ເທວຕາສໍຍຸຕ຺ຕ

ໂອຆຕຣຓສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ໂອຆຕຣຓສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ເທວຕໍ ອາຣພ຺ຠ ຠາສິຕໍ, ອຎ຺ຎຕຣາ ຠນ຺ເຕ ເທວຕາ ອຠິກ຺ກນ຺ຕາຍ ຣຕ຺ຕິຍາ ອຠິກ຺ກນ຺ຕວຓ຺ຓາ ເກວລກປ຺ປໍ ເຊຕວນໍ ໂອຠາເສຕ຺ວາ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ, ເອກມນ຺ຕໍ ຐິຕາ ໂຂ ສາ ເທວຕາ ຠຄວນ຺ຕໍ ເອຕທໂວຈ ‘‘ກຖໍ ນຸ ຕ຺ວໍ ມາຣິສ ໂອຆມຕຣີ’’ຕິ,

ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ອປຕິຏ຺ຐໍ ຂ຺ວາຫໍ ອາວຸໂສ ອນາຍູຫໍ ໂອຆມຕຣິໍ’’ຕິ, ເອວໍ ໂຂ ຠນ຺ເຕ ຠຄວຕາ ຠາສິຕໍ.

ອຈ຺ເຈນ຺ຕິສຸຕ຺ຕ

ປຸຈ຺ຉາ – ອຈ຺ເຈນ຺ຕິສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ເທວຕໍ ອາຣພ຺ຠ ຠາສິຕໍ. ອຎ຺ຎຕຣາ ຠນ຺ເຕ ເທວຕາ ຠຄວນ຺ຕໍ ເອຕທໂວຈ–

‘‘ອຈ຺ເຈນ຺ຕິ ກາລາ ຕຣຍນ຺ຕິ ຣຕ຺ຕິໂຍ,

ວໂຍຄຸຓາ ອນຸປຸພ຺ພໍ ຊຫນ຺ຕິ,

ເອຕໍ ຠຍໍ ມຣເຓ ເປກ຺ຂມາໂນ,

ປຸຎ຺ຎານິ ກຍິຣາຖ ສຸຂາວຫານີ’’ຕິ–

ຕສ຺ມິໍ ຠນ຺ເຕ ວຕ຺ຖຸສ຺ມິໍ –

‘‘ອຈ຺ເຈນ຺ຕິ ກາລາ ຕຣຍນ຺ຕິ ຣຕ຺ຕິໂຍ,

ວໂຍຄຸຓາ ອນຸປຸພ຺ພໍ ຊຫນ຺ຕິ,

ເອຕໍ ຠຍໍ ມຣເຓ ເປກ຺ຂມາໂນ,

ໂລກາມິສໍ ປຊເຫ ສນ຺ຕິເປກ຺ໂຂ’’ຕິ –

ເອວໍ ໂຂ ຠນ຺ເຕ ຠຄວຕາ ຠາສິຕໍ.

ສຕ຺ຕິສຸຕ຺ຕ

ປຸຈ຺ຉາ – ສຕ຺ຕິສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ເທວຕໍ ອາຣພ຺ຠ ຠາສິຕໍ, ອຎ຺ຎຕຣາ ຠນ຺ເຕ ເທວຕາ ຠຄວນ຺ຕໍ ເອຕທໂວຈ–

‘‘ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ;

ກາມຣາຄປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ’’ຕິ–

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

ສຕ຺ຕິຍາ ວິຍ ໂອມຏ຺ໂຐ ຑຍ຺ຫມາໂນວ ມຕ຺ຖເກ;

ສກ຺ກາຍທິຏ຺ຐິປ຺ປຫານາຍ, ສໂຕ ຠິກ຺ຂຸ ປຣິພ຺ພເຊຕິ;

ເອວໍ ໂຂ ຠນ຺ເຕ ຠຄວຕາ ຠາສິຕໍ.

ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ;

ກາມຣາຄປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ –

ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ,

ສກ຺ກາຍທິຏ຺ຐິປ຺ປມານາຍ, ສໂຕ ຠິກ຺ຂຸ ປຣິພ຺ພເຊ –

ຊຏາສຸຕ຺ຕ

ປຸຈ຺ຉາ – ຊຏາສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ເທວຕໍ ອາຣພ຺ຠ ຠາສິຕໍ, ອຎ຺ຎຕຣາ ຠນ຺ເຕ ເທວຕາ ຠວຄນ຺ຕໍ ເອຕທໂວຈ–

‘‘ອນ຺ໂຕ ຊຏາ ພຫິຊຏາ, ຊຏາຍ ຊຏິຕາ ປຊາ;

ຕໍ ຕໍ ໂຄຕມ ປຸຈ຺ຉາມິ, ໂກ ອິມໍ ວິຊຏເຍ ຊຏ’’ນ຺ຕິ–

ຕສ຺ມິໍ ຠນ຺ເຕ ວຕ຺ຖຸສ຺ມິໍ –

ສີເລ ປຕິຏ຺ຐາຍ ນໂຣ ສປຎ຺ໂຎ, ຈິຕ຺ຕໍ ປຎ຺ຎຎ຺ຈ ຠາວຍໍ;

ອາຕາປີ ນິປໂກ ຠິກ຺ຂຸ, ໂສ ອິມໍ ວິຊຏເຍ ຊຏໍ.

