໗. ນິຄ຺ຄຫີຕນ຺ຕປຸລ຺ລິງ຺ຄນາມິກປທມາລາ

ອຖ ປຸພ຺ພາຈຣິຍມຕໍ ປຸເຣຈຣໍ ກຕ຺ວາ ນິຄ຺ຄຫີຕນ຺ຕປຸລ຺ລິງ຺ຄານໍ ຠວນ຺ຕ ກໂຣນ຺ຕອິຈ຺ຈາທິກສ຺ສ ປກຕິຣູປສ຺ສ ນາມິກປທມາລໍ ວກ຺ຂາມ –

ຄຈ຺ຉໍ ມຫໍ ຈຣໍ ຕິຏ຺ຐໍ, ທທໍ ຠຸຎ຺ຊໍ ສຸຓໍ ປຈໍ;

ຊຍໍ ຊຣໍ ຈວໍ ມີຍໍ, ສຣໍ ກຸພ຺ພໍ ຊປໍ ວຊໍ.

ຄຈ຺ຉໍ, ຄຈ຺ຉນ຺ໂຕ, ຄຈ຺ຉນ຺ຕາ. ຄຈ຺ຉນ຺ຕໍ, ຄຈ຺ຉນ຺ເຕ. ຄຈ຺ຉຕາ, ຄຈ຺ຉນ຺ເຕຫິ, ຄຈ຺ຉນ຺ເຕຕິ. ຄຈ຺ຉໂຕ, ຄຈ຺ຉນ຺ຕສ຺ສ, ຄຈ຺ຉນ຺ຕານໍ, ຄຈ຺ຉຕໍ. ຄຈ຺ຉຕາ, ຄຈ຺ຉນ຺ເຕຫິ, ຄຈ຺ຉນ຺ເຕຠິ. ຄຈ຺ຉໂຕ, ຄຈ຺ຉນ຺ຕສ຺ສ, ຄຈ຺ຉນ຺ຕານໍ, ຄຈ຺ຉຕໍ. ຄຈ຺ຉຕິ, ຄຈ຺ຉນ຺ເຕສຸ. ໂຠ ຄຈ຺ຉໍ, ໂຠ ຄຈ຺ຉາ, ຠວນ຺ໂຕ ຄຈ຺ຉນ຺ໂຕ.

ຄຈ຺ຉາທີນິ ອຎ຺ຎານິ ຈ ຕໍສທິສານໍ ເອວໍ ເຎຍ຺ຍານີຕິ ຍມກມຫາເຖຣມຕໍ. ກິຎ຺ຈາເປຕ຺ຖ ຕຕິເຍກວຈນຏ຺ຐານາທີສຸ ‘‘ຄຈ຺ຉນ຺ເຕນ, ຄຈ຺ຉນ຺ຕາ, ຄຈ຺ຉນ຺ຕສ຺ມາ, ຄຈ຺ຉນ຺ຕມ຺ຫາ, ຄຈ຺ຉນ຺ຕສ຺ມິໍ, ຄຈ຺ຉນ຺ຕມ຺ຫີ’’ຕິ ອິມານິ ປທານິ ນາຄຕານິ, ຕຖາປິ ຕຕ຺ຖ ຕຕ຺ຖ ປໂຍຄທສ຺ສນໂຕ ຄເຫຕພ຺ພານິ.

ຕຕ຺ຣ ຍມກມຫາເຖເຣນ ອາລປນວຈນຏ຺ຐາເນເຍວ ‘‘ຄຈ຺ຉນ຺ໂຕ, ມຫນ຺ໂຕ, ຈຣນ຺ໂຕ’’ຕິອາທີນໍ ພຫຸວຈນຕ຺ຕໍ ກຖິຕໍ, ປຈ຺ຈຕ຺ຕວຈນຏ຺ຐາເນ ເອກວຈນຕ຺ຕໍ. ເກຫິຈິ ປນ ປຈ຺ຈຕ຺ຕວຈນຏ຺ຐາເນ ເອກວຈນພຫຸວຈນຕ຺ຕໍ, ອາລປນວຈນຏ຺ຐາເນ ພຫຸວຈນຕ຺ຕໍເຍວ ກຖິຕໍ. ‘‘ຄຈ຺ຉໍ, ມຫໍ, ຈຣ’’ນ຺ຕິອາທີນໍ ປນ ອາລປນຏ຺ຐາເນ ເອກວຈນຕ຺ຕໍ. ມຍໍ ປນ ພຸທ຺ຘວຈເນ ອເນກາສຸ ຈາຏ຺ຐກຖາສຸ ‘‘ຄຈ຺ຉນ຺ໂຕ, ມຫນ຺ໂຕ’’ຕິອາທີນໍ ພຫຸວຈນປ຺ປໂຍຄານໍ ‘‘ຄຈ຺ຉໍ, ມຫໍ’’ອິຈ຺ຈາທີນຎ຺ຈ ສານຸສາຣາລປເນກວຈນປ຺ປໂຍຄານໍ ອທສ຺ສນໂຕ ‘‘ຄຈ຺ຉນ຺ໂຕ ຠາຣທ຺ວາໂຊ. ສ ຄຈ຺ຉໍ ນ ນິວຕ຺ຕຕິ. ມຫນ຺ໂຕ ໂລກສນ຺ນິວາໂສ’’ຕິອາທີນໍ ປນ ປຈ຺ຈຕ຺ເຕກວຈນປ຺ປໂຍຄານຎ຺ເຎວ ທສ຺ສນໂຕ ຕາທິສານິ ຣູປານິ ອນິຊ຺ຌານກ຺ຂມານິ ວິຍ ມຎ຺ຎາມ. ນິຣຸຕ຺ຕິປິຏເກ ປຈ຺ຈຕ຺ຕາລປນຏ຺ຐາເນ ‘‘ມຫນ຺ໂຕ, ຠວນ຺ໂຕ, ຈຣນ຺ໂຕ’’ຕິອາທີນໍ ພຫຸວຈນຕ຺ຕເມວ ກຖິຕໍ, ນ ເອກວຈນຕ຺ຕໍ. ຕຖາ ຫິ ຕຕ຺ຖ ‘‘ມຫໍ ຠວໍ ຈຣໍ ຕິຏ຺ຐ’’ນ຺ຕິ ຄາຖໍ ວຕ຺ວາ ‘‘ມຫໍ ຕິຏ຺ຐຕິ, ມຫນ຺ໂຕ ຕິຏ຺ຐນ຺ຕີ’’ຕິ ຈ, ‘‘ໂຠ ມຫາ, ຠວນ຺ໂຕ ມຫນ຺ໂຕ’’ຕິ ຈ, ‘‘ຠວໍ ຕິຏ຺ຐຕິ, ຠວນ຺ໂຕ ຕິຏ຺ຐນ຺ຕີ’’ຕິ ຈ ອາທິ ວຸຕ຺ຕໍ.

ເອຕ຺ຖ ປນ ‘‘ຠວໍ, ຠວນ຺ໂຕ’’ຕິ ປທານິ ຍຕ຺ຖ ‘‘ໂຫນ຺ໂຕ ໂຫນ຺ຕາ’’ຕິ ກ຺ຣິຍຕ຺ຖໍ ນ ວທນ຺ຕິ, ຕຕ຺ຖ ‘‘ຠວໍ ກຈ຺ຈາໂນ. ມາ ຠວນ຺ໂຕ ເອວໍ ອວຈຸຕ຺ຖາ’’ຕິອາທີສຸ ວິຍ ອຎ຺ຎສ຺ມິໍ ອຕ຺ເຖ ປຕນໂຕ ເອກວຈນພຫຸວຈນານິ ຠວນ຺ຕິ, ຕສ຺ມາ ‘‘ສນ຺ໂຕ ສປ຺ປຸຣິສາ ໂລເກ’’ຕິ ເອຕ຺ຖ ‘‘ສນ຺ໂຕ’’ຕິ ປທສ຺ສ ວິຍ ‘‘ອຣຫນ຺ໂຕ ສມ຺ມາສມ຺ພຸທ຺ຘາ’’ຕິ ເອຕ຺ຖ ‘‘ອຣຫນ຺ໂຕ’’ຕິ ປທສ຺ສ ວິຍ ຈ ‘‘ຠວນ຺ໂຕ’’ຕິ ປທສ຺ສ ພຫຸວຈນຕ຺ຕໍ ນິຊ຺ຌານກ຺ຂມໍ. ‘‘ມຫນ຺ໂຕ, ຈຣນ຺ໂຕ, ຕິຏ຺ຐນ຺ໂຕ’’ຕິອາທີນໍ ປນ ພຫຸວຈນຕ຺ຕໍ ນ ນິຊ຺ຌານກ຺ຂມໍ ວິຍ ອມ຺ເຫ ປຏິຠາຕິ. ນ ຫິ ກຕ຺ຖຈິປິ ‘‘ສນ຺ໂຕ, ອຣຫນ຺ໂຕ, ຠວນ຺ໂຕ’’ຕິ ປທວຊ຺ຊິຕານໍ ‘‘ຄຈ຺ຉນ຺ໂຕ, ມຫນ຺ໂຕ, ຈຣນ຺ໂຕ’’ຕິອາທີນໍ ອເນກປທສຕານໍ ພຫຸວຈນນ຺ຕຕາປໂຍເຄ ປສ຺ສາມ. ຕຖາ ຫິ –

ພວ຺ຫຕ຺ເຕ ກຕ຺ຖຈິ ຐາເນ, ‘‘ຊານ’’ມິຈ຺ຈາທໂຍ ຍຖາ;

ທິສ຺ສນ຺ຕິ ເນວໍ ພວ຺ຫຕ຺ເຕ, ‘‘ຄຈ຺ຉນ຺ໂຕ’’ ອິຕິອາທໂຍ.

ພວ຺ຫຕ຺ເຕ ກຕ຺ຖຈິ ຐາເນ, ‘‘ສນ຺ໂຕ’’ ອິຈ຺ຈາທໂຍປິ ຈ;

ທິສ຺ສນ຺ຕິ ເນວໍ ພວ຺ຫຕ຺ເຕ, ‘‘ຄຈ຺ຉນ຺ໂຕ’’ ອິຕິອາທໂຍ.

‘‘ອຣຫນ຺ໂຕ’’ຕິ ພວ຺ຫຕ຺ເຕ, ເອກນ຺ເຕເນວ ທິສ຺ສຕິ;

ເນວໍ ທິສ຺ສນ຺ຕິ ພວ຺ຫຕ຺ເຕ, ‘‘ຄຈ຺ຉນ຺ໂຕ’’ ອິຕິອາທໂຍ.

ອເນກສຕປາເຐສຸ, ‘‘ວິຫຣນ຺ໂຕ’’ຕິອາທີສຸ;

ເອກສ຺ສປິ ພຫຸກຕ຺ເຕ, ປວຕ຺ຕິ ນ ຕຸ ທິສ຺ສຕິ.

ພຫຸວຈນນເຍນ, ‘‘ຄຈ຺ຉນ຺ໂຕ’’ຕິ ປທສ຺ສ ຫິ;

ຄຫເຓ ສຕິ ພຫໂວ, ໂທສາ ທິສ຺ສນ຺ຕິ ສຈ຺ຈໂຕ.

ຍເຖກມ຺ຫິ ຆເຣ ທຑ຺ເຒ, ທຑ຺ຒາ ສາມີປິກາ ຆຣາ;

ຕຖາ ພວ຺ຫຕ຺ຕວາຈິຕ຺ເຕ, ‘‘ຄຈ຺ຉນ຺ໂຕ’’ຕິ ປທສ຺ສ ຕຸ.

‘‘ວິຫຣນ຺ໂຕ’’ຕິອາທີນໍ, ພວ຺ຫຕ຺ຕວາຈິຕາ ສິຍາ;

ຣູປນໂຍ ອນິຏ຺ໂຐ ຈ, ຄເຫຕພ຺ໂພ ອເນກຘາ.

ເອວໍ ສນ຺ເຕປິ ຍສ຺ມາ ‘‘ນິຣຸຕ຺ຕິປິຏກໍ ນາມ ປຠິນ຺ນປຏິສມ຺ຠິເທນ ມຫາຂີຓາສເວນ ມຫາກຈ຺ຈາຍເນນ ກຕ’’ນ຺ຕິ ໂລເກ ປສິທ຺ຘໍ, ຕສ຺ມາ ອິທໍ ຐານໍ ປຸນປ຺ປຸນໍ ອຸປປຣິກ຺ຂິຕພ຺ພໍ. ກິຎ຺ຈາເປຕ຺ຖ ເຖເຣ ຄາຣເວນ ເອວໍ ວຸຕ຺ຕໍ, ຕຖາປິ ປາຬິນຍໍ ຄຣຸໍ ກຕ຺ວາ ທິຏ຺ເຐເນກວຈນນເຍນ ອທິຏ຺ໂຐ ພຫຸວຈນນໂຍ ຉຑ຺ເຑຕພ຺ໂພ. ເອວໍ ສຕິ ນິຄ຺ຄຫີຕນ຺ເຕສຸ ນໂຍ ໂສຠໂນ ຠວຕິ. ອຍໍ ປນ ອມ຺ຫາກໍ ຣຸຈິ –

‘‘ຠວໍ ກຣໍ ອຣຫໍ ສໍ, ມຫໍ’’ ອິຕິ ປທານິ ຕຸ;

ວິສທິສານິ ສມ຺ໂຠນ຺ຕິ, ອຎ຺ຎມຎ຺ຎນ຺ຕິ ລກ຺ຂເຍ.

