໒. ຠວຕິກ຺ຣິຍາປທມາລາວິຠາຄ

ອິໂຕ ປຣໍ ປວກ຺ຂາມິ, ໂສຕູນໍ ມຕິວຑ຺ຒນໍ;

ກ຺ຣິຍາປທກ຺ກມໍ ນາມ, ວິຠຕ຺ຕາທີນິ ທີປຍໍ.

ຕຕ຺ຣ ອາຂ຺ຍາຕິກສ຺ສ ກ຺ຣິຍາລກ຺ຂຓຕ຺ຕສູຈິກາ ຕ຺ຍາທໂຍ ວິຠຕ຺ຕິໂຍ, ຕາ ອຏ຺ຐວິຘາ ວຕ຺ຕມານາປຎ຺ຈມີສຕ຺ຕມີປໂຣກ຺ຂາຫິຍ຺ຍຕ຺ຕນຊ຺ຊຕນີຠວິສ຺ສນ຺ຕີ ກາລາຕິປຕ຺ຕິວເສນ.

ຕຕ຺ຖຕິ ອນ຺ຕິ, ສິ ຖ, ມິ ມ, ເຕ ອນ຺ເຕ, ເສ ວ຺ເຫ, ເອ ມ຺ເຫ ອິຈ຺ເຈຕາ ວຕ຺ຕມານາວິຠຕ຺ຕິໂຍ ນາມ.

ຕຸ ອນ຺ຕຸ, ຫິ ຖ, ມິ ມ, ຕໍ ອນ຺ຕໍ, ສຸ ວ຺ໂຫ, ເອ ອາມເສ ອິຈ຺ເຈຕາ ປຎ຺ຈມີວິຠຕ຺ຕິໂຍ ນາມ.

ເອຍ຺ຍ ເອຍ຺ຍຸໍ, ເອຍ຺ຍາສິ ເອຍ຺ຍາຖ, ເອຍ຺ຍາມິ ເອຍ຺ຍາມ, ເອຖ ເອຣໍ, ເອໂຖ ເອຍ຺ຍາວ຺ໂຫ, ເອຍ຺ຍໍ ເອຍ຺ຍາມ຺ເຫ ອິຈ຺ເຈຕາ ສຕ຺ຕມີວິຠຕ຺ຕິໂຍ ນາມ.

ອ ອຸ, ເອ ຕ຺ຖ, ອໍ ມ຺ຫ, ຕ຺ຖ ເຣ, ຕ຺ໂຖ ວ຺ໂຫ, ອິໍ ມ຺ເຫ ອິຈ຺ເຈຕາ ປໂຣກ຺ຂາວິຠຕ຺ຕິໂຍ ນາມ.

ອາ ອູ, ໂອ ຕ຺ຖ, ອໍ ມ຺ຫາ, ຕ຺ຖ ຕ຺ຖຸໍ, ເສ ວ຺ຫໍ, ອິໍ ມ຺ຫເສ ອິຈ຺ເຈຕາ ຫິຍ຺ຍຕ຺ຕນີວິຠຕ຺ຕິໂຍ ນາມ.

ອີ ອຸໍ, ໂອ ຕ຺ຖ, ອິໍ ມ຺ຫາ, ອາ ອູ, ເສ ວ຺ຫໍ, ອໍ ມ຺ເຫ ອິຈ຺ເຈຕາ ອຊ຺ຊຕນີວິຠຕ຺ຕິໂຍ ນາມ.

ສ຺ສຕິ ສ຺ສນ຺ຕິ, ສ຺ສສິ ສ຺ສຖ, ສ຺ສາມິ ສ຺ສາມ, ສ຺ສເຕ ສ຺ສນ຺ເຕ, ສ຺ສເສ ສ຺ສວ຺ເຫ, ສ຺ສໍ ສ຺ສາມ຺ເຫ ອິຈ຺ເຈຕາ ຠວິສ຺ສນ຺ຕີວິຠຕ຺ຕິໂຍ ນາມ.

ສ຺ສາ ສ຺ສໍສຸ, ສ຺ເສ ສ຺ສຖ, ສ຺ສໍ ສ຺ສາມ຺ຫາ, ສ຺ສຖ ສ຺ສິສຸ, ສ຺ສເສ ສ຺ສວ຺ເຫ, ສ຺ສິໍ ສ຺ສາມ຺ຫເສ ອິຈ຺ເຈຕາ ກາລາຕິປຕ຺ຕິວິຠຕ຺ຕິໂຍ ນາມ.

ສພ຺ພາສເມຕາສໍ ວິຠຕ຺ຕີນໍ ຍານິ ຍານິ ປຸພ຺ພການິ ຉ ປທານິ, ຕານິ ຕານິ ປຣສ຺ສປທານິ ນາມ. ຍານິ ຍານິ ປນ ປຣານິ ຉ ປທານິ, ຕານິ ຕານິ ອຕ຺ຕໂນປທານິ ນາມ. ຕຕ຺ຖ ປຣສ຺ສປທານິ ວຕ຺ຕມານາ ຉ, ປຎ຺ຈມິໂຍ ຉ, ສຕ຺ຕມິໂຍ ຉ, ປໂຣກ຺ຂາ ຉ, ຫິຍ຺ຍຕ຺ຕນິໂຍ ຉ, ອຊ຺ຊຕນິໂຍ ຉ, ຠວິສ຺ສນ຺ຕິໂຍ ຉ, ກາລາຕິປຕ຺ຕິໂຍ ຉາຕິ ອຏ຺ຐຈຕ຺ຕາລີສວິຘານິ ໂຫນ຺ຕິ, ຕຖາ ອິຕຣານິ, ສພ຺ພານິ ຕານິ ປິຓ຺ຑິຕານິ ຉນ຺ນວຸຕິວິຘານິ.

ປຣສ຺ສປທານມຕ຺ຕໂນປທານຎ຺ຈ ທ຺ເວ ທ຺ເວ ປທານິ ປຐມມຊ຺ຌິມຸຕ຺ຕມປຸຣິສາ ນາມ. ເຕ ວຕ຺ຕມານາທີສຸ ຈຕ຺ຕາໂຣ ຈຕ຺ຕາໂຣ, ອຏ຺ຐນ຺ນໍ ວິຠຕ຺ຕີນໍ ວເສນ ທ຺ວຕ຺ຕິໍສ, ປິຓ຺ຑິຕານິ ປຣິມາຓາເນວ.

ທ຺ວີສຸ ທ຺ວີສຸ ປເທສຸ ປຐມໍ ປຐມໍ ເອກວຈນໍ, ທຸຕິຍໍ ທຸຕິຍໍ ພຫຸວຈນໍ.

ຕຕ຺ຣ ວຕ຺ຕມານວິຠຕ຺ຕີນນ຺ຕິ ອນ຺ຕິ, ສິ ຖ, ມິ ມ ອິຈ຺ເຈຕານິ ປຣສ຺ສປທານິ. ເຕ ອນ຺ເຕ, ເສ ວ຺ເຫ, ເອ ມ຺ເຫ ອິຈ຺ເຈຕານິ ອຕ຺ຕໂນປທານິ. ປຣສ຺ສປທຕ຺ຕໂນປເທສຸປິຕິ ອນ຺ຕິ ອິຕິ ປຐມປຸຣິສາ, ສິຖ ອິຕິ ມຊ຺ຌິມປຸຣິສາ, ມິ ມ ອິຕິ ອຸຕ຺ຕມປຸຣິສາ, ເຕ ອນ຺ເຕ ອິຕິ ປຐມປຸຣິສາ, ເສ ວ຺ເຫ ອິຕິ ມຊ຺ຌິມປຸຣິສາ, ເອ ມ຺ເຫ ອິຕິ ອຸຕ຺ຕມປຸຣິສາ.

ປຐມມຊ຺ຌິມຸຕ຺ຕມປຸຣິເສສຸປິ ຕິ-ອິຕິ ເອກວຈນໍ, ອນ຺ຕິ-ອິຕິ ພຫຸວຈນນ຺ຕິ ເອວໍ ເອກວຈນພຫຸວຈນານິ ກມໂຕ ເຎຍ຺ຍານິ. ເອວໍ ເສສາສຸ ວິຠຕ຺ຕີສຸ ປຣສ຺ສປທຕ຺ຕໂນປທປຐມມຊ຺ຌິມຸຕ຺ຕມປຸຣິເສກວຈນພຫຸວຈນານິ ເຎຍ຺ຍານິ.

