ຠິກ຺ຂຸນີສໍຍຸຕ຺ຕ

ອາຬວິກາສຸຕ຺ຕ

ປຸຈ຺ຉາ – ອິທານິ ອາວຸໂສ ຠິກ຺ຂຸນີ ສໍຍຸຕ຺ຕໍ ປຸຈ຺ຉາມິ, ຍໍ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ ສາວິກາຫິ ເຖຣີຫິ ອຕ຺ຕໂນ

ຈ ພຸທ຺ຘສາສນສ຺ສ ຈ ຍຖາຠູຕໍ ຄຸຓໍ ປກາເສຕ຺ວາ ຠາສິຕໍ. ຕຕ຺ຖາວຸໂສ ປຐມໍ ໂປຣາຓເກຫິ ມຫາກສ຺ສປາທີຫິ ຘມ຺ມສໍຄາຫເກຫິ ເຖຣວເຣຫິ ສໍຄີຕໍ ອາຬວິກາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ມາຣໍ ປາປິມນ຺ຕໍ ອາຣພ຺ຠ ອາຬວິກາຍ ຠິກ຺ຂຸນິຍາ ຠາສິຕໍ. ມາໂຣ ຠນ຺ເຕ ປາປິມາ ອາຬວິກາຍ ຠິກ຺ຂຸນິຍາ ຠຍໍ ຉມ຺ຠິຕຕ຺ຕໍ ໂລມຫໍສໍ ອຸປ຺ປາເທຕຸກາໂມ ວິເວກມ຺ຫາ ຈາເວຕຸກາໂມ ອາຬວິກໍ ຠິກ຺ຂຸນິໍ ຄາຖາຍ ອຊ຺ຌຠາສິ–

‘‘ນຕ຺ຖິ ນິສ຺ສຣຓໍ ໂລເກ, ກິໍ ວິເວເກນ ກາຫສິ;

ຠຸຎ຺ຊສ຺ສ ກາມຣຕິໂຍ, ມາຫຸ ປຈ຺ຉານຸຕາປິນີ’’ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ອຕ຺ຖິ ນິສ຺ສຣຓໍ ໂລເກ, ປຎ຺ຎາຍ ເມ ສຸຜຸສ຺ສິຕໍ;

ປມຕ຺ຕພນ຺ຘຸ ປາປິມ, ນ ຕ຺ວໍ ຊານາສິ ຕໍ ປທໍ;

ສຕ຺ຕິສູລູປມາ ກາມາ, ຂນ຺ຘາສໍ ອຘິກຸຏ຺ຏນາ;

ຍໍ ຕ຺ວໍ ກາມຣຕິໍ ພ຺ຣູສິ, ອຣຫິ ມຍ຺ຫ ສາ ອຫູ’’ຕິ.

ເອວໍ ໂຂ ຠນ຺ເຕ ອາຬວິກາຍ ຠິກ຺ຂຸນິຍາ ຠາສິຕໍ.

ນຕ຺ຖິ ນິສ຺ສຣຓໍ ໂລເກ, ກິໍ ວິເວເກນ ກາຫສິ;

ຠຸຎ຺ຊສ຺ສຸ ກາມຣຕິໂຍ, ມາຫຸ ປຈ຺ຉານຸຕາປິນີ-ຫຸ–

ອຕ຺ຖິ ນິສ຺ສຣຓໍ ໂລເກ, ປຎ຺ຎາຍ ເມ ສຸຜຸສ຺ສິຕໍ;

ປມຕ຺ຕພນ຺ຘຸ ປາປິມ, ນ ຕ຺ວໍ ຊານາສິ ຕໍ ປທໍ.

