ໂກສລສໍຍຸຕ຺ຕ

ທຫຣສຸຕ຺ຕ

ປຸຈ຺ຉາ – ທຫຣສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຣາຊານໍ ປເສນທິໍ ໂກສລໍ ອາຣພ຺ຠ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ, ເອກມນ຺ຕໍ ນິສິນ຺ໂນ ໂຂ ຠນ຺ເຕ ຣາຊາ ປເສນທິ ໂກສໂລ ຠຄວນ຺ຕໍ ເອຕທໂວຈ ‘‘ຠວມ຺ປິ ໂນ ໂຄຕໂມ ‘ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘ’ຕິ ປຏິຊານາຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ຍຎ຺ຫິ ຕໍ ມຫາຣາຊ ສມ຺ມາ ວທມາໂນວເທຍ຺ຍ ‘ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘ’ຕິ, ມເມວ ຕໍ ສມ຺ມາ ວທມາໂນ ວເທຍ຺ຍາ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ຕສ຺ມາ ຫິ ປຓ຺ຑິໂຕ ໂປໂສ, ສມ຺ປສ຺ສໍ ອຕ຺ຖມຕ຺ຕໂນ;

ຠຸຊງ຺ຄມໍ ປາວກຎ຺ຈ, ຂຕ຺ຕິຍຎ຺ຈ ຍສສ຺ສິນໍ;

ຠິກ຺ຂຸຎ຺ຈ ສີລສມ຺ປນ຺ນໍ, ສມ຺ມເທວ ສມາຈເຣ–

ອຕ຺ຕຣກ຺ຂິຕສຸຕ຺ຕ

ປຸຈ຺ຉາ – ອຕ຺ຕຣກ຺ຂິຕສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຣາຊານໍເຍວ ປເສນທິໍ ໂກສລໍ ອາຣພ຺ຠ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ຠຄວນ຺ຕໍ ອຸປສງ຺ກມິຕ຺ວາ ‘‘ອິຘ ມຍ຺ຫໍ ຠນ຺ເຕ ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທີ’’ຕິ ເອວມາທິກໍ ວຈນໍ ອໂວຈ. ຠຄວາ ຈ ຠນ຺ເຕ ເອວເມຕໍ ມຫາຣາຊ ເອວເມຕໍ ມຫາຣາຊາຕິ ເອວມາທິນາ ວິຠຊິຕ຺ວາ ຠາສິຕໍ.

ກາເຍນ ສໍວໂຣ ສາຘຸ, ສາຘຸ ວາຈາຍ ສໍວໂຣ;

ມນສາ ສໍວໂຣ ສາຘຸ, ສາຘຸ, ສພ຺ພຕ຺ຖ ສໍວໂຣ;

ສພ຺ພຕ຺ຖ ສໍວຸໂຕ ລຊ຺ຊີ, ຣກ຺ຂິໂຕຕິ ປວຸຈ຺ຈຕິ.

ອປ຺ປກສຸຕ຺ຕ

ປຸຈ຺ຉາ – ອປ຺ປກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຣາຊານໍເຍວ ປເສນທິໍ ໂກສລໍ ອາຣພ຺ຠ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ຠຄວນ຺ຕໍ ອຸປສງ຺ກມິຕ຺ວາ ‘‘ອິຘ ມຍ຺ຫໍ ຠນ຺ເຕ ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ ອປ຺ປກາ ເຕ ສຕ຺ຕາ ໂລກສ຺ມິໍ, ເຍ ອຸຬາເຣ ອຸຬາເຣ ໂຠເຄ ລຠິຕ຺ວາ ນ ເຈວ ມຊ຺ຊນ຺ຕິ ນ ຈ ປມຊ຺ຊນ຺ຕິ, ນ ຈ ກາເມສຸ ເຄຘໍ ອາປຊ຺ຊນ຺ຕີ’’ຕິ ເອວມາທິກໍ ວຈນໍ ອໂວຈ. ຠຄວາ ຈ ຠນ຺ເຕ ‘‘ເອວເມຕໍ ມຫາຣາຊ ເອວເມຕໍ ມຫາຣາຊາ’’ຕິ ເອວມາທິນາ ອປ຺ປກສຸຕ຺ຕໍ ຠາສິຕໍ.

