໑໓. ສວິນິຈ຺ຉຍສງ຺ຂ຺ຍານາມນາມິກປທມາລາ

ອິໂຕ ປຣໍ ປວກ຺ຂາມິ, ສງ຺ຂ຺ຍານາມິກປນ຺ຕິໂຍ;

ຠູຘາຕຸເຊຫິ ຣູເປຫິ, ອຎ຺ເຎຫິ ຈຸປໂຍຊິຕຸໍ.

ຍາ ຫິ ສາ ເຫຏ຺ຐາ ອມ຺ເຫຫິ ເອກ ທ຺ວິຕິ ຈຕຸອິຈ຺ເຈເຕສໍ ສງ຺ຂ຺ຍາສພ຺ພນາມານໍ ນາມິກປທມາລາ ກຖິຕາ, ຕໍ ຐເປຕ຺ວາ ອິຘ ອສພ຺ພນາມານໍ ປຎ຺ຈ ຉ ສຕ຺ຕາທີນໍ ສງ຺ຂ຺ຍານາມານໍ ນາມິກປທມາລາ ຠູຘາຕຸມເຍຫິ ອຎ຺ເຎຫິ ຈ ຣູເປຫິ ໂຍຊນຕ຺ຖໍ ວຸຈ຺ຈເຕ –

ປຎ຺ຈ, ປຎ຺ຈຫິ, ປຎ຺ຈຠິ, ປຎ຺ຈນ຺ນໍ, ປຎ຺ຈສຸ. ສຕ຺ຕນ຺ນໍ ວິຠຕ຺ຕີນໍ ວເສນ ເຎຍ຺ຍໍ. ‘‘ປຎ຺ຈ ຠູຕາ, ປຎ຺ຈ ອຠິຠວິຕາໂຣ, ປຎ຺ຈ ປຸຣິສາ, ປຎ຺ຈ ຠູມິໂຍ, ປຎ຺ຈ ກຎ຺ຎາໂຍ, ປຎ຺ຈ ຠູຕານິ, ປຎ຺ຈ ຈິຕ຺ຕານີ’’ຕິອາທິນາ ສພ຺ພຕ຺ຖ ໂຍເຊຕພ຺ພໍ. ຉ, ຉຫິ, ຉຠິ, ຉນ຺ນໍ, ຉສຸ, ຉສ຺ສຸ ອິຕິປິ. ‘‘ຉສ຺ສຸ ໂລໂກ ສມຸປ຺ປນ຺ໂນ, ຉສ຺ສຸ ກ຺ຣຸພ຺ພຕິ ສນ຺ຖວ’’ນ຺ຕິ ຫິ ປາຬິ. ສຕ຺ຕ, ສຕ຺ຕຫິ, ສຕ຺ຕຠິ, ສຕ຺ຕນ຺ນໍ, ສຕ຺ຕສຸ. ອຏ຺ຐ, ອຏ຺ຐຫິ, ອຏ຺ຐຠິ, ອຏ຺ຐນ຺ນໍ, ອຏ຺ຐສຸ. ນວ, ນວຫິ, ນວຠິ, ນວນ຺ນໍ, ນວສຸ. ທສ, ທສຫິ, ທສຠິ, ທສນ຺ນໍ, ທສສຸ. ເອວໍ ເອກາທສ. ທ຺ວາທສ, ພາຣສ. ເຕຣສ, ເຕທສ, ເຕຬສ. ຈຕຸທ຺ທສ, ຈຸທ຺ທສ. ປຎ຺ຈທສ, ປນ຺ນຣສ. ໂສຬສ. ສຕ຺ຕຣສ. ອຏ຺ຐາຣສ, ອຏ຺ຐາຣສຫິ, ອຏ຺ຐາຣສຠິ, ອຏ຺ຐາຣສນ຺ນໍ, ອຏ຺ຐາຣສສຸ. ສພ຺ພເມຕໍ ພຫຸວຈນວເສນ ຄເຫຕພ຺ພໍ.

ເອກູນວີສຕິ, ເອກູນວີສໍ ອິຈ຺ຈາທິປິ. ເອກູນວີສາຍ, ເອກູນວີສາຍໍ, ເອກູນວີສ ຠິກ຺ຂູ ຕິຏ຺ຐນ຺ຕິ, ເອກູນວີສໍ ຠິກ຺ຂູ ປສ຺ສຕິ, ເອວໍ ‘‘ກຎ຺ຎາໂຍ ຈິຕ຺ຕານີ’’ຕິ ຈ ອາທິນາ ໂຍເຊຕພ຺ພໍ. ເອກູນວີສາຍ ຠິກ຺ຂູຫິ ຘມ຺ໂມ ເທສິໂຕ, ເອກູນວີສາຍ ກຎ຺ຎາຫິ ກຕໍ, ເອກູນວີສາຍ ຈິຕ຺ເຕຫິ ກຕໍ, ເອກູນວີສາຍ ຠິກ຺ຂູນໍ ຈີວຣໍ ເທຕິ, ເອກູນວີສາຍ ກຎ຺ຎານໍ ຘນໍ ເທຕິ, ເອກູນວີສາຍ ຈິຕ຺ຕານໍ ຣຸຈ຺ຈຕິ, ເອກູນວີສາຍ ຠິກ຺ຂູຫິ ອເປຕິ. ເອວໍ ກຎ຺ຎາຫິ ຈິຕ຺ເຕຫິ. ເອກູນວີສາຍ ຠິກ຺ຂູນໍ ສນ຺ຕກໍ, ເອວໍ ກຎ຺ຎານໍ ຈິຕ຺ຕານໍ. ເອກູນວີສາຍໍ ຠິກ຺ຂູສຸ ປຕິຏ຺ຐິຕໍ. ເອວໍ ‘‘ກຎ຺ຎາສຸ ຈິຕ຺ເຕສູ’’ຕິ ໂຍເຊຕພ຺ພໍ. ເອກູນວີສຕິ, ເອກູນວີສຕິໍ, ເອກູນວີສຕິຍາ, ເອກູນວີສຕິຍໍ.

ວີສຕິ, ວີສຕິໍ, ວີສຕິຍາ, ວີສຕິຍໍ. ວີສ, ວີສໍ, ວີສາຍ, ວີສາຍໍ. ຕຖາ ເອກວີສ ທ຺ວາວີສ ພາວີສ ເຕວີສ ຈຕຸວີສ ອິຈ຺ຈາທີສຸປິ. ຕິໍສ, ຕິໍສໍ, ຕິໍສາຍ, ຕິໍສາຍໍ. ຈຕ຺ຕາລີສ, ຈຕ຺ຕາລີສໍ, ຈຕ຺ຕາລີສາຍ, ຈຕ຺ຕາລີສາຍໍ. ຈຕ຺ຕາຣີສ ອິຈ຺ຈາທິປິ. ປຎ຺ຎາສ, ປຎ຺ຎາສໍ, ປຎ຺ຎາສາຍ, ປຎ຺ຎາສາຍໍ. ປຓ຺ຓາສ, ປຓ຺ຓາສໍ, ປຓ຺ຓາສາຍ, ປຓ຺ຓາສາຍໍ. ສຏ຺ຐິ, ສຏ຺ຐິໍ, ສຏ຺ຐິຍາ, ສຏ຺ຐິຍໍ. ສຕ຺ຕຕິ, ສຕ຺ຕຕິໍ, ສຕ຺ຕຕິຍາ, ສຕ຺ຕຕິຍໍ. ສຕ຺ຕຣິ ອິຈ຺ຈາທິປິ. ອສີຕິ, ອສີຕິໍ, ອສີຕິຍາ, ອສີຕິຍໍ. ນວຸຕິ. ນວຸຕິໍ, ນວຸຕິຍາ, ນວຸຕິຍໍ.

ອິຕ຺ຖຎ຺ຈ ອຎ຺ຎຖາປິ ສງ຺ຂ຺ຍາຣູປານິ ຄເຫຕພ຺ພານິ. ເອກູນວີເສຫິ, ເອກູນວີສານໍ, ເອກູນວີເສສຸ. ‘‘ຉນ຺ນວຸຕີນ’’ນ຺ຕິ ຈ ອາທິນາປິ ສງ຺ຂ຺ຍາຣູປານໍ ກຕ຺ຖຈິ ທສ຺ສນໂຕ ເກຈິ ສທ຺ທສຕ຺ຖວິທູ ອູນວີສຕິສທ຺ທໍ ສພ຺ພທາປິ ເອກວຈນນ຺ຕມິຕ຺ຖິລິງ຺ຄເມວ ປຍຸຎ຺ຊນ຺ຕິ. ເກຈິ ‘‘ວີສຕິອາທໂຍ ອານວຸຕິ ເອກວຈນນ຺ຕາ ອິຕ຺ຖິລິງ຺ຄາ’’ຕິ ວທນ຺ຕິ. ເກຈິ ປນາຫຸ –

‘‘ສທ຺ທາ ສງ຺ຂ຺ເຍຍ຺ຍສງ຺ຂາສຸ, ເອກຕ຺ເຕ ວີສຕາທໂຍ;

ສງ຺ຂຕ຺ເຖ ທ຺ວິພຫຸຕ຺ຕມ຺ຫິ, ຕາ ຕຸ ຈານວຸຕິຕ຺ຖິໂຍ’’ຕິ.