ຕຕ຺ຖ ວິຠຕ຺ຕີຕິ ເກນຏ຺ເຐນ ວິຠຕ຺ຕິ? ກາລາທິວເສນ ຘາຕ຺ວຕ຺ຖໍ ວິຠຊຕີຕິ ວິຠຕ຺ຕິ, ສ຺ຍາທີຫິ ນາມິກວິຠຕ຺ຕີຫິ ສຫ ສພ຺ພສງ຺ຄາຫກວເສນ ປນ ສກຕ຺ຖປຣຕ຺ຖາທິເຠເທ ອຕ຺ເຖ ວິຠຊຕີຕິ ວິຠຕ຺ຕິ, ກມ຺ມາທໂຍ ວາ ກາຣເກ ເອກວຈນພຫຸວຈນວເສນ ວິຠຊຕີຕິ ວິຠຕ຺ຕິ, ວິຠຊິຕພ຺ພາ ຎາເຓນາຕິປິ ວິຠຕ຺ຕິ, ວິຠຊນ຺ຕິ ອຕ຺ເຖ ເອຕາຍາຕິປິ ວິຠຕ຺ຕິ, ອຖ ວາ ສຕິປິ ຊິນສາສເນ ອວິຠຕ຺ຕິກນິທ຺ເທເສ ສພ຺ເພນ ສພ຺ພໍ ວິຠຕ຺ຕີຫິ ວິນາ ອຕ຺ຖສ຺ສາ’ນິທ຺ທິສິຕພ຺ພໂຕ ວິເສເສນ ວິວິເຘນ ວາ ອາກາເຣນ ຠຊນ຺ຕິ ເສວນ຺ຕິ ນໍ ປຓ຺ຑິຕາຕິປິ ວິຠຕ຺ຕິ. ຕຕ຺ຖ ອວິຠຕ຺ຕິກນິທ຺ເທສລກ຺ຂຓໍ ວທາມ ສຫ ປໂຍຄນິທສ຺ສນາທີຫິ.

ອວິຠຕ຺ຕິກນິທ຺ເທໂສ, ນາມິເກສຸປລພ຺ຠຕິ;

ນາຂ຺ຍາເຕສູຕິ ວິຎ຺ເຎຍ຺ຍ-ມິທເມຕ຺ຖ ນິທສ຺ສນໍ.

ນິຄ຺ໂຣໂຘວ ມຫາຣຸກ຺ໂຂ, ເຖຣ ວາທານມຸຕ຺ຕໂມ;

ອນູນໍ ອນຘິກຎ຺ຈ, ເກວລໍ ຊິນສາສນໍ.

ຕຕ຺ຣ ເຖຣ-ອິຕິ ອວິຠຕ຺ຕິໂກ ນິທ຺ເທໂສ, ເຖຣານໍ ອຍນ຺ຕິ ເຖໂຣ. ໂກ ໂສ? ວາໂທ. ເຖຣວາໂທ ອຎ຺ເຎສໍ ວາທານໍ ອຸຕ຺ຕໂມຕິ ອຍມຕ຺ໂຖ ເວທິຕພ຺ໂພ.

‘‘ກາໂຍ ເຕ ສພ຺ພ ໂສວຓ຺ໂຓ’’, ອິຈ຺ຈາທິມ຺ຫິປິ ນາມິເກ;

ອວິຠຕ຺ຕິກນິທ຺ເທໂສ, ຄເຫຕພ຺ໂພ ນຍຎ຺ຎຸນາ.

ອວິຠຕ຺ຕິກນິທ຺ເທໂສ, ນນ຺ວາຂ຺ຍາເຕປິ ທິສ຺ສຕິ;

‘‘ໂຠ ຂາທ ປິວ’’ອິຈ຺ຈຕ຺ຣ, ວເທ ໂຍ ໂກຈິ ໂຈທໂກ.

ຍທິ ເອວໍ ມເຕນສ຺ສ, ຠເວຍ຺ຍ ອວິຠຕ຺ຕິກໍ;

‘‘ຠິກ຺ຂຸ, ໂຠ ປຸຣິສິ’’ຈ຺ຈາທິ, ປທມ຺ປິ, ນ ຫິທໍ ຕຖາ.

‘‘ຠິກ຺ຂຸ, ໂຠ ປຸຣິສິ’’ຈ຺ຈາທິ, ສິ ຄ ໂລເປນ ວຸຈ຺ຈຕິ;

ຕຖາ ‘‘ຂາທາ’’ຕິອາທີນິ, ຫິ ໂລເປນ ປວຸຈ຺ຈເຣ.

ເອວໍ ອວິຠຕ຺ຕິກນິທ຺ເທໂສ ອາຂ຺ຍາເຕສຸ ນ ລພ຺ຠຕິ, ນາເມສຸເຍວ ລພ຺ຠຕິ. ຕຕ຺ຣາປິ ‘‘ອຏ຺ຐ ຈ ປຸຄ຺ຄລ ຘມ຺ມທສາ ເຕ’’ຕິ ເອຕ຺ຖ ຉນ຺ທວເສນ ປຸຄ຺ຄລ ອິຕິ ຣສ຺ສກຣຓໍ ທຏ຺ຐພ຺ພໍ, ນ ‘‘ກກຸສນ຺ຘ ໂກຓາຄມໂນ ຈ ກສ຺ສໂປ’’ຕິ ເອຕ຺ຖ ກກຸສນ຺ຘ ອິຕິ ອວິຠຕ຺ຕິກນິທ຺ເທໂສ ວິຍ ອວິຠຕ຺ຕິກນິທ຺ເທໂສ ທຏ຺ຐພ຺ໂພ. ‘‘ຠິກ຺ຂຸ ນິສິນ຺ເນ ມາຕຸຄາໂມ ອຸປນິສິນ຺ໂນ ວາ ໂຫຕິ ອຸປນິປນ຺ໂນ ວາ’’ຕິ ເອຕ຺ຖ ປນ ຠິກ຺ຂູຕິ ອິທໍ ຠິກ຺ຂຸມ຺ຫີຕິ ວຕ຺ຕພ຺ພຕ຺ຖຕ຺ຕາ ຠຸມ຺ເມ ປຈ຺ຈຕ຺ຕນ຺ຕິປິ ອທິຏ຺ຐວິຠຕ຺ຕິກນິທ຺ເທໂສຕິປິ ວຕ຺ຕຸໍ ຍຸຊ຺ຊຕິ. ຕຕ຺ຖ ປນ ຉນ຺ທວເສນ ກຕຣສ຺ສຕ຺ຕາ ຕານິ ປທານິ ອວິຠຕ຺ຕິກນິທ຺ເທສປກ຺ຂມ຺ປິ ຠຊນ຺ຕີຕິ ວຕ຺ຕຸໍ ນ ຍຸຊ຺ຊຕິ.

ຕຕ຺ຖ ປຣສ຺ສປທານີຕິ ປຣສ຺ສ ອຕ຺ຖຠູຕານິ ປທານິ ປຣສ຺ສປທານິ. ເອຕ຺ຖຸຕ຺ຕມປຸຣິເສສຸ ອຕ຺ຕໂນ ອຕ຺ເຖສຸປິ ອຕ຺ຕໂນປທໂວຫາໂຣ ນ ກຣິຍຕິ.

ກິຎ຺ຈາປິ ອຕ຺ຕໂນ ອຕ຺ຖາ, ປຸຣິສາ ອຸຕ຺ຕມວ຺ຫຍາ;

ຕຖາປິ ອິຕເຣສານ-ມຸສ຺ສນ຺ນຕ຺ຕາວ ຕພ຺ພສາ;

ຕພ຺ໂພຫາໂຣ ອິເມສານໍ, ໂປຣາເຓຫິ ນິໂຣປິໂຕ.

ອຕ຺ຕໂນປທານີຕິ ອຕ຺ຕໂນ ອຕ຺ຖຠູຕານິ ປທານິ ອຕ຺ຕໂນປທານິ. ເອຕ຺ຖ ປນ ປຐມມຊ຺ຌິມປຸຣິເສສຸ ປຣສ຺ສຕ຺ເຖສຸປິ ປຣສ຺ສປທໂວຫາໂຣ ນ ກຣິຍຕິ.

