ໂສຕາປຕ຺ຕິສໍຍຸຕ຺ຕ

ຈກ຺ກວຕ຺ຕິຣາຊສຸຕ຺ຕ

ປຸຈ຺ຉາ – ໂສຕາປຕ຺ຕິສໍຍຸຕ຺ເຕ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ປຐມໍ ສໍຄີຕໍ ຈກ຺ກວຕ຺ຕິຣາຊສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ກິຎ຺ຈາປິ ຠິກ຺ຂເວ ຣາຊາ ຈກ຺ກວຕ຺ຕີ ຈຕຸນ຺ນໍ ທີປານໍ ອິສ຺ສຣິຍາຘິປຈ຺ຈໍ ຣຊ຺ຊໍ ກາເຣຕ຺ວາ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ ເທວານໍ ຕາວຕິໍສານໍ ສຫພ຺ຍຕໍ, ໂສ ຕຕ຺ຖ ນນ຺ທເນ ວເນ ອຈ຺ຉຣາສງ຺ຆປຣິວຸໂຕ ທິພ຺ເພຫິ ຈ ປຎ຺ຈຫິ ກາມຄຸເຓຫິ ສມປ຺ປິໂຕ ສມງ຺ຄີຠູໂຕ ປຣິຈາເຣຕິ ໂສ ຈຕູຫິ ຘມ຺ເມຫິ ອສມນ຺ນາຄໂຕ, ອຖ ໂຂ ໂສ ອປຣິມຸຕ຺ໂຕວ ນິຣຍາ, ອປຣິມຸຕ຺ໂຕ ຕິຣຈ຺ຉານໂຍນິຍາ, ອປຣິມຸຕ຺ໂຕ ເປຕ຺ຕິວິສຍາ, ອປຣິມຸຕ຺ໂຕ ອປາຍທຸຄ຺ຄຕິວິນິປາຕາ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ທີຆາວຸ ອຸປາສກສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ຕຕິຍໍ ສໍຄີຕໍ ທີຆາວຸອຸປາສກສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ທີຆາວຸໍ ອຸປາສກໍ ອາຣພ຺ຠ ຠາສິຕໍ. ຠຄວາ ຠນ຺ເຕ ທີຆາວຸໍ ອຸປາສກໍ ອາພາຘິກໍ ທຸກ຺ຂິຕໍ ພາຬ຺ຫຄິລານໍ ເອຕທໂວຈ ‘‘ກຈ຺ຈິ ເຕ ທີຆາວຸ ຂມນີຍໍ, ກຈ຺ຈິ ຍາປນີຍໍ, ກຈ຺ຈິ ທຸກ຺ຂາ ເວທນາ ປຏິກ຺ກມນ຺ຕິ ໂນ ອຠິກ຺ກມນ຺ຕິ, ປຏິກ຺ກໂມສານໍ ປຎ຺ຎາຍຕິ ໂນ ອຠິກ຺ກໂມ’’ຕິ. ນ ເມ ຠນ຺ເຕ ຂມນີຍໍ, ນ ຍາປນີຍໍ ພາຬ຺ຫາ ເມ ທຸກ຺ຂາ ເວທນາ ອຠິກ຺ກມນ຺ຕິ ໂນ ປຏິກ຺ກມນ຺ຕິ, ອຠິກ຺ກໂມສານໍ ປຎ຺ຎາຍຕິ ໂນ ປຏິກ຺ກໂມຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຕສ຺ມາຕິຫ ເຕ ທີຆາວຸ ເອວໍ ສິກ຺ຂິຕພ຺ພໍ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ຠວິສ຺ສາມີ’’ຕິ ເອວມາທິນາ ຠຄວຕາ ຠາສິຕໍ.