ເອຕ຺ຖ ທ຺ວິວຈນໍ ຉຑ຺ເຑຕພ຺ພໍ ພຸທ຺ຘວຈເນ ຕທຠາວໂຕ. ສພ຺ເພສມ຺ປິ ຈ ເຕສໍ ຍຖາວຸຕ຺ຕວຈນໍ ກິຎ຺ຈິ ປາຬິປ຺ປເທສໍ ປຕ຺ວາ ຍຸຊ຺ຊຕິ, ກິຎ຺ຈິ ປນ ປຕ຺ວາ ນ ຍຸຊ຺ຊຕິ ວີສຕິວີສໍຕິໍສໍອິຈ຺ຈາທີນຎ຺ຫິ ສງ຺ຂຕ຺ຖານໍ ສທ຺ທານໍ ພຫຸວຈນປ຺ປໂຍຄວເສນປິ ປາຬິຍໍ ທສ຺ສນໂຕ, ກຈ຺ຈາຍເນ ຈ ໂຍວຈນສມ຺ຠູຕຣູປວນ຺ຕຕາທສ຺ສນໂຕ. ຕສ຺ມາ ຍຖາສມ຺ຠວໍ ຍຖາປາວຈນຎ຺ຈ ອິຕ຺ຖິລິງ຺ຄຠາເວ ເຕສເມກວຈນນ຺ຕຕາ ເວທິຕພ຺ພາ ອຕ຺ຖິ ນຕ຺ຖິສທ຺ທານໍ ວິຍ.

ອຕ຺ຖິນຕ຺ຖິສທ຺ທາ ຫິ ນິປາຕຕ຺ຕາ ເອກຕ຺ເຕປິ ພຫຸຕ຺ເຕປິ ປວຕ຺ຕນ຺ຕິ ‘‘ປຸຕ຺ຕາ ມຕ຺ຖິ ຘນມ຺ມຕ຺ຖິ. ນຕ຺ຖິ ອຕ຺ຕສມໍ ເປມໍ. ນຕ຺ຖິ ສມຓພ຺ຣາຫ຺ມຓາ’’ຕິອາທີສຸ. ອລິງ຺ຄຕ຺ເຕປິ ປເນເຕສໍ ກຕ຺ຖຈິ ອິຕ຺ຖິລິງ຺ຄຠາໂວ ທິຏ຺ໂຐ. ອຠິຘມ຺ເມ ຫິ ຘມ຺ມເສນາປຕິນາ ອນຸຘມ຺ມຈກ຺ກວຕ຺ຕິນາ ໂວຫາຣກຸສເລນ ໂວຫາຣກຸສລສາຘເກນ ‘‘ອຕ຺ຖິຍາ ນວ. ນຕ຺ຖິຍາ ນວາ’’ຕິ ເອກວຈນນ຺ຕໍ ອິຕ຺ຖິລິງ຺ຄຣູປໍ ທສ຺ສິຕໍ, ຕສ຺ມາ ວີສຕິວີສຕິມິຈ຺ຈາທີນມ຺ປິ ຍຖາສມ຺ຠວໍ ຍຖາປາວຈນຎ຺ຈ ອິຕ຺ຖິລິງ຺ຄຠາເວ ເອກວຈນນ຺ຕຕາ ເວທິຕພ຺ພາ.

ຕຕ຺ເຖເກ ‘‘ເຫຕຸຍາ ອຘິປຕິຍາ’’ຕິ ຈ ອິທໍ ລິງ຺ຄວິປລ຺ລາສວເສນ ຄເຫຕພ຺ພໍ ມຎ຺ຎນ຺ຕິ. ຕມ຺ມຕິວເສນ ‘‘ເຫຕຸມ຺ຫິ ອຘິປຕິມ຺ຫີ’’ຕິ ປຸລ຺ລິງ຺ຄຠາໂວ ປຏິປາເທຕພ຺ໂພ, ‘‘ເຫຕຸປຈ຺ຈເຍ ອຘິປຕິປຈ຺ຈເຍ’’ ອິຈ຺ເຈວຕ຺ໂຖ. ອຖ ວາ ‘‘ເຫຕຸຍາ ອຘິປຕິຍາ’’ຕິ ທ຺ວຍມິທໍ ອິຕ຺ຖິລິງ຺ຄຣູປປຏິຠາຄໍ ປຸລ຺ລິງ຺ຄຣູປນ຺ຕິ ຄເຫຕພ຺ພໍ ‘‘ເຫຕຸໂຍ ຊນ຺ຕຸໂຍ’’ຕິອາທີນໍ ອິຕ຺ຖິລິງ຺ຄຣູປປຏິຠາຄານໍ ປຸລ຺ລິງ຺ຄຣູປານມ຺ປິ ວິຊ຺ຊມານຕ຺ຕາ, ‘‘ອຕ຺ຖິຍາ ນຕ຺ຖິຍາ’’ຕິ ອິທໍ ປນ ລິງ຺ຄວິປລ຺ລາສວເສນ ວຸຕ຺ຕນ຺ຕິ ນ ຄເຫຕພ຺ພໍ ອຕ຺ຖິ ນຕ຺ຖິສທ຺ທານໍ ອລິງ຺ຄເຠທຕ຺ຕາ. ນ ຫິ ອຕ຺ຖິ ນຕ຺ຖິສທ຺ທາ ຕີສຸ ລິງ຺ເຄສຸ ເອກສ຺ມິມ຺ປິ ອນ຺ໂຕຄຘາ. ເອເຕສຸ ຫິ ອຕ຺ຖິສທ຺ໂທ ອາຂ຺ຍາຕນິປາຕວເສນ ຠິຊ຺ຊຕິ ‘‘ອຕ຺ຖິ ສນ຺ຕິ ສໍວິຊ຺ຊຕິ. ອຕ຺ຖິຂີຣາ ພ຺ຣາຫ຺ມຓີ’’ຕິອາທີສຸ, ນຕ຺ຖິສທ຺ໂທ ປນ ນິປາໂຕເຍວ. ອິຈ຺ເຈວໍ ອຕ຺ຖິ ນຕ຺ຖິສທ຺ທານໍ ນິປາຕານຎ຺ຈ ລິງ຺ຄວຈນວເສນ ກຖນໍ ຍຸຊ຺ຊຕິ ອິຕ຺ຖິລິງ຺ຄາທິວເສນ ເອກຕ຺ຕາທິວເສນ ຈ ອປ຺ປວຕ຺ຕນໂຕ. ວຸຕ຺ຕຎ຺ຈ –

‘‘ສທິສໍ ຕີສຸ ລິງ຺ເຄສຸ, ສພ຺ພາສຸ ຈ ວິຠຕ຺ຕິສຸ;

ວຈເນສຸ ຈ ສພ຺ເພສຸ, ຍໍ ນ ພ຺ເຍຕິ ຕທພ຺ຍຍ’’ນ຺ຕິ.

ເອຕ຺ຖ ສິຍາ – ນນຸ ຈ ໂຠ ‘‘ອຕ຺ຖິ ສກ຺ກາ ລພ຺ຠາ ອິຈ຺ເຈເຕ ປຐມາຍາ’’ຕິ ວຈນໂຕ ອຕ຺ຖິສທ຺ໂທ ປຐມາຍ ວິຠຕ຺ຕິຍາ ຍຸຕ຺ໂຕ, ເອວໍ ສນ຺ເຕ ກສ຺ມາ ‘‘ສທິສໍ ຕີສຸ ລິງ຺ເຄສູ’’ຕິອາທິ ວຸຕ຺ຕນ຺ຕິ? ສຈ຺ຈໍ ອຕ຺ຖິສທ຺ໂທ ປຐມາຍ ວິຠຕ຺ຕິຍາ ຍຸຕ຺ໂຕ, ຕຖາ ນຕ຺ຖິສທ຺ໂທ ອຕ຺ຖິສທ຺ທສ຺ສ ວຈນເລເສນ ຄເຫຕພ຺ພຕ຺ຕາ ຍຸຄຬປທຕ຺ຕາ ຈ. ອິທໍ ປນ ‘‘ສທິສໍ ຕີສຸ ລິງ຺ເຄສູ’’ຕິອາທິວຈນໍ ອຸປສຄ຺ຄນິປາຕສງ຺ຂາເຕ ອສງ຺ຂ຺ຍາສທ຺ເທ ສນ຺ຘາຍ ວຸຕ຺ຕໍ, ນ ເອເກກມສງ຺ຂ຺ຍາສທ຺ທໍ ສນ຺ຘາຍ. ຕຖາ ຫິ ‘‘ອສງ຺ຂ຺ຍາ’’ຕິ ຈ ‘‘ອພ຺ຍຍາ’’ຕິ ຈ ລທ຺ຘໂວຫາເຣສຸ ອຸປສຄ຺ຄນິປາເຕສຸ ອຸປສຄ຺ຄາ ສພ຺ເພປິ ສພ຺ພວິຠຕ຺ຕິວຈນກາ. ນິປາຕານໍ ປນ ເອກຈ຺ເຈ ປຐມາທີສຸ ຍຖາຣຫໍ ວິຠຕ຺ຕິຍຸຕ຺ຕາ, ເອກຈ຺ເຈ ອວິຠຕ຺ຕິຍຸຕ຺ຕາ. ຕຕ຺ຖ ເຍ ຍທຄ຺ເຄນ ວິຠຕ຺ຕິຍຸຕ຺ຕາ, ເຕ ຕທຄ຺ເຄນ ຕພ຺ພຈນກາ. ອຸປສຄ຺ຄນິປາເຕສຸ ຫິ ປຈ຺ເຈກໍ ‘‘ອິທໍ ນາມ ວຈນ’’ນ຺ຕິ ລທ຺ຘຸໍ ນ ສກ຺ກາ, ສພ຺ພສງ຺ຄາຫກວເສນ ປນ ‘‘ສທິສໍ ຕີສຸ ລິງ຺ເຄສູ’’ຕິອາທິ ປຸພ຺ພາຈຣິເຍຫິ ວຸຕ຺ຕໍ. ກຈ຺ຈາຍນາຈຣິເຍນປິ ອິມເມວຕ຺ຖໍ ສນ຺ຘາຍ ‘‘ສພ຺ພາສມາວຸໂສປສຄ຺ຄນິປາຕາທີຫິ ຈາ’’ຕິ ວຸຕ຺ຕໍ. ນ ຫິ ອາວຸໂສສທ຺ທໂຕ ສພ຺ພາປິ ວິຠຕ຺ຕິໂຍ ລພ຺ຠນ຺ຕິ, ອຖ ໂຂ ອາລປນຕ຺ຖວາຈກຕ຺ຕາ ເອກວຈນິກອເນກວຈນິກາ ປຐມາວິຠຕ຺ຕິໂຍເຍວ ລພ຺ຠນ຺ຕິ. ອຍມສ຺ມາກໍ ຂນ຺ຕິ.