‘‘ຄຈ຺ຉໍ ຈຣໍ ທທໍ ຕິຏ຺ຐໍ, ຈິນ຺ຕຍໍ ຠາວຍໍ ວທໍ;

ຊານໍ ປສ຺ສ’’ນ຺ຕິອາທີນິ, ສທິສານິ ຠວນ຺ຕິ ຫິ.

ຕຕ຺ຣ ‘‘ຊານ’’ນ຺ຕິອາທີນິ, ກຕ຺ຖຈິ ປຣິວຕ຺ຕເຣ;

ວິຠຕ຺ຕິລິງ຺ຄວຈນ-ວເສນາຕິ ວິຠາວເຍ.

ຕຕ຺ຣ ຕາວ ຠວນ຺ຕສທ຺ທສ຺ສ ນາມິກປທມາລາ ວຸຈ຺ຈຕິ – ຠວໍສທ຺ໂທ ຫິ ‘‘ວຑ຺ຒນ຺ໂຕ, ໂຫນ຺ໂຕ’’ຕິ ອຕ຺ເຖປິ ວທຕິ. ເຕສໍ ວເສນ ອຍໍ ນາມິກປທມາລາ.

ຠວໍ, ຠວນ຺ໂຕ, ຠວນ຺ຕາ. ຠວນ຺ຕໍ, ຠວນ຺ເຕ. ຠວນ຺ເຕນ, ຠວນ຺ເຕຫິ, ຠວນ຺ເຕຠິ. ຠວນ຺ຕສ຺ສ, ຠວນ຺ຕານໍ. ຠວນ຺ຕາ, ຠວນ຺ຕສ຺ມາ, ຠວນ຺ຕມ຺ຫາ, ຠວນ຺ເຕຫິ, ຠວນ຺ເຕຠິ. ຠວນ຺ຕສ຺ສ, ຠວນ຺ຕານໍ. ຠວນ຺ເຕ, ຠວນ຺ຕສ຺ມິໍ, ຠວນ຺ຕມ຺ຫິ, ຠວນ຺ເຕສຸ. ເຫ ຠວນ຺ຕ, ເຫ ຠວນ຺ຕາ.

ຕຕ຺ຖ ‘‘ຠວໍ, ຠວນ຺ໂຕ’’ຕິອາທີນໍ ‘‘ວຑ຺ຒນ຺ໂຕໂຫນ຺ໂຕ’’ຕິອາທິນາ ອຕ຺ໂຖ ທຏ຺ຐພ຺ໂພ. ຕຖາ ຫິ ‘‘ສຸວິຊາໂນ ຠວໍ ໂຫຕິ. ຘມ຺ມກາໂມ ຠວໍ ໂຫຕິ. ຣາຊາ ຠວນ຺ໂຕ ນານາສມ຺ປຕ຺ຕີຫິ ໂມທຕິ. ກຸຬີຣທໂຫ ຄງ຺ຄາຍ ເອກາພທ຺ໂຘ, ຄງ຺ຄາຍ ປູຣຓກາເລ ຄງ຺ໂຄທເກນ ປູຣຕິ, ອຸທເກ ມນ຺ທີ ຠວນ຺ເຕ ທຫໂຕ ອຸທກໍ ຄງ຺ຄາຍ ໂອຕຣຕີ’’ຕິ ປໂຍຄາ ຠວນ຺ຕິ, ຕສ຺ມາ ອຍໍ ນາມິກປທມາລາ ສາຣໂຕ ປຈ຺ເຈຕພ຺ພາ. ເອຕ຺ຖ ຠວໍສທ຺ທມຕ຺ຕໍ ວຊ຺ເຊຕ຺ວາ ຄຈ຺ຉມານຈຣມານສທ຺ທາທີສຸ ວິຍ ຠວນ຺ຕສທ຺ເທ ‘‘ຠວນ຺ໂຕ, ຠວນ຺ຕາ’’ຕິ ປຸຣິສນໂຍປິ ລພ຺ຠຕິ, ນປຸໍສກລິງ຺ເຄ ວຕ຺ຕພ຺ເພ ‘‘ຠວນ຺ຕໍ, ຠວນ຺ຕານີ’’ຕິ ຈິຕ຺ຕນໂຍປິ ລພ຺ຠຕິ. ເອວໍ ວຑ຺ຒນຠວນຕ຺ຖວາຈກສ຺ສ ຠວນ຺ຕສທ຺ທສ຺ສ ນາມິກປທມາລາ ເວທິຕພ຺ພາ.

ອຍຎ຺ຈ ວິເສໂສ ‘‘ຠວນ຺ໂຕ’’ຕິ ປທໍ ວຑ຺ຒນຠວນຕ຺ຖໂຕ ອຎ຺ຎຕ຺ເຖ ວຕ຺ຕມານໍ ພຫຸວຈນເມວ ໂຫຕິ, ຍຖາ ‘‘ຠວນ຺ໂຕ ອາຄຈ຺ຉນ຺ຕີ’’ຕິ. ວຑ຺ຒນຠວນຕ຺ເຖສຸ ວຕ຺ຕມານໍ ເອກວຈນເມວ. ອຕ຺ຣິເມ ປໂຍຄາ ‘‘ອນຸປຸພ຺ເພນ ຠວນ຺ໂຕ ວິຎ຺ຎຸຕໍ ປາປຸຓາຕິ. ສມເຓນ ນາມ ອີທິເສສຸ ກມ຺ເມສຸ ອພ຺ຍາວເຏນ ຠວິຕພ຺ພໍ, ເອວໍ ຠວນ຺ໂຕ ຫິ ສມໂຓ ສຸສມໂຓ ອສ຺ສາ’’ຕິ. ‘‘ຠວໍ’’ ອິຕິ ປທໍ ປນ ອຸຠຍຕ຺ຖາປິ ເອກວຈນເມວ, ຕສ຺ມາ ອິທານິ ‘‘ຠວໍ ອານນ຺ໂທ. ຠວນ຺ໂຕ ອາຄຈ຺ຉນ຺ຕິ, ອປ຺ປສທ຺ທາ ຠວນ຺ໂຕ ໂຫນ຺ຕຸ, ມາ ໂຠນ຺ໂຕ ສທ຺ທມກຕ຺ຖາ’’ຕິ ເອວມາທິປໂຍຄທສ຺ສນວເສນ ໂວຫາຣວິເສເສ ປວຕ຺ຕໍ ອຎ຺ຎໍ ອຕ຺ຖໍ ປຏິຈ຺ຈ ອປຣາປິ ນາມິກປທມາລາ ວຸຈ຺ຈເຕ –

ຠວໍ, ຠວນ຺ໂຕ, ໂຠນ຺ໂຕ. ຠວນ຺ຕໍ, ຠວນ຺ເຕ. ຠວຕາ, ໂຠຕາ, ຠວນ຺ເຕນ, ຠວນ຺ເຕຫິ, ຠວນ຺ເຕຠິ. ຠວໂຕ, ໂຠໂຕ, ຠວນ຺ຕສ຺ສ, ຠວນ຺ຕານໍ, ຠວຕໍ. ຠວຕາ, ໂຠຕາ, ຠວນ຺ເຕຫິ, ຠວນ຺ເຕຠິ. ຠວໂຕ, ໂຠໂຕ, ຠວນ຺ຕສ຺ສ, ຠວນ຺ຕານໍ, ຠວຕໍ. ຠວຕິ, ຠວນ຺ເຕ, ຠວນ຺ຕສ຺ມິໍ, ຠວນ຺ຕມ຺ຫິ, ຠວນ຺ເຕສຸ. ໂຠ, ຠວນ຺ໂຕ, ໂຠນ຺ໂຕ ອິຕິ.

ເອຕ຺ຖ ປນ ‘‘ໂຠ’’ອິຈ຺ຈາທີນິ ຕີຓິ ປທານິ ຍສ຺ມາ ໂວຫາຣວິເສສປວຕ຺ຕານິ ອາລປນປທານິ ໂຫນ຺ຕິ, ຕສ຺ມາ ‘‘ອາວຸໂສ, ຠນ຺ເຕ’’ຕິ ປທານິ ວິຍ ໂຠສທ຺ທາທິອຸປປທວນ຺ຕານິ ນ ຠວນ຺ຕິ, ‘‘ໂຠ ປຸຣິສ, ຠວນ຺ໂຕ ພ຺ຣາຫ຺ມຓາ, ໂຠນ຺ໂຕ ສມຓາ, ໂຠ ຣາຊ’’ອິຈ຺ຈາທີສຸ ຫິ ປຸຣິສສທ຺ທາທໂຍເຍວ ໂຠສທ຺ທາທິ ອຸປປທວນ຺ໂຕ ຠວນ຺ຕິ. ອິຘ ຈ ‘‘ຠວໍ ອານນ຺ໂທ’’ຕິ ເອຕ຺ຖ ຠວໍສທ຺ເທນ ສມານຕ຺ຖານິ ‘‘ໂຠ, ຠວນ຺ໂຕ, ໂຠນ຺ໂຕ’’ຕິ ປທານິ ວຸຕ຺ຕານິ, ນ ປນ ‘‘ຘມ຺ມກາໂມ ຠວໍ ໂຫຕີ’’ຕິ ເອຕ຺ຖ ຠວໍສທ຺ເທນ ສມານຕ຺ຖານິ. ປຐມສ຺ມິຎ຺ຫິ ນເຍ ວຑ຺ຒນຕ຺ຖວເສນ ‘‘ໂຠ ຠວນ຺ຕ, ຠວນ຺ໂຕ ຠວນ຺ຕາ, ໂຠນ຺ໂຕ ຠວນ຺ຕາ’’ຕິ ໂຠສທ຺ທາທໂຍ ອາລປນປທານໍ ອຸປປທານິ ຠວນ຺ຕິ, ນ ທຸຕິຍສ຺ມິໍ ນເຍ. ອາເມຑິຕວເສນ ປນ ‘‘ໂຠ ໂຠ, ຠວນ຺ໂຕ ຠວນ຺ໂຕ, ໂຠນ຺ໂຕ ໂຠນ຺ໂຕ’’ຕິ ປທານິ ຠວນ຺ຕິ ຍຖາ ‘‘ຠນ຺ເຕ ຠນ຺ເຕ’’ຕິ.

ອຕ຺ຣິທໍ ຠູຘາຕຸວເສນ ສງ຺ເຂປໂຕ ປາຬິນິທສ຺ສນໍ – ກສ຺ມາ ຠວໍ ວິຊ຺ຊນມຣຎ຺ຎນິສ຺ສິໂຕ. ກຖໍ ປນາຫໍ ໂຠ ຕໍ ຠວນ຺ຕໍ ໂຄຕມໍ ຊານິສ຺ສາມິ. ເອວໍ ໂຠຕິ ໂຂ ອມ຺ພຏ຺ໂຐ ມາຓໂວ ພ຺ຣາຫ຺ມຓສ຺ສ ໂປກ຺ຂຣສາຕິສ຺ສ ປຏິສ຺ສຸຕ຺ວາ. ມາ ຠວນ຺ໂຕ ເອວໍ ອວຈຸຕ຺ຖ. ອິມໍ ໂຠນ຺ໂຕ ນິສາເມຖ. ເອວໍ ໂຠ ປຸຣິສ ຊານາຫິ, ປາປຘມ຺ມາ ອສຎ຺ຎຕາ ອິຈ຺ເຈວມາທິ. ເອຕ຺ຖ ‘‘ຠວໍ’’ອິຈ຺ຈາທີນິ ຠູຘາຕຸມຍານິ ນາມປທານີຕິ ເວທິຕພ຺ພານິ.

