ຈູຬວຄ຺ຄປາຬິ

໑. ກມ຺ພກ຺ຂນ຺ຘກ

ປຸຈ຺ຉາ – ຠຓ຺ຑນາທິກາຣກສ຺ສ ອາວຸໂສ ຠິກ຺ຂຸໂນ ຕຊ຺ຊນີຍກມ຺ມໍ ກາຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ປຓ຺ຑຸກໂລຫິຕເກ ຠິກ຺ຂູ ອາຣພ຺ຠ ອນຸຎ຺ຎາຕໍ, ປຓ຺ຑຸກໂລຫິຕກາ ຠນ຺ເຕ ຠິກ຺ຂູ ອຕ຺ຕນາ ຠຓ຺ຑນກາຣກາ ກລຫກາຣກາ ວິວາທກາຣກາ ຠສ຺ສກາຣກາ ສງ຺ເຆ ອຘິກຣຓກາຣກາ, ເຍປິ ຈຎ຺ເຎ ຠິກ຺ຂູ ຠຓ຺ຑນກາຣກາ ກລຫກາຣກາ ວິວາທກາຣກາ ຠສ຺ສກາຣກາ ສງ຺ເຆ ອຘິກຣຓກາຣກາ ເຕ ອຸປສງ຺ກມິຕ຺ວາ ເອວມາຫໍສຸ ‘‘ມາ ໂຂ ຕຸມ຺ເຫ ອາຍສ຺ມນ຺ໂຕ ເອໂສ ອເຊສິ, ພລວາພລວໍ ປຏິມນ຺ເຕຖ, ຕຸມ຺ເຫ ເຕນ ປຓ຺ຑິຕຕຣາ ຈ ພ຺ຍຕ຺ຕຕຣາ ຈ ພຫຸສ຺ສຸຕຕຣາ ຈ ອລມຕ຺ຕຕຣາ ຈ, ມາ ຈສ຺ສ ຠາຍິຕ຺ຖ, ມຍມ຺ປິ ຕຸມ຺ຫາກໍ ປກ຺ຂາ ຠວິສ຺ສາມາ’’ຕິ, ເຕນ ອນຸປ຺ປນ຺ນານິ ເຈວ ຠຓ຺ຑນານິ ອຸປ຺ປຊ຺ຊນ຺ຕິ, ອຸປ຺ປນ຺ນານິ ຈ ຠຓ຺ຑນານິ ຠິຍ຺ໂຍຠາວາຍ ເວປຸລ຺ລາຍ ສໍວຕ຺ຕນ຺ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ຕຊ຺ຊນີຍກມ຺ມກຕສ຺ສ ອາວຸໂສ ຠິກ຺ຂຸໂນ ກຕິສຸ ວຕ຺ເຕສຸ ສມ຺ມາ ວຕ຺ຕນ຺ຕສ຺ສ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ອຏ຺ຐາຣສສຸ ຠນ຺ເຕ ວຕ຺ເຕສຸ ສມ຺ມາ ວຕ຺ຕນ຺ຕສ຺ສ ຕຊ຺ຊນີຍກມ຺ມກຕສ຺ສ ຠິກ຺ຂຸໂນ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ສາວຕ຺ຖິຍໍ ອນຸຎ຺ຎາຕໍ, ເຕເຍວ ປຓ຺ຑຸກໂລຫິຕກາ ຠິກ຺ຂູ ສງ຺ເຆນ ຕຊ຺ຊນີຍກມ຺ມກຕາ ສມ຺ມາ ວຕ຺ຕິຕ຺ວາ ສງ຺ຆໍ ອຸປສງ຺ກມິຕ຺ວາ ຍາຈິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ພາລສ຺ສ ອາວຸໂສ ອພ຺ຍຕ຺ຕສ຺ສ ອາປຕ຺ຕິພຫຸລສ຺ສ ອນປທານສ຺ສ ຄິຫິສໍສຏ຺ຐສ຺ສ ອນນຸໂລມິເກຫິ ຄິຫິສໍສຄ຺ເຄຫິ ນິຍສ຺ສກມ຺ມໍ ກາຕຸໍ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ເສຍ຺ຍສກໍ ອາຣພ຺ຠ ປຎ຺ຎຕ຺ຕໍ, ອາຍສ຺ມາ ຠນ຺ເຕ ເສຍ຺ຍສໂກ ພາໂລ ອໂຫສິ ອພ຺ຍຕ຺ໂຕ ອາປຕ຺ຕິພຫຸໂລ ອນປທາໂນ ຄິຫິສໍສຏ຺ໂຐ ວິຫາສິ ອນນຸໂລມິເກຫິ ຄິຫິສໍສຄ຺ເຄຫິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ນິຍສ຺ສກມ຺ມກຕສ຺ສ ອາວຸໂສ ຠິກ຺ຂຸໂນ ກຕິສຸ ວຕ຺ເຕສຸ ສມ຺ມາ ວຕ຺ຕນ຺ຕສ຺ສ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ອນຸຎ຺ຎາຕໍ.

ວິສ຺ສຊ຺ຊນາ – ອຏ຺ຐາຣສສຸ ຠນ຺ເຕ ວຕ຺ເຕສຸ ສມ຺ມາ ວຕ຺ຕນ຺ຕສ຺ສ ນິຍສ຺ສ ກມ຺ມກຕສ຺ສ ຠິກ຺ຂຸໂນ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ອນຸຎ຺ຎາຕໍ, ນ ອຸປສມ຺ປາເທຕພ຺ພໍ, ນ ນິສ຺ສໂຍ ທາຕພ຺ໂພ, ນ ສາມເຓໂຣ ອຸປຏ຺ຐາເປຕພ຺ໂພ, ນ ຠິກ຺ຂຸໂນວາທກສມ຺ມຸຕິ ສາທິຕພ຺ພາ, ສມ຺ມເຕນປິ ຠິກ຺ຂຸນິໂຍ ນ ໂອວທິຕພ຺ພາ, ເອວມາທີສຸ ຠນ຺ເຕ ອຏ຺ຐາຣສສຸ ວຕ຺ເຕສຸ ສມ຺ມາ ວຕ຺ຕນ຺ຕສ຺ສ ນິຍສ຺ສກມ຺ມກຕສ຺ສ ຠິກ຺ຂຸໂນ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ອນຸຎ຺ຎາຕໍ.