ເກຈິ ປນ ສພ຺ເພຫິປິ ນິປາເຕຫິ ສພ຺ພວິຠຕ຺ຕິໂລປໍ ວທນ຺ຕິ, ຕໍ ນ ຄເຫຕພ຺ພໍ. ‘‘ອຕ຺ຖິ ສກ຺ກາ ລພ຺ຠາ ອິຈ຺ເຈເຕ ປຐມາຍ. ທິວາ ຠິຍ຺ໂຍ ນໂມ ອິຈ຺ເຈເຕ ປຐມາຍ ຈ ທຸຕິຍາຍ ຈາ’’ຕິອາທິວຈນໂຕ, ປທປູຣຓມຕ຺ຕານຎ຺ຈ ອວິຠຕ຺ຕິຍຸຕ຺ຕານໍ ອຖ ຂລຸ ວຕ ວຖ ອິຈ຺ຈາທີນໍ ນິປາຕານໍ ວຈນໂຕ. ເອຕ຺ຖາປິ ສິຍາ ‘‘ນນຸ ຈ ໂຠ ອວິຠຕ຺ຕິຍຸຕ຺ຕານມ຺ປິ ນິປາຕານໍ ສມ຺ຠວໂຕ ອຕ຺ຖິ ນຕ຺ຖິສທ຺ທານໍ ອວິຠຕ຺ຕິໂກ ນິທ຺ເທໂສ ກາຕພ຺ໂພ, ອຖ ກິມຕ຺ຖໍ ‘ອຕ຺ຖິຍາ ນວ, ນຕ຺ຖິຍາ ນວາ’ຕິ ສວິຠຕ຺ຕິໂກ ນິທ຺ເທໂສ ກໂຕ’’ຕິ? ສພ຺ພຖາ ວິຠຕ຺ຕີຫິ ວິນາ ອຕ຺ຖສ຺ສ ນິທ຺ທິສິຕຸມສກ຺ກຸເຓຍ຺ຍຕ຺ຕາຕິ.

ຍທິ ເອວໍ ‘‘ອຕ຺ຖິ ສກ຺ກາ ລພ຺ຠາ ອິຈ຺ເຈເຕ ປຐມາຍາ’’ຕິ ວຈນໂຕ ອຕ຺ຖິ ນຕ຺ຖິສທ຺ທາ ລຸຕ຺ຕາຍ ປຐມາຍ ວິຠຕ຺ຕິຍາ ວເສນ ປຐມາວິຠຕ຺ຕິກາເຍວ ນິທ຺ທິສິຕພ຺ພາ, ເອວມກຕ຺ວາ ກສ຺ມາ ສຕ຺ຕມ຺ຍນ຺ຕວເສນ ‘‘ອຕ຺ຖິຍາ ນຕ຺ຖິຍາ’’ຕິ ນິທ຺ທິຏ຺ຐາຕິ? ສຈ຺ຈໍ, ອຕ຺ຖິ ນຕ຺ຖິສທ຺ທາ ປຐມາວິຠຕ຺ຕິຍຸຕ຺ຕາເຍວ ນິທ຺ທິສິຕພ຺ພາ, ຕຖາປິ ‘‘ອຕ຺ຖິປຈ຺ຈເຍ ນວ, ນຕ຺ຖິປຈ຺ຈເຍ ນວາ’’ຕິ ເອຕສ຺ສຕ຺ຖສ຺ສ ປຣິທີປເນ ປຐມາຍ ໂອກາໂສ ນຕ຺ຖິ, ສຕ຺ຕມິຍາເຍວ ປນ ອຕ຺ຖິ, ຕສ຺ມາ ‘‘ອຕ຺ຖິຍາ ນວ, ນຕ຺ຖິຍາ ນວາ’’ຕິ ວຸຕ຺ຕໍ. ອິຕິ ອຕ຺ຖິຍານຕ຺ຖິຍາສທ຺ທານໍ ສຕ຺ຕມ຺ຍນ຺ຕຠາເວ ສິທ຺ເຘເຍວ ຕຕິຍາຈຕຸຕ຺ຖີປຎ຺ຈມີຉຏ຺ຐິຍນ຺ຕຠາໂວປິ ສິທ຺ໂຘເຍວ ໂຫຕິ. ຕສ຺ມາ ‘‘ອຕ຺ຖິຠາໂວ ອຕ຺ຖິຕາ’’ຕິອາທີສຸປິ ອຕ຺ຖິຍາ ຠາໂວ ອຕ຺ຖິຠາໂວ, ນຕ຺ຖິຍາ ຠາໂວ ນຕ຺ຖິຠາໂວ, ອຕ຺ຖິຍາ ຠາໂວ ອຕ຺ຖິຕາຠິອາທິນາ ສມາສຕທ຺ຘິຕວິຄ຺ຄໂຫ ອວສ຺ສມິຈ຺ຉິຕພ຺ໂພ. ຍທິທມມ຺ເຫຫິ ວຸຕ຺ຕໍ, ຕໍ ‘‘ປາຬິຍາ ວິຣຸຊ຺ຌຕີ’’ຕິ ນ ວຕ຺ຕພ຺ພໍ ປາຬິນຍານຸສາເຣນ ວຸຕ຺ຕຕ຺ຕາຕິ.

ເອວໍ ໂຫຕຸ, ກສ຺ມາ ໂຠ ‘‘ອຕ຺ຖິຍາ, ນຕ຺ຖິຍາ’’ຕິ ອິຕ຺ຖິລິງ຺ຄນິທ຺ເທໂສ ກໂຕ, ນນຸ ນິປາໂຕປສຄ຺ຄາ ອລິງ຺ຄເຠທາຕິ? ສຈ຺ຈໍ, ອິທໍ ປນ ຐານໍ ອຕີວ ສຸຂຸມໍ, ຕຖາປິ ປຸພ຺ພາຈຣິຍານຸຠາວຎ຺ເຎວ ນິສ຺ສາຍ ວິນິຈ຺ຉຍໍ ພ຺ຣູມ. ຍຖາ ຫິ ວີສຕິອິຈ຺ຈາທີນໍ ສງ຺ຂ຺ຍາສທ຺ທານໍ ສຣູປໂຕ ອທພ຺ພວາຈກຕ຺ເຕປິ ທພ຺ພວາຈການໍ ລຕາມຕິຣຕ຺ຕິອິຕ຺ຖີ ຍາຄຸວຘູສທ຺ທານໍ ວິຍ ອິຕ຺ຖິລິງ຺ຄຠາໂວ ສທ຺ທສຕ຺ຖວິທູຫິ ອນຸມໂຕ, ເອວໍ ອທພ຺ພວາຈກຕ຺ເຕປິ ອຕ຺ຖິ ນຕ຺ຖິສທ຺ທານໍ ກຕ຺ຖຈິ ອິຕ຺ຖິລິງ຺ຄຠາໂວ ສທ຺ຘມ຺ມວິທູຫິ ອນຸມໂຕ. ເຕນາຫ ອາຍສ຺ມາ ຘມ຺ມເສນາປຕິ ‘‘ອຕ຺ຖິຍາ ນວ, ນຕ຺ຖິຍາ ນວາ’’ຕິ. ອຖ ວາ ‘‘ອຕ຺ຖິຍາ, ນຕ຺ຖິຍາ’’ຕິ ອິມານິ ລິງ຺ຄຠາວວິນິມຸຕ຺ຕານິ ສຕ຺ຕມິຍນ຺ຕານິ ນິປາຕປທານີຕິປິ ຄເຫຕພ຺ພານິ, ນ ເອຕ຺ຖ ໂຈເທຕພ຺ພໍ, ເອວຣູປານິ ນິປາຕປທານິ ປຸພ຺ພາຈຣິເຍຫິ ວຸຕ຺ຕານິ ນ ສນ຺ຕິ, ຕສ຺ມາ ຉຑ຺ເຑຕພ຺ພມິທໍ ວຈນນ຺ຕິ.

