໘. ວຕ຺ຕກ຺ຂນ຺ຘກ

ປຸຈ຺ຉາ – ອາຄນ຺ຕຸການໍ ອາວຸໂສ ຠິກ຺ຂູນໍ ວຕ຺ຕໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ອາຄນ຺ຕຸເກ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ອາຄນ຺ຕຸກາ ຠນ຺ເຕ ຠິກ຺ຂູ ສອຸປາຫນາປິ ອາຣາມໍ ປວິສິໍສຸ, ຉຕ຺ຕປຄ຺ຄຫິຕາປິ ອາຣາມໍ ປວິສິໍສຸ, ໂອຄຸຓ຺ຐິຕາປິ ອາຣາມໍ ປວິສິໍສຸ, ສີເສປິ ຈີວຣໍ ກຣິຕ຺ວາ ອາຣາມໍ ປວິສິໍສຸ, ປານີເຍນປິ ປາເທ ໂທວິໍສຸ, ວຸຑ຺ຒຕເຣປິ ອາວາສິເກ ຠິກ຺ຂູ ນາຠິວາເທສຸໍ, ນປິ ເສນາສນໍ ປຸຈ຺ຉິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ເຕນ ຫິ ຠິກ຺ຂເວ ອາຄນ຺ຕຸການໍ ຠິກ຺ຂູນໍ ວຕ຺ຕໍ ປຎ຺ຎເປສ຺ສາມິ, ຍຖາ ອາຄນ຺ຕຸເກຫິ ຠິກ຺ຂູຫິ ສມ຺ມາ ວຕ຺ຕິຕພ຺ພໍ, ອາຄນ຺ຕຸເກນ ຠິກ຺ຂເວ ຠິກ຺ຂຸນາ ອິທານິ ອາຣາມໍ ປວິສິສ຺ສາມີຕິ ອຸປາຫນາ ໂອມຸຎ຺ຈິຕ຺ວາ ນີຈໍ ກຕ຺ວາ ປປ຺ໂຜເຏຕ຺ວາ ຄເຫຕ຺ວາ ຉຕ຺ຕໍ ອປນາເມຕ຺ວາ ສີສໍ ວິວຣິຕ຺ວາ ສີເສ ຈີວຣໍ ຂນ຺ເຘ ກຕ຺ວາ ສາຘຸກໍ ອຕຣມາເນນ ອາຣາໂມ ປວິສິຕພ຺ໂພ’’ ເອວມາທິນາ ຠນ຺ເຕ ອາຄນ຺ຕຸການໍ ຠິກ຺ຂູນໍ ວຕ຺ຕໍ ປຎ຺ຎຕ຺ຕໍ.

ປຸຈ຺ຉາ – ອາວາສິການໍ ອາວຸໂສ ຠິກ຺ຂູນໍ ວຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ, ກຖຎ຺ຈ ປນ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ອາວາສິເກ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ອາວາສິກາ ຠິກ຺ຂູ ອາຄນ຺ຕຸເກ ຠິກ຺ຂູ ທິສ຺ວາ ເນວ ອາສນໍ ປຎ຺ຎເປສຸໍ, ນ ປາໂທທກໍ ປາທປີຐໍ ປາທກຖລິກໍ ອຸປນິກ຺ຂິປິໍສຸ, ນ ປຈ຺ຈຸຄ຺ຄນ຺ຕ຺ວາ ປຕ຺ຕຈີວຣໍ ປຏິຄ຺ຄເຫສຸໍ, ນ ເສນາສນໍ ປຎ຺ຎເປສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ –

‘‘ອາວາສິເກນ ຠິກ຺ຂເວ ຠິກ຺ຂຸນາ ອາຄນ຺ຕຸກໍ ຠິກ຺ຂຸໍ ວຸຑ຺ຒຕຣໍ ທິສ຺ວາ ອາສນໍ ປຎ຺ຎເປຕພ຺ພໍ, ປາໂທທກໍ ປາທປີຐໍ ປາທກຖລິກໍ ອຸປນິກ຺ຂິປິຕພ຺ພໍ, ປຈ຺ຈຸຄ຺ຄນ຺ຕ຺ວາ ປຕ຺ຕຈີວຣໍ ປຏິຄ຺ຄເຫຕພ຺ພໍ ປານີເຍນ ປຸຈ຺ຉິຕພ຺ໂພ’’ ເອວມາທິນາ ຠນ຺ເຕ ອາວາສິການໍ ຠິກ຺ຂູນໍ ວຕ຺ຕໍ ຠຄວຕາ ປຎ຺ຎຕ຺ຕໍ.

