໓. ວສ຺ສຸປນາຍິກກ຺ຂນ຺ຘກ

ປຸຈ຺ຉາ – ວສ຺ສູປນາຍິກໍ ອາວຸໂສ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸລາ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ເຫມນ຺ຕມ຺ປິ ຄິມ຺ຫມ຺ປິ ວສ຺ສມ຺ປິ ຈາຣິກໍ ຈຣິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກຕິປນາວຸໂສ ວສ຺ສູປນາຍິກາ ຠຄວຕາ ອນຸຎ຺ຎາຕາ.

ວິສ຺ສຊ຺ຊນາ – ທ຺ເວມາ ຠນ຺ເຕ ວສ຺ສູປນາຍິກາ ຠຄວຕາ ອນຸຎ຺ຎາຕາ ປຸຣິມິກາ ປຈ຺ຉິມິກາ, ອປຣຊ຺ຊຸຄຕາຍ ຠນ຺ເຕ ອາສຬ຺ຫິຍາ ປຸຣິມິກາ ອຸປຄນ຺ຕພ຺ພາ, ມາສຄຕາຍ ຠນ຺ເຕ ອາສຬ຺ຫິຍາ ປຈ຺ຉິມິກາ ອຸປຄນ຺ຕພ຺ພາ, ອິມາ ໂຂ ຠນ຺ເຕ ທ຺ເວ ວສ຺ສູປນາຍິກາ ຠຄວຕາ ອນຸຎ຺ຎາຕາ.

ປຸຈ຺ຉາ – ວສ຺ສໍ ອາວຸໂສ ອຸປຄນ຺ຕ຺ວາ ປຸຣິມໍ ວາ ເຕມາສໍ ປຈ຺ຉິມໍ ວາ ເຕມາສໍ ອວສິຕ຺ວາ ຈາຣິກໍ ປກ຺ກມນ຺ຕສ຺ສ ທຸກ຺ກຏໍ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ວສ຺ສໍ ອຸປຄນ຺ຕ຺ວາ ອນ຺ຕຣາ ວສ຺ສໍ ຈາຣິກໍ ປກ຺ກມິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ສຕ຺ຕາຫ ກຣຓີເຍນ ອາວຸໂສ ປຫິເຕ ຄນ຺ຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ອຸເທເນນ ອຸປາສເກນ ປຫິເຕ ນ ຄຈ຺ຉິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ສຕ຺ຕາຫກຣຓີເຍນ ອາວຸໂສ ສຕ຺ຕນ຺ນໍ ອປຫິເຕປິ ຄນ຺ຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣສ຺ສ ຠິກ຺ຂຸໂນ ມາຕຸຄິລານ ວຕ຺ຖຸສ຺ມິໍ ອນຸຎ຺ຎາຕໍ.

ອນຸຊານາມິ ຠິກ຺ຂເວ ສຕ຺ຕນ຺ນໍ ສຕ຺ຕາຫກຣຓີເຍນ ອປຫິເຕປິ ຄນ຺ຕຸໍ, ປເຄວ ປຫິເຕ.

ປຸຈ຺ຉາ – ກິສ຺ມິໍຈິ ອາວຸໂສ ອນ຺ຕຣາເຍ ສຕິ ອນ຺ໂຕວສ຺ສໍ ປກ຺ກມິຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ໂກສເລສຸ ຊນປເທສຸ ວສ຺ສໍ ອຸປຄຈ຺ຉິໍສຸ, ເຕ ວສ຺ສູປຄຕາ ວາເຬຫິ ອຸພ຺ພາຬ຺ຫາ ອເຫສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ຣຸກ຺ຂ ສຸສິເຣ ວາ ອາວຸໂສ ຣຸກ຺ຂວິຏຠິຍາ ວາ ອຊ຺ໂຌກາເສ ວາ ວສ຺ສໍ ອຸປຄຈ຺ຉນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ຣຸກ຺ຂສຸສິເຣປິ ຣຸກ຺ຂວິຏຠິຍາປິ ອຊ຺ໂຌກາເສປິ ວສ຺ສໍ ອຸປຄຈ຺ຉິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອເສນາສນິເກນ ອາວຸໂສ ວສ຺ສໍ ອຸປຄຈ຺ຉນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຕສ຺ມິໍເຍວ ຠນ຺ເຕ ສາວຕ຺ຖິຍໍ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ອເສນາສນິກາ ວສ຺ສໍ ອຸປຄຈ຺ຉິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຉວກຸຏິກາຍ ວາ ອາວຸໂສ ຉຕ຺ເຕ ວາ ຈາຏິຍາ ວາ ວສ຺ສໍ ອຸປຄຈ຺ຉນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍເຍວ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ຉວກຸຏິກາຍປິ ຉຕ຺ເຕປິ ຈາຏິຍາປິ ວສ຺ສໍ ອຸປຄຈ຺ຉິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ປຏິສ຺ສວໍ ອາວຸໂສ ວິສໍ ວາເທນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອາຣພ຺ຠ ປຎ຺ຎຕ຺ຕໍ, ອາຍສ຺ມາ ຠນ຺ເຕ ອຸປນນ຺ໂທ ສກ຺ຍປຸຕ຺ໂຕ ຣຎ຺ໂຎ ປເສນທິສ຺ສ ໂກສລສ຺ສ ວສ຺ສໍ ວາສໍ ປຏິສ຺ສຸຓິຕ຺ວາ ວິສໍວາເທສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ວສ຺ສູປນາຍິກໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ວສ຺ສູປນາຍິກໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ເອກາ ອາປຕ຺ຕິ.