ປາວຈນສ຺ມິຎ຺ຫິ ຄຣູຫິ ອນິທ຺ທິຏ຺ຐານິປິ ອເນກວິຫິຕານິ ນິປາຕປທານິ ສນ຺ທິສ຺ສນ຺ຕິ, ນາປິ ‘‘ເຫຕຸຍາ, ອຘິປຕິຍາ, ອຕ຺ຖິຍາ, ນຕ຺ຖິຍາ’’ຕິ ເອວມາທີສຸ ‘‘ອປສທ຺ທາ ອິເມ’’ຕິ ວິໂຣໂຘ ອຸປ຺ປາເທຕພ຺ໂພ. ນ ຫິ ອຈິນ຺ເຕຍ຺ຍານຸຠາເວນ ປາຣມິຕາປຸຎ຺ເຎນ ນິປ຺ຜນ຺ເນນ ອນາວຣຓຎາເຓນ ສພ຺ພໍ ເຎຍ຺ຍມຓ຺ຑລໍ ຫຕ຺ຖຕເລ ອາມລກໍ ວິຍ ປຈ຺ຈກ຺ຂໍ ກຕ຺ວາ ປສ຺ສໂຕ ພຸທ຺ຘສ຺ສ ວຈເນ ອຎ຺ເຎສໍ ວາຈາວິປ຺ປລາໂປ ອວສ຺ສໍ ລພ຺ຠຕີຕິ. ນນຸ ຈ ໂຠ ‘‘ເຫຕຸຍາ, ອຘິປຕິຍາ, ອຕ຺ຖິຍາ, ນຕ຺ຖິຍາ’’ຕິ ຈ ອິທໍ ສາຣິປຸຕ຺ຕຕ຺ເຖຣວຈນໍ ເຕນ ນິກ຺ຂິຕ຺ຕຕ຺ຕາ. ຕຖາຄເຕນ ຫິ ຕາວຕິໍສຠປເນ ເທສິຕກາເລ ອິມານິ ປທານິ ນ ສນ຺ຕິ, ເອວໍ ສນ຺ເຕ ກສ຺ມາ ‘‘ພຸທ຺ຘວຈນ’’ນ຺ຕິ ວທຖາຕິ? ພຸທ຺ຘວຈນໍເຍວ ນາມ. ອາຍສ຺ມໂຕ ຫິ ສາຣິປຸຕ຺ຕສ຺ສ ຕຖາຄເຕນ ນໂຍ ທິນ຺ໂນ, ເຕນປິ ປຠິນ຺ນປຏິສມ຺ຠິເທນ ສຕ຺ຖຸກປ຺ເປນ ອຄ຺ຄສາວເກນ ສຕ຺ຖຸ ສນ຺ຕິກາ ນຍໍ ລຠິຕ຺ວາ ພ຺ຍຎ຺ຊນໍ ສຸໂຣປິຕໍ ກຕໍ. ສພ຺ເພປິ ຫິ ປຏິສມ຺ຠິທປ຺ປຕ຺ຕາ ອຣິຍາ ທຸນ຺ນິຣຸຕ຺ຕິໍ ນ ວທນ຺ຕິ ນິຣຸຕ຺ຕິປເຠທສ຺ມິໍ ສຸກຸສລຕ຺ຕາ, ຕສ຺ມາ ອຎ຺ເຎສມວິສໂຍ ເອສ ອຣິຍານໍ ໂວຫາໂຣຕິ ທຏ຺ຐພ຺ພໍ.

ອິທານິ ສຕາທີນໍ ນາມິກປທມາລາ ວຸຈ຺ຈເຕ –

ສຕໍ, ສຕານິ, ສຕາ. ສຕໍ, ສຕານິ, ສເຕ. ສເຕນ, ສເຕຫິ, ສເຕຠິ. ສຕສ຺ສ, ສຕານໍ. ສຕາ, ສຕສ຺ມາ, ສຕມ຺ຫາ, ສເຕຫິ, ສເຕຠິ. ສຕສ຺ສ, ສຕານໍ. ສເຕ, ສຕສ຺ມິໍ, ສຕມ຺ຫິ, ສເຕສຸ. ເອວໍ ສຫສ຺ສໍ, ສຫສ຺ສານີຕິ ໂຍເຊຕພ຺ພໍ. ທສສຫສ຺ສໍ ສຕສຫສ຺ສໍ ທສສຕສຫສ຺ສນ຺ຕິ ເອຕ຺ຖາປິ ເອເສວ ນໂຍ. ອຍໍ ປເນຕ຺ຖ ປໂຍໂຄ ‘‘ສຕໍ ຠິກ຺ຂູ, ສຕໍ ອິຕ຺ຖິໂຍ, ສຕໍ ຈິຕ຺ຕານິ. ຠິກ຺ຂູນໍ ສຕໍ, ອິຕ຺ຖີນໍ ສຕໍ, ຈິຕ຺ຕານໍ ສຕໍ. ສຫສ຺ສາທີສຸປິ ເອເສວ ນໂຍ. ອິຕ຺ຖຎ຺ຈ ອຎ຺ຎຖາປິ ສທ຺ທຣູປານິ ຠວນ຺ຕິ. ໂກຏິ, ໂກຏີ, ໂກຏິໂຍ. ຣຕ຺ຕິນເຍນ ເຎຍ຺ຍໍ.

ເອກປ຺ປຠຸຕິໂຕ ຍາວ, ທສກາ ຍາ ປວຕ຺ຕຕິ;

ສງ຺ຂ຺ຍາ ຕາວ ສາ ສງ຺ຂ຺ເຍຍ຺ຍ-ປ຺ປຘານາຕິ ຄຣູ ວທຸໍ.

ວີສຕິໂຕ ຍາວ ສຕາ, ຍາ ສງ຺ຂ຺ຍາ ຕາວ ສາ ປນ;

ສງ຺ຂ຺ຍາປ຺ປຘານາ ສງ຺ຂ຺ເຍຍ຺ຍ-ປ຺ປຘານາຕິ ຈ ວຓ຺ຓຍຸໍ.

ອປິຈ –

ວີສໂຕ ຍາວ ໂກຏິຍາ, ສງ຺ຂ຺ຍາ ຕາວ ຫິ ສາ ຂລຸ;

ສງ຺ຂ຺ຍາປ຺ປຘານາ ສງ຺ຂ຺ເຍຍ຺ຍ-ປ຺ປຘານາ ຈາຕິ ນິທ຺ທິເສ.

ຕຖາ ຫິ ‘‘ອສີຕິ ໂກຏິໂຍ ຫິຕ຺ວາ, ຫິຣຎ຺ຎສ຺ສາປິ ປພ຺ພຊິ’’ນ຺ຕິ, ‘‘ຂີຓາສວາ ວີຕມລາ, ສມິໍສຸ ສຕໂກຏິໂຍ’’ຕິ ຈ ປາຬິ ທິສ຺ສຕິ.

ອິມສ຺ມິໍ ປນ ຐາເນ ສພ຺ເພສໍ ສງ຺ຂ຺ຍາສທ຺ທຣູປານໍ ປາກຏີກຣເຓນ ວິຎ຺ຎູນໍ ສຸຂຸມຎາຓປຏິລາຠຕ຺ຖໍ ສາຏ຺ຐກຖໍ ອຸທານປາຬິປ຺ປເທສໍ ອຎ຺ຎຎ຺ຈ ປາຬິປ຺ປເທສມຏ຺ຐກຖາວຈນຎ຺ຈ ອາຫຣິຕ຺ວາ ທສ຺ສຍິສ຺ສາມິ –

‘‘ເຍສໍ ໂຂ ວິສາເຂ ສຕໍ ປິຍານິ, ສຕໍ ເຕສໍ ທຸກ຺ຂານິ, ເຍສໍ ນວຸຕິ ປິຍານິ, ນວຸຕິ ເຕສໍ ທຸກ຺ຂານິ. ເຍສໍ ອສີຕິ…ເປ… ເຍສໍ ສຕ຺ຕຕິ. ເຍສໍ ສຏ຺ຐິ. ເຍສໍ ປຎ຺ຎາສໍ, ເຍສໍ ຈຕ຺ຕາຣີສໍ, ເຍສໍ ຕິໍສໍ. ເຍສໍ ໂຂ ວິສາເຂ ວີສໍ ປິຍານິ, ວີສຕິ ເຕສໍ ທຸກ຺ຂານິ. ເຍສໍ ທສ. ເຍສໍ ນວ. ເຍສໍ ອຏ຺ຐ. ເຍສໍ ສຕ຺ຕ. ເຍສໍ ຉ. ເຍສໍ ປຎ຺ຈ. ເຍສໍ ຈຕ຺ຕາຣິ. ເຍສໍ ຕີຓິ. ເຍສໍ ທ຺ເວ. ເຍສໍ ເອກໍ ປິຍໍ, ເຕສໍ ເອກໍ ທຸກ຺ຂ’’ນ຺ຕິ.

ຕຕ຺ຖ ສຕໍ ປິຍານີຕິ ສຕໍ ປິຍາຍິຕພ຺ພວຕ຺ຖູນິ. ‘‘ສຕໍ ປິຍ’’ນ຺ຕິປິ ເກຈິ ປຐນ຺ຕິ. ເອຕ຺ຖ ຈ ຍສ຺ມາ ເອກໂຕ ປຏ຺ຐາຍ ຍາວ ທສ, ຕາວ ສງ຺ຂ຺ຍາສງ຺ຂ຺ເຍຍ຺ຍປ຺ປຘານາ, ຕສ຺ມາ ‘‘ເຍສໍ ທສ ປິຍານິ, ທສ ເຕສໍ ທຸກ຺ຂານີ’’ຕິອາທິນາ ປາຬິ ອາຄຕາ. ເກຈິ ປນ ‘‘ເຍສໍ ທສ ປິຍານໍ, ທສ ເຕສໍ ທຸກ຺ຂານ’’ນ຺ຕິອາທິນາ ປຐນ຺ຕິ, ຕໍ ນ ສຸນ຺ທຣໍ. ຍສ຺ມາ ປນ ວີສຕິໂຕ ປຏ຺ຐາຍ ຍາວ ສຕໍ, ຕາວ ສງ຺ຂ຺ເຍຍ຺ຍປ຺ປຘານາ ສງ຺ຂ຺ຍາປ຺ປຘານາ ຈ, ຕສ຺ມາ ຕຕ຺ຖາປິ ສງ຺ຂ຺ເຍຍ຺ຍປ຺ປຘານໍເຍວ ຄເຫຕ຺ວາ ‘‘ເຍສໍ ໂຂ ວິສາເຂ ສຕໍ ປິຍານິ, ສຕໍ ເຕສໍ ທຸກ຺ຂານີ’’ຕິອາທິນາ ປາຬິ ອາຄຕາ. ສພ຺ເພສມ຺ປິ ຈ ເຍສໍ ເອກໍ ປິຍໍ, ເອກໍ ເຕສໍ ທຸກ຺ຂນ຺ຕິ ປາໂຐ, ນ ປນ ທຸກ຺ຂສ຺ສາຕິ. ເອກສ຺ມິຎ຺ຫິ ປທກ຺ກເມ ເອກຣສາວ ຠຄວໂຕ ເທສນາ ໂຫຕີຕິ. ຕສ຺ມາ ຍຖາວຸຕ຺ຕນຍາວ ປາຬິ ເວທິຕພ຺ພາ. ອຍໍ ຕາວ ສາຏ຺ຐກໂຖ ອຸທານປາຬິປ຺ປເທໂສ.

