ຄາມຓິສໍຍຸຕ຺ຕ

ຈຓ຺ຑສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ຄາມຓິສໍຍຸຕ຺ເຕ ປຐມໍ ຈຓ຺ຑສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຈຓ຺ຑໍ ຄາມຓິໍ ອາຣພ຺ຠ ຠາສິຕໍ. ຈຓ຺ໂຑ ຠນ຺ເຕ ຄາມຓິ ຠຄວນ຺ຕໍ ເອຕທໂວຈ ‘‘ໂກ ນຸ ໂຂ ຠນ຺ເຕ ເຫຕຸ ໂກ ປຈ຺ຈໂຍ, ເຍນ ມິເຘກຈ຺ໂຈ ຈຓ຺ໂຑ ຈຓ຺ໂຑຕ຺ເວວ ສງ຺ຂໍ ຄຈ຺ຉຕິ. ໂກ ປນ ຠນ຺ເຕ ເຫຕຸ ໂກ ປຈ຺ຈໂຍ, ເຍນ ມິເຘກຈ຺ໂຈ ໂສຣໂຕ ໂສຣໂຕຕ຺ເວວ ສງ຺ຂໍ ຄຈ຺ຉຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ອິຘ ຄາມຓິ ເອກຈ຺ຈສ຺ສ ຣາໂຄ ອປ຺ປຫີໂນ ໂຫຕິ, ຣາຄສ຺ສ ອປ຺ປຫີນຕ຺ຕາ ປເຣ ໂກເປນ຺ຕິ, ປເຣຫິ ໂກປິຍມາໂນ ໂກປໍ ປາຕຸກໂຣຕິ, ໂສ ຈຓ຺ໂຑຕ຺ເວວ ສງ຺ຂໍ ຄຈ຺ຉຕີ’’ຕິ ເອວມາທິນາ ຠຄວຕາ ຠາສິຕໍ.

ເຂຕ຺ຕູປມສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ສຕ຺ຕມໍ ສໍຄີຕໍ ເຂຕ຺ຕູປມສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ນາຬນ຺ທາຍໍ ຠນ຺ເຕ ປາວາຣິກມ຺ພວເນ ອສິພນ຺ຘກປຸຕ຺ຕໍ ຄາມຓິໍ ອາຣພ຺ຠ ຠາສິຕໍ. ອສິພນ຺ຘກປຸຕ຺ໂຕ ຠນ຺ເຕ ຄາມຓິ ຠຄວນ຺ຕໍ ເອຕທໂວຈ ‘‘ນນຸ ຠນ຺ເຕ ຠຄວາ ສພ຺ພປາຓຠູຕຫິຕານຸກມ຺ປີ ວິຫຣຕີຕິ. ເອວໍ ຄາມຓິ ຕຖາຄໂຕ ສພ຺ພປາຓຠູຕຫິຕານຸກມ຺ປີ ວິຫຣຕີຕິ. ອຖ ກິຎ຺ຈຣຫິ ຠນ຺ເຕ ຠຄວາ ເອກຈ຺ຈານໍ ສກ຺ກຈ຺ຈໍ ຘມ຺ມໍ ເທເສຕິ, ເອກຈ຺ຈານໍ ໂນ ຕຖາ ສກ຺ກຈ຺ຈໍ ຘມ຺ມໍ ເທເສຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ເຕນ ຫິ ຄາມຓິ ຕຎ຺ເຎເວຕ຺ຖ ປຏິປຸຈ຺ຉິສ຺ສາມິ, ຍຖາ ເຕ ຂເມຍ຺ຍ, ຕຖາ ນໍ ພ຺ຍາກເຣຍ຺ຍາສີ’’ຕິ ເອວມາທິນາ ຠຄວຕາ ຠາສິຕໍ.

