໑໖. ຠູວາທິຄຓິກປຣິຈ຺ເຉທ

ອິໂຕ ປຣໍ ອວຄ຺ຄນ຺ຕາ, ມິສ຺ສກາ ເຈວ ຘາຕຸໂຍ;

ວກ຺ຂາມິ ຘາຕຸເຠທາທິ-ກຸສລສ຺ສ ມຕານຸຄາ.

ຍກາຣນ຺ຕຘາຕຸ

ຍາ ຄຕິປາປຸເຓສຸ. ຍາຕິ, ຍນ຺ຕິ. ຍາຕຸ, ຍນ຺ຕຸ. ເຍຍ຺ຍ, ເຍຍ຺ຍຸໍ, ອນຸປຣິເຍຍ຺ຍຸໍ. ຍຖາສມ຺ຠວໍ ປທມາລາ ໂຍເຊຕພ຺ພາ. ຍນ຺ໂຕ ປຸຣິໂສ. ຍນ຺ຕີ ອິຕ຺ຖີ. ຍນ຺ຕໍ ກຸລໍ. ຍານໍ, ອຸປຍານໍ, ອຸຍ຺ຍານໍ ອິຈ຺ຈາທີນິ. ທິວາທິຄຓິກສ຺ສ ປນສ຺ສ ‘‘ຍາຍຕິ, ຍາຍນ຺ຕີ’’ຕິອາທີນິ ຣູປານິ ຠວນ຺ຕິ.

ຕຕ຺ຣ ຍານນ຺ຕິອາທີສຸ ຍນ຺ຕິ ເອເຕນາຕິ ຍານໍ, ຣຖສກຏາທິ. ອຸປຍນ຺ຕິ ເອເຕນ ອິສ຺ສຣສ຺ສ ວາ ປິຍມນາປສ຺ສ ວາ ສນ຺ຕິກໍ ຄຈ຺ຉນ຺ຕີຕິ ອຸປຍານໍ, ປຓ຺ຓາກາຣໍ. ‘‘ອຸປຍານານິ ເມ ທຊ຺ຊຸໍ, ຣາຊປຸຕ຺ຕ ຕຍິ ຄເຕ’’ຕິ ເອຕ຺ຖ ຫິ ປຓ຺ຓາກາຣານິ ‘‘ອຸປຍານານີ’’ຕິ ວຸຈ຺ຈນ຺ຕິ. ສມ຺ປນ຺ນທສ຺ສນີຍປຸປ຺ຜຜລາທິຕາຍ ອຸທ຺ຘໍ ໂອໂລເກນ຺ຕາ ຍນ຺ຕິ ຄຈ຺ຉນ຺ຕິ ເອຕ຺ຖາຕິ ອຸຍ຺ຍານໍ.

ພ຺ຍາ ອຸມ຺ມີສເນ. ພ຺ຍາຕິ, ພ຺ຍນ຺ຕິ. ພ຺ຍາສິ, ພ຺ຍາຖ. ພ຺ຍາມິ, ພ຺ຍາມ. ຍຖາສມ຺ຠວໍ ປທມາລາ ໂຍເຊຕພ຺ພາ. ຕຕ຺ຣ ປນາຍໍ ປາຬິ ‘‘ຍາວ ພ຺ຍາຕິ ນິມ຺ມີສຕິ, ຕຕ຺ຣາປິ ຣສຕິພ຺ພໂຍ’’ຕິ. ຕຕ຺ຖ ຍາວ ພ຺ຍາຕີຕິ ຍາວ ອຸມ຺ມີສຕິ, ປຸຣາຓຠາສາ ເອສາ, ອຍຎ຺ຫິ ຍສ຺ມິໍ ກາເລ ໂພຘິສຕ຺ໂຕ ຈູຬໂພຘິປຣິພ຺ພາຊໂກ ອໂຫສິ, ຕສ຺ມິໍ ກາເລ ມນຸສ຺ສານໍ ໂວຫາໂຣ.

ຍຸ ມິສ຺ສເນ ຄຕິຍຎ຺ຈ. ໂຍຕິ, ຍວຕິ. ອາຍຸ, ໂຍນິ.

ຕຕ຺ຖ ‘‘ອາຍູ’’ຕິ ອາສທ຺ໂທ ອຸປສຄ຺ໂຄ. ອາຍວນ຺ຕິ ມິສ຺ສີຠວນ຺ຕິ ສຕ຺ຕາ ເອເຕນາຕິ ອາຍຸ. ອຖ ວາ ອາຍວນ຺ຕິ ອາຄຈ຺ຉນ຺ຕິ ປວຕ຺ຕນ຺ຕິ ຕສ຺ມິໍ ສຕິ ອຣູປຘມ຺ມາຕິ ອາຍຸ. ຕຖາ ຫິ ອຏ຺ຐສາລິນິຍໍ ວຸຕ຺ຕໍ ‘‘ອາຍວນຏ຺ເຐນ ອາຍຸ. ຕສ຺ມິຎ຺ຫິ ສຕິ ອຣູປຘມ຺ມາ ອາຍວນ຺ຕິ ອາຄຈ຺ຉນ຺ຕິ ປວຕ຺ຕນ຺ຕິ, ຕສ຺ມາ ອາຍູຕິ ວຸຈ຺ຈຕີ’’ຕິ. ‘‘ອາຍຸ, ຊີວິຕໍ, ປາໂຓ’’ ອິຈ຺ເຈເຕ ປຣິຍາຍາ ໂລກໂວຫາຣວເສນ. ອຠິຘມ຺ມວເສນ ປນ ‘‘ຐິຕິ ຍປນາ ຍາປນາ ຊີວິຕິນ຺ທ຺ຣິຍໍ’’ ອິຈ຺ເຈເຕປິ ເຕເຫວ ສທ຺ຘິໍ ປຣິຍາຍາ. ໂຍນີຕິ ອຓ຺ຑຊາທີນໍ ອຓ຺ຑຊາທີຫິ ສທ຺ຘິໍ ຍາຍ ມິສ຺ສີຠາໂວ ໂຫຕິ, ສາ ໂຍນິ. ອິທໍ ປເນຕ຺ຖ ນິພ຺ພຈນໍ ‘‘ຍວນ຺ຕິ ເອຕ຺ຖ ສຕ຺ຕາ ເອກຊາຕິສມນ຺ວເຍນ ອຎ຺ຎມຎ຺ຎໍ ມິສ຺ສກາ ໂຫນ຺ຕີຕິ ໂຍນິ’’ ອິຕິ. ເອຕ຺ຖ ຈ ໂຍນິສທ຺ທສ຺ສ ອຕ຺ຖຸທ຺ຘາໂຣ ນີຍເຕ. ໂຍນີຕິ ຂນ຺ຘໂກຏ຺ຐາສສ຺ສປິ ກາຣຓສ຺ສປິ ປສ຺ສາວມຄ຺ຄສ຺ສປິ ນາມໍ. ‘‘ຈຕສ຺ໂສ ນາຄໂຍນິໂຍ. ຈຕສ຺ໂສ ສຸປຓ຺ຓໂຍນິໂຍ’’ຕິ ເອຕ຺ຖ ຫິ ຂນ຺ຘໂກຏ຺ຐາໂສ ໂຍນິ ນາມ. ‘‘ໂຍນິ ເຫສາ ຠູມິຊ ຜລສ຺ສ ອຘິຄມາຍາ’’ຕິ ເອຕ຺ຖ ກາຣຓໍ. ‘‘ນ ຈາຫໍ ພ຺ຣາຫ຺ມຓໍ ພ຺ຣູມິ, ໂຍນິຊໍ ມຕ຺ຕິສມ຺ຠວ’’ນ຺ຕິ ເອຕ຺ຖ ປສ຺ສາວມຄ຺ໂຄ. ເອຕ຺ເຖຕໍ ວຸຈ຺ຈຕິ –

ຂນ຺ຘານຎ຺ຈາປິ ໂກຏ຺ຐາເສ, ມຸຕ຺ຕມຄ຺ເຄ ຈ ກາຣເຓ;

ອິເມສຸ ຕີສຸ ອຕ຺ເຖສຸ, ໂຍນິສທ຺ໂທ ປວຕ຺ຕຕິ.

ພ຺ເຍ ສໍວຣເຓ. ພ຺ຍາຍຕິ.

ພ຺ເຍ ປວຕ຺ຕິຍໍ. ພ຺ເຍຕິ ສຫພ຺ໂຍ.

ເອຕ຺ຖ ສຫພ຺ໂຍຕິ ສຫ ພ຺ເຍຕິ ສຫ ປວຕ຺ຕຕີຕິ ສຫພ຺ໂຍ, ສຫາໂຍ, ເອກຠວູປໂຄ ວາ. ຕຖາ ຫິ ‘‘ຕາວຕິໍສານໍ ເທວານໍ ສຫພ຺ຍຕໍ ອຸປປນ຺ໂນ’’ຕິອາທີສຸ ເອກຠວູປໂຄ ‘‘ສຫພ຺ໂຍ’’ຕິ ວຸຈ຺ຈຕິ.

ຫຍ ຄຕິຍໍ. ຫຍຕິ. ຫໂຍ. ຫໂຍຕິ ອສ຺ໂສ. ໂສ ຫິ ຫຍຕິ ສີຆໍ ຄຈ຺ຉຕີຕິ ຫໂຍຕິ ວຸຈ຺ຈຕິ. ອິມານິ ປນສ຺ສ ນາມານິ –

ອສ຺ໂສ ຕຸຣງ຺ໂຄ ຕຸຣໂຄ, ວາຊີ ວາໂຫ ຫໂຍປິ ຈ;

ຕພ຺ເຠທາ ສິນ຺ຘໂວ ເຈວ, ໂຄໂຊ ອສ຺ສຕໂຣປິ ຈ.