ອິທານິ ອຎ຺ໂຎ ປາຬິປ຺ປເທໂສ ອຏ຺ຐກຖາປາຐປ຺ປເທໂສ ຈ ນີຍເຕ –

‘‘ສຕໍ ຫຕ຺ຖີ ສຕໍ ອສ຺ສາ, ສຕໍ ອສ຺ສຕຣີຣຖາ;

ສຕໍ ກຎ຺ຎາ ສຫສ຺ສານິ, ອາມຸກ຺ກມຓິກຸຓ຺ຑລາ;

ເອກສ຺ສ ປທວີຕິຫາຣສ຺ສ, ກລໍ ນາຄ຺ຆນ຺ຕິ ໂສຬສິ’’ນ຺ຕິ

ປາຬິ. ເອຕ຺ຖ ‘‘ສຕໍ ຫຕ຺ຖີ’’ຕິອາທີນິ ວິເສສິຕານິ, ‘‘ສຫສ຺ສານີ’’ຕິ ວິເສສນໍ, ຕສ຺ມາ ສຕໍສທ຺ທໍ ສຫສ຺ສສທ຺ເທນ ໂຍເຊຕ຺ວາ ‘‘ຫຕ຺ຖີ’’ຕິອາທີນິ ປນ ອຸປປທໍ ກຕ຺ວາ ອຕ຺ໂຖ ຄເຫຕພ຺ໂພ. ຫຕ຺ຖີ ສຕໍ ສຫສ຺ສານິ. ອສ຺ສາ ສຕໍ ສຫສ຺ສານິ. ອສ຺ສຕຣີຣຖາ ສຕໍ ສຫສ຺ສານິ. ອາມຸກ຺ກມຓິກຸຓ຺ຑລາ ກຎ຺ຎາ ສຕໍ ສຫສ຺ສານິ. ອິທໍ ສງ຺ຂ຺ເຍຍ຺ຍປ຺ປຘານວເສນຕ຺ຖຄຫຓໍ. ສງ຺ຂ຺ຍາປ຺ປຘານວເສນ ປນ ອຍມ຺ປິ ອຕ຺ໂຖ ຄເຫຕພ຺ໂພ ‘‘ຫຕ຺ຖີນໍ ສຕສຫສ຺ສໍ, ອສ຺ສານໍ ສຕສຫສ຺ສໍ, ອສ຺ສຕຣີຣຖານໍ ສຕສຫສ຺ສໍ, ອາມຸກ຺ກມຓິກຸຓ຺ຑລານໍ ກຎ຺ຎານໍ ສຕສຫສ຺ສ’’ນ຺ຕິ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ. ‘‘ໂຍຊນານໍ ສຕານຸຈ຺ໂຈ, ຫິມວາ ປຎ຺ຈ ປພ຺ພໂຕ’’ຕິ ອຍມຏ຺ຐກຖາປາໂຐ. ເອຕ຺ຖ ‘‘ປຎ຺ຈາ’’ຕິ ສທ຺ທໍ ສຕສທ຺ເທນ ສທ຺ຘິໍ ໂຍເຊຕ຺ວາ ‘‘ສິປ຺ປິການໍ ສຕໍ ນຕ຺ຖີ’’ຕິ ເອຕ຺ຖ ວິຍ ຫິມວາ ປພ຺ພໂຕ ໂຍຊນານໍ ປຎ຺ຈ ສຕານິ ອຸຈ຺ໂຈຕິ ສງ຺ຂ຺ຍາປ຺ປຘານວເສນ ອຕ຺ໂຖ ຄເຫຕພ຺ໂພ. ‘‘ປຎ຺ຈ ສຕານີ’’ຕິ ຈ ອທ຺ຘຸໂນ ອຈ຺ຈນ຺ຕສໍໂຍຄວເສນ ອຸປໂຍຄວຈນໍ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ. ສຕມິຕິ ສທ຺ໂທ ‘‘ສຕໍ ໂຫມິ, ສຫສ຺ສໍ ໂຫມີ’’ຕິອາທີສຸ ເອກວຈໂນ. ‘‘ອເຖຕ຺ເຖກສຕໍ ຂຕ຺ຍາ, ອນຸຍນ຺ຕາ ຍສສ຺ສິໂນ’’ຕິອາທີສຸ ພຫຸວຈໂນ. ເອວໍ ສຫສ຺ສາທີນມ຺ປິ ເອກວຈນພຫຸວຈນຕາ ລພ຺ຠຕິ. ຕຖາ ຫິ ‘‘ຠິຍ຺ໂຍ ນໍ ສຕສຫສ຺ສໍ, ຍກ຺ຂານໍ ປຍິຣຸປາສຕີ’’ຕິ ເອຕ຺ຖ ‘‘ສຕສຫສ຺ສ’’ນ຺ຕິ ເອກວຈນໍ. ‘‘ປໂຣສຫສ຺ສໍ ໂຂ ປນສ຺ສ ປຸຕ຺ຕາ ຠວິສ຺ສນ຺ຕີ’’ຕິ ເອຕ຺ຖ ສຫສ຺ສນ຺ຕິ ພຫຸວຈນນ຺ຕິ ທຏ຺ຐພ຺ພໍ.

‘‘ກປ຺ເປ ຈ ສຕສຫສ຺ເສ, ຈຕຸໂຣ ຈ ອສງ຺ຂິເຍ;

ອມຣໍ ນາມ ນຄຣໍ, ທສ຺ສເນຍ຺ຍໍ ມໂນຣມ’’ນ຺ຕິ

ປາຬິ. ເອຕ຺ຖ ‘‘ກປ຺ເປ ຈ ສຕສຫສ຺ເສ ຈຕຸໂຣ ຈ ອສງ຺ຂິເຍຕິ ສາມິອຕ຺ເຖ ອຸປໂຍຄພຫຸວຈນໍ, ຕສ຺ມາ ‘‘ມຫາກປ຺ປານໍ ສຕສຫສ຺ສານໍ ຈຕຸນ຺ນໍ ອສງ຺ຂິຍານໍ ມຕ຺ຖເກ’’ຕິ ອຕ຺ໂຖ ຄເຫຕພ຺ໂພ, ‘‘ມຕ຺ຖເກ’’ຕິ ເຈຕ຺ຖ ວຈນເສໂສ. ‘‘ກປ຺ປສຕສຫສ຺ສາຘິການໍ ຈຕຸນ຺ນໍ ອສງ຺ຂິຍານໍ ມຕ຺ຖເກ’’ອິຈ຺ເຈວຕ຺ໂຖ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ກປ຺ເປ ຈ ສຕສຫສ຺ເສ, ຈຕຸໂຣ ຈ ອສງ຺ຂິເຍ;

ເອຕ຺ຖນ຺ຕເຣ ຍໍ ຈຣິຕໍ, ສພ຺ພໍ ຕໍ ໂພຘິປາຈນ’’ນ຺ຕິ

ປາຬິ. ເອຕ຺ຖ ‘‘ກປ຺ເປ’’ຕິ ອຈ຺ຈນ຺ຕສໍໂຍຄວເສນ ອຸປໂຍຄພຫຸວຈນໍ. ‘‘ສຕສຫສ຺ເສ ກປ຺ເປ’’ຕິ ກປ຺ປສທ຺ທສມ຺ພນ຺ເຘນ ຈາຍໍ ປຸລ຺ລິງ຺ຄນິທ຺ເທໂສ ອຸປໂຍຄນິທ຺ເທໂສ ຈ. ສມານາຘິກຣຓຎ຺ຫິ ອິທໍ ກປ຺ປສທ຺ເທນ. ‘‘ຈຕຸໂຣ ຈ ອສງ຺ຂິເຍ’’ຕິ ອຈ຺ຉນ຺ຕສໍໂຍຄວເສນ ອຸປໂຍຄພຫຸວຈນານິ. ກສ຺ສ ປນ ອສງ຺ຂິເຍຕິ? ອຎ຺ຎສ຺ສ ອວຸຕ຺ຕຕ຺ຕາ ກປ຺ປສ຺ສ ຈ ວຸຕ຺ຕຕ຺ຕາ ປກຣຓໂຕ ‘‘ກປ຺ປານ’’ນ຺ຕິ ອຍມຕ຺ໂຖ ວິຎ຺ຎາຍເຕວ. ນ ຫິ ວຸຕ຺ຕໍ ວຊ຺ເຊຕ຺ວາ ອວຸຕ຺ຕສ຺ສ ກສ຺ສຈິ ຄຫຓໍ ຍຸຕ຺ຕນ຺ຕິ. ຈສທ຺ໂທ ສມ຺ປິຓ຺ຑນຕ຺ໂຖ ‘‘ມຫາກປ຺ປານໍ ຈຕຸໂຣ ອສງ຺ຂ຺ເຍຍ຺ເຍ ສຕສຫສ຺ເສ ຈ ມຫາກປ຺ເປ’’ຕິ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ຆຏາເນກສຫສ຺ສານິ, ກຸມ຺ຠີນຎ຺ຈ ສຕາ ພຫູ’’ຕິ ປາຬິ. ເອຕ຺ຖ ຆຏາຕິ ຆຏານໍ. ສາມິອຕ຺ເຖ ຫິ ອິທໍ ປຈ຺ຈຕ຺ຕວຈນໍ. ‘‘ຆຏານໍ ອເນກສຫສ຺ສານິ’’ ອິຈ຺ເຈວຕ຺ໂຖ. ກຸມ຺ຠີນຎ຺ຈ ສຕາ ພຫູຕິ ອເນການິ ຈ ກຸມ຺ຠີນໍ ສຕານິ. ເອຕ຺ຖ ນິກາຣໂລໂປ ທຏ຺ຐພ຺ໂພ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ທສວີສສຫສ຺ສານໍ, ຘມ຺ມາຠິສມໂຍ ອຫຸ;