ປຐມມຊ຺ຌິມາ ເຈເຕ, ປຣສ຺ສຕ຺ຖາ ຕຖາປິ ຈ;

ອິຕເຣສໍ ນິຣູຬ຺ຫຕ຺ຕາ, ຕພ຺ໂພຫາຣສ຺ສ ສຈ຺ຈໂຕ.

ອິມສ຺ສ ປນິເມສານໍ, ປຸພ຺ພໂວຫາຣຕາຍ ຈ;

ຕຖາ ສງ຺ກຣໂທສສ຺ສ, ຫຣຓຕ຺ຖາຍ ໂສ ອຍໍ;

ອຕ຺ຕໂນປທໂວຫາໂຣ, ເອສມາໂຣປິໂຕ ຘຸວໍ.

ປຣສ຺ສປທສຎ຺ຎາທິ-ສຎ຺ຎາໂຍ ພຫຸກາ ອິຘ;

ໂປຣາເຓຫິ ກຕຕ຺ຕາຕາ, ສຎ຺ຎາ ໂປຣາຓິກາ ມຕາ.

ຕສ຺ມາ ອິຘ ປຐມປຸຣິສາທີນໍ ຕິຓ຺ຓໍ ປຸຣິສານໍ ວຈນຕ຺ຖໍ ນ ປຣິເຍສາມ. ຣູຬ຺ຫິຍາ ຫິ ໂປຣາເຓຫິ ຕ຺ຍາທີນໍ ປຸຣິສສຎ຺ຎາ ວິຫິຕາ.

ເອກວຈນພຫຸວຈເນສຸ ປນ ເອກສ຺ສຕ຺ຖສ຺ສ ວຈນໍ ເອກວຈນໍ. ພຫູນມຕ຺ຖານໍ ວຈນໍ ພຫຸວຈນໍ. ອຖ ວາ ພຫຸຕ຺ເຕປິ ສຕິ ສມຸທາຍວເສນ ຊາຕິວເສນ ວາ ຈິຕ຺ເຕນ ສມ຺ປິຓ຺ເຑຕ຺ວາ ເອກີກຕສ຺ສຕ຺ຖສ຺ສ ເອກສ຺ສ ວິຍ ວຈນມ຺ປິ ເອກວຈນໍ, ພຫຸຕ຺ເຕ ນິສ຺ສິຕສ຺ສ ນິສ຺ສຍໂວຫາເຣນ ວຸຕ຺ຕສ຺ສ ນິສ຺ສຍວເສນ ເອກສ຺ສ ວິຍ ວຈນມ຺ປິ ເອກວຈນໍ, ເອກຕ຺ຕລກ຺ຂເຓນ ພວ຺ຫຕ຺ຖານໍ ເອກວຈນໍ ວິຍ ວຈນມ຺ປິ ເອກວຈນໍ. ອພຫຸຕ຺ເຕປິ ສຕິ ອຕ຺ຕຄຣຸກາຣາປຣິຈ຺ເຉທມາຕິການຸສນ຺ຘິນຍປຸຈ຺ຉາສຠາຄປຸຖຸຈິຕ຺ຕ- ສມາໂຍຄປຸຖຸອາຣມ຺ມຓວເສນ ເອກຕ຺ຖສ຺ສ ພຫູນໍ ວິຍ ວຈນໍ ພຫຸວຈນໍ, ຕຖາ ເຍ ເຍ ພຫໂວ ຕນ຺ນິວາສຕໍປຸຕ຺ຕສງ຺ຂາຕສ຺ເສກສ຺ສຕ຺ຖສ຺ສ ຣູຬ຺ຫີວເສນ ພຫູນໍ ວິຍ ວຈນມ຺ປິ ພຫຸວຈນໍ, ເອກສ຺ສຕ຺ຖສ຺ສ ອຎ຺ເຎນຕ຺ເຖນ ເອກາຠິຘານວເສນ ພຫູນໍ ວິຍ ວຈນມ຺ປິ ພຫຸວຈນໍ, ເອກສ຺ສຕ຺ຖສ຺ສ ນິສ຺ສິຕວເສນ ພຫູນໍ ວິຍ ວຈນມ຺ປິ ພຫຸວຈນໍ, ເອກສ຺ສຕ຺ຖສ຺ສ ອາຣມ຺ມຓເຠທກິຈ຺ຈເຠທວເສນ ພຫູນໍ ວິຍ ວຈນມ຺ປິ ພຫຸວຈນໍ. ເອວມິເມຫິ ອາກາເຣຫິ ເອກມ຺ຫິ ວຕ຺ຕພ຺ເພ, ເອກມ຺ຫິ ວິຍ ຈ ວຕ຺ຕພ຺ເພ ເອກວຈນໍ, ພຫຸມ຺ຫິ ວຕ຺ຕພ຺ເພ, ພຫຸມ຺ຫິ ວິຍ ຈ ວຕ຺ຕພ຺ເພ ພຫຸວຈນໍ ໂຫຕີຕິ ທຏ຺ຐພ຺ພໍ. ປຸຖຸວຈນໍ, ອເນກວຈນນ຺ຕິ ຈ ອິມສ຺ເສວ ນາມໍ.

ວຈເນສຸ ອຍໍ ອຕ຺ໂຖ, ນາມາຂ຺ຍາຕວິຠຕ຺ຕິນໍ;

ວເສນ ອຘິຄນ຺ຕພ຺ໂພ, ສາສນຕ຺ຖຄເວສິນາ.

ຕສ຺ມາ ຕທຕ຺ຖວິຎ຺ຎາປນຕ຺ຖໍ ອິຘ ນາມິກປໂຍເຄຫິ ສເຫວາຂ຺ຍາຕປໂຍເຄ ປວກ຺ຂາມ – ‘‘ຣາຊາ ອາຄຈ຺ຉຕິ, ສຫາໂຍ ເມ ອາຄຈ຺ຉຕິ, ເອກໍ ຈິຕ຺ຕ’’ ມິຈ຺ເຈວມາທໂຍ ເອກສ຺ສຕ຺ຖສ຺ສ ເອກວຈນປໂຍຄາ. ‘‘ຣາຊາໂນ ອາຄຈ຺ຉນ຺ຕິ, ສຫາຍາ ເມ ອາຄຈ຺ຉນ຺ຕິ, ນ ເມ ເທສ຺ສາ ອຸໂຠ ປຸຕ຺ຕາ, ທ຺ເວ ຕີຓິ’’ ອິຈ຺ເຈວມາທໂຍ ພວ຺ຫຕ຺ຖານໍ ພຫຸວຈນປໂຍຄາ.

‘‘ສາ ເສນາ ມຫຕີ ອາສິ, ພຫຸຊ຺ຊໂນ ປສນ຺ໂນສິ, ສພ຺ໂພ ຕໍ ຊໂນ ໂອຊິນາຍຕຸ, ອິຕ຺ຖິຄຸມ຺ພສ຺ສ ປວຣາ, ພຸທ຺ຘສ຺ສາຫໍ ວຕ຺ຖຍຸຄໍ ອທາສິໍ, ທ຺ວຍໍ ໂວ ຠິກ຺ຂເວ ເທເສສ຺ສາມິ, ເປມໍ ມຫນ຺ຕໍ ຣຕນຕ຺ຕຍສ຺ສ, ກເຣ ປສາທຎ຺ຈ ນໂຣ ອວສ຺ສໍ, ຠິກ຺ຂຸສງ຺ໂຆ, ພລກາໂຍ, ເທວນິກາໂຍ, ອຣິຍຄໂຓ’’- ອິຈ຺ເຈວມາທໂຍ, ‘‘ທ຺ວິກໍ ຕິກ’’ມິຈ຺ຈາທໂຍ ຈ ສມຸທາຍວເສນ ພວ຺ຫຕ຺ຖານໍ ເອກວຈນປໂຍຄາ.

