໒. ອຸໂປສຖກ຺ຂນ຺ຘກ

ປຸຈ຺ຉາ – ຈາຕຸທ຺ທເສ ຈ ອາວຸໂສ ປນ຺ນຣເສ ຈ ປກ຺ຂສ຺ສ ຈ ອຏ຺ຐມິຍາ ສນ຺ນິປຕິຕ຺ວາ ຘມ຺ມໍ ຠາສິຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕາ, ສມ຺ພຫຸລາ ຠນ຺ເຕ ຠິກ຺ຂູ ຈາຕຸທ຺ເທສ ປນ຺ນຣເສ ອຏ຺ຐມິຍາ ຈ ປກ຺ຂສ຺ສ ສນ຺ນິປຕິຕ຺ວາ ຕຸຓ຺ຫີ ນິສີທິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ອນຸຊານາມິ ຠິກ຺ຂເວ ຈາຕຸທ຺ທເສ ປນ຺ນຣເສ ອຏ຺ຐມິຍາ ຈ ປກ຺ຂສ຺ສ ສນ຺ນິປຕິຕຸໍ.

ນນຸ ນາມ ສນ຺ນິປຕິເຕຫິ ຘມ຺ໂມ ຠາສິຕພ຺ໂພ.

ປຸຈ຺ຉາ – ກທາ ອາວຸໂສ ຠິກ຺ຂູນໍ ປາຕິໂມກ຺ຂຸທ຺ເທໂສ ຠຄວຕາ ອນຸຎ຺ຎາໂຕ.

ວິສ຺ສຊ຺ຊນາ – ຍທາ ຠນ຺ເຕ ຠຄວໂຕ ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ ‘‘ຍໍນູນາຫໍ ຍານິ ມຍາ ຠິກ຺ຂູນໍ ປຎ຺ຎຕ຺ຕານິ ສິກ຺ຂາປທານິ, ຕານິ ເນສໍ ປາຕິໂມກ຺ຂຸທ຺ເທສໍ ອນຸຊາເນຍ຺ຍໍ, ໂສ ເນສໍ ຠວິສ຺ສຕິ ອຸໂປສຖກມ຺ມ’’ນ຺ຕິ ຕທາ ຠນ຺ເຕ ຠຄວຕາ ຠິກ຺ຂູນໍ ປາຕິໂມກ຺ຂຸທ຺ເທໂສ ອນຸຎ຺ຎາໂຕ.

ປຸຈ຺ຉາ – ສີມໍ ອາວຸໂສ ສມ຺ມນິຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກິສ຺ມິຎ຺ຈ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອນຸຎ຺ຎາຕໍ, ຣາຊຄເຫ ຠນ຺ເຕ ຠຄວຕິ ວິຫຣຕິ ຠິກ຺ຂູນໍ ເອຕທໂຫສິ ‘‘ຠຄວຕາ ປຎ຺ຎຕ຺ຕໍ ເອຕ຺ຕາວຕາ ສາມຄ຺ຄີ, ຍາວຕາ ເອກາວາໂສຕິ ກິຕ຺ຕາວຕານຸໂຂ ເອກາວາໂສ ໂຫຕີ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ກຕິ ອາວຸໂສ ອຸໂປສຖາ ທິວສວເສນ ຈ ກາຣກປຸຄ຺ຄລວເສນ ຈ ກາຕພ຺ພາກາຣວເສນ ຈ.

ວິສ຺ສຊ຺ຊນາ – ທິວສວເສນ ຠນ຺ເຕ ຕໂຍ ອຸໂປສຖາ, ປຸຄ຺ຄລວເສນ ຈ ຠນ຺ເຕ ຕໂຍ ອຸໂປສຖາ, ກາຕພ຺ພາກາຣວເສນ ຈ ຠນ຺ເຕ ຕໂຍ ອຸໂປສຖາ.

ປຸຈ຺ຉາ – ກຕິ ອາວຸໂສ ອຸໂປສຖກມ຺ມານິ ເຕສຸ ຈ ກີທິສໍ ອຸໂປສຖກມ຺ມໍ ຠຄວຕາ ອນຸຎ຺ຎາຕໍ, ກີທິສໍ ອນນຸຎ຺ຎາຕໍ.

ວິສ຺ສຊ຺ຊນາ – ຈຕ຺ຕາຣິມານິ ຠນ຺ເຕ ອຸໂປສຖກມ຺ມານິ, ອຘມ຺ເມນ ວຄ຺ຄໍ ອຸໂປສຖກມ຺ມໍ, ອຘມ຺ເມນ ສມຄ຺ຄໍ ອຸໂປສຖກມ຺ມໍ, ຘມ຺ເມນ ວຄ຺ຄໍ ອຸໂປສຖກມ຺ມໍ, ຘມ຺ເມນ ສມຄ຺ຄໍ ອຸໂປສຖກມ຺ມໍ. ຕຕ຺ຣ ຠນ຺ເຕ ຍທິທໍ ອຘມ຺ເມນ ວຄ຺ຄໍ ອຸໂປສຖກມ຺ມໍ, ອຘມ຺ເມນ ສມຄ຺ຄໍ ອຸໂປສຖກມ຺ມໍ ຘມ຺ເມນ ວຄ຺ຄໍ ອຸໂປສຖກມ຺ມໍ, ເອວຣູປໍ ຠນ຺ເຕ ອຸໂປສຖກມ຺ມໍ ອນນຸຎ຺ຎາຕໍ, ຕຕ຺ຣ ຠນ຺ເຕ ຍທິທໍ ຘມ຺ເມນ ສມຄ຺ຄໍ ອຸໂປສຖກມ຺ມໍ, ເອວຣູປໍ ຠນ຺ເຕ ອຸໂປສຖກມ຺ມໍ ອນຸຎ຺ຎາຕໍ.

ປຸຈ຺ຉາ – ອຸໂປສຖໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ອຸໂປສຖໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ຕິສ຺ໂສ ອາປຕ຺ຕິໂຍ.