ອປິຈ ເຕສຸ ‘‘ໂຠ, ຠວນ຺ໂຕ, ໂຠນ຺ໂຕ’’ຕິ ອິມານິ ນິປາຕປທານິປິ ໂຫນ຺ຕີຕິ ວວຕ຺ຖເປຕພ຺ພໍ. ‘‘ໂຠ ປຸຣິສາ’’ຕິອາທີສຸ ເຕສໍ ນິປາຕານິປາຕຠາເວ ວິວາໂທ ນ ກຣຓີໂຍ. ກຈ຺ຈາຍນສ຺ມິຎ຺ຫິ ‘‘ໂຠ ເຄ ຕູ’’ຕິ ວຸຕ຺ຕໍ. ອຎ຺ຎຕ຺ຖ ປນ ‘‘ອາມນ຺ຕນຕ຺ເຖ ນິປາໂຕ’’ຕິອາທິ ວຸຕ຺ຕໍ. ຕຖາ ຫິ ນິຣຸຕ຺ຕິມຎ຺ຊູສາຍໍ ວຸຕ຺ຕໍ ‘‘ໂຠຕິທໍ ອາມນ຺ຕນຕ຺ເຖ ນິປາໂຕ. ໂສ ນ ເກວລໍ ເອກວຈນເມວ ໂຫຕິ, ອຖ ໂຂ ພຫຸວຈນມ຺ປິ ໂຫຕີຕິ ‘ໂຠ ປຸຣິສາ’ຕິ ພຫຸວຈນປ຺ປໂຍໂຄປິ ຄຫິໂຕ. ‘ຠວນ຺ໂຕ’ຕິ ປທໍ ປນ ພຫຸວຈນເມວ ໂຫຕີຕິ ‘ປຸຣິສາ’ຕິ ປຸນ ວຸຕ຺ຕ’’ນ຺ຕິ. ປາຬິຍຎ຺ຫິ ອຏ຺ຐກຖາສຸ ຈ ນິປາຕຠູໂຕ ໂຠສທ຺ໂທ ເອກວຈນພຫຸວຈນວເສນ ທ຺ວິຘາ ທິສ຺ສຕິ, ອິຕເຣ ປນ ພຫຸວຈນວເສເນວ ທິສ຺ສນ຺ຕິ. ເຕສໍ ຕຸ ນິປາຕປທຕ຺ເຕ ຣູປນິປ຺ຜາທນກິຈ຺ຈໍ ນຕ຺ຖິ. ເຕສຸ ໂຠສທ຺ທສ຺ສ ນິປາຕປທຕ຺ຕາ ອາຫຈ຺ຈຠາສິເຕ ນິຊ຺ຊີວາລປເນ ອິຕ຺ຖິລິງ຺ຄວິສໂຍ ‘‘ອຸມ຺ມຸຊ຺ຊ ໂຠ ປຸຖຸສິເລ, ປຣິປ຺ລວ ໂຠ ປຸຖຸສິເລ’’ຕິ ປໂຍໂຄປິ ທິສ຺ສຕິ. ອຕ຺ຣິມາ ໂຠສທ຺ທສ຺ສ ປວຕ຺ຕິປຣິທີປນີ ຄາຖາໂຍ –

‘‘ອິໂຕ ໂຠ ສຸຄຕິໍ ຄຈ຺ຉ, ມນຸສ຺ສານໍ ສຫພ຺ຍຕໍ’’;

ເອວມາທີສຸ ໂຠສທ຺ໂທ, ເອກວຈນໂກ ມໂຕ.

‘‘ປສ຺ສຖ ໂຠ ອິມໍ ກຸລ-ປຸຕ຺ຕ’’ມິຈ຺ເຈວມາທິສຸ;

ພຫຸວຈນໂກ ເອໂສ, ໂຠສທ຺ໂທຕິ ວິຠາວເຍ.

ປຸຄ຺ຄລາລປເນ ເຈວ, ຘມ຺ມສ຺ສາລປເນປິ ຈ;

ນິຊ຺ຊີວາລປເນ ຈາຕິ, ໂຠສທ຺ໂທ ຕີສຸ ທິສ຺ສຕິ.

ຕຕ຺ຣ ຘມ຺ມາລປນມ຺ຫິ, ເອກວໂຈວ ລພ຺ຠຕິ;

ອິຕເຣສຸ ສິຍາ ເທກ-ວໂຈ ພຫຸວໂຈປິ ຈ.

ນິຈ຺ຉິຕພ຺ພໍ ຄຸຓີປທໍ, ຘມ຺ມສ຺ສາລປເນ ຘຸວໍ;

‘‘ອຈ຺ຉຣິຍໍ ວຕ ໂຠ’’ຕິ, ອິທເມຕ຺ຖ ນິທສ຺ສນໍ.

ອິຈ຺ຉິຕພ຺ພໍ ຄຸຓີປທໍ, ປຸຄ຺ຄລາລປເນ ປນ;

‘‘ເອວໍ ໂຠ ປຸຣິສ ຊານາຫິ’’, ອິທເມຕ຺ຖ ນິທສ຺ສນໍ.

ຄຸຓີປທໍ ອສນ຺ຕມ຺ປິ, ປຸຄ຺ຄລາລປນມ຺ຫິ ຕຸ;

ອຊ຺ຌາຫຣິຕ຺ວາ ປາວເທ, ອຕ຺ຖໍ ‘‘ໂຠ ເອຫິ’’ອາທິສຸ.

ຆຏາທີນໍ ອາລປນໍ, ນິຊ຺ຊີວາລປນໍ ຠເວ;

ຊີວໍວ ໂລກິຍາ ໂລເກ, ອາລປນ຺ຕິ ກທາຈິ ຕຸ.

ນິຊ຺ຊີວາລປນໍ ອປ຺ປໍ, ອຕ຺ຖວິຎ຺ຎາປເນ ສິຍາ;

‘‘ອຸມ຺ມຸຊ຺ຊ ໂຠ ປຸຖຸສິເລ’’, ອິຕິ ປາຬິ ນິທສ຺ສນໍ.

ເອຕ຺ຖ ລິງ຺ຄວິປລ຺ລາສໍ, ເກຈິ ອິຈ຺ຉນ຺ຕິ ປຓ຺ຑິຕາ;

ເຕສໍ ມເຕນ ໂຠຕີຕິ, ລິງ຺ຄໍ ວິປຣິຓາມເຍ.

ອຖ ວາ ປນ ໂຠສທ຺ໂທ, ນິປາໂຕ ໂສປທໍ ວິຍ;

ຕສ຺ມາ ວິໂຣຘຕາ ນາສ຺ສ, ຕິລິງ຺ເຄ ວຈນທ຺ວເຍ.

ເອວໍ ສນ຺ເຕປິ ໂຠສທ຺ໂທ, ທ຺ວິລິງ຺ເຄເຍວ ປາຍໂຕ;

ຍສ຺ມາ ທິຏ຺ໂຐ ຕໂຕ ວິຎ຺ຎູ, ທ຺ວິລິງ຺ເຄເຍວ ຕໍ ວເທ.

ອິຕ຺ຖິລິງ຺ຄມ຺ຫິ ສມ຺ປຕ຺ເຕ, ‘‘ໂຠ’’ຕິ ອິຕິ ປໂຍຊເຍ;

ເອວໍວິຘໍ ປໂຍຄຎ຺ຫິ, ສຸປ຺ປໂຍຄໍ ພຸຘາພ຺ຣວຸໍ.

ຍຊ຺ເຊວໍ ທຸປ຺ປໂຍຄໍວ, ສິຍາ ຕຸມ຺ເຫຫິ ທສ຺ສິຕໍ;

‘‘ອຸມ຺ມຸຊ຺ຊ ໂຠ ປຸຖຸສິເລ’’, ອິຈ຺ຈາຫຈ຺ຈປທນ຺ຕິ ເຈ.

ທຸປ຺ປໂຍຄໍ ນ ຕໍ ຍສ຺ມາ, ໂວຫາຣກຸສເລນ ເວ;

ຊິເນນ ຠາສິເຕ ຘມ຺ເມ, ທຸປ຺ປໂຍຄາ ນ ວິຊ຺ຊເຣ.

ອິຕ຺ຖິລິງ຺ຄສ຺ສ ວິສເຍ, ໂຠຕິສທ຺ທປ຺ປໂຍຊນໍ;

ກວີນໍ ເປມນີຍນ຺ຕິ, ມຍາ ເອວມຸທີຣິຕໍ.

ເອວໍ ຠວນ຺ຕສທ຺ທສ຺ສ ນາມິກປທມາລາ ປາຬິນຍານຸຣູປໍ ທ຺ວິຘາ ວິຠຕ຺ຕາ ວຑ຺ຒນຠວນຕ຺ຖຕທຎ຺ຎຕ຺ຖວເສນ.

ກໂຣນ຺ຕສທ຺ທສ຺ສ ປນ –

ກຣໍ, ກໂຣນ຺ໂຕ, ກໂຣນ຺ຕາ. ກໂຣນ຺ຕໍ, ກໂຣນ຺ເຕ. ກໂຣຕາ, ກໂຣນ຺ເຕນ, ກໂຣນ຺ເຕຫິ, ກໂຣນ຺ເຕຠິ. ກໂຣໂຕ, ກໂຣນ຺ຕສ຺ສ, ກໂຣນ຺ຕານໍ, ກໂຣຕໍ. ກໂຣຕາ, ກໂຣນ຺ຕາ, ກໂຣນ຺ຕສ຺ມາ, ກໂຣນ຺ຕມ຺ຫາ, ກໂຣນ຺ເຕຫິ, ກໂຣນ຺ເຕຠິ. ກໂຣໂຕ, ກໂຣນ຺ຕສ຺ສ, ກໂຣນ຺ຕານໍ, ກໂຣຕໍ. ກໂຣນ຺ເຕ, ກໂຣນ຺ຕສ຺ມິໍ, ກໂຣນ຺ຕມ຺ຫິ, ກໂຣນ຺ເຕສຸ. ໂຠ ກໂຣນ຺ຕ, ຠວນ຺ໂຕ ກໂຣນ຺ຕາຕິ ຣູປານິ ຠວນ຺ຕິ.

‘‘ກໂຣໂຕ ນ ກຣິຍຕິ ປາປ’’ນ຺ຕິ ອິທເມຕ຺ຖ ກໂຣໂຕສທ຺ທສ຺ສ ອຕ຺ຖິຕານິທສ຺ສນໍ. ອິຕ຺ຖິລິງ຺ເຄ ວຕ຺ຕພ຺ເພ ‘‘ກໂຣນ຺ຕີ, ກໂຣນ຺ຕິໂຍ’’ຕິອາທິນາ ໂຍເຊຕພ຺ພານິ, ນປຸໍສກລິງ຺ເຄ ວຕ຺ຕພ຺ເພ ‘‘ກໂຣນ຺ຕໍ, ກໂຣນ຺ຕານີ’’ຕິອາທິນາ ໂຍເຊຕພ຺ພານິ.

ອຣຫນ຺ຕສທ຺ທສ຺ສ –

ອຣຫໍ, ອຣຫນ຺ໂຕ. ອຣຫນ຺ຕໍ, ອຣຫນ຺ເຕ. ອຣຫຕາ, ອຣຫນ຺ເຕນ, ອຣຫນ຺ເຕຫິ, ອຣຫນ຺ເຕຠິ. ອຣຫໂຕ, ອຣຫນ຺ຕສ຺ສ, ອຣຫນ຺ຕານໍ, ອຣຫຕໍ. ອຣຫຕາ, ອຣຫນ຺ຕາ, ອຣຫນ຺ຕສ຺ມາ, ອຣຫນ຺ຕມ຺ຫາ, ອຣຫນ຺ເຕຫິ, ອຣຫນ຺ເຕຠິ. ອຣຫໂຕ, ອຣຫນ຺ຕສ຺ສ, ອຣຫນ຺ຕານໍ, ອຣຫຕໍ. ອຣຫນ຺ເຕ, ອຣຫນ຺ຕສ຺ມິໍ, ອຣຫນ຺ຕມ຺ຫິ, ອຣຫນ຺ເຕສຸ. ໂຠ ອຣຫນ຺ຕ, ຠວນ຺ໂຕ ອຣຫນ຺ໂຕ ອິຕິ ຣູປານິ ຠວນ຺ຕິ.

ອຍໍ ຄຸຓວາຈກສ຺ສ ອຣຫນ຺ຕສທ຺ທສ຺ສ ນາມິກປທມາລາ. ‘‘ອຣຫາ, ອຣຫນ຺ໂຕ, ອຣຫນ຺ຕາ’’ອິຕິ ຈ. ເອຕຎ຺ຫິ ຣູປໍ ສມນ຺ຕປາສາທິກາຍໍ ມນຸສ຺ສວິຄ຺ຄຫຏ຺ຐາເນ ທິສ຺ສຕິ. ອຸຕ຺ຕຣິມນຸສ຺ສຘມ຺ມປາຬິຍໍ ປນ ‘‘ມຍຎ຺ຈມ຺ຫາ ອນຣຫນ຺ໂຕ’’ຕິ ປທໍ ທິສ຺ສຕິ. ອຣຫນ຺ຕໍ, ອຣຫນ຺ເຕ. ອຣຫຕາ, ເສສໍ ວິຕ຺ຖາເຣຕພ຺ພໍ. ອຍໍ ປຓ຺ຓຕ຺ຕິວາຈກສ຺ສ ອຣຫນ຺ຕສທ຺ທສ຺ສ ນາມິກປທມາລາ.