ກຕ຺ຖຈິ ປນ ອີທິເສສຸ ຐາເນສຸ ພຫຸວຈນປໂຍຄາປິ ທິສ຺ສນ຺ຕິ. ຕຖາ ຫິ ‘‘ປູຊິຕາ ຎາຕິສງ຺ເຆຫິ, ເທວກາຍາ ສມາຄຕາ, ສພ຺ເພເຕ ເທວນິກາຍາ, ທ຺ເວ ເທວສງ຺ຆາ, ຕີຓິ ທຸການິ, ຈຕ຺ຕາຣິ ນວການິ’’ ອິຈ຺ເຈວມາທໂຍ ປໂຍຄາປິ ທິສ຺ສນ຺ຕິ. ອິເມ ເອກວຈນວເສນ ວຕ຺ຕພ຺ພສ຺ສ ສມຸທາຍສ຺ສ ພຫຸສມຸທາຍວເສນ ພຫຸວຈນປໂຍຄາຕິ ຄເຫຕພ຺ພາ, ສງ຺ຄຍ຺ຫມານາ ຈ ພວ຺ຫຕ຺ຖພຫຸວຈເນ ສງ຺ຄຫໍ ຄຈ຺ຉນ຺ຕິ ວິສຸໍເຍວ ວາ, ຕສ຺ມາ ພຫຸສມຸທາຍາເປກ຺ຂພຫຸວຈນນ຺ຕິ ເອເຕສໍ ນາມໍ ເວທິຕພ຺ພໍ.

‘‘ປາຓໍ ນ ຫເນ, ສສ຺ໂສ ສມ຺ປຊ຺ຊຕິ’’ ອິຈ຺ເຈວມາທໂຍ ຊາຕິວເສນ ພວ຺ຫຕ຺ຖານໍ ເອກວຈນປໂຍຄາ, ຕພ຺ຠາວສາມຎ຺ເຎນ ພວ຺ຫຕ຺ຖານໍ ເອກວຈນປໂຍຄາຕິປິ ວຕ຺ຕຸໍ ວຏ຺ຏຕິ.

‘‘ນາຄໍ ຣຏ຺ຐສ຺ສ ປູຊິຕໍ, ສາວຕ຺ຖີ ສທ຺ຘາ ອໂຫສິ ປສນ຺ນາ’’ ອິຈ຺ເຈວມາທໂຍ ນິສ຺ສຍວເສນ ປວຕ຺ຕານໍ ນິສ຺ສຍໂວຫາເຣນ ວຸຕ຺ຕານເມກວຈນປໂຍຄາ.

‘‘ຕິລກ຺ຂຓໍ, ກຸສລາກຸສລໍ, ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາ ສຬາຍຕນໍ, ຘມ຺ມວິນໂຍ, ຈິຕ຺ຕເສໂນ ຈ ຄນ຺ຘພ຺ໂພ, ນຕິຍາ ອສຕິ ອາຄຕິຄຕິ ນ ໂຫຕິ, ອາຄຕິຄຕິຍາ ອສຕິ ຈຸຕູປປາໂຕ ນ ໂຫຕິ’’ ອິຈ຺ເຈວມາທໂຍ ເອກຕ຺ຕລກ຺ຂເຓ ພວ຺ຫຕ຺ຖານໍ ເອກວຈນປໂຍຄາ.

‘‘ເອວໍ ມຍໍ ຄຓ຺ຫາມ, ອມ຺ຫາກໍ ປກຕິ, ປຘານນ຺ຕິ ໂຂ ເມຆິຍ ວທມານໍ ກິນ຺ຕິ ວເທຍ຺ຍາມ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ອຕ຺ຕວເສນ ພຫຸວຈນປໂຍຄາ.

‘‘ເຕ ມນຸສ຺ສາ ຕໍ ຠິກ຺ຂຸໍ ເອຕທໂວຈຸໍ ‘ຠຸຎ຺ຊຖ ຠນ຺ເຕ’ຕິ, ອຫໍ ມນຸສ຺ເສສຸ ມນຸສ຺ສຠູຕາ, ອພ຺ຠາຄຕານາ’ສນກໍ ອທາສິໍ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ຄຣຸກາຣວເສນ ພຫຸວຈນປໂຍຄາ.

‘‘ອປ຺ປຈ຺ຈຍາ ຘມ຺ມາ, ອສງ຺ຂຕາ ຘມ຺ມາ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ອປຣິຈ຺ເຉທວເສນ ພຫຸວຈນປໂຍຄາ, ອນິຍມິຕສງ຺ຂາວເສນ ພຫຸວຈນປໂຍຄາ ວາ.

ເກຈິ ປນ ‘‘ເທສນາໂສຕປາຕວເສນ ພຫຸວຈນປໂຍຄາ’’ຕິປິ ວທນ຺ຕິ, ຕໍ ນ ຄເຫຕພ຺ພໍ. ນ ຫິ ຕຖາຄໂຕ ສຕິສມ຺ປຊຎ຺ຎຣຫິໂຕ ຘມ຺ມໍ ເທເສຕິ, ຍຸຕ຺ຕິ ຈ ນ ທິສ຺ສຕິ ‘‘ມາຕິກາຍໍ ປຸຈ຺ຉາຍໍ ວິສ຺ສຊ຺ຊເນ ຈາຕິ ຕີສຸປິ ຐາເນສຸ ອປ຺ປຈ຺ຈຍາທິຘມ຺ເມ ເທເສນ຺ໂຕ ສຕ຺ຖາ ປຸນປ຺ປຸນໍ ພຫຸວຈນວເສນ ເທສນາໂສເຕ ປຕິຕ຺ວາ ຘມ຺ມໍ ເທເສຕີ’’ຕິ.

‘‘ກຕເມ ຘມ຺ມາ ອປ຺ປຈ຺ຈຍາ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ມາຕິການຸສນ຺ຘິນເຍນ ພຫຸວຈນປໂຍຄາ.

‘‘ອິເມ ຘມ຺ມາ ອປ຺ປຈ຺ຈຍາ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ປຸຈ຺ຉານຸສນ຺ຘິນເຍນ ພຫຸວຈນປໂຍຄາ.

‘‘ກຕເມ ຘມ຺ມາ ໂນ ປຣາມາສາ, ເຕ ຘມ຺ເມ ຐເປຕ຺ວາ ອວເສສາ ກຸສລາກຸສລາພ຺ຍາກຕາ ຘມ຺ມາ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ປຸຈ຺ຉາສຠາເຄນ ພຫຸວຈນປໂຍຄາ.

‘‘ອຕ຺ຖິ ຠິກ຺ຂເວ ອຎ຺ເຎວ ຘມ຺ມາ ຄມ຺ຠີຣາ ທຸທ຺ທສາ ທຸຣນຸໂພຘາ ສນ຺ຕາ ປຓີຕາ ອຕກ຺ກາວຈຣາ ນິປຸຓາ ປຓ຺ຑິຕເວທນີຍາ, ເຍ ຕຖາຄໂຕ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທຕີ’’ຕິ ອຍເມກສ຺ສຕ຺ຖສ຺ສ ປຸຖຸຈິຕ຺ຕສມາໂຍຄປຸຖຸອາຣມ຺ມຓວເສນ ພຫຸວຈນປໂຍໂຄ.

‘‘ເອກໍ ສມຍໍ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ມຫາວເນ,

ສນ຺ຕິ ປຸຕ຺ຕາ ວິເທຫານໍ, ທີຆາວຸ ຣຏ຺ຐວຑ຺ຒໂນ;

ເຕ ຣຊ຺ຊໍ ກາຣຍິສ຺ສນ຺ຕິ, ມິຖິລາຍໍ ປຊາປຕິ’’ –

ອິຈ຺ເຈວມາທໂຍ ສທ຺ທາ ເຍ ເຍ ພຫໂວ, ຕນ຺ນິວາສຕໍປຸຕ຺ຕສງ຺ຂາຕສ຺ເສກຕ຺ຖສ຺ສ ຣູຬ຺ຫີວເສນ ພຫຸວຈນປໂຍຄາ.

‘‘ສາຣິປຸຕ຺ຕໂມຄ຺ຄລ຺ລາເນ ອາມນ຺ເຕສິ ‘ຄຈ຺ຉຖ ຕຸມ຺ເຫ ສາຣິປຸຕ຺ຕາ ກີຏາຄິຣິໍ ຄນ຺ຕ຺ວາ ອສ຺ສຊິປຸນພ຺ພສຸການໍ ຠິກ຺ຂູນໍ ກີຏາຄິຣິສ຺ມາ ປພ຺ພາຊນີຍກມ຺ມໍ ກໂຣຖ, ຕຸມ຺ຫາກໍ ເອເຕ ສທ຺ຘິວິຫາຣິໂນ’ຕິ’’, ‘‘ກຈ຺ຈິ ໂວ ກຸລປຸຕ຺ຕາ, ເອຖ ພ຺ຍຄ຺ຆາ ນິວຕ຺ຕວ຺ໂຫ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ອຎ຺ເຎນຕ຺ເຖນ ເອກາຠິຘານວເສນ ພຫຸວຈນປໂຍຄາ.

