໕. ຈມ຺ມກ຺ຂນ຺ຘກ

ໂສຓມເຖຣ ວຕ຺ຖຸ

ປຸຈ຺ຉາ – ອຸປາຫນໍ ອາວຸໂສ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອາຍສ຺ມນ຺ຕໍ ໂສຓໍ ອາຣພ຺ຠ ອນຸຎ຺ຎາຕໍ, ອາຍສ຺ມໂຕ ຠນ຺ເຕ ໂສຓສ຺ສ ອຈ຺ຈາຣທ຺ຘວີຣິຍສ຺ສ ຈງ຺ກມໂຕ ປາທາ ຠິຊ຺ຊິໍສຸ, ຈງ຺ກໂມ ໂລຫິເຕນ ຜຸໂຏ ອໂຫສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ສພ຺ພນີລິກາ ວາ ອາວຸໂສ ສພ຺ພປີຕິກາ ວາ ສພ຺ພໂລຫິຕິກາ ວາ ສພ຺ພມຎ຺ຊິຏ຺ຐິກາ ວາ ສພ຺ພກຓ຺ຫາ ວາ ສພ຺ພມຫາຣງ຺ຄຣຕ຺ຕາ ວາ ສພ຺ພມຫານາມຣຕ຺ຕາ ວາ ອຸປາຫນາໂຍ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ສພ຺ພນີລິກາໂຍ ອຸປາຫນາໂຍ ຘາເຣສຸໍ, ສພ຺ພປີຕິກາໂຍ ສພ຺ພໂລຫິຕິກາໂຍ ສພ຺ພມຎ຺ຊິຏ຺ຐິກາໂຍ ສພ຺ພກຓ຺ຫາໂຍ ສພ຺ພມຫາຣງ຺ຄຣຕ຺ຕາ ສພ຺ພມຫານາມຣຕ຺ຕາໂຍປິ ອຸປາຫນາໂຍ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຂລ຺ລກພນ຺ຘາ ວາ ອາວຸໂສ ປຸຏພນ຺ຘາ ວາ ປາລິຄຸຓ຺ຐິມາ ວາ ຕູລປຸຓ຺ຓິກາ ວາ ຕິຕ຺ຕິຣປຕ຺ຕິກາ ວາ ເມຓ຺ຑວິສາຓວທ຺ຘິກາ ວາ ອຊວິສາຓວທ຺ຘິກາ ວາ ວິຈ຺ຉິກາຬິກາ ວາ ໂມຣປິຎ຺ຉ ປຣິສິພ຺ພິກາ ວາ ຈິຕ຺ຣາ ວາ ອຸປາຫນາໂຍ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ຂລ຺ລກພນ຺ຘາ ອຸປາຫນາໂຍປິ ຘາເຣສຸໍ, ປຸຏພນ຺ຘາ ອຸປາຫນາໂຍປິ ຘາເຣສຸໍ, ປາລິຄຸຓ຺ຐິມາ ອຸປາຫນາໂຍປິ ຘາເຣສຸໍ, ຕູລປຸຓ຺ຓິກາ ອຸປາຫນາໂຍປິ ຘາເຣສຸໍ, ຕິຕ຺ຕິຣປຕ຺ຕິກາ ອຸປາຫນາໂຍປິ ຘາເຣສຸໍ, ເມຓ຺ຑວິສາຓວທ຺ຘິກາ ອຸປາຫນາໂຍປິ ຘາເຣສຸໍ, ອຊວິສາຓວທ຺ຘິກາ ອຸປາຫນາໂຍປິ ຘາເຣສຸໍ, ວິຈ຺ຉິກາຬິກາ ອຸປາຫນາໂຍປິ ຘາເຣສຸໍ, ໂມຣປິຎ຺ຉ ປຣິສິພ຺ພິຕາ ອຸປາຫນາໂຍ ຘາເຣສຸໍ, ຈິຕ຺ຣາ ອຸປາຫນາໂຍປິ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ກຏ຺ຐປາທຸກາໂຍ ອາວຸໂສ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຉພ຺ພຄ຺ຄີເຍວ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ຣຕ຺ຕິຍາ ປຈ຺ຈູສສມຍໍ ປຈ຺ຈຸຏ຺ຐາຍ ກຏ຺ຐປາທຸກາໂຍ ອຠິຣຸຫິຕ຺ວາ ອຊ຺ໂຌກາເສ ຈງ຺ກມນ຺ຕິ ອຸຈ຺ຈາສທ຺ທາ ມຫາສທ຺ທາ ຂຏຂຏສທ຺ທາ ອເນກວິຫິຕໍ ຕິຣຈ຺ຉານກຖໍ ກເຖນ຺ຕາ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຍາເນນ ອາວຸໂສ ຍາຍນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ຍາເນນ ຍາຍິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຄິລານສ຺ສ ອາວຸໂສ ຍານໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ຄິລານໍ ຠິກ຺ຂຸໍ ອາຣພ຺ຠ ອນຸຎ຺ຎາຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ໂກສເລສຸ ຊນປເທ ສາວຕ຺ຖິໍ ຄຈ຺ຉນ຺ໂຕ ຠຄວນ຺ຕໍ ທສ຺ສນາຍ ອນ຺ຕຣາມຄ຺ເຄ ຄິລາໂນ ກຸກ຺ກຸຈ຺ຈາຍນ຺ໂຕ ຍານໍ ນາຠິຣຸຫິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ອຸຈ຺ຈາສຍນມຫາສຍນານິ ອາວຸໂສ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຉພ຺ພຄ຺ຄິເຍ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ຉພ຺ພຄ຺ຄິຍາ ຠນ຺ເຕ ຠິກ຺ຂູ ອຸຈ຺ຈາສຍນມຫາສຍນານິ ຘາເຣສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ໂຄຈມ຺ມານິ ອາວຸໂສ ຘາເຣນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ປາປຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ປາຓາຕິປາເຕ ສມາທເປສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ປຈ຺ຈນ຺ຕິເມສຸ ອາວຸໂສ ຊນປເທສຸ ວິນຍຘຣປຎ຺ຈເມນ ຄເຓນ ອຸປສມ຺ປທາ ຈ ຄຸຓງ຺ຄຸຓູປຫນຎ຺ຈ ຘຸວນຫານຎ຺ຈ ຈມ຺ມານິ ອຕ຺ຖຣຓານິ ຈ ນິສ຺ສີມຄຕານໍ ຈີວຣທານຎ຺ຈາຕິ ອິມານິ ປຎ຺ຈ ຠຄວຕາ ກຕ຺ຖ ອນຸຎ຺ຎາຕານິ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕານິ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ໂສຓໍ ກຸຏິກຓ຺ຓໍ ອາຣພ຺ຠ ອນຸຎ຺ຎາຕາ, ອາຍສ຺ມາ ຠນ຺ເຕ ໂສໂຓ ກຸຏິກຓ຺ໂຓ ເອຕານິ ປຎ຺ຈວຕ຺ຖູນິ ອາຍສ຺ມໂຕ ມຫາກຈ຺ຈານສ຺ສ ວຈເນນ ຠຄວນ຺ຕໍ ຍາຈິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕາ.

ປຸຈ຺ຉາ – ຈມ຺ມສຎ຺ຎຸຕ຺ຕໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ຈມ຺ມສຎ຺ຎຸຕ຺ຕໍ ວິສ຺ສຊ຺ຊິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ຕິສ຺ໂສ ອາປຕ຺ຕິໂຍ.