໑໐. ໂກສມ຺ພກກ຺ຂນ຺ຘກ

ປຸຈ຺ຉາ – ເຠທຄຣຸເກຫິ ຠິກ຺ຂເວ ຠິກ຺ຂູຫິ ນ ໂສ ຠິກ຺ຂຸ ອາປຕ຺ຕິຍາ ອທສ຺ສເນ ອຸກ຺ຂິປິຕພ຺ໂພຕິ ຈ, ເຠທຄຣຸເກນ ຠິກ຺ຂເວ ຠິກ຺ຂຸນາ ປເຣສມ຺ປິ ສທ຺ຘາຍ ອາປຕ຺ຕິເທເສຕພ຺ພາຕິ ຈ ອາວຸໂສ ອຍໍ ສາມຄ຺ຄິຣສໂອວາໂທ ຠຄວຕາ ກຕ຺ຖ ທິນ຺ໂນ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ທິນ຺ໂນ.

ວິສ຺ສຊ຺ຊນາ – ໂກສມ຺ພິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ທິນ຺ໂນ, ຠຄວຕິ ຠນ຺ເຕ ໂກສມ຺ພິຍໍ ວິຫຣຕິ ອຎ຺ຎຕໂຣ ຠິກ຺ຂຸ ອາປຕ຺ຕິໍ ອາປນ຺ໂນ ອໂຫສິ, ໂສ ຕສ຺ສາ ອາປຕ຺ຕິຍາ ອາປຕ຺ຕິ ທິຏ຺ຐິ ອໂຫສິ, ອຎ຺ເຎ ຠິກ຺ຂູ ຕສ຺ສາ ອາປຕ຺ຕິຍາ ອນາປຕ຺ຕິ ທິຏ຺ຐິໂນ ອເຫສຸໍ. ໂສ ອປເຣນ ສມເຍນ ຕສ຺ສາ ອາປຕ຺ຕິຍາ ອນາປຕ຺ຕິທິຏ຺ຐິ ອໂຫສິ, ອຎ຺ເຎ ຠິກ຺ຂູ ຕສ຺ສາ ອາປຕ຺ຕິຍາ ອາປຕ຺ຕິທິຏ຺ຐິໂນ ອເຫສຸໍ. ອຖ ໂຂ ເຕ ຠນ຺ເຕ ຠິກ຺ຂູ ສາມຄ຺ຄິໍ ລຠິຕ຺ວາ ຕໍ ຠິກ຺ຂຸໍ ອາປຕ຺ຕິຍາ ອທສ຺ສເນ ອຸກ຺ຂິປິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ທິນ຺ໂນ.

ປຸຈ຺ຉາ – ສງ຺ຆເຠທສ຺ສ ອາວຸໂສ ມູລຠູເຕ ຠິກ຺ຂຸມ຺ຫິ ອຸກ຺ຂິຕ຺ຕເກ ໂອສາຣິເຕ ຕສ຺ສ ວຕ຺ຖຸສ຺ສ ວູປສມາຍ ສງ຺ຆສາມຄ຺ຄິຎ຺ຈ ກາຕຸໍ ສາມຄ຺ຄີ ອຸໂປສຖຎ຺ຈ ກາຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ເຕເຍວ ອຸກ຺ຂິຕ຺ຕການຸວຕ຺ຕເກ ຠິກ຺ຂູ ອາຣພ຺ຠ ອນຸຎ຺ຎາຕໍ, ເຕ ຠນ຺ເຕ ອຸກ຺ຂິຕ຺ຕການຸວຕ຺ຕກາ ຠິກ຺ຂູ ຕໍ ອຸກ຺ຂິຕ຺ຕກໍ ຠິກ຺ຂຸໍ ໂອສາເຣຕ຺ວາ ເຍນ ອຸກ຺ເຂປກາ ຠິກ຺ຂູ ເຕນຸປສງ຺ກມິໍສຸ ອຸປສງ຺ກມິຕ຺ວາ ເຕ ອຸກ຺ເຂປເກ ຠິກ຺ຂູ ເອກທໂວຈຸໍ ‘‘ຍສ຺ມິໍ ອາວຸໂສ ວຕ຺ຖຸສ຺ມິໍ ອໂຫສິ ສງ຺ຆສ຺ສ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ສງ຺ຆເຠໂທ ສງ຺ຆຣາຊິ ສງ຺ຆວວຕ຺ຖານໍ ສງ຺ຆນານາກຣຓໍ, ໂສ ເອໂສ ຠິກ຺ຂຸໍ ອາປນ຺ໂນ ຈ ອຸກ຺ຂິຕ຺ໂຕ ຈ ປສ຺ສິ ຈ ໂອສາຣິໂຕ ຈ, ຫນ຺ທ ມຍໍ ອາວຸໂສ ຕສ຺ສ ວຕ຺ຖຸສ຺ສ ວູປສມາຍ ສງ຺ຆສາມຄ຺ຄິໍ ກໂຣມາ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ໂກສມ຺ພກໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ໂກສມ຺ພກໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ເອກາ ອາປຕ຺ຕິ.