ລາຠສກ຺ກາຣສໍຍຸຕ຺ຕ

ມີຬ຺ຫກສຸຕ຺ຕ

ປຸຈ຺ຉາ – ເຕນາວຸໂສ…ເປ… ສມ຺ມາສມ຺ພຸທ຺ເຘນ ລາຠສກ຺ກາຣໍຍຸຕ຺ເຕ ປຎ຺ຈມໍ ສໍຄີຕໍ ມີຬ຺ຫກສຸຕ຺ຕໍ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ທາຣຸໂຓ ຠິກ຺ຂເວ ລາຠສກ຺ກາຣສິໂລໂກ ຜຣຸໂສ ອນ຺ຕຣາຍິໂກ ອນຸຕ຺ຕຣສ຺ສ ໂຍຄກ຺ເຂມສ຺ສ ອຘິຄມາຍ. ເສຍ຺ຍຖາປິ ຠິກ຺ຂເວ ມີຬ຺ຫກາ ຄູຖາທີ ຄູຖປູຣາ ປຸຓ຺ຓາ ຄູຖສ຺ສ, ປຸຣໂຕ ຈສ຺ສ ມຫາຄູຖປຸຎ຺ໂຊ, ສາ ເຕນ ອຎ຺ຎາ ມີຬ຺ຫກາ ອຕິມຎ຺ເຎຍ຺ຍ ‘‘ອຫມ຺ຫິ ຄູຖາທີ ຄູຖປູຣາ ປຸຓ຺ຓາ ຄູຖສ຺ສ, ປຸຣໂຕ ຈ ມ຺ຍາຍໍ ມຫາຄູຖປຸຎ຺ໂຊ’’ຕິ ເອວມາທິນາ ຠຄວຕາ ຠາສິຕໍ.

ຕໍ ຫິ ຕສ຺ສ ຠິກ຺ຂເວ ໂມຆປຸຣິສສ຺ສ ໂຫຕິ ທີຆຣຕ຺ຕໍ ອຫິຕາຍ ທຸກ຺ຂາຍ.

ເອວໍ ທາຣຸໂຓ ໂຂ ຠິກ຺ຂເວ ລາຠສກ຺ກາຣສິໂລໂກ.

ຕສ຺ມາຕິຫ ຠິກ຺ຂເວ ເອວໍ ສິກ຺ຂິຕພ຺ພໍ, ‘‘ອຸປ຺ປນ຺ນໍ ລາຠສກ຺ກາຣສິ ໂລກໍ ປຊຫິສ຺ສາມ, ນ ຈ ໂນ ອຸປ຺ປນ຺ໂນ ລາຠສກ຺ກາຣສິໂລໂກ ຈິຕ຺ຕໍ ປຣິຍາທາຍ ຐສ຺ສຠີ’’ຕິ, ເອວຎ຺ຫິ ໂຂ ຠິກ຺ຂເວ ສິກ຺ຂິຕພ຺ພໍ.

ເອກປຸຕ຺ຕກສຸຕ຺ຕ

ປຸຈ຺ຉາ – ຕຕ຺ໂຖ ອາວຸໂສ ໂປຣາຓເກຫິ ຘມ຺ມສໍຄາຫເກຫິ ສໍຄີຕໍ ເອກປຸຕ຺ຕກສຸຕ຺ຕໍ ກຕ຺ຖ ກໍ ອາຣພ຺ຠໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ທາຣຸໂຓ ຠິກ຺ຂເວ ລາຠສກ຺ກາຣສິໂລໂກ ກຏຸໂກ ຜຣຸໂສ ອນ຺ຕຣາຍິໂກ ອນຸຕ຺ຕຣສ຺ສ ໂຍຄກ຺ເຂມສ຺ສ ອຘິຄມາຍ, ສທ຺ຘາ ຠິກ຺ຂເວ ອຸປາສິກາ ເອກປຸຕ຺ຕກໍ ປິຍໍ ມນາປໍ ເອວໍ ສມ຺ມາອາຍາຈມານາ ອາຍາເຈຍ຺ຍ ຕາທິໂສ ຕາຕ ຠວາຫິ, ຍາທິໂສ ຈິຕ຺ໂຕ ຈ ຄຫປຕິ ຫຕ຺ຖໂກ ຈ ອາຬວໂກ’’ຕິ ເອວມາທິນາ ຠຄວຕາ ຠາສິຕໍ.