ຕຖາ ຫິ ‘‘ອຣຫໍ ສມ຺ມາສມ຺ພຸທ຺ໂຘ. ອຣຫໍ ສຸຄໂຕ ໂລເກ. ອຣຫນ຺ໂຕ ສມ຺ມາສມ຺ພຸທ຺ຘາ’’ຕິອາທີສຸ ອຣຫໍສທ຺ທາທໂຍ ຄຸຓວາຈກາ. ‘‘ອຣຫາ ອໂຫສິ. ອຫຎ຺ຫິ ອຣຫາ ໂລເກ. ເອໂກ ອຣຫາ, ເອກສຏ຺ຐິ ອຣຫນ຺ໂຕ ໂລເກ ອເຫສຸໍ.

ຄາເມ ວາ ຍທິ ວາຣຎ຺ເຎ, ນິນ຺ເນ ວາ ຍທິ ວາ ຖເລ;

ຍຕ຺ຖ ອຣຫນ຺ໂຕ ວິຫຣນ຺ຕິ, ຕໍ ຠູມິຣາມເຓຍ຺ຍກໍ.

ມຍຎ຺ຈມ຺ຫາ ອນຣຫນ຺ໂຕ’’ຕິອາທີສຸ ອຣຫາສທ຺ທາທໂຍ ປຓ຺ຓຕ຺ຕິວາຈກາຕິ ທຏ຺ຐພ຺ພາ. ອິຘ ອິຕ຺ຖິນປຸໍສກລິງ຺ຄວເສນ ວິສຸໍ ວຕ຺ຕພ຺ພນໂຍ ອປ຺ປສິທ຺ໂຘ. ຍທິ ເອວໍ ອາສວກ຺ຂຍໍ ປຕ຺ຕາ ອິຕ຺ຖີ ກຖໍ ວຕ຺ຕພ຺ພາ, ອາສວກ຺ຂຍໍ ປຕ຺ຕໍ ຈິຕ຺ຕໍ ກຖໍ ວຕ຺ຕພ຺ພນ຺ຕິ? ອິຕ຺ຖີ ຕາວ ‘‘ຍໍ ອິຕ຺ຖີ ອຣຫໍ ອສ຺ສ ສມ຺ມາສມ຺ພຸທ຺ໂຘ’’ຕິ ວຈນໂຕ ‘‘ອຣຫ’’ນ຺ຕິ ວຕ຺ຕພ຺ພາ ຄຸຓວເສນ, ປຓ຺ຓຕ຺ຕິວເສນ ປນ ‘‘ອິຕ຺ຖີ ອຣຫາ ອໂຫສີ’’ຕິ ວຕ຺ຕພ຺ພາ. ຈິຕ຺ຕໍ ປນ ຄຸຓວເສເນວ ‘‘ອຣຫໍ ຈິຕ຺ຕ’’ນ຺ຕິ ວຕ຺ຕພ຺ພນ຺ຕິ.

ສນ຺ຕສທ຺ທສ຺ສ –

ສໍ, ສນ຺ໂຕ, ສນ຺ໂຕ, ສນ຺ຕາ. ສໍ, ສນ຺ຕໍ, ສນ຺ເຕ. ສຕາ, ສນ຺ເຕນ, ສນ຺ເຕຫິ, ສນ຺ເຕຠິ, ສພ຺ຠິ. ສໂຕ, ສນ຺ຕສ຺ສ, ສນ຺ຕານໍ, ສຕໍ, ສຕານໍ. ສຕາ, ສນ຺ຕາ, ສນ຺ຕສ຺ມາ, ສນ຺ຕມ຺ຫາ, ສນ຺ເຕຫິ, ສນ຺ເຕຠິ, ສພ຺ຠິ. ສໂຕ, ສນ຺ຕສ຺ສ, ສນ຺ຕານໍ, ສຕໍ, ສຕານໍ. ສຕິ, ສນ຺ເຕ, ສນ຺ຕສ຺ມິໍ, ສນ຺ຕມ຺ຫິ, ສນ຺ເຕສຸ. ໂຠ ສນ຺ຕ, ຠວນ຺ໂຕ ສນ຺ໂຕຕິ ຣູປານິ ຠວນ຺ຕິ.

ເອຕ຺ຖ ປນ ‘‘ອທ຺ຘາ ຫິ ຕາຕ ສຕເນສ ຘມ຺ໂມ’’ຕິ ຊຍທ຺ທິສຊາຕກປາຬິທສ຺ສນໂຕ ‘‘ສຕານ’’ນ຺ຕິ ວຸຕ຺ຕໍ. ຕຕ຺ຖ ຫິ ສຕເນສາຕິ ສຕານໍ ເອສາຕິ ເຉໂທ, ຣສ຺ສຕ຺ຕນິຄ຺ຄຫີຕສຣໂລປວເສນ ຈ ຣູປນິຏ຺ຐານໍ ເວທິຕພ຺ພໍ. ຕຖາ ຫິ ຕທຏ຺ຐກຖາຍໍ ‘‘ອທ຺ຘາ ເອກໍເສນ ເອສ ຕາຕ ສຕານໍ ປຓ຺ຑິຕານໍ ຘມ຺ໂມ ສຠາໂວ’’ຕິ ອຕ຺ໂຖ ວຸຕ຺ໂຕ. ອຍໍ ເຍ ໂລເກ ‘‘ສປ຺ປຸຣິສາ’’ຕິ ຈ ‘‘ອຣິຍາ’’ຕິ ຈ ‘‘ປຓ຺ຑິຕາ’’ຕິ ຈ ວຸຈ຺ຈນ຺ຕິ, ເຕສໍ ວາຈກສ຺ສ ສນ຺ຕສທ຺ທສ຺ສ ນາມິກປທມາລາ. ຕປ຺ປຏິເສຘສ຺ສ ປນ ອສໍ, ອສນ຺ໂຕ, ກຕ຺ຖຈິ ອສນ຺ຕາ ອິຈ຺ຈປິ. ຕຖາ ຫິ ‘‘ອສນ຺ຕາ ກິຣ ມໍ ຊມ຺ມາ, ຕາຕ ຕາຕາຕິ ຠາສເຣ’’ຕິ ປາຬິ ທິສ຺ສຕິ. ‘‘ອສໍ, ອສນ຺ຕໍ, ອສນ຺ເຕ. ອສຕາ’’ຕິອາທິນາ ໂຍເຊຕພ຺ພາ. ອິມສ຺ມິໍ ອຕ຺ເຖ ‘‘ສນ຺ໂຕ, ອສນ຺ໂຕ’’ຕິມານິ ພຫຸວຈນການິເຍວ ຠວນ຺ຕິ, ນ ກຕ຺ຖຈິປິ ເອກວຈນການິ. ກສ຺ມາ? ປຓ຺ຓຕ຺ຕິວາຈກຕ຺ຕາ. ອຎ຺ຎຕ຺ຣ ປນ ‘‘ສນ຺ໂຕ, ທນ຺ໂຕ’’ຕິອາທີສຸ ເອກວຈນານິເຍວ ຐເປຕ຺ວາ ວິຊ຺ຊມານຕ຺ຖວາຈກສນ຺ໂຕສທ຺ທໍ, ກສ຺ມາ? ອປຓ຺ຓຕ຺ຕິວາຈກຕ຺ຕາຕິ ທຏ຺ຐພ຺ພໍ.

ອິທານິ ປຓ຺ຓຕ຺ຕິວາຈການໍ ເຕສໍ ການິຈິ ປໂຍຄານິ ກຖຍາມ –

ສເມຕິ ອສຕາ ອສໍ. ຍໍ ຍຎ຺ຫິ ຣາຊ ຠຊຕິ, ສນ຺ຕໍ ວາ ຍທິ ວາ ອສໍ. ນ ສາ ສຠາ ຍຕ຺ຖ ນ ສນ຺ຕິ ສນ຺ໂຕ. ອສນ຺ໂຕ ນິຣຍໍ ຍນ຺ຕິ, ສນ຺ໂຕ ສຄ຺ຄປຣາຍຓາ. ອສນ຺ເຕ ໂນປເສເວຍ຺ຍ, ສນ຺ເຕ ເສເວຍ຺ຍ ປຓ຺ຑິໂຕ. ສພ຺ຠິເຣວ ສມາເສຖ. ສຕໍ ຘມ຺ໂມ ອິຈ຺ເຈວມາທີນິ ຠວນ຺ຕິ.

ໂຍ ປນມ຺ເຫຫິ ປທມາລາຍໍ ‘‘ສພ຺ຠີ’’ຕິ ອຍໍ ສທ຺ໂທ ຕຕິຍາປຎ຺ຈມີພຫຸວຈນວເສນ ໂຍຊິໂຕ, ໂສ ຈ ໂຂ ສນ຺ຕອິຕິ ອກາຣນ຺ຕປກຕິວເສນ, ອຎ຺ຎຕ຺ຖ ປນ ‘‘ສພ຺ຠີ’’ຕິ ອິກາຣນ຺ຕປກຕິວເສນ ໂຍເຊຕພ຺ໂພ. ຕຖາ ຫິ ສພ຺ຠີຕິ ສປ຺ປຸຣິໂສ ນິພ຺ພານຎ຺ຈ, ສຸນ຺ທຣາຘິວຈນໍ ວາ ເອຕໍ ສພ຺ຠີຕິ. ສພ຺ໂພ ຈາຍມຕ຺ໂຖ ສາຏ຺ຐກຖາຍ ‘‘ພຫຸມ຺ເປຕໍ ອສພ຺ຠິ ຊາຕເວທາ’’ຕິ ອິມາຍ ປາຬິຍາ ‘‘ສນ຺ໂຕ ຫເວ ສພ຺ຠິ ປເວທຍນ຺ຕີ’’ຕິ ອິມາຍ ຈ ທີເປຕພ຺ໂພ.

ອາລປເນ ຈ ປຈ຺ຈຕ຺ເຕ, ຕຕິຍາປຎ຺ຈມີສຸ ຈ;

ສມາສມ຺ຫິ ຈ ໂຍເຊຍ຺ຍ, ສພ຺ຠິສທ຺ທໍ ສຸເມຘໂສ.

ອຕ຺ຣາຍໍ ໂຍຊນາ – ໂຠ ສພ຺ຠິ ຕິຏ຺ຐ, ສພ຺ຠິ ຕິຏ຺ຐຕິ, ສພ຺ຠິ ສຫ ຄຈ຺ຉຕິ, ສພ຺ຠິ ອເປຫິ, ອສພ຺ຠິຣູໂປ ປຸຣິໂສ. ຍສ຺ມາ ປນາຍໍ ສາສນານຸກູລາ, ຕສ຺ມາ ອິມິສ຺ສາ ຕທນຸກູລຕ຺ຕໍ ທສ຺ເສຕຸໍ ອິຘ ສາສນໂຕ ປໂຍເຄ ທສ຺ເສສ຺ສາມ ອຕກ຺ກາວຈເຣ ວິຈິຕ຺ເຕ ສຸຄຕປາຬິນເຍ ໂສຕູນໍ ວິສາຣທມຕິປຏິລາຠຕ຺ຖໍ. ຕໍ ຍຖາ? ພຫຸມ຺ເປຕໍ ອສພ຺ຠິ ຊາຕເວທ, ຍໍ ຕໍ ວາລຘິນາ’ຠິປູຊຍາມ. ສພ຺ຠິ ກຸພ຺ເພຖ ສນ຺ຖວໍ. ຍໍ ສາລວນສ຺ມິໍ ເສນໂກ, ປາປກມ຺ມມກຣິ ອສພ຺ຠິຣູປໍ. ອາພາໂຘຍໍ ອສພ຺ຠິຣູໂປ. ອສມ຺ໂມທໂກ ຖທ຺ໂຘ ອສພ຺ຠິຣູໂປ’’ຕິ. ຕຕ຺ຖ ອາລປນວຈເນ ທິຏ຺ເຐເຍວ ປຈ຺ຈຕ຺ຕວຈນໍ ປາຬິຍໍ ສຣູປໂຕ ອນາຄຕມ຺ປິ ທິຏ຺ຐເມວ ໂຫຕິ. ຕຖາ ກຣຓວຈເນ ທິຏ຺ເຐເຍວ ນິສ຺ສກ຺ກວຈນມ຺ປິ ທິຏ຺ຐເມວ ໂຫຕິ. ສມາເສ ສທ຺ທຣູເປ ທິຏ຺ເຐເຍວ ພ຺ຍາເສ ສທ຺ທຣູປໍ ຍຖາສມ຺ຠວໍ ທິຏ຺ຐເມວ ໂຫຕິ ຐເປຕ຺ວາ ‘‘ເຫຕຸສຕ຺ຖາຣທສ຺ສນ’’ນ຺ຕິອາທີນິ. ຕຕ຺ຖ ຈ ນິພ຺ພານວາຈໂກ ເຈ, ສພ຺ຠິສທ຺ໂທ ອິຕ຺ຖິລິງ຺ໂຄ ສນ຺ຕິວິສຸທ຺ຘິ ນິພ຺ພຸຕິສທ຺ທາ ວິຍ, ໂສ ຈ ຍມກມຫາເຖຣມເຕ ຣຕ຺ຕິນເຍນ ໂຍເຊຕພ຺ໂພ. ສພ຺ເພສມິກາຣນ຺ຕິຕ຺ຖິລິງ຺ຄານໍ ສາຘາຣໂຓ ຫິ ໂສ ນໂຍ. ສຸນ຺ທຣຕ຺ຖວາຈໂກ ເຈ, ອຄ຺ຄິ ຣຕ຺ຕິ ອຏ຺ຐິນເຍຫິ ໂຍເຊຕພ຺ໂພ ວາຈ຺ຈລິງ຺ຄຕ຺ຕາ. ‘‘ສພ຺ຠິຘມ຺ມຠູຕໍ ນິພ຺ພານ’’ນ຺ຕິ ເອຕ຺ຖ ຫິ ສຸນ຺ທຣຘມ຺ມຠູຕໍ ນິພ຺ພານນ຺ຕິ ອຕ຺ໂຖ. ເອວໍ ປາຬິນຍວເສນ ອາລປນາທີສຸ ປຎ຺ຈສຸ ຐາເນສຸ ສພ຺ຠິສທ຺ທສ຺ສ ປວຕ຺ຕິໍ ຎຕ຺ວາ ປຸນ ອຏ຺ຐກຖານຍວເສນປິ ຕປ຺ປວຕ຺ຕິ ເວທິຕພ຺ພາ. ກຖໍ? ຍສ຺ມາ ສຄາຖາວຄ຺ຄສ຺ສ ອຏ຺ຐກຖາຍໍ ‘‘ສນ຺ໂຕ ‘ສພ຺ຠີຫິ ສທ຺ຘິໍ ສຕໍ ຘມ຺ໂມ ນ ຊຣໍ ອຸເປຕີ’ຕິ ປເວທຍນ຺ຕີ’’ຕິ ອິມສ຺ມິໍ ປເທເສ ‘‘ສພ຺ຠີຫີ’’ຕິ ຫິວຈນວເສນ ສທ຺ທຣຈນາວິເສໂສ ອຏ຺ຐກຖາຈຣິເຍຫິ ທສ຺ສິໂຕ, ຕສ຺ມາ ສພ຺ຠິສທ຺ໂທ ສພ຺ເພສຸປິ ວິຠຕ຺ຕິວຈເນສຸ ໂຍເຊຕພ຺ໂພ. ອຕ຺ຣິທໍ ວທາມ –

