໔. ຠູຘາຕຸມຍນາມິກຣູປວິຠາຄ

‘‘ຠູ ສຕ຺ຕາຍ’’ນ຺ຕິ ຘາຕຸສ຺ສ, ຣູປມາຂ຺ຍາຕສຎ຺ຎິຕໍ;

ຕ຺ຍາທ຺ຍນ຺ຕໍ ລປິຕໍ ນານ-ປ຺ປກາເຣຫິ ອນາກຸລໍ.

ສ຺ຍາທ຺ຍນ຺ຕໍ, ທານິ ຕສ຺ເສວ, ຣູປໍ ນາມິກສວ຺ຫຍໍ;

ຠາສິສ຺ສໍ ຠາສິຕຕ຺ເຖສຸ, ປຏຸຠາວາຍ ໂສຕຸນໍ.

ຍທຕ຺ເຖ’ຕ຺ຕນິ ນາເມຕິ, ປຣ’ມຕ຺ເຖສຸ ວາ ສຍໍ;

ນມຕີຕິ ຕທາຫໍສຸ, ນາມໍ ອິຕິ ວິຠາວິໂນ.

ນາມໍ ນາມິກມິຈ຺ຈຕ຺ຣ, ເອກເມເວຕ຺ຖໂຕ ຠເວ;

ຕເທວໍ ນາມິກໍ ເຎ ຍ຺ຍໍ, ສລິງ຺ຄໍ ສວິຠຕ຺ຕິກໍ.

ສຕ຺ວາຠິຘານໍ ລິງ຺ຄນ຺ຕິ, ອິຕ຺ຖິປຸມນປຸໍສກໍ;

ວິຠຕ຺ຕີຕິຘ ສຕ຺ເຕວ, ຕຕ຺ຖ ຈຏ຺ຐ ປວຸຈ຺ຈເຣ.

ປຐມາ ທຸຕິຍາ ຕຕິຍາ, ຈຕຸຕ຺ຖີ ປຎ຺ຈມີ ຕຖາ;

ຉຏ຺ຐີ ຈ ສຕ຺ຕມີ ຈາຕິ, ໂຫນ຺ຕິ ສຕ຺ຕ ວິຠຕ຺ຕິໂຍ.

ລິງ຺ຄຕ຺ເຖ ປຐມາ ສາຍໍ, ຠິນ຺ນາ ທ຺ເວຘາ ສິໂຍ ອິຕິ;

ກມ຺ມຕ຺ເຖ ທຸຕິຍາ ສາປິ, ຠິນ຺ນາ ອໍ ໂຍ ອິຕິ ທ຺ວິຘາ.

ກຣເຓ ຕຕິຍາ ສາປິ, ຠິນ຺ນາ ນາ ຫິ ອິຕິ ທ຺ວິຘາ;

ສມ຺ປທາເນ ຈຕຸຕ຺ຖີ ສາ, ຠິນ຺ນາ ທ຺ເວຘາ ສ ນໍ ອິຕິ.

ອປາທາເນ ປຎ຺ຈມີ ສາ, ຠິນ຺ນາ ທ຺ເວຘາ ສ຺ມາ ຫິ ອິຕິ;

ຉຏ຺ຐີ ສາມິມ຺ຫິ ສາ ຈາປິ, ຠິນ຺ນາ ທ຺ເວຘາ ສ ນໍ ອິຕິ.

ໂອກາເສ ສຕ຺ຕມີ ສາປິ, ຠິນ຺ນາ ທ຺ເວຘາ ສ຺ມິໍສຸ ອິຕິ;

ອາມນ຺ຕນຏ຺ຐມີ ສາຍໍ, ສິໂຍເຍວາຕິ ຈຸທ຺ທສ.

ວຈນທ຺ວຍສໍຍຸຕ຺ຕາ, ເອເກກາ ຕາ ວິຠຕ຺ຕິໂຍ;

ສຕ຺ວມິຕິຫ ວິຎ຺ເຎຍ຺ໂຍ, ອຕ຺ໂຖ ໂສ ທພ຺ພສຎ຺ຎິໂຕ.

ໂຍ ກໂຣຕິສ ກຕ຺ຕາຕຸ, ຕໍ ກມ຺ມໍ ຍໍ ກໂຣຕິ ວາ;

ກຸພ຺ພເຕ ເຍນ ວາ ຕນ຺ຕຸ, ກຣຓໍ ອິຕິ ສຎ຺ຎິຕໍ.

ເທຕິ ໂຣຈຕິ ວາ ຍສ຺ສ, ສມ຺ປທານນ຺ຕິ ຕໍ ມຕໍ;

ຍໂຕເປຕິ ຠຍໍ ວາ ຕໍ, ອປາທານນ຺ຕິ ກິຕ຺ຕິຕໍ.

ຍສ຺ສາຍຕ຺ໂຕ ສມູໂຫວາ, ຕໍ ເວ ສາມີຕິ ເທສິຕໍ;

ຍສ຺ມິໍ ກໂຣຕິ ກິຣິຍໍ, ຕໂທກາສນ຺ຕິ ສທ຺ທິຕໍ.

ຍທາລປຕິ ຕໍ ວຕ຺ຖຸ, ອາມນ຺ຕນມຸທີຣິຕໍ;

ສທ຺ເທນາຠິມຸຂີກາໂຣ, ວິຊ຺ຊມານສ຺ສ ວາ ປນ.

ວິນາ ອາລປນຕ຺ຖໍ ລິງ຺ຄຕ຺ຖາທີສຸ ປຐມາທິວິຠຕ຺ຕຸປ຺ປຕ຺ຕິ ອຸປລກ຺ຂຓວເສນ ວຸຕ຺ຕາຕິ ທຏ຺ຐພ຺ພໍ.

ອິທເມຕ຺ຖ ນິຣຸຕ຺ຕິລກ຺ຂຓໍ ທຏ຺ຐພ຺ພໍ – ປຈ຺ຈຕ຺ຕວຈເນ ປຐມາ ວິຠຕ຺ຕິ ຠວຕິ, ອຸປໂຍຄວຈເນ ທຸຕິຍາ ວິຠຕ຺ຕິ ຠວຕິ, ກຣຓວຈເນ ຕຕິຍາ ວິຠຕ຺ຕິ ຠວຕິ, ສມ຺ປທານວຈເນ ຈຕຸຕ຺ຖີ ວິຠຕ຺ຕິ ຠວຕິ, ນິສ຺ສກ຺ກວຈເນ ປຎ຺ຈມີ ວິຠຕ຺ຕິ ຠວຕິ, ສາມິວຈເນ ຉຏ຺ຐີ ວິຠຕ຺ຕິ ຠວຕິ, ຠຸມ຺ມວຈເນ ສຕ຺ຕມີ ວິຠຕ຺ຕິ ຠວຕິ, ອາມນ຺ຕນວຈເນ ອຏ຺ຐມີ ວິຠຕ຺ຕິ ຠວຕິ. ຕຕ຺ຣຸທ຺ທານໍ –

ປຈ຺ຈຕ຺ຕມຸປໂຍຄຎ຺ຈ, ກຣຓໍ ສມ຺ປທານິຍໍ;

ນິສ຺ສກ຺ກໍ ສາມິວຈນໍ, ຠຸມ຺ມມາລປນຏ຺ຐມໍ.

ຕຕ຺ຣ ປຈ຺ຈຕ຺ຕວຈນໍ ນາມ ຕິວິຘລິງ຺ຄວວຕ຺ຖານຄຕານໍ ອິຕ຺ຖິປຸມນປຸໍສການໍ ປຈ຺ຈຕ຺ຕສຠາວນິທ຺ເທສຕ຺ໂຖ. ອຸປໂຍຄວຈນໍ ນາມ ໂຍ ຍໍ ກໂຣຕິ, ເຕນ ຕທຸປຍຸຕ຺ຕປຣິທີປນຕ຺ໂຖ. ກຣຓວຈນໍ ນາມ ຕຊ຺ຊາປກຕນິພ຺ພຕ຺ຕກປຣິທີປນຕ຺ໂຖ. ສມ຺ປທານວຈນໍ ນາມ ຕປ຺ປທານປຣິທີປນຕ຺ໂຖ. ນິສ຺ສກ຺ກວຈນໍ ນາມ ຕນ຺ນິສ຺ສຏຕທປຄມປຣິທີປນຕ຺ໂຖ. ສາມິວຈນໍ ນາມ ຕທິສ຺ສຣປຣິທີປນຕ຺ໂຖ. ຠຸມ຺ມວຈນໍ ນາມ ຕປ຺ປຕິຏ຺ຐາປຣິທີປນຕ຺ໂຖ. ອາມນ຺ຕນວຈນໍ ນາມ ຕທາມນ຺ຕນປຣິທີປນຕ຺ໂຖ. ເອວໍ ຎຕ຺ວາ ປໂຍຄານິ ອສມ຺ມຸຍ຺ຫນ຺ເຕນ ໂຍເຊຕພ຺ພານິ.

ຠູໂຕ, ຠາວໂກ, ຠໂວ, ອຠໂວ, ຠາໂວ, ອຠາໂວ, ສຠາໂວ, ສພ຺ຠາໂວ, ສມ຺ຠໂວ, ປຠໂວ, ປຠາໂວ, ອນຸຠໂວ, ອານຸຠາໂວ, ປຣາຠໂວ, ວິຠໂວ, ປາຕຸຠາໂວ, ອາວິຠາໂວ, ຕິໂຣຠາໂວ, ວິນາຠາໂວ, ໂສຕ຺ຖິຠາໂວ, ອຕ຺ຖິຠາໂວ, ນຕ຺ຖິຠາໂວຕິ ໂອກາຣນ຺ຕປຸລ຺ລິງ຺ຄໍ.

ອຠິຠວິຕາ, ປຣິຠວິຕາ, ອນຸຠວິຕາ, ສມນຸຠວິຕາ, ຠາວິຕາ, ປຈ຺ຈນຸຠວິຕາຕິ ອາກາຣນ຺ຕປຸລ຺ລິງ຺ຄໍ.

