ພ຺ຣາຫ຺ມຓສໍຍຸຕ຺ຕ

ຘນຎ຺ຊານີສຸຕ຺ຕ

ປຸຈ຺ຉາ – ພ຺ຣາຫ຺ມຓສໍຍຸຕ຺ເຕ ອາວຸໂສ ປຐມໍ ສໍຄີຕໍ ຘນຎ຺ຊານີສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຠາຣທ຺ວາຊໂຄຕ຺ຕໍ ພ຺ຣາຫ຺ມຓໍ ອາຣພ຺ຠ ຠາສິຕໍ. ຠາຣທ຺ວາຊໂຄຕ຺ໂຕ ຠນ຺ເຕ ພ຺ຣາຫ຺ມໂຓ ຠຄວນ຺ຕໍ ອຸປສງ຺ກມິຕ຺ວາ ຄາຖາຍ ອຊ຺ຌຠາສິ.

‘‘ກິໍ ສຸ ເຉຕ຺ວາ ສຸຂໍ ເສຕິ,

ກິໍ ສຸ ເຉຕ຺ວາ ນ ໂສຈຕິ;

ກິສ຺ສສ຺ສຸ ເອກຘມ຺ມສ຺ສ,

ວຘໍ ໂຣເຈສິ ໂຄຕມາ’’ຕິ–

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ໂກຘໍ ເຉຕ຺ວາ ສຸຂໍ ເສຕິ;

ໂກຘໍ ເຉຕ຺ວາ ນ ໂສຈຕິ;

ໂກຘສ຺ສ ວິສມູລສ຺ສ,

ມຘຸຣຄ຺ຄສ຺ສ ພ຺ຣາຫ຺ມຓ;

ວຘໍ ອຣິຍາ ປສໍສນ຺ຕິ,

ຕຎ຺ຫິ ເຉຕ຺ວາ ນ ໂສຈຕີ’’ຕິ;

ເອວໍ ໂຂ ຠນ຺ເຕ ຠຄວຕາ ຠາສິຕໍ.

ກິໍ ສຸ ເຉຕ຺ວາ ສຸຂໍເສຕິ, ກິໍ ສຸ ເຉຕ຺ວາ ນ ໂສຈຕິ;

ກິສ຺ສສ຺ສຸ ເອກຘມ຺ມສ຺ສ, ວຘໍ ໂຣເຈສິ ໂຄຕມ–

ປຸຈ຺ຉາ – ອິມຎ຺ຈ ປນາວຸໂສ ຘມ຺ມເທສນໍ ສຸຕ຺ວາ ຠາຣທ຺ວາຊໂຄຕ຺ໂຕ ພ຺ຣາຫ຺ມໂຓ ອິມສ຺ມິໍ ຘມ຺ມວິນເຍ ປສນ຺ໂນ ກີທິສໍ ປສນ຺ນາກາຣມກາສິ, ກີວຕ຺ຕກຎ຺ຈ ອຕ຺ຖໍ ສມ຺ປາເທສິ.