ປຸຈ຺ຉາ – ກຸລທູສກສ຺ສ ອາວຸໂສ ປາປສມາຈາຣສ຺ສ ຠິກ຺ຂຸໂນ ປພ຺ພາຊນີຍກມ຺ມໍ ກາຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອສ຺ສຊິປຸນພ຺ພສຸເກ ຠິກ຺ຂູ ອາຣພ຺ຠ ອນຸຎ຺ຎາຕໍ, ອສ຺ສຊິປຸນພ຺ພສຸກາ ຠນ຺ເຕ ຠິກ຺ຂູ ກີຏາຄິຣິສ຺ມິໍ ກຸລທູສກາ ອເຫສຸໍ ປາປສມາຈາຣາ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ປຏິສາຣຓີຍກມ຺ມໍ ອາວຸໂສ ປຸຈ຺ຉາມິ, ສທ຺ຘໍ ອາວຸໂສ ປສນ຺ນໍ ຄຫປຕິໍ ທາຍກໍ ກາຣກໍ ສງ຺ຆຸປຏ຺ຐາກໍ ຫີເນນ ຂຸໍເສນ຺ຕສ຺ສ ຠິກ຺ຂຸໂນ ປຏິສາຣຓີຍກມ຺ມໍ ກາຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ສຸຘມ຺ມໍ ອາຣພ຺ຠ ອນຸຎ຺ຎາຕໍ, ຠຄວຕິ ຠນ຺ເຕ ສາວຕ຺ຖິຍໍ ວິຫຣຕິ ອາຍສ຺ມາ ສຸຘມ຺ໂມ ມຈ຺ຉິກາສຓ຺ເຑ ຈິຕ຺ຕໍ ຄຫປຕິໍ ສທ຺ຘໍ ປສນ຺ນໍ ທາຍກໍ ກາຣກໍ ສງ຺ຆຸປຏ຺ຐາກໍ ຫີເນນ ຂຸໍເສສິ ຫີເນນ ວມ຺ເຠສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ເຕນຫິ ຠິກ຺ຂເວ ສງ຺ໂຆ ສຸຘມ຺ມສ຺ສ ຠິກ຺ຂຸໂນ ປຏິສາຣຓີຍກມ຺ມໍ ກໂຣຕຸ ‘‘ຈິຕ຺ໂຕ ເຕ ຄຫປຕິ ຂມາເປຕພ຺ໂພ’’ຕິ –

ປຸຈ຺ຉາ – ປຏິສາຣຓີຍກມ຺ມກຕສ຺ສ ອາວຸໂສ ຠິກ຺ຂຸໂນ ອນຸທູຕໍ ທາຕຸຎ຺ຈ ເຕນ ອນຸທູເຕນ ສທ຺ຘິໍ ຄນ຺ຕ຺ວາ ຍຖາຂຸໍສິຕໍ ຄຫປຕິໍ ຂມາເປຕຸໍ ຈ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍເຍວ ສຸຘມ຺ມໍ ອາຣພ຺ຠ ອນຸຎ຺ຎາຕໍ, ອາຍສ຺ມາ ຠນ຺ເຕ ສຸຘມ຺ໂມ ມຈ຺ຉິກາສຓ຺ຑໍ ຄນ຺ຕ຺ວາ ມງ຺ກຸຠູໂຕ ນາສກ຺ຂິ ຈິຕ຺ຕໍ ຄຫປຕິໍ ຂມາເປຕຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ປຏິສາຣຓີຍກມ຺ມກຕສ຺ສ ອາວຸໂສ ຠິກ຺ຂຸໂນ ກຕິສຸ ວຕ຺ເຕສຸ ສມ຺ມາ ວຕ຺ຕນ຺ຕສ຺ສ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ອນຸຎ຺ຎາຕໍ.

ວິສ຺ສຊ຺ຊນາ – ອຏ຺ຐາຣສສຸ ຠນ຺ເຕ ວຕ຺ເຕສຸ ສມ຺ມາ ວຕ຺ຕນ຺ຕສ຺ສ ປຏິສາຣຓີຍ ກມ຺ມກຕສ຺ສ ຠິກ຺ຂຸໂນ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ອນຸຎ຺ຎາຕໍ.

ປຸຈ຺ຉາ – ອາປຕ຺ຕິໍ ອາວຸໂສ ອາປຊ຺ຊິຕ຺ວາ ຕໍ ອາປຕ຺ຕິໍ ປສ຺ສິຕຸໍ ວາ ປຏິກາຕຸໍ ວາ ນ ອິຈ຺ຉນ຺ຕສ຺ສ ຠິກ຺ຂຸໂນ ອາປຕ຺ຕິຍາ ອທສ຺ສເນ ວາ ອປ຺ປຏິກມ຺ເມ ວາ ອຸກ຺ເຂປນີຍກມ຺ມໍ ກາຕຸໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ໂກສມ຺ພິຍໍ ຠນ຺ເຕ ອາຍສ຺ມນ຺ຕໍ ຉນ຺ນຕ຺ເຖຣໍ ອາຣພ຺ຠ ປຎ຺ຎຕ຺ຕໍ, ອາຍສ຺ມາ ຠນ຺ເຕ ຉນ຺ໂນ ອາປຕ຺ຕິໍ ອາປຊ຺ຊິຕ຺ວາ ນ ອິຈ຺ຉິ ຕໍ ອາປຕ຺ຕິໍ ປສ຺ສິຕຸໍ ວາ ປຏິກາຕຸໍ ວາ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອາປຕ຺ຕິຍາ ອາວຸໂສ ອທສ຺ສເນນ ວາ ອປ຺ປຏິກມ຺ເມ ວາ ອຸກ຺ເຂປນີຍ ກມ຺ມກເຕນ ຠິກ຺ຂຸນາ ກຕິສຸ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ວິສ຺ສຊ຺ຊນາ – ເຕຈຕ຺ຕາລີສາຍ ຠນ຺ເຕ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ປຸຈ຺ຉາ – ອຸກ຺ເຂປນີຍກມ຺ມກຕສ຺ສ ອາວຸໂສ ຠິກ຺ຂຸໂນ ສມ຺ມາ ວຕ຺ຕນ຺ຕສ຺ສ ຕໍ ກມ຺ມໍ ປຏິປ຺ປສ຺ສມ຺ເຠຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ໂກສມ຺ພິຍໍ ຠນ຺ເຕ ອາຍສ຺ມນ຺ຕໍເຍວ ຉນ຺ນໍ ອາຣພ຺ຠ ອນຸຎ຺ຎາຕໍ, ອາຍສ຺ມາ ຠນ຺ເຕ ຉນ຺ໂນ ສງ຺ເຆນ ອາປຕ຺ຕິຍາ ອທສ຺ສເນ ວາ ອປ຺ປຏິກມ຺ເມ ວາ ອຸກ຺ເຂປນີຍກມ຺ມກໂຕ ສມ຺ມາ ວຕ຺ເຕສິ ໂລມໍປາເຕສິ ເນຕ຺ຖາຣໍ ວຕ຺ເຕສິ ສງ຺ຆໍ ອຸປສງ຺ກມິຕ຺ວາ ຕສ຺ສ ກມ຺ມສ຺ສ ປຏິປ຺ປສ຺ສທ຺ຘິຍາ ຍາຈິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ປາປິກໍ ອາວຸໂສ ທິຏ຺ຐິໍ ຄເຫຕ຺ວາ ຕໍ ທິຏ຺ຐິໍ ນ ປຏິນິສ຺ສຊ຺ຊນ຺ຕສ຺ສ ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ເຂປນີຍກມ຺ມໍ ກາຕຸໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຣິຏ຺ຐໍ ຠິກ຺ຂຸໍ ຄທ຺ຘພາຘິປຸພ຺ພໍ ອາຣພ຺ຠ ປຎ຺ຎຕ຺ຕໍ, ຠຄວຕິ ຠນ຺ເຕ ສາວຕ຺ຖິຍໍ ວິຫຣຕິ ອຣິຏ຺ຐສ຺ສ ນາມ ຠິກ຺ຂຸໂນ ຄທ຺ຘພາຘິປຸພ຺ພສ຺ສ ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ ອໂຫສິ ‘‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາເຍເມ ອນ຺ຕຣາຍິກາ ຘມ຺ມາ ວຸຕ຺ຕາ ຠຄວຕາ, ເຕ ປຏິເສວໂຕ ນາລໍ ອນ຺ຕຣາຍາຍາ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ປາປິກາຍ ອາວຸໂສ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ເຂປນີຍກມ຺ມກເຕນ ຠິກ຺ຂຸນາ ກຕິສຸ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ວິສ຺ສຊ຺ຊນາ – ເຕຈຕ຺ຕາລີສາຍ ຠນ຺ເຕ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ປຸຈ຺ຉາ – ກມ຺ມກ຺ຂນ຺ຘກໍ ປຸຈ຺ຉິສ຺ສໍ, ສນິທານິ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ກມ຺ມກ຺ຂນ຺ຘກໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ເອກາ ອາປຕ຺ຕິ.