ກາຣຓາກາຣຓຎ຺ຎູ ຕຸ, ອາຊານີໂຍ ຫຍຸຕ຺ຕໂມ;

ໂຆຏໂກ ຕຸ ຂຬຸງ຺ກສ຺ໂສ, ວຬໂວຕິ ຈ ວຸຈ຺ຈຕິ;

ອສ຺ສໂປໂຕ ກິໂສໂຣຕິ, ຂຬຸງ຺ໂກຕິປິ ວຸຈ຺ຈຕິ;

ຫຣິຍ ຄຕິເຄລຎ຺ເຎສຸ. ຫຣິຍຕິ.

ອຍ ວຍ ປຍ ມຍ ຕຍ ຈຍ ຣຍ ຄຕິຍໍ. ອຍຕິ. ວຍຕິ. ປຍຕິ. ມຍຕິ. ຕຍຕິ. ຈຍຕິ. ຣຍຕິ. ອໂຍ, ສມໂຍ, ວໂຍ, ປໂຍ, ຣໂຍ. ມຍຕຍຈຍຘາຕູນໍ ນາມິກປທານິ ອຸປປຣິກ຺ຂິຕພ຺ພານິ.

ຕຕ຺ຖ ອໂຍຕິ ກາຬໂລຫໍ, ອຍຕິ ນານາກມ຺ມາຣກິຈ຺ເຈສຸ ອຸປໂຍຄໍ ຄຈ຺ຉຕີຕິ ອໂຍ. ວໂຍຕິ ປຐມວຍາທິອາຍຸໂກຏ຺ຐາໂສ, ວຍຕິ ປຣິຫານິໍ ຄຈ຺ຉຕີຕິ ວໂຍ. ປໂຍຕິ ຂີຣສ຺ສປິ ອຸທກສ຺ສປິ ນາມໍ, ປຍຕິ ຊເນນ ປາຕພ຺ພຠາວໍ ຄຈ຺ຉຕີຕິ ປໂຍ. ຣໂຍຕິ ເວໂຄ, ໂຍ ‘‘ຊໂວ’’ຕິປິ ວຸຈ຺ຈຕິ, ຕສ຺ມາ ຣຍນໍ ຊວນໍ ຣໂຍ. ເອຕ຺ຖ ສມຍສທ຺ທສ຺ສ ອຕ຺ຖຸທ຺ຘາໂຣ ວຸຈ຺ຈເຕ ອຫ ນິພ຺ພຈເນນ. ສມຍສທ຺ໂທ –

ສມວາເຍ ຂເຓ ກາເລ, ສມເຍ ເຫຕຸທິຏ຺ຐິສຸ;

ປຏິລາເຠ ປຫາເນ ຈ, ປຏິເວເຘ ຈ ທິສ຺ສຕິ.

ຕຖາ ຫິ ‘‘ອປ຺ເປວ ນາມ ສ຺ເວປິ ອຸປສງ຺ກເມຍ຺ຍາມ ກາລຎ຺ຈ ສມຍຎ຺ຈ ອຸປາທາຍາ’’ຕິ ເອວມາທີສຸ ສມວາໂຍ ອຕ຺ໂຖ. ‘‘ເອໂກວ ໂຂ ຠິກ຺ຂເວ ຂໂຓ ຈ ສມໂຍ ຈ ພ຺ຣຫ຺ມຈຣິຍວາສາຍາ’’ຕິອາທີສຸ ຂໂຓ. ‘‘ອຸຓ຺ຫສມໂຍ ປຣິຬາຫສມໂຍ’’ຕິອາທີສຸ ກາໂລ. ‘‘ມຫາສມໂຍ ປວນສ຺ມິ’’ນ຺ຕິອາທີສຸ ສມູໂຫ. ‘‘ສມໂຍປິ ໂຂ ເຕ ຠທ຺ທາລິ ອປ຺ປຏິວິທ຺ໂຘ ອໂຫສີ’’ຕິອາທີສຸ ເຫຕຸ. ‘‘ເຕນ ສມເຍນ ອຸຄ຺ຄາຫມາໂນ ປຣິພ຺ພາຊໂກ ສມຓມຸຓ຺ຑິກາປຸຕ຺ໂຕ ສມຍປ຺ປວາທເກ ຕິນ຺ທຸກາຈີເຣ ເອກສາລເກ ມລ຺ລິກາຍ ອາຣາເມ ປຏິວສຕີ’’ຕິອາທີສຸ ທິຏ຺ຐິ.

‘‘ທິຏ຺ເຐ ຘມ຺ເມ ຈ ໂຍ ອຕ຺ໂຖ, ໂຍ ຈຕ຺ໂຖ ສມ຺ປຣາຍິໂກ;

ອຕ຺ຖາຠິສມຍາ ຘີໂຣ, ປຓ຺ຑິໂຕຕິ ປວຸຈ຺ຈຕີ’’ຕິ

ອາທີສຸ ປຏິລາໂຠ. ‘‘ສມ຺ມາ ມານາຠິສມຍາ ອນ຺ຕມກາສິ ທຸກ຺ຂສ຺ສາ’’ຕິອາທີສຸ ປຫານໍ. ‘‘ທຸກ຺ຂສ຺ສ ປີຬນຏ຺ໂຐ ສງ຺ຂຕຏ຺ໂຐ ສນ຺ຕາປຏ຺ໂຐ ອຠິສມຍຏ຺ໂຐ’’ຕິອາທີສຸ ປຏິເວໂຘ. ເອຕ຺ຖ ຈ ອຸປສຄ຺ຄານໍ ໂຊຕກມຕ຺ຕຕ຺ຕາ ຕສ຺ສ ຕສ຺ສ ອຕ຺ຖສ຺ສ ວາຈໂກ ສມຍສທ຺ໂທ ເອວາຕິ ສມຍສທ຺ທສ຺ສ ອຕ຺ຖຸທ຺ຘາເຣປິ ສອຸປສຄ຺ໂຄ ອຠິສມຍສທ຺ໂທ ວຸຕ຺ໂຕ.

ຕຕ຺ຖ ສຫກາຣີກາຣຓຕາຍ ສນ຺ນິຊ຺ຌໍ ສເມຕິ ສມເວຕີຕິ ສມໂຍ, ສມວາໂຍ. ສເມຕິ ສມາຄຈ຺ຉຕິ ມຄ຺ຄພ຺ຣຫ຺ມຈຣິຍໍ ເອຕ຺ຖ ຕທາຘາຣປຸຄ຺ຄໂລຕິ ສມໂຍ, ຂໂຓ. ສເມນ຺ຕິ ເອຕ຺ຖ, ເອເຕນ ວາ ສງ຺ຄຈ຺ຉນ຺ຕິ ຘມ຺ມາ ສຫຊາຕຘມ຺ເມຫິ ອຸປ຺ປາທາທີຫິ ວາຕິ ສມໂຍ, ກາໂລ. ຘມ຺ມປ຺ປວຕ຺ຕິມຕ຺ຕຕາຍ ອຕ຺ຖໂຕ ອຠູໂຕປິ ຫິ ກາໂລ ຘມ຺ມປ຺ປວຕ຺ຕິຍາ ອຘິກຣຓໍ ກຣຓໍ ວິຍ ຈ ປຣິກປ຺ປນາມຕ຺ຕສິທ຺ເຘນ ຣູເປນ ໂວຫຣິຍຕີຕິ. ສມໍ, ສຫ ວາ ອວຍວານໍ ອຍນໍ ປວຕ຺ຕິ ອວຏ຺ຐານນ຺ຕິ ສມໂຍ, ສມູໂຫ, ຍຖາ ‘‘ສມຸທາໂຍ’’ຕິ. ອວຍວສຫາວຏ຺ຐານເມວ ຫິ ສມູໂຫ. ປຈ຺ຈຍນ຺ຕຣສມາຄເມ ເອຕິ ຜລໍ ເອຕສ຺ມາ ອຸປ຺ປຊ຺ຊຕິ ປວຕ຺ຕຕິ ຈາຕິ ສມໂຍ, ເຫຕຸ, ຍຖາ ‘‘ສມຸທໂຍ’’ຕິ. ສເມຕິ ສໍໂຍຊນຠາວໂຕ ສມ຺ພນ຺ຘາ ເອຕິ ອຕ຺ຕໂນ ວິສເຍ ປວຕ຺ຕຕິ, ທຬ຺ຫຄ຺ຄຫຓຠາວໂຕ ວາ ສໍຍຸຕ຺ຕາ ອຍນ຺ຕິ ປວຕ຺ຕນ຺ຕິ ສຕ຺ຕາ ຍຖາຠິນິເວສໍ ເອເຕນາຕິ ສມໂຍ, ທິຏ຺ຐິ. ທິຏ຺ຐິສໍໂຍຊເນນ ຫິ ສຕ຺ຕາ ອຕິວິຍ ພຊ຺ຌນ຺ຕິ. ສມິຕິ ສງ຺ຄຕິ ສໂມຘານນ຺ຕິ ສມໂຍ, ປຏິລາໂຠ. ສມສ຺ສ ນິໂຣຘສ຺ສ ຍານໍ, ສມ຺ມາ ວາ ຍານໍ ອປຄໂມ ອປ຺ປວຕ຺ຕີຕິ ສມໂຍ, ປຫານໍ. ຎາເຓນ ອຠິມຸຂໍ ສມ຺ມາ ເອຕພ຺ໂພ ອຘິຄນ຺ຕພ຺ໂພຕິ ສມໂຍ, ຘມ຺ມານໍ ອວິປຣີໂຕ ສຠາໂວ, ອຠິມຸຂຠາເວນ ສມ຺ມາ ເອຕິ ຄຈ຺ຉຕິ ພຸຊ຺ຌຕີຕິ ສມໂຍ. ຍຖາຠູຕສຠາວາວໂພໂຘ. ເອວໍ ຕສ຺ມິໍ ຕສ຺ມິໍ ອຕ຺ເຖ ສມຍສທ຺ທສ຺ສ ປວຕ຺ຕິ ເວທິຕພ຺ພາ.