ວິສ຺ສຊ຺ຊນາ – ອິມຎ຺ຈ ປນ ຠນ຺ເຕ ຘມ຺ມເທສນໍ ສຸຕ຺ວາ ຠາຣທ຺ວາຊໂຄຕ຺ໂຕ ພ຺ຣາຫ຺ມໂຓ ‘‘ອຠິກ຺ກນ຺ຕໍ ໂຠ ໂຄຕມ, ອຠິກ຺ກນ຺ຕໍ ໂຠ ໂຄຕມ, ເສຍ຺ຍຖາປິ ໂຠ ໂຄຕມ ນິກ຺ກຸຊ຺ຊິຕໍ ວາ ອຸກ຺ກຸຊ຺ເຊຍ຺ຍ, ປຏິຈ຺ຉນ຺ນໍ ວາ ວິວເຣຍ຺ຍ, ມູຬ຺ຫສ຺ສ ວາ ມຄ຺ຄໍ ອາຈິກ຺ເຂຍ຺ຍ, ອນ຺ຘກາເຣ ວາ ເຕລປຊ຺ໂຊຕໍ ຘາເຣຍ຺ຍ ຈກ຺ຂຸມນ຺ໂຕ ຣູປານິ ທກ຺ຂນ຺ຕີ’’ຕິ ເອວມາທິນາ ຠນ຺ເຕ ອິມສ຺ມິໍ ຘມ຺ມວິນເຍ ປສນ຺ໂນ ປສນ຺ນາກາຣມກາສິ. ອິມຎ຺ຈ ປນ ຠນ຺ເຕ ຘມ຺ມເທສນໍ ສຸຕ຺ວາ ຠາຣທ຺ວາຊໂຄຕ຺ໂຕ ພ຺ຣາຫ຺ມໂຓ ຠຄວໂຕ ສນ຺ຕິເກ ປພ຺ພຊ຺ຊໍ ອຸປສມ຺ປທໍ ຍາຈິຕ຺ວາ ອຈິຣູປສມ຺ປນ຺ໂນ ຍາວ ອຣຫຕ຺ຕໍ ສມ຺ປາເທສິ.

ອກ຺ໂກສສຸຕ຺ຕ

ປຸຈ຺ຉາ – ອກ຺ໂກສກຠາຣທ຺ວາຊສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອກ຺ໂກສກຠາຣທ຺ວາຊໍ ພ຺ຣາຫ຺ມຓໍ ອາຣພ຺ຠ ຠາສິຕໍ. ອກ຺ໂກສກຠາຣທ຺ວາໂຊ ຠນ຺ເຕ ພ຺ຣາຫ຺ມໂຓ ຠຄວນ຺ຕໍ ອຸປສງ຺ກມິຕ຺ວາ ອສພ຺ຠາຫິ ຜຣຸສາຫິ ວາຈາຫິ ຠຄວນ຺ຕໍ ອກ຺ໂກສຕິ ປຣິຠາສຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຕໍ ກິໍ ມຎ຺ຎສິ ພ຺ຣາຫ຺ມຓ, ອປິ ນຸໂຂ ເຕ ອາຄຈ຺ຉນ຺ຕິ ມິຕ຺ຕາມຈ຺ຈາ ຎາຕິສາໂລຫິຕາ ອຕິຕິໂຍ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ອກ຺ໂກຘສ຺ສ ກຸໂຕ ໂກໂຘ,

ທນ຺ຕສ຺ສ ສມຊີວິໂນ;

ສມ຺ມທຎ຺ຎາ ວິມຸຕ຺ຕສ຺ສ,

ອຸປສນ຺ຕສ຺ສ ຕາທິໂນ.

ຕສ຺ເສວ ເຕນ ປາປິໂຍ,

ໂຍ ກຸທ຺ຘໍ ປຏິກຸຊ຺ຌຕິ;

ກຸທ຺ຘໍ ອປ຺ປຏິກຸຊ຺ຌນ຺ໂຕ,

ສງ຺ຄາມໍ ເຊຕິ ທຸຊ຺ຊຍໍ.

ອຸຠິນ຺ນມຕ຺ຖໍ ຈຣຕິ,

ອຕ຺ຕໂນ ຈ ປຣສ຺ສ ຈ;

ປຣໍ ສງ຺ກຸປິຕໍ ຎຕ຺ວາ,

ໂຍ ສໂຕ ອຸປສມ຺ມຕິ.

ອຸຠິນ຺ນໍ ຕິກິຈ຺ຉນ຺ຕານໍ,

ອຕ຺ຕໂນ ຈ ປຣສ຺ສ ຈ;

ຊນາ ມຎ຺ຎນ຺ຕິ ພາໂລຕິ,

ເຍ ຘມ຺ມສ຺ສ ອໂກວິທາ.

ປຸຈ຺ຉາ – ອິມຎ຺ຈ ປນາວຸໂສ ຘມ຺ມເທສນໍ ສຸຕ຺ວາ ອກ຺ໂກສກຠາຣທ຺ວາໂຊ ພ຺ຣາຫ຺ມໂຓ ອິມສ຺ມິໍ ຘມ຺ມວິນເຍ ປສນ຺ໂນ ກີທິສໍ ປສນ຺ນາກາຣມກາສິ. ກີວຕ຺ຕກຎ຺ຈ ອຕ຺ຖໍ ສມ຺ປາເທສິ.