‘‘ມຎ຺ຈາ ອຸກ຺ກຸຏ຺ຐິໍ ກໂຣນ຺ຕິ’’ ອິຈ຺ເຈວມາທໂຍ ເອກສ຺ສຕ຺ຖສ຺ສ ນິສ຺ສິຕວເສນ ພຫຸວຈນປໂຍຄາ.

‘‘ຈຕ຺ຕາໂຣ ສຕິປຏ຺ຐານາ’’ຕິ ອຍມາຣມ຺ມຓເຠເທນ ເອກສ຺ສຕ຺ຖສ຺ສ ພຫຸວຈນປໂຍໂຄ.

‘‘ຈຕ຺ຕາໂຣ ສມ຺ມປ຺ປຘານາ’’ຕິ ອຍໍ ປນ ກິຈ຺ຈເຠເທນ ເອກສ຺ສຕ຺ຖສ຺ສ ພຫຸວຈນປໂຍໂຄ.

ຕຕ຺ຖ ເອກຕ຺ເຖກວຈນໍ, ສມຸທາຍາເປກ຺ເຂກວຈນໍ, ຊາຕ຺ຍາເປກ຺ເຂກວຈນໍ, ຕນ຺ນິສ຺ສຍາເປກ຺ເຂກວຈນໍ, ເອກຕ຺ຕລກ຺ຂເຓກວຈນນ຺ຕິ ປຎ຺ຈວິຘໍ ເອກວຈນໍ ຠວຕິ. ເອຕ຺ຖ ປນ ຊາຕ຺ຍາເປກ຺ເຂກວຈນໍ ອຕ຺ຖໂຕ ສາມຎ຺ຎາເປກ຺ເຂກວຈນເມວາຕິ ທຏ຺ຐພ຺ພໍ.

ພວ຺ຫຕ຺ຖພຫຸວຈນໍ, ພຫຸສມຸທາຍາເປກ຺ຂພຫຸວຈນໍ, ອຕ຺ຕພຫຸວຈນໍ, ຄຣຸກາຣພຫຸວຈນໍ, ອປຣິຈ຺ເຉທພຫຸວຈນໍ, ມາຕິການຸສນ຺ຘິນຍພຫຸວຈນໍ, ປຸຈ຺ຉານຸສນ຺ຘິນຍພຫຸວຈນໍ, ປຸຈ຺ຉາສຠາຄພຫຸວຈນໍ, ປຸຖຸຈິຕ຺ຕສມາໂຍຄປຸຖຸອາຣມ຺ມຓພຫຸວຈນໍ, ຕນ຺ນິວາສພຫຸວຈນໍ, ຕໍປຸຕ຺ຕພຫຸວຈນໍ, ເອກາຠິຘານພຫຸວຈນໍ, ຕນ຺ນິສ຺ສິຕາເປກ຺ຂພຫຸວຈນໍ, ອາຣມ຺ມຓເຠທພຫຸວຈນໍ, ກິຈ຺ຈເຠທພຫຸວຈນນ຺ຕິ ປນ຺ນຣສວິຘໍ ພຫຸວຈນໍ ຠວຕິ. ອິຈ຺ເຈວໍ ວີສຘາ ສພ຺ພານິ ເອກວຈນພຫຸວຈນານິ ສງ຺ຄຫິຕານິ. ອຕ຺ຣິທໍ ປາຬິວວຕ຺ຖານໍ –

ເອກຕ຺ເຖ ເທກວຈນ-ຎ຺ຈິຕຣສ຺ມິຕຣມ຺ປິ ຈ;

ສມຸທາຍຊາຕິເອກຕ຺ຕ-ລກ຺ຂເຓກວໂຈປິ ຈ;

ສາຏ຺ຐກເຖ ປິຏກມ຺ຫິ, ປາເຐ ປາເຍນ ທິສ຺ສເຣ.

ຄຣຸມ຺ຫິ ຈຕ຺ຕເນກສ຺ມິໍ, ພຫຸວຈນກໍ ປນ;

ປາຬິຍໍ ອປ຺ປກໍ ອຏ຺ຐ-ກຖາຏີກາສຸ ຕໍ ພຫຸໍ.

ຕຖາ ຫິ ພຫຸກໍ ເທກ-ວຈນໍເຍວ ປາຬິຍໍ;

ຄຣຸມ຺ຫິ ຈຕ຺ຕເນກສ຺ມິໍ, ອິທເມຕ຺ຖ ນິທສ຺ສນໍ.

‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ຕວ ສາສນມາຄມ຺ມ, ປຕ຺ໂຕມ຺ຫິ ອມຕໍ ປທໍ’’.

ອິຈ຺ເຈວມາທໂຍ ປາຐາ, ພຫຸຘາ ຊິນສາສເນ;

ທິສ຺ສນ຺ຕີຕິ ວິຊາເນຍ຺ຍ, ວິທ຺ວາ ອກ຺ຂຣຈິນ຺ຕໂກ.

ສາຕິສຍໍ ຄຣຸກາຣາ-ຣຫສ຺ສາປິ ມເຫສິໂນ;

ເອກວຈນໂຍເຄນ, ນິທ຺ເທໂສ ທິສ຺ສເຕ ຍໂຕ.

ຕໂຕ ໂວຫາຣກຸສໂລ, ກເຣຍ຺ຍຕ຺ຖານຸຣູປໂຕ;

ເອກວຈນໂຍຄໍ ວາ, ອິຕຣໍ ວາ ສຸເມຘໂສ.

ປາເຍນ ຕນ຺ນິວາສມ຺ຫິ, ພຫຸວຈນກໍ ຐິຕໍ;

ຕໍປຸຕ຺ເຕ ອປ຺ປກໍ ຕນ຺ນິ-ສ຺ສເຍກວຈນມ຺ປິ ຈ.

ປຸຖຸຈິຕ຺ຕາປຣິຈ຺ເຉທ-ມາຕິກາສນ຺ຘິອາທິສຸ;

ພຫຸວຈນກຎ຺ຈາປິ, ອປ຺ປກນ຺ຕິ ປກາສເຍ.

ເອກາຠິຘານໂຕ ກິຈ຺ຈາ, ຕຖາ ໂຄຈຣໂຕປິ ຈ;

ພຫຸວຈນກໍ ຕນ຺ນິ-ສ຺ສິຕາເປກ຺ຂຎ຺ຈ ອປ຺ປກໍ.

ອິຈ຺ເຈວໍ ສປ຺ປໂຍຄໍ ຕຸ, ຎຕ຺ວານ ວຈນທ຺ວຍໍ;

ກາຕພ຺ໂພ ປນ ໂວຫາໂຣ, ຍຖາປາຬິ ວິຠາວິນາ.

ອິທານິ ກາລາທິວເສນ ອາຂ຺ຍາຕປ຺ປວຕ຺ຕິໍ ທີປຍິສ຺ສາມ – ກາລກາຣກປຸຣິສປຣິທີປກໍ ກ຺ຣິຍາລກ຺ຂຓໍ ອາຂ຺ຍາຕິກໍ. ຕຕ຺ຣ ກາລນ຺ຕິ ອຕີຕານາຄຕປຈ຺ຈຸປ຺ປນ຺ນວເສນ ຕໂຍ ກາລາ, ອຕີຕານາຄຕປຈ຺ຈຸປ຺ປນ຺ນາຓຕ຺ຕິປຣິກປ຺ປກາລາຕິປຕ຺ຕິວເສນ ປນ ຉ, ເຕ ເອເກກາ ຕິປຸຣິສກາ.

ວຸຕ຺ຕປ຺ປກາຣກາເລສຸ, ຍທິທໍ ວຕ຺ຕເຕ ຍໂຕ;

ອາຂ຺ຍາຕິກໍ ຕໂຕ ຕສ຺ສ, ກາລທີປນຕາ ມຕາ.

