໖. ເຠສຊ຺ຊກ຺ຂນ຺ຘກ

ປຸຈ຺ຉາ – ປຎ຺ຈ ອາວຸໂສ ເຠສຊ຺ຊານິ ປຏິຄ຺ຄເຫຕ຺ວາ ກາເລປິ ວິກາເລປິ ປຣິຠຸຎ຺ຊິຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລານໍ ຠນ຺ເຕ ຠິກ຺ຂູນໍ ສາຣທິເກນ ອາພາເຘນ ປຸຏ຺ຐານໍ ຍາຄຸປິ ນ ສມ຺ມາ ປຣິຓາມໍ ຄຈ຺ຉິ, ຠຕ຺ຕມ຺ປິ ຠຸຕ຺ຕໍ ນ ສມ຺ມາ ປຣິຓາມໍ ຄຈ຺ຉິ, ເຕ ເຕນ ກິສາ ອເຫສຸໍ ລູຂາ ທຸພ຺ພຓ຺ຓາ ອຸປ຺ປຓ຺ຑຸປ຺ປຓ຺ຑຸກຊາຕາ ຘມນິສນ຺ຖຕຄຕ຺ຕາ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ມູລາທິເຠສຊ຺ຊານິ ອາວຸໂສ ຠຄວຕາ ກຕ຺ຖ ອນຸຎ຺ຎາຕານິ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕານິ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຄິລາເນ ຠິກ຺ຂູ ອາຣພ຺ຠ ອນຸຎ຺ຎາຕານິ, ສມ຺ພຫຸລານໍ ຄິລານານໍ ຠິກ຺ຂູນໍ ມູເລຫິ ເຠສຊ຺ເຊຫິ ອຕ຺ໂຖ ອໂຫສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕານິ.

ປຸຈ຺ຉາ – ອນ຺ໂຕວຸຏ຺ຐໍວາ ອາວຸໂສ ອນ຺ໂຕປກ຺ກໍ ວາ ສາມໍປກ຺ກໍ ວາ ປຣິຠຸຎ຺ຊນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອາຍສ຺ມນ຺ຕໍ ອານນ຺ທໍ ອາຣພ຺ຠ ປຎ຺ຎຕ຺ຕໍ, ອາຍສ຺ມາ ຠນ຺ເຕ ອານນ຺ໂທ ສາມໍ ຕິລມ຺ປິ ຕຓ຺ຑຸລມ຺ປິ ມຸຄ຺ຄມ຺ປິ ວິຎ຺ຎາເປຕ຺ວາ ອນ຺ໂຕ ວາເສຕ຺ວາ ອນ຺ໂຕ ສາມໍ ປຈິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ສຸປ຺ປິຍາ ວຕ຺ຖຸ

ປຸຈ຺ຉາ – ມນຸສ຺ສມໍສໍ ອາວຸໂສ ປຣິຠຸຎ຺ຊນ຺ຕສ຺ສ ຖຸລ຺ລຈ຺ຈຍຎ຺ຈ ອປ຺ປຏິເວກ຺ຂິຕ຺ວາ ມໍສໍ ປຣິຠຸຎ຺ຊນ຺ຕສ຺ສ ທຸກ຺ກຏຎ຺ຈ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ພາຣາຓສິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ຠິກ຺ຂຸ ອປ຺ປຏິເວກ຺ຂິຕ຺ວາ ມນຸສ຺ສມໍສໍ ຠຸຎ຺ຊິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ນ ຠິກ຺ຂເວ ມນຸສ຺ສມໍສໍ ປຣິຠຸຎ຺ຊິຕພ຺ພໍ, ໂຍ ປຣິຠຸຎ຺ເຊຍ຺ຍ, ອາປຕ຺ຕິ ຖຸລ຺ລຈ຺ຈຍສ຺ສ, ນ ຈ ຠິກ຺ຂເວ ອປ຺ປຏິເວກ຺ຂິຕ຺ວາ ມໍສໍ ປຣິຠຸຎ຺ຊິຕພ຺ພໍ, ໂຍ ປຣິຠຸຎ຺ເຊຍ຺ຍ ອາປຕ຺ຕິ ທຸກ຺ກຏສ຺ສ.

