ພ຺ຣຫ຺ມສໍຍຸຕ຺ຕ

ຄາຣວສຸຕ຺ຕ

ປຸຈ຺ຉາ – ພ຺ຣຫ຺ມສໍຍຸຕ຺ເຕ ອາວຸໂສ ໂປຣາເຓຫິ ມຫາກສ຺ສປເຖຣາທີຫິ ຘມ຺ມສໍຄາຫກເຖຣວເຣຫິ ທຸຕິຍໍ ສໍຄີຕໍ ຄາຣວສຸຕ຺ຕໍ ກຕ຺ຖ ກຖຎ຺ຈ ສມຸປ຺ປນ຺ນໍ.

ວິສ຺ສຊ຺ຊນາ – ອຸຣຸເວລາຍໍ ຠນ຺ເຕ ສມຸປ຺ປນ຺ນໍ. ຠຄວາ ຠນ຺ເຕ ອຸຣຸເວລາຍໍ ວິຫຣຕິ ນຊ຺ຊາ ເນຣຎ຺ຊຣາຍ ຕີເຣ ອຊປາລນິຄ຺ໂຣຘມູເລ ປຐມາຠິສມ຺ພຸທ຺ໂຘ. ອຖ ໂຂ ຠຄວໂຕ ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ ‘‘ທຸກ຺ຂໍ ໂຂ ອຄາຣໂວ ວິຫຣຕິ ອປ຺ປຕິສ຺ໂສ, ກໍ ນຸ ຂ຺ວາຫໍ ສມຓໍ ວາ ພ຺ຣາຫ຺ມຓໍ ວາ ສກ຺ກຕ຺ວາ ຄຣຸໍ ກຕ຺ວາ ອຸປນິສ຺ສາຍ ວິຫເຣຍ຺ຍ’’ນ຺ຕິ.

ອຖ ໂຂ ຠນ຺ເຕ ຠຄວໂຕ ເອຕທໂຫສິ ‘‘ອປຣິປຸຓ຺ຓສ຺ສ ໂຂ ສີລກ຺ຂນ຺ຘສ຺ສ ປາຣິປູຣິຍາ ອຎ຺ຎໍ ສມຓໍ ວາ ພ຺ຣາຫ຺ມຓໍ ວາ ສກ຺ກຕ຺ວາ ຄຣຸໍ ກຕ຺ວາ ອຸປນິສ຺ສາຍ ວິຫເຣຍ຺ຍຸໍ, ນ ໂຂ ປນາຫໍ ປສ຺ສາມິ ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ອຕ຺ຕນາ ສີລສມ຺ປນ຺ນຕຣໍ ອຎ຺ຎໍ ສມຓໍ ວາ

ພ຺ຣາຫ຺ມຓໍ ວາ, ຍມຫໍ ສກ຺ກຕ຺ວາ ຄຣຸໍ ກຕ຺ວາ ອຸປນິສ຺ສາຍ ວິຫເຣຍ຺ຍຸໍ.

ອປຣິປຸຓ຺ຓສ຺ສ ໂຂ ສມາຘິກ຺ຂນ຺ຘສ຺ສ;

ອປຣິປຸຓ຺ຓສ຺ສ ໂຂ ປຎ຺ຎາກ຺ຂນ຺ຘສ຺ສ;

ອປຣິປຸຓ຺ຓສ຺ສ ໂຂ ວິມຸຕ຺ຕິກ຺ຂນ຺ຘສ຺ສ.

ອປຣິປຸຓ຺ຓສ຺ສ ໂຂ ວິມຸຕ຺ຕິຎາຓທສ຺ສນກ຺ຂນ຺ຘສ຺ສ ປາຣິປູຣິຍາ ອຎ຺ຎໍ ສມຓໍ ວາ ພ຺ຣາຫ຺ມຓໍ ວາ ສກ຺ກຕ຺ວາ ຄຣຸໍ ກຕ຺ວາ ອຸປນິນິສ຺ສາຍ ວິຫເຣຍ຺ຍໍ. ນ ໂຂ ປນາຫໍ ປສ຺ສາມິ ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ອຕ຺ຕນາ ວິມຸຕ຺ຕິຎາຓທສ຺ສນສມ຺ປນ຺ນຕຣໍ ອຎ຺ຎໍ ສມຓໍ ວາ ພ຺ຣາຫ຺ມຓໍ ວາ, ຍມຫໍ ສກ຺ກຕ຺ວາ ຄຣຸໍ ກຕ຺ວາ ອຸປນິສ຺ສາຍ ວິຫເຣຍ຺ຍໍ. ຍໍນູນາຫໍ ຍ຺ວາຍໍ ຘມ຺ໂມ ມຍາ ອຠິສມ຺ພຸທ຺ໂຘ, ຕເມວ ຘມ຺ມໍ ສກ຺ກຕ຺ວາ ຄຣຸໍ ກຕ຺ວາ ອຸປນິສ຺ສາຍ ວິຫເຣຍ຺ຍ’’ນ຺ຕິ. ເອວໍ ໂຂ ຠນ຺ເຕ ຠຄວໂຕ ເຈຕໂສ ປຣິວິຕກ຺ກວເສນ ອຸປ຺ປນ຺ນໍ.