ຄຣູ ‘‘ສພ຺ຠີຫິ ສທ຺ຘິ’’ນ຺ຕິ, ອຕ຺ຖໍ ຠາສິໍສຸ ປາຬິຍາ;

ຍໂຕ ຕໂຕ ສພ຺ຠິສທ຺ທໍ, ຘີໂຣ ສພ຺ພຕ຺ຖ ໂຍຊເຍ.

‘‘ອສພ຺ຠິຣູໂປ’’ອິຕິປິ, ສມາສວິສເຍ ສຸຕໍ;

ຍສ຺ມາ ຕສ຺ມາ ສພ຺ຠິສທ຺ທໍ, ວິຎ຺ຎູ ສພ຺ພຘິ ໂຍຊເຍ.

‘‘ໂອວເທຍ຺ຍານຸສາເສຍ຺ຍ, ອສພ຺ຠາ ຈ ນິວາຣເຍ’’ຕິ ເອຕ຺ຖ ປນ ‘‘ອສພ຺ຠາ’’ຕິປທໍ ວິຈິຕ຺ຣວຸຕ຺ຕີສຸ ຕທ຺ຘິຕປຈ຺ຈເຍສຸ ຓ຺ຍປຈ຺ຈຍວເສນ ນິປ຺ຜຕ຺ຕິມຸປາຄຕນ຺ຕິ ເວທິຕພ຺ພໍ. ກຖໍ? ເຍຠຸຍ຺ເຍນ ອສພ຺ຠີສຸ ຠວໍ ອສພ຺ຠໍ. ກິໍ ຕໍ? ອກຸສລໍ, ຕໂຕ ອສພ຺ຠາ ອກຸສລຘມ຺ມາ ນິວາຣເຍ ຈ, ກຸສລຘມ຺ເມ ປຕິຏ຺ຐເປຍ຺ຍາຕິ ອຕ຺ໂຖ. ‘‘ອມ຺ເຫ ອສພ຺ຠາຫິ ວາຈາຫິ ວິກ຺ໂກສມານາ ຕິພ຺ພາຫິ ສຕ຺ຕີຫິ ຫນິສ຺ສນ຺ຕີ’’ຕິ ເອຕ຺ຖ ຕຸ ອສພ຺ຠີນໍ ເອຕາຕິ ອສພ຺ຠາ, ນ ວາ ສພ຺ຠີນໍ ເອຕາຕິປິ ອສພ຺ຠາຕິ ນິພ຺ພຈນໍ, ຓ຺ຍປຈ຺ຈຍວເສນ ຈ ປທສິທ຺ຘິ ເວທິຕພ຺ພາ. ຍາ ຈ ປເນຕ຺ຖ ອມ຺ເຫຫິ ສນ຺ຕສທ຺ທສ຺ສ ‘‘ສໍ, ສນ຺ໂຕ. ສໍ, ສນ຺ຕໍ, ສນ຺ເຕ’’ຕິອາທິນາ ປທມາລາ ທສ຺ສິຕາ, ຕຕ຺ຖ ‘‘ສເມຕິ ອສຕາ ອສ’’ນ຺ຕິ ປາຬິຍໍ ‘‘ອສ’’ນ຺ຕິ ປເທ ທິຏ຺ເຐເຍວ ‘‘ສ’’ນ຺ຕິ ປທໍ ປາຬິຍໍ ອນາຄຕມ຺ປິ ທິຏ຺ຐເມວ ໂຫຕິ ຍຸຄຬຠາເວນ ວິຊ຺ຊມານຕາຣຫຕ຺ຕາ. ເອວໍ ທິຏ຺ເຐນ ອທິຏ຺ຐສ຺ສ ຄຫຓໍ ເວທິຕພ຺ພໍ. ອຖ ວາ ‘‘ອສ’’ນ຺ຕິ ເອຕ຺ຖ ນ ສໍ ອສນ຺ຕິ ສມາສວິຄ຺ຄຫວເສນາຘິຄນ຺ຕພ຺ພຕ຺ຕາ ‘‘ສ’’ມິຕິ ປທໍ ທິຏ຺ຐເມວ ໂຫຕິ. ເອວມຎ຺ຎຕ຺ຣາປິ ນໂຍ. ຕຕ຺ຣ ສນ຺ຕິ ສປ຺ປຸຣິໂສ. ອສນ຺ຕິ ອສປ຺ປຸຣິໂສ. ອິຕ຺ຖິລິງ຺ເຄວຕ຺ຕພ຺ເພ ‘‘ອສຕີ, ອສາ’’ຕິ ຣູປານິ ຠວນ຺ຕິ. ‘‘ອສຕີ, ອສຕີ, ອສຕິໂຍ, ອສາ. ອສຕິໍ, ອສຕີ, ອສຕິໂຍ. ອສາຍ, ອສຕິຍາ, ອສຕີຫິ, ອສຕີຠິ. ອສຕິຍາ, ອສຕີນ’’ນ຺ຕິ ວກ຺ຂມານ ອິຕ຺ຖິນເຍນ ນາມິກປທມາລາ ໂຍເຊຕພ຺ພາ.

ເອຕ຺ຖ ປນ ‘‘ອສາ ໂລກິຕ຺ຖິໂຍ ນາມ, ເວລາ ຕາສໍ ນ ວິຊ຺ຊຕິ. ມາ ຈ ວສໍ ອສຕີນໍ ນິຄຈ຺ເຉ’’ຕິອາທີນິ ທສ຺ເສຕພ຺ພານິ. ອສາຕິ ເຈຕ຺ຖ ອສຕີຕິ ຈ ສມານຕ຺ຖາ, ອສນ຺ຕຊາຕິກາຕິ ຫິ ເຕສໍ ອຕ຺ໂຖ. ຍສ຺ມາ ປນ ຊາຕກຏ຺ຐກຖາຍໍ ‘‘ອສາຕິ ອສຕິໂຍ ລາມິກາ, ອຖ ວາ ສາຕໍ ວຸຈ຺ຈຕິ ສຸຂໍ, ຕໍ ຕາສຸ ນຕ຺ຖິ, ອຕ຺ຕນິ ປຏິພທ຺ຘຈິຕ຺ຕານໍ ອສາຕເມວ ເທນ຺ຕີຕິປິ ອສາ, ທຸກ຺ຂາ, ທຸກ຺ຂວຕ຺ຖຸຠູຕາຕິ ອຕ຺ໂຖ’’ຕິ ອຕ຺ຖໍ ສໍວຓ຺ເຓສຸໍ, ຕສ຺ມາ ສາຕໍ ນຕ຺ຖິ ເອຕິສ຺ສນ຺ຕິ ອສາຕິ ອຕ຺ເຖ ‘‘ອສາ’’ຕິ ປທສ຺ສ ຍຖາ ຣິຕ຺ໂຕ ອສ຺ສາໂທ ເອຕ຺ຖາຕິ ຣິຕ຺ຕສ຺ສນ຺ຕິປທສ຺ສ ລຸຕ຺ຕຸຕ຺ຕຣກ຺ຂຣສ຺ສ ‘‘ຣິຕ຺ຕສ຺ສໍ, ຣິຕ຺ຕສ຺ສານິ. ຣິຕ຺ຕສ຺ສ’’ນ຺ຕິ ຈິຕ຺ຕນເຍນ ນາມິກປທມາລາ ໂຍເຊຕພ຺ພາ, ຕຖາ ‘‘ອສາ, ອສາ, ອສາໂຍ. ອສໍ, ອສາ, ອສາໂຍ. ອສາຍາ’’ຕິ ກຎ຺ຎານເຍນ ໂຍເຊຕພ຺ພາ.

ເອຕ຺ຖ ຈ ໂຍ ອມ຺ເຫຫິ ‘‘ສນ຺ໂຕ’’ອິຕິ ສທ຺ໂທ ທສ຺ສິໂຕ. ໂສ ກຕ຺ຖຈິ ເອກວຈນພຫຸວຈນຠາເວນ ສໍວິຊ຺ຊມານສທ຺ທສ຺ສຕ຺ຖມ຺ປິ ວທຕິ, ຕສ຺ສ ວເສນ ອຍໍ ນາມິກປທມາລາ –

ສນ຺ໂຕ, ສນ຺ໂຕ, ສນ຺ຕາ. ສນ຺ຕໍ, ສນ຺ເຕ. ສຕາ, ສນ຺ເຕນ, ສນ຺ເຕຫິ, ສນ຺ເຕຠິ. ສໂຕ, ສນ຺ຕສ຺ສ, ສຕໍ, ສນ຺ຕານໍ. ສຕາ, ສນ຺ຕາ, ສນ຺ຕສ຺ມາ, ສນ຺ຕມ຺ຫາ, ສນ຺ເຕຫິ, ສນ຺ເຕຠິ. ສໂຕ, ສນ຺ຕສ຺ສ, ສຕໍ, ສນ຺ຕານໍ. ສຕິ, ສນ຺ເຕ, ສນ຺ຕສ຺ມິໍ, ສນ຺ຕມ຺ຫິ, ສນ຺ເຕສຸ. ໂຠ ສນ຺ຕ, ຠວນ຺ໂຕ ສນ຺ໂຕ, ຠວນ຺ໂຕ ສນ຺ຕາ.

ເອຕ຺ຖ ປນ ‘‘ອຍໍ ໂຂ ຠິກ຺ຂເວ ອຏ຺ຐໂມ ຠທ຺ໂທ ອສ຺ສາຊານີໂຍ ສນ຺ໂຕ ສໍວິຊ຺ຊມາໂນ ໂລກສ຺ມິໍ. ຈຕ຺ຕາໂຣເມ ຠິກ຺ຂເວ ປຸຄ຺ຄລາ ສນ຺ໂຕ ສໍວິຊ຺ຊມານາ ໂລກສ຺ມິໍ. ອສຕາ ຕຸຈ຺ຉາ ມຸສາ ອຠູເຕນ ອພ຺ຠາຈິກ຺ຂນ຺ຕິ. ຠເວ ໂຂ ສຕິ ຊາຕິ ໂຫຕິ’’ອິຈ຺ເຈວມາທີນິ ປໂຍຄານິ ຠວນ຺ຕິ. ‘‘ສງ຺ຂາເຣສຸ ໂຂ ສຕິ ວິຎ຺ຎາຓໍ ໂຫຕີ’’ຕິອາທີສຸ ປນ ສຕິສທ຺ໂທ ວຈນວິປລ຺ລາສວເສນ ຐິໂຕຕິ ຄເຫຕພ຺ໂພ.