ຠວໍ, ປຣາຠວໍ, ປຣິຠວໍ, ອຠິຠວໍ, ອນຸຠວໍ, ສມນຸຠວໍ, ປຈ຺ຈນຸຠວໍ, ປຠວໍ, ອປ຺ປຠວນ຺ຕິ ນິຄ຺ຄຫີຕນ຺ຕປຸລ຺ລິງ຺ຄໍ.

ຘນຠູຕິ, ສິຣິຠູຕິ, ໂສຕ຺ຖິຠູຕິ, ສຸວຕ຺ຖິຠູຕີຕິ ອິກາຣນ຺ຕປຸລ຺ລິງ຺ຄໍ.

ຠາວີ, ວິຠາວີ, ສມ຺ຠາວີ, ປຣິຠາວີຕິ ອີກາຣນ຺ຕປຸລ຺ລິງ຺ຄໍ.

ສຍມ຺ຠູ, ປຠູ, ອຠິຠູ, ວິຠູ, ອຘິຠູ, ປຕິຠູ, ໂຄຕ຺ຣຠູ, ວຕ຺ຣຠູ, ປຣາຠິຠູ, ຣູປາຠິຠູ, ສທ຺ທາຠິຠູ, ຄນ຺ຘາຠິຠູ, ຣສາຠິຠູ, ໂຜຏ຺ຐພ຺ພາຠິຠູ, ຘມ຺ມາຠິຠູ, ສພ຺ພາຠິຠູຕິ ອູກາຣນ຺ຕປຸລ຺ລິງ຺ຄໍ.

ອິມາເນຕ຺ຖ ຉພ຺ພິຘານິ ປຸລ຺ລິງ຺ຄານິ ຠູຘາຕຸມຍານິ ອຸທ຺ທິຏ຺ຐານິ.

ອຸກາຣນ຺ຕໍ ປຸລ຺ລິງ຺ຄໍຕຸ ຠູຘາຕຸມຍມປ຺ປສິທ຺ຘໍ, ອຎ຺ຎຘາຕຸມຍໍ ປນຸກາຣນ຺ຕປຸລ຺ລິງ຺ຄໍ ປສິທ຺ຘໍ ‘‘ຠິກ຺ຂຸ, ເຫຕຸ’’ອິຕິ. ເຕນ ສທ຺ຘິໍ ສຕ຺ຕວິຘານິ ປຸລ຺ລິງ຺ຄານິ ໂຫນ຺ຕິ, ສພ຺ພາເນຕານິ ສຠາວໂຕເຍວ ປຸລ຺ລິງ຺ຄານີຕິ ທຏ຺ຐພ຺ພານິ. ເອຕ຺ຖ ສຕ຺ໂຕຕິ ອຕ຺ຖວາຈໂກ ຠູຕສທ຺ໂທເຍວ ນິໂຍຄາ ປຸລ຺ລິງ຺ຄນ຺ຕິປິ ທຏ຺ຐພ຺ໂພ.

ເຍ ປນ ‘‘ໂຍ ຘມ຺ໂມ ຠູໂຕ, ຍາ ຘມ຺ມຊາຕິ ຠູຕາ, ຍໍ ຘມ຺ມຊາຕໍ ຠູຕ’’ນ຺ຕິ ເອວໍ ລິງ຺ຄຕ຺ຕເຍ ໂຍຊນາຣຫຕ຺ຕາ ອນິຍຕລິງ຺ຄາ ອຎ຺ເຎປິ ຠູຕປຣາຠູຕສມ຺ຠູຕສທ຺ທາທໂຍ ສນ຺ທິສ຺ສນ຺ຕິ ປາວຈນວເຣ, ເຕປິ ນາໂນປສຄ຺ຄນິປາຕປເທຫິ ໂຍຊນວເສນ ສທ຺ທຣຈນາຍໍ ສຸຂຸມຕ຺ຖຄ຺ຄຫເຓ ຈ ວິຎ຺ຎູນໍ ໂກສລ຺ລຊນນຕ຺ຖໍ ນິຍຕປຸລ຺ລິງ຺ເຄສຸ ປກ຺ຂິປິຕ຺ວາ ທສ຺ເສສ຺ສາມ.

ເສຍ຺ຍຖິທໍ? ຠູໂຕ, ປຣາຠູໂຕ, ສມ຺ຠູໂຕ, ວິຠູໂຕ, ປາຕຸຠູໂຕ, ອາວິຠູໂຕ, ຕິໂຣຠູໂຕ, ວິນາຠູໂຕ, ຠພ຺ໂພ, ປຣິຠູໂຕ, ອຠິຠູໂຕ, ອຘິຠູໂຕ, ອທ຺ຘຠູໂຕ, ອນຸຠູໂຕ, ສມນຸຠູໂຕ, ປຈ຺ຈນຸຠູໂຕ, ຠາວິໂຕ, ສມ຺ຠາວິໂຕ, ວິຠາວິໂຕ, ປຣິຠາວິໂຕ, ອນຸປຣິຠູໂຕ, ປຣິຠວິຕພ຺ໂພ, ປຣິໂຠຕພ຺ໂພ, ປຣິຠວນີໂຍ, ອຠິຠວິຕພ຺ໂພ, ອຠິໂຠຕພ຺ໂພ, ອຠິຠວນີໂຍ, ອຘິຠວິຕພ຺ໂພ, ອຘິໂຠຕພ຺ໂພ, ອຘິຠວນີໂຍ, ອນຸຠວິຕພ຺ໂພ, ອນຸໂຠຕພ຺ໂພ, ອນຸຠວນີໂຍ, ສມນຸຠວິຕພ຺ໂພ, ສມນຸໂຠຕພ຺ໂພ, ສມນຸຠວນີໂຍ, ປຈ຺ຈນຸຠວິຕພ຺ໂພ, ປຈ຺ຈນຸໂຠຕພ຺ໂພ, ປຈ຺ຈນຸຠວນີໂຍ, ຠາເວຕພ຺ໂພ, ຠາວນີໂຍ, ສມ຺ຠາເວຕພ຺ໂພ, ສມ຺ຠາວນີໂຍ, ວິຠາເວຕພ຺ໂພ, ວິຠາວນີໂຍ, ປຣິຠາເວຕພ຺ໂພ, ປຣິຠາວນີໂຍ, ຠວມາໂນ, ວິຠວມາໂນ, ປຣິຠວມາໂນ, ອຠິຠວມາໂນ, ອນຸຠວມາໂນ, ສມນຸຠວມາໂນ, ປຈ຺ຈນຸຠວມາໂນ, ອນຸໂຠນ຺ໂຕ, ສມນຸໂຠນ຺ໂຕ, ປຈ຺ຈນຸໂຠນ຺ໂຕ, ສມ຺ໂຠນ຺ໂຕ, ອຠິສມ຺ໂຠນ຺ໂຕ, ຠາເວນ຺ໂຕ, ສມ຺ຠາເວນ຺ໂຕ, ວິຠາເວນ຺ໂຕ, ປຣິຠາເວນ຺ໂຕ, ປຣິຠວິຍມາໂນ, ປຣິຠຸຍ຺ຍມາໂນ, ອຠິຠວິຍມາໂນ, ອຠິຠູຍມາໂນ, ອນຸຠວິຍມາໂນ, ອນຸຠຸຍ຺ຍມາໂນ, ສມນຸຠວິຍມາໂນ, ສມນຸຠຸຍ຺ຍມາໂນ, ປຈ຺ຈນຸຠວິຍມາໂນ, ປຈ຺ຈນຸຠຸຍ຺ຍມາໂນຕິ ອິມານິ ນິຍຕປຸລ຺ລິງ຺ເຄສຸ ປກ຺ຂິຕ຺ຕລິງ຺ຄານິ. ເອວໂມກາຣນ຺ຕາທິວເສນ ຉພ຺ພິຘານິ ປຸລ຺ລິງ຺ຄານິ ຠູຘາຕຸມຍານິ ປກາສິຕານິ. ອຍໍ ຕາວ ປຸລ຺ລິງ຺ຄວເສນ ອຸທາຫຣຓຸທ຺ເທໂສ.

ຠາວິກາ, ຠາວນາ, ວິຠາວນາ, ສມ຺ຠາວນາ, ປຣິຠາວນາຕິ ອາກາຣນ຺ຕອິຕ຺ຖິລິງ຺ຄໍ.

ຠູມິ, ຠູຕິ, ວິຠູຕິ. ອິກາຣນ຺ຕອິຕ຺ຖິລິງ຺ຄໍ.

ຠູຣີ, ຠູຕີ, ໂຠຕີ, ວິຠາວິນີ, ປຣິວິຠາວິນີ, ສມ຺ຠາວິນີ, ປາຕຸຠວນ຺ຕີ, ປາຕຸໂຠນ຺ຕີ, ປຣິຠວນ຺ຕີ, ປຣິໂຠນ຺ຕີ, ອຠິຠວນ຺ຕີ, ອຠິໂຠນ຺ຕີ, ອຘິຠວນ຺ຕີ, ອຘິໂຠນ຺ຕີ, ອນຸຠວນ຺ຕີ, ອນຸໂຠນ຺ຕີ, ສມນຸຠວນ຺ຕີ, ສມນຸໂຠນ຺ຕີ, ປຈ຺ຈນຸຠວນ຺ຕີ, ປຈ຺ຈນຸໂຠນ຺ຕີ, ອຠິສມ຺ຠວນ຺ຕີ, ອຠິສມ຺ໂຠນ຺ຕີຕິ ອີກາຣນ຺ຕອິຕ຺ຖິລິງ຺ຄໍ.

ຠູ, ອຠູ. ອູກາຣນ຺ຕອິຕ຺ຖິລິງ຺ຄໍ.

ອິມາເນຕ຺ຖ ຈຕຸພ຺ພິຘານິ ອິຕ຺ຖິລິງ຺ຄານິ ຠູຘາຕຸມຍານິ ອຸທ຺ທິຏ຺ຐານິ.

