ອນມຕຄ຺ຄສໍຍຸຕ຺ຕ

ປຖວີສຸຕ຺ຕ

ປຸຈ຺ຉາ – ອນມຕຄ຺ຄສໍຍຸຕ຺ເຕ ອາວຸໂສ ທຸຕິຍໍ ສໍຄີຕໍ ປຖວີສຸຕ຺ຕໍ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ອນມຕຄ຺ໂຄຍໍ ຠິກ຺ຂເວ ສໍສາໂຣ, ປຸພ຺ພາ ໂກຏິ ນ ປຎ຺ຎາຍຕິ ອວິຊ຺ຊານີວຣຓານໍ ສຕ຺ຕານໍ ຕຓ຺ຫາສໍໂຍຊນານໍ ສນ຺ຘາວຕໍ ສໍສຣຕໍ. ເສຍ຺ຍຖາປິ ຠິກ຺ຂເວ ປຸຣິໂສ ອິມໍ ມຫາປຖວິໍ ໂກລຏ຺ຐິມຕ຺ຕໍ ໂກລຏ຺ຐິມຕ຺ຕໍ ມຕ຺ຕິກາຄຸຬິກໍ ກຣິຕ຺ວາ ນິກ຺ຂິເປຍ຺ຍ ‘ອຍໍ ເມ ປິຍາ, ຕສ຺ສ ເມ ປິຕຸ ອຍໍ ປິຕາ’ຕິ. ອປຣິຍາທິນ຺ນາວ ຠິກ຺ຂເວ ຕສ຺ສ ປຸຣິສສ຺ສ ປິຕຸປິຕໂຣ ອສ຺ສຸ. ອຖາຍໍ ມຫາປຖວີ ປຣິກ຺ຂຍໍ ປຣິຍາທານໍ ຄຈ຺ເຉຍ຺ຍ. ຕໍ ກິສ຺ສເຫຕຸ, ອນມຕຄ຺ໂຄຍໍ ຠິກ຺ຂເວ ສໍສາໂຣ, ປຸພ຺ພາ ໂກຏິ ນ ປຎ຺ຎາຍຕິ ອວິຊ຺ຊານີວຣຓານໍ ສຕ຺ຕານໍ ຕຓ຺ຫາ ສໍໂຍຊນານໍ ສນ຺ຘາວຕໍ ສໍສຣຕໍ’’ ເອວມາທິນາ ຠຄວຕາ ຠາສິຕໍ.

ເອວໍ ທີຆຣຕ຺ຕໍ ໂວ ຠິກ຺ຂເວ ທຸກ຺ຂໍ ປຈ຺ຈນຸຠູຕໍ ຕິພ຺ພໍ ປຈ຺ຈນຸຠູຕໍ ພ຺ຍສນໍ ປຈ຺ຈນຸຠູຕໍ ກຏສີ ວຑ຺ຒິຕາ.

ອລເມວ ສພ຺ພສງ຺ຂາເຣສຸ ນິພ຺ພິນ຺ທິຕຸໍ,

ອລໍ ວິຣຊ຺ຊິຕຸໍ, ອລໍ ວິມຸຈ຺ຈິຕຸໍ,

ອສ຺ສຸສຸຕ຺ຕ

ປຸຈ຺ຉາ – ຕຕ຺ຖາວຸໂສ ຕຕິຍໍ ສໍຄີຕໍ ອສ຺ສຸສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລເຍວ ຠິກ຺ຂູ ອາຣພ຺ຠ ‘‘ຕໍ ກິໍ ມຎ຺ຎຖ ຠິກ຺ຂເວ, ກຕມໍ ນຸ ໂຂ ພຫຸຕຣໍ, ຍໍ ວາ ໂວ ອິມິນາ ທີເຆນ ອທ຺ຘຸນາ ສນ຺ຘາວຕໍ ສໍສຣຕໍ ອມນາປສມ຺ປໂຍຄາ ມນາປວິປ຺ປໂຍຄາ ກນ຺ທນ຺ຕານໍ ໂຣທນ຺ຕານໍ ອສ຺ສຸ ປສ຺ສນ຺ນໍ ປຄ຺ຆຣິຕໍ, ຍໍ ວາ ຈຕູສຸ ມຫາສມຸທ຺ເທສຸ ອຸທກ’’ນ຺ຕິ ເອວມາທິນາ ຠຄວຕາ ຠາສິຕໍ.