ກາຣກນ຺ຕິ ກມ຺ມກຕ຺ຕຸຠາວາ. ເຕ ຫິ ອຸປຈາຣມຸຂ຺ຍສຠາວວເສນ ກໂຣນ຺ຕິ ກຣຓນ຺ຕິ ຈ ‘‘ກາຣກາ’’ຕິ ວຸຈ຺ຈນ຺ຕິ. ເຕວ ຍຖາກ຺ກມໍ ກ຺ຣິຍານິມິຕ຺ຕ ຕໍສາຘກ ຕໍສຠາວາຕິ ເວທິຕພ຺ພາ.

ກມ຺ມໍ ກຕ຺ຕາ ຈ ຠາໂວ ຈ, ອິຈ຺ເຈວໍ ກາຣກາ ຕິຘາ;

ວິຠຕ຺ຕິປຈ຺ຈຍາ ເອຕ຺ຖ, ວຸຕ຺ຕາ ນາຎ຺ຎຕ຺ຣ ສຈ຺ຈໂຕ.

‘‘ປຣິຠວິຍ຺ຍຕິ’’ຈ຺ຈາທີ, ກມ຺ເມ ສິຊ຺ຌນ຺ຕິ ກາຣເກ;

‘‘ສມ຺ຠວຕີ’’ຕິອາທີນິ, ສິຊ຺ຌເຣ ກຕ຺ຕຸກາຣເກ.

‘‘ວິຠວິຍ຺ຍຕິ’’ອິຈ຺ຈາທີ, ຠາເວ ສິຊ຺ຌນ຺ຕິ ກາຣເກ;

ຕິວິເຘສ຺ເວວເມເຕສຸ, ວິຠຕ຺ຕິປຈ຺ຈຍາ ມຕາ.

ກາຣກຕ຺ຕຍມຸຕ຺ຕໍ ຍໍ, ອາຂ຺ຍາຕໍ ນຕ຺ຖິ ສພ຺ພໂສ;

ຕສ຺ມາ ຕທ຺ທີປນຕ຺ຕມ຺ປິ, ຕສ຺ສາຂ຺ຍາຕສ຺ສ ຠາສິຕໍ.

ກາຣກຕ຺ຕໍ ຕຸ ຠາວສ຺ສ, ສເຈປິ ນ ສມີຣິຕໍ;

ກາຣກລກ຺ຂເຓ ເຕນ, ຠາເວນ ຈ ອວຕ຺ຖຸນາ.

ກ຺ຣິຍານິປ຺ຜຕ຺ຕິ ນຕ຺ຖີຕິ, ຍຸຕ຺ຕິໂຕປິ ຈ ນຕ຺ຖິ ຕໍ;

ຕຖາປາຂ຺ຍາຕິເກ ຕສ຺ສ, ຕພ຺ໂພຫາໂຣ ນິຣຸຕ຺ຕິຍໍ;

ປຕິຏ຺ຐິຕນໂຍວາຕິ, ມນ຺ຕ຺ວາ ອມ຺ເຫຫິ ຠາສິໂຕ.

ປຸຣິໂສຕິ ເອກວຈນພຫຸວຈນກາ ປຐມມຊ຺ຌິມຸຕ຺ຕມປຸຣິສາ. ຕຕ຺ຖ ປຐມປຸຣິໂສ ອາຂ຺ຍາຕປເທນ ຕຸລ຺ຍາຘິກຣເຓ ສາຘກວາຈເກ ວາ ກມ຺ມວາຈເກ ວາ ຕຸມ຺ຫາ’ມ຺ຫສທ຺ທວຊ຺ຊິເຕ ປຈ຺ຈຕ຺ຕວຈນຠູເຕ ນາມມ຺ຫິ ‘‘ອຠິນີຫາໂຣ ສມິຊ຺ຌຕິ, ໂພຘິ ວຸຈ຺ຈຕິ ຈຕູສຸ ມຄ຺ເຄສຸຎາຓ’’ນ຺ຕິອາທີສຸ ວິຍ ປຍຸຊ຺ຊມາເນປິ, ຕຏ຺ຐານິຍຕ຺ເຕ ສຕິ ‘‘ຠາສຕິ ວາ ກໂຣຕິ ວາ, ປີຬິຍກ຺ໂຂຕິ ມໍ ວິທູ, ວຸຈ຺ຈຕີຕິ ວຈນ’’ນ຺ຕິອາທີສຸ ວິຍ ອປ຺ປຍຸຊ຺ຊມາເນປິ ສພ຺ພຘາຕູຫິ ປໂຣ ໂຫຕິ. ກຕ຺ຖຈິ ປນ ປາຬິປ຺ປເທເສ ນາມສ຺ສ ອປ຺ປຍຸຕ຺ຕຕ຺ຕາ ປຐມປຸຣິສປໂຍຄຕ຺ໂຖ ທຸຣນຸໂພໂຘ ຠວຕິ, ຍຖາ ‘‘ທຸກ຺ຂໍ ເຕ ເວທຍິສ຺ສາມິ, ຕຕ຺ຖ ອສ຺ສາສຍນ຺ຕຸ ມ’’ນ຺ຕິ. ຕຖາ ຫິ ເອຕ຺ຖ ‘‘ປາທາ’’ຕິ ປາຐເສໂສ, ຕສ຺ມິໍ ທຸກ຺ຂສາສນາໂຣຈເນ ວຕ຺ຕຸໍ ອວິສຫນວເສນ ກິລມນ຺ຕໍ ມໍ ເທວສ຺ສ ອຸໂຠ ປາທາ ອສ຺ສາເສນ຺ຕຸ, ວິສ຺ສຏ຺ໂຐ ກເຖຫີຕິ ມໍ ວທຖາຕິ ອຘິປ຺ປາໂຍ ຈ ຠວຕິ.

ອຘິປ຺ປາໂຍ ສຸທຸພ຺ໂພໂຘ, ຍສ຺ມາ ວິຊ຺ຊຕິ ປາຬິຍໍ;

ຕສ຺ມາ ອຸປຏ຺ຐຫໍ ຄຓ຺ເຫ, ຄຣຸໍ ຄຣຸມຕໍ ວິທູ.

ຕຕ຺ຣິມານິ ຠູຘາຕາຘິກາຣຕ຺ຕາ ຠູຘາຕຸວເສນ ນິທສ຺ສນປທານິ. ໂສ ປຣິຠວຕິ, ເຕ ປຣິຠວນ຺ຕິ, ປຣິຠວຕິ, ປຣິຠວນ຺ຕິ. ສປຕ຺ໂຕ ອຠິຠວິຍເຕ, ສພ຺ພາ ວິຕ຺ຍາ’ນຸຠູຍເຕ, ອຠິຠວິຍເຕ, ອນຸຠູຍເຕຕິ. ຍຕ຺ຖ ສຕິປິ ນາມສ຺ສ ສາຘກວາຈກຕ຺ເຕ ອປຈ຺ຈຕ຺ຕວຈນຕ຺ຕາ ອາຂ຺ຍາຕປເທນ ຕຸລ຺ຍາຘິກຣຓຕາ ນ ລພ຺ຠຕິ, ຕຕ຺ຖ ກມ຺ມວາຈກໍ ປຈ຺ຈຕ຺ຕວຈນຠູຕໍ ຕຸລ຺ຍາຘິກຣຓປທໍ ປຏິຈ຺ຈ ປຐມປຸຣິສາທໂຍ ຕໂຍ ລພ຺ຠນ຺ຕິ. ຕໍ ຍຖາ? ປຣິຠວິຍ຺ຍເຕ ປຸຣິໂສ ເທວທຕ຺ເຕນ, ປຣິຠວິຍ຺ຍເສ ຕ຺ວໍ ເທວທຕ຺ເຕນ, ປຣິຠວິຍ຺ຍມ຺ເຫ ມຍໍ ອກຸສເລຫິ ຘມ຺ເມຫິ. ເອຕ຺ຖ ປນິທໍ ວຈນໍ ນ ວຕ຺ຕພ຺ພໍ ‘‘ນິນ຺ທນ຺ຕິ ຕຸຓ຺ຫິມາສິນ’ນ຺ຕິອາທີສຸ ສຕິປິ ນາມສ຺ສ ກມ຺ມວາຈກຕ຺ເຕ ອປຈ຺ຈຕ຺ຕວຈນຕ຺ຕາ ອາຂ຺ຍາຕປເທນ ຕຸລ຺ຍາຘິກຣຓຕາ ນ ລພ຺ຠຕີຕິ ປຐມປຸຣິສຸປ຺ປຕ຺ຕິ ນ ສິຍາ’’ຕິ. ກສ຺ມາຕິ ເຈ? ‘‘ນິນ຺ທນ຺ຕິ ຕຸຓ຺ຫິມາສິນ’’ນ຺ຕິອາທີສຸ ‘‘ຊນາ’’ຕິ ອຊ຺ຌາຫຣິຕພ຺ພສ຺ສ ສາຘກວາຈກສ຺ສ ນາມສ຺ສ ສທ຺ຘິມາຂ຺ຍາຕປເທນ ຕຸລ຺ຍາຘິກຣຓຠາວສ຺ສ ອິຈ຺ຉິຕຕ຺ຕາ. ເອວມຸຕ຺ຕຣຕ຺ຣາປິ ນໂຍ.