ນນຸ ຈ ອຕ຺ຖມຕ຺ຕໍ ປຕິ ສທ຺ທາ ອຠິນິວິສນ຺ຕີຕິ ນ ເອເກນ ສທ຺ເທນ ອເນເກ ອຕ຺ຖາ ອຠິຘີຍນ຺ຕີຕິ? ສຈ຺ຈເມຕໍ ສທ຺ທວິເສເສ ອເປກ຺ຂິເຕ. ສທ຺ທວິເສເສ ຫິ ອເປກ຺ຂມາເນ ເອເກນ ສທ຺ເທນ ອເນກຕ຺ຖາຠິຘານໍ ນ ສມ຺ຠວຕິ. ນ ຫິ ໂຍ ກາລຕ຺ໂຖ ສມຍສທ຺ໂທ, ໂສເຍວ ສມູຫາທິອຕ຺ຖໍ ວທຕິ. ເອຕ຺ຖ ປນ ເຕສໍ ເຕສໍ ອຕ຺ຖານໍ ສມຍ ສທ຺ທວຈນີຍຕາ ສາມຎ຺ຎມຸປາທາຍ ອເນກຕ຺ຖຕາ ສມຍສທ຺ທສ຺ສ ວຸຕ຺ຕາ. ເອວໍ ສພ຺ພຕ຺ຖ ອຕ຺ຖຸທ຺ຘາເຣ ອຘິປ຺ປາໂຍ ເວທິຕພ຺ໂພ.

ອິໂຕ ຍາໂຕ ອຍໂຕ ຈ, ນິປ຺ຜຕ຺ຕິໍ ສມຸທີຣເຍ;

ວິຎ຺ຎູ ສມຍສທ຺ທສ຺ສ, ສມວາຍາທິວາຈິໂນ.

ອິໂຕ ຍາໂຕ ອຍໂຕ ຈ, ສມານຕ຺ເຖຫິ ຘາຕຸຫິ;

ເອວໍ ສມານຣູປານິ, ຠວນ຺ຕີຕິ ຈ ອີຣເຍ.

ນຍ ຣກ຺ຂເຓ ຈ. ຈກາໂຣ ຄຕິເປກ຺ຂໂກ. ນຍຕິ. ນໂຍ. ນໂຍຕິ ນຍນໍ ຄມນນ຺ຕິ ນໂຍ, ປາຬິຄຕິ. ນຍນ຺ຕິ ວາ ຣກ຺ຂນ຺ຕິ ອຕ຺ຖໍ ເອເຕນາຕິ ນໂຍ, ຕຖຕ຺ຕນຍາທິ.

ທຍ ທານຄຕິຫິໍສາທານຣກ຺ຂາສຸ. ທຍຕິ. ທຍາ.

ທຍາຕິ ເມຕ຺ຕາປິ ວຸຈ຺ຈຕິ ກຣຸຓາປິ. ‘‘ທຍາປນ຺ໂນ’’ຕິ ເອຕ຺ຖ ຫິ ເມຕ຺ຕາ ‘‘ທຍາ’’ຕິ, ເມຕ຺ຕຈິຕ຺ຕຕໍ ອາປນ຺ໂນຕິ ຫິ ອຕ຺ໂຖ. ‘‘ອທຍາປນ຺ໂນ’’ຕິ ເອຕ຺ຖ ປນ ກຣຸຓາ ‘‘ທຍາ’’ຕິ ວຸຈ຺ຈຕິ. ນິກ຺ກຣຸຓຕໍ ອາປນ຺ໂນຕິ ຫິ ອຕ຺ໂຖ. ເອວໍ ທຍາສທ຺ທສ຺ສ ເມຕ຺ຕາກຣຸຓາສຸ ປວຕ຺ຕິ ເວທິຕພ຺ພາ. ຕຖາ ຫິ ອຠິຘມ຺ມຏີກາຍໍ ວຸຕ຺ຕໍ ‘‘ທຍາສທ຺ໂທ ຍຕ຺ຖ ຍຕ຺ຖ ປວຕ຺ຕຕິ, ຕຕ຺ຖ ຕຕ຺ຖ ອຘິປ຺ປາຍວເສນ ໂຍເຊຕພ຺ໂພ. ທຍາສທ຺ໂທ ຫິ ອນຸຣກ຺ຂຓຕ຺ຖໍ ອນ຺ໂຕນີຕໍ ກຕ຺ວາ ປວຕ຺ຕມາໂນ ເມຕ຺ຕາຍ ຈ ກຣຸຓາຍ ຈ ປວຕ຺ຕຕີ’’ຕິ.

ວຈນຕ຺ໂຖ ປເນຕ຺ຖ ເອວໍ ເວທິຕພ຺ໂພ – ທຍຕິ ທທາຕິ ສຕ຺ຕານໍ ອຠຍໍ ເອຕາຍາຕິ ທຍາ. ທຍຕິ ຄຈ຺ຉຕິ ວິຠາຄໍ ອກຕ຺ວາ ປາປກລ຺ຍາຓຊເນສຸ ສມໍ ວຕ຺ຕຕິ, ສີເຕນ ສມໍ ຜຣນ຺ຕໍ ຣໂຊມລຎ຺ຈ ປວາເຫນ຺ຕໍ ອຸທກມິວາຕິປິ ທຍາ, ເມຕ຺ຕາ. ທຍຕິ ວາ ຫິໍສຕິ ກາຣຸຓິກໍ ຍາວ ຍຖາຘິປ຺ເປຕໍ ປຣສ຺ສ ຫິຕນິປ຺ຜຕ຺ຕິໍ ນ ປາປຸຓາຕິ, ຕາວາຕິ ທຍາ. ທຍຕິ ອນຸຄ຺ຄຓ຺ຫາຕິ ປາປຊນມ຺ປິ ສຊ຺ຊໂນ ເອຕາຍາຕິປິ ທຍາ. ທຍຕິ ອຕ຺ຕໂນ ສຸຂມ຺ປິ ປຫາຍ ເຂທໍ ຄຓ຺ຫາຕິ ສຊ຺ຊໂນ ເອຕາຍາຕິ ທຍາ. ທຍນ຺ຕິ ຄຓ຺ຫນ຺ຕິ ເອຕາຍ ມຫາໂພຘິສຕ຺ຕາ ພຸທ຺ຘຠາວາຍ ອຠິນີຫາຣກຣຓກາເລ ຫຕ຺ຖຄຕມ຺ປິ ອຣຫຕ຺ຕຜລໍ ຉຑ຺ເຑຕ຺ວາ ສໍສາຣສາຄຣໂຕ ສຕ຺ເຕ ສມຸທ຺ຘຣິຕຸກາມາ ອນສ຺ສາສກຣໍ ອຕິຠຍານກໍ ມຫນ຺ຕໍ ສໍສາຣທຸກ຺ຂໍ, ປຈ຺ຉິມຠເວ ຈ ສຫ ອມຕຘາຕຸປຏິລາເຠນ ອເນກຄຸຓສມລງ຺ກຕໍ ສພ຺ພຎ຺ຎຸຕຎ຺ຎາຓຎ຺ຈາຕິປິ ທຍາ, ກຣຸຓາ. ກຣຸຓາມູລກາ ຫິ ສພ຺ເພ ພຸທ຺ຘຄຸຓາ.

ອປໂຣ ນໂຍ – ທຍນ຺ຕິ ອນຸຣກ຺ຂນ຺ຕິ ສຕ຺ເຕ ເອຕາຍ, ສຍໍ ວາ ອນຸທຍຕິ, ອນຸທຍມຕ຺ຕເມວ ວາ ເອຕນ຺ຕິ ທຍາ, ເມຕ຺ຕາ ເຈວ ກຣຸຓາ ຈ. ກິຎ຺ຈິ ປໂຍຄເມຕ຺ຖ ກຖຍາມ ‘‘ເສຍ຺ຍຖາປິ ຄຫປຕິ ຄິຊ຺ໂຌ ວາ ກງ຺ໂກ ວາ ກຸລໂລ ວາ ມໍສເປສິໍ ອາທາຍ ທເຍຍ຺ຍ. ປຸຕ຺ເຕສຸ ມທ຺ທີ ທເຍສິ, ສສ຺ສຸຍາ ສສຸຣມ຺ຫິ ຈ. ທຍິຕພ຺ໂພ ຣເຖສຠ’’. ຕຕ຺ຖ ທເຍຍ຺ຍາຕິ ອຸປ຺ປຕິຕ຺ວາ ຄຈ຺ເຉຍ຺ຍ, ຄຕ຺ຍຕ຺ຖວເສເນຕໍ ທຏ຺ຐພ຺ພໍ. ທເຍສີຕິ ເມຕ຺ຕຈິຕ຺ຕໍ ກເຣຍ຺ຍາສິ. ທຍິຕພ຺ໂພຕິ ປິຍາຍິຕພ຺ໂພ. ອຸຠຍມ຺ເປຕໍ ວິວຣຓໍ ຣກ຺ຂຓຕ຺ຖໍ ອນ຺ໂຕຄຘໍ ກຕ຺ວາ ອຘິປ຺ປາຍຕ຺ຖວເສນ ກຕນ຺ຕິ ເວທິຕພ຺ພໍ.

ອູຍີ ຕນ຺ຕສນ຺ຕາເນ. ອູຍຕິ. ອູໂຕ, ອູຕວາ.