ວິສ຺ສຊ຺ຊນາ – ອິມຎ຺ຈ ປນ ຠນ຺ເຕ ຘມ຺ມເທສນໍ ສຸຕ຺ວາ ອກ຺ໂກສກຠາຣທ຺ວາໂຊ ພ຺ຣາຫ຺ມໂຓ ‘‘ອຠິກ຺ກນ຺ຕໍ ໂຠ ໂຄຕມ, ອຠິກ຺ກນ຺ຕໍ ໂຠ ໂຄຕມາ’’ຕິ ເອວມາທິນາ ອິມສ຺ມິໍ ຘມ຺ມວິນເຍ ປສນ຺ໂນ ປສນ຺ນາກາຣມກາສິ. ຍາວ ອຣຫຕ຺ຕາ ຈ ປນ ມຫນ຺ຕໍ ອຕ຺ຖໍ ສມ຺ປາເທສິ.

ພຫຸຘີຕຣສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ ຊານຕາ…ເປ… ສມ຺ມາສມ຺ພຸທ຺ເຘນ ພ຺ຣາຫ຺ມຓສໍຍຸຕ຺ເຕ ພຫຸຘີຕຣສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ໂກສເລສຸ ຠນ຺ເຕ ອຎ຺ຎຕຣສ຺ມິໍ ວນສຓ຺ເຑ ອຎ຺ຎຕຣໍ ຠາຣທ຺ວາຊໂຄຕ຺ຕໍ ພ຺ຣາຫ຺ມຓໍ ອາຣພ຺ຠ ຠາສິຕໍ. ອຎ຺ຎຕໂຣ ຠນ຺ເຕ ຠາຣທ຺ວາຊໂຄຕ຺ໂຕ ພ຺ຣາຫ຺ມໂຓ ໂຄເຓ ນຏ຺ເຐ ປຣິເຍສນ຺ໂຕ ຠຄວໂຕ ສນ຺ຕິເກ ອິມາ ຄາຖາໂຍ ອຠາສິ.

‘‘ນ ຫິ ນູນິມສ຺ສ ສມຓສ຺ສ, ພລີພທ຺ທາ ຈຕຸທ຺ທສ;

ອຊ຺ຊສຏ຺ຐິໍ ນ ທິສ຺ສນ຺ຕິ, ເຕນາຍໍ ສມໂຓ ສຸຂີ;

ນ ຫິ ນູນິມສ຺ສ ສມຓສ຺ສ, ຕິລາເຂຕ຺ຕສ຺ມິ ປາປກາ;

ເອກປຓ຺ຓາ ທຸປຓ຺ຓາ ຈ, ເຕນາຍໍ ສມໂຓ ສຸຂີ.

(ເປຍ຺ຍາລ)

ນ ຫິ ນູນິມສ຺ສ ສມຓສ຺ສ, ປຈ຺ຈູສມ຺ຫິ ອິຓາຍິກາ;

ເທຖ ເທຖາຕິ ໂຈເທນ຺ຕິ, ເຕນາຍໍ ສມໂຓ ສຸຂີ’’ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ນ ຫິ ມຍ຺ຫໍ ພ຺ຣາຫ຺ມຓ, ພລີພທ຺ທາ ຈຕຸທ຺ທສ;

ອຊ຺ຊສຏ຺ຐິໍ ນ ທິສ຺ສນ຺ຕິ, ເຕນາຫໍ ພ຺ຣາຫ຺ມຓາ ສຸຂີ;

ນ ຫິ ມຍ຺ຫໍ ພ຺ຣາຫ຺ມຓ, ຕິລາເຂຕ຺ຕສ຺ມິ ປາປກາ;

ເອກປຓ຺ຓາ ທຸປຓ຺ຓາ ຈ, ເຕນາຫໍ ພ຺ຣາຫ຺ມຓາ ສຸຂີ.