ປຸຈ຺ຉາ – ຫຕ຺ຖິມໍສໍ ວາ ອາວຸໂສ ອສ຺ສມໍສໍ ວາ ປຣິຠຸຎ຺ຊນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ພາຣາຓສິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ຫຕ຺ຖິມໍສມ຺ປິ ອສ຺ສມໍສມ຺ປິ ປຣິຠຸຎ຺ຊິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ສຸນກ຺ຂມໍສໍ ວາ ອາວຸໂສ ອຫິມໍສໍ ວາ ຠຸຎ຺ຊນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ພາຣາຓສິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ສຸນກ຺ຂມໍສມ຺ປິ ອຫິມໍສມ຺ປິ ປຣິຠຸຎ຺ຊິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ສີຫມໍສໍ ວາ ອາວຸໂສ ພ຺ຍຄ຺ຆມໍສໍ ວາ ທີປິມໍສໍ ວາ ອຈ຺ຉມໍສໍ ວາ ຕຣຈ຺ຉມໍສໍ ວາ ຠຸຎ຺ຊນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ພາຣາຓສິຍໍເຍວ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລາ ຠນ຺ເຕ ຠິກ຺ຂູ ສີຫມໍສມ຺ປິ ພ຺ຍຄ຺ຆມໍສມ຺ປິ ທີປິມໍສມ຺ປິ ອຈ຺ຉມໍສມ຺ປິ ຕຣຈ຺ຉມໍສມ຺ປິ ປຣິຠຸຎ຺ຊິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ຄິລານສ຺ສ ອາວຸໂສ ຄຸຬໍ ວາ ອຄິລານສ຺ສ ຄຸໂຬທກໍ ວາ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ຄິລານສ຺ເສວ ຠຄວຕາ ຄຸໂຬ ອນຸຎ຺ຎາໂຕ ໂນ ອຄິລານສ຺ສາຕິ ກຸກ຺ກຸຈ຺ຈາຍນ຺ຕາ ຄຸຬໍ ນ ຠຸຎ຺ຊິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ຊານໍ ອາວຸໂສ ອຸທ຺ທິສ຺ສ ກຕໍ ມໍສໍ ປຣິຠຸຎ຺ຊນ຺ຕສ຺ສ ທຸກ຺ກຏໍ ປຎ຺ຎເປຕ຺ວາ ຕິໂກຏິປຣິສຸທ຺ຘໍ ມໍສໍ ຠຄວຕາ ກຕ຺ຖ ອນຸຎ຺ຎາຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ສີຫສ຺ສ ເສຏາປຕິໂນ ວຕ຺ຖຸສ຺ມິໍ ອນຸຎ຺ຎາຕໍ.

ເມຓ຺ຑກ ວຕ຺ຖຸ

ປຸຈ຺ຉາ – ປາເຖຍ຺ຍໍ ອາວຸໂສ ປຣິເຍສິຕຸຎ຺ຈ ກປ຺ປິຍກາຣການໍ ຫຕ຺ເຖ ອຸປນິກ຺ຂິຕ຺ຕຫິຣຎ຺ຎໂຕ ນິພ຺ພຕ຺ຕໍ ກປ຺ປິຍປຈ຺ຈຍໍ ສາທິຕຸຎ຺ຈ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ອນ຺ຕຣາ ຈ ຠນ຺ເຕ ຠທ຺ທິຍໍ ອນ຺ຕຣາ ຈ ອງ຺ຄຸຕ຺ຕຣາປໍ ເມຓ຺ຑກໍ ຄຫປຕິໍ ອາຣພ຺ຠ ອນຸຎ຺ຎາຕໍ, ເມຓ຺ຑໂກ ຠນ຺ເຕ ຄຫປຕິ ຠຄວນ຺ຕໍ ຍາຈິ ‘‘ສນ຺ຕິ ຠນ຺ເຕ ມຄ຺ຄາ ກນ຺ຕາຣາ ອປ຺ໂປທກາ ອປ຺ປຠກ຺ຂາ ນ ສຸກຣາ ອປາເຖຍ຺ເຍນ ຄນ຺ຕຸໍ, ສາຘຸ ຠນ຺ເຕ ຠຄວາ ຠິກ຺ຂູນໍ ປາເຖຍ຺ຍໍ ອນຸຊານາຕູ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ເກຓິຍ ວຕ຺ຖຸ

ປຸຈ຺ຉາ – ອຏ຺ຐ ອາວຸໂສ ປານານິ ຠຄວຕາ ກຕ຺ຖ ອນຸຎ຺ຎາຕານິ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕານິ.

ວິສ຺ສຊ຺ຊນາ – ອາປເຓ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕານິ, ສມ຺ພຫຸລາ ຠນ຺ເຕ ຠິກ຺ຂູ ກຸກ຺ກຸຈ຺ຈາຍນ຺ຕາ ປານານິ ນ ປຏິຄ຺ຄຓ຺ຫິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕານິ.