ອຸກາຣນ຺ຕິຕ຺ຖິລິງ຺ຄໍ ຠູຘາຕຸມຍມປ຺ປສິທ຺ຘໍ, ອຎ຺ຎຘາຕຸມຍໍ ປນ ອຸກາຣນ຺ຕິຕ຺ຖິລິງ຺ຄໍ ປສິທ຺ຘໍ ‘‘ຘາຕຸ, ເຘນຸ’’ອິຕິ. ເຕນ ສທ຺ຘິໍ ປຎ຺ຈວິຘານິ ອິຕ຺ຖິລິງ຺ຄານິ ໂຫນ຺ຕິ, ໂອກາຣນ຺ຕສ຺ສ ວາ ໂຄສທ຺ທສ຺ສ ອິຕ຺ຖິລິງ຺ຄຠາເວ ເຕນ ສທ຺ຘິໍ ຉພ຺ພິຘານິປິ ໂຫນ຺ຕິ, ສພ຺ພາເນຕານິ ສຠາວໂຕເຍວິຕ຺ຖິລິງ຺ຄານີຕິ ທຏ຺ຐພ຺ພານິ. ເອຕ຺ຖາປິ ອນິຍຕລິງ຺ຄາ ຠູຕປຣາຠູຕສມ຺ຠູຕສທ຺ທາທໂຍ ອິຕ຺ຖິລິງ຺ຄວເສນ ຍຸຊ຺ຊນ຺ເຕ.

ກຖໍ? ຠູຕາ, ປຣາຠູຕາ, ສມ຺ຠູຕາຕິ ສພ຺ພໍ ວິຕ຺ຖາຣໂຕ ຄເຫຕພ຺ພໍ ‘‘ອນຸໂຠນ຺ໂຕ ສມນຸໂຠນ຺ໂຕ’’ຕິອາທີນິ ນວ ປທານິ ວຊ຺ເຊຕ຺ວາ. ຕານິ ຫິ ອີກາຣນ຺ຕວເສນ ໂຍຊິຕານິ. ອິມານິ ນິຍຕລິງ຺ເຄສຸ ປກ຺ຂິຕ຺ຕລິງ຺ຄານິ. ເອວໍ ອາກາຣນ຺ຕາທິວເສນ ຈຕຸພ຺ພິຘານິ ອິຕ຺ຖິລິງ຺ຄານິ ຠູຘາຕຸມຍານິ ປກາສິຕານິ. ອຍໍ ອິຕ຺ຖິລິງ຺ຄວເສນ ອຸທາຫຣຓຸທ຺ເທໂສ.

ຠູຕໍ, ມຫາຠູຕໍ, ຠວິຕ຺ຕໍ, ຠູນໍ, ຠວນໍ, ປຣາຠວນໍ, ສມ຺ຠວນໍ, ວິຠວນໍ, ປາຕຸຠວນໍ, ອາວິຠວນໍ, ຕິໂຣຠວນໍ, ວິນາຠວນໍ, ໂສຕ຺ຖິຠວນໍ, ປຣິຠວນໍ, ອຠິຠວນໍ, ອຘິຠວນໍ, ອນຸຠວນໍ, ສມນຸຠວນໍ, ປຈ຺ຈນຸຠວນນ຺ຕິ ນິຄ຺ຄຫີຕນ຺ຕນປຸໍສກລິງ຺ຄໍ.

ອຕ຺ຖວິຠາວິ, ຘມ຺ມວິຠາວິ. ອິກາຣນ຺ຕນປຸໍສກລິງ຺ຄໍ.

ໂຄຕ຺ຣຠຸ, ຈິຕ຺ຕສຫຠຸ, ນຈິຕ຺ຕສຫຠຸ. ອຸກາຣນ຺ຕນປຸໍສກລິງ຺ຄໍ.

ສພ຺ພາເນຕານິ ສຠາວໂຕເຍວ ນປຸໍສກລິງ຺ຄານີຕິ ທຏ຺ຐພ຺ພານິ. ເອຕ຺ຖ ສຕ຺ຕຠູຕຣູປວາຈໂກ ຠູຕສທ຺ໂທເຍວ ນິໂຍຄາ ນປຸໍສກລິງ຺ໂຄຕິປິ ທຏ຺ຐພ຺ພໍ. ເອຕ຺ຖາປິ ອນິຍຕລິງ຺ຄາ ຠູຕ ປຣາຠູຕ ສມ຺ຠູຕສທ຺ທາທໂຍ ນປຸໍສກລິງ຺ຄວເສນ ຍຸຊ຺ຊນ຺ເຕ.

ກຖໍ? ຠູຕໍ, ປຣາຠູຕໍ, ສມ຺ຠູຕໍ, ວິຠູຕໍ. ເປຍ຺ຍາໂລ. ສມນຸຠວມານໍ, ປຈ຺ຈນຸຠວມານໍ, ອນຸໂຠນ຺ຕໍ, ອນຸຠວນ຺ຕໍ, ສມນຸໂຠນ຺ຕໍ, ສມນຸຠວນ຺ຕໍ, ປຈ຺ຈນຸໂຠນ຺ຕໍ, ປຈ຺ຈນຸຠວນ຺ຕໍ, ສມ຺ໂຠນ຺ຕໍ, ສມ຺ຠວນ຺ຕໍ, ອຠິສມ຺ໂຠນ຺ຕໍ, ອຠິສມ຺ຠວນ຺ຕໍ, ປາຕຸໂຠນ຺ຕໍ, ປາຕຸຠວນ຺ຕໍ, ປຣິໂຠນ຺ຕໍ, ປຣິຠວນ຺ຕໍ, ອຠິໂຠນ຺ຕໍ, ອຠິຠວນ຺ຕໍ, ອຘິໂຠນ຺ຕໍ, ອຘິຠວນ຺ຕໍ, ຠາເວນ຺ຕໍ, ສມ຺ຠາເວນ຺ຕໍ, ວິຠາເວນ຺ຕໍ, ປຣິຠາເວນ຺ຕໍ, ປຣິຠາວິຍມານໍ, ປຣິຠຸຍ຺ຍມານໍ, ເປຍ຺ຍາໂລ. ປຈ຺ຈນຸຠວິຍມານໍ, ປຈ຺ຈນຸຠຸຍ຺ຍມານນ຺ຕິ ອິມານິ ນິຍຕນປຸໍສກລິງ຺ເຄສຸ ປກ຺ຂິຕ຺ຕລິງ຺ຄານິ. ເອວໍ ນິຄ຺ຄຫີຕນ຺ຕາທິວເສນ ຕິວິຘານິ ນປຸໍສກລິງ຺ຄານິ ຠູຘາຕຸມຍານິ ປກາສິຕານິ. ອຍໍ ນປຸໍສກລິງ຺ຄວເສນ ອຸທາຫຣຓຸທ຺ເທໂສ, ເອວໍ ປຸລ຺ລິງ຺ຄາທິວເສນ ລິງ຺ຄຕ຺ຕຍໍ ຠູຘາຕຸມຍມຸທ຺ທິຏ຺ຐໍ.

ເອຕ຺ຖ ເມ ອປ຺ປສິທ຺ຘາຕິ, ເຍ ເຍ ສທ຺ທາ ປກາສິຕາ;

ເຕ ເຕ ປາຬິປ຺ປເທເສສຸ, ມຄ຺ຄິຕພ຺ພາ ວິຠາວິນາ.

ໂອ, ອາ, ພິນ຺ທຸ, ອິ, ອີ, ອຸ, ອູ-ອນ຺ຕິເມ ສຕ຺ຕຘາ ຐິຕາ;

ເຎ ຍ຺ຍາ ປຸລ຺ລິງ຺ຄເຠທາຕິ, ນິຣຸຕ຺ຕຎ຺ຎູຫິ ຠາສິຕາ.

ອາ ອິວຓ຺ໂຓ ຈຸວຓ຺ໂຓ ຈ, ປຎ຺ຈ ອນ຺ຕາ ສຣູປໂຕ;

ອິຕ຺ຖິເຠທາຕິ ວິຎ຺ເຎຍ຺ຍາ, ໂອກາຣນ຺ເຕນ ຉາປິ ວາ.

ພິນ຺ທຸ, ອິ, ອຸ-ອິເມ ອນ຺ຕາ, ຕໂຍ ເຎຍ຺ຍາ ວິຠາວິນາ;

ນປຸໍສກປ຺ປເຠທາຕິ, ນິຣຸຕ຺ຕຎ຺ຎູຫິ ຠາສິຕາ.

ອນ຺ຕາ ສຕ຺ເຕວ ປຸລ຺ລິງ຺ເຄ, ອິຕ຺ຖິຍໍ ປຎ຺ຈ ວາ ຉ ວາ;

ນປຸໍສເກ ຕໂຍ ເອວໍ, ທສ ປຎ຺ຈຫິ ຉພ຺ພິຘາ.

