ສຣຓານິວຄ຺ຄ

ປຐມ ມຫານາມສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ຕຕິເຍ ສຣຓານິວຄ຺ເຄ ໂປຣາຓເກຫິ ຘມ຺ມສໍຄາຫກມຫາເຖເຣຫິ ປຐມໍ ສໍຄີຕໍ ປຐມມຫານາມສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສກ຺ເກສຸ ຠນ຺ເຕ ກປິລວຕ຺ຖຸສ຺ມິໍ ນິຄ຺ໂຣຘາຣາເມ ມຫານາມໍ ສກ຺ກໍ ອາຣພ຺ຠ ຠາສິຕໍ. ມຫານາໂມ ຠນ຺ເຕ ສກ຺ໂກ ຠຄວນ຺ຕໍ ເອຕທໂວຈ ‘‘ອິທໍ ຠນ຺ເຕ ກປິລວຕ຺ຖຸ ອິທ຺ຘຎ຺ເຈວ ຜີຕຎ຺ຈ ພາຫຸຊຎ຺ຎໍ ອາກິຓ຺ຓມນຸສ຺ສໍ ສມ຺ພາຘພ຺ຍູຫໍ, ໂສ ຂ຺ວາຫໍ ຠນ຺ເຕ ຠຄວນ຺ຕໍ ວາ ປຍິຣຸປາສິຕ຺ວາ ມໂນຠາວນີເຍ ວາ ຠິກ຺ຂູ ສາຍນ຺ຫສມຍໍ ກປິລວຕ຺ຖຸໍ ປວິສນ຺ໂຕ ຠນ຺ເຕນປິ ຫຕ຺ຖິນາ ສມາຄຈ຺ຉາມິ, ຠນ຺ເຕນປິ ອສ຺ເສນ ສມາຄຈ຺ຉາມິ, ຠນ຺ເຕນປິ ຣເຖນ ສມາຄຈ຺ຉາມິ, ຠນ຺ເຕນປິ ສກເຏນ ສມາຄຈ຺ຉາມິ, ຠນ຺ເຕນປິ ປຸຣິເສນ ສມາຄຈ຺ຉາມິ, ຕສ຺ສ ມຍ຺ຫໍ ຠນ຺ເຕ ຕສ຺ມິໍ ສມເຍ ມຸສ຺ສເຕວ ຠຄວນ຺ຕໍ ອາຣພ຺ຠ ສຕິ, ມຸສ຺ສຕິ ຘມ຺ມໍ ອາຣພ຺ຠ ສຕິ, ມຸສ຺ສຕິ ສງ຺ຆໍ ອາຣພ຺ຠ ສຕິ, ຕສ຺ສ ມຍ຺ຫໍ ຠນ຺ເຕ ເອວໍ ໂຫຕິ ອິມມ຺ຫິ ຈາຫໍ ສມເຍ ກາລໍ ກເຣຍ຺ຍໍ, ກາ ມຍ຺ຫໍ ຄຕິ, ໂກ ອຠິສມ຺ປຣາໂຍ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ມາ ຠາຍິ ມຫານາມ, ມາ ຠາຍິ ມຫານາມ, ອປາປກໍ ເຕ ມຣຓໍ ຠວິສ຺ສຕິ ອປາປິກາ ກາລໍ ກິຣິຍາ’’ຕິ ເອວມາທິນາ ຠຄວຕາ ຠາສິຕໍ.

ທຸຕິຍ ສຣຓານິສກ຺ກສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ຘມ຺ມສໍຄາຫກມຫາເຖເຣຫິ ປຎ຺ຈມໍ ສໍຄີຕໍ ທຸຕິຍສຣຓານິສກ຺ກສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສກ຺ເກສຸ ຠນ຺ເຕ ກປິລວຕ຺ຖຸສ຺ມິໍ ນິຄ຺ໂຣຘາຣາເມ ມຫານາມໍເຍວ ສກ຺ກໍ ອາຣພ຺ຠ ຠາສິຕໍ.

ມຫານາໂມ ຠນ຺ເຕ ສກ຺ໂກ ຠຄວນ຺ຕໍ ເອຕທໂວຈ ‘‘ອິຘ ຠນ຺ເຕ ສຣຓານິ ສກ຺ໂກ ກາລງ຺ກໂຕ, ໂສ ຠຄວຕາ ພ຺ຍາກໂຕ ‘ໂສຕາປນ຺ໂນ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ’ຕິ. ຕຕ຺ຣ ສຸທໍ ຠນ຺ເຕ ສມ຺ພຫຸລາ ສກ຺ກາ ສງ຺ຄມ຺ມ ສມາຄມ຺ມ ອຸຊ຺ຌາຍນ຺ຕິ ຂີຍນ຺ຕິ ວິປາເຈນ຺ຕິ ‘ອຈ຺ຉຣິຍໍ ວຕ ໂຠ, ອພ຺ຠຸຕໍ ວຕ