ມຊ຺ຌິມປຸຣິໂສ ອາຂ຺ຍາຕປເທນ ຕຸລ຺ຍາຘິກຣເຓ ສາຘກວາຈເກ ວາ ກມ຺ມວາຈເກ ວາ ປຈ຺ຈຕ຺ຕວຈນຠູເຕ ຕຸມ຺ຫສທ຺ເທ ປຍຸຊ຺ຊມາເນປິ, ຕຏ຺ຐານິຍຕ຺ເຕ ສຕິ ອປ຺ປຍຸຊ຺ຊມາເນປິ ສພ຺ພຘາຕູຫິ ປໂຣ ໂຫຕິ. ຕ຺ວໍ ອຕິຠວສິ, ຕຸມ຺ເຫ ອຕິຠວຖ, ອຕິຠວສິ, ອຕິຠວຖ. ຕ຺ວໍ ປຣິຠວິຍເສ ເທວທຕ຺ເຕນ, ຕຸມ຺ເຫ ປຣິຠວິຍວ຺ເຫ. ຍຕ຺ຖ ສຕິປິ ຕຸມ຺ຫສທ຺ທສ຺ສ ສາຘກວາຈກຕ຺ເຕ ອປຈ຺ຈຕ຺ຕວຈນຕ຺ຕາ ອາຂ຺ຍາຕປເທນ ຕຸລ຺ຍາຘິກຣຓຕາ ນ ລພ຺ຠຕິ, ນ ຕຕ຺ຖ ມຊ຺ຌິມປຸຣິໂສ ໂຫຕິ. ອິຕເຣ ປນ ທ຺ເວ ໂຫນ຺ຕິ ກມ຺ມວາຈກໍ ປຈ຺ຈຕ຺ຕວຈນຠູຕໍ ຕຸລ຺ຍາຘິກຣຓປທໍ ປຏິຈ຺ຈ. ຕໍ ຍຖາ? ຕຍາ ອຠິຠວິຍເຕ ສປຕ຺ໂຕ, ຕຍາ ອຠິຠວິເຍ ອຫໍ.

ອຸຕ຺ຕມປຸຣິໂສ ອາຂ຺ຍາຕປເທນ ຕຸລ຺ຍາຘິກຣເຓ ສາຘກວາຈເກ ວາ ກມ຺ມວາຈເກ ວາ ປຈ຺ຈຕ຺ຕວຈນຠູເຕ ອມ຺ຫສທ຺ເທ ປຍຸຊ຺ຊມາເນປິ, ຕຏ຺ຐານິຍຕ຺ເຕ ສຕິ ອປ຺ປຍຸຊ຺ຊມາເນປິ ສພ຺ພຘາຕູຫິ ປໂຣ ໂຫຕິ. ອຫໍ ປຣິຠວາມິ, ມຍໍ ປຣິຠວາມ, ປຣິຠວາມິ, ປຣິຠວາມ. ອຫໍ ປຣິຠວິຍ຺ຍາມິ ອກຸສເລຫິ ຘມ຺ເມຫິ, ມຍໍ ປຣິຠວິຍ຺ຍາມ, ປຣິຠວິຍ຺ຍາມິ, ປຣິຠວິຍ຺ຍາມ. ຍຕ຺ຖ ສຕິປິ ອມ຺ຫສທ຺ທສ຺ສ ສາຘກວາຈກຕ຺ເຕ ອປຈ຺ຈຕ຺ຕວຈນຕ຺ຕາ ອາຂ຺ຍາຕປເທນ ຕຸລ຺ຍາຘິກຣຓຕາ ນ ລພ຺ຠຕິ, ນ ຕຕ຺ຖ ອຸຕ຺ຕມປຸຣິໂສ ໂຫຕິ. ອິຕເຣ ປນ ທ຺ເວ ໂຫນ຺ຕິ ກມ຺ມວາຈກໍ ປຈ຺ຈຕ຺ຕວຈນຠູຕໍ ຕຸລ຺ຍາຘິກຣຓປທໍ ປຏິຈ຺ຈ. ຕໍ ຍຖາ? ມຍາ ອນຸຠວິຍເຕ ສມ຺ປຕ຺ຕິ, ມຍາ ອຠິຠວິຍເສ ຕ຺ວໍ. ເອວໍ ຍຕ຺ຖ ຍຕ຺ຖ ສາຘກວາຈການໍ ວາ ກມ຺ມວາຈການໍ ວາ ນາມາທີນໍ ປຈ຺ຈຕ຺ຕວຈນຠູຕານໍ ອາຂ຺ຍາຕປເທຫິ ຕຸລ຺ຍາຘິກຣຓຕ຺ເຕ ລທ຺ເຘ ຕຕ຺ຖ ຕຕ຺ຖ ປຐມປຸຣິສາທໂຍ ລພ຺ຠນ຺ຕິ, ຕສ຺ມາ ນາມາທີນໍ ປຈ຺ຈຕ຺ຕວຈນຠູຕານໍ ຕຸລ຺ຍາຘິກຣຓຠາໂວເຍວ ປຐມປຸຣິສາທີນມຸປ຺ປຕ຺ຕິຍາ ກາຣຓໍ.

ທ຺ວິນ຺ນໍ ຕິຓ຺ຓໍ ວາ ປຸຣິສານເມກາຠິຘາເນ ປໂຣ ປຸຣິໂສ ຄເຫຕພ຺ໂພ. ເອຕ຺ຖ ເອກາຠິຘານໍ ນາມ ເອກໂຕ ອຠິຘານໍ ເອກກາລາຠິຘານຎ຺ຈ. ຕຎ຺ຈ ໂຂ ຈສທ຺ທປໂຍເຄເຍວ, ອຈສທ຺ທປໂຍເຄ ຠິນ຺ນກາລາຠິຘາເນ ຕຄ຺ຄຫຓາຠາວໂຕ. ‘‘ຕຸມ຺ເຫ ອຕ຺ຖກຸສລາ ຠວຖ, ມຍມຕ຺ຖກຸສລາ ຠວາມ’’ ອິຈ຺ເຈວມາທໂຍ ຕປ຺ປໂຍຄາ. ຕຕ຺ຖ ຕຸມ຺ເຫ ອຕ຺ຖກຸສລາ ຠວຖ – ອິຈ຺ເຈຕສ຺ມິໍ ໂວຫາເຣ ‘‘ໂສ ຈ ອຕ຺ຖກຸສໂລ ຠວຕິ, ຕ຺ວຎ຺ຈ ອຕ຺ຖກຸສໂລ ຠວສິ, ຕຸມ຺ເຫ ອຕ຺ຖກຸສລາ ຠວຖາ’’ຕິ ເອວໍ ທ຺ວິນ຺ນເມກາຠິຘາເນ ປໂຣ ປຸຣິໂສ ຄເຫຕພ຺ໂພ. ‘‘ມຍມຕ຺ຖກຸສລາ ຠວາມ’’ ອິຈ຺ເຈຕສ຺ມິໍ ປນ ‘‘ໂສ ຈ ອຕ຺ຖກຸສໂລ ຠວຕິ, ອຫຎ຺ຈ ອຕ຺ຖກຸສໂລ ຠວາມິ, ມຍມຕ຺ຖກຸສລາ ຠວາມາ’’ຕິ ວາ ‘‘ຕ຺ວຎ຺ຈ ອຕ຺ຖກຸສໂລ ຠວສິ, ອຫຎ຺ຈ ອຕ຺ຖກຸສໂລ ຠວາມິ, ມຍມຕ຺ຖກຸສລາ ຠວາມາ’’ຕິ ວາ ເອວມ຺ປິ ທ຺ວິນ຺ນເມກາຠິຘາເນ ປໂຣ ປຸຣິໂສ ຄເຫຕພ຺ໂພ. ‘‘ໂສ ຈ ອຕ຺ຖກຸສໂລ ຠວຕິ, ຕ຺ວຎ຺ຈ ອຕ຺ຖກຸສໂລ ຠວສິ, ອຫຎ຺ຈ ອຕ຺ຖກຸສໂລ ຠວາມິ, ມຍມຕ຺ຖກຸສລາ ຠວາມາ’’ຕິ ວາ ‘‘ໂສ ຈ ອຕ຺ຖກຸສໂລ ຠວຕິ, ເຕ ຈ ອຕ຺ຖກຸສລາ ຠວນ຺ຕິ, ຕ຺ວຎ຺ຈ ອຕ຺ຖກຸສໂລ ຠວສິ, ຕຸມ຺ເຫ ຈ ອຕ຺ຖກຸສລາ ຠວຖ, ອຫຎ຺ຈ ອຕ຺ຖກຸສໂລ ຠວາມິ, ມຍມຕ຺ຖກຸສລາ ຠວາມາ’’ຕິ ວາ ເອວໍ ຕິຓ຺ຓເມກາຠິຘາເນ ປໂຣ ປຸຣິໂສ ຄເຫຕພ຺ໂພ.