ເອກທ຺ວິນ຺ນໍ ອຠິສມໂຍ, ຄຓນາໂຕ ອສງ຺ຂິໂຍ’’ຕິ

ປາຬິ. ເອຕ຺ຖ ທສວີສສຫສ຺ສານນ຺ຕິ ທສສຫສ຺ສານໍ ວີສສຫສ຺ສານຎ຺ຈ. ຘມ຺ມາຠິສມໂຍຕິ ຈຕຸສຈ຺ຈປ຺ປຏິເວໂຘ. ເອກທ຺ວິນ຺ນນ຺ຕິ ສີສມຕ຺ຕກຖນໍ, ເຕນ ‘‘ເອກສ຺ສ ເຈວ ທ຺ວິນ຺ນຎ຺ຈ ຕິຓ຺ຓໍ ຈຕຸນ຺ນໍ…ເປ… ທສນ຺ນ’’ນ຺ຕິອາທິນາ ນເຍນ ອສງ຺ຂ຺ເຍຍ຺ໂຍຕິ ອຕ຺ໂຖ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ຈຕ຺ຕາຣິ ສຕສຫສ຺ສານິ, ຉຬຠິຎ຺ຎາ ມຫິທ຺ຘິກາ;

ທີປງ຺ກຣໍ ໂລກວິທຸໍ, ປຣິວາເຣນ຺ຕິ ສພ຺ພທາ’’ຕິ

ປາຬິ. ເອຕ຺ຖ ຈຕ຺ຕາຣິ ສຕສຫສ຺ສານີຕິ ອິທໍ ລິງ຺ຄເຠທວເສນ ‘‘ຉຬຠິຎ຺ຎາ ມຫິທ຺ຘິກາ’’ຕິ ອິເມຫິ ທ຺ວີຫິ ປເທຫິ ສມານາຘິກຣຓໍ. ອີທິເສສຸ ຫິ ຐາເນສຸ ອສງ຺ຂ຺ເຍຍ຺ຍ ວາຈໂກປິ ສທ຺ໂທ ນປຸໍສໂກວ ໂຫຕິ, ຕສ຺ມາ ‘‘ຈຕ຺ຕາຣິ ສຕສຫສ຺ສານີ’’ຕິ ຈ ‘‘ຉຬຠິຎ຺ຎາ’’ຕິ ຈ ‘‘ມຫິທ຺ຘິກາ’’ຕິ ຈ ເອຕໍ ປທຕ຺ຕຍໍ ສມານາຘິກຣຓໍ. ອຖ ວາ ຉຬຠິຎ຺ຎາ ມຫິທ຺ຘິກາຕິ ຉຬຠິຎ຺ຎານໍ ມຫທ຺ຘິການນ຺ຕິ ສາມິອຕ຺ເຖ ປຈ຺ຈຕ຺ຕວຈນໍ ທຏ຺ຐພ຺ພໍ. ອິມສ຺ມິໍ ປນຕ຺ເຖ ‘‘ຈຕ຺ຕາຣິ ສຕສຫສ຺ສານີ’’ຕິ ອຍໍ ສງ຺ຂ຺ຍາວຈໂນ ຠວຕິ. ‘‘ຕີຓິ ສຕສຫສ຺ສານິ, ນາຣິໂຍ ສມລງ຺ກຕາ’’ຕິອາທີສຸປິ ອຍໍ ນໂຍ ເນຕພ຺ໂພ. ‘‘ຕາ ຈ ສຕ຺ຕ ສຕາ ຠຣິຍາ, ທາສ຺ໂຍ ສຕ຺ຕ ສຕານິ ຈາ’’ຕິ ປາຬິ. ເອຕ຺ຖ ສຕາຕິ ‘‘ສຕານີ’’ຕິ ນປຸໍສກວເສນ ຄເຫຕພ຺ພໍ, ນ ອິຕ຺ຖິລິງ຺ຄວເສນ. ‘‘ສຕາ’’ຕິ ຫິ ‘‘ປຎ຺ຈ ຈິຕ຺ຕາ ວິປາກາ’’ຕິອາທີນິ ວິຍ ນປຸໍສກຣູປໍ. ອິຕ຺ຖິລິງ຺ຄຠູຕາ ຫິ ສຕສທ຺ໂທ ນຕ຺ຖິ, ຕຖາ ປຸລ຺ລິງ຺ຄຠູໂຕ. ຍທິ ຈ ທ຺ວິລິງ຺ໂຄ ສຕສທ຺ໂທ ສິຍາ, ເອວຎ຺ຈ ສຕິ ‘‘ປຸຣິໂສ, ກຎ຺ຎາ’’ຕິ ຈ ໂອກາຣນ຺ຕປຸລ຺ລິງ຺ຄອາກາຣນ຺ຕິຕ຺ຖິຣູເປຫິປິຠວິຕພ຺ພໍ. ຣູປທ຺ວຍມ຺ປິ ສຕສທ຺ທສ຺ສ ນຕ຺ຖິ, ເຕນ ຎາຍຕິ ‘‘ສຕສທ຺ໂທ ເອກນ຺ຕນປຸໍສໂກ’’ຕິ.

ນນຸ ຈ ໂຠ ‘‘ຕາ ເທວຕາ ສຕ຺ຕສຕາ ອຸຬາຣາ’’ຕິ ເອຕ຺ຖ ສຕສທ຺ໂທ ອິຕ຺ຖິລິງ຺ໂຄ ຫຸຕ຺ວາ ທິສ຺ສຕີຕິ? ນ, ນປຸໍສໂກເຍວາຕິ. ນນຸ ຈ ໂຠ ເທວຕາສທ຺ເທນ ສມານາຘິກຣໂຓຕິ? ສຈ຺ຈໍ ສມານາຘິກຣໂຓ, ຕຖາປິ ນປຸໍສໂກເຍວ. ອີທິເສສຸ ຫິ ສງ຺ຂ຺ຍາວິສເຍສຸ ສມານາຘິກຣຓຠາໂວ ອປ຺ປມາໂຓ. ຕຖາ ຫິ ‘‘ປຎ຺ຈ ປຈ຺ເຈກພຸທ຺ຘສຕານິ ອິມສ຺ມິໍ ອິສິຄິລິສ຺ມິໍ ປພ຺ພເຕ ຈິຣວາສິໂນ ອເຫສຸ’’ນ຺ຕິ ນປຸໍສກລິງ຺ເຄນ ປຸລ຺ລິງ຺ຄສ຺ສ ສມານາຘິກຣຓຕາ ທິສ຺ສຕິ, ຕສ຺ມາ ‘‘ຕາ ເທວຕາ ສຕ຺ຕສຕາ ອຸຬາຣາ’’ຕິ ເອຕ຺ຖາປິ ‘‘ສຕ຺ຕສຕານີ’’ຕິ ນປຸໍສກຠາໂວເຍວາຕິ ອວຄນ຺ຕພ຺ໂພ. ‘‘ສຕ຺ຕ ຫຕ຺ຖິສເຕ ທຕ຺ວາ’’ຕິອາທີສຸປິ ສຕສທ຺ໂທ ນປຸໍສໂກເຍວ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ນວຸຕິໂກຏິສຫສ຺ເສຫິ, ປຣິວາເຣສິ ມຫາມຸນີ’’ຕິ ປາຬິ. ເອຕ຺ຖ ‘‘ນວຸຕິໂກຏິສຫສ຺ເສຫິ ຠິກ຺ຂູຫີ’’ຕິ ວາ ‘‘ຠິກ຺ຂູນໍ ນວຸຕິໂກຏິສຫສ຺ເສຫີ’’ຕິ ວາ ສງ຺ຂ຺ເຍຍ຺ຍສງ຺ຂ຺ຍາປຘານວເສນ ອຕ຺ໂຖ ຄເຫຕພ຺ໂພ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ສຕສຫສ຺ສວສ຺ສານິ, ອາຍຸ ຕສ຺ສ ມເຫສິໂນ’’ຕິ ປາຬິ. ເອຕ຺ຖ ‘‘ສຕສຫສ຺ສວສ຺ສານີ’’ຕິ ກາລສ຺ສ ອຈ຺ຈນ຺ຕສໍໂຍຄວເສນ ອຸປໂຍຄວຈນໍ. ຕຖາ ‘‘ທສວສ຺ສສຫສ຺ສານິ, ອຄາຣ’ມຊ຺ຌ ໂສ ວສີ’’ຕິ ປາຬິຍມ຺ປິ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ’’ຕິ ປາຬິ, ‘‘ເອກນວຸເຕ ອິໂຕ ກປ຺ເປ’’ຕິ ປາຬິ ຈ. ເອຕ຺ຖ ສຕສຫສ຺ສມ຺ຫິ ກປ຺ເປຕິ ສຕສຫສ຺ສານໍ ກປ຺ປານໍ ມຕ຺ຖເກ. ເອກນວຸເຕ ກປ຺ເປຕິ ເອກນວຸຕິຍາ ກປ຺ປານໍ ມຕ຺ຖເກຕິ ຠຸມ຺ມວຈນສ຺ສ ສາມິຠຸມ຺ມວຈນວເສນ ອຕ຺ໂຖ ຄເຫຕພ຺ໂພ. ຕຖາ ຫິ ‘‘ຠຄວຕິ ພ຺ຣຫ຺ມຈຣິຍໍ ວຸສ຺ສຕີ’’ຕິ ເອຕ຺ຖ ຠຸມ຺ມວຈນສ຺ສ ‘‘ຠຄວໂຕ ສນ຺ຕິເກ’’ຕິ ສາມິຠຸມ຺ມວຈນວເສນ ອຕ຺ໂຖ ຄຫິໂຕ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ຍທິ ຕຕ຺ຖ ສຫສ຺ສານິ, ສຕານິ ນຫຸຕານິ ຈ;

