ກສ຺ສປສໍຍຸຕ຺ຕ

ຈນ຺ທູປມສຸຕ຺ຕ

ປຸຈ຺ຉາ – ກສ຺ສປສໍຍຸຕ຺ເຕ ປນາວຸໂສ ຈນ຺ທູປມສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ຈນ຺ທູປມາ ຠິກ຺ຂເວ ກຸລານິ ອຸປສງ຺ກມຖ ອປກສ຺ເສວ ກາຍໍ ອປກສ຺ສ ຈິຕ຺ຕໍ ນິຈ຺ຈນວກາ ກຸເລສຸ ອປ຺ປຄພ຺ຠາ. ເສຍ຺ຍຖາປິ ຠິກ຺ຂເວ ປຸຣິໂສ ຊຣຸທປານໍ ວາ ໂອໂລເກຍ຺ຍ ປພ຺ພຕວິສມໍ ວາ ນທີວິທຸຄ຺ຄໍ ວາ ອປກສ຺ເສວ ກາຍໍ ອປກສ຺ສ ຈິຕ຺ຕໍ. ເອວເມວ ໂຂ ຠິກ຺ຂເວ ຈນ຺ທູປມາ ກຸລານິ ອຸປສງ຺ກມຖ ອປກສ຺ເສວ ກາຍໍ ອປກສ຺ສ ຈິຕ຺ຕໍ ນິຈ຺ຈນວກາ ກຸເລສຸ ອປ຺ປຄພ຺ຠາ’’ຕິ ເອວມາທິນາ ຠຄວຕາ ຠາສິຕໍ.

ຕໍ ກິໍ ມຎ຺ຎຖ ຠິກ຺ຂເວ, ກຖໍ ຣູປາ ຠິກ຺ຂຸ ອຣຫຕິ ກຸລານິ ອຸປສງ຺ກມິຕຸໍ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ປຣິສຸທ຺ຘາປຣິສຸທ຺ຘ ຘມ຺ມເທສນໍ ທສ຺ເສຕ຺ວາ ຠິກ຺ຂູນໍ ໂອວາໂທ ທິນ຺ໂນ.

ວິສ຺ສຊ຺ຊນາ – ‘‘ຕໍ ກິໍ ມຎ຺ຎຖ ຠິກ຺ຂເວ, ກຖໍ ຣູປສ຺ສ ຠິກ຺ຂຸໂນ ອປຣິສຸທ຺ຘາ ຘມ຺ມເທສນາ ໂຫຕິ, ກຖໍ ຣູປສ຺ສ ຠິກ຺ຂຸໂນ ປຣິສຸທ຺ຘາ ຘມ຺ມເທສນາ ໂຫຕີ’’ຕິ ເອວມາທິນາ ປຣິສຸທ຺ຘາປຣິສຸທ຺ຘຘມ຺ມເທສນາ ວິຕ຺ຖາຣໂຕ ທສ຺ເສຕ຺ວາ ‘‘ກສ຺ສເປນ ວາ ຫິ ໂວ ຠິກ຺ຂເວ ໂອວທິສ຺ສາມິ ໂຍ ວາ ປນສ຺ສ ກສ຺ສປສທິໂສ, ໂອວທິເຕຫິ ຈ ປນ ໂວ ຕຖຕ຺ຕາຍ ປຏິປຊ຺ຊິຕພ຺ພ’’ນ຺ຕິ. ເອວໍ ໂຂ ຠນ຺ເຕ ຠຄວໂຕ ຠິກ຺ຂູນໍ ໂອວາໂທ ທິນ຺ໂນ.

ໂຍ ຫິ ໂກຈິ ຠິກ຺ຂເວ ຠິກ຺ຂຸ ເອວໍຈິຕ຺ໂຕ ປເຣສໍ ຘມ຺ມໍ ເທເສຕິ ‘‘ອໂຫ ວຕ ເມ ຘມ຺ມໍ ສຸເຓຍ຺ຍຸໍ, ສຸຕ຺ວາ ຈ ປນ ຘມ຺ມໍ ປສີເທຍ຺ຍຸໍ, ປສນ຺ນາ ຈ ເມ ປສນ຺ນາກາຣໍ ກເຣຍ຺ຍຸໍ–

ສ຺ວາກ຺ຂາໂຕ ຠຄວຕາ ຘມ຺ໂມ ສນ຺ທິຏ຺ຐິໂກ ອກາລິໂກ ເອຫິ ປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫິ–

ກສ຺ສເປນ ວາ ຫິ ໂວ ຠິກ຺ຂເວ ໂອວທິສ຺ສາມິ ໂຍ ວາ ປນສ຺ສ ກສ຺ສປສທິໂສ, ໂອວທິເຕຫິ ຈ ປນ ໂວ ຕຖຕ຺ຕາຍ ປຏິປຊ຺ຊິຕພ຺ພໍ–

ກຸລູປກສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ກສ຺ສປສໍຍຸຕ຺ເຕ ຈຕຸຕ຺ຖໍ ກຸລູປກສຸຕ຺ຕໍ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ຕໍ ກິໍ ມຎ຺ຎຖ ຠິກ຺ຂເວ, ກຖໍ ຣູໂປ ຠິກ຺ຂຸ ອຣຫຕິ ກຸລູປໂກ ໂຫຕຸໍ, ກຖໍ ຣູໂປ ຠິກ຺ຂຸ ນ ອຣຫຕິ ກຸລູປໂກ ໂຫຕຸ’’ນ຺ຕິ ເອວມາທິນາ ຠຄວຕາ ຠາສິຕໍ.