ສງ຺ຂຘມສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກ ມຫາເຖເຣຫິ ອຏ຺ຐມໍ ສໍຄີຕໍ ສງ຺ຂຘມສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ນາຬນ຺ທາຍໍເຍວ ຠນ຺ເຕ ປາວາຣິກມ຺ພວເນ ອສິພນ຺ຘກປຸຕ຺ຕໍ ຄາມຓິໍ ນິຄຓ຺ຐສາວກໍ ອາຣພ຺ຠ ຠາສິຕໍ. ຠຄວາ ຠນ຺ເຕ ອສິພນ຺ຘກປຸຕ຺ຕໍ ຄາມຓິໍ ນິຄຓ຺ຐສາວກໍ ເອຕທໂວຈ ‘‘ກຖໍ ນຸ ໂຂ ຄາມຓິ ນິຄຓ຺ໂຐ ນາຏປຸຕ຺ໂຕ ສາວການໍ ຘມ຺ມໍ ເທເສຕີ’’ຕິ. ເອວໍ ໂຂ ຠນ຺ເຕ ນິຄຓ຺ໂຐ ນາຏປຸຕ຺ໂຕ ສາວການໍ ຘມ຺ມໍ ເທເສຕິ ‘‘ໂຍ ໂກຈິ ປາຓໍ ອຕິປາເຕຕິ, ສພ຺ໂພ ໂສ ອາປາຍິໂກ ເນຣຍິໂກ. (ເປຍ຺ຍາລ) ຍໍພຫຸລໍ ຍໍພຫຸລໍ ວິຫຣຕິ, ເຕນ ເຕນ ນີຍຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຍໍພຫຸລໍ ຍໍພຫຸລຎ຺ຈ ຄາມຓິ ວິຫຣຕິ, ເຕນ ເຕນ ນີຍຕິ, ເອວໍ ສນ຺ເຕ ນ ໂກຈິ ອາປາຍິໂກ ເນຣຍິໂກ ຠວິສ຺ສຕິ, ຍຖາ ນິຄຓ຺ຐສ຺ສ ນາຏປຸຕ຺ຕສ຺ສ ວຈນ’’ນ຺ຕິ ເອວໍ ໂຂ ຠຄວຕາ ສໍຂິຕ຺ເຕນ ຠາສິຕໍ.

ຍໍ ພຫຸລວາທ

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ຍໍພຫຸລວາເທ ໂທໂສ ປກາສິໂຕ.

ວິສ຺ສຊ຺ຊນາ – ຕໍ ກິໍ ມຎ຺ຎສິ ຄາມຓິ, ໂຍ ໂສ ປຸຣິໂສ ປາຓາຕິປາຕີ ຣຕ຺ຕິຍາ ວາ ທິວສສ຺ສ ວາ ສມຍາສມຍໍ ອຸປາທາຍ ກຕໂມ ພຫຸຕໂຣ ສມໂຍ ຍໍ ວາໂສ ປາຓມຕິປາເຕຕິ. ຍໍ ວາ ໂສ ປາຓໍ ນາຕິປາເຕຕີຕິ ເອວມາທິນາ ຠນ຺ເຕ ຕຕ຺ຖ ຠຄວຕາ ອສິພນ຺ຘກໍ ນິຄຓ຺ຐນາຏປຸຕ຺ຕສ຺ສ ສາວກໍ ຄາມຓິໍ ປຸຈ຺ຉິຕ຺ວາ ປຸຈ຺ຉິຕ຺ວາ ຍໍພຫຸລວາເທ ໂທໂສ ປກາສິໂຕ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ອເນກໍສ ວິປາກກມ຺ມສ຺ສ ເອກໍ ສວິປາກວາເທ ໂທໂສ ປກາສິໂຕ.

ວິສ຺ສຊ຺ຊນາ – ອິຘ ຄາມຓິ ເອກຈ຺ໂຈ ສຕ຺ຖາ ເອວໍວາທີ ໂຫຕິ ເອວໍທິຏ຺ຐິ ໂຍ ໂກຈິ ປາຓມຕິປາເຕຕິ, ສພ຺ໂພ ໂສ ອາປາຍິໂກ ເນຣຍິໂກຕິ ເອວມາທິນາ ຠນ຺ເຕ ຕຕ຺ຖ ຠຄວຕາ ອເນກໍສ ກມ຺ມວິປາກສ຺ສ ເອກໍສວິປາກວາເທ ໂທໂສ ວິຕ຺ຖາເຣຕ຺ວາ ປກາສິໂຕ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ຍຖາຘມ຺ມສາສເນ ຄຸໂຓວິຠຊິຕ຺ວາ ປກາສິໂຕ.