ປຸຈ຺ຉາ – ຄມິການໍ ອາວຸໂສ ຠິກ຺ຂູນໍ ວຕ຺ຕໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ, ກຖຎ຺ຈປນ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຄມິເກ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຄມິກາ ຠິກ຺ຂູ ທາຣຸຠຓ຺ຑໍ ມຕ຺ຕິກາຠຓ຺ຑໍ ອປ຺ປຏິສາເມຕ຺ວາ ທ຺ວາຣວາຕປານໍ ວິວຣິຕ຺ວາ ເສນາສນໍ ອນາປຸຈ຺ຉາ ປກ຺ກມິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຄມິເກນ ຠິກ຺ຂເວ ຠິກ຺ຂຸນາ ທາຣຸຠຓ຺ຑໍ ປຏິສາເມຕ຺ວາ ທ຺ວາຣວາຕປານໍ ຖເກຕ຺ວາ ເສນາສນໍ ອາປຸຈ຺ຉາ ປກ຺ກມິຕພ຺ພໍ’’ ເອວມາທິນາ ຠນ຺ເຕ ອາກາເຣນ ຠຄວຕາ ຄມິການໍ ຠິກ຺ຂູນໍ ວຕ຺ຕໍ ປຎ຺ຎຕ຺ຕໍ.

ປຸຈ຺ຉາ – ຠຕ຺ຕຄ຺ເຄ ອາວຸໂສ ອນຸໂມທິຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ຠຕ຺ຕຄ຺ເຄ ນານຸໂມທິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ຠິກ຺ຂູນໍ ອາວຸໂສ ຠຕ຺ຕຄ຺ຄວຕ຺ຕໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ທຸນ຺ນິວຕ຺ຖາ ທຸປ຺ປາຣຸຕາ ອນາກປ຺ປສມ຺ປນ຺ນາ ຠຕ຺ຕຄ຺ຄໍ ຄຈ຺ຉິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ສເຈ ອາຣາເມ ກາໂລ ອາໂຣຈິໂຕ ໂຫຕິ, ຕິມຓ຺ຑລໍ ປຏິຈ຺ຉາເທນ຺ເຕນ ປຣິມຓ຺ຑລໍ ນິວາເສຕ຺ວາ ກາຍພນ຺ຘນໍ ພນ຺ຘິຕ຺ວາ ສຄຸຓໍ ກຕ຺ວາ ສງ຺ຆາຏິໂຍ ປາຣຸປິຕ຺ວາ ຄຓ຺ຐິກໍ ປຏິມຸຎ຺ຈິຕ຺ວາ ໂຘວິຕ຺ວາ ປຕ຺ຕໍ ຄເຫຕ຺ວາ ສາຘຸກໍ ອຕຣມາເນນ ຄາໂມ ປວິສິຕພ຺ໂພ’’ຕິ ເອວມາທິນາ ຠນ຺ເຕ ຠຕ຺ຕຄ຺ຄວຕ຺ຕໍ ປຎ຺ຎຕ຺ຕໍ.

ປຸຈ຺ຉາ – ຠິກ຺ຂູນໍ ອາວຸໂສ ເສນາສນວຕ຺ຕໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ, ກຖຎ຺ຈ ຕໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ຠິກ຺ຂູສຸ ອຊ຺ໂຌກາເສ ຈີວຣໍ ກໂຣນ຺ເຕສຸ ປຏິວາເຕ ອງ຺ຄເຓ ເສນາສນໍ ປປ຺ໂຜເຏສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຍສ຺ມິໍ ວິຫາເຣ ວິຫຣຕິ, ສເຈ ໂສ ວິຫາໂຣ ອຸກ຺ລາໂປ ໂຫຕິ, ສເຈ ອຸສ຺ສຫຕິ ໂສເຘຕພ຺ໂພ’’ຕິ ເອວມາທິນາ ຠນ຺ເຕ ຠິກ຺ຂູນໍ ເສນາສນວຕ຺ຕໍ ຠຄວຕາ ປຎ຺ຎຕ຺ຕໍ.

ປຸຈ຺ຉາ – ສມາຈາຣໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ສມາຈາຣໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ເອກາ ອາປຕ຺ຕິ.