ມລ຺ລິກາສຸຕ຺ຕ

ປຸຈ຺ຉາ – ມລ຺ລິກາສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຣາຊານໍເຍວ ປເສນທິໍ ໂກສລໍ ອາຣພ຺ຠ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ມລ຺ລິກໍ ເທວິໍ ເອຕທໂວຈ ‘‘ອຕ຺ຖິ ນຸ ໂຂ ເຕ ມລ຺ລິເກ ໂກຈຎ຺ໂຎ ອຕ຺ຕນາ ປິຍຕໂຣ’’ຕິ. ຕສ຺ມິໍ ວຕ຺ຖຸສ຺ມິໍ ສພ຺ພາທິສາ ອນຸປຣິຄມ຺ມ ເຈຕສາຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ສພ຺ພາ ທິສາ ອນຸປຣິຄມ຺ມ ເຈຕສາ, ເນວຊ຺ຌຄາ ປິຍຕຣມຕ຺ຕນາ ກ຺ວຈິ. ເອວໍ ປິໂຍ ປຸຖຸ ອຕ຺ຕາ ປເຣສໍ, ຕສ຺ມາ ນ ຫິໍເສ ປຣມຕ຺ຕກາໂມ–

ສຕ຺ຕຊຏິລສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ສຕ຺ຕຊຏິລສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຣາຊານໍ ປເສນທິໍ ໂກສລໍ ອາຣພ຺ຠ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ອຈິຣປກ຺ກນ຺ເຕສຸ ສຕ຺ຕສຸ ຈ ຊຏິເລສຸ ສຕ຺ຕສຸ ຈ ນິຄຓ຺ເຐສຸ ສຕ຺ຕສຸ ຈ ອເຈລເກສຸ ສຕ຺ຕສຸ ຈ ເອກສາຏເກສຸ ສຕ຺ຕສຸ ຈ ປຣິພ຺ພາຊເກສຸ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ, ເອກມນ຺ຕໍ ນິສິນ຺ໂນ ໂຂ ຠນ຺ເຕ ຣາຊາ ປເສນທິ ໂກສໂລ ຠຄວນ຺ຕໍ ເອຕທໂວຈ ‘‘ເຍ ເຕ ຠນ຺ເຕ ໂລເກ ອຣຫນ຺ໂຕ ວາ ອຣຫຕ຺ຕມຄ຺ຄໍ ວາ ສມາປນ຺ນາ, ເອເຕ ເຕສໍ ອຎ຺ຎຕຣາ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ທຸຊ຺ຊານໍ ໂຂ ເອຕໍ ມຫາຣາຊ ຕຍາ ຄິຫິນາ ກາມໂຠຄິນາ ປຸຕ຺ຕສມ຺ພາຘສຍນໍ ອຊ຺ຌາວສນ຺ເຕນ ກາສິຓຈນ຺ທນໍ ປຈ຺ຈນຸໂຠນ຺ເຕນ ມາລາຄນ຺ຘວິເລປນໍ ຘາຣຍນ຺ເຕນ ຊາຕຣູປຣຊຕໍ ສາທິຍນ຺ເຕນ ‘‘ອິເມ ວາ ອຣຫນ຺ໂຕ, ອິເມ ວາ ອຣຫຕ຺ຕມຄ຺ຄໍ ສມາປນ຺ນາ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ນ ວຓ຺ຓຣູເປນ ນໂຣ ສຸຊາໂນ, ນ ວິສ຺ສເສ ອິຕ຺ຕຣທສ຺ສເນນ;

ສຸສຎ຺ຎຕານຎ຺ຫິ ວິຍຎ຺ຊເນນ, ອສຎ຺ຎຕາ ໂລກມິມໍ ຈຣນ຺ຕິ.

ປຕິຣູປໂກ ມຕ຺ຕິກາກຸຓ຺ຑໂລວ, ໂລຫຑ຺ຒມາໂສວ ສຸວຓ຺ຓຉນ຺ໂນ;