(ເປຍ຺ຍາລ)

ນ ຫິ ມຍ຺ຫໍ ພ຺ຣາຫ຺ມຓ, ປຈ຺ຈູສມ຺ຫິ ອິຓາຍິກາ;

ເທຖ ເທຖາຕິ ໂຈເທນ຺ຕິ, ເຕນາຫໍ ພ຺ຣາຫ຺ມຓາ ສຸຂີຕິ.

ເອວໍ ໂຂ ຠນ຺ເຕ ຠຄວຕາ ຠາສິຕໍ.

(໑)

ນ ຫິ ນູນິມສ຺ສ ສມຓສ຺ສ, ພລີພທ຺ທາ ຈຕຸທ຺ທສ;

ອຊ຺ຊສຏ຺ຐິໍ ນ ທິສ຺ສນ຺ຕິ, ເຕນາຫໍ ສມໂຓ ສຸຂີ.

(໒)

ນ ຫິ ນູນິມສ຺ສ ສມຓສ຺ສ, ຕິລາເຂຕ຺ຕສ຺ມິ ປາປກາ;

ເອກປຓ຺ຓາ ທຸປຓ຺ຓາ ຈ, ເຕນາຍໍ ສມໂຓ ສຸຂີ.

(໓)

ນ ຫິ ນູນິມສ຺ສ ສມຓສ຺ສ, ຕຸຈ຺ຉໂກຏ຺ຐສ຺ມິ ມູສິກາ;

ອຸສ຺ໂສຬ຺ຫິກາຍ ນຈ຺ຈນ຺ຕິ, ເຕນາຍໍ ສມໂຓ ສຸຂີ.

(໔)

ນ ຫິ ນູນິມສ຺ສ ສມຓສ຺ສ, ສນ຺ຖາໂຣ ສຕ຺ຕມາສິໂກ;

ອຸປ຺ປາຏເກຫິ ສຎ຺ຉນ຺ໂນ, ເຕນາຍໍ ສມໂຓ ສຸຂີ.

(໕)

ນ ຫິ ນູນິມສ຺ສ ສມຓສ຺ສ, ວິຘວາ ສຕ຺ຕ ຘີຕໂຣ;

ເອກປຸຕ຺ຕາ ທຸປຸຕ຺ຕາ ຈ, ເຕນາຍໍ ສມໂຓ ສຸຂີ.

(໖)

ນ ຫິ ນູນິມສ຺ສ ສມຓສ຺ສ, ປິງ຺ຄລາ ຕິລກາຫຕາ;

ໂສຕ຺ຕໍ ປາເທນ ໂພເຘຕິ, ເຕນາຍໍ ສມໂຓ ສຸຂີ.

(໗)

ນ ຫິ ນູນິມສ຺ສ ສມຓສ຺ສ, ປຈ຺ຈູສມິ ອິຓາຍິກາ;

ເທຖ ເທຖາຕິ ໂຈເທນ຺ຕິ, ເຕນາຍໍ ສມໂຓ ສຸຂີ.

(໑)

ນ ຫິ ມຍ຺ຫໍ ພ຺ຣາຫ຺ມຓ, ພລີພທ຺ທາ ຈຕຸທ຺ທສ;

ອຊ຺ຊສຏ຺ຐິໍ ນ ທິສ຺ສນ຺ຕິ, ເຕນາຫໍ ພ຺ຣາຫ຺ມຓາ ສຸຂີ.

(໒)

ນ ຫິ ມຍ຺ຫໍ ພ຺ຣາຫ຺ມຓ, ຕິລາເຂຕ຺ຕສ຺ມິ ປາປກາ;

ເອກປຓ຺ຓາ ທຸປຓ຺ຓາ ຈ, ເຕນາຫໍ ພ຺ຣາຫ຺ມຓາ ສຸຂີ.