ວິສ຺ສຊ຺ຊນາ – ອິຘ ປນ ຄາມຓິ ຕຖາຄໂຕ ໂລເກ ອຸປ຺ປຊ຺ຊຕິ ອຣຫໍ ສມ຺ມາສມ຺ພຸທ຺ໂຘ ວິຊ຺ຊາຈຣຓສມ຺ປນ຺ໂນ ສຸຄໂຕ ໂລກວິທູ ອນຸຕ຺ຕໂຣປຸຣິສ ທມ຺ມສາຣຖິ ສຕ຺ຖາເທວມນຸສ຺ສານໍ ພຸທ຺ໂຘ ຠຄວາ, ໂສ ອເນກປຣິຍາເຍນ ປາຓາຕິປາຕໍ ຄຣຫຕິ ວິຄຣຫຕິ. ‘‘ປາຓາຕິປາຕາ ວິຣມຖາ’’ຕິ ຈາຫາຕິ ເອວມາທິນາ ຠນ຺ເຕ ຠຄວຕາ ຕຕ຺ຖ ຍຖາຘມ຺ມສາສເນ ຄຸໂຓ ວິຕ຺ຖາເຣຕ຺ວາ ປກາສິໂຕ.

ຠທ຺ຣກສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ເອກາທສມໍ ສໍຄີຕໍ ຠທ຺ຣກສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ມລ຺ເລສຸ ຠນ຺ເຕ ອຸຣຸເວລກປ຺ເປນາມ ມລ຺ລານໍ ນິຄເມ ຠທ຺ຣກໍ ຄາມຓິໍ ອາຣພ຺ຠ ຠາສິຕໍ. ຠທ຺ຣໂກ ຠນ຺ເຕ ຄາມຓິ ຠຄວນ຺ຕໍ ເອຕທໂວຈ ‘‘ສາຘຸ ເມ ຠນ຺ເຕ ຠຄວາ ທຸກ຺ຂສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ເທເສຕູ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ອຫຎ຺ເຈ ເຕ ຄາມຓິ ອຕີຕມທ຺ຘານໍ ອາຣພ຺ຠ ທຸກ຺ຂສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ເທເສຍ຺ຍໍ ‘ເອວໍ ອໂຫສິ ອຕີຕມທ຺ຘານ’ນ຺ຕິ. ຕຕ຺ຣ ເຕ ສິຍາ ກງ຺ຂາ ສິຍາ ວິມຕີ’’ຕິ ເອວມາທິນາ ຠຄວຕາ ຠາສິຕໍ.