ສຕ຺ຕິສູລູປມາ ກາມາ, ຂນ຺ຘາສໍ ອຘິກຸຏ຺ຏນາ;

ຍໍ ຕ຺ວໍ ກາມຣຕິໍ ພ຺ຣູສິ, ອຣຕິ ມຍ຺ຫ ສາ ອຫຸ–

ໂສມາສຸຕ຺ຕ

ປຸຈ຺ຉາ – ໂສມາສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍເຍວ ຠນ຺ເຕ ອນ຺ຘວເນ ມາຣໍ ປາປິມນ຺ຕໍ ອາຣພ຺ຠ ໂສມາຍ ຠິກ຺ຂຸນິຍາ ຠາສິຕໍ. ມາໂຣ ຠນ຺ເຕ ປາປິມາ ໂສມາຍ ຠິກ຺ຂຸນິຍາ ຠຍໍ ຉມ຺ຠິຕຕ຺ຕໍ ໂລມຫໍສໍ ອຸປ຺ປາເທຕຸກາໂມ ສມາຘິມ຺ຫາ ຈາເວຕຸກາໂມ ໂສມໍ ຠິກ຺ຂຸນິໍ ຄາຖາຍ ອຊ຺ຌຠາສິ.

‘‘ຍໍ ຕໍ ອິສີຫິ ປຕ຺ຕພ຺ພໍ, ຐານໍ ທຸຣຠິສມ຺ຠວໍ;

ນ ຕໍ ທ຺ວງ຺ຄຸລປຎ຺ຎາຍ, ສກ຺ກາ ປປ຺ໂປຕຸມິຕ຺ຖິຍາ’’ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ອິຕ຺ຖິຠາໂວ ກິໍ ກຍິຣາ, ຈິຕ຺ຕມ຺ຫິ ສຸສມາຫິເຕ;

ຎາຓມ຺ຫິ ວຕ຺ຕມານມ຺ຫິ, ສມ຺ມາ ຘມ຺ມໍ ວິປສ຺ສໂຕ;

ຍສ຺ສ ນູນ ສິຍາ ເອວໍ, ອິຕ຺ຖາຫໍ ປຸຣິໂສຕິ ວາ;

ກິຎ຺ຈິ ວາ ປນ ອຎ຺ຎສ຺ມິ, ຕໍ ມາໂຣ ວຕ຺ຕຸມຣຫຕີ’’ຕິ.

ເອວໍ ໂຂ ຠນ຺ເຕ ໂສມາຍ ຠິກ຺ຂຸນິຍາ ອຣິຍສາວິກາຍ ຠາສິຕໍ.

ຍໍ ຕໍ ອິສີຫິ ປຕ຺ຕພ຺ພໍ, ຐານໍ ທຸຣຠິສມ຺ຠວໍ;

ນ ຕໍ ທ຺ວງ຺ຄຸລປຎ຺ຎາຍ, ສກ຺ກາ ປປ຺ໂປຕຸມິຕ຺ຖິຍາ–

ອິຕ຺ຖິ ຠາໂວ ກິໍ ກຍິຣາ, ຈິຕ຺ຕມ຺ຫິ ສຸສມາຫິເຕ;

ຎາຓມ຺ຫິ ວຕ຺ຕ ມານມ຺ຫິ, ສມ຺ມາ ຘມ຺ມໍ ວິປສ຺ສໂຕ.

ຍສ຺ສ ນູນ ສິຍາ ເອວໍ, ອິຕ຺ຖາຫໍ ປຸຣິໂສຕິ ວາ;

ກິຎ຺ຈິ ວາ ປນ ອຎ຺ຎສ຺ມິ, ຕໍ ມາໂຣ ວຕ຺ຕຸມຣຫຕິ.