໒. ປາຣິວາສິກກ຺ຂນ຺ຘກ

ປຸຈ຺ຉາ – ປາຣິວາສິກສ຺ສ ອາວຸໂສ ປກຕຕ຺ຕານໍ ຠິກ຺ຂູນໍ ອຠິວາທນາທີນິ ສາທິຍນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ປາຣິວາສິເກ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ປາຣິວາສິກາ ຠນ຺ເຕ ຠິກ຺ຂູ ສາທິຍິໍສຸ ປກຕຕ຺ຕານໍ ຠິກ຺ຂູນໍ ອຠິວາທນາທີນິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ປາຣິວາສິເກນ ອາວຸໂສ ຠິກ຺ຂຸນາ ກຕິສຸ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ວິສ຺ສຊ຺ຊນາ – ປາຣິວາສິເກນ ຠນ຺ເຕ ຠິກ຺ຂຸນາ ຈຕຸນວຸຕິຍາ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ປຸຈ຺ຉາ – ປາຣິວາສິກໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ປາຣິວາສິກໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ເອກາ ອາປຕ຺ຕິ.

໓. ສມຸຈ຺ຈຍກ຺ຂນ຺ຘກ

ປຸຈ຺ຉາ – ສມຸຈ຺ຈຍໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ສມຸຈ຺ຈຍໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ເອກາ ອາປຕ຺ຕິ.

໔. ສມຖກ຺ຂນ຺ຘກ

ປຸຈ຺ຉາ – ອສມ຺ມຸຂີຠູຕານໍ ອາວຸໂສ ຠິກ຺ຂູນໍ ຕຊ຺ຊນີຍໍ ວາ ນິຍສ຺ສໍ ວາ ປພ຺ພາຊນີຍໍ ວາ ປຏິສາຣຓີຍໍ ວາ ອຸກ຺ເຂປນີຍໍ ວາ ກມ຺ມໍ ກໂຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອສມ຺ມຸຂີຠູຕານໍ ຠິກ຺ຂູນໍ ກມ຺ມໍ ອກໍສຸ ຕຊ຺ຊນີຍມ຺ປິ ນິຍສ຺ສມ຺ປິ ປພ຺ພາຊນີຍມ຺ປິ ປຏິສາຣຓີຍມ຺ປິ ອຸກ຺ເຂປນີຍມ຺ປິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ສຕິເວປຸລ຺ລປຕ຺ຕສ຺ສ ອາວຸໂສ ຠິກ຺ຂຸໂນ ສຕິວິນຍໍ ທານໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ເມຕ຺ຕິຍຠູມຊເກ ຠິກ຺ຂູ ອາຣພ຺ຠ ອນຸຎ຺ຎາຕໍ ເມຕ຺ຕິຍຠູມຊກາ ຠນ຺ເຕ ຠິກ຺ຂູ ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ອມູລິກາຍ ສີລວິປຕ຺ຕິຍາ ອນຸທ຺ຘໍເສສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ກຕິປນາວຸໂສ ເອຕ຺ຖ ຘມ຺ມິການິ ສຕິວິນຍທານານິ.

ວິສ຺ສຊ຺ຊນາ – ປຎ຺ຈິມານິ ຠນ຺ເຕ ຘມ຺ມິການິ ສຕິວິນຍສ຺ສ ທານານິ, ສຸທ຺ໂຘ ໂຫຕິ ຠິກ຺ຂຸ ອນາປຕ຺ຕິໂກ, ອນຸວທນ຺ຕິ ຈ ນໍ, ຍາຈຕິ ຈ, ຕສ຺ສ ສງ຺ໂຆ ສຕິວິນຍໍ ເທຕິ ຘມ຺ເມນ ສມຄ຺ເຄນ, ອິມານິ ໂຂ ຠນ຺ເຕ ປຎ຺ຈ ຘມ຺ມິການິ ສຕິ ວິນຍສ຺ສ ທານານິ.

ປຸຈ຺ຉາ – ອມູຬ຺ຫສ຺ສ ອາວຸໂສ ຠິກ຺ຂຸໂນ ອມູຬ຺ຫວິນຍໍ ທາຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ຄຄ຺ຄໍ ຠິກ຺ຂຸໍ ອຸມ຺ມຕ຺ຕເກນ ຈິຕ຺ຕວິປຣິຍາສກເຕນ ອຊ຺ຌາຈິຓ຺ເຓນ ອາປຕ຺ຕິຍາ ໂຈເທສຸໍ ‘‘ສຣຕາ ຍສ຺ມາ ເອວຣູປິໍ ອາປຕ຺ຕິໍ ອາປຊ຺ຊິຕາ’’ຕິ, ໂສ ເອວໍ ວເທຕິ ‘‘ອຫໍ ໂຂ ອາວຸໂສ ອຸມ຺ມຕ຺ຕໂກ ອໂຫສິ ຈິຕ຺ຕວິປຣິຍາສກໂຕ, ເຕນ ເມ ອຸມ຺ມຕ຺ຕເກນ ຈິຕ຺ຕວິປຣິຍາສກເຕນ ພຫຸໍ ອສ຺ສາມຓກໍ ອຊ຺ຌາຈິຓ຺ຓໍ ຠາສິຕປຣິກ຺ກນ຺ຕໍ, ນາຫໍ ຕໍ ສຣາມິ, ມູຬ຺ເຫນ ເມ ເອຕໍ ກຕ’’ນ຺ຕິ. ເອວມ຺ປິ ນໍ ວຸຈ຺ຈມານາ ໂຈເທນ຺ເຕວ ‘‘ສຣຕາ ຍສ຺ມາ ເອວຣູປິໍ ອາປຕ຺ຕິໍ ອາປຊ຺ຊິຕາ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ກຕິ ອາວຸໂສ ອຘມ຺ມິການິ ອມູຬ຺ຫວິນຍສ຺ສ ທານານິ, ວິຠຊິຕ຺ວາ ກເຖຫິ.