ສາຘຸ ເມ ຠນ຺ເຕ ຠຄວາ ທຸກ຺ຂສ຺ສ

ສມຸທຍຎ຺ຈ ອຕ຺ຖງ຺ຄມຎ຺ຈ ເທເສຕຸ–

‘‘ຕໍ ກິໍ ມຎ຺ຎສິ ຄາມຓິ, ອຕ຺ຖິ ອຸຣຸເວລກປ຺ເປ ມນຸສ຺ສາ’’ –

ຣາສິຍສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ຄາມຓິສໍຍຸຕ຺ເຕ ທ຺ວາທສມໍ ສໍຄີຕໍ ຣາສິຍສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ມລ຺ເລສຸ ຠນ຺ເຕ ອຸຣຸເວລກປ຺ເປນາມ ມລ຺ລານໍ ນິຄເມ ຣາສິຍໍ ຄາມຓິໍ ອາຣພ຺ຠ ຠາສິຕໍ. ຣາສິໂຍ ຠນ຺ເຕ ຄາມຓິ ຠຄວນ຺ຕໍ ອຸປສງ຺ກມິຕ຺ວາ ເອຕທໂທຈ ‘‘ສຸຕໍ ເມ ຠນ຺ເຕ ‘ສມໂຓ ໂຄຕໂມ ສພ຺ພໍ ຕປໍ ຄຣຫຕິ, ສພ຺ພໍ ຕມສ຺ສິໍ ລູຂຊີວິໍ ເອກໍເສນ ອຸປວທຕິ ອຸປກ຺ໂກສຕີ’’ຕິ. ເຍ ເຕ ຠນ຺ເຕ ເອວມາຫໍສຸ ‘ສມໂຓ ໂຄຕໂມ ສພ຺ພໍ ຕປໍ ຄຣຫຕິ, ສພ຺ພໍ ຕປສ຺ສິໍ ລູຂຊີວິໍ ເອກໍເສນ ອຸປວທຕິ ອຸປກ຺ໂກສຕີ’’ຕິ. ກຈ຺ຈິ ເຕ ຠນ຺ເຕ ຠຄວໂຕ ວຸຕ຺ຕວາທິໂນ, ນ ຈ ຠຄວນ຺ຕໍ ອຠູເຕນ ອພ຺ຠາຈິກ຺ຂນ຺ຕິ, ຘມ຺ມສ຺ສ ຈານຸຘມ຺ມໍ ພ຺ຍາກໂຣນ຺ຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ເຍ ເຕ ຄາມຓິ ເອວມາຫໍສຸ ‘‘ສມໂຓ ໂຄຕໂມ ສພ຺ພໍ ຕປໍ ຄຣຫຕິ, ສພ຺ພໍ ຕປສ຺ສິໍ ລູຂຊີວິໍ ເອກໍເສນ ອຸປວທຕິ ອຸປກ຺ໂກສຕີ’’ຕິ ເອວມາທິນາ ຠຄວຕາ ຠາສິຕໍ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ຄຣຫິຕພ຺ພາຄຣຫິຕພ຺ພາ ກາມໂຠຄິໂນ ວິຕ຺ຖາເຣນ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ຕໂຍ ໂຂ ເມ ຄາມຓິ ກາມໂຠຄິໂນ ສນ຺ໂຕ ສໍວິຊ຺ຊມານາ ໂລກສ຺ມິໍ. ກຕເມ ຕໂຍ. ອິຘ ຄາມຓິ ເອກຈ຺ໂຈ ກາມໂຠຄີ ອຘມ຺ເມນ ໂຠເຄ ປຣິເຍສຕິ ສາຫເສນ, ອຘມ຺ເມນ ໂຠເຄ ປຣິເຍສິຕ຺ວາ ສາຫເສນ ນ ອຕ຺ຕານໍ ສຸເຂຕິ ນ ປີເຓຕິ, ນ ສໍວິຠຊຕິ ນ ປຸຎ຺ຎານິ ກໂຣຕີຕິ ເອວມາທິນາ ຠນ຺ເຕ ຕຕ຺ຖ ຠຄວຕາ ຄຣຫິຕພ຺ພາຄຣຫິຕພ຺ພາ ກາມໂຠຄິໂນ ວິຕ຺ຖາເຣນ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ຄຣຫິຕພ຺ພາຄຣຫິຕພ຺ພາ ຕປສ຺ສິໂນ ລູຂຊີວິໂນ ວິຕ຺ຖາເຣນ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ຕໂຍ ເມ ຄາມຓິ ຕປສ຺ສິໂນ ລູຂຊີວິໂນ ສນ຺ໂຕ ສໍວິຊ຺ຊມານາ ໂລກສ຺ມິໍ. ກຕເມ ຕໂຍ. ອິຘ ຄາມຓີ ເອກຈ຺ໂຈ ຕປສ຺ສີ ລູຂຊີວີ ສທ຺ຘາ ອຄາຣສ຺ມາ ອນຄາຣິຍໍ ປພ຺ພຊິໂຕ ໂຫຕິ ‘‘ອປ຺ເປວ ນາມ ກຸສລໍ ຘມ຺ມໍ ອຘິຄຈ຺ເຉຍ຺ຍໍ, ອປ຺ເປວ ນາມ ອຸຕ຺ຕຣິມນຸສ຺ສຘມ຺ມາ ອລມຣິຍຎາຓທສ຺ສນວິເສສໍ ສຈ຺ຉິກເຣຍ຺ຍ’’ນ຺ຕິ, ໂສ ອຕ຺ຕານໍ ອາຕາເປຕິ ປຣິຕາເປຕິ, ກຸສລຎ຺ຈ ຘມ຺ມໍ ນາຘິຄຈ຺ຉຕິ, ອຸຕ຺ຕຣິ ຈ ມນຸສ຺ສຘມ຺ມາ ອລມຣິຍຎາຓທສ຺ສນວິເສສໍ ນ ສຈ຺ຉິກໂຣຕີຕິ ເອວມາທິນາ ຠນ຺ເຕ ຕຕ຺ຖ ຠຄວຕາ ຄຣຫິຕພ຺ພາຄຣຫິຕພ຺ພາ ຕປສ຺ສິໂນ ລູຂຊີວິໂນ ວິຕ຺ຖາເຣນ ວິຠຊິຕ຺ວາ ປກາສິຕາ.