ອພ຺ຍາກຕສໍຍຸຕ຺ຕ

ເຂມາສຸຕ຺ຕ

ປຸຈ຺ຉາ – ອພ຺ຍາກຕສໍຍຸຕ຺ເຕ ປນາວຸໂສ ໂປຣາຓເກຫິ ຘມ຺ມສໍຄາຫກ ມຫາເຖເຣຫິ ປຐມໍ ສໍຄີຕໍ ເຂມາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ. ກຖຎ຺ຈ ຕໍ ຠຄວຕາປິ ປຸນ ຠາສິຕໍ.

ວິສ຺ສຊ຺ຊນາ – ອນ຺ຕຣາ ຈ ຠນ຺ເຕ ສາວຕ຺ຖິໍ ອນ຺ຕຣາ ຈ ສາເກຕໍ ໂຕຣຓວຕ຺ຖຸສ຺ມິໍ ປເທເສ ຣາຊານໍ ປເສນທິໍ ໂກສລໍ ອາຣພ຺ຠ ເຂມາຍ ຠິກ຺ຂຸນິຍາ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ເຍນ ເຂມາ ຠິກ຺ຂຸນີ ເຕນຸປສງ຺ກມິ, ອຸປສງ຺ກມິຕ຺ວາ ອຠິວາເທຕ຺ວາ ເອກມນ຺ຕໍ ນິສີທິ, ເອກມນ຺ຕໍ ນິສິນ຺ໂນ ໂຂ ຠນ຺ເຕ ຣາຊາ ປເສນທິໂກສໂລ ເຂມໍ ຠິກ຺ຂຸນິໍ ເອຕທໂວຈ ‘‘ກິໍ ນຸໂຂ ອຍ຺ເຍ ໂຫຕິ ຕຖາຄໂຕ ປຣໍມຣຓາ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ອພ຺ຍາກຕໍ ໂຂ ເອຕໍ ມຫາຣາຊ ຠຄວຕາ ໂຫຕິ ຕຖາຄໂຕ ປຣໍ ມຣຓາ’’ຕິ ເອວມາທິນາ ເຂມາຍ ຠິກ຺ຂຸນິຍາ ຠາສິຕໍ. ຠຄວຕາ ຈ ຠນ຺ເຕ ອປເຣນ ສມເຍນ ຣຎ຺ຎາ ປເສນທິໂກສເລນ ປຸຏ຺ເຐນ ເອວເມວ ປຸນ ຠາສິຕໍ.

ກິໍ ປນຍ຺ເຍ ນໂຫຕິ ຕຖາຄໂຕ ປຣໍ ມຣຓາ.

ກຸຕູຫລສາລາສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ນວມໍ ສໍຄີຕໍ ກຸຕູຫລສາລາສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ວຈ຺ຉໂຄຕ຺ຕໍ ປຣິພ຺ພາຊກໍ ອາຣພ຺ຠ ຠາສິຕໍ. ວຈ຺ຉໂຄຕ຺ໂຕ ຠນ຺ເຕ ປຣິພ຺ພາຊໂກ ຠຄວນ຺ຕໍ ອຸປສງ຺ກມິຕ຺ວາ ‘‘ປຸຣິມານິ ໂຠ ໂຄຕມ ທິວສານິ ປຸຣິມຕຣານິ ສມ຺ພຫຸລານໍ ນານາຕິຕ຺ຖິຍານໍ ສມຓພ຺ຣາຫ຺ມຓານໍ ປຣິພ຺ພາຊການໍ ກຸຕູຫລສາລາຍໍ ສນ຺ນິສິນ຺ນານໍ ສນ຺ນິປຕິຕານໍ ອຍມນ຺ຕຣກຖາ ອຸທປາທີ’’ຕິ ເອວມາທິກໍ ວຈນໍ ອໂວຈ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ອລຎ຺ຫິ ເຕ ວຈ຺ຉ ກງ຺ຂິຕຸໍ, ອລໍ ວິຈິກິຈ຺ຉິຕຸໍ. ກງ຺ຂນີເຍ ຈ ປນ ເຕ ຐາເນ ວິຈິກິຈ຺ຉາ ອຸປ຺ປນ຺ນາ’’ຕິ ເອວມາທິນາ ຠຄວຕາ ຠາສິຕໍ.