໑໐. ຠິກ຺ຂຸນິກ຺ຂນ຺ຘກ

ປຸຈ຺ຉາ – ອຏ຺ຐຫິ ອາວຸໂສ ຄຣຸຘມ຺ເມຫິ ອຸປສມ຺ປທາ ຠຄວຕາ ກຕ຺ຖ ອນຸຎ຺ຎາຕາ, ກສ຺ສ ອນຸຎ຺ຎາຕາ, ກິສ຺ມິຎ຺ຈ ວຕ຺ຖຸສ຺ມິໍ ອນຸຎ຺ຎາຕາ.

ວິສ຺ສຊ຺ຊນາ – ເວສາລິຍໍ ຠນ຺ເຕ ມຫາປຊາປຕິຍາ ໂຄຕມິຍາ ອນຸຎ຺ຎາຕາ, ມຫາປຊາປຕິ ຠນ຺ເຕ ໂຄຕມີ ສູເນຫິ ປາເທຫິ ຣໂຊກິຓ຺ເຓນ ຄຕ຺ເຕນ ທຸກ຺ຂີ ທຸມ຺ມນາ ອສ຺ສຸມຸຂີ ຣຸທມານາ ພຫິທ຺ວາຣໂກຏ຺ຐເກ ອຏ຺ຐາສິ, ອຖ ໂຂ ຠນ຺ເຕ ອາຍສ຺ມາ ອານນ຺ໂທ ມຫາປຊາປຕິໍ ໂຄຕມິໍ ຕໍ ກາຣຓໍ ປຸຈ຺ຉິຕ຺ວາ ຠຄວນ຺ຕໍ ຈຕຸກ຺ຂຕ຺ຕຸໍ ຍາຈິ ມາຕຸຄາມສ຺ສ ຕຖາຄຕປ຺ປເວທິເຕ ຘມ຺ມວິນເຍ ອາຄາຣສ຺ມາ ອນາຄາຣິຍໍ ປພ຺ພຊ຺ຊໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ປຸຈ຺ຉາ – ຠິກ຺ຂູຫິ ອາວຸໂສ ຠິກ຺ຂຸນິໂຍ ອຸປສມ຺ປາເທຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ມຫາປຊາປຕິໍ ໂຄຕມິໍ ອາຣພ຺ຠ ອນຸຎ຺ຎາຕໍ, ມຫາປຊາປຕິ ຠນ຺ເຕ ໂຄຕມີ ຠຄວນ຺ຕໍ ເອຕທໂວຈ ‘‘ກຖາຫໍ ຠນ຺ເຕ ອິມາສຸ ສາກິຍານີສຸ ປຏິປຊ຺ຊາມີ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ເອກໂຕ ອຸປສມ຺ປນ຺ນາຍ ອາວຸໂສ ຠິກ຺ຂຸນິສງ຺ເຆ ວິສຸທ຺ຘາຍ ຠິກ຺ຂຸສງ຺ເຆ ອຸປສມ຺ປາເທຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ຠິກ຺ຂຸນີນໍ ອນ຺ຕຣາຍິເກ ຘມ຺ເມ ປຸຈ຺ຉິໍສຸ, ອຸປສມ຺ປທາເປກ຺ຂາໂຍ ວິຕ຺ຖາຍິໍສຸ, ມງ຺ກູ ອເຫສຸໍ, ນ ສກ຺ຂິໍສຸ ວິສ຺ສຊ຺ເຊຕຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ຠິກ຺ຂຸນິກ຺ຂນ຺ຘກໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ຠິກ຺ຂຸນິກ຺ຂນ຺ຘກໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ທ຺ເວ ອາປຕ຺ຕິໂຍ.