ກິສາໂຄຕມີສຸຕ຺ຕ

ປຸຈ຺ຉາ – ຕຕ຺ຖາວຸໂສ ກິສາໂຄຕມີສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍເຍວ ຠນ຺ເຕ ອນ຺ຘວເນ ມາຣໍ ປາປິມນ຺ຕໍ ອາຣພ຺ຠ ກິສາໂຄຕມິຍາ ຠິກ຺ຂຸນິຍາ ເຖຣິຍາ ຠາສິຕໍ. ມາໂຣ ຠນ຺ເຕ ປາປິມາ ກິສາໂຄຕມິຍາ ຠິກ຺ຂຸນິຍາ ຠຍໍ ຉມ຺ຠິຕຕ຺ຕໍ ໂລມຫໍສໍ ອຸປ຺ປາເທຕຸກາໂມ ສມາຘິມ຺ຫາ ຈາເວຕຸກາໂມ ກິສາໂຄຕມິໍ ຠິກ຺ຂຸນິໍ ຄາຖາຍ ອຊ຺ຌຠາສິ–

‘‘ກິໍ ນຸ ຕ຺ວໍ ມຕປຸຕ຺ຕາວ, ເອກມາສິ ຣຸທມ຺ມຸຂີ;

ວນມຊ຺ຌຄຕາ ເອກາ, ປຸຣິສໍ ນຸ ຄເວສສີ’’ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ອຈ຺ຈນ຺ຕໍ ມຕປຸຕ຺ຕາມ຺ຫິ, ປຸຣິສາ ເອກທນ຺ຕິກາ;

ນ ໂສຈາມິ ນ ໂຣທາມິ, ນ ຕໍ ຠາຍາມິ ອາວຸໂສ.

ສພ຺ພຕ຺ຖ ວິຫຕາ ນນ຺ທີ, ຕໂມກ຺ຂນ຺ໂຘ ປທາລິໂຕ;

ເຊຕ຺ວານ ມຈ຺ຈຸໂນ ເສນໍ, ວິຫຣາມິ ອນາສວາ’’ຕິ.

ເອວໍ ໂຂ ຠນ຺ເຕ ກິສາໂຄຕມິຍາ ຠິກ຺ຂຸນິຍາ ຠາສິຕໍ.

ກິໍ ນຸ ຕ຺ວໍ ມຕປຸຕ຺ຕາວ, ເອກມາສິ ຣຸທມ຺ມຸຂີ;

ວນມຊ຺ຌຄຕາ ເອກາ, ປຸຣິສໍ ນຸ ຄເສສສິ-ຫຸ–

ອຈ຺ຈນ຺ຕໍ ມຕປຸຕ຺ຕາມ຺ຫິ, ປຸຣິສາ ເອຕທນ຺ຕິກາ;

ນ ໂສຈາມິ ນ ໂຣທາມິ, ນ ຕໍ ຠາຍາມິ ອາວຸໂສ.

ສພ຺ພຕ຺ຖ ວິຫຕາ ນນ຺ທີ, ຕໂມກ຺ຂນ຺ໂຘ ປທາລິໂຕ;

ເຊຕ຺ວານ ມຈ຺ຈຸໂນ ເສນໍ, ວິຫຣາມິ ອນາສວາ.

ອຸປ຺ປລວຓ຺ຓາສຸຕ຺ຕ

ປຸຈ຺ຉາ – ຕຕ຺ຖາວຸໂສ ໂປຣາເຓຫິ ສໍຄີຕິກາຣມຫາເຖຣວເຣຫິ ສໍຄີຕໍ ອຸປ຺ປລວຓ຺ຓສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍເຍວ ຠນ຺ເຕ ອນ຺ຘວເນ ມາຣໍ ປາປິມນ຺ຕໍ ອາຣພ຺ຠ ອຸປ຺ປລວຓ຺ຓາຍ ຠິກ຺ຂຸນິຍາ ຠາສິຕໍ. ມາໂຣ ຠນ຺ເຕ ປາປິມາ ອຸປ຺ປລວຓ຺ຓາຍ ຠິກ຺ຂຸນິຍາ ຠຍໍ ຉມ຺ຠິຕຕ຺ຕໍ ໂລມຫໍສໍ ອຸປ຺ປາເທຕຸກາໂມ ສມາຘິມ຺ຫາ ຈາເວຕຸກາໂມ ອຸປ຺ປລວຓ຺ຓໍ ຠິກ຺ຂຸນິໍ ຄາຖາຍ ອຊ຺ຌຠາສິ–