ວິສ຺ສຊ຺ຊນາ – ຕີຓິ ຠນ຺ເຕ ອຘມ຺ມິການິ ອມູຬ຺ຫວິນຍສ຺ສ ທານານິ, ອິຘ ຠນ຺ເຕ ຠິກ຺ຂຸ ອາປຕ຺ຕິໍ ອາປນ຺ໂນ ໂຫຕິ, ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ ‘‘ສຣຕາຍສ຺ມາ ເອວຣູປິໍ ອາປຕ຺ຕິໍ ອາປຊ຺ຊິຕາ’’ຕິ, ໂສ ສຣມາໂນວ ເອວໍ ວເທຕິ ‘‘ນ ໂຂ ອຫໍ ອາວຸໂສ ສຣາມິ ເອວຣູປິໍ ອາປຕ຺ຕິໍ ອາປຊ຺ຊິຕາ’’ຕິ. ອຎ຺ໂຎ ສຣມາໂນວ ເອວໍ ວເທຕິ ‘‘ສຣາມິ ໂຂ ອຫໍ ອາວຸໂສ ຍຖາ ສຸປິນນ຺ເຕນາ’’ຕິ. ອຎ຺ໂຎ ອນຸມ຺ມຕ຺ຕໂກວ ອຸມ຺ມຕ຺ຕກາລຍໍ ກໂຣຕິ ‘‘ອຫມ຺ປິ ໂຂ ເອວໍ ກໂຣມິ, ຕຸມ຺ເຫປິ ເອວໍ ກໂຣຖ, ມຍ຺ຫມ຺ປິ ເອຕໍ ກປ຺ປຕິ, ຕຸມ຺ຫາກມ຺ເປຕໍ ກປ຺ປຕີ’’ຕິ. ເອສໍ ສງ຺ໂຆ ອມູຬ຺ຫວິນຍໍ ເທຕິ, ອຘມ຺ມິກໍ ຠນ຺ເຕ ອມູຬ຺ຫວິນຍສ຺ສ ທານໍ. ອິມານິ ໂຂ ຠນ຺ເຕ ຕີຓິ ອຘມ຺ມິການິ ອມູຬ຺ຫວິນຍສ຺ສ ທານານິ.

ປຸຈ຺ຉາ – ກຕິ ອາວຸໂສ ຘມ຺ມິການິ ອມູຬ຺ຫວິນຍສ຺ສ ທານານິ, ວິຠຊິຕ຺ວາ ກເຖຫິ.

ວິສ຺ສຊ຺ຊນາ – ຕີຓິ ຠນ຺ເຕ ຘມ຺ມິການິ ອມູຬ຺ຫວິນຍສ຺ສ ທານານິ, ອິຘ ຠນ຺ເຕ ຠິກ຺ຂຸ ອຸມ຺ມຕ຺ຕໂກ ໂຫຕິ ຈິຕ຺ຕວິປຣິຍາສກໂຕ ເຕນ ອຸມ຺ມຕ຺ຕເກນ ຈິຕ຺ຕວິປຣິຍາສກເຕນ ພຫຸໍ ອສ຺ສາມຓກໍ ອຊ຺ຌາຈິຓ຺ຓໍ ໂຫຕິ ຠາສິຕປຣິກ຺ກນ຺ຕໍ, ຕເມນໍ ໂຈເທຕິ ສງ຺ໂຆ ວາ ສມ຺ພຫຸລາ ວາ ເອກປຸຄ຺ຄໂລ ວາ ‘‘ສຣຕາຍສ຺ມາ ເອວຣູປິໍ ອາປຕ຺ຕິໍ ອາປຊ຺ຊິຕາ’’ຕິ, ໂສ ອສ຺ສຣມາໂນວ ເອວໍ ວເທຕິ ‘‘ນ ໂຂ ອຫໍ ອາວຸໂສ ສຣາມິ ເອວຣູປິໍ ອາປຕ຺ຕິໍ ອາປຊ຺ຊິຕາ’’ຕິ. ອຎ຺ໂຎປິ ອສ຺ສຣມາໂນວ ເອວໍ ວເທຕິ ‘‘ສຣາມິ ໂຂ ອຫໍ ອາວຸໂສ ຍຖາ ສຸປິນນ຺ເຕນາ’’ຕິ. ອຎ຺ໂຎປິ ອຸມ຺ມຕ຺ຕໂກວ ອຸມ຺ມຕ຺ຕກາລຍໍ ກໂຣຕິ ‘‘ອຫມ຺ປິ ເອວໍ ກໂຣມິ, ຕຸມ຺ເຫປິ ເອວໍ ກໂຣຖ, ມຍ຺ຫມ຺ປິ ເອຕໍ ກປ຺ປຕິ, ຕຸມ຺ຫາກມ຺ເປຕໍ ກປ຺ປຕີ’’ຕິ. ເອສໍ ຠນ຺ເຕ ຕິຓ຺ຓໍ ຠິກ຺ຂູນໍ ສງ຺ໂຆ ອມູຬ຺ຫວິນຍໍ ເທຕິ, ຘມ຺ມິກໍ ຠນ຺ເຕ ອມູຬ຺ຫວິນຍສ຺ສ ທານໍ. ອິມານິ ໂຂ ຠນ຺ເຕ ຕີຓິ ຘມ຺ມິການິ ອມູຬ຺ຫວິນຍສ຺ສ ທານານິ.

ປຸຈ຺ຉາ – ອປ຺ປຏິຎ຺ຎາຍ ອາວຸໂສ ຠິກ຺ຂູນໍ ຕຊ຺ຊນີຍາທີນິ ກມ຺ມານິ ກໂຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອປ຺ປຏິຎ຺ຎາຍ ຠິກ຺ຂູນໍ ກມ຺ມານິ ອກໍສຸ ຕຊ຺ຊນີຍາທີນິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກຖໍ ອາວຸໂສ ອຘມ຺ມິກໍ ໂຫຕິ ປຏິຎ຺ຎາຕກຣຓໍ.

ວິສ຺ສຊ຺ຊນາ – ອຎ຺ຎຖາ ຠນ຺ເຕ ອາປຕ຺ຕິໍ ອາປຊ຺ຊນ຺ຕສ຺ສ ອຎ຺ຎຖາ ປຏິຊານນ຺ຕສ຺ສ ຍຖາ ໂສ ປຏິຊານາຕິ, ຕຖາ ສງ຺ໂຆ ກາເຣຕິ, ເອວໍ ໂຂ ຠນ຺ເຕ ອຘມ຺ມິກໍ ໂຫຕິ ປຏິຎ຺ຎາຕກຣຓໍ.

ປຸຈ຺ຉາ – ກຖໍ ອາວຸໂສ ຘມ຺ມິກໍ ໂຫຕິ ປຏິຎ຺ຎາຕກຣຓໍ.

ວິສ຺ສຊ຺ຊນາ – ຍໍ ຠນ຺ເຕ ອາປຕ຺ຕິໍ ອາປຊ຺ຊນ຺ຕສ຺ສ ຕເມວ ປຏິຊານນ຺ຕສ຺ສ ເຕເນວ ສງ຺ໂຆ ກາເຣຕິ, ເອວໍ ໂຂ ຠນ຺ເຕ ຘມ຺ມິກໍ ປຏິຎ຺ຎາຕກຣຓໍ.