ໂຠ, ເອຕ຺ຖ ທານິ ໂກ ນ ໂສຕາປນ຺ໂນ ຠວິສ຺ສຕິ, ຍຕ຺ຣ ຫິ ນາມ ສຣຓານິ ສກ຺ໂກ ກາລງ຺ກໂຕ, ໂສ ຠຄວຕາ ພ຺ຍາກໂຕ ‘ໂສຕາປນ຺ໂນ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ’ຕິ, ສຣຓານິ ສກ຺ໂກ ສິກ຺ຂາຍ ອປຣິປູຣກາຣີ ອໂຫສີ’’ຕິ ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ໂຍ ໂສ ມຫານາມ ທີຆຣຕ຺ຕໍ ອຸປາສໂກ ພຸທ຺ຘໍ ສຣຓໍ ຄໂຕ, ຘມ຺ມໍ ສຣຓໍ ຄໂຕ, ສງ຺ຆໍ ສຣຓໍ ຄໂຕ, ໂສ ກຖໍ ວິນິປາຕໍ ຄຈ຺ເຉຍ຺ຍາ’’ຕິ ເອວມາທິນາ ຠຄວຕາ ຠາສິຕໍ.

ປຐມ ອນາຖປິຓ຺ຑິກສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ຉຏ຺ຐໍ ສໍຄີຕໍ ປຐມອນາຖປິຓ຺ຑິກສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອນາຖປິຓ຺ຑິກໍ ຄຫປຕິໍ ອາຣພ຺ຠ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ.

ອາຍສ຺ມາ ຠນ຺ເຕ ສາຣິປຸຕ຺ຕຕ຺ເຖໂຣ ອາຍສ຺ມຕາ ອານນ຺ທຕ຺ເຖເຣນ ປຈ຺ຉາສມເຓນ ສທ຺ຘິໍ ເຍນ ອນາຖປິຓ຺ຑິກສ຺ສ ຄຫປຕິສ຺ສ ນິເວສນໍ ເຕນຸປສງ຺ກມິ, ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ, ນິສຊ຺ຊ ໂຂ ອາຍສ຺ມາ ສາຣິປຸຕ຺ໂຕ ອນາຖປິຓ຺ຑິກໍ ຄຫປຕິໍ ອາພາຘິກໍ ທຸກ຺ຂິຕໍ ພາຬ຺ຫຄິລານໍ ເອຕທໂວຈ ‘‘ກຈ຺ຈິ ເຕ ຄຫປຕິ ຂມນີຍໍ ກຈ຺ຈິ ຍາປນີຍໍ, ກຈ຺ຈິ ທຸກ຺ຂາ ເວທນາ ປຏິກ຺ກມນ຺ຕິ, ໂນ ອຠິກ຺ກມນ຺ຕິ, ປຏິກ຺ກໂມສານໍ ປຎ຺ຎາຍຕິ, ໂນ ອຠິກ຺ກໂມ’’ຕິ, ນ ເມ ຠນ຺ເຕ ຂມນີຍໍ, ນ ຍາປນີຍໍ, ພາຬ຺ຫາ ເມ ທຸກ຺ຂາ ເວທນາ ອຠິກ຺ກມນ຺ຕິ, ໂນ ປຏິກ຺ກມນ຺ຕິ, ອຠິກ຺ກໂມສານໍ ປຎ຺ຎາຍຕິ, ໂນ ປຏິກ຺ກໂມຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຍຖາ ຣູເປນ ໂຂ ຄຫປຕິ ພຸທ຺ເຘ ອປ຺ປສາເທນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຍຣໍ ອຸປປຊ຺ຊຕິ ຕຖາຣູໂປ ເຕ ພຸທ຺ເຘ ອປ຺ປສາໂທ ນຕ຺ຖິ, ອຕ຺ຖິ ຈ ໂຂ ເຕ ຄຫປຕິ ພຸທ຺ເຘ ອເວຈ຺ຈປ຺ປສາໂທ ‘ອິຕິປິ ໂສ ຠຄວາ ອຣຫໍ ສມ຺ມາສມ຺ພຸທ຺ໂຘ…ເປ… ຠຄວາ’ຕິ ຕຎ຺ຈ ປນ ເຕ ພຸທ຺ເຘ ອເວຈ຺ຈປ຺ປສາທໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍາ’’ຕິ ເອວມາທິນາ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ.

ຍສ຺ສ ສທ຺ຘາ ຕຖາຄເຕ, ອຈລາ ສຸປ຺ປຕິຏ຺ຐິຕາ;

ສີລຎ຺ຈ ຍສ຺ສ ກລ຺ຍາຓໍ, ອຣິຍກນ຺ຕໍ ປສໍສິຕໍ.

ສງ຺ເຆ ປສາໂທ ຍສ຺ສຕ຺ຖິ, ອຸຊຸຠູຕຎ຺ຈ ທສ຺ສນໍ;

ອທລິທ຺ໂທຕິ ຕໍ ອາຫຸ, ອໂມຆໍ ຕສ຺ສ ຊີວິຕໍ.

ຕສ຺ມາ ສທ຺ຘຎ຺ຈ ສີລຎ຺ຈ, ປສາທໍ ຘມ຺ມທສ຺ສນໍ;

ອນຸຍຸຎ຺ເຊຖ ເມຘາວີ, ສຣໍ ພຸທ຺ຘານສາສນໍ.