ຕຕ຺ຣ ເອກວຈນພຫຸວຈນວເສນ ທ຺ວິຘາ ຐິເຕສຸ ສນ຺ໂຕສທ຺ເທສຸ ພຫຸວຈນສນ຺ໂຕສທ຺ທໍ ຐເປຕ຺ວາ ເສສາ ສມານສທ຺ທສ຺ສຕ຺ຖມ຺ປິ ວທນ຺ຕິ, ຕສ຺ມາ ‘‘ສນ຺ໂຕຕິ ສມາໂນ, ສນ຺ຕາຕິ ສມານາ’’ຕິອາທິນາ ອຕ຺ໂຖ ກເຖຕພ຺ໂພ. ສມາໂນຕິ ອິມສ຺ສ ຈ ‘‘ໂຫນ຺ໂຕ’’ຕິ ອຕ຺ໂຖ ‘‘ປຫຸ ສມາໂນ ວິປຸລຕ຺ຖຈິນ຺ຕີ, ກິໍ ກາຣຓາ ເມ ນ ກໂຣສິ ທຸກ຺ຂ’’ນ຺ຕິອາທີສຸ ວິຍ. ປໂຍຄານິ ປນ –

‘‘ໂຍ ມາຕຣໍ ປິຕຣໍ ວາ, ຊິຓ຺ຓກໍ ຄຕໂຍພ຺ພນໍ;

ປຫຸ ສນ຺ໂຕ ນ ຠຣຕິ, ຕໍ ປຣາຠວໂຕ ມຸຂໍ.

ອິເຘວ ຕິຏ຺ຐມານສ຺ສ, ເທວຠູຕສ຺ສ ເມ ສໂຕ;

ປຸນຣາຍຸ ຈ ເມ ລທ຺ໂຘ, ເອວໍ ຊານາຫິ ມາຣິສາ’’ຕິ

ເອວມາທີນິ ຠວນ຺ຕິ.

ອປິຈ ສນ຺ໂຕສທ຺ໂທ ຍສ຺ມາ ‘‘ກິລນ຺ໂຕ’’ຕິ ຈ ‘‘ອຸປສນ຺ໂຕ’’ຕິ ຈ ‘‘ນິຣຸທ຺ໂຘ’’ຕິ ຈ ອຕ຺ຖໍ ວທຕິ, ຕສ຺ມາ ເຕສໍ ວເສນ ສນ຺ຕສທ຺ທສ຺ສ ‘‘ສນ຺ໂຕ, ສນ຺ຕາ. ສນ຺ຕໍ, ສນ຺ເຕ. ສນ຺ເຕນາ’’ຕິ ປຸຣິສນເຍນ ນາມິກປທມາລາ ເວທິຕພ຺ພາ. ເອຕ຺ຖ ຈ ‘‘ສນ຺ໂຕ ຕສິໂຕ. ທີຆໍ ສນ຺ຕສ຺ສ ໂຍຊນໍ. ສນ຺ໂຕ ທນ຺ໂຕ ນິຍໂຕ ພ຺ຣຫ຺ມຈາຣີ. ສນ຺ໂຕ ນິຣຸທ຺ໂຘ ອຕ຺ຖງ຺ຄໂຕ ອພ຺ຠຕ຺ຖງ຺ຄໂຕ’’ຕິອາທີນິ ປໂຍຄານິ. ນປຸໍສກລິງ຺ເຄ ວຕ຺ຕພ຺ເພ ‘‘ສນ຺ຕໍ, ສນ຺ຕານີ’’ຕິ ຈິຕ຺ຕນເຍນ ນາມິກປທມາລາ. ສາ ຈ ‘‘ສໍວິຊ຺ຊມານໍ ສມານໍ ກິລນ຺ຕໍ ອຸປສນ຺ຕໍ ນິຣຸທ຺ຘ’’ມິຕິ ອຕ຺ຖທີປກາປທວຕີຕິ ເວທິຕພ຺ພາ. ອຖ ວາ ‘‘ອຸປາທາເນ ໂຂ ສຕິ ຠໂວ ໂຫຕີ’’ຕິອາທີສຸ ນປຸໍສກປ຺ປໂຍຄທສ຺ສນໂຕ ສນ຺ຕສທ຺ທສ຺ສ ສໍວິຊ຺ຊມານສທ຺ທຕ຺ຖວາຈກຕ຺ເຕ ຕຕິຍາປຎ຺ຈມີຈຕຸຕ຺ຖີຉຏ຺ຐີສຕ຺ຕມີຐາເນ ‘‘ສຕາ, ສໂຕ, ສຕໍ, ສຕີ’’ຕິ ປທານິ ອຘິການິ ວຕ຺ຕພ຺ພານິ, ເສສານິ ຈິຕ຺ຕນເຍນ ເຎຍ຺ຍານິ. ອິຕ຺ຖິລິງ຺ເຄ ປນ ວຕ຺ຕພ຺ເພ ‘‘ສນ຺ຕາ, ສນ຺ຕາ, ສນ຺ຕາໂຍ. ສນ຺ຕໍ, ສນ຺ຕາ, ສນ຺ຕາໂຍ. ສນ຺ຕາຍາ’’ຕິ ກຎ຺ຎານເຍນ ຈ, ສນ຺ຕີ, ສນ຺ຕີ, ສນ຺ຕິໂຍ. ສນ຺ຕິໍ, ສນ຺ຕີ, ສນ຺ຕິໂຍ. ສນ຺ຕິຍາ’’ຕິ ອິຕ຺ຖິນເຍນ ຈ ນາມິກປທມາລາ ໂຍເຊຕພ຺ພາ. ເອຕາສຸ ປຐມາ ‘‘ສໍວິຊ຺ຊມານາ ກິລນ຺ຕາ ອຸປສນ຺ຕາ ນິຣຸທ຺ຘາ’’ຕິ ອຕ຺ຖທີປກາປທວຕີ, ເອຕ຺ຖ ປໂຍຄາ ສຸວິຎ຺ເຎຍ຺ຍາວ. ທຸຕິຍາ ປນ ‘‘ສໍວິຊ຺ຊມານາ ສມານາ’’ຕິ ອຕ຺ຖທີປກາປທວຕີ. ຕຖາ ຫິ ‘‘ສນ຺ຕີ ອາປຕ຺ຕິ ອາວິກາຕພ຺ພາ’’ຕິ ເອຕ຺ຖ ສໍວິຊ຺ຊມານາ ‘‘ສນ຺ຕີ’’ຕິ ວຸຈ຺ຈຕິ.

‘‘ຍາຍ ມາຕຸ ຠໂຕ ໂປໂສ,

ອິມໍ ໂລກໍ ອເວກ຺ຂຕິ;

ຕມ຺ປິ ປາຓທທິໍ ສນ຺ຕິໍ,

ຫນ຺ຕິ ກຸທ຺ໂຘ ປຸຖຸຊ຺ຊໂນ’’ຕິ

ເອຕ຺ຖ ປນ ສມານາ ‘‘ສນ຺ຕີ’’ຕິ ວຸຈ຺ຈຕິ. ອປຣາປິ ອິຕ຺ຖິລິງ຺ເຄ ວຕ຺ຕພ຺ເພ ປທມາລາ ເວທິຕພ຺ພາ. ສນ຺ຕີສທ຺ທສ຺ສ ຫິ ສໍວິຊ຺ຊມານສທ຺ທຕ຺ຖວາຈກຕ຺ເຕ ‘‘ຊາຕິຍາ ໂຂ ສຕິ ຊຣາມຣຓໍ ໂຫຕີ’’ຕິອາທິນາ ອິຕ຺ຖິລິງ຺ຄປ຺ປໂຍຄທສ຺ສນໂຕ ສຕ຺ຕມີຐາເນ ‘‘ສຕິ, ສຕິຍາ, ສຕິຍໍ, ສນ຺ຕິຍາ, ສນ຺ຕິຍໍ, ສນ຺ຕີສູ’’ຕິ ຣູປານິ ວຕ຺ຕພ຺ພານິ. ເສສານິ ອິຕ຺ຖິນເຍນ ເຎຍ຺ຍານິ. ອຍໍ ຕຕິຍາ, ເອຕ຺ຖ ຈ ‘‘ອສນ຺ຕິຍາ ອາປຕ຺ຕິຍາ ຕຸຓ຺ຫີ ຠວິຕພ຺ພ’’ນ຺ຕິ ປາຬິ ‘‘ສນ຺ຕິຍາ’’ອິຈ຺ຈາທີນໍ ອຕ຺ຖິຠາເວ ນິທສ຺ສນໍ. ອປໂຣ ນໂຍ – ສຕີສທ຺ທສ຺ສ ‘‘ສມານາ’’ຕິ ອິມສ຺ມິໍ ອຕ຺ເຖ ‘‘ຍາ ຕ຺ວໍ ວສສິ ຊິຓ຺ຓສ຺ສ, ເອວໍ ທຫຣິຍາ ສຕີ’’ຕິ ຈ ‘‘ເຍ ຕໍ ຊິຓ຺ຓສ຺ສ ປາທໍສຸ, ເອວໍ ທຫຣິຍໍ ສຕິ’’ນ຺ຕິ ຈ ປາຬິທສ຺ສນໂຕ ‘‘ສຕີ, ສຕີ, ສຕິໂຍ. ສຕິໍ, ສຕີ, ສຕິໂຍ. ສຕິຍາ’’ຕິອາທີນິປິ ຣູປານິ ໂຍເຊຕພ຺ພານິ, ສໍໂຍເຄ ນກາຣໂລປວເສນ ວາ.

ອິທານິ ‘‘ສນ຺ໂຕ, ສນ຺ຕາ’’ຕິ ປທທ຺ວຍສ຺ສ ປໂຍຄນິຈ຺ຉຍໍ ກຖຍາມ ປໂຍເຄສຸ ໂສຕູນໍ ອສມ຺ມູຬ຺ຫຠາວາຍ. ຕຖາ ຫິ ‘‘ສປ຺ປຸຣິສາ’’ຕິ ວາ ‘‘ປຓ຺ຑິຕາ’’ຕິ ວາ ພຫຸວຈນວເສນ ອຕ຺ຖໍ ວຕ຺ຕຸກາເມນ ‘‘ສນ຺ໂຕ ທນ຺ໂຕ’’ຕິ ເອວໍ ວຸຕ຺ຕເອກວຈນສທິສໍ ‘‘ສນ຺ໂຕ’’ຕິ ພຫຸວຈນໍ ວຕ຺ຕພ຺ພໍ. ‘‘ສໍວິຊ຺ຊມາໂນ’’ຕິ ເອກວຈນວເສນ ອຕ຺ຖໍ ວຕ຺ຕຸກາເມນ ‘‘ສນ຺ໂຕ’’ຕິ ເອກວຈນໍ ວຕ຺ຕພ຺ພໍ. ‘‘ສໍວິຊ຺ຊມານາ’’ຕິ ພຫຸວຈນວເສນ ອຕ຺ຖໍ ວຕ຺ຕຸກາເມນ ‘‘ສນ຺ໂຕ ສປ຺ປຸຣິສາ’’ຕິ, ‘‘ສນ຺ໂຕ ສໍວິຊ຺ຊມານາ’’ຕິ ຈ ເອວໍ ວຸຕ຺ຕພຫຸວຈນສທິສໍ ‘‘ສນ຺ໂຕ’’ຕິ ວາ ‘‘ສນ຺ຕາ’’ຕິ ວາ ພຫຸວຈນໍ ວຕ຺ຕພ຺ພໍ, ‘‘ກິລນ຺ໂຕ’’ຕິ ວາ ‘‘ສມາໂນ’’ຕິ ວາ ‘‘ອຸປສນ຺ໂຕ’’ຕິ ວາ ‘‘ນິຣຸທ຺ໂຘ’’ຕິ ວາ ເອກວຈນວເສນ ອຕ຺ຖໍ ວຕ຺ຕຸກາເມນ ‘‘ສນ຺ໂຕ ສປ຺ປຸຣິສາ’’ຕິ ເອວໍ ວຸຕ຺ຕພຫຸວຈນສທິສໍ ‘‘ສນ຺ໂຕ’’ຕິ ເອກວຈນໍ ວຕ຺ຕພ຺ພໍ. ເຕເຍວຕ຺ເຖ ພຫຸວຈນວເສນ ວຕ຺ຕຸກາເມນ ປນ ‘‘ສນ຺ຕາ ສູເນຫິ ປາເທຫິ, ໂກ ເນ ຫຕ຺ເຖ ຄເຫສ຺ສຕີ’’ຕິ ເອຕ຺ຖ ວິຍ ‘‘ສນ຺ຕາ’’ຕິ ພຫຸວຈນໍ ວຕ຺ຕພ຺ພໍ. ອຍໍ ນີຕິ ສາຘຸກໍ ມນສິ ກາຕພ຺ພາ. ອິທຎ຺ຫິ ມນ຺ທພຸທ຺ຘີນໍ ສມ຺ໂມຫຏ຺ຐານໍ. ອຍມ຺ປິ ປເນຕ຺ຖ ສງ຺ຄໂຫ ເວທິຕພ຺ໂພ –

‘‘ຕິລິງ຺ຄຕ຺ເຖ ຈ ເອກຕ຺ເຖ, ພວ຺ຫຕ຺ເຖປິ ຈ ທິສ຺ສຕິ;

ສຕ຺ຕມ຺ຍນ຺ໂຕ ສຕິສທ຺ໂທ, ວິປລ຺ລາເສ ພຫຸມ຺ຫິ ໂສ’’ຕິ.