‘‘ສຸປຸປ຺ຜິຕຄ຺ຄໍ ອຸປຄມ຺ມ ຠິກ຺ຂຸນິ, ເອກາ ຕຸວໍ ຕິຏ຺ຐສິ ສາລມູເລ. ນ ຈຕ຺ຖິ ເຕ ທຸຕິຍາ ວຓ຺ຓຘາຕຸ, ພາເລ ນ ຕ຺ວໍ ຠາຍສິ ຘຸຕ຺ຕການ’’ນ຺ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ສຕໍ ສຫສ຺ສານິປິ ຘຸຕ຺ຕການໍ,

ອິຘາຄຕາ ຕາທິສກາ ຠເວຍ຺ຍຸໍ;

ໂລມໍ ນ ອິຎ຺ຊາມິ ນ ສນ຺ຕສາມິ,

ນ ມາຣ ຠາຍາມິ ຕເມກິກາປິ.

ເອສາ ອນ຺ຕຣຘາຍາມິ, ກຸຈ຺ຉິໍ ວາ ປວິສາມິ ເຕ;

ປຂຸມນ຺ຕຣິກາຍມ຺ປິ, ຕິຏ຺ຐນ຺ຕິໍ ມໍ ນ ທກ຺ຂສິ.

ຈິຕ຺ຕສ຺ມິໍ ວສີຠູຕາມ຺ຫິ, ອິທ຺ຘິປາທາ ສຸຠາວິຕາ;

ສພ຺ພພນ຺ຘນມຸຕ຺ຕາມ຺ຫິ, ນ ຕໍ ຠາຍາມິ ອາວຸໂສ’’ຕິ.

ເອວໍ ໂຂ ຠນ຺ເຕ ອຸປ຺ປລວຓ຺ຓາຍ ຠິກ຺ຂຸນິຍາ ຠາສິຕໍ.

ຈາລາສຸຕ຺ຕ

ປຸຈ຺ຉາ – ຕຕ຺ຖາວຸໂສ ຈາລາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອນ຺ຘວເນ ມາຣໍເຍວ ປາປິມນ຺ຕໍ ອາຣພ຺ຠ ຈາລາຍ ຠິກ຺ຂຸນິຍາ ອຣິຍສາວິກາຍ ຠາສິຕໍ. ມາໂຣ ຠນ຺ເຕ ປາປິມາ ຈາລໍ ຠິກ຺ຂຸນິໍ ອຸປສງ຺ກມິຕ຺ວາ ເອຕທໂວຈ ‘‘ກິໍ ນຸ ຕ຺ວໍ ຠິກ຺ຂຸນິ ນ ໂຣເຈສີ’’ຕິ. ຊາຕິໍ ຂ຺ວາຫໍ ອາວຸໂສ ນ ໂຣເຈມີ’’ຕິ.

ກິໍ ນຸ ຊາຕິໍ ນ ໂຣເຈສິ, ຊາໂຕ ກາມານິ ຠຸຎ຺ຊຕິ;

ໂກ ນຸ ຕໍ ອິທມາທປຍິ, ຊາຕິໍ ມາ ໂຣຈ ຠິກ຺ຂຸນີຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ຊາຕສ຺ສ ມຣຓໍ ໂຫຕິ, ຊາໂຕ ທຸກ຺ຂານິ ຜຸສ຺ສຕິ;

ພນ຺ຘໍ ວຘໍ ປຣິກ຺ເລສໍ, ຕສ຺ມາ ຊາຕິໍ ນ ໂຣຈເຍ.

ພຸທ຺ໂຘ ຘມ຺ມມເທເສສິ, ຊາຕິຍາ ສມຕິກ຺ກມໍ;

ສພ຺ພທຸກ຺ຂປ຺ປຫານາຍ, ໂສ ມໍ ສຈ຺ເຈ ນິເວສຍິ.