ປຸຈ຺ຉາ – ເຍຠຸຍ຺ຍສິກາຍ ອາວຸໂສ ອຘິກຣຓໍ ວູປສເມຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ຠຓ຺ຑນຊາຕາ ກລຫຊາຕາ ວິວາທາປນ຺ນາ ອຎ຺ຎມຎ຺ຎໍ ມຸຂສຕ຺ຕີຫິ ວິຕຸທນ຺ຕາ ວິຫຣິໍສຸ, ນ ສກ຺ໂກນ຺ຕິ ຕໍ ອຘິກຣຓໍ ວູປສເມຕຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ກຖໍ ອາວຸໂສ ອຘິກຣຓໍ ເຍຠຸຍ຺ຍສິກາຍ ວູປສເມຕພ຺ພໍ.

ວິສ຺ສຊ຺ຊນາ – ປຎ຺ຈຫິ ຠນ຺ເຕ ອງ຺ເຄຫິ ສມນ຺ນາຄໂຕ ຠິກ຺ຂຸ ສລາກຄ຺ຄາຫາປໂກ ສມ຺ມນ຺ນິຕພ຺ໂພ, ເຕນ ຠນ຺ເຕ ສລາກຄ຺ຄາຫາປເກນ ສລາກາ ຄາຫາຕພ຺ພາ ຍຖາ ພຫຸຕຣາ ຠິກ຺ຂູ ຘມ຺ມວາທິໂນ ວທນ຺ຕິ ຕຖາ ຕໍ ອຘິກຣຓໍ ວູປສເມຕພ຺ພໍ, ເອວໍ ໂຂ ຠນ຺ເຕ ເຍຠຸຍ຺ຍສິກາຍ ອຘິກຣຓໍ ວູປສເມຕພ຺ພໍ.

ປຸຈ຺ຉາ – ກຕິ ອາວຸໂສ ອຘມ຺ມິກາ ສລາກຄ຺ຄາຫາ.

ວິສ຺ສຊ຺ຊນາ – ທສ ຠນ຺ເຕ ອຘມ຺ມິກາ ສລາກຄ຺ຄາຫາ, ໂອຣມຕ຺ຕກຎ຺ຈ ອຘິກຣຓໍ ໂຫຕິ, ນ ຈ ຄຕິຄຕໍ ໂຫຕິ, ນ ຈ ສຣິຕສາຣິຕໍ ໂຫຕິ, ຊານາຕິ ‘ອຘມ຺ມວາທີ ພຫຸຕຣາ’ຕິ, ອປ຺ເປວ ນາມ ອຘມ຺ມວາທີ ພຫຸຕຣາ ອສ຺ສູຕິ, ຊານາຕິ ‘ສງ຺ໂຆ ຠິຊ຺ຊິສ຺ສຕີ’ຕິ, ອປ຺ເປວ ນາມ ສງ຺ໂຆ ຠິຊ຺ເຊຍ຺ຍາຕິ, ອຘມ຺ເມນ ຄຓ຺ຫນ຺ຕິ, ວຄ຺ຄາ ຄຓ຺ຫນ຺ຕິ, ນ ຈ ຍຖາທິຏ຺ຐິຍາ ຄຓ຺ຫນ຺ຕິ, ອິເມ ໂຂ ຠນ຺ເຕ ທສ ອຘມ຺ມິກາ ກລາກຄ຺ຄາຫາ.

ປຸຈ຺ຉາ – ກຕິ ອາວຸໂສ ຘມ຺ມິກາ ສລາກຄ຺ຄາຫາ.

ວິສ຺ສຊ຺ຊນາ – ທສ ຠນ຺ເຕ ຘມ຺ມິກາ ສລາກຄ຺ຄາຫາ ວຸຕ຺ຕວິປຣິຍາເຍນ.

ປຸຈ຺ຉາ – ປາປຸສ຺ສນ຺ນສ຺ສ ອາວຸໂສ ຠິກ຺ຂຸສ຺ສ ຕສ຺ສ ປາປິຍສິກາ ກມ຺ມໍ ກາຕຸໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອຸປວາຬໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຸປວາໂຬ ຠນ຺ເຕ ຠິກ຺ຂຸ ສງ຺ຆມຊ຺ເຌ ອາປຕ຺ຕິຍາ ອນຸຍຸຎ຺ຊິຍມາໂນ ອວຊານິຕ຺ວາ ປຏິຊານາຕິ, ປຏິຊານິຕ຺ວາ ອວຊານາຕິ, ອຎ຺ເຎນຎ຺ຎໍ ປຏິຈຣຕິ, ສມ຺ປຊານມຸສາ ຠາສຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກຕິ ອາວຸໂສ ຘມ຺ມິການິ ຕສ຺ສປາປິຍສິກາ ກມ຺ມສ຺ສ ກຣຓານິ.

ວິສ຺ສຊ຺ຊນາ – ປຎ຺ຈິມານິ ຠນ຺ເຕ ຘມ຺ມິການິ ຕສ຺ສປາປິຍສິກາ ກມ຺ມສ຺ສ ກຣຓານິ. ອສຸຈິ ຈ ໂຫຕິ, ອລຊ຺ຊີ ຈ, ສານຸວາໂທ ຈ, ຕສ຺ສ ສງ຺ໂຆ ຕສ຺ສປາປິຍສິກາ ກມ຺ມໍ ກໂຣຕິ ຘມ຺ເມນ ສມຄ຺ເຄນ, ອິມານິ ໂຂ ຠນ຺ເຕ ປຎ຺ຈ ຘມ຺ມິການິ ຕສ຺ສ ປາປິຍສິກາ ກມ຺ມສ຺ສ ກຣຓານິ.

ປຸຈ຺ຉາ – ຕສ຺ສ ປາປິຍສິກາກມ຺ມກເຕນ ອາວຸໂສ ຠິກ຺ຂຸນາ ກຕິສຸ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ວິສ຺ສຊ຺ຊນາ – ຕສ຺ສ ປາປິຍສິກາກມ຺ມກເຕນ ຠນ຺ເຕ ຠິກ຺ຂຸນາ ອຏ຺ຐາຣສສຸ ວຕ຺ເຕສຸ ສມ຺ມາ ວຕ຺ຕິຕພ຺ພໍ. ນ ອຸປສມ຺ປາເທຕພ຺ພໍ, ນ ນິສ຺ສໂຍ ທາຕພ຺ໂພ, ນ ສາມເຓໂຣ ອຸປຏ຺ຐາເປຕພ຺ໂພ, ເອວມາທີສຸ ຠນ຺ເຕ ອຏ຺ຐາຣສສຸ ວຕ຺ເຕສຸ ສມ຺ມາ ວຕ຺ຕິຕພ຺ພໍ.

ປຸຈ຺ຉາ – ກຕິ ອາວຸໂສ ອຘິກຣຓານິ ສມເຖຫິ ວູປສເມຕພ຺ພານິ.

ວິສ຺ສຊ຺ຊນາ – ຈຕ຺ຕາຣິມານິ ຠນ຺ເຕ ອຘິກຣຓານິ ສມເຖຫິ ວູປສເມຕພ຺ພານິ, ວິວາທາຘິກຣຓໍ ອນຸວາທາຘິກຣຓໍ ອາປຕ຺ຕາຘິກຣຓໍ ກິຈ຺ຈາຘິກຣຓໍ, ອິມານິ ຠນ຺ເຕ ຈຕ຺ຕາຣິ ອຘິກຣຓານິ ສມເຖຫິ ວູປສເມຕພ຺ພານິ.

ປຸຈ຺ຉາ – ກິໍ ອາວຸໂສ ວິວາທາຘິກຣຓສ຺ສ ມູລໍ.