ກສ຺ສເປນ ວາ ຫິ ໂວ ຠິກ຺ຂເວ ໂອວທິສ຺ສາມິ ໂຍ ວາ ປນສ຺ສ ກສ຺ສປສທິໂສ, ໂອວທິເຕຫິ ຈ ປນ ໂວ ຕຖຕ຺ຕາຍ ປຏິປຊ຺ຊິຕພ຺ພໍ.

ທຸຕິຍ ໂອວາທສຸຕ຺ຕ

ປຸຈ຺ຉາ – ຕຕ຺ເຖວາວຸໂສ ຠຄວຕາ ທຸຕິຍ ໂອວາທສຸຕ຺ຕໍ ກຕ຺ຖ ເກນ ສທ຺ຘິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອາຍສ຺ມຕາ ມຫາກສ຺ສເປນ ສທ຺ຘິໍ ‘‘ໂອວທ ກສ຺ສປ ຠິກ຺ຂູ, ກໂຣຫິ ກສ຺ສປ ຠິກ຺ຂູນໍ ຘມ຺ມິໍ ກຖໍ, ອຫໍ ວາ ກສ຺ສປ ຠິກ຺ຂູ ໂອວເທຍ຺ຍໍ ຕ຺ວໍ ວາ, ອຫໍ ວາ ຠິກ຺ຂູນໍ ຘມ຺ມິໍ ກຖໍ ກເຣຍ຺ຍໍ ຕ຺ວໍ ວາ’’ຕິ ເອວມາທິນາ ຠຄວຕາ ຠາສິຕໍ.

ຍສ຺ສ ກສ຺ສຈິ ຠນ຺ເຕ ສທ຺ຘາ ນຕ຺ຖິ ກຸສເລສຸ ຘມ຺ເມສຸ, ຫິຣີ ນຕ຺ຖິ. ໂອຕ຺ຕປ຺ປໍ ນຕ຺ຖິ. ວີຣິຍໍ ນຕ຺ຖິ. ປຎ຺ຎາ ນຕ຺ຖິ ກຸສເລສຸ ຘມ຺ເມສຸ.

ຕຕິຍ ໂອວາທສຸຕ຺ຕ

ປຸຈ຺ຉາ – ຕຕ຺ເຖວາວຸໂສ ຠຄວຕາ ຕຕິຍໂອວາທສຸຕ຺ຕໍ ກຕ຺ຖ ເກນ ສທ຺ຘິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອາຍສ຺ມຕາເຍວ ມຫາກສ຺ສເປນ ສທ຺ຘິໍ ‘‘ໂອວທ ກສ຺ສປ ຠິກ຺ຂູ. ກໂຣຫິ ກສ຺ສປ ຠິກ຺ຂູນໍ ຘມ຺ມິໍ ກຖໍ, ອຫໍ ວາ ກສ຺ສປ ຠິກ຺ຂູ ໂອວເທຍ຺ຍໍ ຕ຺ວໍ ວາ. ອຫໍ ວາ ຠິກ຺ຂູນໍ ຘມ຺ມໍ ກຖໍ ກເຣຍ຺ຍໍ ຕ຺ວໍ ວາ’’ຕິ ເອວມາທິນາ ຠຄວຕາ ຠາສິຕໍ.

ທຸພ຺ພຈາ ໂຂ ຠນ຺ເຕ ເອຕຣຫິ ຠິກ຺ຂູ ໂທວຈສ຺ສກຣເຓຫິ ຘມ຺ເມຫິ ສມນ຺ນາຄຕາ ອກ຺ຂມາ ອປ຺ປທກ຺ຂິຓຄ຺ຄາຫິໂນ ອນຸສາສນິໍ–

ສທ຺ຘມ຺ມປ຺ປຕິຣູປກສຸຕ຺ຕ

ປຸຈ຺ຉາ – ຕຕ຺ເຖວາວຸໂສ ຠຄວຕາ ປຣິໂຍສານໍ ສທ຺ຘມ຺ມປ຺ປຕິຣູປກສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍເຍວ ມຫາກສ຺ສປໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ມຫາກສ຺ສໂປ ຠຄວນ຺ຕໍ ເອຕເທໂວຈ ‘‘ໂກ ນຸ ໂຂ ຠນ຺ເຕ ເຫຕຸ ໂກ ປຈ຺ຈໂຍ, ເຍນ ປຸພ຺ເພ ອປ຺ປຕຣານິ ເຈວ ສິກ຺ຂາປທານິ ອເຫສຸໍ, ພຫຸຕຣາ ຈ ຠິກ຺ຂູ ອຎ຺ຎາຍ ສຓ຺ຐຫິໍສຸ. ໂກ ປນ ຠນ຺ເຕ ເຫຕຸ ໂກ ປຈ຺ຈໂຍ, ເຍເນຕຣຫິ ພຫຸຕຣານິ ເຈວ ສກ຺ຂາປທານິ ອປ຺ປຕຣາ ຈ ຠິກ຺ຂູ ອຎ຺ຎາຍ ສຓ຺ຐຫນ຺ຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ເອວຎ຺ເຈຕໍ ກສ຺ສປ ໂຫຕິ ສຕ຺ເຕສຸ ຫາຍມາເນສຸ ສທ຺ຘມ຺ເມ ອນ຺ຕຣຘາຍມາເນ ພຫຸຕຣານິເຈວ ສິກ຺ຂາປທານິ ໂຫນ຺ຕິ, ອປ຺ປຕຣາຈ ຠິກ຺ຂູ ອຎ຺ຎາຍ ສຓ຺ຐຫນ຺ຕີ’’ຕິ ເອວມາທິນາ ຠຄວຕາ ຠາສິຕໍ.