ຍສ຺ມາ ປເນຕ຺ຖ ‘‘ຠູໂຕ’’ຕິອາທໂຍ ສທ຺ທາ ນິພ຺ພຈນາຠິເຘຍ຺ຍກຖນຕ຺ຖສາຘກວຈນປຣິຍາຍວຈນຕ຺ຖຸທ຺ຘາຣວເສນ ວຸຈ຺ຈມານາ ປາກຏາ ໂຫນ຺ຕິ ສຸວິຎ຺ເຎຍ຺ຍາ ຈ, ຕສ຺ມາ ອິເມສໍ ນິພ຺ພຈນາທີນິ ຍຖາສມ຺ຠວໍ ວກ຺ຂາມ ວິຎ຺ຎູນໍ ຕຸຏ຺ຐິຊນນຕ຺ຖຎ຺ເຈວ ໂສຕາຣານມຕ຺ເຖສຸ ປຏຸຕຣພຸທ຺ຘິປຏິລາຠາຍ ຈ. ຕຕ຺ຣ ຠູໂຕຕິ ຂນ຺ຘປາຕຸຠາເວນ ຠວຕີຕິ ຠູໂຕ, ອິທໍ ຕາວ ນິພ຺ພຈນໍ. ‘‘ຠູໂຕ’’ຕິ ສພ຺ພສງ຺ຄາຫກວເສນ ສຕ຺ໂຕ ວຸຈ຺ຈຕິ, ອິທມຠິເຘຍ຺ຍກຖນໍ. ‘‘ໂຍ ຈ ກາລຆໂສ ຠູໂຕ. ສພ຺ເພວ ນິກ຺ຂິປິສ຺ສນ຺ຕິ, ຠູຕາ ໂລເກ ສມຸສ຺ສຍ’’ນ຺ຕິ ຈ ອິທເມຕສ຺ສ ອຕ຺ຖສ຺ສ ສາຘກວຈນໍ. ອຖ ວາ ຠູໂຕຕິ ເອວໍນາມໂກ ອມນຸສ຺ສຊາຕິໂຍ ສຕ຺ຕວິເສໂສ, ອິທມຠິເຘຍ຺ຍກຖນໍ. ‘‘ຠູຕວິຊ຺ຊາ, ຠູຕເວຊ຺ໂຊ, ຠູຕວິຄ຺ຄຫິໂຕ’’ຕິ ຈ ອິທເມຕສ຺ສ ອຕ຺ຖສ຺ສ ສາຘກວຈນໍ. ຍຎ຺ຈ ປນ ‘‘ສຕ຺ໂຕ ມຈ຺ໂຈ ປຊາ’’ຕິອາທິກໍ ຕຕ຺ຖ ຕຕ຺ຖ ອາຄຕໍ ວຈນໍ, ອິທໍ ສຕ຺ໂຕຕິ ອຕ຺ຖວາຈກສ຺ສ ຠູຕສທ຺ທສ຺ສ ປຣິຍາຍວຈນໍ. ຍຎ຺ຈ ນິທ຺ເທສປາຬິຍໍ ‘‘ມຈ຺ໂຈຕິ ສຕ຺ໂຕ ນໂຣ ມານໂວ ໂປໂສ ປຸຄ຺ຄໂລ ຊີໂວ ຊຄຸ ຊນ຺ຕຸ ຫິນ຺ທຄຸ ມນຸໂຊ’’ຕິ ອາຄຕໍ, ອິທມ຺ປິ ປຣິຍາຍວຈນເມວ. ຕານິ ສພ຺ພານິ ປິຓ຺ເຑຕ຺ວາ ວຸຈ຺ຈນ຺ເຕ –

ສຕ຺ໂຕ ມຈ຺ໂຈ ຊໂນ ຠູໂຕ, ປາໂຓ ຫິນ຺ທຄຸ ປຸຄ຺ຄໂລ;

ຊນ຺ຕຸ ຊີໂວ ຊຄຸ ຍກ຺ໂຂ, ປາຓີ ເທຫີ ຕຖາຄໂຕ.

ສຕ຺ຕໂວ ມາຕິໂຍ ໂລໂກ, ມນຸໂຊ ມານໂວ ນໂຣ;

ໂປໂສ ສຣີຣີຕິ ປຸເມ, ຠູຕມິຕິ ນປຸໍສເກ.

ປຊາຕິ ອິຕ຺ຖິຍໍ ວຸຕ຺ໂຕ, ລິງ຺ຄໂຕ, ນ ຈ ອຕ຺ຖໂຕ;

ເອວໍ ຕິລິງ຺ຄິກາ ໂຫນ຺ຕິ, ສທ຺ທາ ສຕ຺ຕາຠິຘານກາ.

ໂຍ ໂສ ຊງ຺ຆາຍ ອຸລຕິ, ໂສ ສຕ຺ໂຕ ຊງ຺ຆໂລ ອິຘ;

ປາຓເທຫາຠິຘາເນຫິ, ສຕ຺ຕນາມໍ ປປຎ຺ຈິຕໍ.

ອິມສ຺ມິໍ ປກຣເຓ ‘‘ປຣິຍາຍວຈນ’’ນ຺ຕິ ຈ ‘‘ອຠິຘານ’’ນ຺ຕິ ຈ ‘‘ສງ຺ຂາ’’ຕິອາທີນິ ຈ ເອກຕ຺ຖານິ ອຘິປ຺ເປຕານິ, ອຕ຺ຖຸທ຺ຘາຣວເສນ ປນ ຠູຕສທ຺ໂທ ປຎ຺ຈກ຺ຂນ຺ຘາມນຸສ຺ສຘາຕຸສສ຺ສຕວິຊ຺ຊມານຂີຓາສວສຕ຺ຕຣຸກ຺ຂາທີສຸ ທິສ຺ສຕິ, ຕປ຺ປໂຍໂຄ ອຸປຣິ ອຕ຺ຖຕ຺ຕິກວິຠາເຄ ອາວິຠວິສ຺ສຕິ. ຠາວໂກຕິ ຠາເວຕີຕິ ຠາວໂກ, ອິທໍ ນິພ຺ພຈນໍ. ໂຍ ຠາວນໍ ກໂຣຕິ, ໂສ ຠາວໂກ. ອິທມຠິເຘຍ຺ຍກຖນໍ. ‘‘ຠາວໂກ ນິປໂກ ຘີໂຣ’’ຕິ ອິທເມຕສ຺ສ ອຕ຺ຖສ຺ສ ສາຘກວຈນໍ. ‘‘ຠາວໂກ ຠາວນາປສຸໂຕ ຠາວນາປຍຸຕ຺ໂຕ ຠາວນາສມ຺ປນ຺ໂນ’’ຕິ ອິທໍ ປຣິຍາຍວຈນໍ. ອິມານິ ‘‘ຠູໂຕ ຠາວໂກ’’ຕິ ທ຺ເວ ປທານິ ສຸທ຺ຘກຕ຺ຕຸເຫຕຸກຕ຺ຕຸວເສນ ວຸຕ຺ຕານີຕິ. ອິໂຕ ປຣໍ ນຍານຸສາເຣນ ສຸວິຎ຺ເຎຍ຺ຍຕ຺ຕາ ‘‘ອິທໍ ນິພ຺ພຈນ’’ນ຺ຕິ ຈ ອາທີນິ ອວຕ຺ວາ ກຕ຺ຖຈິ ອຕ຺ຖສາຘກວຈນໍ ປຣິຍາຍວຈນໍ ອຕ຺ຖຸທ຺ຘາຣຎ຺ຈ ຍຖາຣຫໍ ທສ຺ເສສ຺ສາມ. ເຕສຸ ຫິ ສພ຺ພຕ຺ຖ ທສ຺ສິເຕສຸ ຄນ຺ຖວິຕ຺ຖາໂຣ ສິຍາ, ຕສ຺ມາ ເຍສມຕ຺ໂຖ ອຸຕ຺ຕາໂນ, ເຕສມ຺ປິ ປທານມຠິເຘຍ຺ຍໍ ນ ກເຖສ຺ສາມ, ນິພ຺ພຈນມຕ຺ຕເມວ ເນສໍ ກເຖສ຺ສາມ. ເຍສໍ ປນ ຄມ຺ຠີໂຣ ອຕ຺ໂຖ, ເຕສມຠິເຘຍ຺ຍໍ ກເຖສ຺ສາມ.

ຠວນໍ ຠໂວ, ຠໂວ ວຸຈ຺ຈຕິ ວຸທ຺ຘິ. ຠູສທ຺ທສ຺ສ ອຕ຺ຖາຕິສຍໂຍຄໂຕ ວຑ຺ຒເນປິ ທິສ຺ສມານຕ຺ຕາ ຠວນໍ ວຑ຺ຒນນ຺ຕິ ກຕ຺ວາ. ‘‘ຠໂວ ຈ ຣຎ຺ໂຎ ອຠໂວ ຈ ຣຎ຺ໂຎ’’ຕິ ອິທໍ ວຸທ຺ຘິອຕ຺ຖສ຺ສ ສາຘກໍ ວຈນໍ. ອຖ ວາ ຠໂວຕິ ວຸຈ຺ຈຕິ ສສ຺ສຕໍ. ‘‘ສສ຺ສໂຕ ອຕ຺ຕາ ຈ ໂລໂກ ຈາ’’ຕິ ຫິ ສສ຺ສຕວເສນ ປວຕ຺ຕາ ທິຏ຺ຐິ ສສ຺ສຕທິຏ຺ຐິ, ຕສ຺ມາ ຠວທິຏ຺ຐີ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ຕຖາ ຠໂວຕິ ຠວທິຏ຺ຐິ, ຠວຕິ ສສ຺ສຕໍ ຕິຏ຺ຐຕີຕິ ປວຕ຺ຕນໂຕ ສສ຺ສຕທິຏ຺ຐິ ຠວທິຏ຺ຐິ ນາມ. ຠວທິຏ຺ຐິ ຫິ ອຸຕ຺ຕຣປທໂລເປນ ຠໂວຕິ ວຸຈ຺ຈຕິ. ‘‘ຠເວນ ຠວສ຺ສ ວິປ຺ປໂມກ຺ຂມາຫໍສູ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ເອຕ຺ຖາຍໍ ປາຬິວຈນຕ຺ໂຖ – ເອກຈ຺ເຈ ສມຓາ ວາ ພ຺ຣາຫ຺ມຓາ ວາ ຠວທິຏ຺ຐິຍາ ວາ ກາມຠວາທິນາ ວາ ສພ຺ພຠວໂຕ ວິມຸຕ຺ຕິໍ ສໍສາຣວິສຸທ຺ຘິໍ ກຖຍິໍສູຕິ. ອຖ ວາ ຠວນ຺ຕິ ວຑ຺ຒນ຺ຕິ ສຕ຺ຕາ ເອເຕນາຕິ ຠໂວຕິ ອຕ຺ເຖນ ສມ຺ປຕ຺ຕິປຸຎ຺ຎານິ ຠໂວຕິ ຈ ວຸຈ຺ຈນ຺ຕິ. ‘‘ອິຕິຠວາຠວຕຎ຺ຈ ວີຕິວຕ຺ໂຕ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ເອຕ຺ຖ ປນາຍໍ ປາຬິວຈນຕ຺ໂຖ – ຠໂວຕິ ສມ຺ປຕ຺ຕິ, ອຠໂວຕິ ວິປຕ຺ຕິ. ຕຖາ ຠໂວຕິ ວຸທ຺ຘິ, ອຠໂວຕິ ຫານິ. ຠໂວຕິ ສສ຺ສຕໍ, ອຠໂວຕິ ອຸຈ຺ເຉໂທ. ຠໂວຕິ ປຸຎ຺ຎໍ, ອຠໂວຕິ ປາປໍ, ຕໍ ສພ຺ພໍ ວີຕິວຕ຺ໂຕຕິ.

