໘. ຈີວຣກ຺ຂນ຺ຘກ

ຊີວກວຕ຺ຖຸ

ປຸຈ຺ຉາ – ຄຫປຕິຈີວຣໍ ອາວຸໂສ ສາທິຍິຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຊີວກໍ ໂກມາຣຠຈ຺ຈໍ ອາຣພ຺ຠ ອນຸຎ຺ຎາຕໍ, ຊີວໂກ ຠນ຺ເຕ ໂກມາຣຠຈ຺ໂຈ ຠິກ຺ຂູນໍ ຄຫປຕິຈີວຣໍ ອນຸຊານິຕຸໍ ຠຄວນ຺ຕໍ ຍາຈິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ຉ ອາວຸໂສ ຣຊນານິ ຠຄວຕາ ກຕ຺ຖ ອນຸຎ຺ຎາຕານິ, ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕານິ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕານິ, ສມ຺ພຫຸລາ ຠນ຺ເຕ ຠິກ຺ຂູ ຉກເຓນປິ ປຓ຺ຑຸມຕ຺ຕິກາຍປິ ຈີວຣໍ ຣຊິໍສຸ, ຈີວຣໍ ທຸພ຺ພຓ຺ຓໍ ໂຫຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕານິ.

ປຸຈ຺ຉາ – ອຈ຺ຉິນ຺ນການິ ອາວຸໂສ ຈີວຣານິ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ອຈ຺ຉິນ຺ນການິ ຈີວຣານິ ຘາເຣສຸໍ ທນ຺ຕກສາວານິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກທາ ອາວຸໂສ ຠຄວາ ອນຸຎ຺ຎາສິ ຉິນ຺ນກໍ ສງ຺ຆາຏິໍ ຉິນ຺ນກໍ ອຸຕ຺ຕຣາສງ຺ຄໍ ຉິນ຺ນກໍ ອນ຺ຕຣວາສກໍ.

ວິສ຺ສຊ຺ຊນາ – ທກ຺ຂິຓາຄິຣິໂຕ ຠນ຺ເຕ ປຈ຺ຉາຄຕກາເລ ຠຄວາ ອນຸຎ຺ຎາສິ ຉິນ຺ນກໍ ສງ຺ຆາຏິໍ ຉິນ຺ນກໍ ອຸຕ຺ຕຣາສງ຺ຄໍ ຉິນ຺ນກໍ ອນ຺ຕຣວາສກໍ.

ປຸຈ຺ຉາ – ອຄ຺ຄຬໍ ຈ ອາວຸໂສ ຕຸນ຺ນຎ຺ຈ ໂອວຏ຺ຏິກຎ຺ຈ ກຓ຺ຑຸສກຎ຺ຈ ທຬ຺ຫີກມ຺ມຎ຺ຈ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ພາຣາຓສິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ອນຸຎ຺ຎາຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ອຄ຺ຄຬໍ ອຈ຺ຉຸເປສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ວສ຺ສິກສາຏິກາ ຈ ອາວຸໂສ ອາຄນ຺ຕຸກຠຕ຺ຕຎ຺ຈ ຄມິກຠຕ຺ຕຎ຺ຈ ຄິລານຠຕ຺ຕຎ຺ຈ ຄິລານຸປຏ຺ຐາກຠຕ຺ຕຎ຺ຈ ຄິລານເຠສຊ຺ຊຎ຺ຈ ຘຸວຍາຄຸ ຈ ຠິກ຺ຂຸນິສງ຺ຆສ຺ສ ອຸທກສາຏິກາຈາຕິ ອິມາ ອຏ຺ຐ ຠຄວຕາ ກຕ຺ຖ ອນຸຎ຺ຎາຕາ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕາ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ວິສາຂໍ ມິຄາຣມາຕຣໍ ອາຣພ຺ຠ ອນຸຎ຺ຎາຕາ, ວິສາຂາ ຠນ຺ເຕ ມິຄາຣມາຕາ ຠຄວນ຺ຕໍ ອຏ຺ຐວຣານິ ຍາຈິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ປຸຈ຺ຉາ – ຠຄວຕາ ອາວຸໂສ ມາຕາປິຕູນໍ ທານໍ ອນຸຊານິຕ຺ວາ ສທ຺ຘາເທຍ຺ຍໍ ວິນິປາເຕນ຺ຕສ຺ສ ທຸກ຺ກຏໍ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕຣສ຺ສ ຠນ຺ເຕ ຠິກ຺ຂຸໂນ ພຫຸໍ ຈີວຣໍ ອຸປ຺ປນ຺ນໍ ອໂຫສິ, ໂສ ຈ ຕໍຈີວຣໍ ມາຕາປິຕູນໍ ທາຕຸກາໂມ ອໂຫສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ມາຕາປິຕໂຣຕິ ໂຂ ຠິກ຺ຂເວ ທທມາເນ ກິໍ ວເທຍ຺ຍາມ, ອນຸຊານາມິ ຠິກ຺ຂເວ ມາຕາປິຕູນໍ ທາຕຸໍ, ນ ຈ ຠິກ຺ຂເວ ສທ຺ຘາເທຍ຺ຍໍ ວິນິປາເຕຕພ຺ພໍ, ໂຍ ວິນິປາເຕຍ຺ຍ ອາປຕ຺ຕິ ທຸກ຺ກຏສ຺ສ –