ປູຍີ ວິສຣເຓ ທຸຄ຺ຄນ຺ເຘ ຈ. ປູຍຕິ. ປູໂຕ, ປູຕວາ. ປູຕິມຈ຺ຉໍ ກຸສຄ຺ເຄນ, ໂຍ ນໂຣ ອຸປນຍ຺ຫຕິ.

ກນຸຍີ ສທ຺ເທ. ກນຸຍຕິ. ກນຸໂຕ, ກນຸຕວາ.

ຂມາຍ ວິຘູນເນ. ຂມາຍຕິ. ຂມາໂຕ, ຂມາຕວາ.

ຜາຍິ ປາຍິ ວຸທ຺ຘິຍໍ. ຜາຍຕິ. ຜີໂຕ, ຜຕວາ.

ຕຕ຺ຖ ຕຕວນ຺ຕຸປຈ຺ຈຍາ, ຍກາຣໂລໂປ, ຘາຕ຺ວນ຺ຕສ຺ສ ສຣສ຺ສ ອິກາຣາເທໂສ ຈ ທຏ຺ຐພ຺ໂພ. ເອສ ນໂຍ ‘‘ປູໂຕ ປູຕວາ’’ຕິອາທີສຸປິ ຍຖາສມ຺ຠວໍ ທຏ຺ຐພ຺ໂພ. ປາຍຕິ. ປາໂຍ. ອປາໂຍ. ເອຕ຺ຖ ຈ ນຕ຺ຖິ ປາໂຍ ວຸທ຺ຘິ ເອຕ຺ຖາຕິ ອປາໂຍ. ອຖ ວາ ປນ ອຍໂຕ ສຸຂໂຕ ອເປໂຕຕິ ອປາໂຍຕິປິ ນິພ຺ພຈນີຍໍ. ອປາໂຍຕິ ຈ ນິຣໂຍ ຕິຣຈ຺ຉານໂຍນິ ເປຕ຺ຕິວິສໂຍ ອສຸຣກາໂຍຕິ ຈຕ຺ຕາໂຣ ອປາຍາ.

ຕາຍຸ ສນ຺ຕານປາລເນສຸ. ຕາຍຕິ. ຕາຍນໍ. ທິວາທິຄເຓ ປນ ຕາ ປາລເນຕິ ຘາຕຸໍ ປສ຺ສຖ, ຕສ຺ສ ‘‘ຕາຍຕິ ຕາຓ’’ນ຺ຕິ ຣູປານິ. ອຸຠເຍສໍ ກ຺ຣິຍາປທໍ ສມໍ. ອກາຣຍກາຣປຈ຺ຈຍມຕ຺ເຕເນວ ນານຕ຺ຕໍ, ນາມິກປທານິ ປນ ວິສທິສານິ ‘‘ຕາຍນໍ, ຕາຓ’’ນ຺ຕິ.

ຈາຍຸ ປູຊານິສາມເນສຸ. ປູຊາ ປູຊນາ. ນິສາມນໍ ໂອໂລກນໍ ສວນຎ຺ຈ ວຸຈ຺ຈຕິ. ‘‘ອິງ຺ຆ ມທ຺ທິ ນິສາເມຫິ. ນິສາມຍຖ ສາຘໂວ’’ຕິ ຈ ອາທີສຸ ຫິ ໂອໂລກນສວນານິ ນິສາມນສທ຺ເທນ ວຸຕ຺ຕານິ. ອປິຈ ຎາເຓນ ອຸປປຣິກ຺ຂຓມ຺ປິ ນິສາມນເມວາຕິ ຄເຫຕພ຺ພໍ. ຈາຍຕິ, ອປຈາຍຕິ. ອນຄາເຣ ປພ຺ພຊິເຕ, ອປເຈ ພ຺ຣຫ຺ມຈາຣິເຍ. ເຍ ວຸທ຺ຘມປຈາຍນ຺ຕິ. ອປຈິຕິໍ ທສ຺ເສຕິ. ນິຈ຺ຈໍ ວຸທ຺ຘາປຈາຍິໂນ.

ຍກາຣນ຺ຕຘາຕຸຣູປານິ.

ຣກາຣນ຺ຕຘາຕຸ

ຣາ ອາທາເນ. ຣາຕິ.

ຣິ ສນ຺ຕາເນ. ເຣຕິ. ເຣຓຸ. ເຣຓູຕິ ຣໂຊ.

ຣຸ ຄຕິຍໍ ໂຣສເນ ຈ. ຣວຕິ, ວິຣວຕິ.

ຣຸ ສທ຺ເທ. ໂຣຕິ, ຣວຕິ. ຣໂວ, ອຸປຣໂວ. ຣຸຕມນຸຎ຺ຎໍ ຣຸຈິຍາ ຈ ປິຏ຺ຐິ. ຣຸຕນ຺ຕິ ຣວນໍ ຣຸຕໍ, ສທ຺ໂທ.

ເຣ ສທ຺ເທ. ຣາຍຕິ. ຣາ. ຣຕ຺ຕິ. ເອຕ຺ຖ ຈ ຣາຕິ ສທ຺ໂທ. ຣຕ຺ຕີຕິ ນິສາສງ຺ຂາໂຕ ສຕ຺ຕານໍ ສທ຺ທສ຺ສ ວູປສມກາໂລ. ຣາ ຕິຍ຺ຍຕິ ອຸຈ຺ຉິຊ຺ຊຕິ ເອຕ຺ຖາຕິ ຣຕ຺ຕິ.

ພ຺ຣູ ວິຍຕ຺ຕິຍໍ ວາຈາຍໍ. ອປິ ຫນ຺ຕ຺ວາ ຫໂຕ ພ຺ຣູຕິ.

ພ຺ຣວີຕິ, ພ຺ຣຸນ຺ຕິ. ພ຺ຣູສິ, ພ຺ຣູຖ. ພ຺ຣູມິ, ພ຺ຣູມ. ພ຺ຣູເຕ, ພ຺ຣຸວນ຺ເຕ. ພ຺ຣູເສ, ພ຺ຣຸວ຺ເຫ. ພ຺ຣຸເວ, ພ຺ຣຸມ຺ເຫ.

ພ຺ຣູຕຸ, ພ຺ຣຸວິຕຸ, ພ຺ຣຸວນ຺ຕຸ. ພ຺ຣູຫິ, ພ຺ຣູຖ. ພ຺ຣູມິ, ພ຺ຣູມ. ພ຺ຣູຕໍ, ພ຺ຣຸວນ຺ຕໍ.

ເອຕ຺ຖ ຈ ອມ຺ພຏ຺ຐສຸຕ຺ເຕ ‘‘ປຸນ ຠວໍ ໂຄຕໂມ ພ຺ຣຸວິຕູ’’ຕິ ປາຬິທສ຺ສນໂຕ ‘‘ພ຺ຣຸວິຕູ’’ຕິ ວຸຕ຺ຕໍ. ເອວໍ ສພ຺ພຕ຺ຖາປິ ອຸປປຣິກ຺ຂິຕ຺ວາ ນໂຍ ຄເຫຕພ຺ໂພ.

ພ຺ຣຸເວຍ຺ຍ, ພ຺ຣຸເວ, ພ຺ຣຸເວຍ຺ຍຸໍ. ພ຺ຣຸເວຍ຺ຍາສິ, ພ຺ຣຸເວຍ຺ຍາຖ. ພ຺ຣຸເວຍ຺ຍາມິ, ພ຺ຣຸເວຍ຺ຍາມ. ພ຺ຣຸເວຖ, ພ຺ຣຸເວຣໍ. ພ຺ຣຸເວໂຖ, ພ຺ຣຸເວຍ຺ຍາວ຺ໂຫ. ພ຺ຣຸເວຍ຺ຍໍ. ພ຺ຣຸເວຍ຺ຍາມ຺ເຫ.

ປພ຺ຣູຕິ. ອນຸພ຺ຣູຕິ. ປພ຺ຣູຕຸ, ອນຸພ຺ຣູຕຸ. ປພ຺ຣຸເວຍ຺ຍ, ອນຸພ຺ຣຸເວຍ຺ຍ. ເອວໍ ສພ຺ພຕ຺ຖ ປອນຸອຸປສຄ຺ເຄຫິປິ ຍຖາສມ຺ຠວໍ ປທມາລາ ໂຍເຊຕພ຺ພາ.

ອາຫ, ອາຫຸ. ພ຺ຣເວ, ພ຺ຣວິຕ຺ຖ, ພ຺ຣວິເຣ. ພ຺ຣວິຕ຺ໂຖ, ພ຺ຣວິວ຺ໂຫ. ພ຺ຣວິໍ, ພ຺ຣວິມ຺ເຫ. ປໂຣກ຺ຂາວເສນ ວຸຕ຺ຕານິ.

ອພ຺ຣວາ, ອພ຺ຣວູ. ອພ຺ຣໂວ, ອພ຺ຣວຕ຺ຖ. ອພ຺ຣວໍ, ອພ຺ຣວມ຺ຫາ. ອພ຺ຣວຕ຺ຖ, ອພ຺ຣວຕ຺ຖຸໍ. ອພ຺ຣວເສ, ອພ຺ຣວ຺ຫໍ. ອພ຺ຣວິໍ, ອພ຺ຣວິມ຺ຫເສ. ຫິຍ຺ຍຕ຺ຕນີວເສນ ວຸຕ຺ຕານິ.

ອພ຺ຣວິ, ອພ຺ຣວຸໍ. ອພ຺ຣໂວ, ອພ຺ຣວິຕ຺ຖ. ອພ຺ຣວິໍ, ອພ຺ຣວິມ຺ຫາ. ອພ຺ຣວາ, ອພ຺ຣວູ. ອພ຺ຣວເສ, ອພ຺ຣວິວ຺ຫໍ. ອພ຺ຣວໍ, ອພ຺ຣວິມ຺ເຫ. ອຊ຺ຊຕນີວເສນ ວຸຕ຺ຕານິ.