ສາສປສຸຕ຺ຕ

ປຸຈ຺ຉາ – ຕຕ຺ຖາວຸໂສ ຉຏ຺ຐໍ ສໍຄີຕໍ ສາສປສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ຠາສິຕໍ. ອຎ຺ຎຕໂຣ ຠນ຺ເຕ ຠິກ຺ຂຸ ຠຄວນ຺ຕໍ ເອຕທໂວຈ ‘‘ກີວທີໂຆ ນຸ ໂຂ ຠນ຺ເຕ ກປ຺ໂປ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ທີໂຆ ໂຂ ຠິກ຺ຂຸ ກປ຺ໂປ, ໂສ ນ ສຸກໂຣ ສງ຺ຂາຕຸໍ ເອຕ຺ຕການິ ວສ຺ສານິ ອິຕິວາ, (ເປຍ຺ຍາລ) ເອຕ຺ຕການິ ວສ຺ສສຕສຫສ຺ສານິ ອິຕິວາຕິ ເອວມາທິນາ ຠຄວຕາ ຠາສິຕໍ.

ຄງ຺ຄາສຸຕ຺ຕ

ປຸຈ຺ຉາ – ເຕນາວຸໂສ…ເປ… ສມ຺ມາສມ຺ພຸທ຺ເຘນ ອນມຕຄ຺ຄສໍຍຸຕ຺ເຕ ຄງ຺ຄາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອຎ຺ຎຕຣໍ ພ຺ຣາຫ຺ມຓໍ ອາຣພ຺ຠ ຠາສິຕໍ. ອຎ຺ຎຕໂຣ ຠນ຺ເຕ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ ‘‘ກີວ-

ພຫຸກາ ນຸ ໂຂ ໂຠ ໂຄຕມ ກປ຺ປາ ອພ຺ຠຕີຕາ ອຕິກ຺ກນ຺ຕາ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ພຫຸກາ ໂຂ ພ຺ຣາຫ຺ມຓ ກປ຺ປາ ອພ຺ຠຕີຕາ ອຕິກ຺ກນ຺ຕາ, ເຕ ນ ສຸກຣາ ສງ຺ຂາຕຸໍ ‘ເອຕ຺ຕກາ ກປ຺ປາ’ ອິຕິ ວາ ‘ເອຕ຺ຕການິ ກປ຺ປສຕານິ’ ອິຕິ ວາ ‘ເອຕ຺ຕການິ ກປ຺ປສຫສ຺ສານິ’ ອິຕິວາ ‘ເອຕ຺ຕການິ ກປ຺ປສຕສຫສ຺ສານິ’ ອິຕິ ວາ’’ຕິ ເອວ ມາທິນາ ຠຄວຕາ ຠາສິຕໍ.

ປຸຄ຺ຄລສຸຕ຺ຕ

ປຸຈ຺ຉາ – ປຸຄ຺ຄລສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ອນມຕຄ຺ໂຄຍໍ ຠິກ຺ຂເວ ສໍສາໂຣ, ປຸພ຺ພາໂກຏິ ນ ປຎ຺ຎາຍຕິ ອວິຊ຺ຊາ ນີວຣຓານໍ ສຕ຺ຕານໍ ຕຓ຺ຫາສໍໂຍຊນານໍ ສນ຺ຘາວຕໍ ສໍສຣຕໍ. ເອກປຸຄ຺ຄລສ຺ສ ຠິກ຺ຂເວ ກປ຺ປໍ ສນ຺ຘາວໂຕ ສໍສຣໂຕ ສິຍາ ເອວໍ ມຫາ ອຏ຺ຐິກງ຺ກໂລ ອຏ຺ຐິປຸຎ຺ໂຊ ອຏ຺ຐິຣາສິ, ຍຖາ ຍໍ ເວປຸລ຺ໂລ ປພ຺ພໂຕ. ສເຈ ສໍຫາຣໂກ ອສ຺ສ, ສມ຺ຠຕຎ຺ຈ ນ ວິນສ຺ເສຕ຺ຍາ’’ຕິ ເອວມາທິນາ ຠຄວຕາ ຠາສິຕໍ.