ສໂຫກາສາ ຂນ຺ຘາປິ ຠໂວ. ‘‘ກາມຠໂວ ຣູປຠໂວ’’ ອິຈ຺ເຈວມາທິ ເອຕສ຺ສຕ຺ຖສ຺ສ ສາຘກໍ ວຈນໍ. ເອຕ຺ຖ ປນ ຂນ຺ຘາ ‘‘ໂຍ ປຎ຺ຎາຍຕິ, ໂສ ສຣູປໍ ລຠຕີ’’ຕິ ກຕ຺ວາ ‘‘ຠວຕິ ອວິຊ຺ຊາຕຓ຺ຫາທິສມຸທຍາ ນິຣນ຺ຕຣໍ ສມຸເທຕີ’’ຕິ ອຕ຺ເຖນ ວາ ‘‘ຠວາ’’ຕິ ວຸຈ຺ຈນ຺ຕິ. ໂອກາໂສ ປນ ‘‘ຠວນ຺ຕິ ຊາຍນ຺ຕິ ເອຕ຺ຖ ສຕ຺ຕາ ນາມຣູປຘມ຺ມາ ຈາ’’ຕິ ອຕ຺ເຖນ ‘‘ຠໂວ’’ຕິ. ອປິຈ ກມ຺ມຠໂວປິ ຠໂວ, ອຸປປຕ຺ຕິຠໂວປິ ຠໂວ. ‘‘ອຸປາທານປຈ຺ຈຍາ ຠໂວ ທຸວິເຘນ ອຕ຺ຖິ ກມ຺ມຠໂວ, ອຕ຺ຖິ ອຸປປຕ຺ຕິຠໂວ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ຕຕ຺ຖ ກມ຺ມເມວ ຠໂວ ກມ຺ມຠໂວ. ຕຖາ ອຸປປຕ຺ຕິ ເອວ ຠໂວ ອຸປປຕ຺ຕິຠໂວ. ເອຕ຺ຖູປປຕ຺ຕິ ຠວຕີຕິ ຠໂວ, ກມ຺ມໍ ປນ ຍຖາ ສຸຂກາຣຓຕ຺ຕາ ‘‘ສຸໂຂ ພຸທ຺ຘານມຸປ຺ປາໂທ’’ຕິ ວຸຕ຺ໂຕ. ເອວໍ ຠວກາຣຓຕ຺ຕາ ຜລໂວຫາເຣນ ຠໂວຕິ ທຏ຺ຐພ຺ພໍ. ອຖ ວາ ຠາວນລກ຺ຂຓຕ຺ຕາ ຠາເວຕີຕິ ຠໂວ. ກິໍ ຠາເວຕິ? ອຸປປຕ຺ຕິໍ. ອິຕິ ອຸປປຕ຺ຕິໍ ຠາເວຕີຕິ ຠໂວຕິ ວຸຈ຺ຈຕິ. ຠາເວຕີຕິມສ຺ສ ຈ ນິພ຺ພຕ຺ເຕຕີຕິ ເຫຕຸກຕ຺ຕຸວເສນຕ຺ໂຖ. ອຖ ວາ ‘‘ຠວປຈ຺ຈຍາ ຊາຕີ’’ຕິ ວຈນໂຕ ຠວຕິ ເອເຕນາຕິ ຠໂວຕິ ກມ຺ມຠໂວ ວຸຈ຺ຈຕິ.

‘‘ຂນ຺ຘານຎ຺ຈ ປຏິປາຏິ, ຘາຕຸອາຍຕນານ ຈ;

ອພ຺ໂພຈ຺ຉິນ຺ນໍ ວຕ຺ຕມານາ, ສໍສາໂຣຕິ ປວຸຈ຺ຈຕີ’’ຕິ

ວຸຕ຺ຕລກ຺ຂໂຓ ສໍສາໂຣປິ ຠໂວ. ‘‘ຠເວ ທຸກ຺ຂໍ ຠວທຸກ຺ຂໍ, ຠເວ ສໍສຣນ຺ໂຕ’’ຕິ ອິມາເນຕສ຺ສຕ຺ຖສ຺ສ ສາຘການິ ວຈນານິ. ຕຕ຺ຣ ເກນຏ຺ເຐນ ສໍສາໂຣ ຠໂວຕິ ກຖີຍຕິ? ຠວຕິ ເອຕ຺ຖ ສຕ຺ຕສມ຺ມຸຕິ ຂນ຺ຘາທິປຏິປາຏິສງ຺ຂາເຕ ຘມ຺ມປຸຎ຺ຊສ຺ມິນ຺ຕິ ອຕ຺ເຖນ. ອິທໍ ຠວສທ຺ທສ຺ສ ຠາວກຕ຺ຕຸກຣຓາຘິກຣຓສາຘນວເສນຕ຺ຖກຖນໍ.

ເອຕ຺ຖ ຠວສທ຺ທສ຺ສ ອຕ຺ຖຸທ຺ຘາຣໍ ວທາມ –

ວຸທ຺ຘິສມ຺ປຕ຺ຕິປຸຎ຺ຎານິ, ຂນ຺ຘາ ໂສກາສສຎ຺ຎິຕາ;

ສໍສາໂຣ ສສ຺ສຕຎ຺ເຈຕໍ, ຠວສທ຺ເທນ ສທ຺ທິຕໍ.

ຠວຕຓ຺ຫາ ຠວທິຏ຺ຐິ, ອຸປປຕ຺ຕິຠໂວ ຕຖາ;

ກມ຺ມຠໂວ ຈ ສພ຺ພນ຺ຕໍ, ຠວສທ຺ເທນ ສທ຺ທິຕໍ.

ຠວຕຓ຺ຫາຠວທິຏ຺ຐິ-ທ຺ວຍໍ ກຕ຺ຖຈິ ປາຬິຍໍ;

ອຸຕ຺ຕຣປທໂລເປນ, ຠວສທ຺ເທນ ສທ຺ທິຕໍ.

ອຠໂວຕິ ນ ຠໂວ ອຠໂວ.

ວິປຕ຺ຕິ ຫານິ ອຸຈ຺ເຉໂທ, ປາປຎ຺ເຈວ ຈຕຸພ຺ພິຘາ;

ອິເມ ອຠວສທ຺ເທນ, ອຕ຺ຖາ ວຸຈ຺ຈນ຺ຕິ ສາສເນ.

ຠາໂວຕິ ອຊ຺ຌາສໂຍ, ໂຍ ‘‘ອຘິປ຺ປາໂຍ’’ຕິປິ ວຸຈ຺ຈຕິ. ‘‘ຖີນໍຠາໂວ ທຸຣາຊາໂນ. ນາມຈ຺ໂຈ ຣາຊຠຣິຍາສຸ, ຠາວໍ ກຸພ຺ເພຖ ປຓ຺ຑິໂຕ. ຫທຍງ຺ຄຕຠາວໍ ປກາເສຕີ’’ຕິ ເອວມາທິ ເອຕສ຺ສຕ຺ຖສ຺ສ ສາຘກໍ ວຈນໍ. ອປິຈ ວຕ຺ຖຸຘມ຺ໂມປິ ຠາໂວ. ‘‘ຠາວສງ຺ເກຕສິທ຺ຘີນ’’ນ຺ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ, ຈິຕ຺ຕມ຺ປິ ຠາໂວ. ‘‘ອຈ຺ຈາຫິຕໍ ກມ຺ມໍ ກໂຣສິ ລຸທ຺ທໍ, ຠາເວ ຈ ເຕ ກຸສລໍ ນຕ຺ຖິ ກິຎ຺ຈີ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ກ຺ຣິຍາປິຠາໂວ. ‘‘ຠາວລກ຺ຂຓໍ ຠາວສຕ຺ຕມີ’’ຕິ ຈ ອິທເມຕສ຺ສຕ຺ຖສ຺ສ ສາຘກໍ ວຈນໍ. ອປິຈ ຠາໂວຕິ ສຕ຺ຕເວວຈນນ຺ຕິ ຠຓນ຺ຕິ, ຘາຕຸ ວາ ເອຕໍ ອຘິວຈນໍ. ຕຕ຺ຖ ອຊ຺ຌາສໂຍ ຈ ວຕ຺ຖຸຘມ຺ໂມ ຈ ຈິຕ຺ຕຎ຺ຈ ສຕ຺ໂຕ ຈາຕິ ອິເມ ຠວຕີຕິ ຠາໂວ. ຕຖາ ປນ ຠາເວຕີຕິ ຠາໂວ, ກ຺ຣິຍາ ຕຸ ຠວນນ຺ຕິ ຠາໂວ. ສາ ຈ ຠວນຄມນປຈນາທິວເສນາເນກວິຘາ. ອປິຈ ຠາວຣູປມ຺ປິ ຠາໂວ, ຍໍ ອິຕ຺ຖິຠາໂວ ປຸມ຺ຠາໂວ ອິຕ຺ຖິນ຺ທ຺ຣິຍນ຺ຕິ ຈ ວຸຈ຺ຈຕິ. ຕຕ຺ຣາຍໍ ວຈນຕ຺ໂຖ – ‘‘ອິຕ຺ຖີ’’ຕິ ວາ ‘‘ປຸຣິໂສ’’ຕິ ວາ ຠວຕິ ເອເຕນ ຈິຕ຺ຕໍ ອຠິຘານຎ຺ຈາຕິ ຠາໂວ.

ນຕ຺ຕໂນມຕິຍາ ເອຕໍ, ນິພ຺ພຈນມຸທາຫຏໍ;

ປຸພ຺ພາຈຣິຍສີຫານໍ, ມຕໍ ນິສ຺ສາຍ ມາຫຏໍ.