ອິທານິ ມຫນ຺ຕສທ຺ທສ຺ສ ນາມິກປທມາລາ ວຸຈ຺ຈເຕ –

ມຫໍ, ມຫາ, ມຫນ຺ໂຕ, ມຫນ຺ຕາ. ມຫນ຺ຕໍ, ມຫນ຺ເຕ. ມຫຕາ, ມຫນ຺ເຕນ, ມຫນ຺ເຕຫິ, ມຫນ຺ເຕຠິ. ມຫໂຕ, ມຫນ຺ຕສ຺ສ, ມຫນ຺ຕານໍ, ມຫຕໍ. ມຫຕາ, ມຫນ຺ຕາ, ມຫນ຺ຕສ຺ມາ, ມຫນ຺ຕມ຺ຫາ, ມຫນ຺ເຕຫິ, ມຫນ຺ເຕຠິ. ມຫໂຕ, ມຫນ຺ຕສ຺ສ, ມຫນ຺ຕານໍ, ມຫຕໍ. ມຫຕິ, ມຫນ຺ເຕ, ມຫນ຺ຕສ຺ມິໍ, ມຫນ຺ຕມ຺ຫິ, ມຫນ຺ເຕສຸ. ໂຠ ມຫ, ໂຠ ມຫາ, ຠວນ຺ໂຕ ມຫນ຺ໂຕຕິ ອຍມມ຺ຫາກໍ ຣຸຈິ.

ເອຕ຺ຖ ‘‘ມຫນ຺ໂຕ, ມຫນ຺ຕາ. ມຫນ຺ຕໍ, ມຫນ຺ເຕ. ມຫນ຺ເຕນາ’’ຕິ ປຸຣິສນໂຍປິ ລພ຺ຠຕິ, ຕສ຺ມາ ‘‘ໂຠ ມຫນ຺ຕ, ຠວນ຺ໂຕ ມຫນ຺ຕາ’’ຕິ ອາລປນປທານິ ໂຍເຊຕພ຺ພານິ. ນປຸໍສກລິງ຺ເຄ ວຕ຺ຕພ຺ເພ ‘‘ມຫນ຺ຕໍ, ມຫນ຺ຕານີ’’ຕິ ຈິຕ຺ຕນໂຍປິ ລພ຺ຠຕິ. ອິຕ຺ຖິລິງ຺ເຄ ວຕ຺ຕພ຺ເພ ‘‘ມຫຕີ, ມຫຕີ, ມຫຕິໂຍ. ມຫຕິໍ, ມຫຕີ, ມຫຕິໂຍ. ມຫຕິຍາ, ມຫຕີຫິ ມຫຕີຠີ’’ຕິ ອິຕ຺ຖິນໂຍປິ ລພ຺ຠຕິ. ‘‘ມຫຕິຍາ ຈ ຍກ຺ຂເສນາຍາ’’ຕິອາທີເນຕ຺ຖ ນິທສ຺ສນປທານິ. ອປໂຣປິ ‘‘ມຫນ຺ຕາ, ມຫນ຺ຕາ, ມຫນ຺ຕາໂຍ. ມຫນ຺ຕ’’ນ຺ຕິ ກຎ຺ຎານໂຍປິ ລພ຺ຠຕິ, ‘‘ມຫນ຺ຕາ ນິຘິກຸມ຺ຠິໂຍ’’ຕິອາທີເນຕ຺ຖ ນິທສ຺ສນປທານິ. ກຈ຺ຈາຍເນ ປນ ‘‘ມຫນ຺ຕີ’’ອິຕິ ປທໍ ທິຏ຺ຐໍ. ຕໍ ‘‘ຄຸຓວນ຺ຕີ, ກຸລວນ຺ຕີ’’ອິຈ຺ຈາທີນິ ວິຍ ປາຬິຍໍ ອປ຺ປສິທ຺ຘຕ຺ຕາ ວີມໍສິຕພ຺ພໍ.

ນນຸ ໂຠ ຍສ຺ມາ ສາສເນປິ ‘‘ຄຈ຺ຉນ຺ຕີ, ຈຣນ຺ຕີ’’ຕິອາທີນິ ຈ ‘‘ອິທ຺ຘິມນ຺ຕີ’’ຕິ ຈ ປທໍ ທິສ຺ສຕິ, ຕສ຺ມາ ‘‘ມຫນ຺ຕີ, ຄຸຓວນ຺ຕີ’’ຕິອາທີນິປິ ຠວິຕພ຺ພນ຺ຕິ? ນ ຠວິຕພ຺ພໍ ຕຖາຣູປສ຺ສ ນຍສ຺ສ ວເສນ ອຄ຺ຄເຫຕພ຺ພຕ຺ຕາ, ‘‘ມຫຕີ, ຄຸຓວຕີ’’ອິຈ຺ຈາທິນຍສ຺ເສວ ທສ຺ສນໂຕ ຈ. ຕຖາ ຫິ ປາຬິຍໍ ອຏ຺ຐກຖາສຸ ຈ ‘‘ເສຍ຺ຍຖາປິ ນາມ ມຫຕີ ນງ຺ຄລສີສາ, ອິຕ຺ຖີ ສິຍາ ຣູປວຕີ, ສາ ຈ ສີລວຕີ ສິຍາ. ສຕິມຕີ ຈກ຺ຂຸມຕີ. ອິທ຺ຘິມຕີ ປຕ຺ຕິມຕີ’’ຕິ ຈ ‘‘ມຫຕິໍ ເສນໍ ທິສ຺ວາ ມໂຫສຘເສນາ ມນ຺ທາ, ອຍໍ ອຕິວິຍ ມຫຕີ ເສນາ ທິສ຺ສຕີ’’ຕິ ຈ ອາທີນິ ປໂຍຄານິ ທິສ຺ສນ຺ຕິ, ນ ‘‘ມຫນ຺ຕີ, ຣູປວນ຺ຕີ’’ອິຈ຺ຈາທີນິ.

ເກຈິ ປນ ‘‘ມຫາອິຕິ ສທ຺ໂທ ພ຺ຍາເສ ນ ລພ຺ຠຕິ, ສມາເສເຍວ ລພ຺ຠຕິ ‘ມຫາປຸຣິໂສ’ຕິ ເອຕ຺ຖ ວິຍາ’’ຕິ ວທນ຺ຕິ, ຕໍ ນ ຄເຫຕພ຺ພໍ. ‘‘ມຫາ ເຕ ອຸປາສກ ປຣິຈ຺ຈາໂຄ. ມຫາ ວຕາຍໍ ຠນ຺ເຕ ຠູມິຈາໂລ. ໂຆໂສ ຈ ວິປຸໂລ ມຫາ. ພາຣາຓສິຣຊ຺ຊໍ ນາມ ມຫາ. ເສນາ ສາທິສ຺ສເຕ ມຫາ’’ຕິ ປໂຍຄທສ຺ສນໂຕ. ເອວໍ ພ຺ຍາເສປິ ລພ຺ຠຕີຕິ ເວທິຕພ຺ພໍ, ຕສ຺ມາ ‘‘ມຫໍ, ມຫາ, ມຫນ຺ໂຕ, ມຫນ຺ຕາ. ໂຠ ມຫນ຺ຕ, ຠວນ຺ໂຕ ມຫນ຺ຕາ’’ຕິ ປຸລ຺ລິງ຺ເຄ, ‘‘ມຫນ຺ຕໍ, ມຫາ, ມຫນ຺ຕານິ. ໂຠ ມຫນ຺ຕ, ຠວນ຺ໂຕ ມຫນ຺ຕານີ’’ຕິ ນປຸໍສກລິງ຺ເຄ, ‘‘ມຫນ຺ຕາ, ມຫາ, ມຫນ຺ຕາ, ມຫນ຺ຕາໂຍ. ໂຠຕິ ມຫນ຺ເຕ, ໂຠຕິໂຍ ມຫນ຺ຕາ, ມຫນ຺ຕາໂຍ’’ຕິ ອິຕ຺ຖິລິງ຺ເຄ ສພ຺ພໍ ສມ຺ປຸຓ຺ຓໍ ໂຍເຊຕພ຺ພໍ. ສມາເສ ປນ ‘‘ມຫາສຕ຺ໂຕ ມຫາອຸປາສໂກ ມຫາອຸປາສິກາ ມຫພ຺ພໂລ ມຫາວນໍ ມຫຄ຺ຄຕໍ ມຫປ຺ຜລໍ ມຫພ຺ຠຍ’’ນ຺ຕິອາທີນິ ຣູປານິ ຠວນ຺ຕິ, ຕທ຺ຘິເຕ ‘‘ມຫຕ຺ຕໂນ ມຫຕ຺ຕໍ ມຫນ຺ຕຕ຺ຕໍ ມຫນ຺ຕຕາ’’ຕິ ຣູປານິ ຠວນ຺ຕິ. ຄຈ຺ຉນ຺ຕສທ຺ທສ຺ສ ປນ ‘‘ຄຈ຺ຉນ຺ໂຕ ຄຈ຺ຉນ຺ຕາ’’ຕິ ຣູປານິ ວຕ຺ວາ ເສສານິ ມຫນ຺ຕສທ຺ເທ ວຸຕ຺ຕນເຍນ ວິຕ຺ຖາເຣຕ຺ວາ ນາມິກປທມາລາ ເວທິຕພ຺ພາ. ຕຖາ ‘‘ຄຈ຺ຉນ຺ໂຕ, ຄຈ຺ຉນ຺ຕາ’’ຕິ ປຸຣິສນໂຍ ຈ ‘‘ຄຈ຺ຉນ຺ຕໍ, ຄຈ຺ຉນ຺ຕານີ’’ຕິ ຈິຕ຺ຕນໂຍ ຈ ‘‘ຄຈ຺ຉນ຺ຕີ, ຄຈ຺ຉນ຺ຕີ, ຄຈ຺ຉນ຺ຕິໂຍ’’ຕິ ອິຕ຺ຖິນໂຍ ຈ ຄເຫຕພ຺ໂພ. ເອວໍ ລິງ຺ຄຕ຺ຕຍວເສນ ‘‘ຈຣໍ ຈຣນ຺ໂຕ ຈຣນ຺ຕໍ ຈຣນ຺ຕີ, ທທໍ ທທນ຺ໂຕ ທທນ຺ຕໍ ທທນ຺ຕີ’’ຕິອາທີນໍ ອເນກປທສຫສ຺ສານໍ ນາມິກປທມາລາ ວິຕ຺ຖາເຣຕພ຺ພາ.

ເຍ ປນາຈຣິຍາ ‘‘ຄຈ຺ຉນ຺ໂຕ’’ຕິອາທີນໍ ປຈ຺ຈຕ຺ຕາລປນພຫຸວຈນຕ຺ຕຎ຺ຈ ‘‘ຄຈ຺ຉໍ’’ອິຈ຺ຈາທີນໍ ອາລປເນກວຈນຕ຺ຕຎ຺ຈ ອິຈ຺ຉນ຺ຕິ, ເຕ ສມມ຺ເຫຫິ ປໂຍໂຄ ສາສເນ ນ ທິຏ຺ໂຐ ນຍວເສນາຄເຫຕພ຺ພຕ຺ຕາ. ຕສ຺ມາ ຕານິ ເອຕ຺ຖ ນ ວທາມ. ອຍໍ ປນ ວິເສໂສ ທິຏ຺ໂຐ. ເສຍ຺ຍຖິທໍ?

‘‘ຄຈ຺ຉໍ ວິຘມ’’ມິຈ຺ຈາທິ-ປທານິ ມຸນິສາສເນ;

ກຕ຺ຖຈາຂ຺ຍາຕິກາ ໂຫນ຺ຕິ, ກຕ຺ຖຈິ ປນ ນາມິກາ.

‘‘ຕສ຺ສາຫໍ ສນ຺ຕິເກ ຄຈ຺ຉໍ,

ໂສ ເມ ສຕ຺ຖາ ຠວິສ຺ສຕິ;

ວິຘມໍ ເທວ ເຕ ຣຏ຺ຐໍ,

ປຸຕ຺ໂຕ ເວສ຺ສນ຺ຕໂຣ ຕວ.

ອຘມ຺ມໍ ສາຣຖິ ກຍິຣາ, ມຎ຺ເຈ ຕ຺ວໍ ນິກ຺ຂນໍ ວເນ’’;

ອິຈ຺ເຈວມາທໂຍ ເຎຍ຺ຍາ, ປໂຍຄາ ເອຕ຺ຖ ຘີມຕາ.