ວິສ຺ສຊ຺ຊນາ – ຉ ຠນ຺ເຕ ວິວາທມູລານິ ວິວາທາຘິກຣຓສ຺ສ ມູລໍ, ຕີຓິປິ ອກຸສລມູລານິ ວິວາທາຘິກຣຓສ຺ສ ມູລໍ, ຕີຓິປິ ກຸສລມູລານິ ວິວາທາຘິກຣຓສ຺ສ ມູລໍ, ອິທໍ ຠນ຺ເຕ ວິວາທາຘິກຣຓສ຺ສ ມູລໍ.

ປຸຈ຺ຉາ – ກິໍ ປນາວຸໂສ ອນຸວາທາຘິກຣຓສ຺ສ ມູລໍ.

ວິສ຺ສຊ຺ຊນາ – ຉ ຠນ຺ເຕ ອນຸວາທມູລານິ ອນຸວາທາຘິກຣຓສ຺ສ ມູລໍ, ຕີຓິປິ ອກຸສລມູລານິ ອນຸວາທາຘິກຣຓສ຺ສ ມູລໍ, ຕີຓິປິ ກຸສລມູລານິ ອນຸວາທາຘິກຣຓສ຺ສ ມູລໍ, ກາໂຍປິ ອນຸວາທາຘິກຣຓສ຺ສ ມູລໍ, ວາຈາປິ ອນຸວາທາຘິກຣຓສ຺ສ ມູລໍ, ອິທໍ ໂຂ ຠນ຺ເຕ ອນຸວາທາຘິກຣຓສ຺ສ ມູລໍ.

ປຸຈ຺ຉາ – ກິໍ ປນາວຸໂສ ອາປຕ຺ຕາຘິກຣຓສ຺ສ ມູລໍ.

ວິສ຺ສຊ຺ຊນາ – ຉ ຠນ຺ເຕ ອາປຕ຺ຕິສມຸຏ຺ຐານາ ອາປຕ຺ຕາຘິກຣຓສ຺ສ ມູລໍ, ອຕ຺ຕິ ຠນ຺ເຕ ອາປຕ຺ຕິ ກາຍໂຕ ສມຸຏ຺ຐາຕິ ນ ວາຈໂຕ ນ ຈິຕ຺ຕໂຕ, ອຕ຺ຖິ ຠນ຺ເຕ ອາປຕ຺ຕິ ວາຈໂຕ ສມຸຏ຺ຐາຕິ ນ ກາຍໂຕ ນ ຈິຕ຺ຕໂຕ, ອຕ຺ຖິ ຠນ຺ເຕ ອາປຕ຺ຕິ ກາຍໂຕ ຈ ວາຈໂຕ ຈ ສມຸຏ຺ຐາຕິ ນ ຈິຕ຺ຕໂຕ, ອຕ຺ຖິ ຠນ຺ເຕ ອາປຕ຺ຕິ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ ນ ວາຈໂຕ, ອຕ຺ຖິ ຠນ຺ເຕ ອາປຕ຺ຕິ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ ນ ກາຍໂຕ, ອຕ຺ຖິ ຠນ຺ເຕ ອາປຕ຺ຕິ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ອິມານິ ຠນ຺ເຕ ຉ ອາປຕ຺ຕິ ສມຸຏ຺ຐານານິ ອາປຕ຺ຕາຘິກຣຓສ຺ສ ມູລໍ.

ປຸຈ຺ຉາ – ກິໍ ປນາວຸໂສ ກິຈ຺ຈາຘິກຣຓສ຺ສ ມູລໍ.

ວິສ຺ສຊ຺ຊນາ – ກິຈ຺ຈາຘິກຣຓສ຺ສ ຠນ຺ເຕ ເອກໍ ມູລໍ ສງ຺ໂຆ.

ປຸຈ຺ຉາ – ສມຖໍ ອາວຸໂສ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ສມຖໍ ຠນ຺ເຕ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ທ຺ເວ ອາປຕ຺ຕິໂຍ.

໕. ຂຸທ຺ທກວຕ຺ຖຸກ຺ຂນ຺ຘກ

ປຸຈ຺ຉາ – ນຫາຍນ຺ເຕນ ອາວຸໂສ ຠິກ຺ຂຸນາ ຣຸກ຺ເຂ ວາ ຖມ຺ເຠ ວາ ກຸຏ຺ເຏ ວາ ກາຍໍ ອຸຄ຺ຆໍເສນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ນຫາຍມານາ ຣຸກ຺ເຂປິ ຖມ຺ເຠປິ ກຸຏ຺ເຏປິ ກາຍໍ ອຸຄ຺ຆໍເສສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຄນ຺ຘພ຺ພຫຕ຺ຖເກນ ວາ ອາວຸໂສ ກຸຣຸວິນ຺ທກສຸຕ຺ຕິຍາ ວາ ມລ຺ລເກນ ວາ ນຫາຍນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍວ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ຄນ຺ຘພ຺ພຫຕ຺ຖເກນປິ ກຸຣຸວິນ຺ທກສຸຕ຺ຕິຍາປິ ມລ຺ລເກນປິ ນຫາຍິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ປາຓິນາ ອາວຸໂສ ປຣິກມ຺ມໍ ກາຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ປິຏ຺ຐິປຣິກມ຺ມໍ ກາຕຸໍ ກຸກ຺ກຸຈ຺ຈາຍິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ວລ຺ລິກໍ ວາ ອາວຸໂສ ປາມງ຺ຄໍ ວາ ກຓ຺ຐສຸຕ຺ຕກໍ ວາ ກຏິສຸຕ຺ຕກໍ ວາ ໂອວຏ຺ຏິກໍ ວາ ກາຍຸຣໍ ວາ ຫຕ຺ຖາຠຣຓໍ ວາ ອງ຺ຄຸລິມຸທ຺ທິກໍ ວາ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ວລ຺ລິກາທີນິ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ທີເຆ ອາວຸໂສ ເກເສ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ທີເຆ ເກເສ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ໂກຈ຺ເຉນວາ ອາວຸໂສ ຜຓເກນວາ ຫຕ຺ຖຜຓເກນວາ ເກເສ ໂອສຓ຺ເຐນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍວ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ໂກຈ຺ຉາທີຫິ ເກເສ ໂອສຓ຺ເຐສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອາທາເສ ວາ ອາວຸໂສ ອຸທກປຕ຺ເຕ ວາ ມຸຂນິມິຕ຺ຕໍ ໂອໂລເກນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍວ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອາທາເສປິ ອຸທກປຕ຺ເຕປິ ມຸຂນິມິຕ຺ຕໍ ໂອໂລເກສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອາພາຘປຈ຺ຈຍາ ປນາວຸໂສ ອາທາເສ ວາ ອຸທກປຕ຺ເຕ ວາ ມຸຂນິມິຕ຺ຕໍ ໂອໂລເກຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ອນຸຎ຺ຎາຕໍ, ຠຄວຕິ ຠນ຺ເຕ ຣາຊຄເຫ ວິຫຣຕິ ອຎ຺ຎຕຣສ຺ສ ຠິກ຺ຂຸໂນ ມຸເຂ ວໂຓ ອໂຫສິ, ໂສ ຠິກ຺ຂູ ເອຕທໂວຈ ‘‘ກີທິໂສ ເມ ອາວຸໂສ ວໂຓ’’ຕິ, ຠິກ຺ຂູ ເອວມາຫໍສຸ ‘‘ເອທິໂສ ເຕ ອາວຸໂສ ວໂຓ’’ຕິ, ໂສ ນ ສທ຺ທຫຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ມຸຂາເລປນາທີນິ ອາວຸໂສ ກໂຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ມຸຂາເລປນາທີນິ ອກໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ນຈ຺ຈໍ ວາ ອາວຸໂສ ຄີຕໍ ວາ ວາທິຕໍ ວາ ທສ຺ສນາຍ ຄຈ຺ຉນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ນຈ຺ຈມ຺ປິ ຄີຕມ຺ປິ ວາທິຕມ຺ປິ ທສ຺ສນາຍ ຄຈ຺ຉິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກຖໍ ອາວຸໂສ ນຈ຺ຈາທີນິ ປສ຺ສນ຺ຕສ຺ສ ອາປຕ຺ຕິ ໂຫຕິ, ກຖໍ ປນ ອນາປຕ຺ຕິ.

