘ສໍ, ສານິ, ສາ. ສໍ, ສານິ, ເສ. ເສນ’’ອິຈ຺ຈາທິ ປຸພ຺ເພ ປກາສິຕນເຍນ ເຎຍ຺ຍໍ. ເອຕ຺ຖ ຈ ໂສຕູນໍ ສຸຄຕມຕວເຣ ໂກສລ຺ລຊນນຕ຺ຖໍ ສມາສນ຺ຕຄຕສ຺ສ ສໍສທ຺ທສ຺ສ ນາມິກປທມາລໍ ປຣິປຸຓ຺ຓໍ ກຕ຺ວາ ກຖຍາມ –

ມນຸສ຺ສສ຺ສໍ, ມນຸສ຺ສສ຺ສານິ, ມນຸສ຺ສສ຺ສາ. ມນຸສ຺ສສ຺ສໍ, ມນຸສ຺ສສ຺ສານິ, ມນຸສ຺ສສ຺ເສ. ມນຸສ຺ສສ຺ເສນ, ມນຸສ຺ສສ຺ເສຫິ, ມນຸສ຺ສສ຺ເສຠິ. ມນຸສ຺ສສ຺ສສ຺ສ, ມນຸສ຺ສສ຺ສານໍ. ມນຸສ຺ສສ຺ສາ, ມນຸສ຺ສສ຺ສສ຺ມາ, ມນຸສ຺ສສ຺ສມ຺ຫາ, ມນຸສ຺ສສ຺ເສຫິ, ມນຸສ຺ສສ຺ເສຠິ. ມນຸສ຺ສສ຺ສສ຺ສ, ມນຸສ຺ສສ຺ສານໍ. ມນຸສ຺ສສ຺ເສ, ມນຸສ຺ສສ຺ສສ຺ມິໍ, ມນຸສ຺ສສ຺ສມ຺ຫິ, ມນຸສ຺ສສ຺ເສສຸ. ໂຠ ມນຸສ຺ສສ຺ສ, ໂຠນ຺ໂຕ ມນຸສ຺ສສ຺ສານິ, ມນຸສ຺ສສ຺ສາ. ເອສ ນໂຍ ‘‘ປຣສ຺ສໍ ສພ຺ພສ຺ສ’’ນ຺ຕິອາທີສຸປິ, ສພ຺ພາເນຕານິ ປທານິ ອຠິເຘຍ຺ຍລິງ຺ຄານີຕິ ຄເຫຕພ຺ພານິ.

ຍໍ ຕໍ ກິມິຕິສທ຺ທານໍ, ນາມມາລໍ ປນຕ຺ຕຣິ;

ສພ຺ພນາມປຣິຈ຺ເຉເທ, ປກາສິສ຺ສໍ ຕິລິງ຺ຄໂຕ.

ອິຈ຺ເຈວໍ ເຫຏ຺ຐາ ອຸທ຺ທິຏ຺ຐານໍ ໂກ ວິ ສາທີນໍ ນາມິກປທມາລາ ສທ຺ຘິໍ ອຕ຺ຖນ຺ຕຣນິທສ຺ສນປເທຫິ ວິຠຕ຺ຕາ. ຕຕ຺ຣິທໍ ລິງ຺ຄວວຕ຺ຖານໍ –

ໂກ ວິ ສາ ໂຫນ຺ຕິ ປຸລ຺ລິງ຺ເຄ, ຠາ ຣາ ຖີ ຘີ ກຸ ຠູ ຖິຍໍ;

ກໍ ຂໍ ນປຸໍສເກ ໂຄ ຕຸ, ປຸເມ ເຈວິຕ຺ຖິລິງ຺ຄເກ.

ໂມ ປຸເມ ອິຕ຺ຖິລິງ຺ເຄ ມາ, ສໍ ປຸເມ ຈ ນປຸໍສເກ;

ຍໍ ຕໍ ກິມິຕິ ສພ຺ພຕ຺ຣ, ລິງ຺ເຄສ຺ເວວ ປວຕ຺ຕເຣ.

ອິໂຕ ອຎ຺ຎານິປິ ເອກກ຺ຂຣານິ ອຸປປຣິກ຺ຂິຕ຺ວາ ຄເຫຕພ຺ພານິ.

ເອວໍ ວິຎ຺ຎູນໍ ນຍຎ຺ຎູນໍ ສທ຺ທຣຈນາວິສເຍ ປຣມວິສຸທ຺ຘວິປຸລພຸທ຺ຘິປຏິລາຠຕ຺ຖໍ ປຣມສຓ຺ຫສຸຂຸມຕ຺ເຖສຸ ປໂຍເຄສຸ ອສມ຺ໂມຫຕ຺ຖໍ ສຸວຓ຺ຓຕເລ ສີຫວິຊມ຺ຠເນນ ເກສຣີສີຫສ຺ສ ວິຊມ຺ຠນມິວ ເຕປິຏເກ ພຸທ຺ຘວຈເນ ຎາຓວິຊມ຺ຠເນນ ວິຊມ຺ຠນຕ຺ຖຎ຺ຈ ອຘິກູເນກກ຺ຂຣວເສນ ລິງ຺ຄຕ຺ຕຍໍ ມິສ຺ເສຕ຺ວາ ນາມິກປທມາລາ ວິຠຕ຺ຕາ.

ສທ຺ເທ ຠວນ຺ຕິ ກຸສລາ ນ ຕຸ ເກຈິ ອຕ຺ເຖ,

ອຕ຺ເຖ ຠວນ຺ຕິ ກຸສລາ ນ ຕຸ ເກຈິ ສທ຺ເທ.

ໂກສລ຺ລເມວ ປຣມໍ ທຸຠຍຕ຺ຖ ຕສ຺ມາ,

ໂຍຄໍ ກເຣຍ຺ຍ ສຕຕໍ ມຕິມາ ວຣນ຺ຕິ.

ອິຕິ ນວງ຺ເຄ ສາຏ຺ຐກເຖ ປິຏກຕ຺ຕເຍ ພ຺ຍປ຺ປຖຄຕີສຸ

ວິຎ຺ຎູນໍ ໂກສລ຺ລຕ຺ຖາຍ ກເຕ ສທ຺ທນີຕິປ຺ປກຣເຓ

ລິງ຺ຄຕ຺ຕຍມິສ຺ສໂກ ນາມິກປທມາລາວິຠາໂຄ

ທສໂມ ປຣິຈ຺ເຉໂທ.