ເຍສໍ ຣາໂຄ ຈ ໂທໂສ ຈ, ອວິຊ຺ຊາ ຈ ວິຣາຊິຕາ;

ຂີຓາສວາ ອຣຫນ຺ໂຕ, ເຕສໍ ວິຊຏິຕາ ຊຏາຕິ;

ເອວມາທິນາ ຠນ຺ເຕ ຠຄວຕາ ຠາສິຕໍ.

ສີເລ ປຕິຏ຺ຐາຍ ນໂຣ ສປຎ຺ໂຎ, ຈິຕ຺ຕໍ ປຎ຺ຎຎ຺ຈ ຠາວຍໍ;

ອາຕາປີ ນິປໂກ ຠິກ຺ຂຸ, ໂສ ອິມໍ ວິຊຏເຍ ຊຏໍ–

ເຍສໍ ຣາໂຄ ຈ ໂທໂສ ຈ, ອວິຊ຺ຊາ ຈ ວິຣາຊິຕາ;

ຂີຓາສວາ ອຣຫນ຺ໂຕ, ເຕສໍ ວິຊຏິຕາ ຊຏາ–

ຍຕ຺ຖ ນາມຎ຺ຈ ຣູປຎ຺ຈ, ອເສສໍ ອຸປຣຸຊ຺ຌຕິ;

ປຏິຆໍ ຣູປສຎ຺ຎາ ຈ, ເອຕ຺ເຖສາ ຉິຊ຺ຊເຕ ຊຏາ.

ອຈ຺ຉຣາສຸຕ຺ຕ

ປຸຈ຺ຉາ – ອຈ຺ຉຣາສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ເທວປຸຕ຺ຕໍ ອາຣພ຺ຠ ຠາສິຕໍ. ອຎ຺ຎຕໂຣ ຠນ຺ເຕ ເທວປຸຕ຺ໂຕ ຠຄວນ຺ຕໍ ເອຕທໂວຈ–

‘‘ອຈ຺ຉຣາຄຓສງ຺ຆຏ຺ຐໍ, ປິສາຈ ຄຓເສວິຕໍ;

ວນນ຺ຕໍ ໂມຫນໍ ນາມ, ກຖໍ ຍາຕ຺ຣາ ຠວິສ຺ສຕີ’’ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ອຸຊຸໂກ ນາມ ໂສ ມຄ຺ໂຄ, ອຠຍາ ນາມ ສາ ທິສາ,

ຣໂຖ ອກູຊໂນ ນາມ, ຘມ຺ມຈກ຺ເກຫິ ສໍຍຸໂຕ.

ຫິຣີ ຕສ຺ສ ອປາລມ຺ໂພ, ສຕ຺ຍສ຺ສ ປຣິວາຣຓໍ;

ຘມ຺ມາຫໍ ສາຣຖິໍ ພ຺ຣູມິ, ສມ຺ມາທິຏ຺ຐິ ປຸເຣຊວໍ.

ຍສ຺ສ ເອຕາທິສໍ ຍານໍ, ອິຕ຺ຖິຍາ ປຸຣິສສ຺ສ ວາ;

ສ ເວ ເອເຕນ ຍາເນນ, ນິພ຺ພານສ຺ເສວ ສນ຺ຕິເກ’’ຕິ.

ເອວໍ ໂຂ ຠນ຺ເຕ ຠຄວຕາ ຠາສິຕໍ.

ອຈ຺ຉຣາຄຓສງ຺ຆຸຏ຺ຐໍ, ປິສາຈຄຓເສວິຕໍ;

ວນນ຺ຕໍ ໂມຫນໍ ນາມ, ກຖໍ ຍາຕ຺ຣາ ຠວິສ຺ສຕິ–

ຊຣາສຸຕ຺ຕ

ປຸຈ຺ຉາ – ຊຣາສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕຣໍ ເທວຕໍ ອາຣພ຺ຠ ຠາສິຕໍ. ອຎ຺ຎຕຣາ ຠນ຺ເຕ ເທວຕາ ຠຄວນ຺ຕໍ ເອຕທໂວຈ–

‘‘ກິໍ ສຸ ຍາວ ຊຣາ ສາຘຸ, ກິໍ ສຸ ສາຘຸ ປຕິຏ຺ຐິຕໍ;

ກິໍ ສຸ ນຣານໍ ຣຕນໍ, ກິໍ ສຸ ໂຈເຣຫິ ທູຫຣ’’ນ຺ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ສີລໍ ຍາວ ຊຣາ ສາຘຸ, ສທ຺ຘາ ສາຘຸ ປຕິຏ຺ຐິຕາ;

ປຎ຺ຎາ ນຣານໍ ຣຕນໍ, ປຸຎ຺ຎໍ ໂຈເຣຫິ ທູຫຣ’’ນ຺ຕິ.

ເອວໍ ໂຂ ຠນ຺ເຕ ຠຄວຕາ ຠາສິຕໍ.

ກິໍ ສຸ ຍາວ ຊຣາ ສາຘຸ.

ກິໍ ສຸ ສາຘຸ ປຕິຏ຺ຐິຕໍ.

ກິໍ ສຸ ນຣານໍ ຣຕນໍ.

ກິໍ ສຸ ໂຈເຣຫິ ທູຫຣໍ.