(໓)

ນ ຫິ ມຍ຺ຫໍ ພ຺ຣາຫ຺ມຓ, ຕຸຈ຺ຉໂກຏ຺ຐສ຺ມິ ມູສິກາ;

ອຸສ຺ໂສຬ຺ຫີກາຍ ນຈ຺ຈນ຺ຕິ, ເຕນາຫໍ ພ຺ຣາຫ຺ມຓາ ສຸຂີ.

(໔)

ນ ຫິ ມຍ຺ຫໍ ພ຺ຣາຫ຺ມຓ, ສນ຺ຖາໂຣ ສຕ຺ຕມາສິໂກ;

ອຸປ຺ປາຏເກຫິ ສຎ຺ຉນ຺ໂນ, ເຕນາຫໍ ພ຺ຣາຫ຺ມຓາ ສຸຂີ.

(໕)

ນ ຫິ ມຍ຺ຫໍ ພ຺ຣາຫ຺ມຓ, ວິຘວາ ສຕ຺ຕ ຘີຕໂຣ;

ເອກປຸຕ຺ຕາ ທຸປຸຕ຺ຕາ ຈ, ເຕນາຫໍ ພ຺ຣາຫ຺ມຓາ ສຸຂີ.

(໖)

ນ ຫິ ມຍ຺ຫໍ ພ຺ຣາຫ຺ມຓ, ປິງ຺ຄລາ ຕິລກາຫຕາ;

ໂສຕ຺ຕໍ ປາເທນ ໂພເຘຕິ, ເຕນາຫໍ ພ຺ຣາຫ຺ມຓາ ສຸຂີ.

(໗)

ນ ຫິ ມຍ຺ຫໍ ພ຺ຣາຫ຺ມຓ, ປຈ຺ຈູສມ຺ຫິ ອິຓາຍິກາ;

ເທຖ ເທຖາຕິ ໂຈເທນ຺ຕິ, ເຕນາຫໍ ພ຺ຣາຫ຺ມຓາ ສຸຂີ.

ປຸຈ຺ຉາ – ອິມຎ຺ຈ ປນາວຸໂສ ຘມ຺ມເທສນໍ ສຸຕ຺ວາ ໂສ ຠາຣທ຺ວາຊໂຄຕ຺ໂຕ ພ຺ຣາຫ຺ມໂຓ ອິມສ຺ມິໍ ຘມ຺ມວິນເຍ ປສນ຺ໂນ ກີທິສໍ ປສນ຺ນາກາຣມກາສິ. ກີວ ມຫນ຺ຕຎ຺ຈ ອິມສ຺ມິໍ ຘມ຺ມວິນເຍ ອຕ຺ຖໍ ສມ຺ປາເທສິ.

ວິສ຺ສຊ຺ຊນາ – ອິມຎ຺ຈ ປນ ຠນ຺ເຕ ຘມ຺ມເທສນໍ ສຸຕ຺ວາ ໂສ ຠາຣທ຺ວາຊໂຄຕ຺ໂຕ ພ຺ຣາຫ຺ມໂຓ ‘‘ອຠິກ຺ກນ຺ຕໍ ໂຠ ໂຄຕມ ອຠິກ຺ກນ຺ຕໍ ໂຠ ໂຄຕມ, ເສຍ຺ຍຖາປິ ໂຠໂຄຕມ, ນິກ຺ກຸຊ຺ຊິຕໍ ວາ ອຸກ຺ກຸຊ຺ເຊຍ຺ຍ, ປຏິຈ຺ຉນ຺ນໍ ວາ ວິວເຣຍ຺ຍ, ມູຬ຺ຫສ຺ສ ວາ ມຄ຺ຄໍ ອາຈິກ຺ເຂຍ຺ຍ, ອນ຺ຘກາເຣ ວາ ເຕລປຊ຺ໂຊຕໍ ຘາເຣຍ຺ຍ, ຈກ຺ຂຸມນ຺ໂຕ ຣູປານິ ທຸກ຺ຂນ຺ຕີ’’ຕິ ເອວມາທິນາ ອິມສ຺ມິ ຘມ຺ມວິນເຍ ປສນ຺ໂນ ປສນ຺ນາກາຣມກາສິ. ຠຄວໂຕ ຈ ສນ຺ຕິເກ ‘‘ລເຠຍ຺ຍາຫໍ ໂຠໂຕ ໂຄຕມສ຺ສ ສນ຺ຕິເກ ປພ຺ພຊໍ, ລເຠຍ຺ຍໍ ອຸປສມ຺ປທ’’ນ຺ຕິ ເອວມາທິນາ ປພ຺ພຊ຺ຊໍ ອຸປສມ຺ປທໍ ຍາຈິຕ຺ວາ ອຈິຣູປສມ຺ປນ຺ໂນ ຍາວ ອຣຫຕ຺ຕາ ມຫນ຺ຕໍ ວິເສສໍ ສມ຺ປາເທສິ.