ພ຺ຣຸວິສ຺ສຕິ, ພ຺ຣຸວິສ຺ສນ຺ຕິ. ອພ຺ຣວິສ຺ສາ, ອພ຺ຣວິສ຺ສໍສຸ. ເສສໍ ສພ຺ພໍ ເນຕພ຺ພໍ. ກມ຺ມປທໍ ອປ຺ປສິທ຺ຘໍ. ສເຈ ປນ ສິຍາ, ‘‘ພ຺ຣູຍຕີ’’ຕິ ສິຍາ ‘‘ລຸຍຕິ, ລູຍຕີ’’ຕິ ປທານິ ວິຍ.

ຊີຣ ພ຺ຣູຫເນ. ພ຺ຣູຫນໍ ວຑ຺ຒນໍ. ຊີຣຕິ. ຊີຣໍ. ຊີຣມາໂນ. ຊີຣຓໍ. ອປ຺ປສ຺ສຸຕາຍໍ ປຸຣິໂສ, ພລິພທ຺ໂທວ ຊີຣຕິ.

ປູຣ ປູຣເຓ. ປູຣຕິ. ປູຣໂຕວ ມໂຫທຘິ. ສພ຺ເພ ປູເຣນ຺ຕຸ ສງ຺ກປ຺ປາ. ປູຣິຕຸໍ, ປູຣິຕ຺ວາ, ປູຣໍ, ປູຣິຕໍ. ປຸຓ຺ຓໍ, ປຣິປຸຓ຺ຓໍ. ສມ຺ປຸຓ຺ຓໍ, ປູຣຓໍ. ປູຣໂຓ ກສ຺ສໂປ. ກາຣິເຕ ‘‘ປາຣມິໂຍ ປູເຣຕິ, ປູຣຍຕິ, ປູຣາເປຕິ, ປູຣາປຍຕິ. ປູເຣຕ຺ວາ, ປູຣຍິຕ຺ວາ, ປູຣາເປຕ຺ວາ, ປູຣາປຍິຕ຺ວາ, ປຣິປູເຣຕ຺ວາ’’ ອິຈ຺ຈາທີນິ ຠວນ຺ຕິ.

ໂຆຣ ຄຕິປຏິຆາເຕ. ຄຕິປຏິຆາຕໍ ຄຕິປຏິຫນນໍ. ໂຆຣຕິ.

ໂຘຣ ຄຕິຈາຕຸຣິເຍ. ຄຕິຈາຕຸຣິຍໍ ຄຕິເຉກຠາໂວ. ໂຘເຣຕິ.

ສຣ ຄຕິຍໍ. ສຣຕິ, ວິສຣຕິ, ອຸສ຺ສຣຕິ. ອຸສ຺ສາຣຓາ. ສໂຣ. ສໍສາໂຣ ອິຈ຺ຈາທີນິ. ຕຕ຺ຖ ສໂຣຕິ ຣຫໂທ. ສໍສາໂຣຕິ ວຏ຺ຏໍ, ໂຍ ‘‘ຠໂວ’’ຕິປິ ວຸຈ຺ຈຕິ.

ຈຣ ຈຣເຓ. ຈຣຕິ, ວິຈຣຕິ, ອນຸຈຣຕິ, ສຎ຺ຈຣຕິ.

ຈຣ ຄຕິຠກ຺ຂເນສຸ. ຈຣຕິ, ວິຈຣຕິ, ອນຸຈຣຕິ, ສຎ຺ຈຣຕິ, ປຏິຈຣຕິ. ຈຣິຍາ. ຈຣິຕາ. ຈາໂຣ. ວິຈາໂຣ. ອນຸວິຈາໂຣ. ອຸປວິຈາໂຣ. ຈຣຓໍ. ຈາຣໂກ. ໂອຈຣໂກ. ພ຺ຣຫ຺ມຈຣິຍໍ ອິຈ຺ຈາທີນິ.

ຕຕ຺ຖ ຈຣຕີຕິ ຄຈ຺ຉຕິ, ຠກ຺ຂຕິ ວາ. ຕຖາ ຫິ ຈຣນ຺ຕິ ປທສ຺ສ ຄຈ຺ຉນ຺ໂຕ ຂາທນ຺ໂຕ ຈາຕິ ອຕ຺ຖໍ ວທນ຺ຕິ ຄຣູ. ປຏິຈຣຕີຕິ ປຏິຈ຺ຉາເທຕິ. ຈາຣໂກຕິ ຕໍປເວສິຕານໍ ສຕ຺ຕານໍ ສຸຂໍ ຈຣຕິ ຠກ຺ຂຕີຕິ ຈາຣໂກ, ໂຣໂຘ. ໂອຈຣໂກຕິ ອໂຘຈາຣີ. ພ຺ຣຫ຺ມຈຣິຍນ຺ຕິ ທານມ຺ປິ ເວຍ຺ຍາວຈ຺ຈມ຺ປິ ສິກ຺ຂາປທມ຺ປິ ພ຺ຣຫ຺ມວິຫາໂຣປິ ຘມ຺ມເທສນາປິ ເມຖຸນວິຣຕິປິ ສທາຣສນ຺ໂຕໂສປິ ອຸໂປສໂຖປິ ອຣິຍມຄ຺ໂຄປິ ສກລໍ ສາສນມ຺ປິ ອຊ຺ຌາສໂຍປິ ວຸຈ຺ຈຕິ.

ກິນ຺ເຕ ວຕໍ ກິໍ ປນ ພ຺ຣຫ຺ມຈຣິຍໍ,

ກິສ຺ສ ສຸຈິຓ຺ຓສ຺ສ ອຍໍ ວິປາໂກ;

ອິທ຺ຘິຊຸຕິພລວີຣິຍູປປຕ຺ຕິ,

ອິທຎ຺ຈ ເຕ ນາຄ ມຫາວິມານໍ.

ອຫຎ຺ຈ ຠຣິຍາ ຈ ມນຸສ຺ສໂລເກ,

ສທ຺ຘາ ອຸໂຠ ທານປຕີ ອຫຸມ຺ຫາ;

ໂອປານຠູຕໍ ເມ ຆຣໍ ຕທາສິ,

ສນ຺ຕປ຺ປິຕາ ສມຓພ຺ຣາຫ຺ມຓາ ຈ.

ຕໍ ເມ ວຕໍ ຕໍ ປນ ພ຺ຣຫ຺ມຈຣິຍໍ,

ຕສ຺ສ ສຸຈິຓ຺ຓສ຺ສ ອຍໍ ວິປາໂກ;

ອິທ຺ຘິຊຸຕິພລວີຣິຍູປປຕ຺ຕິ,

ອິທຎ຺ຈ ເມ ຘີຣ ມຫາວິມານ’’ນ຺ຕິ

ອິມສ຺ມິຎ຺ຫິ ປຸຓ຺ຓກຊາຕເກ ທານໍ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ຕໍ.

‘‘ເກນ ປາຓິ ກາມທໂທ, ເກນ ປາຓິ ມຘຸສ຺ສໂວ;

ເກນ ເຕ ພ຺ຣຫ຺ມຈຣິເຍນ, ປຸຎ຺ຎໍ ປາຓິມ຺ຫິ ອິຊ຺ຌຕິ.

ເຕນ ປາຓິ ກາມທໂທ, ເຕນ ປາຓິ ມຘຸສ຺ສໂວ;

ເຕນ ເມ ພ຺ຣຫ຺ມຈຣິເຍນ, ປຸຎ຺ຎໍ ປາຓິມ຺ຫິ ອິຊ຺ຌຕີ’’ຕິ

ອິມສ຺ມິໍ ອງ຺ກຸຣເປຕວຕ຺ຖຸມ຺ຫິ ເວຍ຺ຍາວຈ຺ຈໍ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ຕໍ. ‘‘ອິທໍ ໂຂ ຕໍ ຠິກ຺ຂເວ ຕິຕ຺ຕິຣິຍໍ ນາມ ພ຺ຣຫ຺ມຈຣິຍໍ ອໂຫສີ’’ຕິ ອິມສ຺ມິໍ ຕິຕ຺ຕິຣຊາຕເກ ສິກ຺ຂາປທໍ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ຕໍ. ‘‘ຕໍ ໂຂ ປນ ປຎ຺ຈສິຂ ພ຺ຣຫ຺ມຈຣິຍໍ ເນວ ນິພ຺ພິທາຍ ນ ວິຣາຄາຍ…ເປ… ຍາວເທວ ພ຺ຣຫ຺ມໂລກູປປຕ຺ຕິຍາ’’ຕິ ອິມສ຺ມິໍ ມຫາໂຄວິນ຺ທສຸຕ຺ເຕ ພ຺ຣຫ຺ມວິຫາຣາ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ຕາ. ‘‘ເອກສ຺ມິໍ ພ຺ຣຫ຺ມຈຣິຍສ຺ມິໍ, ສຫສ຺ສໍ ມຈ຺ຈຸຫາຍິໂນ’’ຕິ ເອຕ຺ຖ ຘມ຺ມເທສນາ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ຕາ. ‘‘ປເຣ ອພ຺ຣຫ຺ມຈາຣີ ຠວິສ຺ສນ຺ຕິ, ມຍເມຕ຺ຖ ພ຺ຣຫ຺ມຈາຣິໂນ ຠວິສ຺ສາມາ’’ຕິ ສລ຺ເລຂສຸຕ຺ເຕ ເມຖຸນວິຣຕິ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ຕາ.