ທຸຄ຺ຄຕສຸຕ຺ຕ, ສຸຂິຕສຸຕ຺ຕ

ປຸຈ຺ຉາ – ຕຕ຺ຖາວຸໂສ ທຸຄ຺ຄຕສຸຕ຺ຕຎ຺ຈ ສຸຂິຕສຸຕ຺ຕຎ຺ຈ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ອນມຕຄ຺ໂຄຍໍ ຠິກ຺ຂເວ ສໍສາໂຣ, ປຸພ຺ພາ ໂກຏິ ນ ປຎ຺ຎາຍຕິ ອວິຊ຺ຊານີວຣຓານໍ ສຕ຺ຕານໍ ຕຓ຺ຫາສໍໂຍຊນານໍ ສນ຺ຘາວຕໍ ສໍສຣຕໍ. ຍໍ ຠິກ຺ຂເວ ປສ຺ເສຍ຺ຍາຖ ທຸຄ຺ຄຕໍ ທຸຣູເປຕໍ, ນິຏ຺ຐເມຕ຺ຖ ຄນ຺ຕພ຺ພໍ ‘ອມ຺ເຫຫິປິ ເອວຣູປໍ ປຈ຺ຈນຸຠູຕໍ ອິມິນາ ທີເຆນ ອທ຺ຘຸນາ’ຕິ, ຍໍ ຠິກ຺ຂເວ ປສ຺ເສຍ຺ຍາຖ ສຸຂິຕໍ ສຸສຊ຺ຊິຕໍ,

ນິຏ຺ຐເມຕ຺ຖ ຄນ຺ຕພ຺ພໍ, ‘‘ອມ຺ເຫຫິປິ ປຈ຺ຈນຸຠູຕໍ ອິມິນາ ທີເຆນ ອທ຺ຘຸນາ’’ຕິ ເອວມາທິນາ ຠຄວຕາ ຠາສິຕໍ.

ຕິໍສມຕ຺ຕສຸຕ຺ຕ

ປຸຈ຺ຉາ – ຕິໍສມຕ຺ຕສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຕິໍສມຕ຺ເຕ ປາເວຍ຺ຍເກ ຠິກ຺ຂູ ອາຣພ຺ຠ ‘‘ອນມຕຄ຺ໂຄຍໍ ຠິກ຺ຂເວ ສໍສາໂຣ, ປຸພ຺ພາໂກຏິ ນ ປຎ຺ຎາຍຕິ ອວິຊ຺ຊານີວຣຓານໍ ສຕ຺ຕານໍ ຕຓ຺ຫາສໍໂຍຊນານໍ ສນ຺ຘາວຕໍ ສໍສຣຕໍ. ຕໍ ກິໍ ມຎ຺ຎຖ ຠິກ຺ຂເວ, ກຕມໍ ນຸ ໂຂ ພຫຸຕຣໍ, ຍໍ ວາ ໂວ ອິມິນາ ທີເຆນ ອທ຺ຘຸນາ ສນ຺ຘາວຕໍ ສໍສຣຕໍ ສີສຈ຺ຉິນ຺ນານໍ ໂລຫິຕໍ ປສ຺ສນ຺ນໍ ປຄ຺ຆຣິຕໍ, ຍໍ ວາ ຈຕູສຸ ມຫາສມຸທ຺ເທສຸ ອຸທກ’’ນ຺ຕິ ເອວມາທິນາ ຠວຄຕາ ຠາສິຕໍ.

ມາຕຸສຸຕ຺ຕ

ປຸຈ຺ຉາ – ມາຕຸສຸຕ຺ຕາທີນິ ປນາວຸໂສ ຉສຸຕ຺ຕານິ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ອນມຕຄ຺ໂຄຍໍ ຠິກ຺ຂເວ ສໍສາໂຣ, ປຸພ຺ພາ ໂກຏິ ນ ປຎ຺ຎາຍຕິ ອວິຊ຺ຊານີວຣຓານໍ ສຕ຺ຕານໍ ຕຓ຺ຫາສໍໂຍຊນານໍ ສນ຺ຘາວຕໍ ສໍສຣຕໍ. ນ ໂສ ຠິກ຺ຂເວ ສຕ຺ໂຕ ສຸລຠຣູໂປ, ໂຍ ນ ມາຕາຠູຕປຸພ຺ໂພ ອິມິນາ ທີເຆນ ອທ຺ຘຸນາ. ໂຍ ນ ປິຕາຠູຕປຸພ຺ໂພ. ໂຍ ນ ຠາຕາຠູຕປຸພ຺ໂພ. ໂຍ ນ ຠຄິນິຠູຕປຸພ຺ໂພ. ໂຍ ນ ປຸຕ຺ຕຠູຕປຸພ຺ໂພ. ໂຍ ນ ຘີຕາຠູຕປຸພ຺ໂພ ອິມິນາ ທີເຆນ ອທ຺ຘຸນາ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.