ກສິຠາຣທ຺ວາຊສຸຕ຺ຕ

ປຸຈ຺ຉາ – ຕຕ຺ຖາວຸໂສ ເອກາທສມໍ ມຫາກສ຺ສປາທີຫິ ໂປຣາຓຘມ຺ມສໍຄາຫກເຖເຣຫິ ສໍຄີຕໍ ກສິຠາຣທ຺ວາຊສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ມຄເຘສຸ ຠນ຺ເຕ ທກ຺ຂິຓາຄິຣິສ຺ມິໍ ເອກນາຬາຍໍ ພ຺ຣາຫ຺ມຓຄາເມ ກສິຠາຣທ຺ວາຊໍ ພ຺ຣາຫ຺ມຓໍ ອາຣພ຺ຠ ຠາສິຕໍ. ກສິຠາຣທ຺ວາໂຊ ຠນ຺ເຕ ພ຺ຣາຫ຺ມໂຓ ຠຄວນ຺ຕໍ ຄາຖາຍ ອຊ຺ຌຠາສິ.

‘‘ກສ຺ສໂກ ປຏິຊານາສິ, ນ ຈ ປສ຺ສາມິ ເຕ ກສິໍ. ກສ຺ສໂກ ປຸຈ຺ຉິໂຕ ພ຺ຣູຫິ, ກຖໍ ຊາເນມຸ ຕໍ ກສິ’’ນ຺ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ສທ຺ຘາ ພີຊໍ ຕໂປ ວຸຏ຺ຐິ, ປຎ຺ຎາ ເມ ຍຸຄນງ຺ຄລໍ;

ຫິຣີ ອີສາ ມໂນ ໂຍຕ຺ຕໍ, ສຕິ ເມ ຜາລປາຈນໍ.

ກາຍຄຸຕ຺ໂຕ ວຈີຄຸຕ຺ໂຕ, ອາຫາເຣ ອຸທເຣ ຍໂຕ;

ສຈ຺ຈໍ ກໂຣມິ ນິທ຺ທານໍ, ໂສຣຈ຺ຈໍ ເມ ປໂມຈນໍ.

ວີຣິຍໍ ເມ ຘຸຣໂຘຣຍ຺ຫໍ, ໂຍຄກ຺ເຂມາຘິວາຫນໍ;

ຄຈ຺ຉຕິ ອນິວຕ຺ຕນ຺ຕໍ, ຍຕ຺ຖ ຄນ຺ຕ຺ວາ ນ ໂສຈຕິ.

ເອວເມສາ ກສີ ກຏ຺ຐາ, ສາ ໂຫຕິ ອມຕປ຺ຜລາ;

ເອຕໍ ກສິໍ ກສິຕ຺ວານ, ສພ຺ພທຸກ຺ຂາ ປມຸຈ຺ຈຕີ’’ຕິ.

ເອວໍ ໂຂ ຠນ຺ເຕ ຠຄວຕາ ຠາສິຕໍ.

ກສ຺ສໂກ ປຏິຊານາສິ, ນ ຈ ປສ຺ສາມິ ເຕ ກສິໍ;

ກສ຺ສໂກ ປຸຈ຺ຉິໂຕ ພ຺ຣູຫິ, ກຖໍ ຊາເນມຸ ຕໍ ກສິໍ.