ມຍຎ຺ຈ ຠຣິຍາ ນາຕິກ຺ກມາມ,

ອມ຺ເຫ ຈ ຠຣິຍາ ນາຕິກ຺ກມນ຺ຕິ;

ອຎ຺ຎຕ຺ຣ ຕາຫ ພ຺ຣຫ຺ມຈຣິຍໍ ຈຣາມ;

ຕສ຺ມາ ຫິ ອມ຺ຫໍ ທຫຣາ ນ ມີຍເຣ’’ຕິ

ມຫາຘມ຺ມປາລຊາຕເກ ສທາຣສນ຺ໂຕໂສ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ໂຕ.

ຫີເນນ ພ຺ຣຫ຺ມຈຣິເຍນ, ຂຕ຺ຕິເຍ ອຸປປຊ຺ຊຕິ;

ມຊ຺ຌິເມນ ຈ ເທເວສຸ, ອຸຕ຺ຕເມນ ວິສຸຊ຺ຌຕີ’’ຕິ

ເອວໍ ນິມິຊາຕເກ ອວີຕິກ຺ກມວເສນ ກໂຕ ອຸໂປສໂຖ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ໂຕ. ‘‘ອິທໍ ໂຂ ປນ ປຎ຺ຈສິຂ ພ຺ຣຫ຺ມຈຣິຍໍ ເອກນ຺ຕນິພ຺ພິທາຍ ວິຣາຄາຍ…ເປ… ອຍເມວ ອຣິໂຍ ອຏ຺ຐງ຺ຄິໂກ ມຄ຺ໂຄ’’ຕິ ມຫາໂຄວິນ຺ທສຸຕ຺ຕສ຺ມິໍເຍວ ອຣິຍມຄ຺ໂຄ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ໂຕ. ‘‘ຕຍິທໍ ພ຺ຣຫ຺ມຈຣິຍໍ ອິທ຺ຘຎ຺ເຈວ ຜີຕຎ຺ຈ ວິຕ຺ຖາຣິກໍ ພາຫຸຊຎ຺ຎໍ ປຸຖຸຠູຕໍ ຍາວເທວ ມນຸສ຺ເສຫິ ສຸປ຺ປກາສິຕ’’ນ຺ຕິ ປາສາທິກສຸຕ຺ເຕ ສິກ຺ຂຕ຺ຕຍສງ຺ຄຫໍ ສກລໍ ສາສນໍ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ຕໍ.

‘‘ອປິ ອຕຣມານານໍ, ຜລາສາວ ສມິຊ຺ຌຕິ;

ວິປກ຺ກພ຺ຣຫ຺ມຈຣິໂຍສ຺ມິ, ເອວໍ ຊານາຫິ ຄາມຓີ’’ຕິ

ເອຕ຺ຖ ອຊ຺ຌາສໂຍ ‘‘ພ຺ຣຫ຺ມຈຣິຍ’’ນ຺ຕິ ວຸຕ຺ໂຕ. ອິຈ຺ເຈວໍ –

ທານໍ ເວຍ຺ຍາວຏິຍຎ຺ຈ, ສິກ຺ຂາ ພ຺ຣຫ຺ມວິຫາຣກາ;

ຘມ຺ມກ຺ຂານໍ ເມຖຸນຕາ-ວິຣຕິ ຈ ອຸໂປສໂຖ.

ສທາເຣສຸ ຈ ສນ຺ໂຕໂສ, ອຣິຍມຄ຺ໂຄ ຈ ສາສນໍ;

ອຊ຺ຌາສໂຍ ຈິເມ ພ຺ຣຫ຺ມ-ຈຣິຍສທ຺ເທນ ວຸຈ຺ຈເຣ.

ຫຸຣ ໂກຏິລ຺ເລ. ຫຸຣຕິ.

ສຣ ສທ຺ໂທປຕາເປສຸ. ສຣຕິ. ສໂຣ, ສຣຓໍ.

ເອຕ຺ຖ ຈ ສໂຣຕິ ສທ຺ໂທປິ ວຸຈ຺ຈຕິ ອຸສຸປິ. ສຣຓນ຺ຕິ ສຣຕິ ອຸປຕາເປຕິ ຫິໍສຕິ ສຣຓຄຕານໍ ເຕເນວ ສຣຓຄມເນນ ຠຍໍ ສນ຺ຕາປໍ ທຸກ຺ຂໍ ທຸຄ຺ຄຕິໍ ປຣິກິເລສຎ຺ຈາຕິ ສຣຓໍ, ພຸທ຺ຘາທິຣຕນຕ຺ຕຍໍ. ອຖ ວາ ສທ຺ຘາ ປສນ຺ນາ ມນຸສ຺ສາ ‘‘ອມ຺ຫາກໍ ສຣຓມິທ’’ນ຺ຕິ ສຣນ຺ຕິ ຈິນ຺ເຕນ຺ຕິ, ຕໍ ຕຕ຺ຖ ຈ ວາຈໍ ນິຈ຺ຉຣນ຺ຕິ ຄຈ຺ຉນ຺ຕິ ຈາຕິປິ ສຣຓໍ.

ສຣ ຈິນ຺ຕາຍໍ. ສຣຕິ, ສຸສຣຕິ ອິຈ຺ຈປິ ປໂຍໂຄ. ອປ຺ປກ຺ຂຣານຎ຺ຫິ ພຫຸຠາໂວ ອຎ຺ຎຖາຠາໂວ ຈ ໂຫຕິ, ຍຖາ ‘‘ທ຺ເວ, ທຸເວ, ຕຓ຺ຫາ ຕສິຓາ, ປມ຺ຫໍ, ປຂຸມ’’ນ຺ຕິ. ອນຸສ຺ສຣຕິ, ປຏິສ຺ສຣຕິ. ສຣນ຺ຕິ ເອຕາຍ ສຕ຺ຕາ, ສຍໍ ວາ ສຣຕິ, ສຣຓມຕ຺ຕເມວ ວາ ເອຕນ຺ຕິ ສຕິ. ອນຸສ຺ສຕິ, ປຏິສ຺ສຕິ. ສຣຕີຕິ ສໂຕ. ປຸນປ຺ປຸນໍ ສຣຕີຕິ ປຏິສ຺ສໂຕ.

ທ຺ວຣ ສໍວຣເຓ. ສໍວຣຓໍ ຣກ຺ຂຓາ. ທ຺ວຣຕິ. ທ຺ວາຣໍ. ທ຺ວິສທ຺ທູປປທອຣຘາຕຸວເສນປິ ອິທໍ ຣູປໍ ສິຊ຺ຌຕິ. ຕຕ຺ຣິມານິ ນິພ຺ພຈນານິ – ທ຺ວຣນ຺ຕິ ສໍວຣນ຺ຕິ ຣກ຺ຂນ຺ຕິ ເອເຕນາຕິ ທ຺ວາຣໍ, ອຖ ວາ ທ຺ເວ ກວາຏາ ອຣນ຺ຕິ ຄຈ຺ຉນ຺ຕິ ປວຕ຺ຕນ຺ຕິ ເອຕ຺ຖາຕິປິ ທ຺ວາຣນ຺ຕິ. ເຄຫທ຺ວາຣມ຺ປິ ກາຍທ຺ວາຣາທີນິປິ ອຸປາໂຍປິ ທ຺ວາຣນ຺ຕິ ວຸຈ຺ຈຕິ. ປາຬິຍໍ ຕຸ ‘‘ທ຺ວາຣໍ ທ຺ວາຣາ’’ຕິ ຈ ອິຕ຺ຖິນປຸໍສກວເສນ ທ຺ວາຣສທ຺ໂທ ວຸຕ຺ໂຕ. ຕຖາ ຫິ ‘‘ທ຺ວາຣມ຺ປິ ສຸຣກ຺ຂິຕໍ ໂຫຕີ’’ຕິ ຈ ‘‘ທ຺ວາຣາເປສາ’’ຕິ ຈ ຕສ຺ສ ທ຺ວິລິງ຺ຄຕາ ວຸຕ຺ຕາ.

ຄຣ ຆຣ ເສຈເນ. ຄຣຕິ. ຆຣຕິ. ຆຣໍ.

ຘູຣ ຫຸຈ຺ຉເນ. ຫຸຈ຺ຉນ ໂກຏິລ຺ລໍ. ຘູຣຕິ.

ຕຣ ປ຺ລວນສຣເຓສຸ. ຕຣຕິ. ຕຣຓໍ. ຕິຕ຺ຖໍ. ຕິຓ຺ໂຓ. ອຸຕ຺ຕິຓ຺ໂຓ. ໂອຕິຓ຺ໂຓ ອິຈ຺ຈາທີນິ. ຕຕ຺ຖ ຕຣຓໍ ວຸຈ຺ຈຕິ ນາວາ, ຕຣຕິ ອຸທກປິຏ຺ເຐ ປ຺ລວຕິ, ຕຣນ຺ຕິ ອຸຕ຺ຕຣນ຺ຕິ ວາ ນທິໍ ເອເຕນາຕິ ອຕ຺ເຖນ.

ນາວາ ປ຺ລໂວ ຕຣໍ ໂປໂຕ, ຕຣຓໍ ອຸຕ຺ຕຣໍ ຕຖາ;

ຊລຍານນ຺ຕິ ເອຕານິ, ນາວານາມານິ ໂຫນ຺ຕິ ຕຸ.

ຕຣ ສມ຺ຠເມ. ສມ຺ຠໂມ ອນວຏ຺ຐານໍ. ຕຣຕິ. ຕຣິໂຕ. ຕຸຣງ຺ໂຄ.