ວຸຕ຺ຕຎ຺ເຫຕໍ ໂປຣາເຓຫິ ‘‘ອິຕ຺ຖິຍາ ຠາໂວ ອິຕ຺ຖິຠາໂວ, ອິຕ຺ຖີຕິ ວາ ຠວຕິ ເອເຕນ ຈິຕ຺ຕໍ ອຠິຘານຎ຺ຈາຕິ ອິຕ຺ຖິຠາໂວ’’ຕິ, ຕສ຺ມາ ປຸມ຺ຠາໂວຕິ ເອຕ຺ຖາປິ ປຸມສ຺ສ ຠາໂວ ປຸມ຺ຠາໂວ, ປຸມາຕິ ວາ ຠວຕິ ເອເຕນ ຈິຕ຺ຕໍ ອຠິຘານຎ຺ຈາຕິ ປຸມ຺ຠາໂວຕິ ນິພ຺ພຈນໍ ສມຘິຄນ຺ຕພ຺ພໍ. ອິທໍ ຠາວສທ຺ທສ຺ສ ກຕ຺ຕຸຠາວກຣຓສາຘນວເສນຕ຺ຖກຖນໍ.

ອຠາໂວຕິ ນ ຠາໂວຕິ ອຠາໂວ, ໂກ ໂສ? ສຸຎ຺ຎຕາ ນຕ຺ຖິຕາ. ສຠາໂວຕິ ອຕ຺ຕໂນ ຠາໂວ ສຠາໂວ, ອຕ຺ຕໂນ ປກຕິ ອິຈ຺ເຈວຕ຺ໂຖ. ອຖ ວາ ສຠາໂວຕິ ຘມ຺ມານໍ ສຕິ ອຕ຺ຖສມ຺ຠເວ ໂຍ ໂກຈິ ສຣູປໍ ລຠຕິ, ຕສ຺ສ ຠາໂວ ລກ຺ຂຓມິຕິ ສຎ຺ຎິໂຕ ນມນຣຸປ຺ປນກກ຺ຂຬຜຸສນາທິອາກາໂຣ ອິຈ຺ເຈວຕ຺ໂຖ. ‘‘ສາມຎ຺ຎໍ ວາ ສຠາໂວ ວາ, ຘມ຺ມານໍ ລກ຺ຂຓໍ ມຕ’’ນ຺ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ອປິຈ ສຠາໂວຕິ ສລກ຺ຂໂຓ ປຣມຕ຺ຖຘມ຺ໂມ. ເກນຏ຺ເຐນ? ສຫ ຠາເວນາຕິ ອຕ຺ເຖນ. ສພ຺ຠາໂວຕິ ສຕໍ ຠາໂວ ສພ຺ຠາໂວ, ສປ຺ປຸຣິສຘມ຺ໂມ ອິຈ຺ເຈວຕ຺ໂຖ. ອຖ ວາ ອຕ຺ຕໂນ ຠາໂວ ສພ຺ຠາໂວ. ‘‘ຄາຫາປຍນ຺ຕິ ສພ຺ຠາວ’’ນ຺ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ສໍວິຊ຺ຊມາໂນ ວາ ຠາໂວ ສພ຺ຠາໂວ. ‘‘ເອວໍ ຄຫຓສພ຺ຠາໂວ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ອິທໍ ສຠາວ ສພ຺ຠາວສທ຺ທານໍ ຠາວສາຘນວເສນຕ຺ຖກຖນໍ.

ສມ຺ຠໂວຕິ ສມ຺ຠວນໍ ສມ຺ຠໂວ, ສມ຺ຠວນກ຺ຣິຍາ, ຍຸຕ຺ຕິ ວາ. ຍຸຕ຺ຕິ ຫິ ສມ຺ຠໂວຕິ ວຸຈ຺ຈຕິ ‘‘ສມ຺ຠໂວ ຄຫຓສ຺ສ ກາຣຓ’’ນ຺ຕິອາທີສຸ. ອຖ ວາ ສມ຺ຠວຕິ ເອຕສ຺ມາຕິ ສມ຺ຠໂວ. ຍໂຕ ຫິ ຍໍ ກິຎ຺ຈິ ສມ຺ຠວຕິ, ໂສ ສມ຺ຠໂວ. ປຠໂວຕິ ປຠວນໍ ປຠໂວ, ອຈ຺ຉິນ຺ນຕາ, ປຠວຕິ ເອຕສ຺ມາຕິ ວາ ປຠໂວ. ຍໂຕ ຫິ ຍໍ ກິຎ຺ຈິ ປຠວຕິ, ໂສ ປຠໂວ. ອິເມ ປນ ສມ຺ຠວປຠວສທ຺ທາ ກຕ຺ຖຈິ ສມານຕ຺ຖາ ກຕ຺ຖຈິ ຠິນ຺ນຕ຺ຖາຕິ ເວທິຕພ຺ພາ. ກຖໍ? ສມ຺ຠວສທ຺ໂທ ຫິ ຠວນກ຺ຣິຍມ຺ປິ ວທຕິ ຍຸຕ຺ຕິມ຺ປິ ປຎ຺ຎຕ຺ຕິມ຺ປິ ສມ຺ຠວຣູປມ຺ປິ ປຈ຺ຈຍຕ຺ຖມ຺ປິ, ປຠວສທ຺ໂທ ປນ ຠວນກ຺ຣິຍມ຺ປິ ວທຕິ ນທິປ຺ປຠວມ຺ປິ ປຈ຺ຈຍຕ຺ຖມ຺ປິ, ຕສ຺ມາ ປຈ຺ຈຍຕ຺ຖໍ ວຊ຺ເຊຕ຺ວາ ຠິນ຺ນຕ຺ຖາຕິ ຄເຫຕພ຺ພາ, ປຈ຺ຈຍຕ຺ເຖນ ປນ ສມານຕ຺ຖາຕິ ຄເຫຕພ຺ພາ. ວຸຕ຺ຕຎ຺ເຫຕໍ ‘‘ປຈ຺ຈໂຍ ເຫຕຸ ນິທານໍ ກາຣຓໍ ສມ຺ຠໂວ ປຠໂວຕິອາທິ ອຕ຺ຖໂຕ ເອກໍ, ພ຺ຍຎ຺ຊນໂຕ ນານ’’ນ຺ຕິ.

‘‘ມູລໍ ເຫຕຸ ນິທານຎ຺ຈ, ສມ຺ຠໂວ ປຠໂວ ຕຖາ;

ສມຸຏ຺ຐານາຫາຣາຣມ຺ມຓໍ, ປຈ຺ຈໂຍ ສມຸທເຍນ ຈາ’’ຕິ

ອຍມ຺ປິ ຄາຖາ ເອຕສ຺ສຕ຺ຖສ຺ສ ສາຘິກາ. ອິທໍ ສມ຺ຠວປຠວສທ຺ທານໍ ຠາວາປາທານສາຘນວເສນຕ຺ຖກຖນໍ.

ເອວເມຕ຺ຖ ຠາວກຕ຺ຕຸກມ຺ມກຣຓາປາທານາຘິກຣຓວເສນ ຉ ສາຘນານິ ປກາສິຕານິ. ຕານິ ສມ຺ປທານສາຘເນນ ສຕ຺ຕວິຘານິ ຠວນ຺ຕິ, ຕໍ ປນ ອຸຕ຺ຕຣິ ອາວິຠວິສ຺ສຕິ ‘‘ຘນມສ຺ສ ຠວຕູຕິ ຘນຠູຕີ’’ຕິອາທິນາ. ອິຈ຺ເຈວໍ ກິຕກວເສນ ສພ຺ພຖາປິ ສຕ຺ຕວິຘານິ ສາຘນານິ ໂຫນ຺ຕິ, ຍານິ ‘‘ກາຣການີ’’ຕິປິ ວຸຈ຺ຈຕິ, ອິໂຕ ອຎ຺ຎໍ ສາຘນໍ ນຕ຺ຖິ. ອິຘ ປໂຍເຄສ຺ວຕ຺ເຖສຸ ຈ ວິຎ຺ຎູນໍ ປາຏວຕ຺ຖໍ ສາຘນນາມໍ ປກາສິຕໍ. ຕຖາ ຫິ ທຸນ຺ນິກ຺ຂິຕ຺ຕສາຘເນຫິ ປເທຫິ ໂຍຊິຕາ ສທ຺ທປ຺ປໂຍຄາ ທຸພ຺ໂພຘຕ຺ຖາ ໂຫນ຺ຕິ, ສຸນິກ຺ຂິຕ຺ຕສາຘເນຫິ ປນ ປເທຫິ ໂຍຊິຕາ ສຸໂພຘຕ຺ຖາ ໂຫນ຺ຕິ, ຕສ຺ມາ ປໂຍຄາສາຘນມູລກາ, ອຕ຺ໂຖ ຈ ປໂຍຄມູລໂກ. ປໂຍຄານຸຣູປຎ຺ຫິ ອວິປຣີຕໍ ກຕ຺ວາ ອຕ຺ຖໍ ກຖນສີລາ ‘‘ຍາຈິໂຕວ ພຫຸລໍ ຈີວຣໍ ປຣິຠຸຎ຺ຊຕິ, ອປ຺ປໍ ອຍາຈິໂຕ’’ຕິ ເອວມາທີສຸ ສາຘນວເສນ ຄເຫຕພ຺ເພສຸ ອຕ຺ເຖສຸ, ອຎ຺ເຎສຸ ຈຕ຺ເຖສຸ ປຏຸຕຣພຸທ຺ຘິໂນ ປຓ຺ຑິຕາເຍວ ເອກນ຺ເຕນ ຠຄວໂຕ ປຣິຍຕ຺ຕິສາສນຘຣາ ນາມ ໂຫນ຺ຕີຕິ ເວທິຕພ຺ພໍ. ອິໂຕ ປຣໍ ນຍານຸສາເຣນ ສຸວິຎ຺ເຎຍ຺ຍຕ຺ຕາ ‘‘ອິທໍ ນາມ ສາຘນ’’ນ຺ຕິ ນ ວກ຺ຂາມ, ເກວລມິຘ ທສ຺ສິເຕສຸ ປໂຍເຄສຸ ວິຎ຺ຎູນໍ ພຫຸມານຸປ຺ປາທນຕ຺ຖຎ຺ເຈວ ວິວິຘວິຈິຕ຺ຕປາຬິຄຕິເກ ວິວິຘຕ຺ຖສາເຣ ຊິນວຣວຈເນ ໂສຕູນໍ ພຸທ຺ຘິວິຊມ຺ຠນຕ຺ຖຎ຺ຈ ອຕ຺ຖສາຘກວຈນານິເຍວ ຍຖາຣຫໍ ສຸຕ຺ຕເຄຍ຺ຍເວຍ຺ຍາກຣຓຄາຖາທີສຸ ຕໂຕ ຕໂຕ ອາຫຣິຕ຺ວາ ທສ຺ເສສ຺ສາມ.