ສທ຺ຘາ ພີຊໍ ຕໂປ ວຸຏ຺ຐິ, ປຎ຺ຎາ ເມ ຍຸຄນງ຺ຄລໍ;

ຫິຣີ ອີສາ ມໂນ ໂຍຕ຺ຕໍ, ສຕິ ເມ ຜາລປາຈນໍ.

ປຸຈ຺ຉາ – ອິມຎ຺ຈ ປນາວຸໂສ ຘມ຺ມເທສນໍ ສຸຕ຺ວາ ໂສ ກສິຠາຣທ຺ວາໂຊ ພ຺ຣາຫ຺ມໂຓ ອິມສ຺ມິໍ ຘມ຺ມວິນເຍ ປສນ຺ໂນ ກີທິສໍ ປສນ຺ນາກາຣມກາສິ.

ວິສ຺ສຊ຺ຊນາ – ອິມຎ຺ຈ ປນ ຠນ຺ເຕ ຘມ຺ມເທສນໍ ສຸຕ຺ວາ ກສິຠາຣທ຺ວາໂຊ ພ຺ຣາຫ຺ມໂຓ ‘‘ອຠິກ຺ກນ຺ຕໍ ໂຠ ໂຄຕມ, ອຠິກ຺ກນ຺ຕໍ ໂຠ ໂຄຕມາ’’ຕິເອວມາທິນາ ອິມສ຺ມິໍ ຘມ຺ມວິນເຍ ປສນ຺ໂນ ປສນ຺ນາກາຣມກາສິ.

ເສຍ຺ຍຖາປິ ໂຠ ໂຄຕມ ອຸກ຺ກຸຊ຺ຊິຕໍ ວາ ນິກ຺ກຸຊ຺ເຊຍ຺ຍ.

ອຸທຍສຸຕ຺ຕ

ປຸຈ຺ຉາ – ອຸທຍສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຸທຍໍ ພ຺ຣາຫ຺ມຓໍ ອາຣພ຺ຠ ຠາສິຕໍ. ອຸທໂຍ ຠນ຺ເຕ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ ‘‘ປກຏ຺ຐໂກຍໍ ສມໂຓ ໂຄຕໂມ ປຸນປ຺ປຸນໍ ອາຄຈ຺ຉຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ປຸນປ຺ປຸນຎ຺ເຈວ ວປນ຺ຕິ ພີຊໍ, ປຸນປ຺ປຸນໍ ວສ຺ສຕິ ເທວຣາຊາ;

ປຸນປ຺ປຸນໍ ເຂຕ຺ຕໍ ກສນ຺ຕິ ກສ຺ສກາ, ປຸນປ຺ປຸນໍ ຘຎ຺ຎມຸເປຕິ ຣຏ຺ຐໍ.

ເອວມາທິນາ ຠນ຺ເຕ ຠຄວຕາ ຠາສິຕໍ.

ປຸນປ຺ປຸນໍ ເຈວ ວປນ຺ຕິ ພີຊໍ, ປຸນປ຺ປຸນໍ ວສ຺ສຕິ ເທວ ຣາຊາ;

ປຸນປ຺ປຸນໍ ເຂຕ຺ຕໍ ກສນ຺ຕິ ກສ຺ສກາ, ປຸນປ຺ປຸນໍ ຘຎ຺ຎມຸເປຕິ ຣຏ຺ຐໍ.

ປຸນປ຺ປຸນໍ ຍາຈກາ ຍາຈຍນ຺ຕິ, ປຸນປ຺ປຸນໍ ທານປຕີ ທທນ຺ຕິ;

ປຸນປ຺ປຸນໍ ທານປຕີ ທທິຕ຺ວາ, ປຸນປ຺ປຸນໍ ສຄ຺ຄມຸເປຕິ ຐານໍ.

ປຸນປ຺ປຸນໍ ຂີຣນິກາ ທຸຫນ຺ຕິ, ປຸນປ຺ປຸນໍ ວຈ຺ໂຉ ອຸເປຕິ ມາຕຣໍ;

ປຸນປ຺ປຸນໍ ກິລມຕິ ຜນ຺ທຕິ ຈ, ປຸນປ຺ປຸນໍ ຄພ຺ຠມຸເປຕິ ມນ຺ໂທ.