ເຍ ຈ ອຕີຕາ ສມ຺ພຸທ຺ຘາ, ເຍ ຈ ພຸທ຺ຘາ ອນາຄຕາ;

ໂຍ ເຈຕຣຫິ ສມ຺ພຸທ຺ໂຘ, ພຫູນໍ ໂສກນາສໂນ;

ສພ຺ເພ ສທ຺ຘມ຺ມຄຣຸໂນ, ວິຫໍສຸ ວິຫຣນ຺ຕິ ຈ;

ຕຖາປິ ວິຫຣິສ຺ສນ຺ຕິ, ເອສາ ພຸທ຺ຘານ ຘມ຺ມຕາ.

ຕສ຺ມາ ຫິ ອຕ຺ຕກາເມນ, ມຫຕ຺ຕມຠິກງ຺ຂຕາ;

ສທ຺ຘມ຺ໂມ ຄຣຸກາຕພ຺ໂພ, ສຣໍ ພຸທ຺ຘານ ສາສນໍ.

ອຎ຺ຎຣຕພ຺ຣຫ຺ມສຸຕ຺ຕ

ປຸຈ຺ຉາ- ຕຕ຺ຖາວຸໂສ ໂປຣາຓເກຫິ ມຫາກສ຺ສປາທີຫິ ຘມ຺ມສໍຄາຫກເຖຣວເຣຫິ ປຐມໍ ສໍຄີຕໍ ອຎ຺ຎຕຣພ຺ຣຫ຺ມສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ພ຺ຣຫ຺ມໂລເກ ຠນ຺ເຕ ອຎ຺ຎຕຣໍ ພ຺ຣຫ຺ມານໍ ອາຣພ຺ຠ ອາຍສ຺ມຕາ ມຫາໂມຄ຺ຄລ຺ລານຕ຺ເຖເຣນ ຠາສິຕໍ. ອຎ຺ຎຕຣສ຺ສ ຠນ຺ເຕ ພ຺ຣຫ຺ມຸໂນ ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ ໂຫຕິ ‘‘ນຕ຺ຖິ ໂສ ສມໂຓ ວາ ພ຺ຣາຫ຺ມໂຓ ວາ, ໂຍ ອິຘ ອາຄຈ຺ເຉຍ຺ຍາ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ອຊ຺ຊາປິ ເຕ ອາວຸໂສ ສາ ທິຏ຺ຐິ, ຍາ ເຕ ທິຏ຺ຐິ ປຸເຣ ອຫຸ;

ປສ຺ສສິ ວີຕິວຕ຺ຕນ຺ຕໍ, ພ຺ຣຫ຺ມໂລເກ ປຠສ຺ສຣນ຺ຕິ;

ເອວໍ ໂຂ ຠນ຺ເຕ ອາຍສ຺ມຕາ ມຫາໂມຄ຺ຄລ຺ລານຕ຺ເຖເຣນ ຠາສິຕໍ.

ອຊ຺ຊາປິ ເຕ ອາວຸໂສ ສາ ທິຏ຺ຐິ, ຍາ ເຕ ທິຏ຺ຐິ ປຸເຣ ອຫຸ;

ປສ຺ສສິ ວີຕິວຕ຺ຕນ຺ຕ, ພ຺ຣຫ຺ມໂລເກ ປຠສ຺ສຣໍ-ຫຸ–

ນ ເມ ມາຣິສ ສາ ທິຏ຺ຐິ, ຍາ ເມ ທິຏ຺ຐິ ປຸເຣ ອຫຸ;

ປສ຺ສາມິ ວີຕິວຕ຺ຕນ຺ຕໍ, ພ຺ຣຫ຺ມໂລເກ ປຠສ຺ສຣໍ;

ສ຺ວາຫໍ ອຊ຺ຊ ກຖໍ ວຊ຺ຊໍ, ອຫໍ ນິຈ຺ໂຈມ຺ຫິ ສສ຺ສໂຕ ຫຸ–

ເຕວິຊ຺ຊາ ອິທ຺ຘິປຕ຺ຕາ ຈ, ເຈໂຕປຣິຍາຍ ໂກວິທາ;

ຂີຓາສວາ ອຣຫນ຺ໂຕ, ພຫູ ພຸທ຺ຘສ຺ສ ສາວກາ-ຫຸ–

ອຣຸຓວຕີສຸຕ຺ຕ

ປຸຈ຺ຉາ – ຕຕ຺ຖາວຸໂສ ອຣຸຓວຕີສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ຠູຕປຸພ຺ພໍ ຠິກ຺ຂເວ ຣາຊາ ອໂຫສິ ອຣຸຓວາ ນາມ. ຣຎ຺ໂຎ ໂຂ ປນ ຠິກ຺ຂເວ ອຣຸຓວໂຕ ອຣຸຓວຕີ ນາມ ຣາຊຘານີ ອໂຫສີ’’ຕິ ເອວມາທິນາ ຠນ຺ເຕ ຠຄວຕາ ອຣຸຓວຕີ ສຸຕ຺ຕໍ ຠາສິຕໍ.

ອາຣມ຺ຠຖ ນິກ຺ກມຖ, ຍຸຎ຺ຊຖ ພຸທ຺ຘສາສເນ;

ຘຸນາຖ ມຈ຺ຈຸໂນ ເສນໍ, ນຬາຄາຣໍວ ກຸຎ຺ຊໂຣ;

ໂຍ ອິມສ຺ມິໍ ຘມ຺ມວິນເຍ, ອປ຺ປມຕ຺ໂຕ ວິຫສ຺ສຕິ;

ປຫາຍ ຊາຕິ ສໍສາຣໍ, ທຸກ຺ຂສ຺ສນ຺ຕໍ ກຣິສ຺ສຕິ-ຫຸ–