ວິສ຺ສຊ຺ຊນາ – ນຈ຺ຈໍ ວາ ຠນ຺ເຕ ຄີຕໍ ວາ ວາທິຕໍ ວາ ທສ຺ສນາຍ ຄຈ຺ຉຕິ ອາປຕ຺ຕິ ທຸກ຺ກຏສ຺ສ, ຍຕ຺ຖ ຐິໂຕ ປສ຺ສຕິ ວາ ສຸຓາຕິ ວາ ອາປຕ຺ຕິ ທຸກ຺ກຏສ຺ສ, ທສ຺ສນູປຈາຣໍ ວິຊຫິຕ຺ວາ ປຸນປ຺ປຸນໍ ປສ຺ສຕິ ອາປຕ຺ຕິ ທຸກ຺ກຏສ຺ສ, ອາຣາເມ ຐິຕສ຺ສ ປສ຺ສໂຕ ອນາປຕ຺ຕິ, ວິຫາຣໂຕ ປນ ວິຫາຣໍ ປສ຺ສິສ຺ສາມີຕິ ຄຈ຺ຉໂຕ ອາປຕ຺ຕິເຍວ, ຍຕ຺ຖ ຐິໂຕ ປສ຺ສຕິ ວາ ສຸຓາຕິ ວາ ອາປຕ຺ຕິ ທຸກ຺ກຏສ຺ສ, ອາສນສາລາຍ ນິສິນ຺ໂນ ປສ຺ສຕິ ອນາປຕ຺ຕິ, ປສ຺ສິສ຺ສາມີຕິ ວຸຏ຺ຐຫິຕ຺ວາ ຄຈ຺ຉຕິ ອາປຕ຺ຕິ ທຸກ຺ກຏສ຺ສ, ຍຕ຺ຖ ຐິໂຕ ປສ຺ສຕິ ວາ ສຸຓາຕິ ວາ ອາປຕ຺ຕິ ທຸກ຺ກຏສ຺ສ, ປຕິປຖໍ ຄຈ຺ຉນ຺ໂຕ ປສ຺ສຕິ ອນາປຕ຺ຕິ, ຄີວໍ ປຣິວຕ຺ເຕຕ຺ວາ ປສ຺ສໂຕ ປນ ອາປຕ຺ຕິ ຠນ຺ເຕ.

ປຸຈ຺ຉາ – ອາຍຕເກນ ອາວຸໂສ ຄີຕສ຺ສເຣນ ຘມ຺ມໍ ຄາຍນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອາຍຕເກນ ຄີຕສ຺ສເຣນ ຘມ຺ມໍ ຄາຍິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ທາຣຸປຕ຺ຕໍ ອາວຸໂສ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອາຍສ຺ມນ຺ຕໍ ປິຓ຺ໂຑລຠາຣທ຺ວາຊໍ ອາຣພ຺ຠ ປຎ຺ຎຕ຺ຕໍ, ອາຍສ຺ມາ ຠນ຺ເຕ ປິຓ຺ໂຑລຠາຣທ຺ວາໂຊ ຉວສ຺ສ ທາຣຸປຕ຺ຕສ຺ສ ກາຣຓາ ຄິຫີນໍ ອຸຕ຺ຕຣິມນຸສ຺ສຘມ຺ມໍ ອິທ຺ຘິປາຏິຫາຣິຍໍ ທສ຺ເສຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ນ ຈ ຠິກ຺ຂເວ ທາຣຸປຕ຺ໂຕ ຘາເຣຕພ຺ໂພ, ໂຍ ຘາເຣຍ຺ຍ ອາປຕ຺ຕິ ທຸກ຺ກຏສ຺ສ –

ປຸຈ຺ຉາ – ຠຄວຕາ ອາວຸໂສ ອຸຈ຺ຈາວເຈ ປຕ຺ເຕ ປຏິກ຺ຂິປິຕ຺ວາ ອໂຍ ປຕ຺ໂຕ ຠູມິປຕ຺ໂຕຕິ ອິເມເຍວ ທ຺ເວ ປຕ຺ຕາ ກຕ຺ຖ ອນຸຎ຺ຎາຕາ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕາ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ອນຸຎ຺ຎາຕາ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອຸຈ຺ຈາວເຈ ປຕ຺ເຕ ຘາເຣສຸໍ ໂສວຓ຺ຓມຍາ ຣູປິຍມຍາ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ປຸຈ຺ຉາ – ໂສທກໍ ອາວຸໂສ ປຕ຺ຕໍ ປຏິສາເມນ຺ຕສ຺ສ ຈ ໂອຕາເປນ຺ຕສ຺ສຈ ອຸຓ຺ເຫ ປຕ຺ຕໍ ນິທຫນ຺ຕສ຺ສ ຈ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ໂສທກໍ ປຕ຺ຕໍ ປຏິສາເມສຸໍ, ໂອຕາເປສຸໍ, ອຸຓ຺ເຫ ປຕ຺ຕໍ ນິທຫິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຉວສີສປຕ຺ຕໍ ອາວຸໂສ ຘາເຣນ຺ຕສ຺ສ ຈ ສພ຺ພປໍສຸກູລິກສ຺ສ ຈ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ສພ຺ພປໍສຸກູລິໂກ ອໂຫສິ, ໂສ ຉວສີສສ຺ສ ປຕ຺ຕໍ ຘາເຣສິ, ອຎ຺ຎຕຣາ ອິຕ຺ຖີ ປສ຺ສິຕ຺ວາ ຠີຕາ ວິສ຺ສຣມກາສິ ‘‘ອຠຸໍ ເມ ປິສາໂຈ ວຕາຍ’’ນ຺ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຈລການິ ວາ ອາວຸໂສ ອຏ຺ຐິການິ ວາ ອຸຈ຺ຉິຏ຺ໂຐທກໍ ວາ ປຕ຺ເຕນ ນີຫຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ຈລການິປິ ອຏ຺ຐິການິປິ ອຸຈ຺ຉິຏ຺ໂຐ ທກມ຺ປິ ປຕ຺ເຕນ ນີຫຣິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອຸປາຫນຕ຺ຖວິກາ ອາວຸໂສ ຠຄວຕາ ກຕ຺ຖ ອນຸຎ຺ຎາຕາ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕາ.