‘‘ຄຈ຺ຉິສ຺ສາມິ ວິຘມີ’’ຕິ-ອາທິນາ ຊິນສາສເນ;

ນານາກາລປຸຣິສານໍ, ວເສນຕ຺ຖໍ ວເທ ວິທູ.

ນາມຕ຺ເຕ ປນ ‘‘ຄຈ຺ຉນ຺ໂຕ, ວິຘມນ຺ໂຕ’’ຕິອາທິນາ;

‘‘ຄຈ຺ຉ’’ມິຈ຺ເຈວມາທີນ-ມຕ຺ຖມຕ຺ຖວິທູ ວເທ.

ອິທານິ ສມຄຕິກຕ຺ເຕປິ ‘‘ຊານໍ, ປສ຺ສ’’ນ຺ຕິອາທີນໍ ລິງ຺ຄວິຠຕ຺ຕິວຈນນ຺ຕຣວເສນ ໂຍ ວິເສໂສ ທິສ຺ສຕິ, ຕໍ ວທາມ. ຕຖາ ຫິ ‘‘ສາ ຊານໍເຍວ ອາຫ ນ ຊານາມີຕິ, ປສ຺ສໍເຍວ ອາຫ ນ ປສ຺ສາມີ’’ຕິ ເອວມາທີສຸ ຊານໍ ປສ຺ສໍ ສທ຺ທານໍ ‘‘ຊານນ຺ຕີ ປສ຺ສນ຺ຕີ’’ຕິ ລິງ຺ຄນ຺ຕຣວເສນ ປຣິວຕ຺ຕນໍ ຠວຕີຕິ ທຏ຺ຐພ຺ພໍ. ອິມິນາ ‘‘ຄຈ຺ຉໍ’’ອິຕິ ສທ຺ທສ຺ສປິ ຍຖາປໂຍຄໍ ‘‘ຄຈ຺ຉນ຺ຕີ’’ຕິ ອິຕ຺ຖິຍາ ກຖນຕ຺ໂຖ ລພ຺ຠຕິ ເຕຫິ ສມານຄຕິກຕ຺ຕາ, ນ ‘‘ຄຈ຺ຉນ຺ໂຕ’’ຕິ ສທ຺ທສ຺ສ ‘‘ຄຈ຺ຉນ຺ຕີ’’ຕິ ອິຕ຺ຖິຍາ ກຖນຕ຺ໂຖ ລພ຺ຠຕິ ເຕຫິ ອສມານຄຕິກຕ຺ຕາຕິ ກາຣຓໍ ທສ຺ສິຕໍ ໂຫຕິ. ‘‘ອປິ ນຸ ຕຸມ຺ເຫ ອາຍສ຺ມນ຺ໂຕ ເອກນ຺ຕສຸຂໍ ໂລກໍ ຊານໍ ປສ຺ສໍ ວິຫຣຖາ’’ຕິ ເອຕ຺ຖ ‘‘ຊານນ຺ຕາ ປສ຺ສນ຺ຕາ’’ຕິ ວຈນນ຺ຕຣວເສນ ປຣິວຕ຺ຕນໍ ຠວຕີຕິ ທຏ຺ຐພ຺ພໍ. ອິມິນາ ປນ ‘‘ຄຈ຺ຉໍ’’ອິຕິ ສທ຺ທສ຺ສປິ ຍຖາປໂຍຄໍ ‘‘ຄຈ຺ຉນ຺ຕາ’’ຕິ ພຫຸວຈນຕ຺ໂຖ ລພ຺ຠຕິ ເຕຫິ ສມານຄຕິກຕ຺ຕາ, ນ ‘‘ຄຈ຺ຉນ຺ເຕ’’ຕິ ສທ຺ທສ຺ສ ‘‘ຄຈ຺ຉນ຺ຕາ’’ຕິ ພຫຸວຈນຕ຺ໂຖ ລພ຺ຠຕິ ເຕຫິ ອສມານຄຕິກຕ຺ຕາຕິ ກາຣຓໍ ທສ຺ສິຕໍ ໂຫຕິ. ເອສ ນໂຍ ອຸຕ຺ຕຣຕ຺ຣາປິ. ‘‘ຠຣນ຺ຕິ ມາຕາປິຕໂຣ, ປຸພ຺ເພ ກຕມນຸສ຺ສຣ’’ນ຺ຕິ ເອຕ຺ຖ ອນຸສ຺ສຣໍສທ຺ທສ຺ສ ‘‘ອນຸສ຺ສຣນ຺ຕາ’’ຕິ ວຈນນ຺ຕຣວເສນ ປຣິວຕ຺ຕນໍ ຠວຕິ. ‘‘ສທ຺ຘມ຺ໂມ ຄຣຸກາຕພ຺ໂພ, ສຣໍ ພຸທ຺ຘານ ສາສນ’’ນ຺ຕິ ເອຕ຺ຖ ສຣໍສທ຺ທສ຺ສ ສຣນ຺ເຕນາຕິ ວິຠຕ຺ຕນ຺ຕຣວເສນ ປຣິວຕ຺ຕນໍ ຠວຕິ. ‘‘ຜຸສໍ ຠູຕານິ ສຓ຺ຐານໍ, ມນສາ ຄຓ຺ຫໂຕ ຍຖາ’’ຕິ ເອຕ຺ຖ ຜຸສໍສທ຺ທສ຺ສປິ ‘‘ຜຸສນ຺ຕສ຺ສາ’’ຕິ ວິຠຕ຺ຕນ຺ຕຣວເສນ ປຣິວຕ຺ຕນໍ ຠວຕິ. ຕຖາ ‘‘ຍາຈໍ ອທທມປ຺ປິໂຍ’’ຕິ ເອຕ຺ຖາປິ ຍາຈໍສທ຺ທສ຺ສ ‘‘ຍາຈນ຺ຕສ຺ສາ’’ຕິ ວິຠຕ຺ຕນ຺ຕຣວເສນ ປຣິວຕ຺ຕນໍ ຠວຕິ. ຍາຈນ຺ຕິ ວາ ຍາຈິຕພ຺ພໍ ຘນໍ, ອິມິນາ ນເຍນ ນານປ຺ປກາຣໂຕ ປຣິວຕ຺ຕນໍ ເວທິຕພ຺ພໍ. ອິຕິ ‘‘ຠວໍກຣ’’ນ຺ຕິອາທີນໍ ວິສທິສປທມາລາ ຈ ‘‘ຄຈ຺ຉໍ, ຈຣ’’ນ຺ຕິອາທີນໍ ສທິສປທມາລາ ຈ ‘‘ຊານໍ, ປສ຺ສ’’ນ຺ຕິອາທີນໍ ລິງ຺ຄວິຠຕ຺ຕິວຈນນ຺ຕຣວເສນ ກຕ຺ຖຈິ ປຣິວຕ຺ຕນນ຺ຕິ ອຍໍ ຕິວິໂຘປິ ອາກາໂຣ ອາຂ຺ຍາຕິກປທຕ຺ຖວິຠາວນາຍ ສທ຺ຘິໍ ກຖິໂຕ ປາວຈນວເຣ ໂສຕູນໍ ສທ຺ເທສ຺ວຕ຺ເຖສຸ ຈ ວິສາຣທພຸທ຺ຘິປຏິລາຠຕ຺ຖໍ. ສພ຺ພເມຕຎ຺ຫິ ສນ຺ຘາຍ ອິມາ ຄາຖາ ວຸຕ຺ຕາ –

‘‘ຠວໍ ກຣໍ ອຣຫໍ ສໍ, ມຫໍ’’ອິຕິ ປທານິ ຕຸ;

ວິສທິສານິ ສມ຺ໂຠນ຺ຕິ, ອຎ຺ຎມຎ຺ຎນ຺ຕິ ລກ຺ຂເຍ.

‘‘ຄຈ຺ຉໍ ຈຣໍ ທທໍ ຕິຏ຺ຐໍ, ຈິນ຺ຕຍໍ ຠາວຍໍ ວທໍ;

ຊານໍ ປສ຺ສ’’ນ຺ຕິອາທີນິ, ສມານານິ ຠວນ຺ຕິ ຫິ.

ຕຕ຺ຣ ‘‘ຊານ’’ນ຺ຕິອາທີນໍ, ກຕ຺ຖຈິ ປຣິວຕ຺ຕນໍ;

ລິງ຺ຄວິຠຕ຺ຕິວຈນ-ນ຺ຕຣໂຕ ປນ ທິສ຺ສຕີຕິ.

ອປິຈ ອຍໍ ສພ຺ເພສມ຺ປິ ນິຄ຺ຄຫີຕນ຺ຕປຸລ຺ລິງ຺ຄານໍ ປກຕິ, ຍທິທໍ ທ຺ວີສຸ ລິງ຺ເຄສຸ ຉສຸ ວິຠຕ຺ຕີສຸ ເຕຣສສຸ ວຈເນສຸ ອຎ຺ຎຕຣລິງ຺ຄວິຠຕ຺ຕິວຈນວເສນ ປຣິວຕ຺ຕນໍ. ອຍມ຺ປິ ປເນຕ຺ຖ ນີຕິ ເວທິຕພ຺ພາ.

‘‘ຄຈ຺ຉໍ ຈຣ’’ນ຺ຕິອາທີນິ, ວິປ຺ປກຕວໂຈ ສິຍຸໍ;

‘‘ຄຈ຺ຉມາໂນ ຈຣມາໂນ’’, ອິຈ຺ຈາທີນິ ປທານິ ຈ.

‘‘ມຫໍ ຠວ’’ນ຺ຕິ ເອຕານິ, ວິປ຺ປກຕວໂຈປິ ຈ;

ອວິປ຺ປກຕວໂຈ ຈ, ສິຍຸໍ ອຕ຺ຖານຸຣູປໂຕ.

‘‘ອຣຫໍ ສ’’ນ຺ຕິ ເອຕານິ, ວິນິມຸຕ຺ຕານິ ສພ຺ພຖາ;

ອາກາຣໍ ຕິວິຘມ຺ເປຕໍ, ກເຣ ຈິຕ຺ເຕ ສຸເມຘໂສຕິ.

ສວິນິຈ຺ຉໂຍຍໍ ນິຄ຺ຄຫີຕນ຺ຕປຸລ຺ລິງ຺ຄານໍ ປກຕິຣູປສ຺ສ ນາມິກປທມາລາວິຠາໂຄ.

ອາກາຣນ຺ຕຕາປກຕິກໍ ນິຄ຺ຄຫີຕນ຺ຕປຸລ຺ລິງ຺ຄໍ ນິຏ຺ຐິຕໍ.

ອິທານິ ຘນຠູຕິອິຈ຺ເຈຕສ຺ສ ປກຕິຣູປສ຺ສ ອຎ຺ເຎສຎ຺ຈ ຕໍສທິສານໍ ນາມິກປທມາລາວິຠາຄໍ ວກ຺ຂາມິ ປຸພ຺ພາຈຣິຍມຕໍ ປຸເຣຈຣໍ ກຕ຺ວາ.

ອຄ຺ຄິ, ອຄ຺ຄີ, ອຄ຺ຄໂຍ. ອຄ຺ຄິໍ, ອຄ຺ຄີ, ອຄ຺ຄໂຍ. ອຄ຺ຄິນາ, ອຄ຺ຄີຫິ, ອຄ຺ຄີຠິ. ອຄ຺ຄິສ຺ສ, ອຄ຺ຄິໂນ, ອຄ຺ຄີນໍ. ອຄ຺ຄິນາ, ອຄ຺ຄີຫິ, ອຄ຺ຄີຠິ. ອຄ຺ຄິສ຺ສ, ອຄ຺ຄິໂນ, ອຄ຺ຄີນໍ. ອຄ຺ຄິສ຺ມິໍ, ອຄ຺ຄິມ຺ຫິ, ອຄ຺ຄີສຸ. ໂຠ ອຄ຺ຄິ, ໂຠ ອຄ຺ຄີ, ຠວນ຺ໂຕ ອຄ຺ຄໂຍ. ຍມກມຫາເຖຣມຕໍ.

ເອຕ຺ຖ ກິຎ຺ຈາປິ ນິສ຺ສກ຺ກວຈນຏ຺ຐາເນ ‘‘ອຄ຺ຄິສ຺ມາ, ອຄ຺ຄິມ຺ຫາ’’ຕິ ອິມານິ ນາຄຕານິ, ຕຖາປິ ຕຕ຺ຖ ຕຕ຺ຖ ຕໍສທິສປ຺ປໂຍຄທສ຺ສນໂຕ ຄເຫຕພ຺ພານິ. ‘‘ອຄ຺ຄິນາ, ອຄ຺ຄິສ຺ມາ, ອຄ຺ຄິມ຺ຫາ’’ຕິ ກໂມ ຈ ເວທິຕພ຺ໂພ.