ອປໂຣປິ ອຕ຺ຖນໂຍ ວຸຈ຺ຈຕິ – ‘‘ຕ຺ວຎ຺ຈ ອຕ຺ຖກຸສໂລ ຠວສິ, ໂສ ຈ ອຕ຺ຖກຸສໂລ ຠວຕິ, ຕຸມ຺ເຫ ອຕ຺ຖກຸສລາ ຠວຖາ’’ຕິ ວາ ‘‘ອຫຎ຺ຈ ອຕ຺ຖກຸສໂລ ຠວາມິ, ໂສ ຈ ອຕ຺ຖກຸສໂລ ຠວຕິ, ມຍມຕ຺ຖກຸສລາ ຠວາມາ’’ຕິ ວາ ອິມິນາ ນເຍນ ອເນກປ຺ປເຠໂທ ອຕ຺ຖນໂຍ. ເອວໍ ເສສາສຸ ວິຠຕ຺ຕີສຸ ປຎ຺ຈມີສຕ຺ຕມິຍາທີສຸ ປໂຣປຸຣິໂສ ຄເຫຕພ຺ໂພ. ສພ຺ເພສຸ ຈ ກ຺ຣິຍາປເທສຸ ພວ຺ຫຕ຺ຖວາຈເກສຸ ພຫຸວຈນນ຺ເຕສຸ, ນ ປນ ພຫຸວຈນນ຺ເຕສຸປິ ເອກສ຺ສຕ຺ຕໂນ ວາຈເກສຸ ຄຣຸກາຕພ຺ພສ຺ເສກສ຺ສຕ຺ຖສ຺ສ ວາຈເກສຸ ຈ ກ຺ຣິຍາປເທສຸ. ເອຕ຺ຖ ໂຈທນາສນ຺ທີປນິໂຍ ອິມາ ຄາຖາ –

‘‘ຕ຺ວຎ຺ຈ ຠວສິ ໂສ ຈາປິ, ຠວຕິ’’ຈ຺ຈາທິຠາສເນ;

‘‘ຕຸມ຺ເຫ ຠວຖ’’ ອິຈ຺ຈາທິ, ປໂຣໂປໂສ ກຖໍ ສິຍາ?;

‘‘ອຫໍ ຠວາມິ ໂສ ຈາປິ, ຠວຕິ’’ຈ຺ຈາທິຠາສເນ;

‘‘ມຍໍ ຠວາມ’’ອິຈ຺ຈາທິ, ອຸຕ຺ຕໂມ ຈ ກຖໍ ສິຍາ?;

ເອຕ຺ຖ ຈ ວຸຈ຺ຈເຕ –

ປຈ຺ຉາ ວຸຕ຺ໂຕ ປໂຣ ນາມ, ສຎ຺ຎາຍ ປຏິປາຏິຍາ;

ເອວໍ ປນ ຄເຫຕພ຺ໂພ, ປໂຣປຸຣິສນາມໂກ.

ປຐມມ຺ຫາ ປໂຣ ນາມ, ມຊ຺ຌິໂມ ອຸຕ຺ຕໂມປິ ຈ;

ມຊ຺ຌິມມ຺ຫາ ປໂຣ ນາມ, ອຸຕ຺ຕໂມ ປຸຣິໂສ ຣຸໂຕ.

ເອວໍ ຕຸ ຄຫຓຎ຺ເຫຕ຺ຖ, ໂວຫາຣສ຺ສານຸໂລມກໍ;

ໂທໂສ ຕທນຸໂລມມ຺ຫິ, ຄຫຓສ຺ມິໍ ນ ວິຊ຺ຊຕິ.

‘‘ຕ຺ວຎ຺ຈ ຠທ຺ເທ ສຸຂີ ໂຫຫິ, ເອໂສ ຈາປິ ມຫາມິໂຄ’’;

ອິຕິ ປາໂຐ ຍໂຕ ທິຏ຺ໂຐ, ຕສ຺ມາ ເອວໍ ວເທມເສ.

‘‘ຕຸມ຺ເຫ ທ຺ເວ ສຸຂິຕາ ໂຫຖ’’, ອິຈ຺ຈຕ຺ໂຖ ຕຕ຺ຖ ທິສ຺ສຕິ;

ເອວໍປ຺ຍຍໍ ນໂຍ ວຸຕ຺ໂຕ, ອຕ຺ຕໂນມຕິຍາ ມມ.

ອຕ຺ຕໂນມຕິ ກິຎ຺ຈາປິ, ກຖິຕາ ສພ຺ພທຸພ຺ພລາ;

ຕຖາປິ ນຍມາທາຍ, ກຖິຕຕ຺ຕາ ອໂກປິຍາ.

‘‘ຘມ຺ເມນ ຣຊ຺ຊໍ ກາເຣນ຺ຕໍ, ຣຏ຺ຐາ ປພ຺ພາຊຍິຕ຺ຖ ມໍ;

ຕ຺ວຎ຺ຈ ຊານປທາ ເຈວ, ເນຄມາ ຈ ສມາຄຕາ’’.

‘‘ອຫຎ຺ຈ ມທ຺ທິເທວີ ຈ, ຊາລີກຓ຺ຫາຊິນາ ຈຸໂຠ;

ອຎ຺ຎມຎ຺ຎໍ ໂສກນຸທາ, ວສາມ ອສ຺ສເມ ຕທາ’’.

ເອຕາ ຄາຖາປິ ເອຕສ຺ສ, ອຕ຺ຖສ຺ສ ປນ ສາຘິກາ;

ຕາສຸ ວຸຕ຺ຕນເຍເນວ, ອຕ຺ໂຖ ສຸປາກໂຏ ສິຍາ;

ເອວໍ ວິຎ຺ຎູຫິ ວິຎ຺ເຎຍ຺ຍໍ, ພຫຸນາ ຠາສິເຕນ ກິໍ.

ອາກາເຣນ ມນາເປນ, ກຖເນ ເຍນ ເກນຈິ;

ນ ວິຣຸຊ຺ຌຕິ ເຈ ອຕ຺ໂຖ, ຕໍ ປມາຓໍ ສຸຘີມຕໍ.

ປຸຣິສຕ຺ຕຍໂຕ ເອໂສ, ປໂຣປຸຣິສນາມໂກ;

ນຸປລພ຺ຠຕິ ປຈ຺ເຈກໍ, ຕທນ຺ໂຕຄຘໂຕວ ຍໍ.

ປາຏວຕ຺ຖາຍ ໂສຕູນໍ, ໂວຫາຣຕ຺ເຖສຸ ສພ຺ພໂສ;

ວິສຸໍ ອລພ຺ຠມາໂນປິ, ລພ຺ຠມາໂນວ ອຸທ຺ຘໂຏ.