ປຸນປ຺ປຸນໍ ຊາຍຕິ ມີຍຕິ ຈ, ປຸນປ຺ປຸນໍ ສິວຖິກໍ ຫຣນ຺ຕິ;

ມຄ຺ຄຎ຺ຈ ລທ຺ຘາ ອປຸນພ຺ຠວາຍ, ນ ປຸນປ຺ປຸນໍ ຊາຍຕິ ຠູຣິປຎ຺ໂຎ-ຫຸ–

ມາຕຸໂປສກສຸຕ຺ຕ

ປຸຈ຺ຉາ – ມາຕຸໂປສກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ມາຕຸໂປສກໍ ພ຺ຣາຫ຺ມຓໍ ອາຣພ຺ຠ ຠາສິຕໍ. ມາຕຸໂປສໂກ ຠນ຺ເຕ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ ‘‘ອຫຎ຺ຫິ ໂຠ ໂຄຕມ ຘມ຺ເມນ ຠິກ຺ຂໍ ປຣິເຍສາມິ, ຘມ຺ເມນ ຠິກ຺ຂໍ ປຣິເຍສິຕ຺ວາ ມາຕາປິຕໂຣ ໂປເສມິ, ກຈ຺ຈາຫໍ ໂຠ ໂຄຕມ ເອວໍກາຣີ ກິຈ຺ຈກາຣີ ໂຫມີ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຕຄ຺ຆ ຕ຺ວໍ ພ຺ຣາຫ຺ມຓ ເອວໍກາຣີ ກິຈ຺ຈກາຣີ ໂຫສິ, ໂຍ ໂຂ ພ຺ຣາຫ຺ມຓ ຘມ຺ເມນ ຠິກ຺ຂໍ ປຣິເຍສຕິ, ຘມ຺ເມນ ຠິກ຺ຂໍ ປຣິເຍສິຕ຺ວາ ມາຕາປິຕໂຣ ໂປເສຕິ, ພຫຸໍ ໂສ ປຸຎ຺ຎໍ ປສວຕີ’’ຕິ ເອວມາທິນາ ຠນ຺ເຕ ຠຄວຕາ ຠາສິຕາ.

ໂຍ ມາຕຣໍ ວາ ປິຕຣໍ ວາ, ມຈ຺ໂຈ ຘມ຺ເມນ ໂປສຕິ;

ຕາຍ ນໍ ປາຣິຈຣິຍາຍ, ມາຕາປິຕູສຸ ປຓ຺ຑິຕາ;

ອິເຘວ ນໍ ປສໍສນ຺ຕິ, ເປຈ຺ຈ ສຄ຺ເຄ ປໂມທຕິ–

ໂຂມທຸສ຺ສສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ພ຺ຣາຫ຺ມຓສໍຍຸຕ຺ເຕ ໂຂມທຸສ຺ສສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສກ຺ເກສຸ ຠນ຺ເຕ ໂຂມທຸສ຺ເສ ນາມ ສກ຺ຍານໍ ນິຄເມ ໂຂມທຸສ຺ສເກ ພ຺ຣາຫ຺ມຓຄຫປຕິເກ ອາຣພ຺ຠ ຠາສິຕ, ໂຂມທຸສ຺ສກາ ຠນ຺ເຕ ພ຺ຣາຫ຺ມຓຄຫປຕິກາ ຠຄວນ຺ຕໍ ເອຕທໂວຈຸໍ ‘‘ເກ ຈ ມຸຓ຺ຑກາ ສມຓກາ, ເກ ຈ ສຠາຘມ຺ມໍ ຊານິສ຺ສນ຺ຕີ’’ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ເນສາ ສຠາ ຍຕ຺ຖ ນ ສນ຺ຕິ ສນ຺ໂຕ,

ສນ຺ໂຕ ນ ເຕ ເຍ ນ ວທນ຺ຕິ ຘມ຺ມໍ;