ປຠາໂວຕິ ປກາຣໂຕ ຠວຕີຕິ ປຠາໂວ, ໂສຍມານຸຠາໂວເຍວ. ‘‘ປຠາວໍ ເຕ ນ ປສ຺ສາມິ, ເຍນ ຕ຺ວໍ ມິຖິລໍ ວເຊ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ອນຸຠໂວຕິ ອນຸຠວນໍ ອນຸຠໂວ, ກິໍ ຕໍ? ປຣິຠຸຎ຺ຊນໍ. ອານຸຠາໂວຕິ ເຕຊຸສ຺ສາຫມນ຺ຕປຠູສຕ຺ຕິໂຍ. ‘‘ເຕຊສງ຺ຂໂຕ ອຸສ຺ສາຫມນ຺ຕປຠູສຕ຺ຕິສງ຺ຂາໂຕ ວາ ມຫນ຺ໂຕ ອານຸຠາໂວ ເອຕສ຺ສາຕິ ມຫານຸຠາໂວ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ.

ເຕໂຊ ອຸສ຺ສາຫມນ຺ຕາ ຈ, ປຠູສຕ຺ຕີຕິ ປຎ຺ຈິເມ;

ອານຸຠາວາຕິ ວຸຈ຺ຈນ຺ຕິ, ປຠາວາຕິ ຈ ເຕ ວເທ.

ເຕຊາທິວາຈກຕ຺ຕມ຺ຫິ, ອານຸຠາວປທສ຺ສ ຕຸ;

ອຕ຺ຖນິພ຺ພຈນໍ ຘີໂຣ, ຍຖາສມ຺ຠວມຸທ຺ທິເສ.

ອຖ ວາ ອານຸຠາໂວຕິ ອນຸຠວິຕພ຺ພຜລໍ. ‘‘ອນຸຠວິຕພ຺ພສ຺ສ ຜລສ຺ສ ມຫນ຺ຕຕາຍ ມຫານຸຠາໂວ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ປຣາຠໂວຕິ ປຣາຠວນໍ ປຣາຠໂວ, ອຖ ວາ ປຣາຠວຕີຕິ ປຣາຠໂວ. ‘‘ສຸວິຊາໂນ ປຣາຠໂວ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ອປິຈ ‘‘ຘມ຺ມເທສ຺ສີ ປຣາຠໂວ’’ຕິ ປາຐານຸຣູປໂຕ ປຣາຠວິສ຺ສຕີຕິ ປຣາຠໂວຕິ ອນາຄຕກາລວເສນປິ ນິພ຺ພຈນໍ ທຏ຺ຐພ຺ພໍ. ອຖ ວາ ປຣາຠວນ຺ຕິ ເອເຕນາຕິ ປຣາຠໂວ. ກິໍ ຕໍ? ຘມ຺ມເທສ຺ສິຕາທິ. ‘‘ປຐໂມ ໂສ ປຣາຠໂວ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ວິຠໂວຕິ ນິພ຺ພານໍ. ຕຎ຺ຫິ ຠວໂຕ ວິຄຕຕ຺ຕາ ຠວໂຕ ວິຄໂຕຕິ ວິຠໂວ, ຠວສ຺ສ ຈ ຕໍເຫຕຸ ວິຄຕຕ຺ຕາ ວິຄໂຕ ຠໂວ ເອຕສ຺ມາຕິ ວິຠໂວ. ວິຠວນ຺ຕິ ອຸຈ຺ຉິຊ຺ຊນ຺ຕິ ວິນສ຺ສນ຺ຕິ ອິໂຕ ອຣິຍຘນວິໂລມກາ ກິເລສມຫາໂຈຣາຕິປິ ວິຠໂວ. ວິຠວສທ຺ທສ຺ສ ນິພ຺ພານາຠິຘານຕ຺ເຕ ‘‘ເອວໍ ຠເວ ວິຊ຺ຊມາເນ, ວິຠໂວ ອິຈ຺ຉິຕພ຺ພໂກ’’ຕິ ອິທເມຕ຺ຖ ສາຘກໍ ວຈນໍ. ອິມານິ ປນ ນິພ຺ພານສ຺ສ ປຣິຍາຍວຈນານິ –

ນິພ຺ພານໍ ວິຠໂວ ໂມກ຺ໂຂ, ນິໂຣໂຘ ອມຕໍ ສມໍ;

ສງ຺ຂາຣູປສໂມ ທຸກ຺ຂ-ນິໂຣໂຘ ອຈ຺ຈຸຕ’ກ຺ຂໂຍ.

ວິວຏ຺ຏ’ມກຕໍ ອຕ຺ຖໍ, ສນ຺ຕິປທ’ມສງ຺ຂຕໍ;

ປາຣໍ ຕຓ຺ຫາກ຺ຂໂຍ ທຸກ຺ຂ-ກ຺ຂໂຍ ສຎ຺ໂຎຊນກ຺ຂໂຍ.

ໂຍຄກ຺ເຂໂມ ວິຣາໂຄ ຈ,

ໂລກນ຺ໂຕ ຈ ຠວກ຺ຂໂຍ;

ອປວຄ຺ໂຄ ວິສງ຺ຂາໂຣ,

ສພ຺ຠິ ສຸທ຺ຘິ ວິສຸທ຺ຘິ ຈ.

ວິມຸຕ຺ຍາ’ປຈໂຍ ມຸຕ຺ຕິ, ນິພ຺ພຸຕິ ອຸປຘິກ຺ຂໂຍ;

ສນ຺ຕິ ອສງ຺ຂຕາ ຘາຕຸ, ທິສາ ຈ ສພ຺ພໂຕປຠໍ.

ວິນາເປຕານິ ນາມານິ, ວິເສສກປທໍ ອິຘ;

ນິພ຺ພານວາຈການີຕິ, ສລ຺ລກ຺ເຂຍ຺ຍ ສຸເມຘໂສ.

‘‘ຕາຓໍ ເລຓ’’ນ຺ຕິອາທີນິ-ເປກ຺ຂິການິ ຠວນ຺ຕິ ຫິ;

ວິເສສກປທານນ຺ຕິ, ເອຕ຺ເຖຕານິ ປກາສເຍ.

ຕາຓໍ ເລຓ’ມຣູປຎ຺ຈ, ສນ຺ຕໍ ສຈ຺ຈ’ມນາລຍໍ;

ສຸທຸທ຺ທສໍ ສຣຓຎ຺ຈ, ປຣາຍຓ’ມນີຕິກໍ.

ອນາສວໍ ຘຸວໍ ນິຈ຺ຈໍ, ວິຎ຺ຎາຓ’ມນິທສ຺ສນໍ;

ອພ຺ຍາປຊ຺ຊໍ ສິວໍ ເຂມໍ, ນິປຸຓໍ ອປໂລກິກໍ.

ອນນ຺ຕ’ມກ຺ຂຣໍ ທີໂປ, ອຈ຺ຈນ຺ຕໍ ເກວລໍ ປທໍ;

ປຓີຕໍ ອຈ຺ຈຸຕຎ຺ຈາຕິ, ພຫຸຘາປິ ວິຠາວເຍ.

ໂຄຕ຺ຣຠູຕິ ປທສ຺ສຕ຺ຖໍ, ວທນ຺ເຕຫິ ຄຣູຫິ ຕຸ;

ໂຄຕ຺ຕໍ ວຸຈ຺ຈຕິ ນິພ຺ພານ-ມິຕິ ໂຄຕ຺ຕນ຺ຕິ ຠາສິຕໍ.

ວິຠໂວຕິ ວາ ວິນາສສມ຺ປຕ຺ຕິຘນຸຈ຺ເຉທທິຏ຺ຐິໂຍປິ ວຸຈ຺ຈນ຺ຕິ. ຕຕ຺ຖ ວິນາໂສ ວິຠວນໍ ອຸຈ຺ຉິຊ຺ຊນໍ ນສ຺ສນນ຺ຕິ ອຕ຺ເຖນ ວິຠໂວ. ‘‘ວິຠໂວ ສພ຺ພຘມ຺ມານໍ, ອິຕ຺ເຖເກ ສໂຕ ສຕ຺ຕສ຺ສ ອຸຈ຺ເຉທໍ ວິນາສໍ ວິຠວໍ ປຎ຺ຎເປນ຺ຕີ’’ຕິ ຈ ອິທເມຕສ຺ສຕ຺ຖສ຺ສ ສາຘກໍ ວຈນໍ. ສມ຺ປຕ຺ຕິ ປນ ວິເສສໂຕ ຠວຕີຕິ ວິຠໂວ. ‘‘ຣຎ຺ໂຎ ສິຣິວິຠວໍ ທຏ຺ຐຸກາມາ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ຘນໍ ປນ ຠວນ຺ຕິ ວຑ຺ຒນ຺ຕິ ວຸທ຺ຘິໍ ວິຣູຬ຺ຫິໍ ເວປຸລ຺ລໍ ອາປຊ຺ຊນ຺ຕິ ສຕ຺ຕາ ເອເຕນາຕິ ວິຠໂວ. ‘‘ອສີຕິໂກຏິວິຠວສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕີ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ອິທໍ ປນ ປຣິຍາຍວຈນໍ –

ຘນໍ ສໍ ວິຠໂວ ທພ຺ພໍ, ສາປເຕຍ຺ຍໍ ປຣິຄ຺ຄໂຫ;

ໂອຑ຺ຑໍ ຠຓ຺ຑໍ ສກໍ ອຕ຺ໂຖ, ອິຈ຺ເຈເຕ ຘນວາຈກາ.