ຍານິມານິ ຠນ຺ເຕ ຠຄວຕາ ຈຕ຺ຕາຣິ ໂສຕາປຕ຺ຕິຍງ຺ຄານິ ເທສິຕານິ, ສໍວິຊ຺ຊນ຺ເຕ ເຕ ຘມ຺ມາ ມຍິ–

ຕສ຺ມາຕິຫ ຕ຺ວໍ ທີຆາວຸ ອິເມສຸ ຈຕູສຸ ໂສຕາປຕ຺ຕິຍງ຺ເຄສຸ ປຕິຏ຺ຐາຍ ຉ ວິຊ຺ຊາຠາຄິເຍ ຘມ຺ເມ ອຸຕ຺ຕຣິ ຠາເວຍ຺ຍາສິ–

ມາ ຕ຺ວໍ ຕາຕ ທີຆາວຸ ເອວໍ ມນສາກາສິ.

ອິງ຺ຆ ຕ຺ວໍ ຕາຕ ທີຆາວຸ ຍເທວ ເຕ ຠຄວາ ອາຫ, ຕເທວ ຕ຺ວໍ ສາຘຸກໍ ມນສິກໂຣຫິ.

ປຓ຺ຑິໂຕ ຠິກ຺ຂເວ ທີຆາວຸ ອຸປາສໂກ.

ປຈ຺ຈປາທິ ຘມ຺ມສ຺ສານຸຘມ຺ມໍ.

ນ ຈ ມໍ ຘມ຺ມາຘິກຣຓໍ ວິເຫເຐສິ.

ທີຆາວຸ ຠິກ຺ຂເວ ອຸປາສໂກ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ.

ເວຬຸທ຺ວາເຣຍ຺ຍສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ໂສຕາປຕ຺ຕິສໍຍຸຕ຺ເຕ ສຕ຺ຕມໍ ສໍຄີຕໍ ເວຬຸທ຺ວາເຣຍ຺ຍສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ໂກສເລສຸ ຠນ຺ເຕ ເວຬຸທ຺ວາເຣ ນາມ ໂກສລານໍ ພ຺ຣາຫ຺ມຓ ຄາເມ ເວຬຸທ຺ວາເຣຍ຺ຍເກ ພ຺ຣາຫ຺ມຓຄຫປຕິເກ ອາຣພ຺ຠ ຠາສິຕໍ.

ເວຬຸທ຺ວາເຣຍ຺ຍກາ ຠນ຺ເຕ ພ຺ຣາຫ຺ມຓຄຫປຕິກາ ຠຄວນ຺ຕໍ ເອຕທໂວຈຸໍ ‘‘ມຍໍ ໂຠ ໂຄຕມ ເອວໍກາມາ ເອວໍຉນ຺ທາ ເອວໍອຘິປ຺ປາຍາ ປຸຕ຺ຕສມ຺ພາຘສຍນໍ ອຊ຺ຌາວເສຍ຺ຍາມ…ເປ… ຊາຕຣູປຣຊຕໍ ສາທິເຍຍ຺ຍາມ, ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ເຊຍ຺ຍາມ, ເຕສໍ ໂນ ຠວໍ ໂຄຕໂມ ອມ຺ຫາກໍ ເອວໍກາມານໍ ເອວໍຉນ຺ທານໍ ເອວໍອຘິປ຺ປາຍານໍ ຕຖາ ທມ຺ມໍ ເທເສຕຸ, ຍຖາ ມຍໍ ປຸຕ຺ຕສມ຺ພາຘສຍນໍ ອຊ຺ຌາວເສຍ຺ຍາມ…ເປ… ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ເຊຍ຺ຍາມາ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ອຕ຺ຕູປນາຍິກໍ ໂວ ຄຫປຕໂຍ ຘມ຺ມປຣິຍາຍໍ ເທເສສ຺ສາມິ, ຕໍ ສຸຓາຖ ສາຘຸກໍ ມນສິ ກໂຣຖ, ຠາສິສ຺ສາມີ’’ຕິ ເອວມາທິນາ ຠຄວຕາ ຠາສິຕໍ.