ເອສາ ຠິກ຺ຂເວ ຕຸລາ ເອຕໍ ປມາຓໍ ມມ ສາວການໍ ອຸປາສການໍ ຍທິທໍ ຈິຕ຺ໂຕ ຈ ຄຫປຕິ ຫຕ຺ຖໂກ ຈ ອາຬວໂກ.

ສເຈ ໂຂ ຕ຺ວໍ ຕາຕ ອຄາຣສ຺ມາ ອນຄາຣິຍໍ ປພ຺ພຊສິ, ຕາທິໂສ ຕາຕ ຠວາຫິ, ຍາທິສາ ສາຣິປຸຕ຺ຕໂມຄ຺ຄລ຺ລານາ.

ມາ ຈ ໂຂ ຕ຺ວໍ ຕາຕ ເສຂໍ ອປ຺ປຕ຺ຕມານສໍ ລາຠສກ຺ກາຣສິໂລໂກ ອນຸປາປຸຓາຕຸ–

ເອວໍ ທາຣຸໂຓ ຠິກ຺ຂເວ ລາຠສກ຺ກາຣສິໂລໂກ ກຏຸໂກ ຜຣຸໂສ ອນ຺ຕຣາຍິໂກ ອນຸຕ຺ຕຣສ຺ສ ໂຍຄກ຺ເຂມສ຺ສ ອຘິຄມາຍ.

ເອກວີຕຸສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຍເກຫິ ສໍຄີຕໍ ເອກຘີຕຸສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍເຍວ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ທາຣຸໂຓ ຠິກ຺ຂເວ ລາຠສກ຺ກາຣສິໂລໂກ ກຏຸໂກ ຜຣຸໂສ ອນ຺ຕຣາຍິໂກ ອນຸຕ຺ຕຣສ຺ສ ໂຍຄກ຺ເຂມສ຺ສ ອຘິຄມາຍ. ສທ຺ຘາ ຠິກ຺ຂເວ ອຸປາສິກາ ເອກໍ ຘີຕຣໍ ປິຍໍ ມນາປໍ ເອວໍ ສມ຺ມາ ອາຍາຈມານາ ອາຍາເຈຍ຺ຍ ‘ຕາທິສາ ອຍ຺ເຍ ຠວາຫິ, ຍາທິສາ ຂຸຊ຺ຊຸຕ຺ຕຣາ ຈ ອຸປາສິກາ ເວຬຸກຓ຺ຑກິຍາ ຈ ນນ຺ທມາຕາ’ຕິ. ເອສາ ຠິກ຺ຂເວ ຕຸລາ ເອຕໍ ປມາຓໍ ມມ ສາວິການໍ ອຸປາສິການໍ, ຍທິທໍ ຂຸຊ຺ຊຸຕ຺ຕຣາ ຈ ອຸປາສິກາ ເວຬຸກຓ຺ຑກິຍາ ຈ ນນ຺ທມາຕາ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ສເຈ ໂຂ ຕ຺ວໍ ອຍ຺ເຍ ອຄາຣສ຺ມາ ອນຄາຣິຍໍ ປພ຺ພຊສິ, ຠາທິສາ ອຍ຺ເຍ ຠວາຫິ, ຍາທິສາ ເຂມາ ຈ ຠິກ຺ຂຸນີ ອຸປ຺ປລວຓ຺ຓາ ຈ–

ຕສ຺ມາຕິຫ ຠິກ຺ຂເວ ເອວໍ ສິກ຺ຂິຕພ຺ພໍ.