ເຍ ຈ ຣູປູປຄາ ສຕ຺ຕາ, ເຍ ຈ ອຣູປຏ຺ຐາຍິໂນ;

ນິໂຣຘໍ ອປ຺ປຊານນ຺ຕາ, ອາຄນ຺ຕາໂຣ ປຸນພ຺ຠວນ຺ຕິ.

ເອວໍ ໂຂ ຠນ຺ເຕ ຈາລາຍ ຠິກ຺ຂຸນິຍາ ຠາສິຕໍ.

ກິໍ ນຸ ຊາຕິໍ ນ ໂຣເຈສິ, ຊາໂຕ ກາມານິ ຠຸຎ຺ຊຕິ;

ໂກ ນຸ ຕໍ ອິທມາທປຍິ, ຊາຕິໍ ມາ ໂຣຈ ຠິກ຺ຂຸນີ.

ຊາຕສ຺ສ ມຣຓໍ ໂຫຕິ, ຊາໂຕ ທຸກ຺ຂານິ ຜຸສ຺ສຕິ;

ພນ຺ຘໍ ວຘໍ ປຣິກ຺ເລສໍ, ຕສ຺ມາ ຊາຕິໍ ນ ໂຣຈເຍ.

ພຸທ຺ໂຘ ຘມ຺ມມເທເສສິ, ຊາຕິຍາ ສມຕິກ຺ກມໍ,

ສພ຺ພທຸກ຺ຂປ຺ປຫານາຍ, ໂສ ມໍ ສຈ຺ເຈ ນິເວສຍິ.

ເສລາສຸຕ຺ຕ

ປຸຈ຺ຉາ – ຕຕ຺ຖາວຸໂສ ເສລາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ມາຣໍເຍວ ປາປິມນ຺ຕໍ ອາຣພ຺ພ຺ຠ ເສລາຍ ຠິກ຺ຂຸນິຍາ ອຣິຍສາວິກາຍ ຠາສິຕໍ. ມາໂຣ ຠນ຺ເຕ ປາປິມາ ເສລາຍ ຠິກ຺ຂຸນິຍາ ຠຍໍ ຉມ຺ຠິຕຕ຺ຕໍ ໂລມຫໍສໍ ອຸປ຺ປາເທຕຸກາໂມ ສມາຘິມ຺ຫາ ຈາເວຕຸກາໂມ ເສລໍ ຠິກ຺ຂຸນິໍ ຄາຖາຍ ອຊ຺ຌຠາສິ–

ເກນິທໍ ປກຕໍ ພິມ຺ພໍ, ກ຺ວນຸ ພິມ຺ພສ຺ສ ກາຣໂກ;

ກ຺ວນຸ ພິມ຺ພໍ ສມຸປ຺ປນ຺ນໍ, ກ຺ວນຸ ພິມ຺ພໍ ນິຣຸຊ຺ຌຕີຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ນຍິທໍ ອຕ຺ຕກຕໍ ພິມ຺ພໍ, ນຍິທໍ ປຣກຕໍ ອຆໍ;

ເຫຕຸໍ ປຏິຈ຺ຈ ສມ຺ຠູຕໍ, ເຫຕຸຠງ຺ຄາ ນິຣຸຊ຺ຌຕີຕິ.

ເອວມາທິນາ ຠນ຺ເຕ ເສລາຍ ຠິກ຺ຂຸນິຍາ ຠາສິຕໍ.