ອຸຈ຺ເຉທທິຏ຺ຐິ ປນ ວິຠວຕິ ອຸຈ຺ຉິຊ຺ຊຕິ ‘‘ອຕ຺ຕາ ຈ ໂລໂກ ຈ ປຸນ ຈຸຕິໂຕ ອຸທ຺ຘໍ ນ ຊາຍຕີ’’ຕິ ຄຫຓໂຕ ວິຠໂວຕິ. ‘‘ວິຠວຕຓ຺ຫາ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ວິຠວຕຓ຺ຫາຕິ ຫິ ອຸຈ຺ເຉທທິຏ຺ຐິສຫຄຕາຍ ຕຓ຺ຫາຍ ນາມໍ. ເອຕ຺ຖ ອຕ຺ຖຸທ຺ຘາໂຣ ວຸຈ຺ຈຕິ –

ຘນນິພ຺ພານສມ຺ປຕ຺ຕິ-ວິນາສຸຈ຺ເຉທທິຏ຺ຐິໂຍ;

ວຸຕ຺ຕາ ວິຠວສທ຺ເທນ, ອິຕິ ວິຎ຺ຎູ ວິຠາວເຍ.

ປາຕຸຠາໂວຕິ ປາຕຸຠວນໍ ປາຕຸຠາໂວ. ອາວິຠາໂວຕິ ອາວິຠວນໍ ອາວິຠາໂວ, ອຸຠິນ຺ນເມເຕສໍ ປາກຏຕາ ອິຈ຺ເຈວຕ຺ໂຖ. ຕິໂຣຠາໂວຕິ ຕິໂຣຠວນໍ ຕິໂຣຠາໂວ, ປຏິຈ຺ຉນ຺ນຠາໂວ. ວິນາຠາໂວຕິ ວິນາຠວນໍ ວິນາຠາໂວ, ວິໂຍໂຄ. ໂສຕ຺ຖິຠາໂວຕິ ໂສຕ຺ຖິຠວນໍ ໂສຕ຺ຖິຠາໂວ, ສຸວຕ຺ຖິຠາໂວ ສຸຂສ຺ສ ອຕ຺ຖິຕາ, ອຕ຺ຖໂຕ ປນ ນິພ຺ຠຍຕາ ນິຣຸປທ຺ທວຕາ ເອວ. ອຕ຺ຖິຠາໂວຕິ ອຕ຺ຖິຕາ ວິຊ຺ຊມານຕາ ອວິວິຕ຺ຕຕາ. ນຕ຺ຖິຠາໂວຕິ ນຕ຺ຖິຕາ ອວິຊ຺ຊມານຕາ ວິວິຕ຺ຕຕາ ຣິຕ຺ຕຕາ ຕຸຈ຺ຉຕາ ສຸຎ຺ຎຕາ. ໂອກາຣນ຺ຕປຸລ຺ລິງ຺ຄນິທ຺ເທໂສ.

ອຠິຠວຕີຕິ ອຠິຠວິຕາ, ປຣໍ ອຠິຠວນ຺ໂຕ ໂຍ ໂກຈິ. ເອວໍ ປຣິຠວິຕາ, ອນຸຠວຕີຕິ ອນຸຠວິຕາ, ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ອນຸຠວນ຺ໂຕ ໂຍ ໂກຈິ. ເອວໍ ສມນຸຠວິຕາ. ປຈ຺ຈນຸຠວິຕາ, ເອຕ຺ຖ ປນ ຍຖາ ‘‘ອມຕສ຺ສ ທາຕາ. ອນຸປ຺ປນ຺ນສ຺ສ ມຄ຺ຄສ຺ສ ອຸປ຺ປາເທຕາ’’ຕິອາທີສຸ ‘‘ທາຕາ’’ຕິ ປທານໍ ກຕ຺ຕຸວາຈການໍ ‘‘ອມຕສ຺ສາ’’ຕິອາທີຫິ ປເທຫິ ກມ຺ມວາຈເກຫິ ຉຏ຺ຐິຍນ຺ເຕຫິ ສທ຺ຘິໍ ໂຍຊນາ ທິສ຺ສຕິ, ຕຖາ ອິເມສມ຺ປິ ປທານໍ ‘‘ປຈ຺ຈາມິຕ຺ຕສ຺ສ ອຠິຠວິຕາ’’ຕິອາທິນາ ໂຍຊນາ ກາຕພ຺ພາ. ເອວໍ ອຎ຺ເຎສມ຺ປິ ເອວຣູປານໍ ປທານໍ. ອາກາຣນ຺ຕປຸລ຺ລິງ຺ຄນິທ຺ເທໂສ.

ຠວຕີຕິ ຠວໍ. ຠວິສ຺ສຕີຕິ ວາ ຠວໍ, ວຑ຺ຒມາໂນ ປຸຄ຺ຄໂລ. ‘‘ສຸວິຊາໂນ ຠວໍ ໂຫຕິ, ສຸວິຊາໂນ ປຣາຠໂວ. ຘມ຺ມກາໂມ ຠວໍ ໂຫຕິ, ຘມ຺ມເທສ຺ສີ ປຣາຠໂວ’’ຕິ ອິທເມຕສ຺ສຕ຺ຖສ຺ສ ສາຘກໍ ວຈນໍ. ອຖ ວາ ເຍນ ສທ຺ຘິໍ ກເຖຕິ, ໂສ ‘‘ຠວ’’ນ຺ຕິ ວຕ຺ຕພ຺ໂພ, ‘‘ຠວໍ ກຈ຺ຈາຍໂນ. ຠວໍ ອານນ຺ໂທ. ມຎ຺ເຎ ຠວໍ ປຕ຺ຖຍຕິ, ຣຎ຺ໂຎ ຠຣິຍໍ ປຕິພ຺ພຕ’’ນ຺ຕິອາທີສຸ. ເອຕ຺ຖ ປນ ຘາຕຸອຕ຺ເຖ ອາທໂຣ ນ ກາຕພ຺ໂພ, ສມ຺ມຸຕິອຕ຺ເຖເຍວາທໂຣ ກາຕພ຺ໂພ ‘‘ສງ຺ເກຕວຈນໍ ສຈ຺ຈໍ, ໂລກສມ຺ມຸຕິກາຣຓ’’ນ຺ຕິ ວຈນໂຕ. ໂວຫາຣວິສຍສ຺ມິຎ຺ຫິ ໂລກສມ຺ມຸຕິ ເອວ ປຘານາ ອວິລງ຺ຆນີຍາ. ປຣາຠວຕີຕິ ປຣາຠວໍ. ເອວໍ ປຣິຠວໍ. ອຠິຠວໍ. ອນຸຠວໍ. ປຠວຕິ ປໂຫຕິ ສກ຺ໂກຕີຕິ ປຠວໍ, ປໂຫນ຺ໂຕ ໂຍ ໂກຈິ. ນ ປຠວໍ ອປ຺ປຠວໍ, ‘‘ອປ຺ປຠວ’’ນ຺ຕິ ຈ ອິທໍ ຊາຕເກ ທິຏ຺ຐໍ –

‘‘ຉິນ຺ນພ຺ຠມິວ ວາເຕນ, ຣຸຓ຺ໂຓ ຣຸກ຺ຂມຸປາຄມິໍ;

ໂສຫໍ ອປ຺ປຠວໍ ຕຕ຺ຖ, ສາຂໍ ຫຕ຺ເຖຫິ ອຄ຺ຄຫິ’’ນ຺ຕິ

ຕຕ຺ຖ ສາຘກວຈນມິທໍ. ນິຄ຺ຄຫີຕນ຺ຕປຸລ຺ລິງ຺ຄນິທ຺ເທໂສ.

ຘນຠູຕີຕິ ຘນມສ຺ສ ຠວຕູຕິ ຘນຠູຕິ. ສິຣິຠູຕີຕິ ໂສຠາຍ ເຈວ ປຎ຺ຎາປຸຎ຺ຎານຎ຺ຈ ອຘິວຈນໍ. ສາ ອສ຺ສ ຠວຕູຕິ ສິຣິຠູຕິ. ເອວໍ ໂສຕ຺ຖິຠູຕິ, ສຸວຕ຺ຖິຠູຕິ. ອິກາຣນ຺ຕປຸລ຺ລິງ຺ຄນິທ຺ເທໂສ.

ຠາວີຕິ ຠວນສີໂລ ຠາວີ, ຠວນຘມ຺ໂມ ຠາວີ, ຠວເນ ສາຘຸກາຣີ ຠາວີ. ເອວໍ ວິຠາວີ. ສມ຺ຠາວີ. ປຣິຠາວີຕິ. ຕຕ຺ຣ ວິຠາວີຕິ ອຕ຺ຖວິຠາວເນ ສມຕ຺ໂຖ ປຓ຺ຑິໂຕ ວຸຈ຺ຈຕິ. ເອຕ຺ຖ ວິທ຺ວາ, ວິຊ຺ຊາຄໂຕ, ຎາຓີຕິອາທິ ປຣິຍາຍວຈນໍ ທຏ຺ຐພ຺ພໍ. ຠວນ຺ຕິ ຈຕ຺ຣ –

ວິທ຺ວາ ວິຊ຺ຊາຄໂຕ ຎາຓີ, ວິຠາວີ ປຓ຺ຑິໂຕ ສຸຘີ;

ພຸໂຘ ວິສາຣໂທ ວິຎ຺ຎູ, ໂທສຎ຺ຎູ ວິທ຺ທສຸ ວິທູ.

ວິປສ຺ສີ ປຏິຠາຓີ ຈ, ເມຘາວີ ນິປໂກ ກວິ;

ກຸສໂລ ວິທຸໂຣ ຘີມາ, ຄຕິມາ ມຸຕິມາ ຈຍໍ.

ຈກ຺ຂຸມາ ກຓ຺ຓວາ ທພ຺ໂພ, ຘີໂຣ ຠູຣິ ວິຈກ຺ຂໂຓ;