ໂຣຊມລ຺ລາ ວຕ຺ຖຸ

ປຸຈ຺ຉາ – ສພ຺ພຎ຺ຈ ອາວຸໂສ ຑາກໍ ສພ຺ພຎ຺ຈ ປິຏ຺ຐຂາທນີຍໍ ຠຄວຕາ ກຕ຺ຖ ອນຸຎ຺ຎາຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ກຸສິນາຣາຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອນຸຎ຺ຎາຕໍ, ສມ຺ພຫຸລາ ຠນ຺ເຕ ຠິກ຺ຂູ ກຸກ຺ກຸຈ຺ຈາຍນ຺ຕາ ຑາກຎ຺ຈ ປິຏ຺ຐຂາທນີຍຎ຺ຈ ນ ປຏິຄ຺ຄເຫສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ອກປ຺ປິຍໍ ອາວຸໂສ ສມາທເປນ຺ຕສ຺ສ ທຸກ຺ກຏໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ອາຕຸມາຍໍ ຠນ຺ເຕ ອຎ຺ຎຕຣໍ ວຸຑ຺ຒປພ຺ພຊິຕໍ ອາຣພ຺ຠ ປຎ຺ຎຕ຺ຕໍ, ອຎ຺ຎຕໂຣ ຠນ຺ເຕ ວຸຑ຺ຒປພ຺ພຊິໂຕ ອກປ຺ປິເຍ ສມາທເປຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ສງ຺ຆິການິ ວາ ອາວຸໂສ ປຸຄ຺ຄລິການິ ວາ ພີຊານິ ປຸຄ຺ຄລິກາຍ ວາ ສງ຺ຆິກາຍ ວາ ຠູມິຍາ ໂຣປິຕານິ ຠາຄໍ ທຕ຺ວາ ປຣິຠຸຎ຺ຊິຕຸໍ ຠຄວຕາ ກຕ຺ຖ ອນຸຎ຺ຎາຕໍ, ກິສ຺ມິໍ ວຕ຺ຖຸສ຺ມິໍ ອນຸຎ຺ຎາຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອນຸຎ຺ຎາຕໍ, ສາວຕ຺ຖິຍໍ ຠນ຺ເຕ ຠຄວຕິ ວິຫຣຕິ ສງ຺ຆິການິປິ ພີຊານິ ປຸຄ຺ຄລິກາຍ ຠູມິຍາ ໂຣປິຍິໍສຸ, ປຸຄ຺ຄລິການິປິ ພີຊານິ ສງ຺ຆິກາຍ ຠູມິຍາ ໂຣປິຍິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ອນຸຎ຺ຎາຕໍ.

ປຸຈ຺ຉາ – ວິນຍມຫາປເທສສງ຺ຂາຕານິ ອາວຸໂສ ຈຕ຺ຕາຣິ ກປ຺ປິຍາກປ຺ປິຍອນຸໂລມານິ ຠຄວຕາ ກຕ຺ຖ ປຎ຺ຎຕ຺ຕານິ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕານິ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕານິ, ສມ຺ພຫຸລານໍ ຠນ຺ເຕ ຠິກ຺ຂູນໍ ກິສ຺ມິຎ຺ຈິ ກິສ຺ມິຎ຺ຈິຐາເນ ກຸກ຺ກຸຈ຺ຈໍ ອຸປ຺ປຊ຺ຊິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕານິ.

ປຸຈ຺ຉາ – ຍາວກາລິກາທີຫິ ສໍສຏ຺ຐານໍ ອາວຸໂສ ຍາມກາລິກາທີນໍ ປຣິໂຠຄກາລມຣິຍາທໍ ຠຄວຕາ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ປຎ຺ຎຕ຺ຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ປຎ຺ຎຕ຺ຕໍ, ສມ຺ພຫຸລານໍ ຠນ຺ເຕ ຠິກ຺ຂູນໍ ເອຕທໂຫສິ ‘‘ກປ຺ປຕິ ນຸໂຂ ຍາວກາລິເກນ ຍາມກາລິກໍ ສຕ຺ຕາຫກາລິກໍ ຍາວຊີວິກໍ, ນ ນຸໂຂ ກປ຺ປຕິ. ກປ຺ປຕິນຸໂຂ ຍາມກາລິເກນ ສຕ຺ຕາຫກາລິກໍ ຍາວຊີວິກໍ, ນ ນຸໂຂ ກປ຺ປຕິ. ກປ຺ປຕິ ນຸໂຂ ສຕ຺ຕາຫກາລິເກນ ຍາວຊີວິກໍ, ນ ນຸໂຂ ກປ຺ປຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ປຎ຺ຎຕ຺ຕໍ.

ປຸຈ຺ຉາ – ເຠສຊ຺ຊກໍ ປຸຈ຺ຉິສ຺ສໍ, ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ອາວຸໂສ ກຕິ ອາປຕ຺ຕິໂຍ.

ວິສ຺ສຊ຺ຊນາ – ເຠສຊ຺ຊກໍ ວິສ຺ສຊ຺ຊິສ຺ສໍ ສນິທານໍ ສນິທ຺ເທສໍ. ສມຸກ຺ກຏ຺ຐປທານໍ ຠນ຺ເຕ ຕິສ຺ໂສ ອາປຕ຺ຕິໂຍ.