ເກນິທໍ ປກຕໍ ພິມ຺ພໍ, ກ຺ວນຸ ພິມ຺ພສ຺ສ ກາຣໂກ;

ກ຺ວນຸ ພິມ຺ພໍ ສມຸປ຺ປນ຺ນໍ, ກ຺ວນຸ ພິມ຺ພໍ ນິຣຸຊ຺ຌຕິ-ຫຸ–

ນຍິທໍ ອຕ຺ຕກຕໍ ພິມ຺ພໍ, ນຍິທໍ ປຣກຕໍ ອຆໍ;

ເຫຕຸໍ ປຏິຈ຺ຈ ສມ຺ຠູຕໍ, ເຫຕຸຠງ຺ຄາ ນິຣຸຊ຺ຌຕິ.

ວຊິຣາສຸຕ຺ຕ

ປຸຈ຺ຉາ – ຕຕ຺ຖາວຸໂສ ໂປຣາຓເກຫິ ມຫາກສ຺ສປາທີຫິ ຘມ຺ມສໍຄາຫກເຖຣວເຣຫິ ສໍຄີຕໍ ວຊິຣາສຸຕ຺ຕໍ ກຕ຺ຖ ກໍ ອາຣພ຺ຠ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ມາຣໍ ປາປິມນ຺ຕໍ ອາຣພ຺ຠ ວຊິຣາຍ ເຖຣິຍາ ຠິກ຺ຂຸນິຍາ ຠາສິຕໍ. ມາໂຣ ຠນ຺ເຕ ປາປິມາ ປຸຣິມນເຍເນວ ວຊິຣໍ ຠິກ຺ຂຸນິໍ ຄາຖາຍ ອຊ຺ຌຠາສິ–

ເກນາຍໍ ປກໂຕ ສຕ຺ໂຕ, ກຸວໍ ສຕ຺ຕສ຺ສ ກາຣໂກ,

ກຸວໍ ສຕ຺ໂຕ ສມຸປ຺ປນ຺ໂນ, ກຸວໍ ສຕ຺ໂຕ ນິຣຸຊ຺ຌຕີຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ກິໍ ນຸ ສຕ຺ໂຕຕິ ປຈ຺ເຈສິ, ມາຣທິຏ຺ຐິຄຕໍ ນຸ ເຕ;

ສຸທ຺ຘສງ຺ຂາຣປຸຎ຺ໂຊຍໍ, ນຍິຘ ສຕ຺ຕຸປລພ຺ຠຕິ.

ຍຖາ ຫິ ອງ຺ຄສມ຺ຠາຣາ, ໂຫຕິ ສທ຺ໂທ ຣໂຖ ອິຕິ;

ເອວໍ ຂນ຺ເຘສຸ ສນ຺ເຕສຸ, ໂຫຕິ ສຕ຺ໂຕຕິ ສມ຺ມຸຕິ.

ທຸກ຺ຂເມວ ຫິ ສມ຺ໂຠຕິ, ທຸກ຺ຂໍ ຕິຏ຺ຐຕິ ເວຕິ ຈ,

ນາຎ຺ຎຕ຺ຣ ທຸກ຺ຂາ ສມ຺ໂຠຕິ, ນາຎ຺ຎໍ ທຸກ຺ຂາ ນິຣຸຊ຺ຌຕີຕິ.

ເອວໍ ໂຂ ຠນ຺ເຕ ວຊິຣາຍ ຠິກ຺ຂຸນິຍາ ຠາສິຕໍ.

ເກນາຍໍ ປກໂຕ ສຕ຺ໂຕ, ກຸວໍ ສຕ຺ຕສ຺ສກາຣໂກ;

ກຸວໍ ສຕ຺ໂຕ ສມຸປ຺ປນ຺ໂນ, ກຸວໍ ສຕ຺ໂຕ ນິຣຸຊ຺ຌຕິ-ຫຸ–

ກິໍ ນຸ ສຕ຺ໂຕຕິ ປຈ຺ເຈສິ, ມາຣ ທິຏ຺ຐິຄຕໍ ນຸ ເຕ;

ສຸທ຺ຘສງ຺ຂາຣປຸຎ຺ໂຊຍໍ, ນຍິຘ ສຕ຺ຕຸປລພ຺ຠຕິ.