ເອຕ຺ຖ ຈ ‘‘ໂສ ມາສເຂຕ຺ຕໍ ຕຣິໂຕ ອວາສຣິ’’ນ຺ຕິ ປາຬິ ນິທສ຺ສນໍ. ຕຕ຺ຖ ຕຣິໂຕຕິ ຕຸຣິໂຕ ສມ຺ຠມນ຺ໂຕ. ອວາສຣິນ຺ຕິ ອຸປຄຈ຺ຉິໍ ອຸປວິສິໍ ວາ.

ຊຣ ໂຣເຄ. ເອຕ຺ຖ ຊຣໂຣໂຄເຍວ ‘‘ໂຣໂຄ’’ຕິ ອຘິປ຺ເປໂຕ ປໂຍຄວເສນ. ຊຣສທ຺ທສ຺ສ ຫິ ຊຣໂຣເຄ ປວຕ຺ຕນິຍມນຕ຺ຖໍ ‘‘ໂຣເຄ’’ຕິ ວຸຕ຺ຕໍ. ເຕນ ອຎ຺ໂຎ ໂຣໂຄ ອິຘ ໂຣຄສທ຺ເທນ ນ ວຸຈ຺ຈຕິ. ຊຣຕິ. ຊໂຣ. ສຊ຺ຊໂຣ. ປຊ຺ຊຣໂຣໂຄ. ຊເຣນ ປີຬິຕາ ມນຸສ຺ສາ. ຍຕ຺ຖ ຕຸ ອຍໍ ວໂຍຫານິວາຈໂກ, ຕຕ຺ຖ ປໂຍເຄ ‘‘ຊີຣຕິ, ຊຣາ’’ຕິ ຈສ຺ສ ຣູປານິ ຠວນ຺ຕິ.

ທຣ ຠເຍ. ທຣຕິ. ທຣີ. ‘‘ພີລາສຍາ ທຣີສຍາ’’ຕິ ນິທສ຺ສນໍ. ຕຕ຺ຖ ທຣີຕິ ຠາຍິຕພ຺ພຏ຺ເຐນ ທຣີ.

ທຣ ອາທຣານາທເຣສຸ. ທຣຕິ, ອາທຣຕິ, ອນາທຣຕິ. ອາທໂຣ, ອນາທໂຣ.

ເອຕ຺ຖ ຈ ທຣຕີຕິ ທຣໍ ກໂຣຕີຕິ ຈ ອນາທຣໍ ກໂຣຕີຕິ ຈ ອຕ຺ໂຖ. ຍຖາ ຫິ ອາຣກາສທ຺ໂທ ທູຣາສນ຺ນວາຈໂກ, ຕຖາຍມ຺ປິ ທຣຘາຕຸ ອາທຣານາທຣວາຈໂກ ທຏ຺ຐພ຺ໂພ. ທຣສທ຺ໂທ ຈ ກາຍທຣເຖ ຈິຕ຺ຕທຣເຖ ກິເລສທຣເຖ ຈ ວຕ຺ຕຕິ. ອຍຎ຺ຫິ –

ອາທິຕ຺ຕໍ ວຕ ມໍ ສນ຺ຕໍ, ຆຕສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈິ, ສພ຺ພໍ ນິພ຺ພາປເຍ ທຣ’’ນ຺ຕິ

ເອຕ຺ຖ ກາຍທຣເຖ ຈິຕ຺ຕທຣເຖ ຈ ວຕ຺ຕຕິ. ‘‘ວີຕທ຺ທໂຣ ວີຕໂສໂກ ວີຕສລ຺ໂລ, ສຍໍ ອຠິຎ຺ຎາຍ ອຠາສິ ພຸທ຺ໂຘ’’ຕິ ເອຕ຺ຖ ປນ ກິເລສທຣເຖ ວຕ຺ຕຕິ. ວີຕທ຺ທໂຣຕິ ຫິ ອຄ຺ຄມຄ຺ເຄນ ສພ຺ພກິເລສານໍ ສມຸຈ຺ຉິນ຺ນຕ຺ຕາ ວິຄຕກິເລສທຣໂຖຕິ ອຕ຺ໂຖ.

ນຣ ນຍເນ. ນຣຕິ. ນໂຣ, ນາຣີ.

ເອຕ຺ຖ ນໂຣຕິ ປຸຣິໂສ. ໂສ ຫິ ນຣຕິ ເນຕີຕິ ນໂຣ. ຍຖາ ປຐມປກຕິຠູໂຕ ສຕ຺ໂຕ ທຕຣາຍ ປກຕິຍາ ເສຏ຺ຐຏ຺ເຐນ ປຸຣິ ອຸຈ຺ຈາຏ຺ຐາເນ ເສຕິ ປວຕ຺ຕຕີຕິ ປຸຣິໂສຕິ ວຸຈ຺ຈຕິ, ເອວໍ ນຍນຏ຺ເຐນ ນໂຣຕິ ວຸຈ຺ຈຕິ. ປຸຕ຺ຕຠາຕຸຠູໂຕປິ ຫິ ປຸຄ຺ຄໂລ ມາຕຸເຊຏ຺ຐຠຄິນີນໍ ເນຕຸຏ຺ຐາເນ ຕິຏ຺ຐຕິ, ປເຄວ ອິຕໂຣ ອິຕຣາສໍ. ນາຣີຕິ ນເຣນ ໂຍຄໂຕ, ນຣສ຺ສາຍນ຺ຕິ ວາ ນາຣີ. ອປຣມ຺ເປຕ຺ຖ ນຣສທ຺ທສ຺ສ ນິພ຺ພຈນໍ, ນຣິຍຕິ ສເກນ ກມ຺ເມນ ນິຍ຺ຍຕີຕິ ນໂຣ, ສຕ຺ໂຕ ມນຸສ຺ໂສ ວາ. ‘‘ກມ຺ເມນ ນິຍ຺ຍເຕໂອ ໂລໂກ’’ຕິ ຫິ ວຸຕ຺ຕໍ. ຕຕ຺ຖ ນຣສທ຺ທສ຺ສ ຕາວ ປຸຣິສວຈເນ ‘‘ນຣາ ຈ ອຖ ນາຣິໂຍ’’ຕິ ນິທສ຺ສນໍ. ສຕ຺ຕມນຸສ຺ສວຈເນ ປນ ‘‘ພຸທ຺ໂຘ ອຍໍ ເອທິສໂກ ນຣຸຕ຺ຕໂມ. ອາໂມທິຕາ ນຣມຣູ’’ຕິ ຈ ນິທສ຺ສນໍ, ຕສ຺ມາ ‘‘ນໂຣຕິ ປຸຣິໂສ, ນໂຣຕິ ສຕ຺ໂຕ, ນໂຣຕິ ມນຸສ຺ໂສ’’ຕິ ຕຕ຺ຖ ຕຕ຺ຖ ຍຖາສມ຺ຠວໍ ອຕ຺ໂຖ ສໍວຓ຺ເຓຕພ຺ໂພ.

ຫຣ ຫຣເຓ. ຫຣຓໍ ປວຕ຺ຕນໍ. ຫຣຕິ. ສາວຕ຺ຖິຍໍ ວິຫຣຕິ. ວິຫາສິ. ວິຫໍສຸ. ວິຫຣິສ຺ສຕິ. ອປ຺ປມຕ຺ໂຕ ວິຫິສ຺ສຕິ. ໂວຫຣຕິ. ສໍໂວຫຣຕິ. ສພ຺ໂພ ຫຣຕິ ວາ. ຣູປິຍສໍໂວຫາໂຣ, ຣູປິຍສພ຺ໂພຫາໂຣ ວາ. ປາຏິຫາຣິຍໍ. ປີຕິປາໂມຊ຺ຊຫາໂຣ. ວິຫາໂຣ. ໂວຫາໂຣ. ອຠິຫາໂຣ. ຈິຕ຺ຕໍ ອຠິນີຫຣຕິ. ສາສເນ ວິຫຣໍ, ວິຫຣນ຺ໂຕ, ວິຫຣມາໂນ. ວິຫາຕພ຺ພໍ, ວິຫຣິຕຸໍ. ວິຫຣິຕ຺ວາ. ອຎ຺ຎານິປິ ໂຍເຊຕພ຺ພານິ.

ຕຕ຺ຖ ປາຏິຫາຣິຍນ຺ຕິ ສມາຫິເຕ ຈິຕ຺ເຕ ວິຄຕູປກ຺ກິເລເສ ກຕກິຈ຺ເຈນ ປຈ຺ຉາ ຫຣິຕພ຺ພໍ ປວຕ຺ເຕຕພ຺ພນ຺ຕິ ປາຏິຫາຣິຍໍ. ປຏີຕິ ຫິ ອຍໍ ສທ຺ໂທ ‘‘ປຈ຺ຉາ’’ຕິ ເອຕສ຺ສ ອຕ຺ຖໍ ໂພເຘຕິ ‘‘ຕສ຺ມິໍ ປຏິປວິຏ຺ຐມ຺ຫິ, ອຎ຺ໂຎ ອາຄຎ຺ຉິ ພ຺ຣາຫ຺ມໂຓ’’ຕິອາທີສຸ ວິຍ. ວິຫາໂຣຕິ ຐານນິສຊ຺ຊາທິນາ ວິຫຣນ຺ຕິ ເອຕ຺ຖາຕິ ວິຫາໂຣ, ຠິກ຺ຂູນໍ ອາວາໂສ. ວິຫຣຓໍ ວາ ວິຫາໂຣ, ວິຫຣຓກ຺ຣິຍາ. ໂວຫາໂຣຕິ ພ຺ຍວຫາໂຣປິ ປຓ຺ຓຕ຺ຕິປິ ວຈນມ຺ປິ ເຈຕນາປິ. ຕຕ຺ຖ

ໂຍ ຫິ ໂກຈິ ມນຸສ຺ເສສຸ, ໂວຫາຣໍ ອຸປຊີວຕິ;

ເອວໍ ວາເສຏ຺ຐ ຊານາຕິ, ວາຓິໂຊ ໂສ ນພ຺ຣາຫ຺ມໂຓ’’ຕິ.

