ຈິຕ຺ຕສໍຍຸຕ຺ຕ

ນິຄຓ຺ຐນາຏປຸຕ຺ຕສຸຕ຺ຕ

ປຸຈ຺ຉາ – ຈິຕ຺ຕສໍຍຸຕ຺ເຕ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ອຏ຺ຐມໍ ສໍຄີຕໍ ນິຄຓ຺ຐນາຏປຸຕ຺ຕສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ມຈ຺ຉິກາສຓ຺ເຑ ຠນ຺ເຕ ນິຄຓ຺ຐໍ ນາຏປຸຕ຺ຕໍ ອາຣພ຺ຠ ຈິຕ຺ເຕນ ຄຫປຕິນາ ຠາສິຕໍ. ນິຄຓ຺ໂຐ ຠນ຺ເຕ ນາຏປຸຕ຺ໂຕ ຈິຕ຺ຕໍ ຄຫປຕິໍ ເອຕທໂວຈ ‘‘ສທ຺ທຫສິ ຕ຺ວໍ ຄຫປຕິ ສມຓສ຺ສ ໂຄຕມສ຺ສ ອຕ຺ຖິ ອວິຕກ຺ໂກ ອວິຈາໂຣ ສມາຘິ, ອຕ຺ຖິ ວິຕກ຺ກວິຈາຣານໍ ນິໂຣໂຘ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ນ ຂ຺ວາຫໍ ເອຕ຺ຖ ຠນ຺ເຕ ຠຄວໂຕ ສທ຺ຘາຍ ຄຈ຺ຉາມິ, ອຕ຺ຖິ ອວິຕກ຺ໂກ ອວິຈາໂຣ ສມາຘິ, ອຕ຺ຖິ ວິຕກ຺ກວິຈາຣານໍ ນິໂຣໂຘ’’ຕິ ເອວມາທິນາ ຈິຕ຺ເຕນ ຄຫປຕິນາ ຠາສິຕໍ.

ອິທໍ ຠວນ຺ໂຕ ປສ຺ສນ຺ຕຸ.

ຍາວ ອຸຊຸໂກ ຈາຍໍ ຈິຕ຺ໂຕ ຄຫປຕິ.

‘‘ອຫໍ ໂຂ ຠນ຺ເຕ ຍາວເທວ ອາກງ຺ຂາມິ, ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ສວິຕກ຺ກໍ ສວິຈາຣໍ ວິເວກຊໍ ປີຕິສຸຂໍ ປຐມໍ ຌານໍ ອຸປສມ຺ປຊ຺ຊ ວິຫຣາມິ’’ –

ອິທໍ ຠວນ຺ໂຕ ປສ຺ສນ຺ຕຸ.

ອເຈລກສ຺ສປສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ນວມໍ ສໍຄີຕໍ ອເຈລກສ຺ສປສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຕຕ຺ເຖວ ຠນ຺ເຕ ມຈ຺ຉິກາສຓ຺ເຑ ອເຈລໍ ກສ຺ສປໍ ອາຣພ຺ຠ ຈິຕ຺ເຕນ ຄຫປຕິນາ ຠາສິຕໍ. ອເຈໂລ ຠນ຺ເຕ ກສ຺ສໂປ ຈິຕ຺ຕໍ ຄຫປຕິໍ ເອຕທໂວຈ ‘‘ອິເມຫິ ປນ ເຕ ຄຫປຕິ ຕິໍສມຕ຺ເຕຫິ ວສ຺ເສຫິ ອຕ຺ຖິ ໂກຈິ ອຸຕ຺ຕຣິມນຸສ຺ສຘມ຺ໂມ ອລມຣິຍຎາຓທສ຺ສນວິເສໂສ ອຘິຄໂຕ ຜາສຸວິຫາໂຣ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຄິຫິໂນປິ ສິຍາ ຠນ຺ເຕ ອຫຎ຺ຫິ ຠນ຺ເຕ ຍາວເທວ ອາກງ຺ຂາມິ, ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ສວິຕກ຺ກໍ ສວິຈາຣໍ ວິເວກຊໍ ປີຕິສຸຂໍ ປຐມໍ ຌານໍ ອຸປສມ຺ປຊ຺ຊ ວິຫຣາມີ’’ຕິ ເອວມາທິນາ ຈິຕ຺ເຕນ ຄຫປຕິນາ ຠາສິຕໍ.