ເນວມ຺ຫາກໍ ຠຍໍ ໂກຈິ, ວເນ ວາເຬສຸ ວິຊ຺ຊຕີ’’ຕິ

ປາຬິ. ອຍເມຕສ຺ສາ ອຕ຺ໂຖ – ຕຕ຺ຖ ວເນ ວາຬານໍ ສຫສ຺ສານິ ຈ ສຕານິ ຈ ນຫຸຕານິ ຈ ຍທິ ວິຊ຺ຊນ຺ຕິ. ອຖ ວາ ສຫສ຺ສານິ ສຕານີຕິ ສຕສຫສ຺ສານິ, ວາຬານໍ ສຕສຫສ຺ສານິ ຈ ນຫຸຕານິ ຈ ຍທິ ວິຊ຺ຊນ຺ຕິ, ເອວໍ ວິຊ຺ຊນ຺ເຕສຸປິ ວາເຬສຸ ໂກຈີຕິ ກ຺ວຈິ. ໂກຈິສທ຺ໂທ ຫິ ‘‘ໂກ ເຕ ພລໍ ມຫາຣາຊາ’’ຕິ ເອຕ຺ຖ ໂກສທ຺ໂທ ວິຍ ກ຺ວສທ຺ທຕ຺ເຖ ວຕ຺ຕຕິ, ນິມິຕ຺ຕຕ຺ເຖ ຈາຍໍ ນິທ຺ເທໂສ. ເຕນ ‘‘ໂກຈິ ກ຺ວຈິ ກິສ຺ມິຎ຺ຈິ ວາເຬ ເອກສ຺ສປິ ວາຬມິຄສ຺ສ ກາຣຓາ ເນວມ຺ຫາກໍ ຠຍໍ ວິຊ຺ຊຕີ’’ຕິ ອຕ຺ໂຖ ຄເຫຕພ຺ໂພ. ອຖ ວາ ໂກຈີຕິ ກິຎ຺ຈິ ອປ຺ປມຕ຺ຕກມ຺ປິ. ເອຕ຺ຖ ປນ ‘‘ວາເຬສູ’’ຕິ ນິມິຕ຺ຕຕ຺ເຖ ຠຸມ຺ມໍ. ວາຬານໍ ກາຣຓາ ອປ຺ປມຕ຺ຕກມ຺ປິ ອມ຺ຫາກໍ ຠຍໍ ນ ວິຊ຺ຊຕີຕິ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ສພ຺ພໍ ສຕສຫສ຺ສານິ, ຉຕ຺ຕິໍສປຣິມຓ຺ຑລໍ;

ທສຎ຺ເຈວ ສຫສ຺ສານິ, ອຑ຺ຒຸຑ຺ຒານິ ສຕານິ ຈາ’’ຕິ

ອຏ຺ຐກຖາປາໂຐ. ເອຕ຺ຖ ຍສ຺ມາ ສທ຺ທໂຕ ສມານວິຠຕ຺ຕິລິງ຺ຄວຈນານໍ ປທານໍ ອສມານວິຠຕ຺ຕິລິງ຺ຄວຈນານໍ ວາ ອຕ຺ຖໂຕ ປນ ສມານານໍ ທູເຣ ຐິຕານມ຺ປິ ເອກສມ຺ພນ຺ໂຘ ໂຫຕິ, ອິຕເຣສໍ ສມີເປ ຐິຕານມ຺ປິ ນ ໂຫຕິ, ຕສ຺ມາ ‘‘ສພ຺ພ’’ນ຺ຕິທໍ ‘‘ປຣິມຓ຺ຑລ’’ນ຺ຕິມິນາ ສມ຺ພນ຺ຘິຕພ຺ພໍ. ‘‘ຉຕ຺ຕິໍສາ’’ຕິ ອິທໍ ປນ ‘‘ສຕສຫສ຺ສານີ’’ຕິມິນາ ສມ຺ພນ຺ຘິຕພ຺ພໍ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ທຸເວ ສຕສຫສ຺ສານິ, ຈຕ຺ຕາຣິ ນຫຸຕານິ ຈ;

ເອຕ຺ຕກໍ ພຫລຕ຺ເຕນ, ສງ຺ຂາຕາຍໍ ວສຸນ຺ຘຣາ’’ຕິ

ອຏ຺ຐກຖາປາໂຐ. ເອຕ຺ຖ ‘‘ທຸເວ’’ຕິ ວິເສສນໍ, ‘‘ສຕສຫສ຺ສານີ’’ຕິ ວິເສສິຕພ຺ພໍ. ຕຖາ ‘‘ຈຕ຺ຕາຣີ’’ຕິ ວິເສສນໍ, ‘‘ນຫຸຕານີ’’ຕິ ວິເສສິຕພ຺ພໍ. ຕຖາ ຫິ ‘‘ສຕສຫສ຺ສານິ ນຫຸຕານິ ຈາ’’ຕິ ອິມານິ ‘‘ທຸເວ ຈຕ຺ຕາຣີ’’ຕິ ອິເມຫິ ວິເສສິຕພ຺ພຕ຺ຕາ ‘‘ທ຺ວິສຕສຫສ຺ສໍ ຈຕຸນຫຸຕ’’ນ຺ຕິ ອຕ຺ຖປ຺ປກາສນານິ ຠວນ຺ຕິ. ເອວໍ ສນ຺ເຕປິ ‘‘ທຸເວ’’ອິຈ຺ຈາທີນໍ ສງ຺ຂ຺ຍາສທ຺ທານໍ ‘‘ສຕສຫສ຺ສານີ’’ຕິອາທີຫິ ສງ຺ຂ຺ຍາສທ຺ເທຫິ ສມານາຘິກຣຓຕາ ປຸພ຺ພາຈຣິເຍຫິ ນ ວຸຕ຺ຕາ. ຍສ຺ມາ ປນ ຍຖາ ‘‘ທຸເວ ປຸຖຸຊ຺ຊນາ ວຸຕ຺ຕາ. ສຕສຫສ຺ສໍ ຠິກ຺ຂູ’’ຕິອາທີສຸ ສມານາຘິກຣຓຕາ ລພ຺ຠຕິ ທພ຺ພວາຈກຕ຺ຕາ ວິເສສິຕພ຺ພປທານໍ, ນ ຕຖາ ‘‘ທຸເວ ສຕສຫສ຺ສານີ’’ຕິອາທີສຸ ອທພ຺ພວາຈກຕ຺ຕາ ວິເສສິຕພ຺ພປທານໍ, ຕສ຺ມາ ອີທິເສສຸ ຐາເນສຸ ສມານາຘິກຣຓຕາ ນ ອິຈ຺ຉິຕພ຺ພາ ຍຸຕ຺ຕິຍາ ອຠາວໂຕ. ຍທິ ເອວໍ ‘‘ກຸສລາ, ຣູປໍ, ຈກ຺ຂຸມາ’’ຕິອາທີນໍ ວິຍ ອິເມສມຎ຺ຎມຎ຺ຎສມ຺ພນ຺ຘຣຫິຕາ ສິຍາຕິ? ນ, ວິເສສນວິເສສິຕພ຺ພຠາເວນ ຄຫິຕຕ຺ຕາ. ຍຊ຺ເຊວໍ ສມານາຘິກຣຓຠາໂວ ລທ຺ຘພ຺ໂພຕິ? ນ, ນິຍມາຠາວໂຕ. ເອກນ຺ເຕນ ຫິ ຄຸຓຄຸຓີນໍເຍວ ວິເສສນວິເສສິຕພ຺ພານໍ ສມານາຘິກຣຓຠາໂວ, ນ ອິຕເຣສໍ ວິເສສນວິເສສິຕພ຺ພຕ຺ເຕປິ.