ອຍໍ ພ຺ຍວຫາຣໂວຫາໂຣ ນາມ. ‘‘ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ’’ຕິ ອຍໍ ປຓ຺ຓຕ຺ຕິໂວຫາໂຣ ນາມ. ຕຖາ ຕຖາ ໂວຫຣນ຺ຕິ ປຣາມສນ຺ຕີຕິ ອຍໍ ວຈນໂວຫາໂຣ ນາມ. ‘‘ອຏ຺ຐ ອຣິຍໂວຫາຣາ, ອຏ຺ຐ ອນຣິຍໂວຫາຣາ’’ຕິ ອຍໍ ເຈຕນາໂວຫາໂຣ ນາມ. ອິຈ຺ເຈວໍ –

ພ຺ຍວຫາເຣ ວຈເນ ຈ, ປຓ຺ຓຕ຺ຕິເຈຕນາສຸ ຈ;

ໂວຫາຣສທ຺ໂທ ຈຕູສຸ, ອິເມສ຺ວຕ຺ເຖສຸ ທິສ຺ສຕິ.

ຫຣ ອປນຍເນ. ອປນຍນໍ ນີຫຣຓໍ. ໂທສໍ ຫຣຕິ. ນີຫຣຕິ. ນີຫາໂຣ, ປຣິຫຣຕິ. ປຣິຫາໂຣ. ຣໂຊຫຣຓໍ. ສພ຺ພໂທສຫໂຣ ຘມ຺ໂມ. ຠຄວໂຕ ຈ ສາສນສ຺ສ ຈ ປຏິປກ຺ເຂ ຕິຕ຺ຖິເຍ ຫຣຕີຕິ ປາຏິຫາຣິຍໍ. ມຕ຺ຕາວຓ຺ຓເຠເທເນຕ຺ຖ ‘‘ປາຏິເຫຣໍ ປາຏິຫີຣໍ ປາຏິຫາຣິຍ’’ນ຺ຕິ ຕີຓິ ປທຣູປານິ, ຠວນ຺ຕິ.

ຫຣ ອາທາເນ. ອທິນ຺ນໍ ຫຣຕິ. ຫຣິສ຺ສຕິ. ຫາຫິຕິ ອິຈ຺ຈປ. ‘‘ຂຣາຊິນໍ ປຣ ສຸຎ຺ຈ, ຂາຣິກາຊຎ຺ຈ ຫາຫິຕີ’’ຕິ ອິທເມຕ຺ຖ ນິທສ຺ສນໍ. ອາຫຣຕິ, ອວຫຣຕິ, ສໍຫຣຕິ, ອປຫຣຕິ, ອຸປຫຣຕິ, ປຫຣຕິ, ສມ຺ປຫຣຕິ, ສມາຫຣຕິ. ມໂນຫໂຣ ປາສາໂທ. ປຣສ຺ສຫຣຓໍ. ອາຫາໂຣ, ອວຫາໂຣ, ສໍຫາໂຣ, ອຸປຫາໂຣ, ສມ຺ປຫາໂຣ, ສມາຫາໂຣ. ຫຣິຍ຺ຍຕິ, ອາຫຣິຍ຺ຍຕິ. ອາຫຣິຍ຺ຍນ຺ຕິ. ອາຫຏໍ, ຫຣິຕຸໍ, ອາຫຣິຕຸໍ, ອາຫຣິຕ຺ວາ, ອາຫຣິຕ຺ວານ. ອຎ຺ຎານິປິ ໂຍເຊຕພ຺ພານິ.

ຘຣ ຘຣເຓ. ຘຣຓໍ ວິຊ຺ຊມານຕາ. ຘຣຕິ. ຘຣເຕ ສຕ຺ຖຸສາສນໍ.

ຘຣ ອວິທ຺ຘໍສເນ. ນິພ຺ພານໍ ນິຈ຺ຈໍ ຘຣຕິ.

ຂຣ ຂເຍ. ຂຣຕິ. ຂຣຓໍ. ນກ຺ຂຣນ຺ຕິ ນ ຂິຍ຺ຍນ຺ຕີຕິ ອກ຺ຂຣານິ. ນກ຺ຂຣນ຺ຕິ ນ ນສ຺ສນ຺ຕີຕິ ນກ຺ຂຕ຺ຕານີຕິ ໂປຣາຓາ.

ຊາຄຣນິທ຺ທກ຺ຂເຍ ຊາຄຣຕິ. ຊາຄໂຣ, ຊາຄຣຓໍ, ຊາຄຣໍ. ທີຆາ ຊາຄຣໂຕ ຣຕ຺ຕິ. ຊາຄຣມາໂນ. ອຍຎ຺ຈ ຘາຕຸ ຕນາທິຄຓໍ ປຕ຺ວາ ‘‘ຊາຄໂຣຕິ, ປຏິຊາຄໂຣຕີ’’ຕິ ຣູປານິ ຊເນຕິ.

ອີຣ ວຈເນ ຄຕິກມ຺ປເນສຸ ຈ. ອີຣຕິ. ອີຣິຕໍ. ເອຣິຕໍ. ສມີຣໂຓ. ຊິເນຣິໂຕ ຘມ຺ໂມ. ກຸປ຺ປນ຺ຕິ ວາຕສ຺ສປິ ເອຣິຕສ຺ສ.

ຕຕ຺ຖ ສມີຣໂຓຕິ ວາໂຕ. ໂສ ຫິ ສມີຣຕິ ວາຍຕິ, ສມີເຣຕິ ຈ ຣຸກ຺ຂສາຂາປຓ຺ຓາທີນິ ສຸຏ຺ຐຸ ກມ຺ເປຕີຕິ ‘‘ສມີຣໂຓ’’ຕິ ວຸຈ຺ຈຕິ.

ຫເຣ ລຊ຺ຊາຍໍ. ອລຸຕ຺ຕນ຺ໂຕຍເມກາຣນ຺ໂຕ ຘາຕຸ, ຄິເລ ປີຕິກ຺ຂເຍຕິ ຘາຕຸ ວິຍ. ຫຣາຍຕິ. ຫຣາຍນໍ. ອຏ຺ຏີຍາມິ ຫຣາຍາມິ.

ເອຕ຺ຖ ຫຣາຍຕີຕິ ລຊ຺ຊຕິ, ຫິຣິໍ ກໂຣຕີຕິ ອຕ຺ໂຖ.

ປຣ ປາລນປູຣເຓສຸ. ‘‘ປຣຕິ, ປຣໂມ’’ຕິມສ຺ສ ຣູປານິ, ນຣ ນຍເນຕິ ຘາຕຸສ຺ສ ‘‘ນຣຕິ ນໂຣ’’ຕິ ຣູປານິ ວິຍ.

ຕຕ຺ຖ ປຣຕີຕິ ປາເລຕິ, ປູຣຕິ ວາ. ສຸທ຺ຘກຕ຺ຕຸວເສນິທໍ ປທໍ ວຸຕ຺ຕໍ. ເຫຕຸກຕ຺ຕຸວເສນ ຫິ ‘‘ປາເຣຕິ ປາຣຍຕີ’’ຕິອາທີນິ ຣູປານິ ຠວນ຺ຕິ. ປຣໂມຕິ ປາລໂກ ປູຣໂກ ວາ. ເອຕ຺ຖ ຈ ‘‘ປາຣມີ’’ຕິ ປທໍ ເອຕສ຺ສຕ຺ຖສ຺ສ ສາຘກໍ. ຕຖາ ຫິ ປາຣມີຕິ ປຣຕິ, ປາເຣຕິ ຈາຕິ ປຣໂມ, ທານາທີນໍ ຄຸຓານໍ ປາລໂກ ປູຣໂກ ຈ ມຫາໂພຘິສຕ຺ໂຕ. ປຣມສ຺ສ ອິທໍ, ປຣມສ຺ສ ວາ ຠາໂວ, ກມ຺ມໍ ວາ ປາຣມີ, ທານາທິກ຺ຣິຍາ. ຄຣູຫິ ປນ ‘‘ປູເຣຕີຕິ ປຣໂມ, ທານາທີນໍ ຄຸຓານໍ ປູຣໂກ ປາລໂກ ຈາ’’ຕິ ວຸຕ຺ຕໍ, ຕໍ ວີມໍສິຕພໍ.

ວຣ ວຣເຓ. ວຣຕິ. ວາຣໂຓ, ວຣຸໂຓ.

ຄິຣ ນິຄ຺ຄິຣໂຓ. ນິຄ຺ຄິຣຓໍ ປຄ຺ຆຣຓໍ. ຄິຣຕິ, ຄິຣິ.

ເອຕ຺ຖ ຄິຣີຕິ ປພ຺ພຕາ, ໂຍ ‘ເສໂລ’’ຕິອາທີຫິ ອເນເກຫິ ນາເມຫິ ກຖິຍຕິ. ໂສ ຫິ ສນ຺ຘິສງ຺ຂາເຕຫິ ປພ຺ເພຫິ ຈິຕຕ຺ຕາ ປພ຺ພມສ຺ສ ອຕ຺ຖີຕິ ປພ຺ພໂຕ. ຫິມວມນາທິວເສນ ຊລສ຺ສ ສາຣຠູຕານໍ ເຠສຊ຺ຊາທິວຕ຺ຖູນຎ຺ຈ ຄິຣຓໂຕ ຄິຣີຕິ ວຸຈ຺ຈຕິ.

ອິມານິ ປນສ຺ສ ນາມານິ –