ປຸຈ຺ຉາ – ອຎ຺ຎຕ຺ຣ ວສ຺ສໍ ວຸຏ຺ເຐນ ອາວຸໂສ ອຎ຺ຎຕ຺ຣ ຈີວຣຠາຄໍ ສາທິຍນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອາຣພ຺ຠ ປຎ຺ຎຕ຺ຕໍ, ອາຍສ຺ມາ ຠນ຺ເຕ ອຸປນນ຺ໂທ ສກ຺ຍປຸຕ຺ໂຕ ອຎ຺ຎຕ຺ຣ ວສ຺ສໍ ວຸຏ຺ໂຐ ອຎ຺ຎຕ຺ຣ ຈີວຣຠາຄໍ ສາທິຍິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ອນາຖກໍ ອາວຸໂສ ຠິກ຺ຂຸໍ ຄິລານໍ ນ ອຸປຏ຺ຐຫນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ຠຄວຕິ ຠນ຺ເຕ ສາວຕ຺ຖິຍໍ ວິຫຣຕິ ອຎ຺ຎຕຣສ຺ສ ຠິກ຺ຂຸໂນ ກຸຈ຺ຉິວິກາຣາພາໂຘ ອໂຫສິ, ໂສ ສເກ ມຸຕ຺ຕກຣີເສ ປລິປນ຺ໂນ ສຍິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ນຄ຺ຄິຍໍ ອາວຸໂສ ຕິຕ຺ຖິຍສມາທານໍ ສມາທິຍນ຺ຕສ຺ສ ຖຸລ຺ລຈ຺ຈຍໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ນຄ຺ຄິຍໍ ຕິຕ຺ຖິຍສມາທານໍ ສມາທິຍິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ສພ຺ພນີລການິ ວາ ອາວຸໂສ ຈີວຣານິ ສພ຺ພປີຕການິ ວາ ສພ຺ພໂລຫິຕການິ ວາ ສພ຺ພມຎ຺ຊິຏ຺ຐການິ ວາ ສພ຺ພກຓ຺ຫານິວາຕິ ເອວຣູປານິ ຈີວຣານິ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ສພ຺ພນີລກາທີນິ ຈີວຣານິ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກຎ຺ຈຸກໍ ວາ ອາວຸໂສ ເວຐນໍ ວາ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍວ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ກຎ຺ຈຸກມ຺ປິ ຘາເຣສຸໍ ເວຐນມ຺ປິ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຈີວຣສຎ຺ຎຸຕ຺ຕໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ຈີວຣສຎ຺ຎຸຕ຺ຕໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ຕິສ຺ໂສ ອາປຕ຺ຕິໂຍ.