ຕຕ຺ຖ ‘‘ເອຕ຺ຕກ’’ນ຺ຕິ ປມາຓວຈນໍ. ‘‘ພຫລຕ຺ເຕນາ’’ຕິ ວິເສສເນ ຕຕິຍາ. ອຸຠເຍນ ອິມມຕ຺ຖໍ ທສ຺ເສຕິ ‘‘ອຍໍ ວສຸນ຺ຘຣາ ພຫລຕ຺ເຕນ ໂຍຊນານໍ ທຸເວ ສຕສຫສ຺ສານິ ຈຕ຺ຕາຣິ ນຫຸຕານິ ຈ ເອຕ຺ຕກໍ ສງ຺ຂາຕາ’’ຕິ. ‘‘ເອຕ຺ຕກ’’ນ຺ຕິ ປທສ຺ສ ຈ ‘‘ທຸເວ ສຕສຫສ຺ສານິ ຈຕ຺ຕາຣິ ນຫຸຕານິ ຈາ’’ຕິ ອິເມຫິ ວາ ‘‘ວສຸນ຺ຘຣາ’’ຕິ ອິມິນາ ວາ ສມານາຘິກຣຓຕາ ນ ອິຈ຺ຉິຕພ຺ພາ. ເອຕ຺ຕກນ຺ຕິ ຫິ ຠາວນປຸໍສກໍ, ຍໍ ສທ຺ທສຕ຺ເຖ ກ຺ຣິຍາວິເສສນນ຺ຕິ ວທນ຺ຕິ. ຕສ຺ສ ‘‘ເອຕ຺ຕເກນ ປມາເຓນ’’ອິຈ຺ເຈວຕ຺ໂຖ. ອປິຈ ‘‘ທຸເວ ສຕສຫສ຺ສານິ ຈຕ຺ຕາຣິ ນ ຫຸຕານິ ຈາ’’ຕິ ອິເມສມ຺ປິ ‘‘ວສຸນ຺ຘຣາ’’ຕິ ອິມິນາ ສມານາຘິກຣຓຕາ ນ ອິຈ຺ຉິຕພ຺ພາ ‘‘ຠິກ຺ຂູນໍ ສຕ’’ນ຺ຕິ ເອຕ຺ຖ ສຕສທ຺ທສ຺ສ ວິຍ ສງ຺ຂ຺ຍາວຈນມຕ຺ຕຕ຺ຕາ. ຕຖາ ຫິ ‘‘ເອຕ຺ຕກ’’ນ຺ຕິ ວຸຕ຺ຕໍ. ‘‘ສງ຺ຂາຕາ’’ຕິ ປນ ‘‘ອຍ’’ນ຺ຕິ ຈ ອິເມສໍ ‘‘ວສຸນ຺ຘຣາ’’ຕິ ອິມິນາ ສມານາຘິກຣຓຕາ ລພ຺ຠຕິ. ສພ຺ໂພປາຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ທເສຕ຺ຖ ຣາຊິໂຍ ເສຕາ, ທສ຺ສນີຍາ ມໂນຣມາ;

ຉ ປິງ຺ຄລາ ປນ຺ນຣສ, ຫລິທ຺ທາ ຕາ ຈຕຸທ຺ທສາ’’ຕິ

ປາຬິ. ເອຕ຺ຖ ຉ ປິງ຺ຄລາ ປນ຺ນຣສາຕິ ຉ ຈ ປນ຺ນຣສ ຈາຕິ ເອກວີສຕິ ປິງ຺ຄລາ ຣາຊິໂຍຕິ ອຕ຺ໂຖ ຄເຫຕພ຺ໂພ.

ຕຖາ –

‘‘ປຸຕ຺ຕາປິ ຕສ຺ສ ພຫໂວ, ‘ເອກນາມາ’ຕິ ເມ ສຸຕໍ;

ອສີຕິ ທສ ເອໂກ ຈ, ອິນ຺ທນາມາ ມຫພ຺ພລາ’’ຕິ

ປາຬິ. ເອຕ຺ຖ ປນ ‘‘ເອກນວຸຕີ’’ຕິ ວຕ຺ຕພ຺ເພ ‘‘ອສີຕິ ທສ ເອໂກ ຈາ’’ຕິ ວຸຕ຺ຕໍ. ວິຈິຕ຺ຣສທ຺ທຣຈນຎ຺ຫິ ປາວຈນໍ. ອຍໍ ນໂຍ ອຎ຺ເຎສຸປິ ອີທິເສສຸ ຐາເນສຸ ເນຕພ຺ໂພ.

‘‘ຕິໍສປຸຣິສນາວຸຕ຺ໂຍ, ສພ຺ເພເວເກກນິຈ຺ຈິຕາ;

ເຍສໍ ສມໍ ນ ປສ຺ສາມິ, ເກວລໍ ມຫິ’ມໍ ຈຣ’’ນ຺ຕິ

ປາຬິ. ເອຕ຺ຖ ‘‘ປຸຣິສານໍ ຕິໍສສຫສ຺ສານິ ນວຸຕິ ຈ ສຕານິ ຕິໍສ ນາວຸຕ຺ໂຍ’’ຕິ ວຸຈ຺ຈນ຺ຕິ. ອິມສ຺ມິໍ ປນ ຐາເນ ຕິໍສສທ຺ທໂຕ ສຫສ຺ສສທ຺ທສ຺ສ ນວຸຕິສທ຺ທໂຕ ຈ ສຕສທ຺ທສ຺ສ ໂລປໍ ກຕ຺ວາ ‘‘ຕິໍສ ນາວຸຕ຺ໂຍ’’ຕິ ວຸຕ຺ຕນ຺ຕິ ນ ຄເຫຕພ຺ພໍ. ເອວຎ຺ຫິ ຄຫເຓ ສຕິ ຍຕ຺ຖ ກຕ຺ຖຈິປິ ເອທິສີ ສທ຺ທຣຈນາ ກາຕພ຺ພາ ສິຍາ, ກຕາຍ ຈ ເອທິສາຍ ສທ຺ທຣຈນາຍ ອຕ຺ຖາວຄໂມ ວິນາ ອຸປເທເສນ ສຸຓນ຺ຕານໍ ນ ສິຍາ, ຕສ຺ມາ ເນວໍ ຄເຫຕພ຺ພໍ. ເອວໍ ປນ ຄເຫຕພ຺ພໍ – ‘‘ຕິໍສ ນາວຸຕ຺ໂຍ’’ຕິ ອິທໍ ໂລກສງ຺ເກຕຣູຬ຺ຫໍ ວຈນໍ, ສງ຺ເກຕຣູຬ຺ຫສ຺ສ ປນ ວຈນສ຺ສຕ຺ໂຖ ຍສ຺ມາ ຄຫິຕປຸພ຺ພສງ຺ເກເຕຫິ ສຸຕ຺ວາ ຎາຍເຕ, ນ ອຸປເທສໂຕ, ຕສ຺ມາ ພ຺ຣຫ຺ມທຕ຺ເຕນ ຣຎ຺ຎາ ວຸຕ຺ຕກາເລປິ ສຕ຺ຖາຣາ ຕໍ ກຖໍ ອາຫຣິຕ຺ວາ ວຸຕ຺ຕກາເລປິ ສພ຺ເພ ມນຸສ຺ສາ ວິນາປິ ອຸປເທເສນ ວຈນຕ຺ຖໍ ຊານນ຺ຕີຕິ ຄເຫຕພ຺ພໍ.

ຕິໍສຎ຺ເຈວ ສຫສ຺ສານິ, ນວຸຕິ ຈ ສຕານິ ຕຸ;

ຕິໍສ ນາວຸຕິໂຍ ນາມ, ວຸຕ຺ຕາ ອຸມງ຺ຄຊາຕເກ.

ຍສ຺ມາ ປາວຈເນ ສນ຺ຕິ, ນຍາ ເຈວ ອຈິນ຺ຕິຍາ;

ໂວຫາຣາ ຈ ສຸຄຸຬ຺ຫຕ຺ຖາ, ທຍາປນ຺ເນນ ເທສິຕາ.

ຕສ຺ມາ ສາຏ຺ຐກເຖ ຘີໂຣ, ຄມ຺ຠີເຣ ຊິນຠາສິເຕ;

ອຸປເທສໍ ສທາ ຄຓ຺ເຫ, ຄຣຸໍ ສມ຺ມາ ອຸປຏ຺ຐຫໍ.

ຄຣູປເທສຫີໂນ ຫິ, ອຕ຺ຖສາຣໍ ນ ວິນ຺ທຕິ;

ອຕ຺ຖສາຣວິຫີໂນ ໂສ, ສທ຺ຘມ຺ມາ ປຣິຫາຍຕິ.

ຄຣູປເທສລາຠີ ຈ, ອຕ຺ຖສາຣສມາຍຸໂຕ;

ສທ຺ຘມ຺ມໍ ປຣິປາເລນ຺ໂຕ, ສທ຺ຘມ຺ມສ຺ມາ ນ ຫາຍຕິ.

ສທ຺ຘມ຺ມຕ຺ຖາຍ ເມ ຕສ຺ມາ, ສງ຺ຂ຺ຍາມາລາປິ ຠາສິຕາ;

ສປ຺ປໂຍຄາ ຍຖາໂຍຄໍ, ສເຫວຕ຺ຖວິນິຈ຺ຉຍາ.

ອິຕິ ນວງ຺ເຄ ສາຏ຺ຐກເຖ ປິຏກຕ຺ຕເຍ ພ຺ຍປ຺ປຖຄຕີສຸ ວິຎ຺ຎູນໍ

ໂກສລ຺ລຕ຺ຖາຍ ກເຕ ສທ຺ທນີຕິປ຺ປກຣເຓ

ສວິນິຈ຺ຉໂຍ ສງ຺ຂ຺ຍານາມານໍ ນາມິກປທມາລາວິຠາໂຄ

ນາມ

ເຕຣສໂມ ປຣິຈ຺ເຉໂທ.