ວິສ຺ສຊ຺ຊນາ – ອນ຺ຕຣາ ຈ ຠນ຺ເຕ ຣາຊຄຫໍ ອນ຺ຕຣາ ຈ ເວສາລິໍ ອຎ຺ຎຕຣໍ ຠິກ຺ຂຸໍ ອາຣພ຺ຠ ອນຸຎ຺ຎາຕາ, ອຎ຺ຎຕໂຣ ຠນ຺ເຕ ຠິກ຺ຂຸ ອຸປາຫນາໂຍ ກາຍພນ຺ຘເນນ ພນ຺ຘິຕ຺ວາ ຄາມໍ ປິຓ຺ຑາຍ ປາວິສິ, ອຎ຺ຎຕໂຣ ອຸປາສໂກ ຕໍ ຠິກ຺ຂຸໍ ອຠິວາເທນ຺ໂຕ ອຸປາຫນາໂຍ ສີເສນ ຆຏ຺ເຏຕິ, ໂສ ຠິກ຺ຂຸ ມງ຺ກຸ ອໂຫສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ປຸຈ຺ຉາ – ອທ຺ຘານມຄ຺ຄປ຺ປຏິປນ຺ເນນ ອາວຸໂສ ປຣິສ຺ສາວນໍ ຍາຈິຍມາເນນ ນ ທທນ຺ຕສ຺ສ ຈ ອປ຺ປຏິສ຺ສາວນເກນ ອທ຺ຘານໍ ປຏິປຊ຺ຊນ຺ຕສ຺ສ ຈ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ອນ຺ຕຣາ ຈ ຠນ຺ເຕ ຣາຊຄຫໍ ອນ຺ຕຣາ ຈ ເວສາລິໍ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ປຣິສ຺ສາວນໍ ຍາຈິຍມາໂນ ນ ອທາສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ປຸປ຺ຜາຠິກິຓ຺ເຓ ອາວຸໂສ ສຍເນ ສຍນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ປຸປ຺ຜາຠິກິຓ຺ເຓສຸ ສຍເນສຸ ສຍິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ເອກຠາຊເນ ວາ ອາວຸໂສ ຠຸຎ຺ຊນ຺ຕານໍ ເອກຖາລເກ ວາ ປິວນ຺ຕານໍ ເອກຕ຺ຖຣຓປາວຸຣຓານໍ ວາ ຕຸວຏ຺ຏານໍ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ຉພ຺ພຄ຺ຄິເຍວ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ເອກຠາຊເນປິ ຠຸຎ຺ຊິໍສຸ, ເອກຖາລເກປິ ປິວິໍສຸ, ເອກມຎ຺ຈເກປິ ຕຸວຏ຺ເຏສຸໍ, ເອກຕ຺ຖຣຓາປິ ຕຸວຏ຺ເຏສຸໍ, ເອກປາວຸຣຓາປິ ຕຸວຏ຺ເຏສຸໍ, ເອກຕ຺ຖຣຓປາວຸຣຓາປິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຈາມຣິພີຊນິໍ ອາວຸໂສ ປຏິກ຺ຂິປິຕ຺ວາ ຕິສ຺ໂສ ພີຊນິໂຍ ຠຄວຕາ ກຕ຺ຖ ອນຸຎ຺ຎາຕາ, ກິສ຺ມິຎ຺ຈ ວຕ຺ຖຸສ຺ມິໍ ອນຸຎ຺ຎາຕາ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອນຸຎ຺ຎາຕາ, ສາວຕ຺ຖິຍໍ ຠນ຺ເຕ ຠຄວຕິ ວິຫຣຕິ ສງ຺ຆສ຺ສ ຈາມຣິພີຊນີ ອຸປ຺ປນ຺ນາ ອໂຫສິ, ຠຄວໂຕ ເອຕມຕ຺ຖໍ ອາໂຣເຈສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ນ ຠິກ຺ຂເວ ຈາມຣິພີຊນີ ຘາເຣຕພ຺ພາ, ໂຍ ຘາເຣຍ຺ຍ, ອາປຕ຺ຕິ ທຸກ຺ກຏສ຺ສ. ອນຸຊານາມິ ຠິກ຺ຂເວ ຕິສ຺ໂສ ພີຊນິໂຍ ວາກມຍໍ ອຸສີຣມຍໍ ໂມຣປິຎ຺ຉາ ມຍໍ.

ປຸຈ຺ຉາ – ທີເຆ ອາວຸໂສ ນເຂ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ທີເຆ ນເຂ ຘາເຣສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກຕ຺ຕຣິກາຍ ອາວຸໂສ ເກເສ ເຉທາເປນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ກຕ຺ຕຣິກາຍ ເກເສ ຉິນ຺ທິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ທີເຆ ອາວຸໂສ ນາສິກາໂລເມ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ທີຆານິ ນາສິກາໂລມານິ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອຸຈ຺ຈາວຈາ ອາວຸໂສ ກຓ຺ຓມລຫຣຓິໂຍ ປຏິກ຺ຂິປິຕ຺ວາ ທສ ກຓ຺ຓມລຫຣຓິໂຍ ຠຄວຕາ ກຕ຺ຖ ອນຸຎ຺ຎາຕາ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕາ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ອນຸຎ຺ຎາຕາ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອຸຈ຺ຈາວຈາ ກຓ຺ຓມລຫຣຓິໂຍ ຘາເຣສຸໍ ໂສວຓ຺ຓມຍໍ ຣູປິຍມຍໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ປຸຈ຺ຉາ – ສງ຺ຆາຏິປລ຺ລຕ຺ຖິກາຍ ນິສີທນ຺ຕສ຺ສ ອາວຸໂສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ສງ຺ຆາຏິປລ຺ລຕ຺ຖິກາຍ ນິສີທິໍສຸ, ສງ຺ຆາຏິຍາ ປຕ຺ຕາ ລຸຊ຺ຊິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອກາຍພນ຺ຘເນນ ອາວຸໂສ ຄາມໍ ປວິສນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ອກາຍພນ຺ຘໂນ ຄາມໍ ປິຓ຺ຑາຍ ປາວິສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຄິຫິນິວຕ຺ຖໍ ອາວຸໂສ ນິວາເສນ຺ຕສ຺ສ ຈ, ຄິຫິປາຣຸຕໍ ປາຣຸປນ຺ຕສ຺ສ ຈ, ສໍເວລ຺ລິຍໍ ນິວາເສນ຺ຕສ຺ສ ຈ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ຄິຫິນິວຕ຺ຖໍ ນິວາສິໍສຸ, ຄິຫິປາຣຸຕມ຺ປິ ປາຣຸປິໍສຸ, ສໍເວລ຺ລິຍມ຺ປິ ນິວາສິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອຸຠໂຕ ກາຊໍ ອາວຸໂສ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອຸຠໂຕ ກາຊໍ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ໂລກາຍຕໍ ອາວຸໂສ ປຣິຍາປຸຓນ຺ຕສ຺ສ ຈ ວາເຈນ຺ຕສ຺ສ ຈ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.