ຈຣນ຺ຕິ ໂລເກ ປຣິວາຣຉນ຺ນາ, ອນ຺ໂຕ ອສຸທ຺ຘາ ພຫິໂສຠມານາ-ຫູ

ປຎ຺ຈຣາຊສຸຕ຺ຕ

ປຸຈ຺ຉາ – ປຎ຺ຈຣາຊສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຣາຊານໍເຍວ ປເສນທິໍ ໂກສລໍ ອາຣພ຺ຠ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ຠຄວນ຺ຕໍ ເອຕທໂວຈ ‘‘ກິໍ ນຸ ໂຂ ຠນ຺ເຕ ກາມານໍ ອຄ຺ຄ’’ນ຺ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ມນາປປຣິຍນ຺ຕໍ ຂ຺ວາຫໍ ມຫາຣາຊ ປຎ຺ຈສຸ ກາມຄຸເຓສຸ ອຄ຺ຄນ຺ຕິ ວທາມີ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ອິຘ ຠນ຺ເຕ ອມ຺ຫາກໍ ປຎ຺ຈນ຺ນໍ ຣາຊູນໍ ປຎ຺ຈຫິ ກາມຄຸເຓຫິ ສມປ຺ປິຕານໍ ສມງ຺ຄີຠູຕານໍ ປຣິຈາຣຍມານານໍ ອຍມນ຺ຕຣາກຖາ ອຸທປາທິໍ ‘ກິໍ ນຸ ໂຂ ກາມານໍ ອຄ຺ຄ’ນ຺ຕິ–

ປທຸມໍ ຍຖາ ໂກກນທໍ ສຸຄນ຺ຘໍ, ປາໂຕ ສິຍາ ຜຸລ຺ລມວີຕຄນ຺ຘໍ. ອງ຺ຄີຣສໍ ປສ຺ສ ວິໂຣຈມານໍ, ຕປນ຺ຕມາທິຈ຺ຈມິວນ຺ຕລິກ຺ເຂ–

ທຸຕິຍອປຸຕ຺ຕກສຸຕ຺ຕ

ປຸຈ຺ຉາ – ທຸຕິຍອປຸຕ຺ຕກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຣາຊານໍເຍວ ປເສນທິໍ ໂກສລໍ ອາຣພ຺ຠ ຠາສິຕໍ. ຣາຊາ ຠນ຺ເຕ ປເສນທິ ໂກສໂລ ຠຄວນ຺ຕໍ ອຸປສງ຺ກມິຕ຺ວາ ‘‘ອິຘ ຠນ຺ເຕ ສາວຕ຺ຖິຍໍ ເສຏ຺ຐິ ຄຫປຕິ ກາລງ຺ກໂຕ, ຕມຫໍ ອປຸຕ຺ຕກໍ ສາປເຕຍ຺ຍໍ ຣາຊນ຺ເຕປຸຣໍ ອຕິຫຣິຕ຺ວາ ອາຄຈ຺ຉາມີ’’ຕິ ເອວມາທິກໍ ວຈນໍ ອໂວຈ. ຠຄວາ ຈ ຠນ຺ເຕ ‘‘ເອວເມຕໍ ມຫາຣາຊ, ເອວເມຕໍ ມຫາຣາຊ, ຠູຕປຸພ຺ພໍ ໂສ ມຫາຣາຊ ເສຏ຺ຐິ ຄຫປຕິ ຕຄ຺ຄຣສິຂິໍ ນາມ ປຈ຺ເຈກສມ຺ພຸທ຺ຘໍ ປິຓ຺ຑປາເຕນ ປຏິປາເທສີ’’ຕິ ເອວມາທິນາ ຕສ຺ສ ເສຏ຺ຐິສ຺ສ ຄຫປຕິສ຺ສ ອຕີຕໍ ວຕ຺ຖຸໍ ອາຫຣິຕ຺ວາ ປຣິໂຍສາເນ ຈຕູຫິ ຄາຖາຫິ ຠາສິຕໍ.

ຘຎ຺ຎໍ ຘນໍ ຣຊຕໍ ຊາຕຣູປໍ, ປຣິຄ຺ຄຫໍ ວາປິ ຍທຕ຺ຖິ ກິຎ຺ຈິ,

ທາສາ ກມ຺ມກຣາ ເປສ຺ສາ, ເຍ ຈສ຺ສ ອນຸຊີວິໂນ.

ສພ຺ພໍ ນາທາຍ ຄນ຺ຕພ຺ພໍ, ສພ຺ພໍ ນິກ຺ຂິປ຺ປຄາມິນໍ;

ຍຎ຺ຈ ກໂຣຕິ ກາເຍນ, ວາຈາຍ ອຸທເຈຕສາ.

ຕຎ຺ຫິ ຕສ຺ສ ສກໍ ໂຫຕິ, ຕໍວ ອາທາຍ ຄຈ຺ຉຕິ;

ຕໍວສ຺ສ ອນຸຄໍ ໂຫຕິ, ຉາຍາວ ອນປາຍິນີ.

ຕສ຺ມາ ກເຣຍ຺ຍ ກລ຺ຍາຓໍ, ນິຈຍໍ ສມ຺ປຣາຍິກໍ;

ປຸຎ຺ຎານິ ປຣໂລກສ຺ມິໍ, ປຕິຏ຺ຐາ ໂຫນ຺ຕິ ປາຓິນໍ –